யாளி! (Post No7928)

WRITTEN BY S NAGARAJAN                     

Post No.7928

Date uploaded in London – – – 6 May 2020   

Contact – swami_48@yahoo.com

Pictures are taken from various sources for spreading knowledge; this is a non- commercial blog. Thanks for your great pictures.

25-12-2019 அன்று கட்டுரை எண் 7379 – ‘கற்பணிக் கோவிலும் எண்கோணமான குளமும் அமைத்த கட்டி முதலி’ என்ற கட்டுரையில் யாளி மீது அமர்ந்த வீரனின் படம் பிரசுரிக்கப்பட்டிருந்தது. இதைக் கண்ணுற்ற அன்பர் கிருஷ்ணமூர்த்தி, “அற்புதமான விசயங்கள். இதில் சில வீரர்கள் ஆரோகணித்து இருக்கும் யாளி என்ற விலங்கினத்தைப் பற்றி ஏதேனும் ஆய்வுகள் இருந்தால் எங்களுக்குச் சொல்லுங்கள்” என்று கேட்டிருந்தார். தனிக் கட்டுரையில் தருவதாகச் சொல்லி இருந்தேன். கட்டுரை இதோ:

யாளி!

ச.நாகராஜன்

yali

தென்னிந்தியக் கோவில்களில் பெரும்பாலான கோவில்களில் விசித்திரமான ஒரு சிற்பத்தை நம்மால் காண முடியும்.

யாளி என்று அழைக்கப்படும் இந்த சிற்பத்தில் சிங்கம், யானை, குதிரை ஆகிய மூன்று மிருகங்களின் சேர்க்கை கொண்டுள்ள ஒரு விசித்திர மிருகம் தோன்றும்.

மதுரை மீனாட்சி அம்மன் கோவிலில் ஆயிரங்கால் மண்டபத்தில் யாளியின் சிற்பம் உள்ளது.

ஜலகண்டேஸ்வரர் கோவிலில் யாளியின் சிற்பம் உள்ளது. திருவண்ணாமலை அண்ணாமலையார் கோவிலிலும் யாளியைக் காணலாம்.

இதே போல பெரிய கோவில்களில் பிரதான மண்டபங்களில் யாளியின் சிற்பத்தைப் பார்க்கலாம்.

ஒரு காலத்தில் இது போன்ற மிருகங்கள் இருந்திருக்கலாமோ என்ற ஊகமும், ஆராய்ச்சியும் ஒரு புறம் இருக்க, இந்த விசித்திரமான மிருகம் இந்திய இலக்கியத்தில் இடம் பெறும் ஒன்றாக அமைந்திருக்கிறது.

வாஸ்து சாஸ்திரத்தில் பதினாறு விதமான யாளி சொல்லப்படுகிறது.

யாளியில் பல்வேறு அமைப்புகள் உள்ளன.

சுமார் 48 யாளியின் படங்களை பின்ட்ரெஸ்ட் சித்திரங்களில் காணலாம். யாளிகளின் தொகுப்பு இது எனலாம்.

இன்னும் நூற்றுக்கணக்கில் யாளியின் சிற்பங்களைத் தொகுத்துச் சேர்க்க முடியும்.

வியாலம், வியாழம், விதலம் என்றெல்லாம் கூட யாளி கூறப்படுவதுண்டு.

யானைத்தலை கொண்ட கஜ வியாலம், சிங்கத் தலை கொண்ட சிம்ம வியாலம், குதிரைத் தலை கொண்ட அஸ்வ வியாலம், மனிதத் தலை கொண்ட நிர் வியாலம், நாயின் தலை கொண்ட ஸ்வான வியாலம், பாம்பைக் கொண்டுள்ள யாளி என இப்படிப் பல சிற்பங்களைக் காண முடியும்.

சிம்ம யாளியை குஜராத்தில் பத்தாம் நூற்றாண்டில் கட்டப்பட்ட மெஹ்ஸனா கோவிலில் காணலாம்.

கஜ யாளியை கஜுராஹோவில்  பார்ஸ்வநாத் கோவில் உள்ளிட்ட பல கோவில்களில் காணலாம்.

முதலையின் மீது ஆரோகணம் செய்யும் யாளியையும் கூடக் காணலாம்.

இப்படிப் பல்வேறு அமைப்புகளைக் காண்பிக்கும் சித்திரங்கள் பாரதம் முழுவதும் உள்ளன.

யாளியின் காலில் மிதிக்கப்பட்டு இருக்கும் மனிதனை வைத்து யாளி இயற்கையின் மகத்தான சக்தி என்றும் மனிதன் இப்படிப்பட்ட சக்திகளுடன் போராட வேண்டியிருக்கிறது என்றும் ஒரு கருத்து முன் வைக்கப்படுகிறது.

இந்த யாளியின்  மீது ஏறி ஆரோகணிக்கும் வீரர்களையும் சில சிற்பங்களில் காண்கிறோம்.

அந்தக் காலத்தில் கஜ கேசரி போன்ற பட்டங்களை இப்படி யாளி போன்ற மிருகங்களை அடக்கி வென்று அதன் மீது அமர்ந்து ஆரோகணிக்கும் வீரர்களுக்கு மட்டுமே தருவர் என சில ஆய்வாளர்கள் கருத்துத் தெரிவிக்கின்றனர். அதி பயங்கர மிருகமான யாளியை வென்றவர் உண்மையில் சிறந்த வீரர் தானே!

இன்னொரு கருத்து யாளி கோவிலைக் காக்கும் முக்கிய அம்சம் என்று கூறுகிறது.

சங்க இலக்கியங்களில் யாளி பற்றிய குறிப்புகள் உள்ளன.

எடுத்துக்காட்டாக நற்றிணையில் (பாடல் 205) இளநாகனார் பாடிய கீழ்க்கண்ட பாடலைக் கூறலாம்.

அருவி ஆர்க்கும் பெருவரை அடுக்கத்து

ஆளி நன் மான், வேட்டு எழுகோள் உகிர்ப்

பூம் பொறி உழுவை தொலைச்சிய வைந் நுதி

ஏந்து வெண் கோட்டு வயக் களிறு இழுக்கும்

துன் அருங்கானம் என்னாய் நீயே

குவளை உண்கண் இவள் ஈண்டு ஒழிய

ஆள் வினைக்கு அகறி ஆயின் இன்றொடு

போயின்று கொல்லோ தானே, படப்பைக்

கொடு முள் ஈங்கை நெடு மா அம் தளிர்

நீர் மலி கதழ் பெயல் தலைஇய

ஆய் நிறம் புரையும் இவள் மாமைக் கவினே

தலைவன் தன் நெஞ்சிடம் சொன்னதாகவோ அல்லது தோழி தலைவனிடம் சொன்னதாகவோ அமைந்த இந்தப் பாடல்

இதில் ஆளி என்ற விலங்கு புலியோடு சண்டை போட்டு கொல்லப்பட்ட யானையை இழுத்துச் செல்லும் என்பது கூறப்படுகிறது. ஆளி பயங்கரமான ஒரு விலங்கு என்பதை இதில் காணலாம்.

“கடுமையான கானகம் வழியே மலைச் சரிவில் நீ செல்ல வேண்டும். அங்கு நீர்வீழ்ச்சிகள் ஆர்ப்பரிக்கும். அங்கு புலியால் கொல்லப்பட்ட யானையை ஆளி இழுத்துச் செல்லும். செல்வத்தைச் சேர்க்கக் கருதி நீ சென்றால் அழகிய நிறம் கொண்ட இந்தக் கன்னியின் அழகு இன்றொடு உன்னுடன் போய் விடும் அல்லவா!” என்பது இந்தப் பாடலின் பொருள்.

அடுத்து பொருநராற்றுப்படையில் 139 முதல் 142 வரிகளைப் பார்ப்போம்

ஆளி நன்மான் அணங்குடைக் குருளை

மீளி மொய்ம்பின் மிகுவலி செருக்கி

முலைக்கோள் விடா அ மாத்திரை ஞெரேரென

தலைகோள் வேட்டம் களிறு அட்டா அங்கு

இதில் வரும் ஆளியை மான் என்று பொருள் கொள்வர்.

சுமார் 25000 ஆண்டுகளுக்கு முன்னர் யாளி இந்தியாவில் இருந்திருக்கலாம் என ஒரு ஊக ஆராய்ச்சி தெரிவிக்கிறது. (டைனோஸர் இனம் அழிந்தது போல யாளியும் அழிந்து விட்டதோ?!)

யாளியை ஹிந்து புராணங்கள் கூறும் கின்னரர், யக்ஷர், கந்தர்வர், அப்ஸரஸ்கள், திக்பாலர்கள் வரிசையில் சேர்த்துப் பேசப்படுவதும் உண்டு.

எது எப்படியானாலும் யாளியின் சிற்பத்தை எந்தக் கோவிலில் கண்டாலும் அதை வியப்புடனும், பயத்துடனும் சில நிமிடங்கள் பார்க்காமல் அகல முடியாது!

***

yali vahana

புருஷோத்தம கோப்ரித், சர்வேஷ் காந்த் தாகூர் உள்ளிட்ட பல ஆர்வலர்கள் யாளி பற்றிய தங்கள் கருத்துக்களை இணைய தளத்தில் பதிவு செய்துள்ளனர். படிக்க சுவையாக உள்ள பல செய்திகளை இணையதளத்தில் காணலாம்.

Vedic Lion around the World! | Tamil and Vedastamilandvedas.com › 2014/11/09 › vedic-lion-around-t…

9 Nov 2014 – Yali in Hindu temples. English word Leo is derived from Yali. Ariel = Ari Hari is a Sanskrit word for lion. Hebrew and Tamil use this word as Ari.

tag — யாளி

—-subham—

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: