பட்ட மரம் தழைக்கக் கவி பாடிய காழிப் புலவன்! (Post No.8025)

WRITTEN BY S NAGARAJAN                     

Post No. 8025

Date uploaded in London – – – 23 May 2020   

Contact – swami_48@yahoo.com

Pictures are taken from various sources for spreading knowledge; this is a non- commercial blog. Thanks for your great pictures.

கொங்கு மண்டல சதகம்

பட்ட மரம் தழைக்கக் கவி பாடிய காழிப் புலவன்!

ச.நாகராஜன்

தொண்டை மண்டலத்தில் வல்லம் என்று ஒரு சிற்றூர் உண்டு. அங்கு இடையர்களில் கல்வி, கேள்விகளில் வல்லவராக நம்பிகாளி என ஒரு புலவர் வாழ்ந்து வந்தார்.

ஒரு சமயம் நம்பிகாளி நெற்குன்றம் சென்று அங்கு பெருங் கொடைவள்ளலாக இருந்த களப்பாள ராஜன் என்ற நெற்குன்றவாண முதலி மீது ஒரு பிரபந்தம் பாடினார்.

தமிழ் அறிவில் சிறந்த அந்த முதலியார் நம்பிகாளி பாடிய பிரபந்தத்தின் உயர்வை உடனே உணர்ந்தார்.

இதற்கு என்ன கொடுப்பது என்று எண்ணி வியந்த அவர் தன் வீடு, ஊர் முதலிய அனைத்தையும் அவருக்குக் கொடுத்ததோடு தன்னையும் கொடுத்தார்; புலவருக்கு அடிமையானார்.

பரிசைப் பெற்றுக் கொண்ட புலவர், முதலியாரை அடிமையிலிருந்து விடுவித்தார்.

பின்பு திருப்புகலூரை அவர் அடைந்தார். அங்கு சிவபிரான் மீது அக்களப்பாளர் திருப்புகலூர் அந்தாதியைப் பாடினார் என வரலாறு கூறுகிறது.

நாவலர் சரிதை இதை இப்படி எடுத்துக் கூறுகிறது :-

பன்னுந் தமிழ்க்கவன் மாமணை யாதி பரிசளிப்ப

முன்னம்பி காளிக்கு நெற்குன்ற வாண முதலியென்போன்

பின்னுஞ் சிலபல பொன்னுங் கொடுத்துத் தன் பேர்நிறுத்த

மன்னுந் தமிழு முரைத்தா னவன்றொண்டை மண்டலமே

கற்குங் கவிவல்லை யாதவர்கோ னம்பி காளிக்கியாம்

விற்கும் பரிசன மாகிவிட் டோம்வட வேங்கடமும்

பொற்குன்ற மும்புகழ் கங்கா நதியும் பொதியமும்போ

னேற்குன் றமுநம் மரபுமெந் நாளு நிலைநிற்கவே  (நாவலர் சரிதை)

பின்பு யாதவர் கோனான நம்பி காளி தேச சஞ்சாரம் செய்து வந்த போது கொங்கு மண்டலத்தில் நெருவூர் என்னும் ஊரை அடைந்தார்.

கையேட்டுக்காரர்களால் நம்பி காளியின் நா வன்மையைக் கேட்டறிந்த  அங்கிருந்த விப்பிரர்கள் பொறாமை கொண்டனர். நம்பி காளியையும் அவரது தமிழையும் இகழ்ந்தனர். இதற்கு உடனடியாக நம்பி காளியின் மாணாக்கர்கள் மறுப்புரை கூறினர்.

“தமிழும் தமிழ்ப் பாக்களும் தெய்வ அருள் பெற்றது எனில், இதோ பட்டுப் போயிருக்கிறதே, இந்த மரத்தை தழையும் படி அவர் பாடுவரோ” என்று அவர்கள் சவால் விட்டனர்.

உடனே மாணாக்கர்கள் நம்பி காளியை நோக்கி, தெய்வத் தமிழின் தெய்வத் தன்மையை இங்கு நிலை பெறச் செய்யுங்கள் என்று வேண்டினர். உடனே அவரும் ஒரு வெண்பாவைப் பாடினார்.

தெய்வத் தமிழென்னுஞ் செம்மொழியு மம்மொழிநேர்

செய்விப்பர் தேவரெனல் தேறத் – தெய்வஞ்

சுரந்தளிக்கு மாநெரூர்ச் சோலையிலே பட்ட

மரந்தளிர்க்க வின்று வளர்ந்து

என்ன ஆச்சரியம், பட்ட மரம் துளிர்த்தது. அனைவரும் வியந்து தமிழின் தெய்வத் தன்மையையும் நம்பி காளியின் நாவன்மையையும் புகழ்ந்து போற்றினர்.

இந்த வரலாறைக் கொங்கு மண்டல சதகம் தனது 78ஆம் பாடலில் இப்படிப் பதிவு செய்கிறது :

பரந்த கடலுல கெல்லா மறியப் பரமசிவ

னிரந்தர மாயருள் சண்முக வேலனன் னேயத்தினாற்

புரந்தரன் போற்றும் நெருவூரிற் காழிப் புலவன்பட்ட

மரந்தழை யக்கவி பாடிய துங்கொங்கு மண்டலமே

பாடலின் பொருள் : சுப்பிரமணியர் அருளைக் கொண்டு நெருவூரில் பட்ட மரத்தைத் துளிர் விட்டுத் தழைக்கும்படி தமிழ்க்கவி பாடிய காளிப் புலவனும் கொங்குமண்டலத்தைச் சேர்ந்தவனே என்பதாம்.

தமிழின் தெய்வத்தன்மையைப் பறை சாற்றும் வரலாறுகளில் இதுவும் ஒன்று!

tags — பட்ட மரம் , காழிப் புலவன்

***

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: