WRITTEN BY S NAGARAJAN

Post No. 10,385

Date uploaded in London – –   28 NOVEMBER  2021         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

ச.நாகராஜன் எழுதியுள்ள சுற்றுப்புறச் சூழல் சிந்தனைகள் பற்றிய பத்து உரைகள் ஆல் இந்தியா ரேடியே சென்னை வானொலி A அலைவரிசையில் (720 Hz) தினமும் காலை 6.55 (மாநிலச் செய்திகள் முடிந்த பின்னர்) 11-11-2021 முதல் ஒலிபரப்பாகி வந்தன.

18-11-2021 காலை ஒலிபரப்பான எட்டாவது உரை கீழே தரப்படுகிறது. 

உத்வேகமூட்டும் ஆர்வலராக மாறலாமே!

                     ச.நாகராஜன்

நாளுக்கு நாள் சுற்றுப்புறச்சூழலைக் காக்க வேண்டும் என்ற ஆர்வம் அனைவருக்கும் ஏற்பட்டு வருவதை உங்கள் அனுபவத்தில் நீங்களே உணரலாம். ஆட்டோவில் ஏறி உட்காரும் ஒரு நபர் அங்கு அதை ஓட்டுநர் அருகில் இருக்கும் இளஞ் செடிக் கன்றுகளைக் கண்டு அது பற்றிக் கேட்டால் இப்படிச் செடிகளை எடுத்துக் கொண்டு மரக்கன்றுகளை நடுவது தனது பழக்கம் என்பார். இயற்கை வளத்தின் மீது ஆர்வம் கொண்ட அந்த ஓட்டுநர் போன்றோர் உலகெங்கும் ஆயிரக் கணக்கில் பெருகி வருகின்றனர்.

எந்த வித எதிர்பார்ப்பும் இல்லாமல் சேவை செய்து வரும் இவர்களைத் தேடிப் பிடித்து பத்திரிகைகளும் ஊடகங்களும் செய்திகளை வெளியிடுகின்றன; பரிசுகளும் பாராட்டுகளும் அவர்களைத் தேடி வருகின்றன. சில நல்ல ஆர்வலர்களைப் பற்றி அறிந்து கொண்டு நாமும் உத்வேகமூட்டும் ஆர்வலராக மாறலாமே!

சில எடுத்துக் காட்டுகள் இதோ: மலைகா வாஸ் (Malaika Vaz) என்ற பெண்மணிக்கு வயது 23 தான்.இந்த இளம் பெண்மணி ஒரு இயற்கை ஆர்வலர். திரைப்படம் தயாரிப்பவர். காட்டில் வாழும் உயிரினங்களைப் பற்றி ஆராய்பவர். தனது ஆய்வின் மூலம் சட்டத்திற்குப் புறம்பாக காட்டு வாழ் உயிரினங்கள் கொல்லப்படுவதையும் கடத்தப் படுவதையும் ஆதாரத்துடன் செய்திகள் வெளியிட்டு அவற்றைத் தடுத்து இவர் நிறுத்தினார்; பாராட்டையும் பெற்றார். ON THE BRINK என்ற இவரது தொலைக்காட்சித் தொடர் அனைவராலும் பாராட்டப்படும் ஒன்று.     

டான்ஜானியாவில் உள்ள கிளிமஞ்சாரோ (Kilimanjaro) மலையடிவாரத்தில் வசிக்கும் ஹான்ஸ் காஸ்மஸ் கொடேயா (HANS COSMAS NGOTEYA) வனவிலங்குகளின் பாதுகாப்பாளர். இந்த விலங்குகளைப் பற்றி, அவர் அனைவருக்கும் பல உண்மைகளைத் தெரிவிக்க, அந்தப் பகுதி வாழ் அனைவரும் விலங்குகள் மீது மிக்க அன்பு பாராட்டினர். அவரையும் நல்லெண்ணத் தூதுவராகக் கொண்டாட ஆரம்பித்தனர்.         

பெர்டி கிரிகாரி (Bertie Gregory) என்ற 27 வயது இளைஞர் ஒரு புகைப்பட வல்லுநர்; திரைப்பட தயாரிப்பாளரும் கூட. மும்பைக்கு வந்த அவர் அங்கு சிறுத்தைகளைப் படம் பிடித்தார்; அண்டார்டிகாவில் பெங்குவின்களையும், வான்கூவரில் அபூர்வமான ஓநாய்களையும் படமாகப் பிடித்தார். அருகி வரும் வனவிலங்குகள் மீது ஆர்வம் பெருகி அவற்றைக் காக்கத் தொடங்கினார். அவருக்குப் பல பரிசுகளும் கிடைத்தன. தனது இந்தப் படங்கள் மூலம் மக்களிடையே வனவிலங்குகள் காக்கப்பட வேண்டியதன் அவசியம் பற்றி தொடர்ந்து விழிப்புணர்வை ஊட்டி வருகிறார் அவர். இப்படி நூற்றுக் கணக்கானவர்களைப் பற்றிச் சொல்லிக் கொண்டே போகலாம்.

இணையதளத்தில் கிடைக்கும் தகவல்கள் நமக்கு உத்வேகம் ஊட்டுபவை. நாமும் இந்த சுற்றுப்புறச் சூழல் காக்கும் களத்தில் முன்களப் பணியாளராக இறங்கலாமே!

***

tags– இயற்கை ஆர்வலர், புகைப்பட வல்லுநர், பெர்டி கிரிகாரி, மலைகா வாஸ்

WRITTEN BY S NAGARAJAN                     

Post No.7768

Date uploaded in London – – 1 April 2020

Contact – swami_48@yahoo.com

Pictures are taken from various sources for spreading knowledge; this is a non- commercial blog. Thanks for your great pictures.

ஆல் இந்தியா ரேடியோ சென்னை வானொலி நிலையம் அலைவரிசை ‘A’யில் காலைமலர் நிகழ்ச்சியில் தினமும் காலை 6.55க்கு 1-3-2020 முதல் 10-3-2020 முடிய ஒலிபரப்பப்பட்ட பத்து சுற்றுப்புறச்சூழல் விழிப்புணர்வு உரைகளில் ஐந்தாவது உரை

(5-3-2020 அன்று ஒலிபரப்பானது)

உத்வேகமூட்டும் இயற்கை ஆர்வலர்கள்!

ச.நாகராஜன்

இயற்கைச் சூழலை மாசில்லாது பாதுகாக்க வேண்டும் என்ற விழிப்புணர்ச்சி உலகெங்கும் மேம்பட இயற்கை ஆர்வலர்கள் உத்வேகமூட்டும் முன்மாதிரியாகத் திகழ்கின்றனர்.

சாமானியனிலிருந்து ஹாலிவுட் பிரபலங்கள் வரை இதில் முனைப்புடன் ஈடுபடுவது வரவேற்கப்பட வேண்டிய செய்தியாகும்.

உலகின் பிரசித்தி பெற்ற நடிகரான லியனார்டோ டிகாப்ரியோ (Leonardo Dicaprio) 50 லட்சம் டாலர் தந்து அமேஸான் காடுகளைப் பாதுகாக்க வேண்டும் என்ற தனது எண்ணத்தை வலியுறுத்தியுள்ளார்.

அமேஸான் காடுகளில் இயற்கையாகவும் சிலசமயம் செயற்கையாகவும் ஏற்படும் தீ விபத்து பல்லுயிர் பெருக்கத்திற்குப் பெரும் ஊறு விளைவித்திருக்கிறது.

இதே போல இம்பாலின் மேற்கே உள்ள காடுகள் அழிந்து வரும் நிலையைக் கண்ட 45 வயதான மொய்ரங்தெம் லொய்யா (Moirangghem Loiya)   மருலாங்கோல் மலைத் தொடர் பகுதிகளில் (Maru Longol hill range) தனது இளம் பருவத்தில் குழந்தையாக இருக்கும் போது அடிக்கடி செல்வது வழக்கம்.

தனது கல்லூரிப்படிப்பை முடித்த நிலையில் 2000ஆம் ஆண்டில் அங்கு சென்ற போது அந்தப் பகுதி முற்றிலுமாக எரிக்கப்பட்டு கிடந்ததைக் கண்டு திடுக்குற்றார்; வேதனை கொண்டார். உடனே அந்தப் பகுதியில் இழந்த பசுமையை மீட்க வேண்டும் என்ற ஒரே நோக்கத்துடன் மரங்களை நட ஆரம்பித்தார். கடந்த 19 வருடங்களாக இடைவிடாது அவர் நட்டு வந்த மரங்கள் 300 ஏக்கர் காட்டை உருவாக்கி இழந்த பசுமையை மீட்டிருக்கிறது.

இந்திய அரசியல் அமைப்பின் 51-A (g) பிரிவானது ஒவ்வொரு இந்தியக் குடிமகனும் இயற்கையைப் பாதுகாப்பதை கடமையாகக் கொள்ள வேண்டுமென்பதை வலியுறுத்துவதோடு விலங்குகளின் மீது இரக்கத்துடன் நடந்து அவற்றைப் பாதுகாக்க வேண்டும் என்கிறது.

லொய்யாவின் தன்னலமற்ற பணியால் உள்ளூர் மக்களும் உற்சாகத்துடன் அவருடன் இணைந்து இயற்கைப் பாதுகாப்பில் ஈடுபட்டு வருகின்றனர்.

அரசும் லொய்யாவின் பணியை வரவேற்று ஊக்குவிக்கிறது.

250 வகையான தாவரங்கள் அங்கு வளர்கின்றன; இவற்றில் 25 வகையான மூங்கில் இருப்பது ஒரு சிறப்பு அம்சமாக இலங்குகிறது. அத்துடன் ஏராளமான பாம்பு வகைகளும், விலங்கினங்களும் பறவைகளும் இப்பகுதியில் பயமின்றி வாழ்ந்து வருகின்றன.

பெருந்திரளான மக்கள் இந்த இயற்கைப் பசுமையைப் பார்த்துப் பரவசப்பட்டு தம் தம் அளவில் இயற்கைப் பாதுகாப்பில் ஈடுபடுகின்றனர். இதே போல நமது பகுதியில் உத்வேகமூட்டும் முன்மாதிரியாக நாம் திகழ்வோம் என ஒவ்வொருவரும் முன் வந்தால் பசுமை இந்தியா அமையும், இல்லையா?!

Script by S.Nagarajan (ச.நாகராஜன்)

tags – மொய்ரங்தெம் லொய்யா, இயற்கை ஆர்வலர், சுற்றுப்புறச்சூழல், விழிப்புணர்வு