இந்து மத உரையாடல்கள்- சம்வாதங்களின் சுருக்கம் (POST.4707)

Krishna in Rangoli, picture posted by A K R Srinivasan

Date: 6 FEBRUARY 2018

 

Time uploaded in London- 7-53 am

 

WRITTEN  by S NAGARAJAN

 

Post No. 4707

 

Pictures shown here are taken from various sources such as Facebook friends, Books, Google and newspapers; thanks. Pictures may not be related to the story. They are only representational.

 

ஆன்மீக மாத இதழான ஞான ஆலயம் பிப்ரவரி 2018 இதழில் வெளியான எந்தக் கேள்விக்கும் இதோ விடை என்ற கட்டுரையில் சம்வாதங்களைப் பற்றிப் படித்தோம். சில சம்வாதங்களைப் பற்றிய கட்டுரை இது.

 

 

சில சம்வாதங்களின் சுருக்கம்

ச.நாகராஜன்

Garuda Vahana

1

சம்வாதம் என்றால் என்ன என்பதை அறிய மாதிரிக்காக சில சம்வாதங்களின் சுருக்கம் கீழே தரப்படுகிறது. உரிய நூல்களில் மூல ஸ்லோகங்களைப் படித்தால் அபூர்வ உண்மைகள் தெரிய வரும். படிக்கும் போது நிதானத்துடனும் பொறுமையுடனும் சற்று ஆழ்ந்த விசாரத்தின் அடிப்படையில் படித்தால் நிறைய பலன் கிடைக்கும்.

 

 

பாகவதத்தில் வரும் ஒரு சம்வாதத்தின் சுருக்கம்:

நைமிசாரண்யத்தில் முனிவர்களுக்கிடையே நடந்த அற்புதமான உரையாடல் இது.

 

 

1) ஒவ்வொருவருக்கும் மிகச் சிறந்த, அதற்கு மேம்பட்ட ஒன்றில்லாத நன்மை எது?

 

மிகச் சிறந்த மேம்பட்ட நன்மை ஒவ்வொருவருக்கும் இது தான்:

எப்போதும் இறைவனின் மீது தூய அன்பைக் கொண்டிருப்பது தான்.

 

 

எப்போதும் தொடர்ந்து இறைவனின் புகழைக் கேட்பது (பிரவசனம், கதா உபந்யாசம் , அறவோர் உரை கேட்பது), இறைவனைத் தொடர்ந்து ஞாபகத்தில் இருத்தி வைத்துக் கொள்வது. அவனைத் தொழுவது ஆகியவையே இந்த தூய அன்பிற்கான வழிகள்!

 

 

2) சாஸ்திரங்களின் சாரம் என்ன?

தனது ஒவ்வொரு செயலாலும் கிருஷ்ண பகவானை மகிழச் செய்வது என்பது தான் அனைத்து சாஸ்திரங்களின் சாரம்.

 

 

3) ஏன் பகவான், தானே ஸ்ரீ கிருஷ்ணராக பூவுலகில் அவதரித்தார்?

 

உயிர் வாழ்கின்ற அனைவருக்கும் தன் உண்மையான ஸ்வரூபத்தைக் காட்டியும். லீலைகளை நிகழ்த்தியும் அவர்களைக் கவர்ந்து தன் பக்கம் இழுத்து அவர்கள் அனைவரையும் தனது சொந்த இருப்பிடமான கோலோகத்திற்கு அழைத்துச் செல்வதற்குத் தான் அவரே நேரில் வந்தார்.

 

 

4) கிருஷ்ண லீலைகள் யாவை?

தேவகியின் மகனாகப் பிறந்தார். நந்தனின் வீட்டில் வளர்ந்தார். பூதனா, கம்ஸன் உள்ளிட்ட பல தீயோரை அழித்தார். நல்லவர்களான பாண்டவருக்கு சகாயமாக அவர்கள் பக்கம் உறுதுணையாக இருந்தார்.மஹாபாரதப் போரில் அறத்தை நிலைநிறுத்தி துஷ்டர்களை அழித்து அவர்களுக்கு உதவினார். இவையும் இன்னும் பலவும் கிருஷ்ணனின் லீலைகள்!

Krishna Bhajan (post by Cuddalore Gopi Bhagavathar)

 

5) இறைவனின்ப் பத்து அவதாரங்களின் நோக்கம் என்ன?

  1. வேதங்களைக் காக்க மச்சாவதாரம்
  2. மந்தார மலையை நிலை நிறுத்த கூர்மாவதாரம்
  3. உலகைத் தூக்கி நிறுத்த வராஹ அவதாரம்
  4. ஹிரண்யகசிபுவை வதம் செய்ய நரசிங்க அவதாரம்
  5. பலி மஹராஜனுக்கு அருள் புரிய வாமன அவதாரம்
  6. தீய மன்னர்களை அழிக்க பரசுராம அவதாரம்
  7. இராவணனை வதம் செய்ய ராமாவதாரம்
  8. அசுரர்களை அழிக்க பலராம அவதாரம்
  9. மிருக பலியைத் தடுக்க புத்தாவதாரம்
  10. கொள்ளையடிப்போரை ஒழிக்க கல்கி அவதாரம்

இவையே அவதார நோக்கங்கள்.

 

 

 

6) ஸ்ரீ கிருஷ்ணர் இந்த உலகை விட்டுச் சென்ற பிறகு தர்மம் யாரைத் தஞ்சம் புகுந்தது?

தர்மம் அனைத்தும் ஸ்ரீமத் பாகவத புராணத்தில் புகுந்து தஞ்சம் அடைந்தது.

 

 

குறிப்பு: – ரிஷிகளின் பெரும்பாலான உரையாடல்கள் நைமிசாரண்யத்தில் ஏன் இடம் பெற்றன. நைமிசாரண்யத்தையே தவம் புரியத் தக்க இடமாக பல ரிஷிகள் தேர்ந்தெடுத்தது ஏன் என்பதை அறிய இந்தக் கட்டுரையாசிரியர் டிசம்பர் 2012 ஞான ஆலயம் இதழில் எழுதியுள்ள ‘கேள்விகளுக்கு விடை தரும் புராணங்கள்’ என்ற கட்டுரையைப் படிக்கவும். (ஞான ஆலயம் இதழ்களை பைண்ட் செய்து வைத்துக் கொண்டால் உங்களுக்கும் உங்கள் சந்ததியினருக்கும் பயனுள்ளதாக அமையும்.)

 

2

யோக வாசிஷ்டம் ராமருக்கும் வசிஷ்டருக்கும் இடையே நடந்த அற்புதமான உரையாடல். உலகின் வெகு சில நூல்கள் மட்டுமே இதற்கு இணையாக இருக்க முடியும்.

32000 ஸ்லோகங்கள்! உலகின் தற்கால அறிஞர்கள் 158 பேர்கள் கூறிய அனைத்து அபூர்வ விஷயங்களையும் வெகு காலத்திற்கு முன்பேயே இந்த நூலில் தெரிவிக்கப்பட்டு உள்ளது.

இந்த நூலில் வரும் அற்புத விஷயங்களில் ஒரு பானைச் சோற்றுக்கு ஒரு சோறு பதம் என்பது போல இதோ சில ஸ்லோகங்களின் கருத்துக்கள்.

 

நீண்ட காலம் வியாதியின்றி ஜீவிப்பதற்கான வழியைச் சுட்டிக் காட்டும் ஸ்லோகங்கள் இவை:-

 

உடலைப் பாதிக்கும் வியாதிகள், மற்றவர்கள் இடும் சாபங்கள், மற்றவர்களின் தீய திருஷ்டிகள் ஆகிய அனைத்தும் தாமரை மலர் எப்படி  ஒரு பாறாங்கல்லை மோதி உடைக்க முடியாதோ அது போல மனத்தைப் பக்குவப்படுத்திய ஒருவனுக்கு ஒரு தீங்கும் விளைவிக்க முடியாது.

 

 

நான் விரும்பும் அல்லது விரும்பாத வஸ்துக்களினால் ஏற்படும் கவலைகளைப் பற்றிய விசாரத்தில் ஈடுபட்டு அவற்றை விடுத்து என்னை ஆத்மாவிலேயே நிலை நிறுத்துகிறேன். அதனால் நான நீண்ட காலம் வியாதி இல்லாமல் ஜீவிக்கிறேன்.

 

“இது இன்று எனக்குக் கிடைத்திருக்கிறது. இந்த அழகிய வஸ்து வேண்டும்” என்பன போன்ற சிந்தனைகள் எனக்கு இல்லை. அதனால் தான் நான் நீண்ட காலம் வியாதி இல்லாமல் ஜீவிக்கிறேன்.

 

 

அலை பாயாமல் என் மனம் ஒருமுனைப்பட்டு இருக்கிறது. துன்பம் இல்லாமல் ஆன்மாவில் நிலை நிறுத்தப்பட்டுள்ளது. ஆகவே நான் வியாதியின்றி இருக்கிறேன்.

Rama Pattabishekam, Kalakshetra, Chennai

 

இன்று எனக்கு என்ன நடந்தது? நாளை என்ன நடக்கப் போகிறது? இப்படிப்பட்ட கவலைகள் எனக்கு இல்லை. ஆகவே நான் வியாதியின்றி இருக்கிறேன்.

 

முதுமை பற்றியும் சாவு பற்றியும் எனக்கு பயமில்லை. ஒரு பெரிய சாம்ராஜ்யமே கிடைத்தாலும் எனக்கு சந்தோஷம் இல்லை. ஆகவே நான் வியாதியின்றி இருக்கிறேன்.

 

இவர் எனக்கு உறவினர். அவன் எனக்கு அந்நியன். இது என்னுடையது. அது அவனுடையது என்று இப்படி நான் உணர்வதில்லை.ஆகவே நான் வியாதியின்றி இருக்கிறேன்.

 

 

எடுப்பது, வைப்பது, எழுந்திருப்பது, மூச்சு விடுவது, தூங்குவது  ஆகியவற்றைச் செய்யும் இந்த உடல் என்று என்னை நான் உணர்வதில்லை. ஆகவே நான் வியாதியின்றி இருக்கிறேன்.

 

அலைபாயாத மனோ சக்தியுடன் அழகிய அன்பான களங்கமற்ற பார்வையுடன் எல்லாவற்றையும் நேர்பட நான் காண்கிறேன்.ஆகவே நான் வியாதியின்றி இருக்கிறேன்.

 

மிகவும் சக்தி வாய்ந்தவனாக நான் இருந்தாலும் கூட வலிமையை எங்கும் பிரயோகிப்பதில்லை. எந்த மனச்சோர்வும் எனக்கு இல்லை. ஏழையாக இருந்தாலும் எனக்கு ஆசை இல்லை.

 

 

அழிகின்ற, உடைந்த, தளர்ந்திருக்கின்ற, சக்தியற்ற, குழம்பியிருக்கின்ற, நசுக்கப்பட்டிருக்கின்ற எதையும் நான் புதியதாகவே பார்க்கிறேன். ஆகவே நான் வியாதியின்றி இருக்கிறேன்.

 

எனக்கு ஒத்துப்போகின்றவையுடன் எனக்கு சந்தோஷம்.  ஒரு மனிதன் கஷ்டப்படும்போது நான் வருத்தமுறுகிறேன். அனைவருக்கும் நான் நண்பன். ஆகவே நான் வியாதியின்றி இருக்கிறேன்.

 

 

துரதிர்ஷ்டம் பீடித்திருக்கும் காலத்தில் நான் தைரியத்துடனும் அயராமலும் இருக்கிறேன். அதிர்ஷ்டம் கூடியிருக்கும் வளமான காலத்திலோ எல்லோருக்கும் நான் நண்பன். நான் இருப்பதும் இல்லை; இல்லாமல் போவதும் இல்லை. ஆகவே நான் வியாதியின்றி இருக்கிறேன்.

 

மேலே கண்ட ஸ்லோகங்களுக்குப் பொருந்துகின்ற வகையில் யாராவது வாழ முடியுமா?

முடியும்.

 

நமது காலத்திலேயே இதற்கு இலக்கணமாகவும் இதற்கு மேலும் ஜீவன்முக்தராக வாழ்ந்ததற்கு இலக்கணமாகவும் திகழ்ந்தவர் ரமண மஹரிஷி!

 

Ramana Maharishi

 

3

ச்ரேயஸ் எனப்படும் உன்னதமான  மேலாம் நிலையை அடைவது எப்படி என்று நாரத மஹரிஷி காலவரைக் கேட்க அவர் ச்ரேயஸுக்கான காரணங்களை விவரிக்கிறார்.

மஹாபாரதத்தில் சாந்தி பர்வத்தில் வரும் இந்த சம்வாதத்தின்

சுருக்கம்:

 

 

பாவ கர்மங்களை விலக்குவது, எப்போதும் புண்ய கர்மங்களைச் செய்து கொண்டிருப்பது, நல்லோர்களுடைய சகவாசம் ஆகியவை ச்ரேயஸ் அடைவதற்கான காரணம்.

 

எல்லா பிராணிகளிடத்திலும் மிருதுவாக இருத்தல், உலக விவகாரங்களில் நேர்மையாக இருத்தல், இனிமையான சொல் ஆகியவை சந்தேகத்திற்கு இடமின்றி ச்ரேயஸை அடைய வைக்கும்.

 

தேவதைகளுக்கும், பித்ருக்களுக்கும், வந்திருக்கும் விருந்தினர்களுக்கும் கொடுக்க வேண்டியதைக் கொடுப்பதும், வேலைக்காரர்களைக் கை விடாமல் இருப்பதும் ச்ரேயஸுக்கான காரணங்கள்.

 

 

 

சத்தியத்தைச் சொல்வது ச்ரேயஸ்.

 

அகங்காரத்தைத்  தள்ளுவதும், அஜாக்கிரதையை விலக்குவதும்,  சந்தோஷமாக இருப்பதும், ஒரே விதமாக நடப்பதும் ச்ரேயஸுக்கான காரணங்கள்.

 

 

இரவில் சஞ்சரிப்பது கூடாது.பகலில் தூங்கக் கூடாது.

 

சோம்பலையும், புறங் கூறுவதையும்,மதத்தையும் விடுதல் வேண்டும். உணவு உட்கொள்வதில் மிதமாக இருத்தல் வேண்டும்.

 

பிறரை தூஷித்து நமக்கு மேன்மையைத் தேடிக் கொள்ளக் கூடாது. தனது சொந்த குணங்களினாலேயே விசேஷமான மேன்மையைத் தேட வேண்டும்.

 

புத்திமானானாவன் தெரிந்தவன் தான் என்றாலும் ஒருவனுக்கு அவன் கேளாமல் எதையும் சொல்லக் கூடாது. நியாய விரோதமாய்க் கேட்கிறவனுக்கும் சொல்லக் கூடாது.

 

 

கர்மத்தை தினமும் செய்பவர்கள்,நல்லவர்கள்,பிறருக்குக் கொடுப்பவர்கள், தங்களது தர்மங்களில் பற்றுள்ளவர்கள் ஆகியோரது சேர்க்கையை விரும்ப வேண்டும்.

 

எந்த ராஜ்யத்தில் துஷ்டர்களுக்கு தண்டனையும் நல்லவர்களுக்கு மதிப்பும் மரியாதையும் தரப்படுகிறதோ அங்கு வசிக்க வேண்டும்.

இவை அனைத்தும் ச்ரேயஸ் அடைவதற்கான காரணங்களாகும்.

 

 

தேவரிஷியான நாரதருக்கும் காலவருக்கும் இடையே நடந்த இந்த அர்த்தமுள்ள உரையாடல் எந்தக் காலத்திற்கும் எல்லோருக்கும் பொருத்தமானது!

***

Draupadi, Picture by Lalgudi Veda

 

4

சத்யபாமாவும் திரௌபதியும் நடத்திய சம்வாதம் பற்றி இந்தக் கட்டுரையாசிரியர் 2007 ஜூலை ஞான ஆலயம் இதழில் ‘பாஞ்சாலி சொன்ன தாம்பத்ய ரகசியம்’ என்ற கட்டுரையில் விளக்கியுள்ளார். ஆகவே அதைப் படித்தால் இந்த சம்வாதம் பற்றித் தெரிந்து கொள்ளலாம்.

 

ஏராளமான சம்வாதங்களைத் தனியே எடுத்துப் படித்தால் யாருமே சுலபத்தில் அறிய முடியாத பல இரகசிய விஷயங்களை நாம் அறியலாம்!

*****

 

 

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: