கண் திருஷ்டியும் அறிவியலும்! – 1(Post No.5024)

Written by S NAGARAJAN

 

Date: 19 MAY 2018

 

Time uploaded in London –  5-35 AM   (British Summer Time)

 

Post No. 5024

 

Pictures shown here are taken from various sources such as Facebook friends, Books, Google and newspapers; thanks. Pictures may be subject to copyright laws.

 

 

18-5-18 பாக்யா வார இதழில் அறிவியல் துளிகள் தொடரில் வெளியாகியுள்ள (எட்டாம் ஆண்டு பதினொன்றாம்) கட்டுரை

 

கண் திருஷ்டியும் அறிவியலும்! – 1

.நாகராஜன்

உலகில் கண் திருஷ்டிக்குப் பயப்படாதவர்கள் இல்லை.

நாடகம் முடிந்தாலும் சரி, பெரிய விழா முடிந்தாலும் சரி திருஷ்டி கழிப்பது வழக்கமாகி விட்டது.உடனடியாக திருஷ்டி கழித்துப் போட்டு விட்டுத் தான் மறு வேலை பார்ப்பார்கள்.

சில பேருடைய பார்வை பட்டாலேயே போதும் திருஷ்டிக்கு உள்ளானவர் பல விதத்திலும் பாதிக்கப்படுவர், ஏன், சில சமயம் உயிருக்கே ஆபத்து ஏற்படுவதுண்டு!

தி ஈவில் ஐ –  எ கேஸ் புக் என்று ஆலன் டுண்டஸ் (The Evil Eye : A casebook – Alan Dundes) இது பற்றிப் பெரிய ஆராய்ச்சி நூலையே எழுதியுள்ளார்.

பார்த்த பார்வையில் புதுச் சட்டை கிழியும்; பால் புளித்துப் போகும், பார்த்த பார்வையில் பல நாட்களுக்குச் சாப்பிடவே பிடிக்காது. வாந்தி எடுக்கும் – இப்படி கெட்ட திருஷ்டியின் “மஹிமையை”ச் சொல்லிக் கொண்டே போகலாம்.

திருஷ்டி பற்றிக் கவலைப்படாத நாகரிகமே இல்லை; நாடே இல்லை; மக்களே இல்லை!

ஒவ்வொரு நாட்டிலும் இதற்குத் தனிப் பெயர் உண்டு.

சுவாரசியமான அந்தப் பெயர் பட்டியலை அப்படியே கீழே காணலாம்:

ஜெர்மனியில் இதற்குப் பெயர் போஸ் ப்ளிக் (Bose Blick)

ஹாலந்தில் இதற்குப் பெயர் பூஸ் ப்ளிக   (boose Blick)

போலந்தில் இதற்குப் பெயர் டே ஒகோ   (Zte Oko)

இத்தாலியில் இதற்குப் பெயர் மால் ஓச்சியோ  (Mal Occhio)

சார்டினாவில் இதற்குப் பெயர் ஒகு மாலு   (Ogu Malu)

கோர்ஸிகாவில் இதற்குப் பெயர் இன்னோச்சியாடுரா   (Innochiatura)

ஸ்பெயினில் இதற்குப் பெயர் மால் டி ஓஜோ   (Mal De Ojo)

பிரான்ஸில் இதற்குப் பெயர் மௌவாயிஸ் செய்ல்  (Mauvais Ceil)

நார்வேயில் இதற்குப் பெயர் ஸ்கோயர் டுஞ்ஜ்   (Skjoertunge)

டென்மார்க்கில் இதற்குப் பெயர் ஆண்ட் ஓஜே (Ondt Oje)

இங்கிலாந்தில் இதற்குப் பெயர் ஈவில் ஐ (Evil Eye)

அயர்லாந்திலும் ஸ்காட்லாந்திலும் இதற்குப் பெயர் இல் ஐ   (Ill Eye)

சிரியாவில் இன்று வரை இதற்குப் பெயர் அயினா பிஷா   (Aina Bisha)

பெர்சியாவில் இதற்குப் பெயர் ஆகாஷா  (aghasha)

ஆர்மீனியாவில் இதற்குப் பெயர் படேரெக்   (Paterrak)

இந்தியாவில் இதற்குப் பெயர் கோர சக்ஷு (Goram cakshu)

இப்படி உலகில் எந்த நாட்டை எடுத்துக் கொண்டாலும் கெட்ட திருஷ்டிக்குத் தனிப்  பெயர் உண்டு. அவ்வளவு நம்பிக்கை.

கிரேக்க, ரோமானிய, ஹிந்து நூல்களில் இந்த கண் திருஷ்டி பற்றி நிறையவே சொல்லப்பட்டிருக்கிறது. பைபிளில் ப்ராவெர்ப் 23:6-இல் கெட்ட திருஷ்டி உடையவனிடம் ரொட்டியை வாங்கிச் சாப்பிடாதே; அவனது திருஷ்டி பட்ட உணவையும் விரும்பாதே என்று சொல்லப்பட்டிருக்கிறது.

குரானிலும் ஷேக்ஸ்பியர் நாடகங்களிலும் கண் திருஷ்டி சொல்லப்படுகிறது.

ஹிந்துக்கள் குடும்ப உறுப்பினர்கள் சாப்பிடுவதை வெளியார் யாரும் பார்ப்பதை விரும்புவதில்லை!

கோணல் கண், கண்களில் பல முடிச்சுகள் இருந்தால் அவரைக் கண்டு விலகுவது எல்லோருக்கும் சகஜமான பழக்கம். குறிப்பாக அபாயகரமான தொழில்களான சுரங்கப் பணி, கடலில் மீன் பிடிக்கச் செல்லுதல் போன்றவற்றில் ஈடுபடுவோர் திருஷ்டி பற்றி நன்கு கவனிப்பர்.குறிப்பாகப் பெண்மணிகள் தங்கள் வீட்டு ஆண்கள் வெளியே செல்லும் போதோ அல்லது ஒரு காரியத்தை நன்கு முடித்து விட்டு வந்தாலோ திருஷ்டி பற்றிக் கவனிப்பர். திருஷ்டி சுற்றிப் போடுவர்.

திருஷ்டியிலிருந்து எப்படித் தப்புவது? முதல் வழி அப்படிப்பட்ட ஆள்களைப் பார்க்கவே பார்க்காதே என்பது தான். அடுத்த வழி சில தாயத்துகளை அணிவது தான்.

அரைஞாண் கயிற்றில் ஆரம்பித்து மணிக்கட்டு, புஜத்தின் மேல் பகுதியில் கயிறு கட்டுதல், கழுத்தில் கயிறில் தாயத்தை அணிவது என்று பல ரகங்களில் திருஷ்டியிலிருந்து தன்னைப் பாதுகாக்க ஒவ்வொருவரும் முயல்கின்றனர்.

லத்தீன் அமெரிக்காவில் கண் திருஷ்டிக்கு மால் டி ஓஜோ என்று பெயர். இதை நம்பாதவர்களே அங்கு இல்லை. ப்யூர்டோ ரிகோசில் பிறந்த குழந்தைகளுக்கு அஜாபச்சே (Azabache) என்ற அதிர்ஷ்டத்திற்கான தாயத்து தரப்படுகிறது.

திருஷ்டியை எதிர்கொள்ள சிறப்பான வண்ணம் நீலம் தான். இது  சுவர்க்கம் அல்லது இறைத்தன்மையைக் குறிக்கும். உள்ளிப்பூண்டை சில தேசத்தவர் பயன்படுத்துகின்றனர். உள்ளிப்பூண்டு என்று சொன்னாலேயே திருஷ்டி போய் விடுமாம்.

நமது ஊரில் மிளகாயைப் மரக்கால் படியில் வைத்து திருஷ்டி சுற்றிப் போடுவர். கடல் உப்பை (கல் உப்பு; உப்புப் பொடி அல்ல) வைத்து திருஷ்டி கழிப்பது அன்றாடப் பழக்கம். பூசணிக்காய் பற்றிச் சொல்லவே வேண்டாம்.

சிலருடைய வீடுகளில் எல்லையற்ற துன்பம் நேர்ந்தால் (திடீரென்று கல்லாக விழுதல் போன்றவை) உடனடியாக இந்த திருஷ்டியைப் போக்க அல்லது சாபத்தைப் போக்க மாந்திரீக வழிகளையும் நாடுவர்.

உலகில் தன்னை திருஷ்டியிலிருந்து பாதுகாத்துக் கொள்ளாத பிரபலங்களே இல்லை. அமெரிக்க ஜனாதிபதியாக இருந்த ஒபாமா ஹனுமான் உருவத்தைத் தன்னுடன் எப்போதும் வைத்திருந்த செய்தியை நாம் அறிவோம். பேஷன் மாடலான கிம் கர்டாஷியான் கெட்ட திருஷ்டியைப் போக்கும் ப்ரேஸ்லெட், தலையணி போன்றவற்றை அணிந்து போஸ் கொடுப்பது வழக்கம். ஜிஜி ஹடிட் 2017இல் ‘ஐ லவ் ஷீ லைன்’ -ஐ திருஷ்டியிலிருந்து காத்துக் கொள்வதற்காக அறிமுகப்படுத்தினார்.

பிரபலங்கள் இதற்காகவே அறிமுகப் படுத்தும் கண் அணிகள், நெக்லேஸ், கீ-செய்ன் ஆகியவை சந்தையில் விற்பனையில் சக்கைப்போடு போடுகின்றன.

கிரேக்க நாகரிக இலக்கியத்தில் பொறாமையுடன் பார்க்கப்படும் பார்வை பொல்லாத பார்வை என்று குறிப்பிடப்படுகிறது. ‘பூரி நஜர்’ (தீய பார்வை) என்றும் இது பொதுவாகச் சொல்லப்படுகிறது. திருஷ்டி பற்றி இன்னும் கொஞ்சம் அலசுவோம்.

 

அறிவியல் அறிஞர் வாழ்வில் .. ..

பிரபல இந்திய கணித மேதையான சீனிவாச ராமானுஜனால் உத்வேகம் பெற்ற கணித மேதை ஜப்பானியரான கென் ஓனோ.(Ken Ono). இவருக்கு வயது இப்போது 50.

இவரது தந்தையார் ஒரு கணித மேதை. தாயாரோ படித்து சாதித்தால் தான் உருப்படுவாய் என்று மகனைத் தூண்டிக் கொண்டே இருக்கும் ‘பெண் புலி’.

பிரபல விஞ்ஞானி ஓப்பன்ஹீமரின் அழைப்பின் பேரில் ஜப்பானிலிருந்து அமெரிக்காவிற்கு வந்தார் கென் ஒனோவின் தந்தை.

ஒனோவிற்கு படிப்பில் அவ்வளவாக ஆர்வம் இல்லை. தந்தை, தாயின் எதிர்பார்ப்புக்கு அவரால் 27 வருடங்கள் ஈடு கொடுக்க முடியவில்லை.

ஒருவழியாக கணிதத்தில் தேறி அமெரிக்காவில் ஒரு பேராசிரியராக ஆனார். அப்பொழுது தான் சீனிவாச ராமானுஜனைப் பற்றி அவர் தெரிந்து கொண்டார்.

ஆயிரக்கணக்கான சூத்திரங்களை ராமானுஜன் நோட்புக்குகளில் எழுதி வைத்திருந்தது அவரை பிரமிக்க வைத்தது. அவரைப் பற்றி நன்கு ஆராயலானார்.

அவரது சூத்திரங்களில் ஒன்றை ஒட்டித் தானும் அல்ஜிப்ரெய்க் நம்பர் தியரியில் ஒரு புதிய கண்டுபிடிப்பைக் கண்டுபிடித்தார்.

சீனிவாச ராமானுஜனைப் புகழ்ந்து கொண்டே இருக்கும் ஒனோ அவரைப் பற்றிய திரைப்படமான ‘The Man Who Knew Infinity’ படத்திற்கும் கணித சம்பந்தமான ஆலோசகர் ஆனார். சீனிவாச ராமானுஜனுக்குத் தனது நன்றியைத் தெரிவிக்கும் வகையில் அவரைப் பற்றிய ஒரு நூலையும் அமிர் அஜல் என்பவருடன் இணைந்து எழுதியுள்ளார். அந்த நூலின் பெயர் : My Search for Ramanujan: How I Learned to Count .

படிப்பே பிடிக்காத தானே ராமானுஜனால் உத்வேகம் பெற்று பெரிய கண்டுபிடிப்பைக் கண்டுபிடித்ததால், “ராமானுஜனைப் பற்றி அறியுங்கள்; அவரிடமிருந்து யார் வேண்டுமானாலும் உத்வேகம் பெற்று அவரைப் போல் ஆகலாம்” என்று கென் ஒனோ எல்லோருக்கும் இன்று அறிவுரை கூறி வருகிறார்.

நமது கும்பகோணத்தைச் சேர்ந்த கணித மேதைக்கு இப்போது கடைசியாக வந்துள்ள புகழாரம் கென் ஓனோவினுடையது என்பதில் நமக்குப் பெருமை தானே!

***

 

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

%d bloggers like this: