சாதலை நீக்கும் நெல்லிக்கனியை ஔவைக்குக் கொடுத்த அதியமான்! (Post.10,667)

if you dont see the image, please go to swamiindology.blogspot.com

WRITTEN BY S NAGARAJAN
Post No. 10,677
Date uploaded in London – – 21 FEBRUARY 2022

Contact – swami_48@yahoo.com
Pictures are taken from various sources for spreading knowledge;
this is a non- commercial blog. Thanks for your great pictures.
tamilandvedas.com, swamiindology.blogspot.com

சாதலை நீக்கும் நெல்லிக்கனியை ஔவைக்குக் கொடுத்த அதியமான்!
ச.நாகராஜன்

அற்புதமான ஒரு நெல்லிக் கனி. அது உண்டவரை நெடுநாள் வாழும்படி செய்யும் அரிய நெல்லிக் கனி. அந்த நெல்லிக் கனி தகடூர் என்னும் தர்மபுரியை ஆண்டு வந்த அரசன் அதியமானுக்குக் கிடைத்தது.
அதை அவன் தானே உண்டு நெடு நாள் வாழ்ந்திருக்கலாம். அப்படிச் செய்தானா? இல்லை. தன்னை விடத் தமிழ் பாடும் ஔவை பிராட்டி நீண்ட நாள் வாழ வேண்டும் என்ற நல்லெண்ணம் கொண்டு அதை ஔவையாருக்கு ஈந்தான். அழியாப் புகழ் பெற்றான்.
அவன் பூதவுடல் மறைந்தாலும் புகழுடல் இன்றும் மறையவில்லை.
இந்தச் சரிதத்தைக் கொங்கு மண்டல சதகம் தனது 42வது பாடலில் தந்து அதியமானைப் போற்றுகிறது.
பாடல் இதோ:
சாதலை நீக்கு மருநெல்லி தன்னைத் தமிழ்சொலௌவைக்
காதர வோடு கொடுத்தவன் கன்னலை யங்குநின்று
மேதினி மீதிற் கொடுவந்து நட்டவன் மேன்மரபோர்
மாதிரஞ் சூழரண் மேவுவ துங்கொங்கு மண்டலமே

பொருள் :

சாதலை நீக்கும் அரும் நெல்லி தன்னை – நெடு நாள் வாழ வைத்து சாதலை நீக்கும் அரிய நெல்லிக் கனியை

தமிழ் சொல் ஔவைக்கு ஆதரவோடு கொடுத்தவன் – தமிழைப் பாடிப் பரவும் ஔவை பிராட்டிக்கு அன்போடு கொடுத்தவன்
கன்னலை அங்கு நின்று மேதினி மீதில் கொடு வந்து நட்டவன் மேல் மரபோர் – கரும்புப் பயிரைக் கொண்டு வந்து நட்டு உற்பத்தி செய்தவனின் வழி வந்தவன்

ஆதிரம் சூழ் அரண் மேவுவதும் கொங்கு மண்டலமே – கொல்லிக் கூற்றமாகிய மலை அரணை உடையவனுமாகியவன்
அப்படிப்பட்ட அதியமானும் கொங்கு மண்டலத்தைச் சேர்ந்தவனே.

இன்று தர்மபுரி என்று அழைக்கப்படும் அந்தக் கால தகடூரைத் தலை நகராகக் கொண்டு ஆண்டு வந்தவன் அதியமான் என்னும் சிறந்த அரசன்.
இவன் கடை எழு வள்ளல்களில் ஒருவன்.
ஒரு நாள் இவன் பருத்திப்பள்ளி நாட்டிலிருக்கும் கஞ்சமலை மீதுள்ள கருங்காடு என்னும் பகுதியில் சஞ்சரித்தான்.
அப்போது ஒரு துறவி அவனைச் சந்தித்து ஒரு நெல்லிக் கனியை அவனிடம் தந்தார்.
‘இதை உண்டவருக்கு நரை திரை தோன்றாது, நீடித்த நாள் உயிர் வாழலாம்’ என்று அவர் கூறியதோடு ‘இதை நீ உண்பாயேல் நெடுநாள் நல்ல புலவர்களை ஆதரித்துத் தமிழை வளர்க்கலாம்’ என்றார்.
அதை ஏற்றுக் கொண்ட அதியமான் அதைத் தன்னிடம் பத்திரமாக வைத்திருந்தான். ஒரு நாள் அவனைப் பார்க்க ஔவையார் வந்தார்.
உடனே தன்னிடமிருந்த நெல்லிக்கனியை அவருக்குத் தந்து உண்ணச் செய்தான். அதன் வரலாற்றையும் கூறினான்.

இந்த உண்மை வரலாற்றைப் பல்வேறு நூல்களும் போற்றிப் புகழ்கின்றன.
சிறுபாணாற்றுப்படையில் வரும் வரிகள் இவை:
“மால் வரைக் கமஞ் சூழ் சாரற்க வினிய நெல்லி
யமிழ்து விளை தீங்கனி யௌவைக் கீந்த
வுரவுச் சினங் கனலு மொளி திகழ் நெடுவே
லரவக் கடற்றானை யதிகனும்”

தர்மபுரி கரும்புப் பயிரில் சிறந்து விளங்கியதையும் சிறுபாணாற்றுப் படை கூறுகிறது:

“அமரர்ப் பேணியு மாவுதி யருத்தியும்
அரும் பெரு மரபிற கரும்பி வட்டந்து”

கரபுரநாதர் புராணம் இந்த வரலாற்றை விரிவாகக் கூறுகிறது:

“பூதலத்தினி லதிகமான் மணிமுடி பொறுத்தர சியற்றுங்காற்
காதலாய்க் கருங்காட்டிடைச் சித்தரைக் கண்டு வந்தனை செய்து
வீதலின் மருந் தோன்றரு ளென்னலும் விண்புகு கருநெல்லித்
தீதிலாக் கனி யொன்றினை யுதவவே சேரலன் மகிழ்வெய்தி

இந்த வண்கனி யெங்கிருந் தெடுத்தனி ரிதினதி சயமென்னோ
சிந்தை யுற்றுணரச்சொலும் என்றலும் திருவுளங்களி கூர்ந்தே
அந்த நாட் பிரமன்றரு மலையிலதிசய சஞ்சீவி
எந்த நாட்களு முளதிதை யுட்கொள நரை திரை யிவை மாற்றும்”

இது தான் அதிசய நெல்லிக் கனியின் ஆற்றல்!

ஒரு சமயம் அதியமான் கரூரை ஆண்டு வந்த புகழ்ச் சோழர்க்கு திரை செலுத்த மறுத்து விட்டான்.

அவன் எங்கே உள்ளான் என்று புகழ்ச் சோழன் கேட்க பதில் வந்தது இப்படி:
“ ஆங்கவன் யாரென்றருள அதிகனவ னணித்தாக
ஓங்கெயில் சூழ் மலையரணத்துள் உறைவான்”
(புகழ்ச் சொழர் புராணம்)

அதியமான், பாண்டிய மன்னனோடு ஒரு முறை போர் புரிந்தான். அதை நெடுஞ்சடையனது தான சாஸனம் ஒன்று குறிப்பிடுகிறது:
“மாயிரும் பெரும் புனற் காவிரி வடகரை
ஆயிரவேலி அயிரூர் தன்னினும்
புகழியூருந்த் திகழ்வே லதியனை
ஓடு புறங்கண்டவன்”

கடை ஏழு வள்ளல்களின் ஒருவனான அதியமான் தமிழ் ஔவைக்கு நெல்லிக் கனி தந்ததால் இன்றும் புகழோடு வாழ்கிறான்!


tags- நெல்லிக்கனி, ஔவை,  அதியமான்

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: