சூரியனார் கோவில்! ஆலயம் அறிவோம்! (Post No.9154)

WRITTEN BY BRHANNAYAKI SATHYANARAYANAN

Post No. 9154

Date uploaded in London – –17 January 2021      

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

லண்டனிலிருந்து வாரம் தோறும் ஞாயிற்றுக்கிழமைகளில் ஒளிபரப்பாகும் தமிழ் முழக்கம் நிகழ்ச்சியில் 17-1-2021 அன்று ஒளிபரப்பாகிய உரை.

ஆலயம் அறிவோம்!     வழங்குவது பிரஹன்நாயகி சத்யநாராயணன்.

“ஓம் ஜபா குஸும சங்காஸம் காஸ்யபேயம் மஹாத்யுதிம் |

தமோரிம் ஸர்வபாபக்நம் ப்ரணதோஸ்மி திவாகரம் ||

செம்பருத்தி பூவின் நிறம் உடையவன். காஸ்யபரின் புதல்வன். மிகவும் ப்ரகாசம் உடையவன். இருட்டின் பகைவன். எல்லா பாவங்களையும் அழிப்பவன். அந்த சூரியனை நமஸ்கரிக்கிறேன்.

ஆலயம் அறிவோம் தொடரில் இன்று நமது யாத்திரையில் இடம் பெறுவது  சூரிய தேவன், உஷாதேவி, பிரத்யுஷாதேவியுடன் வீற்றிருக்கும் புகழ் பெற்ற தலமான சூரியனார் கோவில்.  சென்னையிலிலிருந்து இது 312 கிலோமீட்டர் தொலைவில் உள்ளது. கும்பகோணத்திலருந்து 15 கிலோமீட்டர் தொலைவிலும் ஆடுதுறையிலிருந்து 3 கிலோமீட்டர் தொலைவிலும் உள்ளது.

இந்த தலத்தைப் பற்றி ஏராளமான புராண வரலாறுகள் உண்டு.

முன்னொரு காலத்தில் காலவ முனிவர் என்னும் முனிவர் தனக்கு குஷ்ட நோய் வரப்போவதை உணர்ந்து நன்மை தீமைகள் ஏற்படுவதற்கு காரணமாக இருப்பது நவ கிரஹங்களே என்பதால் நவ கிரஹங்களைக் குறித்துக் கடும் தவம் மேற்கொண்டார். தவத்திற்கு இரங்கி நவ கிரஹங்களும் முனிவர் முன் தோன்ற, முனிவர் தனது குறையைக் கூறி தொழு நோய் வராமல் தன்னைக் காக்க வேண்டினார்.  நவகிரஹங்களும் அவருக்கு தொழுநோய் அணுகாத வண்ணம் வரம் அளித்தனர். இதை அறிந்த பிரம்மதேவன், காலதேவனின் துணை கொண்டு அனைத்து உயிர்களுக்கும் பாவ புண்ணிய பலன்களைக் கொடுக்காமல், இப்படி வரம் அளித்தது தவறு என்றும் கூறி, முனிவரது தொழுநோய், நவகிரஹங்களுக்குப் பிடிக்குமாறு சாபம் அளித்தார்.

நவகிரஹங்களும் அவரது அருள் வேண்ட, அவர் கூறிய படியே காவிரியின் வடகரையில் அமைந்துள்ள அர்க்கவனம் என்னும் வெள்ளெருக்கு வனத்தை அடைந்து மும்மூர்த்திகளை நோக்கிக் கடும் தவம் புரிந்தனர். மனம் மகிழ்ந்த மஹேஸ்வரன் அவர்கள் முன் தோன்றி தொழுநோய்  நீங்குமாறு அருள் புரிந்தார். ‘இன்று முதல் இந்தத் தலம் உங்களது தலமாக விளங்கட்டும்’, என்றும் அருள் பாலித்தார்.

அன்று முதல் சிவபிரானது சூலத்தால் தோற்றுவிக்கப்பட்ட சூரிய புஷ்கரணி உள்ளிட்ட நவ தீர்த்தங்களில் நீராடி வழிபடுவோருக்கு நவகிரஹங்களின் அனுக்ரஹம் உண்டாகிறது என்கிறது சூரியனார் கோவிலின் தல புராணம்.

சூரியனின் எதிரே அவரது உக்கிரத்தைத் தணிக்கும் வண்ணம் குரு பகவான் இருக்க அவரையும் வணங்கும் பாக்யத்தைப் பக்தர்கள் பெறுகின்றனர். குருபகவானுக்கு முன்னே வலப்புறமுள்ள படிகளின் வழியே வந்து சனி, புதன், செவ்வாய், சந்திரன், கேது, சுக்கிரன், ராகு ஆகியோரையும் வணங்கி அவர்களின் அருளையும் பக்தர்கள் பெறுகின்றனர்.

இங்குள்ள நவகிரஹங்கள் ஆயுதமும் வாகனமும் இல்லாமல் இரண்டு கரங்களுடன் சாந்தமான, புன்னகை தவழும் முகத்துடன் அனுக்ரஹ மூர்த்திகளாகக் காட்சி அளிப்பதைப் பார்க்கலாம்.

இங்கு சூரியனை வலம் வருபவர்கள் அப்ரதக்ஷிணமாகவே வலம் வருகின்றனர். அதே முறையில் தான் நவ கிரஹங்கள் பிரதிஷ்டை செய்யப்பட்டுள்ளன.

இங்கு சூரியனை வழிபட்டு அவன் அருள் பெற்றோரில், நள மஹாராஜன், பரீட்சித் மஹாராஜன், சித்திராங்கத பாண்டியன், புரூரவசு, சோமசன்மன், இந்திரன் உள்ளிட்ட ஏராளமானோர் அடங்குவர்.

சிவபிரானின் அருளால் இங்குள்ள நவகிரஹங்களும், பரிவார தேவதைகளாக இல்லாமல், முதன்மை தேவதைகளாக இருப்பது இந்தத் தலத்தின் தனிச் சிறப்பாகும்.

இங்குள்ள மூலவரான சூரிய பகவான் அமைக்கப்பட்டுள்ள விதம் அறிவியல் வியக்கும் ஒன்றாகும். வானவியல் தொழில்நுட்பத்தை அடிப்படையாகக் கொண்டு, சூரியன் கிழக்கே தோன்றி வடக்கு நோக்கிச் செல்லும் உத்தராயண காலத்திலும், தெற்கு நோக்கிச் செல்லும் தட்சிணாயன காலத்திலும் ஆண்டுக்கு இரு முறை மூன்று மூன்று நாட்கள் சூரியனுடைய ஒளிக்கதிர்கள் இக்கோயிலின் மூலவரின் பாதங்களில் விழுமாறு அமைக்கப்பட்டுள்ளது.

தென்னகத்தில் சூரியனுக்காக உள்ள தனிக்கோயில் இது ஒன்று தான். ஒரே கோயிலுக்குள் நவகிரஹங்களுக்கு தனித் தனிக் கோயில்கள் கொண்டுள்ள  தலமும் இது தான். சூரியனை வழிபடும் போதே குருபகவானையும் வழிபட வைக்கும் தலமும் இது தான். இரு அசுப கிரஹங்களுக்கு இடையே ஒரு சுப கிரஹம் என்ற முறைப்படி அமைக்கப்பட்டுள்ள அதிசய தலமும் இது தான்.

நவகிரஹங்களும் ஒன்று சேர்ந்து விநாயகரை பிரதிஷ்டை செய்து தங்கள் தோஷங்களை நீக்கிக் கொண்ட தலமும் இது தான். பக்தர்களுக்கு களத்திர தோஷம், பிரதிபந்த தோஷம், புத்திர தோஷம் உள்ளிட்ட அனைத்து தோஷங்களையும் நீக்கும் அற்புத தலம் இது. தோல் வியாதிகள், குஷ்டம் உள்ளிட்ட கொடூரமான வியாதிகள் அனைத்தும் போக பக்தர்கள் இங்கு வந்து வழிபட்டு அவை நீங்கப் பெறுவது அனுபவபூர்வமான உண்மையாகும்.

கோள்வினை தீர்த்த விநாயகருக்கு முன்னே நர்த்தன மண்டபமும், இதற்கு கிழக்கே உற்சவ மூர்த்திகள் எழுந்தருளியுள்ள சபாநாயகர் மண்டபமும், இதற்குக் கிழக்கே காசி விஸ்வநாதர் – விசாலாட்சி எழுந்தருளியுள்ள ஸ்தபன மண்டபமும், இதற்குக் கிழக்கே குரு பகவான் எழுந்தருளியுள்ள மஹா மண்டபமும் உள்ளன. தல விருக்ஷம் வெள்ளெருக்குச் செடியாகும்.

காலம் காலமாக கோடானு கோடி பக்தர்கள் வணங்கி வழிபட்டும் வரும் சூரிய தேவன் அனைவருக்கும் சர்வ மங்களத்தைத் தர ஞானமயம் சார்பில் பிரார்த்திக்கிறோம். வேதத்தில் சூரிய பிரார்த்தனையாக உள்ள மந்திரங்கள் இவை:   பஸ்யேம சரதஸ் ஸதம். சூரிய மண்டலத்தை நூறாண்டுகள் கண்டு வணங்குவோம்.ஜீவேம சரதஸ் ஸதம். அவ்வண்ணமே நூறாண்டு வாழ்வோம். நந்தாம சரதஸ் ஸதம். நூறாண்டு உற்றார் உறவினர்களுடன் கூடிக் குலாவி வாழ்வோம். மோதாம சரதஸ் ஸதம். நூறாண்டு மகிழ்வோம். பவாம சரதஸ் ஸதம்.  நூறாண்டு கீர்த்தியுடன் விளங்குவோம். ஸ்ருணவாம சரதஸ் ஸதம். நூறாண்டு இனியதைக் கேட்போம். ப்ரப்ரவாம சரதஸ் ஸதம். நூறாண்டு இனியதையே பேசுவோம். அஜீதாஸ்யாம சரதஸ் ஸதம். நூறாண்டுகளும் தீமைகளால் ஜெயிக்கப்படாதவர்களாகவே வாழ்வோம். ஜ்யோக்ஸ ஸூர்யம் த்ருசே. இவ்வாறாக, நீண்ட காலம் சூரிய தேவனைப் பார்த்து அனுபவிக்க ஆசைப்படுகிறோம். நன்றி வணக்கம்.

tags– சூரியனார் கோவில்!

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: