தினமணி திரு வெ. சந்தானம்  (1911-1998) Post No.11195

picture of Sri V Santanam, News Editor, Dinamani, Madurai

WRITTEN BY S Srinivasan &Brothers and Sister

Post No. 11,195

Date uploaded in London – –    15 AUGUST 2022         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

IF U DONT SEE THE PICTURES HERE, GO TO MY OTHER BLOG, swamiindology.blogspot.com

நாட்டின் சுதந்திரத்திற்காகப் பாடுபட்ட எமது தந்தையாரின் நினைவு அஞ்சலிக் கட்டுரை!

ஆகஸ்ட் 15ஆம் தேதி மறைந்த அவரை இந்த 75வது இந்திய சுதந்திர தினத்தன்று பக்தியுடனும் பெருமையுடனும் நினைவு கூர்ந்து எங்கள் அஞ்சலியைச் சமர்ப்பிக்கிறோம்

தினமணி திரு வெ. சந்தானம்  (1911-1998)

(BY ச. சீனிவாசன், ச.நாகராஜன். ச.சுவாமிநாதன், ச.சூரியநாராயணன், ச. மீனாட்சிசுந்தரம், லலிதா நடராஜன்)

1. சாதாரண  மத்தியதர வர்க்க குடும்பத்தில் 1911ஆம் ஆண்டு தோன்றியவர் திரு வெ.சந்தானம்.

திருக்களாவூர் எனப்படும் திருக்கருகாவூர் பூர்வீகம்.

2. அவரது தந்தையார் திரு வெங்கடராமன் செல்வத்தில் திளைத்தவர். அந்தக் காலத்திலேயே பெட்ரோல் பங்க் வைத்திருந்தவர். அந்தக் காலத்தில் பெட்ரோல் பங்க் என்ற வார்த்தை புழக்கத்தில் வரவில்லை. ஆகவே மண்ணெண்ணெய் வெங்கட்ராம ஐயர் என்று அறியப்பட்டவர்.  ஆனால் ஒரு கப்பல் கவிழ்ந்ததில் (இன்ஷூரன்ஸ் இல்லாததால்) இவரது சொத்துக்களை நஷ்டப்பட்டு இழந்தார். சென்னையை நோக்கிக் குடும்பம் வந்தது.

3. இள வயதிலேயே திரு சந்தானம் தனது எழுத்துத் திறமையைக் காண்பிக்க ஆரம்பித்தார்.

பாரதமணி பத்திரிகையில் சேர்ந்தார்.

திரு சங்கு கணேசன், ஏ என் சிவராமன், மணிக்கொடி எழுத்தாளர்கள் அறிமுகம் ஏற்பட்டது.

4. மஹாகவி பாரதியார் மீது ஆர்வம் மிகக் கொண்டு அரிய பாரதியார் பாடல்களைத் தேடிக் கண்டுபிடித்து பிரசுரித்தார். பாரதி இயல் வல்லுநர் ரா.அ.பத்மநாபன் இதைக் குறிப்பிட்டிருக்கிறார்.

5. தினமணியில் உதவி ஆசிரியராக சென்னையில் சேர்ந்தார். திரு சொக்கலிங்கம் தினமணியை விட்டு வெளியேற திரு ஏ.என். சிவராமன் ஆசிரியர் ஆனார்.

6. ஆயிரத்தி தொள்ளாயிரத்து ஐம்பதுகளின் ஆரம்பத்தில் தினமணியின் மதுரைப் பதிப்புத் தொடங்கியது. பொறுப்பாசிரியராகப் பதவி ஏற்று குடும்பத்துடன் மதுரை வந்தார். மீனாட்சி பட்டணம் அவருக்கு மிகவும் பிடித்து விட்டது. அன்னை மீனாட்சி அருள் மழை பொழிய இறுதி வரை தினமணியிலேயே தொடர்ந்து நற்பணி ஆற்றினார்.

மார்கழி மாதத்தில் அதிகாலை மீனாட்சி தரிசனம் கண்டிப்பாக உண்டு. அதே போல முடிந்த போதெல்லாம் தினமும் மீனாட்சி அம்மன் கோவிலில் இரவு நேரத்தில் நடைபெறும் பள்ளியறை தீபாராதனையில் தவறாமல் கலந்து கொள்வார். இது குடும்பத்தினரின் பழக்கமாகவே ஆனது.

1998, ஆகஸ்ட் 15ஆம் தேதி மறையும் வரை மதுரை வாழ்க்கை தொடர்ந்தது.

7. சிறந்த மொழி பெயர்ப்பாளர். ஆகவே அன்னாகரீனா என்ற லியோ டால்ஸ்டாயின் நாவலை தமிழில் மொழிபெயர்த்தார். நூல் அல்லயன்ஸ் கம்பெனி வெளியீடாக வந்தது.

8. சிறந்த எழுத்தாளர். நிறைய சிறுகதைகளையும் நூற்றுக் கணக்கில் கட்டுரைகளையும், பல்லாயிரக் கணக்கில் செய்தித் துளிகளையும் உருவாக்கியவர்.

9. சிறந்த சொற்பொழிவாளர். நூற்றுக்கணக்கான ஆன்மீ, இலக்கிய, சமூக கூட்டங்களில் பங்கேற்று உரையாற்றியவர்.

10. ஏராளமான இலக்கிய, சமுதாய, சுதந்திர விழிப்புணர்ச்சி மற்றும் ஆன்மீகக் கூட்டங்களுக்குத் தலைமை வகித்தவர்.

11.அகில இந்திய வானொலி மூலமாக அடிக்கடி உரையாற்றியவர்.

12. ஸ்வாமிஜி கிருஷ்ணா ஆஃப் அச்சன்கோவில் பெரும் மகான். அவரை குருவாக ஏற்றவர்.

ஸ்வாமிஜி கிருஷ்ணா உபதேசித்த கணபதி ஹோமத்தை தினமும் பல வருடங்களாகக் காலையில் செய்து வந்தவர்.

13. காஞ்சி பரமாசார்யாளின் பக்தர். அனுக்ரஹத்தைப் பெற்றவர். பலமுறை அவரை தரிசனம் செய்தவர்.

14. சிருங்கேரி பீடம் 35வது ஆசார்யாள் ஶ்ரீ அபிநவ வித்யாதீர்த்தரின் அனுக்ரஹம் பெற்றவர்.

சிருங்கேரி ஆசார்யர் இல்லத்திற்கு வந்து அனுக்ரஹம் செய்ய அவரது ஆசியை குடும்பமே பெற்றது.

15. பகவான் சத்யசாயிபாபாவை நேரில் பார்க்க புட்டபர்த்தி சென்று அவரை தரிசித்தவர். பேட்டியில் அவர் தனது விஸிடிங் கார்டைத் தர அதைப் பெற்றவர்.

16. பகவான் சத்யசாயிபாபாவைப் பற்றி ஏராளமான கீதங்கள் புனைந்தவர். சத்யசாயிபாபா அதைப் பற்றிக் கூறுகையில் பதங்கள் தானே வந்து விழுந்தன என்று கூறி ஆசி அருளினார்.

17. பகவான் சத்ய சாயிபாபா அழைப்பை ஏற்று சென்னை ஆபட்ஸ்பரியில் நடந்த கூட்டத்தில் சொற்பொழிவாற்றியவர்.

18. தர்மபுர ஆதீன மாநாடுகளில் பங்கேற்றவர்.

திருமந்திர மாநாடுகள் குறிப்பிடத் தகுந்தவை.

19.திருவாவடுதுறை ஆதீனம் ஏற்பாடு செய்த கூட்டங்களில் கலந்து கொண்டு உரையாற்றியவர்.

20.ஸ்வாமி சாந்தானந்தா புதுக்கோட்டையில் நடத்திய ஸஹஸ்ர சண்டி யாகத்திற்குப் பெருமளவில் பிரசாரத்திற்கு உதவியவர்.

21.ஸ்வாமி சாந்தானந்தா இல்லத்திற்கு வந்து அருளாசி வழங்கினார். பிக்ஷையும் ஏற்றார்.

22. ஏராளமான ஆன்மீக உபந்யாசகர்களுக்கு ஆதரவு அளித்தவர். குறிப்பாக கூத்தனூர் ஶ்ரீ சிங்கார சுப்ரமண்ய சாஸ்திரிகளைத் தனது இல்லத்திலேயே பலகாலும் தங்க வைத்து உபசரித்தவர்.

23. தமிழை ஆன்மீகத்திலிருந்து திசை திருப்பிக் காட்ட முயற்சித்ததை முறியடித்து தமிழ் தெய்வத்தமிழே என முழங்கி தெய்வத் தமிழ் சங்கத்தை மதுரையில் நிறுவியவர்.

24. சிறந்த இசை ரஸிகர். திருவாவடுதுறை ராஜரத்தினம் பிள்ளை கச்சேரிகளை ரசித்ததைக் குறிப்பிடுவார். பாரதியார் பாடல்களை வீட்டில் அடிக்கடிப் பாடிக் காட்டுவார்.

25. ராஜாஜியின் அன்புக்குப் பாத்திரமானவர். அவர் திருமணத்திற்கு நேரில் வந்து ஆசி கூறி கௌரவித்தார்.

26. திரு காமராஜரின் நெருங்கிய நண்பர். திரு காமராஜருடன் ஒரே சிறையில் இருந்தவர். அவரே சுதந்திர போராட்ட வீரர்கள் பற்றிய அரசு தொகுப்பிற்கு தன் கையெழுத்திட்ட சான்றிதழ் கடிதம் வழங்கினார்.

27. சுதந்திரப் போராட்டத்தில் தீவிர பங்கேற்றவர். அதனால் வெள்ளை அரசினால் கைது செய்யப்பட்டு சிறை வைக்கப்பட்டவர்.

28. 25வது ஆண்டு சுதந்திர தினத்தன்று மதுரையில் தியாகிகளுக்கான தாமிரப் பட்டயம் பெற்றவர்.

29. மணிக்கொடி திரு பி.எஸ்.ராமையாவின் பால்ய கால நண்பர். அவருக்கு வத்தலகுண்டுவில் பின்னால் நடந்த மணிவிழாவைச் சிறப்பாக கொண்டாடியவர்.

30. திரு வ.ரா.வோடு நெருங்கிப் பழகியவர். அந்தக் காலத்தில் வாரந்தோறும் நண்பர்கள் ஒருவருக்கொருவர் வீட்டில் வார விருந்து நடைபெறும். வ.ரா. வீட்டில் ஒரு வாரம் என்றால் தனது வீட்டில் ஒரு வாரம் என்ற வழக்கப்படி இனிய விருந்து இலக்கிய மயமாகத் திகழும்.

31. தீவிர சைவ உணவு மேற்கொண்டவர்.

32. மிக மிக எளிமையாக வாழ்ந்தவர். ஆடம்பரத்தை அறவே வெறுத்தவர். கதர் ஜிப்பா, வேஷ்டி என உடையில் கூட சுதேசி பொருள்களை ஆதரிக்க வேண்டும் என்ற குறிக்கோளைக் காட்டியவர்.

33. இரண்டாம் உலகப் போரையொட்டி வெளிநாடு செல்ல வாய்ப்புத் தரப்பட்ட போது அதை மறுத்தவர். ஆகவே திரு ஏ.என்.சிவராமன் அந்தப் பயணத்தை மேற்கொண்டார்.

34. குடி, மது என்ற பழக்கங்களை அறவே நீத்து அமெரிக்க அதிகாரிகளும் வியந்து போற்றும்படி ஒழுக்கத்தை வாழ்ந்து காட்டியவர்.

35. சுமார் பத்து முதல் பனிரெண்டு நேரம் என்ற அடிப்படையில் தினமும் பத்திரிகை பணியில் உழைத்தவர்.

36.கிங்காங் உள்ளிட்ட மல்யுத்த வீரர்களுக்குப் புகழ் தேடித் தந்தவர். கிங்காங் வீட்டிற்கே வந்து உரையாடி இருக்கிறார்.

37. திருப்புகழ் பாடல்களில் பெரிதும் லயித்தவர். அதல சேடனார் ஆட உள்ளிட்ட பல பாடல்களுக்கு இசை அமைத்திருக்கிறார்.

38. மதுரை திருப்புகழ் சபையில் நடக்கும் பஜனைகளுக்கு நேரம் கிடைத்த போதெல்லாம் செல்பவர். திருப்புகழ் கூட்டங்களில் பேசுபவர்.

39. ஶ்ரீ கிருபானந்தவாரியாரின் நண்பர். அவர் கூட்டங்களுக்குத் தலைமை உரை ஆற்றியவர்.

40. ஶ்ரீ முத்துராமலிங்கத் தேவரின் சிறந்த நண்பர்.

அவரது கூட்டத்திற்கு தலைமை தாங்கி உரை நிகழ்த்தியவர்.

 ஶ்ரீ முத்துராமலிங்கத் தேவரின் உரைகளைப் பெரிய அளவில் அப்படியே தினமணியில் பிரசுரித்து தேவர் பற்றிய இன்றைய ஆவணத்திற்கு வழி வகுத்திருக்கிறார்.

41. ரிஷிகேஷ் ஸ்வாமி சிவானந்தரிம் அளவற்ற ஈடுபாடு கொண்டவர். மதுரை தெய்வநெறிக் கழகம் நடத்தும் கூட்டங்களில் தலைமை உரை ஆற்றுவதை வழக்கமாகக் கொண்டிருந்தார்.

42. பல திருத்தலங்களுக்கும் யாத்திரை மேற்கொள்வதை வழக்கமாகக் கொண்டிருந்தவர்.

நூற்றுக்கணக்கான கோவில்கள் இந்த யாத்திரையில் அடங்கும்.

43. குடும்பத்தை பேணிக் காத்தவர். சிறந்த கணவரா, சிறந்த தந்தையாக இருந்தவர். குடும்பத்தை மிக உயரிய நிலைக்குக் கொண்டு வந்தவர்.

44. சொத்து சேர்ப்பதில் அக்கறை இல்லாதவர். இறுதி வரை அவருக்கென சொந்த வீடு இல்லை. ஆனால் மகன்கள் அனைவரும் சொந்த வீட்டில் இருப்பதைக் கண்டு மகிழ்ந்தவர். அதை வாங்க உத்வேகம் ஊட்டி ஆதரவளித்தவர்.

45. காஞ்சி பரமாசார்யாள் அனுக்ரஹித்து ஆரம்பித்து வைத்த மார்கழி மாத திருப்பாவை – திருவெம்பாவை இசைப் பள்ளிகளை வெகுவாக ஆதரித்து ஊக்குவித்தவர். மதுரையில் திருமதி ராஜம்மாள் சுந்தரராஜன், திரு பாலகிருஷ்ண ஐயங்கார் பள்ளிகளை வெகுவாக ஆதரித்தவர்.

46. இலக்கியக் கூட்டங்களில் பங்கேற்றவர். மஹாகவி பாரதியார் பற்றிய ஏராளமான கூட்டங்களில் பங்கேற்றவர்.

47. மதுரை எழுத்தாளர் சங்கத் தலைவராகப் பொறுப்பு வகித்தவர். சத்குரு சங்கீத சமாஜம் உள்ளிட்ட முக்கிய நிலையங்களையும் ஆதரித்து சமாஜ குழுவில் அங்கம் வகித்தவர்.  பல கமிட்டிகளில் அங்கம் வகித்தவர். சமூகப் பணிகள் முன்னேற ஆலோசனைகளை அவ்வப்பொழுது வழங்குவார். மகாகவி பாரதியார் உருவச்சிலை கமிட்டி, மீனாக்ஷி அம்மன் கோவில் கும்பாபிஷேகக் கமிட்டி என்று இப்படி பல முக்கிய குழுக்களில் அங்கம் வகித்து நல்ல செயல்கள் நடைபெற ஊக்கம் கொடுத்து வந்தவர்.

48. புதிய எழுத்தாளர்களை அறிமுகப்படுத்தியவர். நூற்றுக் கணக்கான எழுத்தாளர்கள் இவரால் பிரபலமாயினர்.

49. மத வேற்றுமை பார்க்காதவர். அவரால் ஆதரிக்கப்பட்ட ஜியாவுடீன் என்ற இஸ்லாமிய எழுத்தாளர் பெருமை பட இது பற்றிக் கூறுவதுண்டு.

50. குர் ஆனைக் கற்றவர். இதை முறையாகக் கற்பிக்க ஒரு இஸ்லாமிய பேரறிஞர் வீடு வந்து சொல்லிக் கொடுத்தார்.

51. தியானம் யோகா ஆர்வலர். நாட்கணக்கில் குறிப்பிட்ட காலம் மௌன விரதம் ஏற்பார்.

52. நல்ல ஜோதிடர்களை ஆதரித்தவர். தினமணியில் ராசிபலன் எழுதி வந்த ஶ்ரீ ரங்கநாத ஜோதிடர் இவர் பால் பெருமதிப்புக் கொண்டிருந்தார். ராசிபலன்களைத் தொடர்ந்து பல வருட காலம் தினமணியில் எழுதி வந்தார்.

53. ஹிந்துப் பண்டிகைகள் அனைத்தையும் முறையாகக் கொண்டாடி வந்தவர். தான தர்மங்களில் அக்கறை கொண்டு விளம்பரமில்லாமல் தானம் செய்தவர்.

54. ஏழைகளை ஆதரித்தவர். நன்கு புத்திகூர்மையுள்ள ஏழை மாணவர்களை ஊக்குவித்து உயர்த்தும் பொருட்டு அவர்களை இல்லத்திற்கு அழைத்து உணவளித்தவர்.

55. சங்கீத வித்வான்களைப் பெருமளவு ஆதரித்தவர். வீட்டில் எப்போதும் சில வித்வான்கள் இருப்பர் என்று சொல்லுமளவு அவர்கள் அன்பு பாராட்டி இல்லம் வருவது வழக்கமாயிற்று. திரு சேஷகோபாலன் மிக மிக இளமையாக இருந்த போது அவரை ஊக்கப்படுத்தினார். பாரதரத்னா திருமதி எம்.எஸ். சுப்புலெக்ஷ்மியின் சகோதரர் எம்.எஸ். சக்திவேல் உள்ளிட்ட இசைக் கலைஞர்களை ஆதரித்தார்.

56. காருகுறிச்சி அருணாசலம் இவர் பால் பெருமதிப்பு கொண்டிருந்தார். முக்கிய உற்சவங்களின் போது மீனாக்ஷி வீதி வலம் வரும் போது காருகுறிச்சி அருணாசலம் இவர் வீட்டின் முன்னே நாதஸ்வரம் வாசித்துள்ளார்.

57. இராமேஸ்வர புயலின் போது கொஞ்சமும் அஞ்சாமல் நேராக வெள்ளத்தின் ஊடே சென்று நிலைமையை நேரில் ஆய்வு நடத்தி இரவோடிரவாக நடந்தவை பற்றிய செய்தியை உலகிற்கு விரிவான முறையில் நல்கியவர்.

58. மிக மிக ஆழ்ந்த தீவிர படிப்பாளர்.

உலக பத்திரிகைகள், நாவல்கள், கட்டுரைகள், பல்வேறு துறை ஆய்வுகள் ஆகியவற்றை உடனுக்குடன் படிப்பவர். பிரம்மஞானசபையில் அனைத்துப் புத்தகங்களையும் படித்தவர் என்று அந்த நூலகரே பின்னால் குறிப்பிட்டிருக்கிறார்.

59. தமிழ் அன்பர். தமிழில் பட்டி மன்றங்களை தினமணி விழாக்களில் நடத்தியவர். திருவாளர்கள் சாலமன் பாப்பையா, சொ.சொ.மீ சுந்தரம், சௌமிய நாராயணன் உள்ளிட்ட ஏராளமான பேச்சாளர்கள் இல்லத்தில் வந்து பல்வேறு தலைப்புகளை அலசி ஆராய்ந்து பட்டி மன்ற விவாதத்திற்கான இலக்கிய தலைப்பைத் தேர்ந்தெடுப்பது வழக்கமாக இருந்தது.

60. இலக்கியவாதிகளும் சிறந்த அரசியல்வாதிகளும் விரும்பி வீடு தேடி வந்து அளவளாவிச் செல்வர். பாரதி அன்பர் திரு வி.ஜி. சீனிவாசன் விக்டோரியா எட்வர்ட் ஹால் போகும் வழியில் இவர் வீட்டிற்கு வந்து ஒரு பார்வை பார்த்து விட்டுத் தான் செல்வார்.

திரு சா. கணேசன், பேராசிரியர் சீனிவாச ராகவன், திரு எஸ். ராமகிருஷ்ணன் உள்ளிட்ட ஏராளமான அறிஞர்கள் வருவது வழக்கம்.

61.மதுரை ஆதினம் சோமசுந்தர தேசிகரின் அன்புக்கு உரியவர். அவரது நற்பணிகளை வெகுவாக ஆதரித்து வந்தவர்.

62. தேசீயப் பணிகளில் ஆர்வம் கொண்டவர். திரு இராம கோபாலன் (பின்னால் ஹிந்து முன்னணியை நிறுவியவர்), திரு எல். கணேசன் (இன்றைய மாநில கவர்னர்), திரு சிவராம்ஜி ஆகியோர் இல்லத்திற்கு அடிக்கடி வருவது வழக்கம்.

63. எமர்ஜென்ஸி காலத்தில் அஞ்சாது பத்திரிகை பணியை ஆற்றியவர். சென்சார் அதிகாரிகளே பாராட்டி நட்பு கொள்ளும்படி வியக்க வைத்தவர்.

64. சிறந்த நினைவாற்றல் கொண்டவர். படித்த புத்தகங்களில் மிக முக்கிய பகுதிகள் அடிக்கோடிட்டு இருக்கும். குறிப்புகளை தனி நோட்டில் எழுதிக் கொள்வது வழக்கம். தேவார திருவாசகம், திருப்புகழ், நாலாயிர திவ்ய பிரபந்தம், பாரதியார் கவிதைகள் உள்ளிட்டவற்றிலிருந்து சரளமாக மேற்கோள்களைச் சுட்டிக் காட்டுவார்.

65. தினமணி உரிமையாளர் திரு ராம்நாத் கோயங்காவின் மதிப்பிற்கும் அன்பிற்கும் பாத்திரமானவர். திரு கோயங்கா மதுரையில் மீனாக்ஷி அம்மன் கோவிலுக்கு தரிசனம் செய்யும் போது கூட இவரை நிச்சயம் கூட்டிச் செல்வது வழக்கமானது. அவரது விருப்பதிற்கிணங்க பல முறைகள் 45 நாட்கள் அர்ச்சனையை மீனாக்ஷி அம்மன் கோவில் மற்றும் திருப்பரங்குன்றம் கோவிலில் நிறைவேற்றுவது வழக்கம். குடும்ப உறுப்பினர்களும் அவ்வப்பொழுது அன்றாட அர்ச்சனை, பூர்த்தி நாட்களில் பங்கு பெறுவது வழக்கமானது.

66. செய்திகளை பிரசுரிப்பதில் நடுநிலை வகித்து பத்திரிகை தர்மம் காத்து சிறந்த பத்திரிகையாளராக நெடுங்காலம் விளங்கியவர்.

எடிடிங்கில் தனி முத்திரை பதித்தவர். காலையில் ஆறு மணிக்கே எடிடிங் வேலைகள் இல்லத்தில் ஆரம்பிக்கப்படும். இரவு பனிரெண்டு மணிக்கு அலுவலகத்திலிருந்து திரும்பி வரும் வரை இது தொடரும். எந்த ஒரு செய்தியிலும் ஒரு சில விநாடிகளில் அதன் முக்கியத்துவத்தை, சாரத்தை கிரஹித்து உடனே வழங்குவது இவரது தனிப்பட்ட சிறப்பு.

67. சிறந்த மொழி பெயர்ப்பாளர். ஆங்கிலத்தின் நுட்பங்களையும் அதைத் தமிழில் தரும் வல்லமையையும் கொண்டவர். தினசரி ஆங்கிலத்தில் ராய்ட்டர், பிடிஐ ஆகியவற்றில் வரும் செய்திகளைப் பிரித்து, பகுத்து, தொகுத்து, தமிழில் மொழி பெயர்த்து அதை மக்களுக்குத் தருவது வழக்கம்.

68. லட்சக்கணக்கான தினமணி பிரதிகள் அன்றாடம் தென் தமிழ் நாடெங்கும் செல்லும். அவற்றில் ஆன்மீகத்திற்கு என்று தினமும் தனி ஒரு காலம் (Column) தந்தவர். இதர பத்திரிகைகள் ஆன்மீகத்திற்கு முக்கியத்துவம் தராமல் இருந்த நிலையில் ஆன்மீகச் செய்திகளை முதல் பக்கத்தில் நான்கு காலம் தலைப்பில் வெளியிட்டு புது நெறியை பத்திரிகை உலகில் புகுத்தியவர். இதர பத்திரிகைகள் இந்த புது வழியைப் பின்பற்ற ஆரம்பித்தன. இது இன்றளவும் தமிழ் பத்திரிகைகள் அனைத்திலும் தொடர்கிறது.

69. புதுப் புது கலைகளை கற்பதில் ஆர்வம் கொண்டவர். அவ்வப்பொழுது அந்தந்தக் கலையின் வல்லுநர்களை அழைத்து அது சம்பந்தமான நுட்பமான விஷயங்களைக் கற்றுத் தேர்வார்.

70. உழவாரப் பணிகளில் நேரில் ஈடுபடுபவர். இம்மையில் நன்மை தருவார் கோவில் உள்ளிட்ட இடங்களில் நடைபெற்ற பணிகளை ஊக்குவித்தவர். தானே நேரில் குளத்தைத் தூறு வாரும் பணியில் ஈடுபட்டவர்; அனைவரையும் செயல் முறையில் ஊக்குவித்தவர்.

71. நூல்களுக்கு முன்னுரை மற்றும் கட்டுரைகளை வழங்கியவர்.

72. நலிந்த நாடகக் கலைஞர்களை உற்சாகப்படுத்தி உதவி செய்து ஊக்குவித்தவர். நாடகக் கலை நலிவுற்று வருவதைக் கண்டு அந்தக் கலைஞர்கள் வாடியபோது அவர்கள் மேம்பட உற்சாகம் ஊட்டியவர்.

73. புதுக்கோட்டை ஶ்ரீ கோபாலகிருஷ்ண பாகவதரின் அன்புக்கும் ஆசிக்கும் பாத்திரமானவர். ராதா கல்யாணத்தில் ஈடுபாடுள்ளவர். வாரந்தோறும் நண்பர் ஒருவருடன் சேர்ந்து மாறி மாறி அவர் வீட்டிலும் தன் வீட்டிலுமாக ராதா கல்யாணத்தை பல வருடங்கள் நடத்தி வந்தார்.

74. சேதுராம் பஜனை மண்டலியில் நடைபெறும் பஜனைகளில் அளவில்லா ஆர்வம் கொண்டவர். சமர்த்த ராமதாஸர், துக்காராம் பாடல்கள், பஜனைகளைத் தொடர்ந்து ஈடுபாட்டுடன் செய்தவர்.

75. தேசமும் தெய்வமுமே உயிர் என வாழ்ந்தவர். 1998ஆம் ஆண்டு ஆகஸ்ட் மாதம் 15ஆம் நாள் காலையில் எல்லிஸ் நகரில் தன் வீட்டில் இருந்தவாறே, “கொடி ஏற்றி ஆயிற்றா?” என்று கேட்டார். ஆம் என்று சொன்னவுடன் அவர் உயிர் பிரிந்தது. அவர் வாழ்க்கையின் நோக்கமும் அனைவருக்கும் புரிந்தது.

அவரைப் போற்றி எங்கள் அஞ்சலியைச் செலுத்துகிறோம்

***

tags-Tags – Dinamani, News Editor, V Santanam, தினமணி , திரு வெ. சந்தானம் ,  மதுரை, பொறுப்பாசிரியர் 

Leave a comment

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: