இறைவன் இருக்கிறான்?! நாத்திகமும் (?) ஆத்திகமும் (!) (Post No.8251)

WRITTEN BY S NAGARAJAN                     

Post No. 8251

Date uploaded in London – – –28 June 2020   

Contact – swami_48@yahoo.com

Pictures are taken from various sources for spreading knowledge; this is a non- commercial blog. Thanks for your great pictures.

மாலைமலர் 20-6-2020 இதழில் வெளியாகியுள்ள கட்டுரை!

இறைவன் இருக்கிறான்?! நாத்திகமும் (?) ஆத்திகமும் (!)

ச.நாகராஜன்

ரஸ்ஸலும் தாகூரும்!

பிரபல இயற்பியல் விஞ்ஞானியும் மாபெரும் கணித மேதையுமான

பெர்ட்ரண்ட் ரஸ்ஸல் (பிறப்பு 18-5-1872 மறைவு 2-2-1970) ஒரு நாத்திகர்! ஒரு முறை நம் நாட்டின், பிரபல கவிஞரான ரவீந்திரநாத் தாகூர் (பிறப்பு 7-5-1861 மறைவு 7-8-1941) இங்கிலாந்து சென்றிருந்த போது அவருடன் ரஸ்ஸல் கேம்பிரிட்ஜில் காலார நடந்து சென்றார். அப்போது அருகில் உள்ள கிங்ஸ் காலேஜ் சர்ச்சுக்கு அருகில் அவர்கள் இருவரும் வந்தனர்.

தேவாலயத்தில் அற்புதமாக ஒரு கூட்டுப் பிரார்த்தனையின் இசையை மாணவர்கள் இசைத்துக் கொண்டிருந்தனர். இசை இருவரையும் கவர்ந்தது. ‘உள்ளே போகலாமே’ என்றார் தாகூர்.

ஆனால் ரஸ்ஸலோ, ‘அது தான் நடக்காது! இந்த இசையும் ஊதுபத்தி மணமும் ஜன்னல் வழியே வெளிவரும் வண்ணமயமான ஒளிக்கதிர்களும் என் மீது செல்வாக்கு செலுத்தி என் பகுத்தறிவு எதைச் சந்தேகிக்கிறதோ அதை விட்டு விட ஒருபோதும் அனுமதிக்க மாட்டேன்’ என்றார்.

தாகூரோ விழுந்து விழுந்து சிரித்தார் – கடவுளைப் பற்றிய சந்தேகம் ரஸ்ஸலுக்கு எப்போது தான் போகுமோ என்று!

ஒரு நாத்திகர் நாத்திகராகவே இருக்க விரும்பும் வகையில் ரஸ்ஸல் சேர்கிறார்.

ஆனால் இன்னொரு சம்பவம் இப்படிப்பட்ட நாத்திகர்களுக்கும் சில சமயம் சந்தேகத்தை ஏற்படுத்தி விடுகிறது என்பதைக் காட்டுகிறது!

மைக்கேல் ஷெர்மரின் திகைப்பு!

மைக்கேல் ஷெர்மர் (பிறப்பு 8-9-1954 இப்போது வயது 66) உலகப் பகுத்தறிவுக் கழகத்தின் தலைவர். விஞ்ஞானபூர்வமாக இல்லாத எதையும் நம்பவே கூடாது என்று தொடர்ந்து வலியுறுத்தி வருபவர். இவரது கழகத்தில் சுமார் 55000 உறுப்பினர்கள் உள்ளனர். உலகின் பிரபல அறிவியல் இதழான ஸயிண்டிபிக் அமெரிக்கன் பத்திரிகையில் 2001 ஏப்ரல் மாத இதழிலிருந்து பகுத்தறிவுப் பகுதியை இவர் எழுதி வருகிறார்.

இவரது பகுத்தறிவையே ஆட்டுவிக்கும் ஒரு சம்பவம் இவரது திருமண தினமான 2014 ஜூன் 24ஆம் தேதி நிகழ்ந்தது.

அதை இவரே ஸயிண்டிபிக் அமெரிக்கன் பத்திரிகையில் வாசகர்களுடன் பகிர்ந்து கொண்டது அவரது நேர்மையைக் காட்டுகிறது!

ஜெர்மனியைச் சேர்ந்த ஜென்னிபர் க்ராபை மணமுடிக்க அவர் முடிவு செய்தார்.

ஜென்னிபருக்கு அவரது தாத்தா என்றால் உயிர்! ஆனால் அவரது 16ஆம் வயதில் அவரது தாத்தா மரணமடைந்தார்.

தாத்தா பயன்படுத்திய 1976ஆம் வருட பிலிப்ஸ் டிரான்ஸிஸ்டரை அவரது நினைவாக அவர் போற்றிப் பாதுகாத்து வந்தார்.

அது இயங்கவில்லை. எவ்வளவோ பேரிடம் ரிப்பேர் செய்யக் கொடுத்த போதும் ஒன்றும் நடக்கவில்லை.

கல்யாண நாளன்று திடீரென்று அந்த ரேடியோ பாட ஆரம்பித்தது!

அனைவரும் பிரமித்தனர்.

பகுத்தறிவுக் கழகத் தலைவரோ திகைத்துப் போனார்.

ஜென்னிபரும் அதே அளவு பகுத்தறிவுவாதி தான். அவரும் திகைத்தார்.

கூடியிருந்தோரோ குதூகலப்பட்டனர். சந்தோஷ ஆரவாரமிட்டனர்.

மணநாளன்று மட்டும் பாடிய அந்த ரேடியோ அடுத்த நாளிலிருந்து பாடவில்லை.

தன் தாத்தா எப்போதும் தன்னுடன் இருக்கிறார் என்பதற்கான அடையாளம் அது என்கிறார் பகுத்தறிவுக் கொள்கையைக் கழட்டி விட்ட ஜென்னிபர்!

ஆமாம், ஆமாம், அது உண்மையே என்கிறார் ஷெர்மர்!

“என் பகுத்தறிவுக் கொள்கைக்கு பலத்த அடி அது. எப்படி அந்த ரேடியோ ஒரே ஒரு நாளன்று மட்டும், அதுவும் ஜென்னிபரின் திருமண தினத்தன்று மட்டும் பாடியது என்பதை என்னால் நம்பவும் முடியவில்லை; விளக்கம் கொடுக்கவும் முடியவில்லை” என்று ஸயிண்டிபிக் அமெரிக்கன் இதழில் பகிரங்கமாக தன் நிலையை அவர் ஒப்புக் கொண்டிருக்கிறார்.

இப்படிச் சில நிகழ்வுகள் அவ்வப்பொழுது நிகழ்ந்து நாத்திகரைச் சிந்திக்க வைக்குமோ?!

கடவுளை நம்புகிறீர்களா? ஐன்ஸ்டீனின் பதில்!

உலகில் இதுவரை தோன்றிய விஞ்ஞானிகளிலேயே மாபெரும் விஞ்ஞானி என்று இன்றளவும் கொண்டாடப்பட்டு வருபவர் ஆல்பர்ட் ஐன்ஸ்டீன்! (பிறப்பு 14-3-1879 மறைவு 18-4-1955)

அவருக்கு 1936ஆம் ஆண்டு ஜனவரி மாதம் ஒரு சிறுமியிடமிருந்து கடிதம் ஒன்று வந்தது. பிரித்து படித்தார் ஐன்ஸ்டீன்.

கடிதம் இது தான்:

எனது அன்புக்குரிய டாக்டர் ஐன்ஸ்டீன்,

எங்களது ஞாயிற்றுக்கிழமை பள்ளி வகுப்பில் விஞ்ஞானிகள் பிரார்த்தனை செய்கிறார்களா என்ற கேள்வியை முன் வைத்தோம். விஞ்ஞானம், மதம் ஆகிய இரண்டையும் ஒருசேர நம்ப முடியுமா என்ற கேள்வியிலிருந்து இது ஆரம்பித்தது. நாங்கள் விஞ்ஞானிகளுக்கும் இதர முக்கியமான பிரபலங்களுக்கும் எங்கள் கேள்விக்குப் பதிலளிக்க வேண்டுமாறு எழுதி வருகிறோம்.

எங்கள் கேள்விக்கு நீங்கள் பதில் அளித்தால் மிகவும் கௌரவிக்கப்பட்டதாய் மகிழ்ச்சி கொள்வோம். விஞ்ஞானிகள் பிரார்த்தனை செய்கிறார்களா, அப்படியெனில் அவர்கள் எதற்காகப் பிரார்த்தனை செய்கிறார்கள்?

நாங்கள் ஆறாம் வகுப்பில் மிஸ்.எல்லிஸ் வகுப்பில் படிக்கிறோம்.

                                  மிகுந்த மரியாதையுடன் தங்கள் பிலிஸ்

சிறுமி கேட்ட கேள்வி ஆழமானது; அர்த்தமுள்ளது.

அதை ஒதுக்கி விடவில்லை அவர். ஐந்தே நாட்களில் பதில் எழுதி அனுப்பி விட்டார்.

உலகின் விலை மதிக்க முடியாத பொக்கிஷமாக இன்றளவும் அது கருதப்படுகிறது.

ஐன்ஸ்டீனின் பதில் இது தான் :

அன்புள்ள பிலிஸ்,

உனது கேள்விக்கு எவ்வளவு எளிமையாக பதில் கூற முடியுமோ அவ்வளவு எளிமையாக பதிலளிக்க முயற்சிக்கிறேன்.

இதோ எனது பதில்:

மனிதர்களின் விஷயங்களில் நடக்கும் ஒவ்வொரு நிகழ்வும் இயற்கையின் சட்ட திட்டங்களுக்கு இணங்க நடைபெறுகின்றன என்று விஞ்ஞானிகள் நம்புகின்றனர்.

ஆகவே நிகழ்வுகளின் மீது, ஒரு பிரார்த்தனை செல்வாக்கு கொண்டிருக்கும், -அதாவது இயற்கைக்கு மீறிய அதீதமான விருப்பத்திற்கு இணங்க நிகழ்வானது மாறும் – என்று ஒரு விஞ்ஞானி நம்புவதற்கு இயலாது.

இருந்தபோதிலும், இந்த இயற்கைச் சக்திகளைப் பற்றிய நமது அறிவு பூரணமானதில்லை என்பதை நாம் ஒப்புக்கொள்ள வேண்டும். ஆகவே கடைசியில் இறுதியான மஹாசக்தி ஒன்று உள்ளது என்ற நம்பிக்கையானது ஒருவித தெய்வீக நம்பிக்கையைச் சார்ந்திருக்கிறது. அப்படிப்பட்ட நம்பிக்கை இப்போதைய விஞ்ஞான சாதனங்கள் இருந்தபோதிலும் கூட, இப்போது பரவலாக எல்லா இடங்களிலும் உள்ளது.

ஆனால், கூடவே விஞ்ஞானத்தின் மீது தீவிர நாட்டம் கொண்டுள்ள ஒவ்வொருவரும் பிரபஞ்சத்தின் விதிகளில் ஏதோ ஒரு மஹா சக்தி -மனிதனுக்கும் மேம்பட்ட பிரம்மாண்டமான ஒன்று – பரிமளிக்கிறது என்று நம்ப வைக்கப்பட்டுள்ளனர்.

இதன்படி விஞ்ஞானத்தின் மீதான நாட்டம் ஒரு விசேஷ மத உணர்வுக்கு இட்டுச் செல்கிறது.

   உளங்கனிந்த வாழ்த்துக்களுடன் உனது ஏ. ஐன்ஸ்டீன்

கடிதத்தைப் படித்த சிறுமி அடைந்த மகிழ்ச்சி ஒருபுறமிருக்க உலகத்தினர் அடைந்த மகிழ்ச்சியைச் சொல்லவும் வேண்டுமோ?

அவர் தனிப்பட்ட கடவுளைத் தான் நம்பவில்லை என்றும் ஒரு மஹாசக்தி இருப்பதை நம்புவதாகவும் கூறினார்.

ஒரு முறை பேச்சு வாக்கில் அவர், “கடவுள் நுட்பமானவர், தீய நோக்கம் கொண்டவரல்ல (God is Subtle, but not malicious)” என்று கூறினார்.

இதில் பொதிந்திருந்த ஆழ்ந்த அர்த்தத்தை உலகம் கொண்டாடியது. இந்த வார்த்தைகள் அப்படியே அவரது கணிதப் பிரிவில் சலவைக் கல்லில் பொறிக்கப்பட்டு வைக்கப்பட்டிருக்கிறது!

இறைவன் இருக்கிறான் – ஐந்து நிரூபணங்கள்!

விஞ்ஞானிகளின் கருத்துக்கள் இப்படி இருக்க ஆத்திகர்களின் நிரூபணங்கள் அதிரடியாக உள்ளன.

செயிண்ட் தாமஸ் அக்வினாஸ் 1265ஆம் ஆண்டிலிருந்து 1274ஆம் ஆண்டிற்குள்ளாக (ஸம்மோ தியோலாஜிகா என்ற) அரிய ஒரு நூலை எழுதினார். அதில் அவர் இறைவன் இருக்கிறான் என்பதற்கு ஐந்து நிரூபணங்களை வழங்குகிறார்.

  1. இயக்கம் ; நமது புலன்கள் ஒவ்வொரு இயக்கத்தையும் அறிந்து கொள்கிறது. ஒன்றின் மீது இன்னொன்றின் இயக்கம் இருக்கிறது என்பதையும் நம்மால் தெளிவாகப் புரிந்து கொள்ள முடிகிறது. ஆகவே இந்த சங்கிலித் தொடர் போன்ற இயக்கத்திற்கு ஆதி காரணமாக உள்ள இயக்ககர்த்தா ஒருவர் இருக்க வேண்டுமல்லவா, அவர் தான் இறைவன்!
  2. காரணமின்றி எந்த ஒரு காரியமும் நடப்பதில்லை. எந்த ஒரு காரியத்திற்கும் காரணம் இருக்கிறதல்லவா? ஆகவே முதலில் இருக்கும் ஆதி காரணம் எது? அது இல்லாமல் மற்றவை நடக்காது. அந்த முதல் காரணமே இறைவன்!
  3. பொருள்கள் தோன்றுகின்றன; மறைகின்றன! சில சமயம் அவை இருக்கலாம்; சில சமயம் அவை இல்லாமல் போகலாம்! ஆனால் சூனியத்திலிருந்து எதுவும் தோன்ற முடியாதல்லவா? ஏதோ ஒன்று எப்போதும் இருக்க வேண்டுமல்லவா? அந்த முழு முதல் பொருள் தான் இறைவன்!
  4.  வெவ்வேறு விஷயங்களில் வெவ்வேறு அளவான நல்லவை இருக்கிறது. இதை – க்ரேட் செயின் ஆஃப் பீயிங் -“சங்கிலித் தொடர் போன்ற இருக்கை” என்ற அறிவியல் கொள்கை வற்புறுத்துகிறது. உயிரற்ற ஜடத்திலிருந்து ஆரம்பித்து உயிரியல் ரீதியாக சிக்கலான உயிர்கள் வரை இது பல்வேறு அமைப்புக்குக் காரணமாகிறது. இந்த நல்லனவற்றைச் செய்யும் ஒன்று இருக்க வேண்டுமல்லவா? அது தான் இறைவன்!
  5. ஒவ்வொரு வடிவமைப்பிலும் ஒரு ஒழுங்கு, நியதி இருக்கிறது. அது ஒரு லட்சியத்துடன் கூட அமைக்கப்பட்டிருக்கிறது. இந்த அனைத்துமே தற்செயலாக ஏற்பட்டிருக்க முடியவே முடியாது. இவற்றை உருவாக்க ஒரு பேரறிவு வேண்டுமல்லவா? அந்த வாலறிவன் தான் இறைவன்!

நுட்பமாகச் சொல்லப்பட்ட மேற்கண்ட ஐந்து கருத்துக்களை ஆழ்ந்து சிந்தித்தால் இறைத்தன்மை என்னவென்று புரியும்!

உலகின் பெரும் நாத்திகர் ஆத்திகரானார்!

பிரிட்டனைச் சேர்ந்த தத்துவஞானியும் பேராசிரியருமான அந்தோணி ஃப்ளூ (பிறப்பு 11-2-1923 மறைவு 8-4-2010) தனது 87 வருட வாழ்க்கையில் 81 வருடங்கள் வரை நாத்திக பிரச்சாரத்தைத் தீவிரமாக நடத்தி வந்தார். ஆனால் அறிவியல் அடிப்படையிலான ஆதாரங்களையும், விஷயமறிந்தோர் தரும் விளக்கங்களையும் நன்கு சிந்தித்துப் பார்த்தார்; பின்னர் தன் முடிவை மாற்றிக் கொண்டு 2004ஆம் ஆண்டு இறைவன் மீது நம்பிக்கை கொண்டு அதை அனைவரிடமும் கூறி விட்டார்.

அவர், “அறிவு பூர்வமான ஒரு வடிவமைப்பானது இருக்கிறதென்று நான் ஒப்புக் கொள்கிறேன்” என்றார். இண்டெலிஜென்ஸ் டிசைனர் எனப்படும் அறிவுசால் வடிவமைப்பாளர் ஒருவர் இருப்பதை விஞ்ஞானிகளில் பலர் இப்போது ஆதரிக்கின்றனர்.

அது என்ன அறிவார்ந்த வடிவமைப்பாளர்? சூப்பர் இண்டெலிஜென்ஸ் டிசைனர்?!

ஃபிரெடெரிக் ஹேலின் விளக்கம்!

பிரபல வானவியல் விஞ்ஞானியான சர் ஃபிரடெரிக் ஹேல் பற்றி அனைவரும் அறிவர்.

அவர் இதற்கான விளக்கத்தை அழகுற இப்படிக் கூறுகிறார்:

மனிதனின் உடலில் உள்ள செல்கள் அமினோ அமிலங்களால் உருவாக்கப்படுபவை.

“அமினோ அமிலங்கள், தாமாக இயற்கையின் பரிணாமத்தில் ஒன்று சேர்ந்து மனிதனின் செல்லாக உருவானது என்று கூறுவது மகா அபத்தம்! இப்படி ஒரு தற்செயல் சேர்க்கை நடக்க முடியாத ஒன்று என்பதற்கு ஒரு உதாரணம் வேண்டுமானால் சொல்லலாம்!

ஒரு சூறாவளிக் காற்றானது வெகு வேகமாகக் கிளம்பி பழைய இரும்புப் பட்டறையில் இருந்த பாகங்களை எல்லாம் வேகத்துடன் வெளியே கிளப்பி அவை அனைத்தும் தாமாக அந்தந்த இடத்தில் பொருத்தமாக ஒன்று சேர்ந்து ஒரு போயிங் 747 விமானமாக தாமாகவே அசெம்பிள் ஆகி பறக்கத் தயாராகி விட்டது என்று சொல்வது போல இருக்கிறது அமினோ அமிலங்கள் தாமாகச் சேர்ந்து மனித செல்லாக மாறி மனிதன் உருவானான் என்கிற கதை!”

ஹேலின் இந்த விளக்கத்தைப் போல இன்னும் ஒரு விளக்கத்தைத் தந்தார் பாலி என்னும் இன்னொரு அறிஞர்!

பேரறிவு வடிவமைப்பாளன்!

அயல் கிரகம் ஒன்றை ஒரு மனிதன் அடைகிறான் என்று வைத்துக் கொள்வோம். அங்கு தரையில் டிஜிடல் கடிகாரம் ஒன்றை அவன் காண்கிறான். அந்தச் செய்தியை பூமிக்கு அவன் அனுப்பினால் பூமியில் என்ன பரபரப்பு உண்டாகும்? கடிகாரத்தைப் படைத்த ஒருவன் அங்கு இருக்கிறான் என்றல்லவா அர்த்தம் ஏற்படுகிறது!

கையில் கட்டும் கடிகாரத்தைக் காண்பித்தால் அதை உருவாக்கியவன் ஒருவன் இருக்க வேண்டுமல்லவா?

இந்த கடிகார ஒப்புமையை முதலில் சொன்னவர் வில்லியம் பாலி (பிறப்பு :ஜூலை 1743 மறைவு:25-5-1805) என்ற அறிஞர். கோடானுகோடி நட்சத்திரங்களையும், கிரகங்களையும், பால்வீதி மண்டலங்களையும், அவை சுழலுகின்ற சுற்றுப்பாதைகளையும் நிர்ணயித்தவர் யார்? ஒழுங்குபட இயக்குபவர் யார்?

பேரறிவுள்ள வடிவமைப்பாளனே என்ற பாலியின் கொள்கை இப்போது பல விஞ்ஞானிகளும் ஒப்புக்கூடிய ஒரு கருத்தாக ஆகி வருகிறது.

ககாரின், விண்ணிலே கடவுளைப் பார்த்தீர்களா?

ரஷிய விண்வெளி வீரர் யூரி ககாரின் (பிறப்பு 9-3-1934 மறைவு 27-3-1968) வோஸ்டாஸ் விண்கலத்தில் ஏறி 1961ஆம் ஆண்டு ஏப்ரல் மாதம் 12ஆம் தேதி விண்வெளியில் பறந்து மனித குலத்தில் ஒரு புது சகாப்தத்தைத் தோற்றுவித்தார். அவரது சாதனை கண்டு மனித குலம் பிரமித்தது; வியந்தது.

அவர் விண்கலத்திலிருந்து மீண்டும் பூமிக்கு வந்த பின்னர் அவரைப் பாராட்ட ஒரு மாபெரும் விழா ஏற்பாடு செய்ய்ப்பட்டது.

அதைப் பற்றிய ஜோக் ஒன்று உலகெங்கும் பரவலாகப் பரவியது. ஜோக் இது தான்:-

பாராட்டு விழாவில் அப்போது சோவியத் பிரதமராக இருந்த நிகிதா குருஷேவ் கலந்து கொண்டார். அவர் ககாரினிடம், “ககாரின்,  விண்வெளியில் கடவுளைப் பார்த்தீர்களா, எனக்குக் கொஞ்சம் சொல்லுங்களேன்” என்றார்.

அதற்கு உடனே ககாரின், “ஆமாம், ஐயா, அவரைப் பார்த்தேன்” என்றார்.

உடனே குருஷேவ் அவரிடம், “வேறு யாரிடமும் இதைச் சொல்லி விடாதீர்கள்” என்றார்.

 அதே விழாவிற்கு வந்திருந்த ஒரு பாதிரியார் ககாரினிடம், “ககாரின், விண்வெளியில் கடவுளைப் பார்த்தீர்களா?” என்று கேட்டார். அதற்கு ககாரின், “இல்லை ஐயா, பார்க்கவில்லை” என்று பதில் கூறினார். உடனே பாதிரியார், “வேறு யாரிடமும் இதைச் சொல்லி விடாதீர்கள்” என்றார்.

ஜோக் ஒரு புறம் இருக்க, ககாரின் இந்தக் கேள்விக்கு என்ன பதிலைத் தான் உண்மையாகச் சொன்னார்?

அவர் உண்மையாகச் சொன்ன பதில் இது தான்: “ பூமியில் நீங்கள் கடவுளைப் பார்க்கவில்லை எனில் உங்களால் விண்வெளியில் கடவுளைப் பார்க்க முடியாது!”

அர்த்தமுள்ள பதில்! ஆழ்ந்து சிந்தித்தால் உண்மை புரியும் அல்லவா!

திருமூலர், திருஞானசம்பந்தர், கம்பர் வாக்கு!

காலமும் கணக்கும் நீத்த வாலறிவனின் பெருமையைப் பற்றித் திருமூலர்,

ஆர் அறிவார் எங்கள் அண்ணல் பெருமையை
யார் அறிவார் இந்த அகலமும் நீளமும்
பேர் அறியாத பெருஞ்சுடர் ஒன்று அதன்
வேர் அறியாமை விளம்புகின்றேனே

என்று அற்புதமாகக் கூறி விடுகிறார்.

திருஞானசம்பந்தரோ,

ஏதுக்களாலும் எடுத்த மொழியாலும்  மிக்குச்
சோதிக்க வேண்டா சுடர் விட்டுளன் எங்கள்  சோதி
மா துக்கம்  நீங்கல் உறுவீர் மனம் பற்றி வாழ்மின்
சாதுக்கண் மிக்க  இறையே  வந்து சார்மின்களே

என்று கூறி காரணங்களாலும் தர்க்கத்தாலும் சோதனை செய்ய வேண்டாம்; நேராக வந்து இறைவனைப் பற்றுங்கள் என்று அறிவுறுத்துகிறார்.

கவிச்சக்கரவர்த்தி கம்பனோ முத்தாய்ப்பாக மனித குலத்திற்கு ஒரு கருத்தை இராமாயணத்தில் யுத்த காண்டத்தின் கடவுள் வாழ்த்தாக நம் முன் வைக்கிறான் :

ஒன்றே என்னின் ஒன்றேயாம், பல என்று உரைக்கின் பலவேயாம்
அன்றே என்னின் அன்றேயாம், ஆமே என்னின் ஆமேயாம்
இன்றே என்னின் இன்றேயாம், உளது என்று உரைக்கின் உளதேயாம்
நன்றே நம்பி குடி வாழ்க்கை நமக்கு இங்கு என்னோ பிழைப்பு அம்மா!

பொருள்:-

இறைவன் ஒருவனே என்று சொன்னால் அவன் ஒருவன் தான்!

இல்லை, பல என்றால் அவன் பலவே தான்!

அப்படி இல்லை என்றால் இல்லை தான்!

ஆம், அப்படித்தான் என்றால் ஆம் தான்!

இல்லை என்றால் இல்லை; உண்டு என்று சொன்னால் உண்டு தான்!

அனைத்துமே நமது நம்பிக்கையில் தான் இருக்கிறது.

இதை உணர்ந்து கொண்டு வாழ்ந்தால் நமது வாழ்க்கை நன்றாகும்!

அடடா, சரியாகத் தான் சொன்னான், கவிச்சக்கரவர்த்தி கம்பன்!

உள்ளத்தின் உணர்விற்கேற்ப உண்மை அமைகிறது!

நீ எதுவாக நினைக்கிறாயோ அதுவாகவே நீ ஆகிறாய்!

tags — இறைவன் இருக்கிறான், நாத்திகம், ஆத்திகம்

***

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: