மஹரிஷி ததீசி! – 1 (Post No.10,633)

WRITTEN BY S NAGARAJAN
Post No. 10,633
Date uploaded in London – – 6 FEBRUARY 2022

Contact – swami_48@yahoo.com
Pictures are taken from various sources for spreading knowledge;
this is a non- commercial blog. Thanks for your great pictures.
tamilandvedas.com, swamiindology.blogspot.com

மஹரிஷி ததீசி! – 1
ச.நாகராஜன்

மஹரிஷி ததீசி மிகுந்த தவ வலிமை கொண்ட ஒருவர். அவரது கடுமையான பிரமசரிய விரதத்தால் தவ ஆற்றல் மிகுந்தது. இதனால் தேவேந்திரன் மிகுந்த பயத்துக்குள்ளானான். அவரது தவத்தைக் கலைக்க நானாவித பொருள்களை அவருக்குக் கொடுத்துப் பார்த்தான்.

ஆனால் அவரோ அதை ஒரு பொருட்டாகவே மதிக்கவில்லை. ஆகவே தேவேந்திரன் யோசனை செய்து, அப்ஸரஸ் ஸ்தீரிகளுள் மிகுந்த சௌந்தர்யம் கொண்ட பேரழகியான அலம்புஷை என்பவளை அவரிடம் அனுப்பினான்.
அந்தச் சமயத்தில் ததீசி முனிவர் சரஸ்வதி நதிக்கரையில் தேவர்களைத் திருப்தி செய்யும் பொருட்டு யாகங்களைச் செய்து கொண்டிருந்தார்.

அப்போது பேரழகியான அலம்புஷை அவர் முன் தோன்றினாள். சகல வித அங்கங்களும் லாவண்யமாக அமைந்திருக்க, அவளைப் பார்த்தவுடனேயே ததீசியின் சுக்லம் வெளிப்பட்டு சரஸ்வதி நதியில் விழுந்தது.

அதை சரஸ்வதி நதி மிகுந்த ஜாக்கிரதையுடன் தன் கர்ப்பத்தில் தாங்கிக் கொண்டாள்.

காலக்கிரமத்தில் அது ஒரு சிசுவானது. பிறந்த குழந்தையை சரஸ்வதி ததீசியிடம் கொண்டு சென்றாள்.

அப்போது ததீசி ரிஷிகள் கூட்டத்தின் மத்தியில் இருந்தார்.

அவரைப் பார்த்த சரஸ்வதி, “ ஓ! ரிஷிபுங்கவரே! அலம்புஷயைப் பார்த்த மாத்திரத்தில் உமது சுக்கிலம் வெளிப்பட்டது. அதை என் கர்ப்பத்தில் தாங்கினேன். இதோ குழந்தை பிறந்து விட்டது. இது உமது குழந்தை தான். வாங்கிக் கொள்ளும்” என்று கூறி குழந்தையை ததீசி முனிவரிம் கொடுத்தாள்.
மிகுந்த சந்தோஷத்துடன் குழந்தையை வாங்கி உச்சி முகர்ந்த ததீசி, சரஸ்வதிக்கு ஒரு வரத்தைக் கொடுத்தார்.

“விஸ்வதேவர்கள், ரிஷிகள். நானாவித கந்தர்வர்கள், அப்ஸரஸ்கள் ஆகிய அனைவரும் உன் ஜலத்தைக் கொண்டு செய்யும் அர்க்கியங்களினால் மிகுந்த திருப்தி அடையக் கடவர்” என்று ததீசி வரத்தைத் தந்தார்.

மேலும் அவர் கூறினார் : “ ஓ! புண்ணியவதியே! நீ ஆதிகாலத்தில் பிரமதேவருடைய தடாகத்திலிருந்து உற்பத்தி ஆனாய். கடும் தவம் புரியும் மஹரிஷிகள் அனைவரும் உன்னை அறிவர். இனிமையான அவயவங்களைக் கொண்ட நீ எனக்கு இந்தக் குழந்தையைக் கொடுத்து உதவி செய்திருக்கிறாய். இந்தக் குழந்தையின் பெயர் ஸரஸ்வத்.. அதனாலேயே இனி இவன் அழைக்கப்படுவான். புதிய உலகங்களை சிருஷ்டிக்கக் கூடிய ஆற்றலை உடைய இவன் இனி உன் பெயராலேயே அழைக்கப்படுவான். நீயும் புண்ய நதிகளுள் சிரேஷ்ட நதியாகக் கருதப்படுவாய்”.

சரஸ்வதி மிகுந்த மகிழ்ச்சியுடன் தன் குழந்தை ஸரஸ்வத்தைத் தன்னுடன் எடுத்துக் கொண்டு சென்றாள்.

பின்னர் ஒரு சமயம் தேவர்களுக்கும் அசுரர்களுக்கும் கோரமான யுத்தம் ஒன்று நடக்க ஆரம்பித்தது. அசுரர்களைக் கொல்லத் தக்க ஆயுதம் ஒன்றிற்காக தேவேந்திரன் மூன்று உலகங்களிலும் அலைந்து கொண்டிருந்தான். ஆனால் அப்படிப்பட்ட ஆயுதம் அவனுக்குக் கிடைக்கவில்லை.

பிறகு பிரம தேவரது யோசனையின் பேரில் அனைத்து தேவர்களையும் தேவேந்திரன் அழைத்தான்.

“ஓ! தேவர்களே! ததீசி முனிவரது முதுகெலும்பு கிடைத்தாலொழிய நாம் வெல்ல முடியாது. ஆகவே நீங்கள் அனைவரும் அவரிடம் சென்று பிரார்த்தனை செய்து அவரது முதுகெலும்பைக் கேளுங்கள்” என்று கூறினான்.

எல்லா தேவர்களும் ததீசி முனிவரிடம் சென்று அவர் முதுகெலும்பிற்காக பிரார்த்தனை செய்தனர்.

உடனடியாக எந்த வித மறுப்புமின்றி ததீசி தன் ஜீவனை தேகத்திலிருந்து விடுத்தார். அழியாத மஹிமை கொண்ட உயர் பதவியை அடைந்தார்.
இன்றளவும் அவரது தியாகம் உலகெங்கும் பேசப்பட்டு வருகிறது.
அவரது முதுகெலும்பைக் கொண்டு தேவேந்திரன் வஜ்ராயுதம், சக்கிரம், மற்றும் இதர கனமான ஆயுதங்களைச் செய்தான்.

பிரம்மாவின் புத்திரரான பிருகு மஹரிஷியிடத்தில் அவரது அரிய தபோ மஹிமையால் பிறந்தவர் ததீசி.

அவரது முதுகெலும்பிலிருந்து உருவாக்கப்பட்ட சக்தி வாய்ந்த வஜ்ராயுதத்தினால் மந்திரங்களைப் பிரயோகித்து அசுரர்களில் தொள்ளாயிரத்து தொண்ணூறு வீரர்களையும் த்வஷ்டாவின் குமாரனும் மகா தபஸ்வியுமான விஸ்வரூபனையும் மிகுந்த பராக்ரமசாலியான விருத்ராசுரனையும் தேவேந்திரன் கொன்றான்.

தக்ஷ பிரஜாபதி யாகம் ஒன்றைச் செய்ய ஆரம்பித்தபோது அதில் ருத்ரருக்கு அவிர்ப்பாகம் கொடுக்க ஆக்ஷேபணை தெரிவித்தார். அதை அறிந்த ததீசி மஹேஸ்வரரை அவமதிக்கக் கூடாது என்று எவ்வளவோ எடுத்துச் சொன்னார். ஆனால் அதை தக்ஷர் கேட்கவில்லை. ததீசி எச்சரித்த பிரகாரம் யாகம் மஹேஸ்வரரால் அழிக்கப்பட்டது. ததீசி மஹரிஷிக்கும் தக்ஷ பிரஜாபதிக்கும் இடையே நடந்த சம்வாதம் தக்ஷ மஹரிஷியின் சரித்திரத்தில் விரிவாக இடம் பெற்றிருக்கிறது.

                             ***                                     தொடரும்

tags--   மஹரிஷி ,ததீசி,