ஸ்ரீ குமரகுருபரர்! – 2 (Post No.10,155)

WRITTEN BY S NAGARAJAN

Post No. 10,155

Date uploaded in London – 30 September   2021         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

ஸ்ரீ குமரகுருபரர்! – 2

ஒவ்வொரு ஊராகச் சென்ற குமரகுருபரர் அங்கு அவருடன் வாதுக்கு வந்தோரை வாதில் ஜெயித்து சைவ சித்தாந்தத்தை நிலை நிறுத்தினார். வைத்தீஸ்வரன் கோவிலை அடைந்த குமரகுருபரரின் கனவிலே முருகப் பிரான் காட்சி அளித்து, “எம்மை பாடாமல் விட்டது ஏன்? என்று வினவினார். கண் விழித்தவுடன் குமரகுருபரர் ‘முத்துக்குமாரசாமி பிள்ளைத் தமிழ் என்ற அரிய பிள்ளைத் தமிழ் நூலை இயற்றினார்.

பின்னர் யாத்திரையாக தர்மபுரம் நோக்கிச் சென்ற குமரகுருபரர் தர்மபுர மடத்தின் அதிபதியான மாசிலாமணி தேசிகரைச் சந்தித்து அவரிடம் ஞானோபதேசம் பெற்றார். அவர் குமரகுருபரரை காசிக்குச் சென்று அறப் பணிகளை மேற் கொள்ளுமாறு கூற காசி நோக்கிச் சென்றார் குமரகுருபரர்.

காசியை அப்போது முகலாய மன்னன் ஒருவன் ஆண்டு வந்தான். அவனுக்கு ஹிந்துஸ்தானி பாஷை மட்டுமே தெரியும். குமரகுருபரருக்கோ அந்த மொழி தெரியாது. அவனைத் தனது அறப்பணிகள் நிமித்தமாகச் சந்திக்க விரும்பிய குமரகுருபரர் சரஸ்வதி தேவியைத் துதித்தார். சகலகலாவல்லி மாலை என்ற அற்புதமான நூலை இயற்றினார். சரஸ்வதியின் அருளால் ஹிந்துஸ்தானி மொழியில் அவர் வல்லவரானார்.

அரசனைச் சந்திக்க அவர் கிளம்பினார். ஆனால் அரசனோ அவருக்கு உரிய ஆசனத்தைத் தந்து கௌரவிக்கவில்லை. ஆகவே குமரகுருபரர் ஒரு சிங்கத்தின் முதுகின் மீது அமர்ந்து அரசவைக்குச் சென்றார். இதனால் வியப்புற்ற மன்னன் அவரது பெருமையை உணர்ந்து அவரைத் தக்கபடி வரவேற்றான்.

சுல்தான் குமரகுருபரரைக் கௌரவிப்பதைக் கண்டு பொறாமை கொண்ட மகமதிய முல்லாக்கள் மன்னரிடம் அவருக்குப் பெரும் அவமதிப்பை உருவாக்க எண்ணினர். அரசனிடம் அவர்கள், குமரகுருபரர் கல்வி கேள்விகளில் வல்லவர் என்றாலும் கூட அவர் வணங்கும் தெய்வம் மெய்யான தெய்வம் இல்லை; அப்படி மெய்யான தெய்வம் என்று அவர் கூறினால் அதை அவர் நிரூபிக்க வேண்டும்“ என்றனர். அரசனும் அவரை அவைக்கு அழைத்தான். குமரகுருபரரிடம் அவர் வணங்கும் தெய்வம் மெய்யான தெய்வம் எனில் அவர் பழுக்கக் காய்ச்சிய இரும்பைக் கையில் பிடித்துக் காண்பிக்க வேண்டும் என்று நிபந்தனை விதித்தனர் முல்லாக்கள். குமரகுருபரரும் இதை ஏற்றார். பழுக்கக் காய்ச்சிய இரும்பைக் கையிலே பிடித்த குமரகுருபரர், “சிவனே முழு முதல் கடவுள் என்பது உண்மையெனில் இந்தப் பழுக்கக் காய்ச்சிய இரும்பு என்னைச் சுடாதிருக்கட்டும் என்று முழங்கினார். காய்ச்சிய இரும்பு அவரைச் சுடவில்லை. மகமதிய குருமார்கள் தலை கவிழ்ந்து நிற்க சுல்தானோ அவரிடம் மன்னிப்புக் கேட்டுக் கொண்டான். குமரகுருபரர் கேட்டுக் கொண்ட படி மடம் ஒன்று நிறுவுவதற்கான சகல உதவிகளையும் செய்து மடத்திற்கான இடத்தையும் அளித்தான். ஆக இப்படித் தான் குமாரசாமி மடம் என்று அனைவராலும் அழைக்கப்படும் காசி மடம் உருவானது.

குமரகுருபரர் சிங்கத்தின் மீது அமர்ந்து அரசவைக்குச் சென்ற சம்பவம் உண்மை தான் என்பதை நிரூபிக்கும் வகையில் இந்தக் காசி மடத்தில் அவர் சிங்கத்தின் மீது அமர்ந்திருக்கும் கற்சிலை இன்றும் காணக்கூடிய படி அங்கு உள்ளது. காசியில் குமரகுருபரர் வசித்த காலத்தில் அவர் நிகழ்த்திய அற்புதங்கள் ஏராளம்.

ஒரு நாள் சுல்தான் அவரைத் தன்னுடன் உணவருந்தும்படி அழைத்தான். குமரகுருபரரும் இசைந்தார். தனது பணியாளர் ஒருவரை ஒரு தட்டிலே செவ்வலரி  மலரை வைத்து அதைக் கொண்டு வரச் செய்து அரசனுடன் விருந்துண்ணச் சென்றார் அவர். “தட்டிலே என்ன? என்று அவன் கேட்க, “அது பன்றி மாமிசம் என்றார் குமரகுருபரர். இதனால் மிகுந்த வெறுப்புக்குள்ளானான் அவன். குமரகுருபரரோ, “இறைவனால் படைக்கப்பட்ட அனைத்தையும் விருப்பு வெறுப்பு இன்றி நோக்க வேண்டும் என்று உபதேசித்ததோடு அரசன் தட்டிலே இருந்த புலால் உணவு அனைத்தையும் சைவ உணவாக மாற்றினார். அரசனுக்கு சைவ உணவின் மேன்மையைப் பற்றி புலப்படுத்தினார்.

கேதார் கட்டில் முகமதியர் மறைத்து வைத்திருந்த கேதார லிங்கத்தை வெளிப்படுத்தி முறையாக பூஜை நடத்த அவர் வழி வகுத்தார். நேபாளத்தில் முகரங்கி என்னுமிடத்தில் ஒரு திருமடத்தை நிர்மாணிக்க தனது அன்பரான வாகீச முனிவர் என்பவரிடம் சொல்லி அதை நிர்மாணிக்க வழி வகை செய்தார்.

காலம் செல்லச் செல்ல குமரகுருபரர் தனது இறுதி நெருங்குவதை உணர்ந்து தமக்குப் பின் பணிகளைத் தொடர்ந்து செய்ய தமது சீடர்களுள் ஒருவரான சொக்கநாத முனிவரை அதற்கெனத் தேர்ந்தெடுத்தார்.

வைகாசி மாதம் தேய்பிறை மூன்றாம் நாளில் அவர் காசி விஸ்வநாதருடன் கலந்தார். இன்னொரு வரலாற்றுச் செய்தி அவர் கங்காநதியில் சென்று மறைந்து கலந்தார் என்று தெரிவிக்கிறது.

தமிழுக்கு குமரகுருபரர் ஆற்றிய நற்பணி சொற்களினால் விளக்க முடியாதபடி எல்லையற்றுப் பரந்த ஒன்றாகும். அவர் தன் வாழ்நாளில் 16 நூல்களை இயற்றியருளினார். கந்தர் கலி வெண்பா, கைலைக் கலம்பகம், மீனாட்சியம்மை பிள்ளைத் தமிழ், மீனாட்சியம்மை குறம், மீனாட்சியம்மை இரட்டை  மணி மாலை, மதுரைக் கலம்பகம், நீதி நெறி விளக்கம், திருவாரூர் நான்மணி மாலை, முத்துக்குமாரசுவாமி பிள்ளைத் தமிழ், சிதம்பர மும்மணிக் கோவை, சிதம்பரம் செய்யுட் கோவை, சிவகாமி அம்மை இரட்டை மணி மாலை, பண்டார மும்மணிக் கோவை, காசிக் கலம்பகம், சகலகலாவல்லி மாலை, காசித் துண்டி விநாயகர் பதிகம் ஆகியவை அவர் இயற்றி அருளிய நூல்களாகும். இந்த நூல்கள் பலவற்றையும் www.projectmadurai.org  உள்ளிட்ட பல இணையதளங்களில் காணலாம்.

குமரகுருபரரைப் பற்றி திரிசிரபுரம் மகா வித்துவான் மீனாட்சி சுந்தரம் பிள்ளை 338 செய்யுள்களில் ஸ்ரீ குமரகுருபர சுவாமிகளின்  சரித்திரம் என்ற நூலை இயற்றியுள்ளார். சேற்றூர் இரா. சுப்பிரமணியக் கவிராயர் என்பவர் 1001 பாடல்கள் அடங்கிய ஸ்ரீ குமரகுருபர சுவாமிகள் புராணம் என்ற நூலை இயற்றியுள்ளார்.

குமரகுருபரரின் பக்தியையும் அவர் பா நயத்தையும் மேற்படி நூல்களில் காணலாம். சொல் நயம், கற்பனை நயம், பொருள் நயம் என அனைத்து நயங்களிலும் அவர் மேலோங்கி நிற்பதற்குச் சில உதாரணங்களை மட்டும் இங்கு பார்ப்போம். இறைவனது எல்லையற்ற தன்மையை அவர் விளக்கும் பாங்கு அற்புதமாக உள்ளது:

“இலதென உளதென இலதுள தெனுமவை

அலதென அளவிட அரியதோர் அளவினை

குறியிலன் அலது ஒரு குணம் இலன் என நினை

அறிபவ ரறிவினும் அறிவரும் நெறியினை என மதுரைக் கலம்பகத்தில் வரும் பாடல் அருமையான ஒன்று.

தொடரும்

*

TAGS- குமரகுருபரர்! – 2

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: