அனுபவித்து மகிழ அமெரிக்க நகரங்கள்! (Post No.10,814)

WRITTEN BY S NAGARAJAN

Post No. 10,814

Date uploaded in London – –     6 APRIL   2022         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

IF U DONT SEE THE PICTURES HERE, GO TO MY OTHER BLOG, swamiindology.blogspot.com

4--4-2022 மாலைமலர் இதழில் வெளியாகியுள்ள கட்டுரை

அனுபவித்து மகிழ அமெரிக்க நகரங்கள்!

ச.நாகராஜன்

பிரம்மாண்டமான ஒரு வல்லரசை, ஜனநாயக நாட்டை, இன்ப புரியை யுனைடெட் ஸ்டேட்ஸ் ஆஃப் அமெரிக்காவை, இந்தக் கட்டுரையில், ஒரு சில வரிகளில் அடக்கி விட முடியுமா, என்ன? 50 மாநிலங்கள் கொண்ட இந்த நாட்டை பல பகுதிகளாகப் பிரித்துத் தான் பார்க்க முடியும்!

முதலில் தூங்கா நகரத்தை, யாரையும் தூங்க விடா நகரத்தை –  லாஸ் வேகாஸை – மாலை நேரத்தில் ஆறு மணிக்கு மேல் கிளம்பி – ஒரு விஸிட் செய்வோம்!

தூங்கா நகரம், யாரையும் தூங்க விடா நகரம் – லாஸ் வேகாஸ்!

இந்த நகரத்திற்குச் செல்லப் பெயர்கள் பல உண்டு. பாவ நகரம் – சின் சிடி – (SIN CITY) என்று ஒரு பெயர்!

காம்ப்ளிங் காபிடல் . (சூதாட்டத்தின் தலைநகரம்) என்று இன்னொரு பெயர்.

மெடோஸ் எனப்படும் புல்வெளி என்ற அர்த்தத்தைத் தருவது லாஸ் வேகாஸ் என்ற பெயர்!

இந்த நகரம் தானும் தூங்காது; இங்கு வருபவரைத் தூங்கவும் விடாது!

அமெரிக்காவின் தங்க (ம் அதிகம் உள்ள) மாநிலம் என்ற பெயரைப் பெற்றுள்ள நிவாடாவில் அமைந்துள்ளது லாஸ் வேகாஸ். குன்றுகள் சுற்றி இருக்க வருடத்தில் 310 நாட்கள் சூரிய ஒளி அதிகம் திகழ சூரிய ஒளி நகரமாகத் திகழும் இது இரவு நேரத்தில் சூரிய ஒளி இல்லாவிட்டாலும் ஒளி வெள்ளத்தில் திகழ ஆரம்பிக்கும். 

ஆம், எங்கு பார்த்தாலும் ஒளி வெள்ளம் பாய்ச்சும் வண்ண வண்ண விளக்குகள்.

மலைக்க வைக்கும் 50 லட்சம் விளக்குகள் இரவு முழுவதும் எரியும்.

சூர்யன் அஸ்தமித்தவுடன் மாலையில் நடக்க ஆரம்பித்தால் சூரிய உதயம் வரை பார்க்க இடங்கள் உள்ளன. இங்கு நைட் க்ளப் (க்ளப் என்றாலே இங்கு நைட் க்ளப் தான்) ஏராளம்!

சூதாட்ட விளையாட்டுக்கள் அடங்கிய காஸினோக்கள் ஏராளம் – நெடுக போய்க் கொண்டே இருக்கும்.

தங்குவதற்கு பயமே இல்லை. 1,50,000 ஹோட்டல்கள் உள்ளன. உலகில் மிகப் பெரிய ஹோட்டல்கள் 20. அதில் 14 இங்கு தான் உள்ளன.

பையில் டாலரை வைத்து செலவழிக்க மாட்டேன் என்று கங்கணம் கட்டிக் கொண்டிருப்பவர் கூட இங்கு சில “விளையாட்டுகளில்” ஈடுபட்டு டாலரை இழப்பது வழக்கம். ஆனால் அந்த விளையாட்டுகளில் ஐந்து டாலர் ஜெயித்து விட்டாலோ இழந்ததைச் சொல்லாமல் ஜெயிப்பதை மட்டுமே சொல்வர். அப்படி அனைவரையும் மயக்கும் ஒரு மாயபுரி லாஸ் வேகாஸ்.

கொரிப்பதற்கும் உண்பதற்கும் எண்ணற்ற உணவு வகைகள்! ஓய்வாக அமர, பூங்காக்கள், காலார நடந்து செல்லும் போதே பார்க்க பல நிகழ்ச்சிகள் ..

தைரியமாக சாகஸ நிகழ்ச்சிகள் செய்ய விரும்புவோர் ‘த்ரில் ரைட்ஸ்’ (Thrill Rides) செல்லலாம். மணிக்கு 45 மைல் வேகத்தில் 160 அடி உயர எழும்பி ஒரு ஆட்டம் ஆடலாம்.

ஸ்ட்ராடோஸ்பியர் டவர் 110 அடுக்கு மாடிகள் கொண்ட ஒரு வியத்தகு கட்டிட அற்புதம். 1149 அடி உயரம் கொண்ட அதில் மேலே சென்று வானளாவிய உயரத்திலிருந்து இந்த நகரத்தைப் பார்ப்பது ஒரு கண் கொள்ளாக் காட்சி. ஒரு சில நிமிடங்களில் கண் இமைக்கும் நேரத்தில் லிப்ட் நம்மை மேலே ஏற்றி விடும்; நம்மை பிரமிக்க வைக்கும்.

1940ஆம் ஆண்டிலிருந்து வெளியான ஏராளமான ஹாலிவுட் திரைப்படங்களில் லாஸ் வேகாஸ் காஸினோக்களை காணலாம். ஜேம்ஸ் பாண்ட் படமான ‘டயமண்ட்ஸ் ஆர் ஃபார் எவர்’ படத்தை யாரும் மறந்திருக்க முடியாது. அந்த காஸினோ காட்சியை அப்படியே நேரில் பார்த்து ரசிக்கலாம்.

காஸினோ வாசலில் அழகிகள் நடனமாடுவதைப் பார்க்கலாம்! அந்த அழகிகளுக்குப் பிடித்தது? அங்கு வரும் அனைவரையும் புன்னகை செய்து வரவேற்கப் பிடிக்கும்! பிடிக்காதது நீளமான உடை. (அரை மீட்டர் பிட் துணி இருந்தாலே அதுவே அவர்களுக்கு அதிகம் தான்!)

காஸினோவில் 21 வயது மேற்பட்டவர்கள் தான் சூதாட்ட விளையாட்டில் பங்கேற்க முடியும். ஆனால் எந்த வயதினராலும் சரி, மற்றவர்கள் பார்க்க அனுமதி உண்டு.

2021ஆம் ஆண்டு மட்டும் 425 லட்சம் பேர் இங்கு வருகை புரிந்துள்ளனர்.

இந்த நகரில் வருடத்திற்கு 22,000 கருத்தரங்குகள்/ கண்காட்சிகள் நடைபெறுகின்றன என்பதிலிருந்தே இதன் வணிக முக்கியத்துவத்தைப் புரிந்து கொள்ளலாம். புதிய கண்டுபிடிப்புகள், புதிய தயாரிப்புகள் முதலில் கண்காட்சிக்கு வைக்கப்படும் இடம் இங்குள்ள அரங்கங்களிலேயே! எந்த சமயத்தில் சென்றாலும் ஏதேனும் ஒரு கண்காட்சியைப் பார்த்து ரசிக்க முடியும்!

தானும் தூங்காமல், உள்ளே வந்தவரையும் பிரமிக்க வைத்துத் தூங்க விடாமல் செய்யும் இந்த நகரம் சூரிய உதயம் வந்தவுடன்… அட, விளக்குகள் அணைந்து விட்டனவே, பரவாயில்லை தூங்கா நகரம் வரப்போகும் அடுத்த இரவை நோக்கிக் காத்திருக்கும்……!!

லாஸ் ஏஞ்சலஸ்

லாஸ் வேகாஸிலிருந்து நான்கு மணி நேரம் காரில் சென்றால் அடுத்த பிரமிப்பூட்டும் நகரான லாஸ் ஏஞ்சலஸை அடைந்து விடலாம். கலிபோர்னியாவின் தென் பகுதியில் அமைந்துள்ளது இது. ஸ்பானிஷ் மொழியில் வான தூதர்கள் என்ற வார்த்தையிலிருந்து தோன்றியது லாஸ் ஏஞ்சலஸ் என்ற பெயர்!

வர்ணிக்க வார்த்தைகள் இல்லை என்று சொல்லும் அழகிய நகரான இதில் பார்க்க ஏராளமான இடங்கள் உள்ளன.

நாம் பார்க்க வேண்டிய முக்கிய  இடத்திற்கு  முதலில் செல்வோம்.

டிஸ்னி லேண்ட்

1955இல் ஆரம்பிக்கப்பட்ட டிஸ்னிலேண்டிற்கு லக்ஷக் கணக்கில் மக்கள் திரள் திரளாக உலகின் பல பகுதிகளிலிருந்தும் வந்து கொண்டே இருக்கிறார்கள்.

ஸ்டார் வார்ஸ். ஃபேண்டஸி லேண்ட், டுமாரோ லேண்ட் என ஏராளமான இடங்கள் பார்ப்பதற்கும் சாகஸ செயல்களுக்கும் உள்ளன.

அனைவரும் தவறாமல் செல்வது ‘பைரேட்ஸ் ஆஃப் தி கரிபியன்’ என்ற இடத்திற்குத் தான்.

நெடு நேரம் க்யூவில் நின்றாலும் நிச்சயம் நமக்கு ஒரு சான்ஸ் உண்டு. ரெயில் ரைட் (Rail Ride), நீர்வீழ்ச்சியில் குதிப்பது, படகில் சவாரி என நம்ப முடியாத நிகழ்ச்சிகளில் நாம் பங்கு கொண்டு செல்வது ஒரு வாழ்நாள் அனுபவமாக ஆகி விடும்.

‘பேய்கள் உலகில்’ பயத்துடன் தான் நுழைய வேண்டும்.  பயப்படவே மாட்டேன் என்று சவால் விட்ட ஒருவர், கூடவே தைரியமாக வந்தார். உள்ளே சென்ற போது ஒரு திருப்பத்தில் ‘ஹாஹா’ என்று இரைச்சலுடன் ஒரு எலும்புக்கூடு கைகால்களை விரித்து ஆடி மண்டை ஓடு சிரிக்க மோதுவது போல வந்து கச்சிதமாக ஆறு அங்குலத்தில் நின்ற போது, சவால் விட்டவரின் அலறலில் எலும்புக் கூடே பதறி விட்டது. அப்படி ஒரு அருமையான வடிவமைப்பு செய்யப்பட்டுள்ள இடம் இது! கச்சிதமாக மேலே படாமல் எலும்புக் கூடு எப்படி ஆறு அங்குலம் தள்ளி நின்றது? (சென்ஸர் ஏதாவது இருக்குமோ?!)

இப்படி சொல்லிக் கொண்டே போகலாம். ‘எந்த நிகழ்ச்சியையும் விட்டு விடாதீர்கள். இருந்து க்யூவில் நின்று பார்த்து மகிழுங்கள்’, என்பது தான் அங்கு சென்றவரின் அன்புரையாக அமையும்.

யுனிவர்ஸல் ஸ்டுடியோஸ்

உலகையே மயக்கும் ஹாலிவுட்  லாஸ் ஏஞ்சலிஸில் தான் உள்ளது. ஆகவே இயல்பாகவே ஏராளமான திரைப்பட நடிக, நடிகையர், திரைப்படத் துறை வல்லுநர்கள் இங்கு உள்ளனர்.

இங்கு உள்ள யுனிவர்ஸல் ஸ்டுடியோஸ் தீம் பார்க்கைப் பார்க்காமல் யாராலும் திரும்ப முடியாது.

இது ஒரு லைஃப் டைம் எக்ஸ்பீரியன்ஸ் என்று சுருக்கமாகச் சொல்லி விடலாம்.

ஜுராஸிக் வோர்ல்ட் என்று ஒரு ரைட். இதில் நாம் செல்லும் போது பழைய காலத்தில் இருந்த பிரம்மாண்டமான டைனோஸர்களைப் பார்த்து பிரமிப்போம்.

ஹாலிவுட் படங்கள் எப்படி எடுக்கப்படுகின்றன என்று ஒரு நிகழ்ச்சி. திரைப்படங்களில் நமது கதா நாயகன் குதிரை  மீது அமர்ந்து –  (அல்லது காரில் காதலியுடன்) செல்லும் காட்சியில் நாம் காணும் மலைத் தொடர்கள், நீர் வீழ்ச்சிகள் நம்மை பிரமிப்பில் ஆழ்த்தும்.

இது எப்படி எடுக்கப்படுகிறது என்பதை இங்கு நேரில் காண்பிக்கும் போது சிரிக்காதவர் யாரும் இருக்க முடியாது. கதாநாயகன் குதிரையில் அமர்ந்து கையையும் காலையும் ஆட்ட பின்னால் ஒரு திரை வேகமாக நகரும். அதில் மலைத் தொடர், நீர் வீழ்ச்சி உள்ளிட்ட பல காட்சிகள் நகர்ந்து கொண்டே இருக்கும். அவ்வளவு தான், திரைப்படமாக எடிட் செய்யப்பட்ட போது நாம் திரையில் காணும் பிரமிப்புக் காட்சிகள் எப்படி தோன்றுகின்றன என்பதையும்  நம்மால் உணர முடிகிறது, இந்த நிகழ்ச்சியால்!

இதே போல ஸ்டண்ட் காட்சிகள் எப்படி எடுக்கப்படுகிறது என்பதைச் செய்து காட்டுகிறார்கள்!

கதாநாயகன் கடலில் உயிருக்குப் போராடும் ஒரு காட்சி.

சுமார் 3000 சதுர அடி பரப்பளவு, ஒரு எட்டு அடி ஆழம் இருக்கும். வறண்ட குளம் போல உள்ள அந்தப் பகுதியை முதலில் பார்க்கிறோம். நாலா பக்கங்களிலிருந்து பைப்பில் நீர் வந்து கொட்ட அந்த பரப்பு சிறிய குளம் போல ஆகிறது.

காற்றுக் குமிழிகளால் அலைகள் கோரமாக உயர எழும்ப, நம் கதாநாயகன் தன் சீரியஸான முக பாவத்துடன் கையையும் காலையும் அந்தக் குளத்தில் ஆட்டுகிறார்.

நாம் சிரிக்கிறோம். ஆனால் திரையில் கண்டு களிக்கும் கடலில் கதாநாயகன் போராடும் பிரமிப்பான காட்சி எடுக்கப்பட்டு விட்டது.

பல காட்சிகளை நாம் பார்க்கும் போதே எதிர்பாராத திகைப்பூட்டும் சம்பவங்களும் நடைபெறும்.  ஒரு காட்சியை ஆர்வத்துடன் பார்த்துக் கொண்டே இருக்கும் போது நமது அருகில் ஒரு கரடி (நிஜக் கரடி தான்) போகும். அலறி அடித்துக் கத்த மாட்டாமோ, என்ன!

யுனிவர்ஸல் ஸ்டுடியோ ஒரு ‘மஸ்ட் விஸிட் ஸ்பாட்” – நிச்சயம் செல்ல வேண்டிய இடம்.

எல்லே, எல்லே (எல். ஏ. – லாஸ் ஏஞ்சலஸ்) என்று அழைக்கப்படும் லாஸ் ஏஞ்சலஸ் அமெரிக்காவில் நியூயார்க்கிற்கு அடுத்தபடி அதிக ஜனத்தொகை (39.7 லட்சம்) கொண்ட நகரம்.

எல்லே (LA) விழுந்தது என்றால் அமெரிக்காவே விழுந்தது போல் தான் என்பது இதன் சிறப்பைக் குறிக்கும் ஒரு வரியாகும்.. 

எல்.ஏ. இரண்டு நாளைக்கு ஒரு தரம் தன்னைப் புதுப்பித்துக் கொண்டு புது மாதிரியாகக் காட்சி அளிக்கிறது என்பது இதைப் பற்றிய இன்னொரு புகழ் மொழியாகும்.

லெகோ லேண்ட்

லாஸ் ஏஞ்சலிஸிலிருந்து 91 மைல் தூரத்தில் உள்ளது நாம் பார்க்க வேண்டிய இன்னொரு அற்புத இடமான லெகோ லேண்ட். இரண்டு மணி நேரக் கார் பயணத்தில் இதை அடைந்து விடலாம்.

இது 10 வயதுக்கும் கீழ்ப்பட்ட குழந்தைகளுக்கான தீம் பார்க். லெகோ ப்ளாக்குகளை வைத்து விளையாடும் குழந்தைகள் விரும்பிப் பார்க்கும் லெகோ லேண்டில் நிறைய ரைடுகளும் கண்காட்சி அரங்கங்களும் உண்டு. லெகோ ப்ளாக்குகளை வைத்துக் குழந்தைகளே அணையைக் கூட இங்கு கட்டலாம்.

குழந்தைகளே இங்கு எலக்ட்ரிக் கார்களை தாமாகவே ஓட்ட வசதியும் உள்ளது. சரியாக ஓட்டினால் அவர்களுக்கு டிரைவிங் லைசென்ஸும் தரப்படும்!

இது வரை உலகில் தயாரித்து, குழந்தைகள் விளையாடும் லெகோ ப்ளாக்குகளை ஒன்றன் மீது ஒன்று வைத்தால் அது சந்திர மண்டலத்தைத் தொட்டு விடும் என்பது இங்கு நமக்குத் தரப்படும் செய்தி. உலகில் அவ்வளவு லெகோ விளையாட்டு ப்ளாக்குகளை குழந்தைகள் விளையாடிக் கொண்டிருக்கின்றன என்பது ஒரு அபூர்வ செய்தி தானே!

இது வரை நாம் பார்த்தது அமெரிக்காவின் ஒரு சிறு பகுதியைத் தான். மற்றதையும் பார்க்காமல் விடலாமா என்ன, பின்னர் பார்ப்போம்.

இப்படி ஒரு பயணத்தை மேற்கொள்வதால் ஏற்படும் உடனடிப் பயன் என்ன?

மனம் விசாலமாகிறது. உலகின் பல்வேறு நாட்டு மக்களை , சிறு வயதிலிருந்து மிக மிக மூத்த வயதினரை, பல்வேறு மொழி பேசுவோரை, பல்வேறு இனம், மதத்தினரைப் பார்க்கும் போது வேற்றுமை உணர்வு இல்லாமல் போகிறது.

நாம் அனைவரும் மனித இனம் என்ற ஒரே இனத்தைச் சேர்ந்தவர்களே என்ற உணர்வு மேலோங்குகிறது.

அமெரிக்கர்களும் இந்தியர்களும் பரஸ்பர மரியாதை, அன்பு கொண்டவர்கள் என்பதால் எங்குமே பிரச்சினை ஏற்பட வாய்ப்பே இருப்பதில்லை. உள்ளார்ந்த அன்பு ஒன்றே மனித குலத்தின் ஒரே சொத்து என்பதை உணர்ந்து கொள்ள முடிகிறது.

மனமுவந்து உதவி செய்வதில் அனைவரும் குறியாய் இருப்பதால்  மயங்குகிறோம், மகிழ்கிறோம்.

அமெரிக்க விமான நிலையத்தில் இறங்கும் போதிலிருந்து உற்சாகம் நம்மைத் தொற்றிக் கொள்ளும். சீனியர்களுக்கு தனி மரியாதை, முன்னுரிமை உண்டு. கச்சிதமான ஒரு பயணத் திட்டத்தை வகுத்துக் கொண்டால் பயணத்திலிருந்து நாம் அள்ளிக் கொண்டு வருவது மகிழ்ச்சியையே!

***

 tags-  லெகோ லேண்ட்.,ஹாலிவுட் ,யுனிவர்ஸல் ஸ்டுடியோ, லாஸ் வேகாஸ்

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: