உலக இந்து சமய செய்தி மடல் 12-12-2021 (Post No.10,437)

Compiled BY LONDON SWAMINATHAN
Post No. 10,437
Date uploaded in London – – 12 DECEMBER 2021

Contact – swami_48@yahoo.com
Pictures are taken from various sources for spreading knowledge.
this is a non- commercial blog. Thanks for your great pictures.
tamilandvedas.com, swamiindology.blogspot.com

இன்று ஞாயிற்றுக் கிழமை டிசம்பர் 12-ஆ ம் தேதி 2021 ஆம் ஆண்டு
இது ‘ஆகாச த்வனி’ யின் உலக இந்து சமய செய்தி மடல் நேயர்கள் அனைவருக்கும் வணக்கம்,

நமஸ்காரம் செய்திகள் வாசிப்பது VAISHNAVI ANAND

எங்கள் நிகழ்ச்சிகளை ஞாயிற்றுக் கிழமை தோறும் லண்டன் நேரம் பிற்பகல் 1 மணிக்கும், இந்திய நேரம் மாலை 6-30 மணிக்கும் FACEBOOK.COM/ GNANAMAYAM மற்றும் ZOOM வழியாக நேரடியாகக் கேட்கலாம்./ காணலாம்.
XXX
இந்து வழிபாட்டு தலங்கள் இழந்த பெருமைகளை பிரதமர் மோடி மீட்டு வருகிறார் -அமித் ஷா புகழாரம்
குஜராத் மாநிலம் அகமதாபாத்தில், கட்வா படிதர் பிரிவின மக்களின் இஷ்ட தெய்வமான மா உமியாவிற்கு ரூ.1,500 கோடி மதிப்பீட்டில் உமியாதம் கோவில் கட்டப்படுகிறது. 74 ஆயிரம் சதுர அடி நிலப்பரப்பில் இந்த கோவில் அமைகிறது. இதற்கான அடிக்கல் நாட்டு விழாவில் மத்திய உள்துறை அமைச்சர் அமித் ஷா பங்கேற்று கோவில் கட்டும் பணியை தொடங்கி வைத்தார்.

விழாவில் அவர் பேசியதாவது:-

மொகலாய மன்னர் ஔரங்கசிப் காலத்தில் பலமுறை தகர்க்கப்பட்ட வாரணாசி காசி விஸ்வநாதர் கோயிலை மேம்படுத்தும் பணிகள் நிறைவு பெற்றுள்ளது. பிரதமர் மோடியால் புதுப்பிக்கப்பட்ட அந்த கோயில் திறப்பு நிகழ்ச்சியை 13ம் தேதி நாம் பார்க்கலாம்.

கேதார்நாத் கோயிலில் உள்ள ஆதி சங்கராச்சாரியாரின் சிலை, கடந்த 2013ம் ஆண்டு அப்பகுதியில் ஏற்பட்ட வெள்ளத்தால் பாதிக்கப்பட்டது. அது புதுப்பிக்கப்பட்டு பிரதமர் மோடியால் திறக்கப்பட்டது.

பல காலமாக இந்து வழிபாட்டுத் தலங்கள் அவமானப்படுத்தப்பட்டு வந்தன. அவற்றின் பெருமைகளை மீட்டு வர யாரும் முன்வரவில்லை. 2014ம் ஆண்டு முழு பெரும்பான்மையுடன் மத்தியில் பிரதமர் மோடி ஆட்சி தொடங்கியது. இழந்த பெருமைகள் மீட்கப்பட்டதுடன், தற்போது இந்து வழிபாட்டு தலங்கள் எந்தவித அச்சமுமின்றி புதுப்பிக்கப்பட்டு வருகின்றன.

முன்பெல்லாம் மக்கள் கோயில்களுக்கு செல்ல வெட்கப்பட்டார்கள். தற்போது மோடி அரசாங்கம் என்ற புதிய சகாப்தம் தொடங்கி உள்ளது. கங்கை ஆரத்தி நிகழ்ச்சியில் பிரதமர் மோடி பங்கேற்றுள்ளார்.

கோயில்கள் என்பது வெறும் மத வழிபாட்டு மையங்களாக இல்லாமல், சமூக சேவை மையங்களாகவும் உள்ளன. வாழ்க்கையில் ஏமாற்றம் அடைந்தவர்கள் தங்கள் சிரமங்களைத் தாண்டி முன்னேறிச் செல்வதற்கான ஆற்றல் தரும் மையங்களாகவும் அவர் திகழ்கின்றன.
இவ்வாறு தமது பேச்சில் மத்திய உள்துறை அமைச்சர் அமித் ஷா குறிப்பிட்டார்.
விஸ்வநாதர் கோவில் வளாகம்: காசியில் 13ல் பிரதமர் மோடி திறப்பு
பிரதமர் மோடியின் சொந்த தொகுதியான, உத்தர பிரதேச மாநிலம் வாரணாசியில், கங்கை கரைகளுடன் விஸ்வநாதர் கோவிலை இணைக்கும் வகையில், 600 கோடி ரூபாயில் கட்டப்பட்டுள்ள விஸ்வநாதர் கோவில் வளாகத்தை, பிரதமர் மோடி வரும், 13ம் தேதி திறந்து வைக்கிறார்.
விஸ்வநாதர் கோவிலை, கங்கை கரைகளுடன் இணைக்கும் வகையில், 600 கோடி ரூபாய் மதிப்பிலான காசி விஸ்வநாதர் கோவில் வளாக திட்டம், 2018ல் துவக்கப்பட்டது.

XXXX

தமிழ் தாய் வாழ்த்து இறைவணக்கப் பாடலே

பாடும் போது எழுந்து நிற்க வேண்டும் என எந்த உத்தரவும் இல்லை:உயர்நீதிமன்ற மதுரை கிளை கருத்து

மதுரை:சென்னையில் நடந்த விழா ஒன்றில் தமிழ்தாய் வாழ்த்து பாடப்பட்ட போது காஞ்சி விஜயேந்திர சரஸ்வதி சுவாமிகள் அமர்ந்திருந்ததாக சர்ச்சை எழுந்த நிலையில், இதுதொடர்பான வழக்கை விசாரித்த உயர்நீதிமன்றம் மதுரை கிளை, ‛தமிழ்தாய் வாழ்த்து இறை வணக்கம் பாடலே. அப்பாடல் பாடப்படும் போது எழுந்திருக்க நிற்க வேண்டும் என எந்த உத்தரவும் இல்லை,’ என குறிப்பிட்டது.
சென்னை மியூசிக் அகாடமியில் 2018 ஜன., 24ல் தமிழ் சமஸ்கிருத டிக் ஷனரி வெளியீட்டு விழா நடந்தது. அப்போதைய கவர்னர் பன்வாரிலால் புரோகித் வெளியிட்டார். காஞ்சி மடாதிபதி விஜயேந்திரசரஸ்வதி சுவாமிகள் பங்கேற்றார். இவ்விழாவில் தமிழ்தாய் வாழ்த்து பாடப்பட்ட போது மடாதிபதி அமர்ந்திருந்தாக சர்ச்சை எழுந்தது.

நாம்தமிழர் கட்சி நிர்வாகி கண்.இளங்கோ தலைமையில் 12 பேர் ராமேஸ்வரம் காஞ்சி மடத்தில் செருப்புகளுடன் நுழைந்து போராட்டத்தில் ஈடுபட்டனர். அவர் மீது காஞ்சி மடத்தின் மேலாளர் போலீசில் புகார் கொடுத்தார். அதன்படி கண்.இளங்கோ மீது போலீசார் வழக்கு பதிவு செய்தனர். அந்த வழக்கை ரத்து செய்ய கோரி கண்.இளங்கோ உயர்நீதிமன்றம் மதுரை கிளையில் மனு செய்தார்.

மனுவை விசாரித்த நீதிபதி ஜி.ஆர்.சுவாமிநாதன் பிறப்பித்த உத்தரவில் கூறியதாவது:
மனுதாரர் தரப்பில் நடந்த சம்பவத்திற்கு வருத்தம் தெரிவித்து மடத்தின் மேலாளரிடம் கடிதம் வழங்கப்பட்டதாக தெரிவிக்கப்பட்டது. அதை மடத்தின் மேலாளரும் நீதிமன்றத்தில் குறிப்பிட்டிருக்கிறார். இந்த விவகாரம் முடித்து வைக்கப்படுவதாக கருதுகிறேன்.
இந்த வழக்கில் சில விஷயங்களை குறிப்பிட வேண்டும்.
மனுதாரர் தமிழ் ஆர்வலரா என இந்த நீதிமன்றம் கேள்வி எழுப்பிய போது ஆம் என்றார். அவரிடம் ஐந்து திருக்குறளை தெரிவிக்க கேட்கப்பட்டது. அவரால் கற்க கசடற சொல்ல முடிந்தது. உழுதுண்டு வாழ்வாரே வாழ்வார் என்ற குறளை கூற கஷ்டப்பட்டார். இதை சுட்டிகாட்டுவதன் மூலம் மனுதாரரை சங்கடப்படுத்தவில்லை.

இருப்பினும் 1970 ஜூன் 17 ல் தமிழ்நாடு அரசு ஒரு உத்தரவு பிறப்பித்துள்ளது. அதில் அரசு துறைகள், கல்வி, உள்ளாட்சி நிறுவன விழாக்களில் தொடக்கமாக நீராருங்கடலுடுத்த என்ற தமிழ் தாய் வாழ்த்து பாடலை பாட வேண்டும் என குறிப்பிட்டுள்ளது. மேலும் இசையமைப்பாளர் எம்.எஸ்.விஸ்வநாதன் இசையமைத்த இந்த பாடலை மோகன ராகத்தில் பாடவும் சுட்டிகாட்டியுள்ளது. எனவே தமிழ்தாய்வாழ்த்து இறை வணக்க பாடல் மட்டுமே. அது கீதம் இல்லை.

மத்திய அரசின் உள்துறை 2015 ஜன., 5ல் பிறப்பித்த உத்தரவில் தேசிய கீதம் பாடும்போது பார்வையாளர்கள் எழுந்திருக்க வேண்டும் என உத்தரவிட்டுள்ளது. அதன்படி சினிமா தியேட்டர்களில் படம் திரையிடுவதற்கு முன் தேசிய கீதம் இசைக்கவும், அனைவரும் எழுந்து நிற்கவும் அறிவுறுத்தியுள்ளது.
தமிழ்தாய் வாழ்த்து பாடல் இறை வணக்கம் பாடல் தான். தமிழ்தாய் வாழ்த்து பாடும் போது பார்வையாளர்கள் எழுந்திருக்க வேண்டும் என இதுவரை எந்த உத்தரவும் பிறப்பிக்கப்படவில்லை. இருப்பினும் தமிழ் தாய் வாழ்த்து பாடும் போது பார்வையாளர்கள் எழுந்து மரியாதை தருகின்றனர். சமூகத்தில் சந்நியாசிக்கு என சிறப்பு இடம் அளிக்கப்படுகிறது. அவர் தியான நிலையில் அமர்ந்திருந்தது குறிப்பிடத்தக்கது
XXX

சிவாலயங்களில் திருவாதிரை விழா துவங்கியது

தமிழ் நாட்டிலுள்ள சிதம்பரம் உள்ளிட்ட சிவன் கோவில்களில் திருவாதிரை விழா துவங்கியது
நெல்லையப்பர், செப்பறை அழகிய கூத்தர் கோயில்களில் மார்கழி திருவாதிரை திருவிழா கொடியேற்றத்துடன் 11ம் தேதி காலை தொடங்கியது. நெல்லை டவுனில் பிரசித்திபெற்ற சுவாமி நெல்லையப்பர், காந்திமதி அம்பாள் கோயிலில் மார்கழி திருவாதிரை திருவிழா ஆண்டுதோறும் 10 நாட்கள் வெகு விமரிசையாக நடைபெறும்.
குற்றாலம் திருக்குற்றால நாதசுவாமி திருக்கோவிலில் திருவாதிரை திருவிழா கொடியேற்றத்துடன் துவங்கியது. வரும் 15ம் தேதி தேரோட்டம் நடக்கிறது. 18ம்தேதி காலை 10 மணிக்கு மேல் சித்திர சபையில் பச்சை சாத்தி தாண்டவ தீபாராதனை நடக்கிறது. 20ம் தேதி அதிகாலை 4 மணிக்கு மேல் சித்திர சபையில் ஆருத்ரா தரிசன தாண்டவ தீபாராதனையும், 5 மணிக்கு மேல் திரிகூட மண்டபத்தில் ஆருத்ரா தரிசன தாண்டவ தீபாராதனையும் நடக்கிறது.
XXXX
வடபழநி ஆண்டவர் கோவிலில் ஜன.,23ல் கும்பாபிஷேகம்
‘வடபழநி ஆண்டவர் கோவிலில், திருப்பணிகள் மிக நேர்த்தியாக நடைபெற்று வருகின்றன. அதன் கும்பாபிஷேகம் ஜன., 23ம் தேதி விமர்சையாக நடத்தப்படும்,” என அமைச்சர் சேகர்பாபு தெரிவித்தார்.
கும்பாபிஷேகத்திற்கான திருப்பணிகள் விரைவுப்படுத்தப்பட்டன. தற்போது, திருப்பணி இறுதி கட்டத்தை எட்டியுள்ளது.

கோவிலில் உள்ள தியான மண்டபம், அபிஷேக மண்டபம், மடப்பள்ளி உள்ளிட்ட மண்டபங்கள் பழமை மாறாமல் புதுப்பிக்கப்பட்டுள்ளன. 33 அடி உயர தங்கத்தகடு வேயப் படும் கொடிமரம், அழகிய வடிவில் இடம் பெற உள்ளது .இக்கோவிலின் மரத்தேர், தங்கத்தேர் அழகுற புதுப்பிக்கப்பட்டு, பக்தர்கள் நேர்த்திக்கடன் செலுத்த தயார் நிலையில் வைக்கப்பட்டுள்ளன. .வடபழநி ஆண்டவர் கோவில் அருகில் உள்ள, பழமை வாய்ந்த ஆதிமூல பெருமாள் கோவிலிலும் திருப்பணிகள் துவக்கப்பட்டு, சம்ப்ரோக்ஷணம் நடத்தப்படும்.

XXX
பிபின் ராவத், உயிரிழந்த அதிகாரிகளின் முக்திக்காக மோட்ச தீபம்

காஞ்சிபுரம் ஜகத்குரு சங்கராச்சார்ய சுவாமி ஸ்ரீமடம் வெளியிட்டுள்ள அறிக்கை:குன்னுார் ஹெலிகாப்டர் விபத்தில், ராணுவ முப்படை தளபதி பிபின் ராவத், மனைவி மற்றும் சக அதிகாரிகளின் மறைவு மிகவும் துரதிஷ்டவசமானது. நம் நாட்டுக்கு பேரிழப்பாக அமைந்துள்ளது.
ஹெலிகாப்டர் விபத்தில் உயிரிழந்த முப்படைகளின் தளபதி பிபின் ராவத் மற்றும் உயிரிழந்த அதிகாரிகளின் முக்திக்காக, காஞ்சி காமாட்சி அம்மன் கோவிலில், மோட்ச தீபம் ஏற்றப்பட்டுள்ளது
பிபின் ராவத் ராணுவத்தில் பல்வேறு உயர் பதவிகளை வகித்தவர். அவரது தியாகம் மற்றும் சேவை என்றும் நினைவுகூரப்படும். மறைந்தவர்களின் முக்திக்காக, காஞ்சி காமாட்சி அம்மன் கோவிலில், மோட்ச தீபம் ஏற்றப்பட்டுள்ளது. இவ்வாறு, அறிக்கையில் தெரிவிக்கப்பட்டுள்ளது.
திருவண்ணாமலையில் விஸ்வ ஹிந்து பரிஷத் சார்பில், அருணாசலேஸ்வரர் கோவிலில் மோட்ச தீபம் ஏற்றப்பட்டது. பின், பிபின் ராவத் உருவப் படத்திற்கு மலர் துாவி அஞ்சலி செலுத்தி மரியாதை செலுத்தினர்.
பொதுமக்கள் அஞ்சலி
தனது வாழ்க்கையின் பெரும்பகுதியை நாட்டிற்கும் ராணுவத்திற்கும் அர்ப்பணித்த, ஈடு செய்ய முடியாத தலைமைத் தளபதி பிபின் ராவத் மறைவிற்கு மகத்தான அஞ்சலி செலுத்தும் வகையிலும், அவரது ஆத்மா சாந்தியடைய வேண்டியும் இறைவனை பிரார்த்திக் கொள்ளும் வகையிலும் அவரது இறுதிச் சடங்கு நடைபெற்ற 10/12/2021 அவருக்காக மட்டுமல்லாமல் அவருடன் சேர்ந்து இன்னுயிர் எனும் தன்னுயிரை இழந்த இதர ராணுவ அதிகாரிகள், வீரர்களின் ஆத்மா சாந்தி பெறவும், பொதுமக்கள் அவரவர் வீடுகளில் விளக்கு அஞ்சலி செலுத்தினர்.

XXXX


சிருங்கேரி சாரதா பீடத்தில் தருமபுர ஆதீனம் தரிசனம்
தருமபுர ஆதீனம் ஸ்ரீ கயிலை குருமகா சன்னிதானம், சிருங்கேரி பீடாதிபதி ஸ்ரீ விதுசேகர பாரதி சுவாமியை தரிசனம் செய்தார். தருமபுர ஆதீனம் ஸ்ரீ கயிலை குருமகா சன்னிதானம், கர்நாடக யாத்திரை மேற்கொண்டுள்ளார்.
இதன் ஒரு பகுதியாக, ஆதிசங்கரரால் ஸ்தாபிக்கப்பெற்ற நான்கு மடங்களுள் ஒன்றான சிருங்கேரிசாரதா பீடம் சென்று, பீடாதிபதி ஸ்ரீ விதுசேகர பாரதி சன்னிதானத்தை தரிசனம் செய்தார்.சிருங்கேரி மடத்தின் தலைமை அதிகாரி கவுரிசங்கர் வரவேற்றார்.
இதற்கு முன், பீடாதிபதிஸ்ரீ பாரதீ தீர்த்த சுவாமியும், தமது தமிழக யாத்திரையின்போது தருமபுரம் ஆதீனத்தில் எழுந்தருளி, ஸ்ரீ சாரதா சந்திர மவுலீஸ்வர பூஜை நிகழ்த்தி உள்ளார்.
XXXX

கோவிலில் அறங்காவலர்கள்; நியமிக்க அரசு நடவடிக்கை

தமிழகத்தில், குறிப்பிட்ட எண்ணிக்கையிலான கோவில்களுக்கு, விரைவில் அறங்காவலர்கள் நியமிக்கப்பட உள்ளதாக, சென்னை உயர் நீதிமன்றத்தில், தமிழக அரசு தெரிவித்துள்ளது.
செங்கல்பட்டு மாவட்டம், அச்சரப்பாக்கம் விஜய வரதராஜ பெருமாள் கோவிலுக்கு சொந்தமாக, பாபுராயன்பேட்டையில் உள்ள, 250 ஏக்கர் நிலத்தை, ஏலம் வாயிலாக குத்தகைக்கு விட, நவம்பர் 24ல் அறிவிப்பு வெளியிடப்பட்டது.இதை எதிர்த்து, வழக்கறிஞர் ஜெகன்நாத் என்பவர், சென்னை உயர் நீதிமன்றத்தில் வழக்கு தொடர்ந்தார். இந்த வழக்கு, தலைமை நீதிபதி எம்.என். பண்டாரி, நீதிபதி ஆதிகேசவலு அடங்கிய அமர்வு முன் விசாரணைக்கு வந்தது.
அப்போது, ‘அறங்காவலர்கள் இல்லாத நிலையில், கோவில் சொத்துக்களை ஏலம் விடக் கூடாது’ என, மனுதாரர் தரப்பில் வாதிடப்பட்டது.தமிழக அரசு தரப்பில், தலைமை வழக்கறிஞர் சண்முகசுந்தரம் ஆஜராகி, ”குறிப்பிட்ட எண்ணிக்கையிலான கோவில்களுக்கு விரைவில் அறங்காவலர்கள் நியமிக்கப்படுவர்,” என தெரிவித்தார்.’ஏல நடவடிக்கைகளை தொடர அனுமதி அளிக்கப்படுகிறது; ஏலத்தை இறுதி செய்யக் கூடாது’ என நீதிபதிகள் உத்தரவிட்டனர். வழக்கு விசாரணை, டிசம்பர் 15ம் தேதிக்கு தள்ளி வைக்கப்பட்டது.
XXX


வாடகை தராவிட்டால் வவ்வாலாக பிறப்பீர்கள்: மதுரை ஆதீனம் எச்சரிக்கை
மானாமதுரை: ”கோயிலுக்கு உண்டான கடனை செலுத்தாதவர்கள், வாடகை கொடுக்காதவர்கள் உடனடியாக கொடுத்துவிடுங்கள் அப்படி இல்லை என்றால் அடுத்த ஜென்மத்தில் வவ்வாலாகவோ , பெருச்சாளியாகவோ பிறக்க நேரிடும்” சிவன் சொத்து குலநாசம் என்பதும் மறுக்க முடியாத உண்மையாகும் என மதுரை ஆதினம் ஞானசம்பந்த பராமாச்சாரிய சுவாமிகள் கூறினார்.
சிவகங்கை மாவட்டம் மானாமதுரை அருகே உள்ள தஞ்சாக்கூரில் ஜெகதீஸ்வரர் சமேத திரிபுரசுந்தரி அம்மன் கோயில் கும்பாபிஷேக விழாவில் கலந்துகொண்டு மதுரை ஆதீனம் பேசியதாவது: தமிழகத்தில் நமது முன்னோர்கள் தினந்தோறும் கோயில்களுக்குச் சென்று தங்களது உடலை புத்துணர்ச்சியாக வைத்திருந்தனர். அதேபோல் தற்போது நாமும் தினந்தோறும் கோயில்களுக்குச் சென்று உடலை புத்துணர்ச்சியாக வைத்திருக்க முயற்சிக்க வேண்டும் . ஆனால் தற்போது பலர் தினந்தோறும் அலைபேசிக்கு தான் சார்ஜ் ஏற்றுகின்றனர். உடலுக்கு சார்ஜ் ஏற்ற கோயில்களுக்கு செல்வதில்லை .
.
அலைபேசி, டெலிவிஷன்களுக்கு கியாரண்டி உண்டு. ஆனால் மனித உடலுக்கு கியாரன்டி எதுவுமில்லை. ஆகையால் கிடைக்கும் நேரத்தை இறைவழிபாட்டில் செலவிடவேண்டும் இவ்வாறு மதுரை ஆதினம் பேசினார்.

XXXX

இத்துடன் லண்டனிலிருந்து வரும் செய்திகள் நிறைவடைந்தன………………………….. செய்திகளை உங்களுக்கு வழங்கியவர் VAISHNAVI ANAND
நன்றி, வணக்கம்

tags- tamilhindunews12122021

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: