ஸ்ரீ சத்ய சாயி பாபா! – 3 (Post No.10,376)

WRITTEN BY S NAGARAJAN

Post No. 10,376

Date uploaded in London – –   25 NOVEMBER  2021         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

வாரந்தோறும் திங்கள் கிழமை இந்திய நேரம் மாலை 6.30க்கு ஒளிபரப்பாகும் ஞானமயம் நிகழ்ச்சியில் 22-11-2021 அன்று ச.நாகராஜன் ஆற்றிய உரை.

எந்த நேரமும் ஞானமயம் நிகழ்ச்சிகளை யூ டியூபிலும் facebook.com/gnanamayam என்ற இணைய வழித் தொடுப்பிலும் காணலாம். இந்த உரை மூன்று பகுதிகளாகத் தரப்படுகிறது.

ஸ்ரீ சத்ய சாயி பாபா! – 3

ச.நாகராஜன்

பகவான் பாபா அற்புதங்களை மட்டும் ஆற்றி பக்தர்களுக்கு அருள் பாலிக்கவில்லை; தனது 65ஆம் பிறந்த நாள் விழாவின் போது உலகிலேயே சிறந்த அறுவைச் சிகிச்சை வசதிகளுடன் கூடிய சூப்பர் ஸ்பெஷாலிடி ஹாஸ்பிடல் ஒன்றை நிறுவி இலவச சிகிச்சை அளிக்கத் தான் கொண்டிருக்கும் சங்கல்பத்தைக் கூறினார். 110 கோடி ரூபாய் செலவில் அமைக்கப்பட்ட இது 1991 நவம்பர் 2ஆம் தேதி திறந்து வைக்கப்பட்டது. புட்டபர்த்தி சிறு கிராமம் என்ற நிலையிலிருந்து மாறி சகல வித வசதிகளுடன் கூடிய விமான நிலையமும் அமைந்த ஒ நவீன நகராக மாறி விட்டது.

உலகெங்கும் சாயி பக்தர்கள் ஆங்காங்கே சேவா மையங்கள், சமிதி உள்ளிட்டவற்றை அமைக்கலாயினர். அமெரிக்கா, ரஷியா, ஹாங்காங், பிரிட்டன்,ஜப்பான் உள்ளிட்ட நூற்றுக்கும் மேற்பட்ட நாடுகளில் சாயி மையங்கள் எழுந்தன. தாய்லாந்தில் பாங்காக் நகரிலிருந்து 200 மைல் தொலைவில் உள்ள ஒரு சிறு கிராமத்திற்கு புட்டபர்த்தி என்று பெயரிடப்பட்டது. அவர்கள் எங்கள் தாய்லாந்து, இப்போது சாய்லாந்து ஆகி விட்டது என்று கூறி மகிழ்ந்தனர்.

சாயிபாபா யார் என்று விசாரித்து அறிய 1958ஆம் ஆண்டு ஒரு கமிஷன் பகவானிடம் வந்தது. அவர்கள் கேட்ட கேள்விகளுக்கெல்லாம் உடனுக்குடன் பாபா பதில் அளித்தார் இப்படி:-

“நீங்கள் பிறந்த தேதி?

“பிறக்கவே இல்லை

“வயது?

“யாராலும் வகுக்க முடியாது. அனாதி.

“பெற்றோர் பெயர்?

“பெற்றோரே இல்லை; ஸ்வயம்பு

“இருப்பிடம்?

“எல்லா இடத்திலும் இருப்பேன்.

சாயி பாபா ஆங்காங்கே ஏராளமான உரைகளைத் தன் வாழ் நாள் முழுவதும் தெலுங்கு மொழியில் ஆற்றி வந்தார். அந்த உரைகள் ஆங்கிலத்தில் மொழி பெயர்க்கப்பட்டு Sathya Sai Speaks என்று 42 தொகுதிகளாக வெளி வந்துள்ளன.

அவரது அணுக்கத் தொண்டராக அமைந்த கஸ்தூரி அவர்கள் பாபாவின் வரலாற்றை ‘சத்யம் சிவம் சுந்தரம் என்று நான்கு தொகுதிகளாக எழுதியுள்ளார்.

நாமஸ்மரணம் சக்தி வாய்ந்தது என்று போதித்த பாபா நகர சங்கீர்த்தன் என்று அதிகாலையில் ஆங்காங்கே ஒவ்வொரு ஊரிலும் பக்தர்கள் குழுவாக பஜனைப் பாடல்களைப் பாடி வலம் வந்து வாழும் இடத்தை ஆன்மீக சக்தி வாய்ந்த் இடமாக மாற்ற வழி வகுத்தார்.

கோவில்களில் உழவாரப் பணிகள், குக்கிராமங்களில் இலவச மருத்துவ முகாம்கள், ஏழைகளுக்கு மருத்துவமனையில் இலவச சிகிச்சை,  நாம லிகிதம், வேத பிரசாரம் உள்ளிட்ட ஏராளமான சேவைப் பணிகளை ஆற்ற வழி வகுத்துப் போதித்தார்.

சாயிபாபா போதனைகளின் அடிப்படையில் ஏராளமான இடங்களில் கல்லூரிகள் அமைக்கப்பட்டன; அவை அற்புதமாக இயங்கி வருகின்றன!

உலகெங்கும் உள்ள சாயி நிறுவனங்களின் குறைந்த பட்ச மதிப்பு 27000 கோடி ரூபாய் எனில் அவர் எப்படிப்பட்ட பிரம்மாண்டமான சேவா நிறுவனங்களைத் தான் தனித்து ஒருவராகவே எழுப்பியுள்ளார் என்பதை உணர்ந்து மகிழலாம்.

வாழும் வழி பற்றி அவரைப் போல போதித்தவர் யாருமே இல்லை எனலாம்.

சுறுசுறுப்பாயிரு; ஆனால் படபடப்பாய் இராதே!

பொறுமையாய் இரு! ஆனால் சோம்பேறியாக இராதே!

பற்றற்று இரு! ஆனால் காட்டுக்குப் போய் விடாதே!

இல்லறத்தை நடத்து. ஆனால் காம வெறியனாக இராதே!

வீரனாய் இரு. ஆனால் போக்கிரியாக இராதே!

அன்பாய் இரு: ஆனால் அடிமையாக இராதே!

கொடையாளியாக இரு; ஆனால் ஓட்டாண்டியாக் இராதே!

சிக்கனமாய் இரு; ஆனால் கருமியாக இராதே!

இரக்கங் காட்டு; ஆனால் ஏமாந்து போகாதே!

என்பது அவர் அருளுரை!

2006ஆம் ஆண்டு அவருக்கு இடுப்பில் ஒரு முறிவு ஏற்படவே அவர் தொடர்ந்து வீல் சேரில் அமர்ந்தபடியே தன் அருள் மழையை எங்கும் பொழிந்து வந்தார்.

இடையறாது 85 ஆண்டுகள் கோடிக்கணக்கான பக்தர்களுக்கு வழிகாட்டி அருள் பாலித்து வந்த பகவான் 2011ஆம் ஆண்டு மார்ச் மாதம் 28ஆம் தேதி மருத்துவ மனையில் அனுமதிக்கப்பட்டார். பல நிபுணர்கள் அவர் உடல் நலத்தை  இடையறாது கண்காணித்து வந்தனர். ஆனால் இறைவன் சங்கல்பப்படி 2011 ஏப்ரல் மாதம் 24ஆம் தேதி காலை 7.40 மணிக்கு பகவான் தனது அவதாரப் பணியை முடித்துக் கொண்டு விண்ணுலகு ஏகினார். அவரே கூறியபடி அவர் மூன்று அவதாரங்களை எடுக்க சங்கல்பம் கொண்டிருந்தார். முதலாவது அவதாரம் ஷீர்டியில் தோன்றி அருள் பாலித்தது. இரண்டாம் அவதாரம் புட்டபர்த்தியில் தோன்றி அருள் பாலித்தது. அடுத்த மூன்றாம் அவதாரமும் அவரது திருவுளப்படி எடுக்கப்படும்!

சத்ய சாயி பாபாவைப் பற்றி ஏராளமான மொழிகளில் ஆயிரக்கணக்கான புத்தகங்கள் வெளியாகியுள்ளன. பக்தர்களின் அதிசய அனுபவங்களுக்கு ஒரு எல்லையே இல்லை!

சேவை செய்; நாம ஸ்மரணம் செய் – இறைவனை அடையலாம் என்பதே அவர் வாழ்க்கையின் சுருக்கமான அருள் மொழி.

My Life is My Message என்றார் அவர்; அவரது வாழ்க்கையை உற்றுக் கவனிப்போம்; ஊன்றிப் படிப்போம். உணர்வோம். உயர்வோம்.

பகவான் ஸ்ரீ சத்ய சாயி பாபாவின் சரண கமலங்களுக்குப் பணிவான நமஸ்காரங்களைச் சமர்ப்பித்து எனது உரையை முடிக்கிறேன்.

நன்றி, வணக்கம்!      ***

tags- சத்ய சாயி பாபா! – 3