சந்திர வெற்றி! (Post No.7104)

WRITTEN BY S NAGARAJAN
swami_48@yahoo.com

Date: 17 OCTOBER 2019
British Summer Time uploaded in London – 5-58 AM
Post No. 7104

Pictures are taken from various sources; beware of copyright rules; don’t use them without permission; this is a non- commercial, educational blog; posted in swamiindology.blogspot.com and tamilandvedas.com simultaneously. Average hits per day for both the blogs 12,000.

பாக்யா 1-10-2019 இதழில் அறிவியல் துளிகள் தொடரில் வெளியாகியுள்ள ஒன்பதாம் ஆண்டு பதினேழாம் கட்டுரை – அத்தியாயம் 433

சந்திர வெற்றி!

 ச.நாகராஜன்

விண்வெளி சாதனைகளில் அமெரிக்கா, ரஷியா, ஐரோப்பா ஆகிய நாடுகளுக்கு ஈடு கொடுத்து முன்னேறும் நாடு இந்தியா என்பதை நமது சமீபத்திய சந்திர வெற்றி நிரூபித்துள்ளது.

இந்த நிலவுச் சாதனை சாதாரண சாதனை அல்ல. மாபெரும் வெற்றி எனக் கொண்டாடத் தகும் பெரிய சாதனை.

இந்திய விண்வெளி ஆய்வு நிறுவனமான இஸ்ரோ தொடர்ந்து பல ஆண்டுகளாகச் சாதனைகள் படைத்து வருவதை உலகம் முழுவதுமே உன்னிப்பாக வியப்புடன் கவனித்து வருகிறது.

விண்ணில் சாடலைட்டுகளை அனாயாசமாக ஏவும் நாடுகளில் ஒன்றாக இந்தியா இன்று திகழ்கிறது.

விண்ணில் பறக்கும் ஒரு விண்கலத்தை மீண்டும் தேவையெனில் தரையிறக்கும் ஸ்பேஸ் காப்ஸ்யூல் ரிகவரி எக்ஸ்பெரிமெண்டையும் (Space Capsule Recovery Experiment) இந்தியா செய்து வெற்றி பெற்றிருக்கிறது.

ஒரே ராக்கெட்டில் 104 சாடலைட்டுகளை விண்ணில் ஏவி இந்தியா சாதனை படைத்திருக்கிறது. பல நாடுகளும் தங்கள் சாடலைட்டுகளை விண்ணில் ஏவ இந்தியாவை நாடி வருகின்றன.

அடுத்து சந்திரனையும் செவ்வாயையும் நோக்கி நமது பார்வை ஆழப் பதிந்திருக்கிறது.

செவ்வாய்க்குச் செல்லும் கலமாக மங்கள்யான் -1 இந்தியாவிலேயே தயாரிக்கப்பட்டது. 5-11-2013 அன்று  செவ்வாயை நோக்கி நமது கலம் கிளம்பியது. சோவியத், அமெரிக்கா, ஐரோப்பா ஆகிய மூன்று நாடுகளுடன்  இந்த செவ்வாய் பயணத்தின் மூலமாக இந்தியா சேர்ந்து விட்டது.

ஆசியாவில் முதலாவதாக செவ்வாய்க்குக் கலம் அனுப்பிய நாடு என்பதோடு உலகில் நான்காவதாக அனுப்பிய நாடு என்ற பெருமை நம்மைச் சேர்கிறது.

        அடுத்து சந்திரயான் – 1 என்ற நமது விண்கலம் 22, அக்டோபர் 2008இல் சந்திரனை நோக்கி ஏவப்பட்டது. முதன் முதலாக சந்திரனில் நீர் இருக்கிறது என்ற செய்தியை இந்தக் கலத்தின் மூலமாக 2009ஆம் ஆண்டில் கண்ட நமது விஞ்ஞானிகள் அதை உலகிற்கு அறிவித்தனர்.

      இதைச் சரிபார்க்கத் தனது கலத்தை ஏவிய அமெரிக்க விண்வெளி ஆய்வு நிறுவனமான நாஸா அது உண்மையே எனக் கண்டு வியந்து அதை உலகிற்கு அறிவித்தது.

சந்திரனுக்குக் கலம் அனுப்பியதன் மூலமாக அமெரிக்கா, சோவியத், சீனா ஆகிய நாடுகள் வரிசையில் இந்தியா சேர்ந்து விட்டது.

இந்த வெற்றியைத் தொடர்ந்து ஒரு மாபெரும் திட்டம் தீட்டப்பட்டது. சந்திரனை ஆராய ஒரு கலத்தை அனுப்பி அதன் தென் பகுதியில் நமது லேண்டரை இறக்குவது என்ற திட்டம் தான் அது.

இந்தத் திட்டம் தீவிரமாகப் பரிசீலிக்கப்பட்டு சந்திரயான் -2 என்ற கலம் சுமார் 1000 கோடி ரூபாய் செலவில் தயாரிக்கப்பட்டது.

   சந்திரயான் – 2 விண்ணில் 22 ஜூலை 2019 அன்று ஏவப்பட்டது. 3850 கிலோ எடை கொண்ட இது ஆர்பிட்டர், லேண்டர் விக்ரம், ரோவர் ஆகிய மூன்று அமைப்புகளைக் கொண்டது.

 இதில் உள்ள விக்ரம் என்ற லேண்டர் (Lander)  தரை இறங்கி அனைத்தையும் சரிபார்த்த பின்னர் ப்ரக்யான் என்ற  ரோவர் சந்திரப் பரப்பில் ஊர்ந்து சென்று ஆய்வுகளை நடத்த வேண்டும் என்பது நமது திட்டம்.

48 நாட்கள் பயணித்த பின்னர் சந்திரயான் – 2 சந்திரனை நெருங்கியது. மணிக்கு 6048 கிலோமீட்டரில் சென்ற லேண்டரின் வேகத்தைப் படிப்படியாக வெற்றிகரமாகக் குறைத்து அதை மணிக்கு 7 கிலோமீட்டர் என்ற குறைந்த வேகத்தில் செல்ல விஞ்ஞானிகள் பெருமுயற்சி செய்து வெற்றி பெற்றனர். அடுத்துச் சந்திரப்பரப்பைத் தொட வேண்டியது தான் பாக்கி.

செப்டம்பர் 7. இரவு மணி 1.51. லேண்டர் சந்திரனின் மிக அருகில் 100 கிலோமீட்டர் உயரத்திற்கு வரும் தருணம்.

இந்திய நாட்டில் கோடானு கோடி பேர்கள் சந்திர வெற்றியைக் கொண்டாடத் தயாராக இருந்தனர். உலகின் பல்வேறு நாடுகளில் உள்ளோரும் இந்தப் பயணத்தைக் கூர்ந்து கவனித்து வந்தனர்.

அனைத்தும் திட்டமிட்டபடி நடந்த வண்ணம் இருக்க, இறுதி சில கணங்களில் எதிர்பாராத விதமாக லேண்டர் விக்ரம் மெதுவாகத் தரை இறங்குவதற்குப் பதிலாக திசை மாறி ஹார்ட் லேண்டிங் எனப்படும் தரை மீது மோதியபடி இறங்கியது.

லேண்டரிலிருந்து நமக்கு வரும் தகவல் தொடர்பு நிற்கவே, எதிர்பாராத விதமாக ஒரு பின்னடைவு ஏற்பட்டது.

இஸ்ரோ தலைவர் சிவன் சற்றுக் கண்ணீர் விட்டுக் கலங்க நமது பிரதமர் மோடி அவரைத் தட்டிக் கொடுத்து ஆறுதல் கூறி உற்சாகப்படுத்தினார். ஒட்டு மொத்த நாட்டு மக்களும் அவருடனும் நம்முடைய விஞ்ஞானிகளுடனும் இருப்பதாக உறுதி கூறினார்.

 செவ்வாய் கிரகத்தை நோக்கிச் சென்ற நமது கலம் முதல் தடவையிலேயே வெற்றி பெற்றது குறிப்பிடத் தகுந்த ஒரு விஷயம்.

அதே போல சந்திரயான் – 1 இன் வெற்றியும் குறிப்பிடத் தகுந்தது.

அடுத்து சந்திரயான் – 2 முழுக்க முழுக்க இந்திய விஞ்ஞானிகளாலேயே வடிவமைக்கப்பட்டு பாகங்கள் அனைத்தும் இங்கேயே செய்யப்பட்டு அதை அசெம்பிள் செய்வதும் இங்கேயே முடிக்கப்பட்டது என்பது நாம் விண்வெளி அறிவியலில் எவ்வளவு தூரம் முன்னேறி இருக்கிறோம் என்பதைத் தெள்ளத் தெளிவாகப் பறை சாற்றுகிறது.

சந்திரனின் தென் துருவத்தை ஆராயும் முதல் விண்கலமும் இதுவே தான்!

  ஆக இப்போது சந்திரயான்-2இன் லேண்டர் தரை இறங்கி ரோவரை சந்திரப் பரப்பில் ஊர்ந்து செல்ல வைக்க முடியாத நிலை வருத்தம் தரும் ஒன்று என்றாலும் கூட 90 சதவிகிதம் வெற்றியை நாம் பெற்றிருக்கிறோம்; ஏனெனில் எதிர்பார்க்கும் தகவல்களை நமது கலம் தொடர்ந்து தந்து கொண்டே இருக்கும்.

       யாராலும் வெற்றி கொள்ள முடியாது என்று கருதப்பட்ட எவரெஸ்ட் சிகரத்தை வெற்றி கொண்ட டென்சிங் வெற்றியடைந்த பிறகு, “ நான் முயன்றேன். ஒரு தடவை அல்ல; ஏழு தடவைகள் முயன்றேன். தாயின் மடியில் தவழப் பாயும் சேயைப் போல! முடிவாக வெற்றியை அருளினாள்” என்று குறிப்பிட்டார்.

    அதே போல அடுத்தடுத்த முயற்சிகள் மூலம் சந்திரனில் ஒரு இந்தியர் இறங்கும் நாள் வெகு தொலைவில் இல்லை என்பதை சந்திரயான் – 2இன் பயணம் உறுதிப் படுத்துகிறது.

   பல நாடுகள் தமது தோல்விகளை மறைத்து வெற்றி பெற்றதை மட்டுமே அறிவிக்கும் நிலையில் இந்தியா வெளிப்படையாக சந்திரப் பயணம் பற்றிய அனைத்து விவரங்களையும் உலகின் முன் வைத்தது.

    சந்திரனைத் தொட இருந்த தருணத்தில் ஒரு தற்காலிகப் பின்னடைவைச் சந்தித்தபோதிலும் அடுத்த முயற்சி ஆரம்பமாகி விட்டது.

    ஒவ்வொரு தடைக்கல்லும் நமக்கு வெற்றியை அடைவதற்கான படிக்கல்லே என்பதை மனதில் ஏற்றித் தளராது உழைப்போம்; உயர்வோம்; வெற்றி பெறுவோம்.

அறிவியல் அறிஞர் வாழ்வில் .. ..

      ஓரிகாமி (Origami) என்பது ஒரு ஜப்பானியக் கலை. பேப்பரை மடித்தும் வளைத்தும் புதுப் புது உருவங்களைச் செய்யும் இந்தக் கலை பதினேழாம் நூற்றாண்டில் ஜப்பானில் மிகவும் புகழ் பெற்றுப் பரவ ஆரம்பித்தது. இதில் காகிதத்தை ஒட்டுதலோ வெட்டுதலோ கூடாது.

இந்தக் கலையை அமெரிக்க விஞ்ஞானி ராபர்ட் ஜே.லேங் (Rober J.Lang) என்பவர் ஒரு புதிய பரிமாணத்திற்கு ஏற்றி இருக்கிறார். 58 வயதான இவர் (பிறப்பு :4-5-1961) ஓரிகாமியில் கணிதத்தையும் அறிவியலையும் இணைத்து அதிசயிக்கத்தக்க வடிவமைப்புகளைச் செய்து காட்டி அசத்துகிறார்.

ஆறு வயதிலிருந்தே பேப்பர்களை மடிப்பதில் ஆர்வம் காட்டிய இவர் படிப்பை முடித்த பின்னர், அமெரிக்க விண்வெளி ஆய்வு நிறுவனமான நாஸாவில் ஜெட் புரபல்ஷன் லாபரட்டரியில் பணியாற்றினார்.

ஓரிகாமியில் பெரும் ஆர்வம் ஏற்பட்டதால் 2001ஆம் ஆண்டில் தனது பணியை விட்டு விட்டு ஓரிகாமி கலையைப் பரப்புவதில் முழு வீச்சுடன் இறங்கினார்.

ஓரிகாமி கலையை உலகினருக்குப் பயன்படுத்தும் விதத்தில் எப்படி விரிவாக்குவது என்பதை ஆராய்ந்து அந்த பேப்பர் மடிப்புகளின் மூலம் அரிய விண்வெளி சாதனங்கள் மற்றும் மருத்துவ சாதனங்களின் வடிவமைப்பைச் செய்து காண்பித்தார்.

நிஜமான சாதனங்கள் இந்தப் பேப்பர் மடிப்பு வடிவமைப்பை அடிப்படையாக வைத்து உருவாக்கப்பட்டன.

இவரது எட்டு புத்தகங்கள் மிகவும் பிரபலமாகி உள்ளன.

யூ டியூபில் இவரது பிரமிக்க வைக்கும் படைப்புகளைக் காணலாம்.

தவளை, டைனோஸர், விண்வெளி டெலஸ்கோப் என ஓரிகாமியில் படைக்கப்படும் படைப்புகளுக்கு ஒரு எல்லையே இல்லை!

சிறிய ஹாபி என்று அழைக்கப்பட்ட ஓரிகாமி பெரிய அறிவியல் விதையைக் கொண்டுள்ளது என்பது ஒரு அதிசயிக்க வைக்கும் சுவையான செய்தி தானே!

***

–subham—
Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

<span>%d</span> bloggers like this: