பொன் விளைந்த களத்தூர் – பெயர் வரக் காரணம் என்ன? (PostNo.10079)

WRITTEN BY S NAGARAJAN

Post No. 10,079

Date uploaded in London – 11 September   2021         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

தொண்டைமண்டல சதகம் பாடல் 63

பொன் விளைந்த களத்தூர் – பெயர் வரக் காரணம் என்ன?

ச.நாகராஜன்

பொன் விளைந்த களத்தூர் என்று தொண்டை நாட்டில் உள்ள ஊருக்கு அந்தப் பெயர் வரக் காரணம் என்ன?

ஒரு பழம் பெரும் பாடல் அந்தக் காரணத்தைக் கூறுகிறது.

பொன்னெல்லை யெல்லாம் பொதிப்பொதியாப் பூசுரர்க்குச்

செந்நெல்லே போலச் சிறந்தளித்தான் – பள்ளகத்தின்

சீரார் மணியைவிலை செய்யானுஞ் செய்யகளத்

தூரானுஞ் செய்கரும மொன்று என்பதனாற் காண்க

வசையிலா வன் பயன் குன்றும்

இசையிலா யாக்கை பொறுத்த நிலம் (குறள் 239)

புகழ் பெறாமல் வாழ்க்கையைக் கழித்தவருடைய உடம்பைச் சுமந்தால் வசையற்ற வளமான பயனாகிய விளைச்சல் இல்லாமல் நிலம் குன்றி விடும் என்பதை உணர்ந்து கொடுத்து வாழ்ந்தோரே வாழ்ந்தோர். தன்னிடம் இருந்த பொன்னை எல்லாம் பொதி பொதியாகச் செந்நெல் என்று கருதி சிறப்பாக அனைவருக்கும் அளித்தான் ஒருவன். ஆகவே அவன் ஊரில் உள்ள நிலமானது நெல்லையெல்லாம் பொன்னாகவே விளையுமாறு பொன்னையே விளைத்து அளித்தது. அதனால் அந்த ஊரின் பெயரும் பொன் விளைந்த களத்தூர் என்று ஆனது.

இப்படிப்பட்ட ஊரைக் கொண்டது தொண்டை மண்டலம் என்று தொண்டை மண்டல சதகம் பாடல் எண் 63இல் கூறுகிறது.

பாடல் இதோ:-

நன்றாய் விளைந்ததை வேதியர்க்கோந்தந்த நன்மையினாற்

பொன்றான் விளைந்திட நெற்போலவேயதைப் போரடித்துல்

குன்றாக் குவிந்ததை நெற்பரிமாற்றங் கொடுந்தளித்தாள்

மன்றார் களந்தைக் குடிதாங்கியுந் தொண்டை மண்டலமே

 களத்தூரில் குடி தாங்கி முதலியார் என்று ஒரு சிறந்த வள்ளல் வாழ்ந்து வந்தார். தனது வயலில் விளைந்த நெல்லை எல்லாம் நன்கு வேதம் கற்று ஓதும் அந்தணர்க்கு வாரி வாரி வழங்கி வந்தார். இதனால் ஒரு ஆண்டு அவர் நிலங்களில் எல்லாம் நெற்பயிர் பொன் நெல்லாக விளைந்தது. அதைக் கண்ணுற்ற அவர் அந்த பொன் நெல்லையும் சாதாரண நெல்லாகக் கருதி படி படியாக அளந்து அனைவருக்கும் கொடுத்தார். இப்படிப்பட்ட குடி தாங்கி முதலியார் வாழ்ந்ததும் தொண்டை மண்டலத்திலே தான் என்கிறது தொண்டை மண்டலம் சதகம்!

பொன் விளைந்த களத்தூர் செங்கல்பட்டிலிருந்து 10 கிலோமீட்டர் தூரத்தில் உள்ளது.

இதைப் பற்றிய இன்னொரு வரலாறும் உண்டு.

களத்தூர் என்ற ஊரில் உள்ளது பழம் பெரும் சிவன் கோவில் ஒன்று. அந்தக் கோவிலில் சிவனுக்கு சார்த்தப்பட்ட மாலையை ஒரு நாள் அர்ச்சகர் வீட்டுக்குக் கொண்டு வர  அர்ச்சகரின் மனைவி அந்த மாலையைத் தான் போட்டு அழகு பார்த்தாள். அந்த நேரம் பார்த்து அரண்மனைச் சேவகன் வர தான் அணிந்திருந்த மாலையை அவசரம் அவசரமாக அவள் கழட்டிக் கொடுத்து அனுப்பினாள்.

அரசன் அந்த மாலையை வாங்கிய போது அவன் கண்ணில் பட்டது மாலையில் இருந்த நீண்ட ஒரு கேசம் தான்.

வெகுண்ட அரசன் அர்ச்சகரை அழைத்துக் காரணம் கேட்க அவர் அலறிப் போய் அது சிவலிங்கத்தில் இருந்த கேசத்திலிருந்து வந்ததே என்று கூறி விட்டார்.

“நாளை நாம் வந்து சிவலிங்கத்தில் உள்ள கேசத்தைப் பார்க்கிறோம். அது இல்லையேல் உம் தலை உடலில் இருக்காது” என்றான் மன்னன்.

அர்ச்சகர் இரவு முழுவதும் தூங்காமல் தான் வணங்கி வந்த சிவனைத் தொழுத வண்ணம் இருந்தார். “கவலைப்படாதே” என்ற அசரரி ஒலி அவருக்குக் கேட்டது.

மறுநாள் காலை மன்னன் கோவிலுக்கு வந்தான். என்ன ஆச்சரியம்! சிவலிங்கத்தின் மேற்பாகத்தின் முன்புறத்தில் சிகை ஒன்று தொங்கிக் கொண்டிருந்தது. அதனால் அவர் முன்குடுமீஸ்வரர் என்ற பெயரைப் பெற்றார்.

மன்னன் மகிழ்ந்தான். அர்ச்சகரோ சிவ பிரானின் அருளை நினைத்து உளம் நெகிழ்ந்து உருகினார்.

அரசனோ முன்னிலும் பூஜைகள் சிறந்து நடக்க ஏராளமான பொன்னையும் பொருளையும் கொடுத்தான்.இன்றும் பொன் விளைந்த களத்தூரில் உள்ள முன்குடுமீஸ்வரரை அனைவரும் தரிசித்து அருள் பெறலாம்!

இன்னொரு வரலாறும் கூறப்படுகிறது. ஸ்ரீ தேசிகன் ஒரு முறை யாத்திரையாக இந்த ஊருக்கு வந்தார். அவர் தன்னுடன் ஹயக்ரீவரின் விக்ரஹத்தைக் கொண்டு செல்வது வழக்கம். அன்று இரவு அங்குள்ள நிலத்தில் குதிரை ஒன்று மேய்ந்தது. அது மேய்ந்த இடமெல்லாம் பொன்னாக நெற்கதிர்கள் விளைந்தது. ஆகவே இந்த ஊர் பொன் விளைந்த களத்தூர் என்ற பெயரைப் பெற்றது.

  இப்படி பொன் விளைந்த களத்தூர் கூற்றுவ நாயனார் பிறந்த ஊர். தொண்டைமண்டல சதகத்தை இயற்றிய படிக்காசுப் புலவர் பிறந்த ஊரும் இது தான். நள வெண்பாவை இயற்றிப் புகழ் பெற்ற புகழேந்திப் புலவர் பிறந்த ஊர் இது தான். இன்னும் அந்தகக் கவி வீரராகவ முதலியார், நாக்பூர் காங்கிரஸ் மாநாட்டிற்கு தலைமை வகித்த சேலம் வீரராகவாச்சாரியார் இன்னும் பல பெரியோர் பிறந்ததும் பொன் விளைந்த களத்தூரே தான்!

***

tags-பொன் விளைந்த களத்தூர்

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: