ஆபரேஷன் ஃபைனல் – ஹாலிவுட் திரைப்படம்! – 2 (Post No.5586)

WRITTEN BY S NAGARAJAN

Date: 25 October 2018

Time uploaded in London – 7-30 AM (British Summer Time)

Post No. 5586

Pictures shown here are taken from various sources including google, Wikipedia, Facebook friends and newspapers. This is a non- commercial blog.

டைரக்டர் திரு கே.பாக்யராஜ் அவர்களை ஆசிரியராகக் கொண்டு வெளிவரும் வார இதழ் பாக்யா. அதில் 19-10-2018 தேதியிட்ட இதழில் அறிவியல் துளிகள் தொடரில் வெளியாகியுள்ள (எட்டாம் ஆண்டு முப்பத்தி மூன்றாம்) கட்டுரை  

ஆபரேஷன் ஃபைனல் – ஹாலிவுட் திரைப்படம்! – 2

ச.நாகராஜன்

இஸ்ரேலின் உளவுப் படையான மொஸாட்டிற்கு எய்ச்மேனை பத்திரமாக இஸ்ரேலுக்குக் கொண்டு செல்வது ஒரு சவாலாகவே இருந்தது. அவருக்கு விமானப் பணியாளரின் உடையை உடுத்தி ஒருவாறாக இஸ்ரேலுக்கு அவர் கொண்டு செல்லப்பட்டார்.

    அர்ஜெண்டினா ஐக்கிய நாடுகள் சபையில் இந்த விவகாரத்தைக் கிளப்பி இஸ்ரேல் செய்தது தவறு என்று முறையிட்டது.

ஆனால் இஸ்ரேலின் சார்பில் ஆஜரான கோல்டா மேயர் தனது வாதத்தினால் அர்ஜெண்டினாவை நன்கு சமாளித்தார்.

    விசாரணை திட்டமிட்டபடி இஸ்ரேலில் துவங்கியது. எய்ச்மேன்  மீது 15 பிரிவுகளில் வழக்கு தொடுக்கப்பட்டது. இந்த பிரம்மாண்டமான விசாரணைக்கு உலகின் மீடியாக்கள் முக்கியத்துவம் தருமாறு இஸ்ரேல் பார்த்துக் கொண்டது. உலகின் அனைத்துப் பத்திரிகைகளும் இதை முதல் பக்கத் தலைப்புச் செய்தியாக வெளியிட்டன. ஜெருசலத்தில் உள்ள பெரிய ஆடிடோரியத்தில் விசாரணை துவங்கியது. அங்கு எய்ச்மேனை யாரும் சுட்டு விடக் கூடாதென்று அவரை புல்லட் ஃப்ரூப் கண்ணாடி பூத்தில் வைத்தனர். அனைத்துப் பத்திரிகையாளர்களும் உள்ளே அனுமதிக்கப்பட்டனர். 750 இருக்கைகள் போடப்பட்டன.

   56 நாட்கள் நடந்த விசாரணையில் 112 சாட்சிகள் விசாரிக்கப்பட்டனர்.எய்ச்மேன் தான் நிரபராதி என்றும் தனக்கு மேலிடம் விதித்த கடமைகளையே தான் செய்ததாகவும் வாதிட்டார்.

     கடைசியில் எய்ச்மேன் மீதான குற்றச்சாட்டுகள் நிரூபிக்கப்படவே அவருக்கு மரண தண்டனை விதிக்கப்பட்டது. அவர் அப்பீல் செய்தார். அங்கும் தண்டனை உறுதிப்படுத்தப்படவே எய்ச்மேனின் மனைவி மற்றும் சகோதரர்கள் இஸ்ரேல் ஜனாதிபதியிடம் கருணை மனு அளித்தனர். ஆனால் அதுவும் நிராகரிக்கப்பட்டது. ரம்லா சிறைச்சாலையில் 1962ஆம் ஆண்டு ஜூன் முதல் தேதி அதிகாலையில் அவர் தூக்கிலிடப்பட்டார்.

    எய்ச்மேனின் கடைசி வார்த்தைகள் : ஜெர்மனி வாழ்க. அர்ஜெண்டினா வாழ்க. ஆஸ்திரியா வாழ்க. இந்த மூன்று நாடுகளுடன் தான் நான் அதிகம் தொடர்பு கொண்டிருந்தேன். அதை மறக்க மாட்டேன். எனது மனைவி, குடும்பத்தினர் மற்றும் நண்பர்களுக்கு எனது வாழ்த்துக்கள். நான் தயார். மற்ற எல்லா மனிதர்களுக்கும் உள்ள விதி போல, மீண்டும் சீக்கிரம் சந்திப்போம். கடவுளை நம்பி நான் சாகிறேன்.

 

     கார்டன் தாமஸ் என்ற எழுத்தாளர், ‘Gideon’s Spies: The Inside Story of Israel’s Legendary Secret Service The Mossad’ என்ற புத்தகத்தில் மொஸாட் பற்றி விரிவாக விளக்கியுள்ளார்.

    அதி நவீன உத்திகளைக் கொண்டு இயங்கும் மொஸாட், கைக்கு அடக்கமான துப்பாக்கி, மிகச் சிறிய வீடியோ கேமராக்கள் உள்ளிட்ட பல நுட்பமான சாதனங்களைக் கொண்டுள்ளது.

அப்படிப்பட்ட உத்திகளும் சாதனங்களையும் கொண்டே எய்ச்மேனும் பிடிக்கப்பட்டார் என்பது குறிப்பிடத்தகுந்தது.

      நீண்ட ஒரு சம்பவக் கோர்வையைக் கொண்டு சோகமாக முடிந்த ஒருவரின் வாழ்க்கையை திரைப்படமாக்குவது என்றால் அதில் நிறையவே சிக்கல் உள்ளது. அதை ஆபரேஷன் பைனல் டைரக்டரும் நடிகர்களும் உணர்ந்திருந்தனர். உளவுப்படை அதிகாரியான மால்கினும் எய்ச்மேனும் ஒருவருக்கொருவர் மோதும் காட்சிகள் அற்புதமாகப் படமாக்கப்பட்டுள்ளன. இஸ்ரேலின் சட்ட விதிகளின் படி குற்றம் சாட்டப்பட்ட ஒருவரின் கையெழுத்து இருந்தால் தான் அவர் விசாரிக்கப்பட முடியும். மால்கின்  எய்ச்மேனை சித்திரவதை செய்யாமல், மூன்றாம் தர வழிகளைக் கையாளாமல் அவரது கையெழுத்தைப் பெறுகிறார். மால்கினின் சொந்த சகோதரியும் குழந்தைகளும் எய்ச்மேனின் கொடூர பலிக்கு இரையானவர்கள். ஆகவே சொந்த இழப்பில் மால்கின் மிக உணர்ச்சிகரமாக இதில் இறங்கினார். இந்தக் காட்சிகள் படத்திற்கு ஒரு உணர்ச்சிகரமான, உளவியல் ரீதியான அணுகுமுறை இருப்பதைக் காட்டின.

   ஒவ்வொரு காட்சியும் காட்சியில் வரும் வசனமும் பல முறை சரி பார்க்கப்பட்டன. அவ்னர் அவ்ரஹாம் என்ற மொஸாட் ஏஜண்ட் இந்த சரிபார்க்கும் பணிக்காகவே  நியமிக்கப்பட்டார்.

படத்தை சரியாக எடுப்பதற்காக டைரக்டர் வெய்ட்ஸ் அர்ஜெண்டினாவிற்கு தன் குடும்பத்துடன் சென்று அங்கேயே தங்கினார். அங்கு எந்த இடத்தில் சம்பவங்கள் நடைபெற்றனவோ அந்த இடத்திலேயே படப்பிடிப்பும் நடை பெற்றது.

மால்கினும் எய்ச்மேனும் வரும் காட்சிகளில் விசேஷ காமராக்கள் பயன்படுத்தப்பட்டன. விசாரணை நடந்த அறையின் வால் பேப்பரும் கூட கவனமாக தேர்ந்தெடுக்கப்பட்டது. இருட்டாக இருந்த அந்த அறையின் காட்சிகள் அப்படியே உள்ளது உள்ளபடி படமாக்கப்பட்டன.

1975ஆம் ஆண்டு ஹேரல் நடந்தது என்ன என்பதை விளக்கி ஒரு புத்தகம் எழுதினார். 2012இல் இன்னும் அதிக விவரங்கள் கசிந்து வெளி உலகிற்குத் தெரிய வந்தது. இதன் அடிப்படையில் தயாரிக்கப்பட்ட இந்தப் படம் அமெரிக்காவிலும் கனடாவிலும் நல்ல வரவேற்பைப் பெற்றது. படம் வெளியான முதல் நாளிலேயே பத்து லட்சம் டாலர் வசூலை பெற்றது. ஆறு நாட்களில் மொத்த வசூல் 95 லட்சம் டாலரைத் தாண்டியது. 1810 தியேட்டர்களில் படம் வெளியிடப்பட்டது. படத்தை அனைத்துப் பத்திரிகைகளும் நல்ல படம் என்று விமரிசித்தது குறிப்பிடத் தகுந்த விஷயம். ‘தத்ரூபமான வரலாற்று அடிப்படையிலான த்ரில்லர்’ என்று ஹாலிவுட் ரிபோர்ட்டர் என்ற பத்திரிகை விமரிசித்துப் படத்தைப் புகழ்ந்துள்ளது. அமெரிக்கா கனடா தவிர இதர நாடுகளில் உள்ள மக்கள் அக்டோபர் 2018இல் வெளியாகவிருக்கும் இந்தப் படத்தை வரவேற்கத் தயாராகி விட்டனர். இரண்டாம் உலகப் போர் பற்றிய நூற்றுக் கணக்கான படங்கள் வெளி வந்து விட்டன; அந்தத் தொடர் வரிசையில் ஃபைனலாக – லேடஸ்டாக – வந்த படம் ஆபரேஷன் ஃபைனல்.

அறிவியல் அறிஞர் வாழ்வில் ..

பிரபல விஞ்ஞானியான ஐன்ஸ்டீன் தனிப்பட்ட வாழ்க்கையில் அவ்வளவு வெற்றிகரமான வாழ்க்கையைக் கொண்டிருக்கவில்லை. முதல் மனைவியான மிலெவாவை விவாகரத்து செய்த சில மாதங்களிலேயே எல்ஸா (பிறப்பு 18-1-1876 மறைவு 20-12-1936) என்ற தன் உறவுக்காரப் பெண்மணியை அவர் மணம் புரிந்து கொண்டார். எல்ஸாவின் தாயாரும் ஐன்ஸ்டீனின் தாயாரும் சகோதரிகள். எல்ஸா துணி வர்த்தகத்தில் இருந்த தன் முதல் கணவரை விவாகரத்து செய்து விட்டு ஐன்ஸ்டீனை மணந்து கொண்டார். ஆனால் அவருக்கு கண் வியாதி முதல் இதயம், நுரையீரல் என பல அங்கங்களிலும் வியாதிகள் உண்டு. மணவாழ்க்கையில் அவர் ஐன்ஸ்டீனின் காவலராகத் தான் திகழ்ந்தார். யாரையும் அனாவசியமாக உள்ளே வந்து ஐன்ஸ்டீனின் நேரத்தை வீணாக்காமல அவர் காத்து வ்ந்தார்.

ஐன்ஸ்டீன் எழுதி இப்போது வெளி உலகிற்கு தெரிய வந்துள்ள 1422 கடிதங்கள் அவர் மண வாழ்க்கையைப் பற்றித் தெரிவிக்கின்றன. முதல் மனைவியிடம் அவர் கண்டிப்பும் கறாராகவும் இருந்ததை இந்தக் கடிதங்கள் காட்டுகின்றன. இரண்டாம் மனைவியான எல்ஸா நியூ ஜெர்ஸியில் உள்ள பிரின்ஸ்டனில் தனது வீ ட்டில் இறந்த போது ஐன்ஸ்டீன் கண்ணீர் விட்டு அழுதார். ஐன்ஸ்டீனின் நண்பரான பீட்டர் பக்கி ஐன்ஸ்டீன் அழுது தான் பார்த்தது அதுவே முதல் தடவை என்று குறிப்பிட்டார்.

தனது இல்லற வாழ்க்கை சிறப்பாக அமையவில்லை என்பதை ஐன்ஸ்டினே ஒப்புக் கொண்டிருக்கிறார். அவரது நண்பரான மைக்கேல் பெஸ்ஸோ என்பவரின் மகனுக்கு மைக்கேல் இறந்ததை ஒட்டி எழுதிய இரங்கல் கடிதத்தில் அவர் எழுதினார் இப்படி: “உனது தந்தையிடம் நான் ஆச்சரியப்பட்ட விஷயம் என்னவெனில் தான் வாழ்க்கை முழுவதும் அவர் ஒரே பெண்மணியுடன் வாழ்ந்தார் என்பதைத் தான்! அப்படிப்பட்ட ஒரு திட்டத்தில் நான் மிக மோசமாகத் தோற்று விட்டேன் – இரு முறை!”

ஐன்ஸ்டீனின் தனிப்பட்ட வாழ்க்கையைப் பற்றி இப்போது ஏராளமான புத்தகங்கள் வந்து விட்டன. அதன் மூலமாகத் தான் பல புதிய விவரங்களை அறிய  முடிகிறது! உணர்ச்சி அடிப்படையிலானது வாழ்க்கை; அறிவின் அடிப்படையிலானது அறிவியல்! அது வேறு; இது வேறு தான்! ஐன்ஸ்டீனின் வாழ்க்கையும் இதற்கு ஒரு எடுத்துக்காட்டு!

***

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: