மெழுகுவர்த்தியில் பிறந்த அக்னி -|| ஏவுகணை! (Post No.10,601)

WRITTEN BY S NAGARAJAN
Post No. 10,601
Date uploaded in London – – 27 JANUARY 2022

Contact – swami_48@yahoo.com
Pictures are taken from various sources for spreading knowledge;
this is a non- commercial blog. Thanks for your great pictures.
tamilandvedas.com, swamiindology.blogspot.com
மெழுகுவர்த்தியில் பிறந்த அக்னி -|| ஏவுகணை!
ச.நாகராஜன்
அக்னி – ||
இந்தியாவையே பெருமிதம் கொள்ளச் செய்த ஏவுகணை! 20 மீட்டர் நீளமுள்ள இந்த சாலிட் ப்ரொபல்ட் பாலிஸ்டிக் மிஸைல் (Solid-propelled ballistic missile) 16 டன் எடை கொண்டது.
இதன் பே-லோட் (Pay-load) 1000 கிலோ ஆகும். இதன் முதல் சோதனை வெற்றிகரமாக 1999ஆம் ஆண்டு ஏப்ரல் மாதம் 11ஆம் தேதி நடத்தப்பட்டது. இது 2004ஆம் ஆண்டு நமது ராணுவத்தில் உரிய முறையில் சேர்க்கப்பட்டது.
இது பிறந்த கதை சுவாரசியமான ஒன்று!
டி ஆர் டி ஓ எனப்படும் (DRDO – Defence and Research Development Organisation) டிஃபென்ஸ் அண்ட் ரிஸர்ச் டெவலப்மெண்ட் ஆர்கனைசேஸன் டாக்டர் ஏ.பி.ஆர். அப்துல்கலாம் அவர்களைத் தலைவராகக் கொண்டு இயங்கி வந்தது.
இது 1999இல் ஏப்ரல் 11ஆம் தேதிக்கு முன்னரேயே கூட ஏவப்பட்டிருக்கக் கூடும். ஆனால் நமது இந்திய விஞ்ஞானிகளின் இயற்கைக்கு ஊறு விளைவிக்கக் கூடாது என்ற நல்லெண்ணமே இதைச் சற்றுத் தள்ளிப் போட்டு சோதனை செய்ய வைத்தது.
வீலர் (Wheeler) தீவு ஒரிஸாவின் தெற்குக் கடற்கரையில் பிதர்கணிகா காடுகளுக்கு அருகில் உள்ளது. இதுவே அக்னி – || ஏவுகணையைச் சோதனை செய்ய வேண்டிய இடமாகத் தேர்ந்தெடுக்கப்பட்டது.
ஆனால் இது அபூர்வமான ஒரு தீவுப் பிரதேசம் என்பது சுற்றுப்புறச் சூழல் ஆர்வலர்களால் சுட்டிக் காட்டப்பட்டது.
இந்தக் கடற்கரை பிரதேசத்திற்கு அருகில் உள்ள கடலில் மிகவும் அரிதாகக் காணப்படும் ஒருவகை ஆமைகள் ஏராளமாக உள்ளன.
இவற்றை ஆலிவ் ரிட்லி டர்டில் (Olive Ridely turtles) என்பர். நம்ப முடியாத தூரத்திலிருந்து பயணப்பட்டு அவை இங்கு வருவது வழக்கம். ஆஸ்திரேலியாவிலிருந்து இங்கு வந்து ஒரு குறிப்பிட்ட இடத்தில் குஞ்சு பொறிக்கும் ஒரு வகை விசேஷமான ஆமைகள் இவை.
நவம்பரில் வரும் இவை மார்ச் முடிய இங்கே தங்கும். குஞ்சுகள் பொறிக்கப்பட்டவுடன் திரும்பித் தமது இடம் நோக்கிச் செல்லும்.
ஆகவே சுற்றுப்புறச் சூழல் ஆர்வலர்கள் அப்துல்கலாம் அவர்களிடம் மார்ச்சுக்கு பிறகு அக்னி ஏவுகணை சோதனையை வைத்துக் கொள்ளலாம் என்று யோசனை கூறினர்.
சுற்றுப்புறச் சூழலில் பெரிதும் ஆர்வம் கொண்ட அப்துல்கலாம் உடனே இந்த யோசனையை ஏற்றுக் கொண்டார்.
உடனடியாக ஒரு ஆணையைப் பிறப்பித்தார். அதன் படி இந்தத் தளத்தில் இருந்த அனைத்து விஞ்ஞானிகளும் மெழுகுவர்த்திகளை ஏற்றி வைத்துக் கொண்டு தங்கள் வேலைகளைப் பார்க்க ஆரம்பித்தனர்.
ஒருவிதமான மின் விளக்கும் எரியவிடப்படவில்லை. ஏனெனில் அவை ஆமைகளுக்கு தொந்தரவாக இருக்கும் என்று.
ஒரு நாளல்ல இரு நாளல்ல, சுமார் ஐந்து மாதங்கள் இப்படி மெழுகுவர்த்திப் பணி தொடர்ந்தது.
விசேஷ விருந்தாளிகளான இந்த ஆமைகள் தமது சந்ததி விருத்திப் பணி முடித்து மீண்டும் சொந்த இடம் நோக்கிப் பயணப்பட்டபின் ஆய்வு வேலைகள் முழு வீச்சில் நடைபெற ஆரம்பித்தன.
ஏப்ரல் 11 – நிர்ணயிக்கப்பட்ட தேதியில் சோதனை நடந்தது; வெற்றி பெற்றது.
இந்தியா தனது பாரம்பரியமான அன்பு வழியை ஒரு போதும் ஒதுக்கியதில்லை – அது கடல் வாழ் உயிரினமாக இருந்த போதிலும் அவற்றுக்கும் கூட ஒரு ஊறும் விளைவிக்க நமது விஞ்ஞானிகள் தயாராக இல்லை.
ஆக மெழுகுவர்த்தியில் பிறந்த அக்னி ஏவுகணை பல்வேறு வளர்ச்சிகளைக் கண்டு உலகையே இன்று பிரமிக்க வைக்கிறத்!

tags-அக்னி II ஏவுகணை