உலகின் தூய்மைத் தலை நகரம் சிங்கப்பூர்!

WRITTEN BY S NAGARAJAN

Post No. 10,909

Date uploaded in London – –     30 APRIL   2022         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

IF U DONT SEE THE PICTURES HERE, GO TO MY OTHER BLOG, swamiindology.blogspot.com

மாலைமலர் 26-4-2022 இதழில் உலகின் அழகிய நகரம் சிங்கப்பூர் என்ற தலைப்பில் வெளியாகியுள்ள கட்டுரை!

உலகின் தூய்மைத் தலை நகரம் சிங்கப்பூர்!

ச.நாகராஜன்

தூய்மைத் தலை நகரம்!

உலகில் உள்ள ஏராளமான நாடுகளில் தூய்மையின் சிகரம் என்று போற்றக் கூடிய நாடு ஏதாவது ஒன்று உண்டா? உண்டு, உணடு.

உலகின் தூய்மைத் தலை நகரம் சிங்கப்பூர் தான்!

பெங் சுயி ஆற்றலை நிரூபிக்க ஏதேனும் ஒரு நாட்டைச் சுட்டிக் காட்ட முடியுமா? முடியும்! சிங்கப்பூரைப் பாருங்கள், அதன் வரலாற்றைப் படியுங்கள், எப்படி பெங் சுயி வழிகளைக் கடைப்பிடித்து உலகின் வளமிக்க நாடாக அது ஆகி இருக்கிறது என்பதைப் பார்க்கலாம்.

தென் கிழக்கு ஆசியாவின் வளமிக்க அழகிய நாடாகத் திகழும் சிங்கப்பூர் ஒரு பிரதான தீவையும் சுற்றி சுமார் 63 குட்டித் தீவுகளையும் கொண்ட நாடு. மக்கள் ஜனத்தொகை 59 லட்சம். பரப்பளவு 283 சதுர மைல்.

சிங்கப்பூருக்கு அதன் பெயர் எப்படி வந்தது? மலாய் ஆவணங்களின் படி பலம்பாங் என்ற நகரிலிருந்து வந்த சாங் நில உடாமா என்ற இளவரசன் இந்தத் தீவில் வரும் போது கடற்கரையில் ஒரு உருவத்தைப் பார்த்தான். அது சிங்கம் போல இருந்ததாக அவன் நம்பினான். அதனால் சிங்க புரம் என்று இதை அழைக்க ஆரம்பிக்க பெயர் சிங்க புரம் ஆனது. இதுவே பின்னால் சிங்கப்பூர் ஆகி விட்டது.

பெங் சுயி ஆற்றலை நிரூபிக்கும் நாடு

சிங்கப்பூரின் பிரதமராக முப்பது வருட காலம் இருந்து உலகிலேயே அதிக காலம் பிரதமராக இருந்து சாதனை படைத்தவர் என்ற புகழைப் பெற்றவர் பிரதமர் லீ க்வான் யூ. அவர் பெங் சுயி மீது அபார நம்பிக்கை கொண்டவர். பெங் சுயி என்பது சீன வாஸ்து சாஸ்திரம். (பெங் என்றால் வாயு; சுயி என்றால் நீர்; இதன் அடிப்படையில் அமைந்தது இந்த சாஸ்திரம்)

சிங்கப்பூரில் மாஸ் டிரான்ஸிட் ரெயில் ரோட் சிஸ்டம்ஸ் எனப்படும் ரெயில் பாதை அமைக்கப்படும் போது சிங்கப்பூரின் பொருளாதார வளம் பெரிதும் பாதிக்கப்பட்டது. உடனே பிரதமர் லீ க்வான் யூ பெங் சுயி நிபுணரான ரெவரண்ட் ஹாங் என்பவரை நாடினார். அவர் பெங்சுயி அடையாள சிம்பலான பாகுவா சின்னத்தை சிங்கப்பூரில் வாழும் ஒவ்வொருவரும் பயன்படுத்த வேண்டும் என்றார். எட்டுப் பக்கம் கொண்ட பாகுவா சின்னத்தை எப்படி அனைவரையும் பயன்படுத்தும்படி சொல்ல முடியும்? பார்த்தார் லீ!

சிங்கப்பூரின் ஒரு டாலர் நாணயத்தில் இதைப் பொறித்தார். நாணயத்தைக் கையில் ஏந்திய மக்களும் அங்கும் இங்கும் சென்று கொண்டே அதைப் பயன்படுத்திக் கொண்டிருக்க, பாகுவாவின் நடமாட்டம் சிங்கப்பூர் முழுவதும் இருக்க ஆரம்பித்தது; சிங்கப்பூர் வளமிக்க நாடாக ஆகி விட்டது.

எட்டுப் பக்கம் கொண்ட பாகுவா மனித வாழ்வின் முக்கிய அம்சங்களான உத்தியோகம், குழந்தை பாக்கியம், அறிவு, உதவும் நண்பர்கள், குடும்பம், செல்வம், புகழ், உறவுகள் ஆகிய அனைத்தையும் மேம்படுத்த உதவுகிறது.

இந்த பாகுவாவின் ஆற்றலைத் தான் சிங்கப்பூர் முழுமையாகப் பயன்படுத்தியது. பாகுவாவை அடுத்து சிங்கப்பூர் டாலர் நோட்டில் அதிர்ஷ்ட சின்னமான டிராகனைப் பொறித்து அதை நாடெங்கும் வலம் வரச் செய்தார் லீ. நாடு வளம் கொழித்தது!

பட்ஜெட்டுக்குத் தக பார்க்கலாம்!

சிங்கப்பூரில் மட்டும் பார்க்க வேண்டிய இடங்கள் ஐம்பதுக்கும் மேல் இருக்கும். ஏராளமான மேப்கள், சுற்றுலா விவர அட்டைகள் உள்ளிட்டவை ஆங்காங்கே இலவசமாகக் கிடைக்கும். இவற்றை ஊன்றிப் படித்து நமது நேரத்திற்கும் பட்ஜெட்டிற்கும் தக்கபடி இடங்களைத் தேர்ந்தெடுத்துக் கொள்ள வேண்டியது தான். தங்குவதற்கு ஏராளமான ஸ்டார் ஹோட்டல்கள் உண்டு.

ஆங்கிலம், சீன மொழியான மாண்டரின், மலாய், தமிழ் ஆகிய நான்கு மொழிகளும் புழக்கத்தில் உள்ளதால் மொழிப் பிரச்சினை இங்கு வருபவர்களுக்கு ஏற்படுவதே இல்லை.

முக்கியமான இடங்களை மட்டும் இப்போது பார்ப்போம்.

சிங்கப்பூர் விலங்கியல் பூங்கா

மிக அருமையான இந்த விலங்கியல் பூங்கா உலகின் அதி சிறந்த மழைக்காடைக் கொண்ட அதிசய பூங்கா. உராங்உடான், வெள்ளைப் புலி, சிறுத்தை என ஏராளமான விலங்குகளை  நேரில் பார்க்கும் போது குழந்தைகளானாலும் சரி பெரியவர்களானாலும் சரி பல்லுயிர் பெருக்கத்தின் மாண்பை உணர முடியும்.

நைட் சஃபாரி, ரிவர் சஃபாரி என அனைத்தையும் அனுபவித்துப் பார்க்கும் போது மனம் மகிழ்ச்சியால் நிரம்பும்.

ஜுராங் பேர்ட் பார்க்

ஆசியாவின் மிகப் பெரிய பறவைகளுக்கான சொர்க்க பூங்கா இது. விலங்கியல் பூங்காவின் அங்கமான இதில் 400 வகையிலான இனத்தைச் சேர்ந்த 5000 பறவைகளை நேரில் பார்த்து மகிழலாம். அது மட்டுமல்ல குழந்தைகள் கூட அழகிய பஞ்சவர்ண கிளியை கையில் ஏந்தி பிடித்துக் கொண்டு போட்டோ எடுத்துக் கொள்ளலாம்.

பறவைகளுக்கோ, விலங்குகளுக்கோ ஆர்வக் கோளாறு காரணமாக நாமாக எதையும் உணவாக அளித்து விடக் கூடாது.

இங்கு நீர்வீழ்ச்சி, டிராம் ரைட் ஆகியவையும் உண்டு. அத்துடன் நம்ப முடியாத அளவு நம்மை பிரமிக்க வைக்கும் பல்வேறு ஷோக்களும் உண்டு. ராக்ஷஸ பருந்தைக் கையில் ஏந்திக் காண்பித்து நமக்கு பிரமிப்பை ஊட்டுவார்கள்.

இதில் எப்படி செல்ல வேண்டும் என்பதற்கான ரூட் மேப்பும் உண்டு. முதலிலேயே வாங்கிக் கொள்ள வேண்டும்.

சிங்கப்பூர் ஃப்ளையர்

சிங்கப்பூரை ஒரே பார்வையில் பார்க்க வேண்டுமா? இந்த ராட்சஸ ராட்டினத்தில் ஏறி உயரத்திற்குச் செல்ல வேண்டியது தான். 165 மீட்டர் உயரத்திற்குச் செல்லும் இது. 150 மீட்டர் குறுக்களவு கொண்ட  இதில் 28 குளிர் சாதனப் பெட்டிகள் உள்ளன. ஒவ்வொன்றிலும் 28 பயணிகள் ஏறி அமர்ந்து கொள்ளலாம். 30 நிமிடத்தில் ஒரு சுற்று சுற்றும் ராட்டினம் இது.

சென்டோசா ஐலேண்ட் (Senrosa Island)

சிங்கப்பூருக்குச் சென்றேன் என்று சொன்னவுடன் சென்டோசா ஐலேண்ட் சென்றீர்களா என்று தான் அனைவரும் கேட்பார்கள்.

இது ஒரு அற்புதமான கேளிக்கைத் தீவு. இங்குள்ள கடற்கரை செயற்கையானது. ஏராளமான கேளிக்கை நிகழ்ச்சிகள் கொண்ட இதற்கான வரைபடம், நிகழ்ச்சிப் பட்டியல் ஆகியவற்றை முதலில் வாங்கிக்கொள்ள வேண்டும்.

சுமார் 347 அடி உயரத்தில் கேபிள் காரில் வானில் செல்லும் அனுபவம் ஒரு வாழ்நாள் அனுபவமாகும். ஆங்காங்கே ஸ்டேஷன்களும் வானில் உண்டு. அவற்றில் இறங்கி இயற்கையை ரசித்து அடுத்த கேபிள் கார் வரும் போது அதில் ஏறிக் கொள்ளலாம்.

இங்குள்ள அக்வேரியம் நிச்சயம் பார்க்க வேண்டிய ஒன்று.

அமெரிக்காவிற்கோ அல்லது ஜப்பானுக்கோ செல்ல முடியாதவர்கள் இங்குள்ள யுனிவர்ஸல் ஸ்டுடியோவிற்குச் சென்று மகிழலாம்.

இங்கு சுற்றிப் பார்க்க என்றே தனி பஸ் உண்டு.

விங்ஸ் ஆப் டைம், செந்தோசா மெர்லயன், ட்ரிக் ஐ மியூஸியம், ஃப்ளை சிங்கப்பூர் என்று இப்படி ஏராளமான அனுபவித்து மகிழ வேண்டிய நிகழ்வுகள் அனைத்து வயதினருக்கும் பொதுவானது.

நேஷனல் காலரி

தென்கிழக்கு ஆசியாவின் பாரம்பரிய கலைச் செல்வங்களைக் கொண்டுள்ள இந்தக் காலரியில் இரு பகுதிகள் உள்ளன. கலைப் பிரியர் என்றால் இங்குள்ள 9000 கலைச் செல்வங்களைக் கண்டு மகிழலாம்.

ஜ்வெல் சாங்கி விமான நிலையம்

உலகின் தலை சிறந்த விமான நிலையம் எது என்ற கேள்விக்கு பதில் : இந்த விமான நிலையம் தான். 10 மாடி அடுக்குக் கட்டிடம் உயரம் கொண்ட இதில் 300 கடைகள் உள்ளன. கட்டிடத்தின் உள்ளே நீர்வீழ்ச்சி இருக்க சுற்றிலும் 2000 மரங்கள் உள்ளன. இரு திரையரங்குகள் உள்ளிட்ட இதை நேரம் இருப்பின் பார்ப்பது அவசியமே.

மரீனா பே ஸேண்ட்ஸ் (Marina Bay Sands)

55 அடுக்குமாடி கட்டிடத்தில் தங்க வசதியான அறைகளைக் கொண்ட புகழ் பெற்ற ஹோட்டலைக் கொண்ட இப்பகுயில் நுழைந்து இங்குள்ள ஸ்கைபார்க்கைப் பார்க்க நுழைவுக் கட்டணம் உண்டு.

இங்குள்ள இன்ஃபினிடி ஸ்விம்மிங் பூல் மிகவும் புகழ் பெற்ற நீச்சல் குளம். ஒவ்வொரு விநாடியும் இங்கு ஆயிரக்கணக்கான போட்டோக்கள் எடுக்கப்படுகின்றன. ஒரு நாளைக்கு இரண்டு லட்சம் போட்டோக்கள் என்ற கணக்கில் எடுக்கப்படும் போட்டோக்களில் உங்கள் கணக்குக்கு முடிந்த அளவில் எடுத்துக் கொண்டு மகிழலாம்.

வளைந்திருக்கும் இந்த கட்டிட அமைப்பு கட்டுமானப் பணியில் எஞ்ஜினியர்களுக்கான ஒரு சவாலாக அமைந்திருந்தது. இந்த சொகுசு ஹோட்டலில் ரூம் கிடைத்தால் அது அதிர்ஷ்டம் தான்!

இந்தப் பகுதியில் உள்ளது பே கார்டன்ஸ் எனும் தோட்டம்.  சுற்றுப்புறச் சூழலைக் காக்கும் பசுமைப் பகுதியான இதன் வடிவமைப்பு பார்க்கப் பார்க்க பிரமிப்பை ஊட்டும்.

ஹெலிக்ஸ் ப்ரிட்ஜ்

மரீனா பே பகுதியில் மரபணு வடிவமைப்பில் வளைந்திருக்கும் இந்த நடைமேடை பாலம் அனைவரின் கவனத்தையும் சிங்கப்பூரில் ஈர்க்கும் ஒன்று. 280 மீட்டர் நீளம் கொண்ட வளைவான பால அமைப்பு நவீன கட்டிட அதிசயங்களுள் ஒன்று.

சைனா டவுன்

சைனாவிற்குப் போக முடியவில்லையே என யாரும் வருத்தப்பட முடியாத அளவில் உள்ள சைனா டவுன் நிச்சயம் பார்க்க வேண்டிய ஒரு இடம். சீன பண்பாட்டு மையம் இங்கு உள்ளது.

புத்தா டூத் ரெலிக் டெம்பிள் மற்றும் புத்த பண்பாட்டு கண்காட்சியகமும் இங்கு உள்ளது. புத்த மதத்தின் பல்வேறு பரிமாணங்களை இங்கு தரிசித்து மகிழலாம். இதே பகுதியில் மாரியம்மன் கோவிலும் உள்ளது.

லிட்டில் இந்தியா

லிட்டில் இந்தியா என்பது பழைய இந்திய பாரம்பரியத்தைக் கொண்ட ஒரு இடம். இங்கு அமைந்துள்ள பெட்டிக் கடைகள் போன்ற அமைப்பில் தேவையான பொருள்களை வாங்கிக் கொள்ளலாம். சுமார் நான்கு அடி அகலம் கொண்ட நடைபாதையில் ஒரு குப்பையையும் பார்க்க முடியாது. அதிசயம், ஆனால் உண்மை. அப்படி ஒரு சுத்தம்.

இப்படி சுத்தமாக ஒவ்வொரு சிறு பகுதியும் பெங்சுயி மற்றும் ஹிந்து வாஸ்து சாஸ்திரப் படி இருப்பதால் தான் சிங்கப்பூர் வளம் கொழிக்கும் நாடாக இலங்குகிறது.

சூயிங் கம் சிங்கப்பூரில் (நினைத்த இடத்தில் துப்ப முடியாதபடி) தடை செய்யப்பட்டிருக்கிறது. மருத்துவ பரிந்துரை இருந்தால் மட்டுமே இதை வாயில் போட்டு மெல்ல முடியும்.

முஸ்தபா ஷாப்பிங் செண்டர்

லிட்டில் இந்தியா பகுதியில் உள்ள முஸ்தபா செண்டர் என்பது மிகப் பெரிய நீளமான கடை. 24 மணி நேரமும் இயங்கும் இதனுள்ளே சென்றால் எதையாவது வாங்காமல் திரும்ப முடியாது. ஏனெனில் இங்கு சுமார் மூன்று லட்சம் விதவிதமான பொருள்கள் விற்கப்படுகின்றன. என் பங்கிற்கு நான் இங்கு வாங்கிய பேனாக்கள் உள்ளிட்ட இதர பொருள்கள் இன்னும் உழைக்கின்றன!

எடுத்துக்காட்டு நகரம்!

சுத்தமான உள்ளத்துடன் சிங்கப்பூர் மக்கள் ஒரே குரலில் பேசுகின்றனர். வருவோரை உபசரித்து மகிழ்கின்றனர்; மகிழ்விக்கின்றனர்.

சிங்கப்பூரைப் பற்றி ஒரே ஒரு வரியில் சொல்ல முடியுமா என்றால் பதில் இது தான்.

உலகின் அழகிய நகரங்களுக்கு எடுத்துக்காட்டு நகரமாக அமைவது சிங்கார சிங்கப்பூர்!

***

tags-  சிங்கப்பூர்

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: