திருவான்மியூர் ஆலயம் அறிவோம் (Post No.10,366)

WRITTEN BY BRHANNAYAKI SATHYANARAYANAN

Post No. 10,366

Date uploaded in London – –   22 NOVEMBER  2021         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

லண்டனிலிருந்து ஞாயிறுதோறும் இந்திய நேரம் மாலை 6.30க்கு ஒளிபரப்பாகும் தமிழ்முழக்கம் நிகழ்ச்சியில் 21-11-2021 அன்று ஒளிபரப்பான உரை!

திருவான்மியூர்

நீதி நின்னை அல்லால் நெறி யாதும் நினைந்து அறியேன்

ஓதீ நால்மறைகள் மறையோன் தலை ஒன்றினையும்

சேதீ சேதம் இல்லாத திருவான்மியூர் உறையும்

ஆதீ உன்னை அல்லால் அடையாது எனது ஆதரவே!

திருஞானசம்பந்தர் திருவடி போற்றி!

ஆலயம் அறிவோம்! வழங்குவது பிரஹன்நாயகி சத்யநாராயணன்.

    ஆலயம் அறிவோம் தொடரில் இன்று நமது யாத்திரையில் இடம் பெறுவது  சென்னை நகரின் தென் பகுதியில் அமைந்துள்ளதும் ஆதி கவியான வால்மீகி பெரும் தவத்தை இயற்றிய தலமுமான திருவான்மியூர் திருத்தலம் ஆகும். இங்கு தான மருந்தீஸ்வரர் சிவாலயம் அமைந்துள்ளது.

இங்கு ஸ்வயம்பு லிங்கமாக அமைந்துள்ள இறைவனின் திருநாமம் : ஸ்ரீ மருந்தீஸ்வரர் அல்லது பால்வண்ண நாதர்

அம்மன் : திரிபுரசுந்தரி, சொக்க நாயகி

ஸ்தல வ்ருக்ஷம் : வன்னி மரம் 

தீர்த்தம் : சிவபிரானின் சடையிலிருந்த கங்கையிலிருந்து சிந்திய ஐந்து துளிகள் இங்கு ஐந்து தீர்த்தங்களாக உருவெடுத்துள்ளன. ஆலயத்தின் கிழக்குக் கோபுரத்திற்கு அருகே சித்திரை குளம் என்ற இந்திரனுக்கு நற்கதி அளித்த புனலையும் காணலாம்.

இத்தலத்தைப் பற்றிய புராண வரலாறு பிரசித்தி பெற்ற ஒன்று. ஒரு சமயம் காமதேனு வசிஷ்ட மஹரிஷியிடம் சற்று அவமரியாதையாக நடந்து கொண்டது. அதனால் கோபம் கொண்ட வசிஷ்டர், “நீ பூலோகத்தில் பசுவாகப் பிறப்பாயாக” என்று சாபமிட்டார்.தன் தவறை உணர்ந்து வருந்திய காமதேனு சாப விமோசனம் அருளுமாறு வசிஷ்டரை வணங்கிக் கேட்க, அவர், “திருவான்மியூரில் எழுந்தருளியுள்ள மருந்தீஸ்வரரை வணங்கி அவருக்குத் தினமும் பால் அபிஷேகம் செய்து வா, உனக்கு சாப விமோசனம் ஏற்படும்” என்றார். அதன்படியே காமதேனுவும் தினமும் சிவலிங்கத்தின் மீது பாலாய்ப் பொழிந்து அபிஷேகம் செய்து வந்தது. சாப விமோசனமும் பெற்றது. பால் பொழிவினால் வெண்மையாக லிங்கம் காட்சி அளிக்க அவர் பால்வண்ன நாதர் என்ற பெயரைப் பெற்றார். மூலவர் சுமார் ஒன்றரை அடி உயரத்துடன் சற்றே சாய்ந்த தோற்றத்துடன் காட்சி அளிக்கிறார். வேட்டையாட வந்த சதயூ மன்னனிடமிருந்து தப்பிச் சென்ற காமதேனுவின் குளம்புகள் ஈசனின் மீது பட்டது. அந்த வடுவை இன்றும் ஈசனிடம் காணலாம்.

இத்தலம் பற்றிய இன்னொரு புராண வரலாறும் உண்டு.

கயிலை மலையில் சிவ பார்வதி திருமணம் நடக்கும் போது அனைவரும் அங்கு கூடவே வடபுலம் தாழ்ந்து தென்புலம் உயர்ந்தது. உடனே அதை சமன் செய்ய தென்புலம் செல்லுமாறு ஈசன் அகத்தியரிடம் கூறவே அகத்தியரும் தென் புலம் வந்தார். அவருக்குத் தனது கல்யாண கோலத்தை இங்கு வன்னி மரத்தடியில் ஈசன் காட்சி அளித்தார். அத்துடன் அகஸ்திய மஹரிஷிக்கு இறைவன்  உலகில் உள்ள அனைத்து வகையான நோய்களைப் பற்றியும் அதைத் தீர்ப்பதற்கான மூலிகைகள் மற்றும் மருந்துகள் பற்றியும் கூறி அருள் பாலித்தார். ஆகவே தான் இங்குள்ள இறைவன் மருந்தீஸ்வரர் என்று அழைக்கப்படுகிறார்.

ஆதி காவியமான ராமாயணத்தை இயற்றிய வால்மீகி மஹரிஷி நாரதரிடம் முக்திப் பேறுக்கான வழி கேட்க அவர் இங்கு வந்து அவரைத் தவம் புரியச் சொன்னார். அவருக்கும் வன்னி மரத்தடியில் ஈசன் தரிசனம் தந்து அருள் பாலித்தார். இன்னொரு தகவலின் படி மார்க்கண்டேய மஹரிஷி வால்மீகி முனிவரை எங்கு அவர் இறைவனின் அசரீரியைக் கேட்கிறாரோ அங்கு அவருக்கு முக்தி கிடைக்கும் என்று சொல்ல வால்மீகி மஹரிஷி இங்கு வரும் போது அவருக்கு “நான் இங்கு உள்ளேன்” என்ற அசரீரி கேட்கவே இங்கேயே அவர் தவம் புரிந்து முக்தி அடைந்தார். அவரது பெயரால் இந்த இடம் திரு வால்மீகிநகர் என்று ஆனது. காலப்போக்கில் மருவி திருவான்மியூர் ஆயிற்று.

ஒரு முறை சூரிய பகவானுக்குப் பல அசுரர்கள் தொல்லை தரவே அவரால் தனது பணியைச் சரிவரச் செய்ய முடியவில்லை. ஆகவே அவரே நேராக இங்கு வந்து ஈஸ்வரனைத் துதிக்க அவரது தொல்லை ஒரு முடிவுக்கு வந்தது. அவர் மாலை நேரத்தில் தொழுவதற்கு வசதியாகவே இங்குள்ள லிங்கம் மேற்குப் பார்த்து இருப்பதாக ஐதீகம்.

சுமார் ஒரு ஏக்கர் பரப்பில் அமைந்துள்ளது இந்த பிரம்மாண்டமான கோவில். ஆலயத்தின் கிழக்கில் ஏழு நிலை இராஜகோபுரமும் அதையடுத்து 5 நிலை கோபுரமும் மேற்கில் 5 நிலை கோபுரமும் உள்ள இந்தத் திருக்கோவிலில் பக்தர்கள் நெடுஞ்சாலையைப் பார்த்து அமைந்துள்ள மேற்கு வாயில் வழியே உள்ளே செல்கின்றனர். கிழக்கு கோபுரத்தின் வழியாக உள்ளே சென்றவுடன் வலது புறத்தில் பிரசித்தி பெற்ற 36 தூண்கள் கொண்டுள்ள தியாகராஜ மண்டபம் உள்ளது. இங்கு தியாகராஜர் பத்ர பீடத்தில் அமர்ந்து தரிசனம் தருகிறார். கிழக்கு வெளிப் பிரகாரத்தில் வலது புறம் திரிபுரசுந்தரி தனி சந்நிதியில் தெற்கு நோக்கி நான்கு கரங்களுடன் காட்சி தந்து அருள் பாலிக்கிறார். அவரது இரு கரங்கள் அங்குச பாசங்களை ஏந்தியுள்ளன. மற்ற இரு கரங்கள் அபய முத்திரைகளைப் பெற்றுள்ளன. கிழக்கு வெளி பிரகாரத்தில் விநாயகர், சுப்ரமண்யர் சந்நிதிகள் உள்ளன.நாயன்மார்கள்,தொகையடியார்கள் நம்பியாண்டார் நம்பி, சேக்கிழார் உள்ளிட்ட பலரையும் இங்கு தரிசித்து வணங்கலாம்.

இத்தலத்தில் திருஞானசம்பந்தர் இரு பதிகங்களையும் அப்பர் பிரான் ஒரு பதிகத்தையும் பாடி அருளியுள்ளனர். அருணகிரிநாதர் ஒரு திருப்புகழ் பாடலைப் பாடியுள்ளார். திருவான்மியூர் தல புராணம் இத்தலம் பற்றிய ஏராளமான திவ்ய வரலாறுகளை எடுத்துரைக்கிறது.

காலம் காலமாக ஆயிரக்கணக்கான பக்தர்களுக்கு அருள்பாலித்து வரும் மருந்தீஸ்வரரும் திரிபுரசுந்தரியும் அனைவருக்கும் சர்வ மங்களத்தைத் தர ஞானமயம் சார்பில் பிரார்த்திக்கிறோம்.              

திருநாவுக்கரசரின் அருள் வாக்கு இது:                                                                                                                      ஆதியும் அரனாய் அயன் மாலுமாய்ப்

பாதி பெண் உரு ஆய பரமன் என்று

ஓதி உள் குழைந்து ஏத்த வல்லார் அவர்

வாதை தீர்த்திடும் வான்மியூர் ஈசனே!

நன்றி, வணக்கம்!                                  

***

tags- மருந்தீஸ்வரர், திருவான்மியூர், வால்மீகி

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: