கைலாய யாத்திரைக்குப் புதிய சாலை! (Post No.8182)

WRITTEN BY S NAGARAJAN                     

Post No. 8182

Date uploaded in London – – –16 June 2020   

Contact – swami_48@yahoo.com

Pictures are taken from various sources for spreading knowledge; this is a non- commercial blog. Thanks for your great pictures.

ஜூன் 2020 ஞான ஆலயம் ஆன்மீக மாத இதழில் வெளியாகியுள்ள கட்டுரை!

கைலாய யாத்திரைக்குப் புதிய சாலை!

ச.நாகராஜன்

          மன்னும் இமயமலை எங்கள் மலையே

மாநில மீதிது போற் பிறிதிலையே – மஹாகவி பாரதியார்

மலையரசன்!

சிவ-பார்வதி உறையும் இடம் எது? இராவணன் தூக்க முயன்ற மலை எது? கங்கை, பிரம்மபுத்திரா உள்ளிட்ட பல புண்ய நதிகள் உற்பத்தியாகும் இடம் எது? இலக்குவன் உயிரைக் காப்பாற்ற அனுமன் தேடிச் சென்ற சஞ்சீவினி மூலிகை உள்ள இடம் எது? கர்ணனை குந்தி பெற்ற இடம் எது? சகுந்தலை வளர்ந்த ஆசிரமம் உள்ள இடம் எது? வேத வியாஸர் மஹா பாரதத்தை இயற்றிய இடம் எது? இது போன்ற நூற்றுக் கணக்கான கேள்விகளுக்கு ஒரே விடை இமயமலைத் தொடர் பகுதி என்பதே ஆகும்!

காளிதாஸனால் நாகாதிராஜன் – மலைகளின் அரசன் என்று போற்றி புகழப்படும் இமயமலை ஹிந்துக்கள், பௌத்தர்கள், ஜைனர்கள் ஆகியோருக்கான புனித மலை.

தூய நீர் ஏரி மானஸசரோவர்!

பிரம்மாவின் மனதில் தோன்றி இங்கு உருவான மானஸசரோவர் உலகின் ஒப்பற்ற பளிங்கு நீர் போன்ற தூய நீர் கொண்ட ஒரே அதிசய அற்புத ஏரி.

15060 அடி உயரத்தில் அமைந்துள்ள வட்ட வடிவமான இந்த ஏரியின் சுற்றுப்பாதை மட்டும் 88 கிலோமீட்டர் நீளம் கொண்டதாகும். இதன் அதிக பட்ச ஆழம் 300 அடி. ஒரு கூழாங்கல்லை இதனுள் போட்டால அது அடியில் அமிழும் வரை அதிசயிக்கத்தக்க விதத்தில் பார்க்கும் அளவு  இதன் நீர் தூய்மையானது!

இங்கிருந்து கைலாய மலையைப் பார்க்கும் பக்தர்கள் பரவசப்பட்டு ஆனந்தமடைவர். கைலாயம் சிவ- பார்வதியின் உறைவிடம். 21778 அடி உயரம் கொண்டது இந்த தெய்வீக சிகரம். இதைச் சுற்றி வரும் பாதை 52 கிலோமீட்டர் நீளம் கொண்டது. ஒரு நாளில் இதைச் சுற்றி வருவதாக விரதம் மேற்கொண்டோர் அரும்பாடுபட்டு இந்த கிரிவலத்தை முடிப்பர்.

சுந்தரர், ஔவையார், சேரமான் பெருமாள் உள்ளிட்ட ஏராளமான மகான்கள்

கைலைப் பயணம் மேற்கொண்டதை பல நூல்களும் சிறப்புறக் கூறும்.

தெய்வீகக் கைலாய யாத்திரை!

இமயமலை கைலாய சிகர யாத்திரை என்பது ஒரு தெய்வீக யாத்திரை! லக்ஷக் கணக்கான பக்தர்கள் பல ஆயிரம் ஆண்டுகளாக மானஸ சரோவர் யாத்திரையை மேற்கொண்டு சிவபிரானின் அரிய தரிசனமான கைலாய தரிசனத்தைப் பெற்றுக் கைலாய யாத்திரையை முடித்துப் பெரும் ஆனந்தம் அடைந்து வந்திருக்கின்றனர். முக்திக்கு ஒரு யாத்திரை இந்த யாத்திரையே!

புதிய பாதை உருவானது!

இந்த கைலாய யாத்திரைக்கான புதிய பாதை ஒன்று உருவாக்கப்பட்டு 2020 மே 8ஆம் தேதி நமது பாதுகாப்புத் துறை மந்திரி ராஜ்நாத் சிங் அவர்களால் காணொளிக் காட்சி மூலம் திறந்து விடப்பட்டுள்ளது.

உத்தரகண்டிலிருந்து கைலாய மானஸசரோவர் ஏரிக்கு இனி பக்தர்கள் செல்லும் நாட்களில் மூன்று நாள் குறைந்து விடும்.

பி ஆர் ஓ எனப்படும் நமது எல்லைப்புற சாலை நிறுவனம் (Border Roads Organaisation) வெற்றிகரமாக இந்த அரிய சாதனையை நிகழ்த்தியுள்ளது.

கடும் குளிரில் மிக உயரத்தில் உள்ள இந்தப் பகுதியில் கடினமான இமயமலைப் பாறைகளை உடைத்துச் சாலை அமைப்பது என்பது நினைத்துப் பார்ப்பதற்கும் முடியாத ஒரு தெய்வீகக் கனவு. இதை தனது ஆட்சிக் காலத்தில் ஆரம்பித்து முடிக்க வேண்டும் என்பது நமது பிரதமர் நரேந்திர மோடி அவர்களின் உறுதியான திட்டமாக அமைந்திருந்தது. கோடிக்கணக்கான ஹிந்துக்கள் மனம் மகிழும் படி அவர் இந்த ‘சிகர சாதனையைச்’ சாதித்து விட்டார்!

மூன்று பாதைகள்!

மானஸசரோவரை அடைய மூன்று பாதைகள் உண்டு. ஒன்று சிக்கிம் வழியாகப் போவது, இரண்டாவது உத்தர்கண்ட் வழியாகச் செல்வது, மூன்றாவது நேபாளத்தில் உள்ள காத்மாண்டு வழியாகச் செல்வது. இந்த மூன்று பாதைகளும் கடினமான மிக நீளமான பாதைகள்.

சிக்கிம் வழியாகச் செல்லும் பாதை 2780 கிலோமீட்டர் தூரம் உள்ளது. இதில் 1490 கிலோமீட்டர் சீனப் பகுதியில் செல்ல வேண்டும். மிகவும் கஷ்டமான பாதை இது.

இன்னொரு பாதை நேபாளத்தில் காத்மாண்டுவில் ஆரம்பித்து இரு விமானப் பயணம், ஒரு சாலைப் பயணம் ஆகியவற்றின் மூலம் 1940 கிலோமீட்டர் தூரத்தைக் கடந்து செல்லும் பாதையாகும். இதிலும் பயணம் செய்யும் கஷ்டம் அதிகம்.
இவற்றை ஒப்பிடும் போது சற்று சுலபமான பாதை உத்தர்கண்ட் பாதை.

நமது பகுதியான உத்தர்கண்டிலிருந்து கைலாயம் செல்லும் பாதையை மூன்று பகுதிகளாகப் பிரிக்கலாம். முதலாவது பித்தோரகரிலிருந்து தவாகட் வரை உள்ள 107. 6 கிலோமீட்டர் நீளமுள்ள பகுதி; அடுத்து தவாகட்டிலிருந்து கதியாப்கர் வரை உள்ள 19.5 கிலோமீட்டர் நீளமுள்ள பகுதி. இது ஒரு வழிச் சாலை. மூன்றாவது பகுதி கதியாப்கரிலிருந்து சீன எல்லையை ஒட்டி உள்ள லிபுலெக் கணவாய் வரை உள்ள 80 கிலோமீட்டர் நீளமுள்ள பகுதி. இதில் நடந்து தான் செல்ல முடியும்! இந்தப் பகுதியைக் கடக்க ஐந்து நாட்கள் ஆகும். லிபுலெக் கணவாய் என்பது இந்திய சீன எல்லையில் 17000 அடி உயரத்தில் உள்ளது.

நமது எல்லைப்புறச் சாலை நிறுவனத்தின் சாதனை!

எல்லைப்புறச் சாலை நிறுவனம் இந்த இரண்டாம் பகுதியை இருவழிச் சாலையாக மாற்றியது. ஆகவே தாராளமாக இரு புறமும் வாகனங்களின் போக்குவரத்து இருக்கும். 76 கிலோமீட்டர் பணி முடிந்து விட்டது. மீதியுள்ள 4 கிலோமீட்டரில் பணியை நடத்த ராணுவ பணிகளுக்கான டைரக்டர் ஜெனரலின் அனுமதி வேண்டும். இந்த அனுமதி கிடைத்தவுடன் 2020 இறுதிக்குள் சாலைப் பணி முற்றிலுமாக முடிந்து விடும். இந்த அகன்ற பாதையால் மூன்று நாட்கள் பயண காலத்தில் குறைக்கப்பட்டு விட்டது!

சீன எல்லைக்குள் நுழைந்த கைலாய யாத்ரீகர்கள் 5 கிலோ மீட்டர் நடக்க வேண்டும்; பின்னர் 97 கிலோ மீட்டர் சாலைப் பயணத்தை மேற்கொள்ள வேண்டும். பின்னர் தான் கைலாய பரிக்ரமம் எனப்படும் கைலாய மலையைச் சுற்றி வரும் பயணம் மேற்கொள்ளப்படும்.

பித்தோரகரிலிருந்து கதியாப்கருக்கு 130 கிலோமீட்டர் சாலை வழியே சென்று அங்கிருந்து லிபுலெக் கணவாய்க்கு 80 கிலோமீட்டர் செல்வதும் இன்னொரு முறையாகக் கடைப்பிடிக்கப்பட்டு வருகிறது.

இப்போது திறக்கப்பட்டுள்ள இந்தப் புதிய பாதை யாத்ரீகர்களின் உடல் சிரமத்தை வெகுவாகக் குறைப்பதோடு செலவில் பெரிய சேமிப்பையும் ஏற்படுத்துகிறது. மற்ற வழிகளை ஒப்பிடும் போது ஐந்தில் ஒரு பகுதி தான் இந்த தூரம் என்பது கோடிக்கணக்கான ஹிந்து  மக்களின் உள்ளங்களைக் குளிர வைக்கும் செய்தியாகும். இந்தப் பாதை பெரும்பாலும் இந்தியப் பகுதியிலும் மிகக் குறைவாகச் சீனப் பகுதியிலும் அமைகிறது.

கைலாயப் பயணம் வெளியுறவு மந்திரி அலுவலகத்தால் மேற்பார்வையிடப்படுகிறது.

இமாலய சாதனை!

கதியாப்கர்-லிபுலெக் சாலை 2005இல் திட்டமிடப்பட்டது. இதற்கான செலவு 80.76கோடி ரூபாய். ஆனால் 2018இல் இந்தச் செலவு 439.4 கோடியாக மறு மதிப்பீடு செய்யப்பட்டு 2022க்குள் முடிக்க வேண்டும் என்ற இலக்கையும் நிர்ணயித்தது. மிக அதிக உயரம், கடும் பனி, இமயமலைப் பாறை, மண் மற்றும் பாறைச் சரிவுகள், மேக மூட்டம் – இவை அனைத்தையும் கருத்தில் கொண்டால் இது ஒரு இமாலய சாதனை தான்!

நமது ஹெலிகாப்டர்கள் அதிக பளுவான சாதனங்களை இங்கு பணிக்கென கொண்டு செல்ல உதவின. ஆஸ்திரேலியாவிலிருந்து விசேஷ இயந்திரங்கள் இறக்குமதி செய்யப்பட்டன.

கண்ணின் மணியாகி நின்ற கயிலை மலையானே போற்றி!

கைலாய சிகரத்தை நேரில் பார்ப்பது என்பது எத்துணை புண்ணியம்!

கைலை மலையானை நினைத்த இடத்திலிருந்தும் தொழலாம் அப்பரின் அருள்வாக்கைப் பாடியவாறே :

பண்ணின் இசையாய் நின்றாய் போற்றி!

    பாவிப்பார் பாவம் அறுப்பாய் போற்றி!

எண்ணும் எழுத்தும் சொல் ஆனாய் போற்றி!

    என் சிந்தை நீங்கா இறைவா போற்றி!

விண்ணும் நிலனும் தீயானாய் போற்றி!

    மேலவர்க்கும் மேல் ஆகி நின்றாய் போற்றி!

கண்ணின் மணியாகி நின்றாய் போற்றி!

     கயிலைமலையானே போற்றி போற்றி!

                    அப்பர் அருளிய திருக்கயிலாயப் பதிகம்

.
tags– கைலாய யாத்திரை, புதிய சாலை





tags கைலாய யாத்திரை, புதிய சாலை
Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: