தாவரம் காப்போம்; பல்லுயிரினம் காப்போம்! (Post.10,790)

WRITTEN BY S NAGARAJAN

Post No. 10,790

Date uploaded in London – –     29 MARCH   2022         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

அகில இந்திய வானொலி நிலையம் சென்னை நிலையத்திலிருந்து 27-3-22 அன்று காலை 6.56 மணிக்கு ஒலிபரப்பாகிய சுற்றுப்புறச்சூழல் பற்றிய ஆறாவது உரை

6

தாவரம் காப்போம்; பல்லுயிரினம் காப்போம்!

ச.நாகராஜன்

இயற்கையோடு இயைந்து வாழ்வது என்பதை அனைத்து நாகரிகங்களும் தலையாய கொள்கையாகக் கடைப்பிடித்து வந்ததை வரலாறு நன்கு கூறுகிறது.

இந்த வகையில் இயற்கை அன்னை அளித்துள்ள தாவரங்களைக் காப்பது நமது தலையாய கடமையாகும். அடுத்து புவியெங்கும் பரவி வாழும் பல்லுயிர்களை, – அவற்றின் இனமே அழிந்துபடாமல் – காப்பதும் ஒரு கடமையாகும்.

பூமியில் மட்டும் மூன்றரை லட்சத்திலிருந்து நான்கு லட்சம் வரை வெவ்வேறு தாவர இனங்கள் உள்ளன என்பதை அறிவியல் ஆய்வு செய்து கண்டுபிடித்துள்ளது.

தாவரங்கள் இன்றி பூமியின் வளம் இல்லை. நமது வாழ்க்கை அமைப்பிற்குத் தாவரமே ஜீவநாடி. சுவாசித்தல், உணவை உட்கொள்ளுதல் உள்ளிட்ட பலவற்றிற்கும் மனித ஆதாரம் தாவரங்களே.

ஒளிச்சேர்க்கையால் சூரிய ஒளியைக் கொண்டு தாவரங்கள் நீர் மூலக்கூறுகளை ஹைட்ரஜனாகவும் ஆக்ஸிஜனாகவும் பிளவு படுத்துகிறது. ஹைட்ரஜன் கார்பன் டை ஆக்ஸைடுடன் இணைந்து குளுகோஸை உருவாக்குகிறது.

மனிதன் உயிர்வாழ இன்றியமையாத ஒன்றாக அமையும் ஆக்ஸிஜன் அல்லது உயிர்வளி இதன் துணை விளைபொருளே (by-product) ஆகும்.

நுண்மையான ஒரு தாவரத்தின் வேர் 20 கெமிக்கல்களை – வேதியல் பொருள்களைப் பிரித்தறியும் பாங்குடையது என்பது எவ்வளவு ஆச்சரியமான ஒரு விஷயம்!

நுண்மையான தாவர வேர்கள் மற்ற உயிரைக் கொல்லும் இனக் கொல்லிகளை (predators) அகற்றி பூந்துகள் சேர்ப்பிகளை (Pollinators) கவர்ந்து இழுக்கிறது. இதனால் உயிரினம் காக்கப்படுகிறது.

90 விழுக்காடு அழிக்கப்பட்டாலும் தம்மைத் தாமே மறுபடி உருவாக்கித் தழைக்கும் தன்மை கொண்டவை தாவரங்கள்.

நீடித்த ஆயுளைக் கொண்டு மனித இனத்தை வாழ வைப்பவை இவை என்றால் அவற்றிற்கு உரிய பாதுகாப்பை மனித இனம் தர வேண்டுமல்லவா!

ஒரு லட்சம் ஆண்டு ஆயுளைக் கொண்ட தாவரங்கள் ஸ்பெயினிலும் 9560 ஆண்டு வயதுள்ள மரம் ஸ்வீடனிலும் பாதுகாக்கப்படுகின்றன என்பது உத்வேகமூட்டும் ஒரு செய்தி!

தாவர இனத்தால் உயிர் வாழும் இனங்களின் பட்டியலுக்கு ஒரு முடிவே இல்லை.

ஒரு முக்கியமான புள்ளி விவரத்தையும் மனிதனாகப் பிறந்த ஒவ்வொருவரும் அறிய வேண்டும். நாம் வாழும் பூமியில் BIOMASS எனப்படும் உயிரினத் தொகுதியில் 82.4 விழுக்காடு தாவரங்களே. 12.8 விழுக்காடு பாக்டீரியா;  0.4 விழுக்காடு மிருகங்கள். வெறும் 0.01 விழுக்காடு மட்டுமே தான் மனித இனம்!

ஆக 82 விழுக்காடு உள்ள பெரும் உயிரினத்தொகுதியாக அமைந்து அனைத்து உயிரினங்களையும் காத்து வரும் தாவரங்களை  0.01 உள்ள மனித இனம் தம்மை அறிந்தும், அறியாமலும் அழிக்க முற்படலாமா?

உணவாகவும், மருந்தாகவும் குளிர்ச்சி தரும் பசுமைக் காவலாகவும், மனித மனதிற்கு சாந்தி தந்து மன இறுக்கத்தைத் தளர்த்தி உற்சாகத்தை ஏற்படுத்தும் இயற்கை வளமாகவும் அமையும் தாவரம் ஒவ்வொன்றையும் காப்போம்; சூழலை இனியதாக ஆக்குவோம்!

**

அகில இந்திய வானொலி நிலையம் சென்னை நிலையத்திலிருந்து 28-3-22 அன்று காலை 6.56 மணிக்கு ஒலிபரப்பாகிய சுற்றுப்புறச்சூழல் பற்றிய ஏழாவது உரை

7

மண் வளம் காக்க மரங்களை நடுவோம்!

ச.நாகராஜன்

சுற்றுப்புறச் சூழலைக் காக்க உதவும் மிக முக்கியமான செய்கைகளில் ஒன்றாக அமைவது மரங்களைக் காப்பதே!

மரங்களை அழிக்காமல் காப்பது மட்டுமல்லாமல் இழந்த மரங்களின் இழப்பீட்டை சமனப்படுத்தும் வகையில் புதிய மரங்களை நட்டு வளர்ப்பது மனிதர்களின் தலையாய கடமையாக ஆகிறது.

இன்று மண்வளம் குறைந்து கொண்டே போக மரங்களின் அழிவே காரணம் என்பதை ஒவ்வொருவரும் உணர வேண்டும்.

மண்ணைச் சுரண்டி சுரண்டி, ஆறுகளை வழக்கம் போலப் பாய விடாமல் ஆக்குவதால், நீடித்த அளவில் நம்மை நாமே அழித்துக் கொண்டவர்களாக ஆகிறோம்.

செழுமை வாய்ந்த மண் வளத்தினாலேயே, பாரம்பரியம் மிக்க இந்திய விவசாயிகள், நூறு கோடிக்கும் அதிகமான இந்திய மக்கள் உணவு பெற வழி வகுக்கிறார்கள்.

உலகில் இதர இடங்களில் உள்ள மண்ணை ஒப்பிட்டுப் பார்க்கும் போது, இந்திய மண்ணில் ஒரு கியூபிக் மீட்டர் மண்ணில், மைக்ரோ ஆர்கானிஸம் (Micro-organism) எனப்படும் நுண்ணுயிர்கள் மிக அதிக அளவில் காணப்படுவது நமது மண் வளத்தின் பெருமையைப் பறை சாற்றும் ஒரு அரிய உண்மையாகும்.

இப்படிப்பட்ட அரிய வளம் வாய்ந்த மண்ணைப் பாதுகாக்க வேண்டிய நாம் அதற்கு உதவியாக அமையும் மரங்களை மிக அதிக அளவில் ஆங்காங்கே நட்டு, பாதுகாத்து வளர்க்க வேண்டும்.

மரங்கள் வெட்டப்படுவதால் மண் வளம் வீழ்ச்சி அடைகிறது. மண்வளம் வீழ்ச்சி அடைவதால் ஊட்டச்சத்து குறைபாடு உருவாகிறது.  ஆகவே நமது குழந்தைகள் ஊட்டச்சத்துக் குறைபாடு உள்ளவர்களாக வளர்கிறார்கள்.

பருவ மழையை நம்பி இருக்கும் நம் நாடு மழைக்காலத்தில் மழை நீரைச் சேமிப்பதோடு ஆறுகள் வற்றிடாமல் பாய வழி வகுத்தால் மண் வளம் செழிக்கும். ஏரிகள், குளங்கள், சிற்றோடைகள், ஊருணிகள், நீரோடைகள் என அனைத்தையும் பாதுகாத்து அவற்றின் அருகே உள்ள மரங்களையும் மலர்ச் செடிகளையும் பாதுகாத்தால் சூழல் மேம்படும்; நீர் வளம் வருடம் முழுவதும் குறையாது. மண் வளம் மேம்படும். ஊட்டச் சத்து உயரிய நிலையை அடைந்து ஆரோக்கியம் மேம்படும்.

நமது சந்ததியினருக்கு நாம் ஒரு பெரும் பாரம்பரியத்தை விட்டுச் செல்வதோடு மட்டுமல்லாமல் தங்கத்தையோ, பணத்தையோ விட்டுச் செல்வதை விட அருமையான இயற்கை வளத்தை மேம்படுத்தி விட்டுச் சென்றோமெனில் அது அவர்களுக்கு நாம் அளிக்கும் உயரிய உரிய பரிசாக அமையும்.

ஆகவே உத்வேகத்துடன் மண் வளம் காப்போம்; மரங்களைக் காப்போம். மரங்கள் நடுவோம்.

ஆங்காங்கே குழுக்கள் அமைத்து மண்ணைச் சுரண்டுவோர்களை இனம் கண்டு உரிய அதிகாரிகளிடம் எடுத்துரைப்போம்.

–subham–

tags- மரங்கள் , தாவரம் ,நடுவோம், 

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: