இராமானுஜரை ஆதரித்த கொங்கு பிராட்டியார்! (Post No.8429)

WRITTEN BY S NAGARAJAN                     

Post No. 8429

Date uploaded in London – – –31  July 2020   

Contact – swami_48@yahoo.com

Pictures are taken from various sources for spreading knowledge; this is a non- commercial blog. Thanks for your great pictures.

இராமானுஜரை ஆதரித்த கொங்கு பிராட்டியார்!

ச.நாகராஜன்

திரிபுவன சக்கரவர்த்தி என்றும் சுங்கம் தவிர்த்த சோழன் என்றும் பேரம்பலம் பொன் வேய்ந்த சோழன் என்றும் இப்படிப் பலவாறாகப் புகழப்படும் (முதலாம்) குலோத்துஙக் சோழன் அரசாண்ட காலம் அது.

அவன் வேண்டிக் கொண்டதால் தான் சேக்கிழார் பெரிய புராணத்தை இயற்றி அரங்கேற்றினார்.

கி.பி. 1070ஆம் ஆண்டு பட்டம் தரித்த குலோத்துங்கன் 1119 முடிய அரசாண்டான்.

இதே காலத்தில் வாழ்ந்த இன்னொரு பெரும் அவதார புருஷர் இராமானுஜர்.

வைஷ்ணவத்தைப் பொறாத சில வித்வான்கள் சைவ வைஷ்ணவ வாத சபை ஒன்றை நடத்த வேண்டும் என்று தீர்மானித்தனர். அதில் வைஷ்ணவர்கள் தோல்வி அடைந்தால் ‘சிவனை அன்றி உயர்ந்தவர் வேறில்லை’ (சிவாத்பரேதரம் நாஸ்தி) என்று எழுதிக் கையெழுத்திட வேண்டும் என்று தீர்மானித்தனர்.

இந்த வாதில் கலந்து கொள்ள வைணவ ஆசாரியரான இராமானுஜர் வர வேண்டும் என்றும் அவர்கள் முடிவு செய்தனர்.

இதை அறிந்தார் நடாதூராழ்வார். உடனே இதை இராமானுஜருக்கு அறிவிக்க வேண்டுமென்று தீர்மானித்து கூரத்தாழ்வானிடம் இதைச் சொன்னார்.

கூரத்தாழ்வான், இராமானுஜரிடம் சென்று அவரிடம், “அரசன் போக்கும் சரியில்லை. ஆகவே நீங்கள் வருவது உசிதமல்ல. நான் போய் வருகிறேன்” என்று சொல்லி விட்டு வாதுக்கான சபைக்குச் செல்ல ஆயத்தமானார். உடையவர் என்று போற்றப்படும் இராமானுஜரின் திரிதண்ட காஷாயாதிகளைத் தானே தரித்துக் கொண்டார்; கிளம்பினார். கூடவே பெரிய நம்பி உள்ளிட்ட இராமானுஜரின் சீடர்களும் சென்றனர்.

இராமானுஜரோ முதலியாண்டான் உள்ளிட்ட சீடர்களுடன் வெள்ளை உடையணிந்து மேல் நாட்டுக்குக் கிளம்பினார். நடந்தவாறே சென்ற அந்தக் குழு கொல்லி மலையை அடைந்தது.

கொல்லி மலைத் தொடரில், அங்கு லத்திவாடி (செருக்கலை) என்ற ஒரு கிராமத்தில் சில வேட்டுவர்கள் குழுவினரை வரவேற்று உபசரித்தனர். இங்கு நீங்கள் தங்கி இருக்கலாம் என்று கூறிய அவர்கள் அருகில் இருந்த ஒரு வீட்டிற்கு அவர்களை அழைத்துச் சென்றனர்.

அந்த வீட்டில் இருந்த அம்மையார், அவர்களை வரவேற்று, முறைப்படி வணங்கி, “ உடையவரிடம் நான் சம்ஸ்காரம் பெற்றுள்ளேன். தளிகை (சமையல்) செய்கிறேன். அமுது செய்து அருளுங்கள்” என்றாள்.

குழுவினர் அந்த அம்மையாரிடம், “நீங்கள் எந்த இடத்தில் உடையவரைச் சேவித்தீர்கள்” என்று வியப்புடன் கேட்டனர்.

அதற்கு அந்த அம்மையார், “ இங்கு கொங்கு நாட்டில் பன்னிரெண்டு வருடம் பஞ்சம் ஏற்பட்டு வருந்திய காலத்தில் ஸ்ரீரங்கம் சென்று என் கணவருடன் வாழ்ந்து வந்தேன். அப்போது எம்பெருமானார் மாதுகர பிக்ஷைக்கு வருவதை மாடியிலிருந்து பார்த்தேன். உடனே கீழே வந்து பிக்ஷையிட்டு வணங்கினேன். சில காலம் கழித்து கொங்கு நாடு செழிப்புற்று விட்டது என்பதைக் கேள்விப் பட்டு உடையவரை அணுகி தாங்கள் அனுக்கிரகித்த மந்திரத்தை மறந்து விட்டேன், மீண்டும் உபதேசித்து அருள்க என்று வேண்டினேன். உடனே முறைப்படி சமாசிரணம் அருளப் பெற்றேன். நித்யப்படி பூஜைக்கு சுவாமிகளின் பாதுகை வேண்டுமென்று வேண்டினேன். அவரும் மகிழ்ச்சியுடன் அதைத் தந்தார். அதை இன்று வரை பூஜித்து வருகிறேன்” என்றார்

உடனே உடையவர், “அந்த மந்திரத்தைக் கொஞ்சம் சொல்” என்றார்.

சொல்லாவிடில் வைணவர்கள் தம் வீட்டில் புசிக்க மாட்டார்களே என்று எண்ணிய அந்த அமமையார் மெதுவாக அவர் காதில் உபதேச மந்திரத்தைக் கூறினார்.

வைணவர்கள், “உங்களுக்கு உபதேசித்தவர் இங்குள்ளவர்களில் இருக்கிறாரா பாருங்கள்” என்றனர்.

அனைவரையும் உற்றுப் பார்த்த அம்மையார் இராமானுஜரை நோக்கி, “தாங்கள் தான் என நினைக்கிறேன். ஆனால் அவர் திரிதண்டி காஷாயம் அணிந்திருந்தார். தாங்களோ வெள்ளை ஆடை அணிந்திருக்கிறீர்கள்” என்றார்.

அந்தப் பாதுகையை எடுத்து வாருங்கள் என்று இராமானுஜர் வேண்ட, அம்மையார் பாதுகையை ஏந்தி வந்தார்.

அதை அணிந்து பார்த்த இராமானுஜர் அது சரியாக இருப்பதைக் கண்டு தன்னுடைய பாதுகைகளே அவை என்பதைக் கண்டு கொண்டார்.

“இப்போது அனைவரும் அமுது அருந்த வாருங்கள்’ என்று அம்மையார் வேண்ட,இராமானுஜர், “ எனது பாதுகைக்கு நிவேதனமான அமுதை நான் உட்கொள்வது சரியல்ல” என்று உரைத்தார்.

ஏனையோரை அமுதுண்ணுமாறு பணித்த அவர் பாலுண்டு உறங்கினார்.

ஏனையோர் அமுதுண்டனர்.

பிறகு வீட்டுக் காரியங்களை முடித்த அம்மையார் தரையில் படுத்து உறங்க ஆயத்தமானார்.

அவரது கணவர், “ஏன் நீ தரையில் படுக்கிறாய்?” என்று வினவினார்.

“உடையவர் உள்ளிட்டோர் இங்கு எழுந்தருளியுள்ளார்கள். ஆனால் அவர மட்டும் உண்ணவில்லை.அதனால் வருத்தமுற்று இருக்கிறேன்”என்று பதில் சொன்னார் அம்மையார்.

“என்னால் ஏதேனும் ஆக வேண்டுமா?” என்று கேட்டார் கணவர்.

“சம்ஸ்காரம் செய்து கொண்டால் நாளை உணவு அருந்துவார்” என்றார் அம்மையார்.

மறுநாள் காலையில் சதிபதி இருவரும் முறைப்படி பஞ்ச சம்ஸ்காரம் செய்து கொண்டனர். பிறகு அனைவரும் அமுதுண்டனர்.

அங்கேயே சில நாட்களைக் கழித்தார் இராமானுஜர்.

பிறகு திரிதண்டம், காஷாயம் அணிந்து மேற்றிசை நோக்கிக் குழுவினருடன் இராமானுஜர் கிளம்பினார்.

இப்படி இராமானுஜரை உபசரித்த கொங்கு பிராட்டியாரைக் கொண்டது கொங்கு மண்டலமே எனப் பெருமையுடன் கூறுகிறது 68ஆம் பாடலில் கொங்கு  மண்டல சதகம்.

பாடல் இதோ:

“சிவனே பரம்பிறி தில்லையெ னாதாற் சிரந்துணிக்க

உவந்தனன் சோழ னெனமறு வேடமா யோடிவந்து

கவன்றிடி ராமா நுஜன்றனைத் தேற்றியுங் காத்தளித்த

மவனகைக் கொங்கு பிராட்டிய ருங்கொங்கு மண்டலமே”

பாடலின் பொருள் :-

‘சிவபெருமான பரம் (துரிய மூர்த்தி), வேறு இல்லை’ எனக் கையெழுத்துப் போடாவிடில் சோழன் கழுத்தை வெட்டி விடுவான் என்று மாறுவேடம் அணிந்து வெளியேறி வந்த இராமானுஜரது பயத்தைப் போக்கி ஊண், உடை முதலிய அனைத்தும் கொடுத்து ஆதரவு தந்த கொங்கு பிராட்டியாரைக் கொண்டதும் கொங்கு மண்டலமே.

இந்த வரலாறைக் குறிக்கும் வகையில் ஐந்து தனியன்கள் உள்ளன. அவற்றின் பொருள் மட்டும் இங்கு தரப்படுகிறது. (மூல ஸ்லோகங்கள் தரப்படவில்லை- க்ரந்த எழுத்துக்களில் இருப்பதால்.)

தனியன்கள்

     ஸ்ரீரங்கத்திற் பாஷியஞ் செய்தருளிய உடையவருடைய தளிர்போன்ற
இரண்டு திருவடிகளை அடைந்து, அவர் பிக்ஷை கொள்ளத்தக்க வீட்டில்
இருந்து, தான் பிறந்த (கொங்கு) தேசத்துக்குச் செல்ல இச்சித்து அவருடைய
பாதுகைகளைப் பெற்ற லக்ஷ்மியென்னும் பெயரை உடைய அம்மையாரைத்
துதிக்கிறேன் நமஸ்கரிக்கிறேன். நினைக்கிறேன்.

     உடையவருடைய திருவடிக் குறியான பாதுகைகளைப் பூசிப்பவரும்,
அடிக்கடி உத்தமமான மந்திரத்தை ஜபிப்பவரும், தமிழ் வேதங்களின்
தத்வஞானச் சுடருற்றவருமான கொங்கு பிராட்டியாரை நான் தஞ்சமென்று
அடைகிறேன்.

     உடையவருடைய திருவடிக்குறியான பாதுகைகளைப் பூஜிப்பவரும், அடிக்கடி உத்தமமான மந்திரத்தை ஜபிப்பவரும், தமிழ் வேதங்களின் தத்துவ ஞானச் சுடருற்றவருமான கொங்கு பிராட்டியாரை நான் தஞ்சமென்று அடைகிறேன்.

 உடையவருடைய திருவடி சம்பந்தமுற்ற மனத்தராய்ப், பல சீஷர்கள்
கேட்கும் தத்வங்களைத் தெரிவிக்க வல்லராய், லக்ஷ்மீ நரசிம்மமூர்த்தியின்
திருவடிக்கமலத்தில் வீழும் வண்டு போலும் நேர்மை மிகுந்தவராயுள்ள
கொங்குப் பிராட்டியாரை நான் தஞ்சமாக அடைகிறேன்.

பிரபந்நாம்ருதம்

கிரிமி கண்டன் காரணமாய், ஸ்ரீரங்கத்தை உடனே விட்டு,
மேற்றிசையில் மேன்மையான கொங்கு தேசத்தை அடைந்த உடையவர்,
வேட்டுவர்களின் உபசரணையை ஏற்றுக்கொண்டு தெய்வச் செயலால்
ஏழாவதுதினம் *சேலாஞ்சலாம்பா (கொங்கு பிராட்டியார்) இல்லத்தை
அடைந்தனர்.

     உடையவர் கொங்குப் பிராட்டியாரது பேராதரவால், அரங்கநாதன்
சேவை பெறாத துக்கமும் அகன்று, சிஷியர்களுடன் சௌக்கியமாகச் சிலநாள்
அவர் திருமனையிலேயே வசித்தனர். (இவர் பதி கொங்கிலண்ணன் -
கொங்கிலாச்சான் எழுபத்துநான்கு வைணவ சிங்காசனாதிபதிகளில் ஒருவர்)

*

* அடிக்குறிப்பு :  சேல அஞ்சல = முன்றானை அது தெலுங்கில் கொங்கு .

அம்பா = லக்ஷ்மீ = அது பிராட்டி

பிரபந்நாம்ருதம் இயற்றியவர் தெலுங்கர். ஆதலால் கொங்கு என்னும் பதத்துக்குச் சேலாஞ்சல எனக் கொண்டார்.

tags-
 உடையவர் ,கொங்குப் பிராட்டி, இராமானுஜர் 

*****