காசிக்குப் போயும் கருமம் தொலையவில்லை (Post No. 8537)

WRITTEN BY LONDON SWAMINATHAN

Post No. 8537

Date uploaded in London – 19 August 2020   

Contact – swami_48@yahoo.com

Pictures are taken from various sources for spreading knowledge; this is a non- commercial blog. Thanks for your great pictures.

tamilandvedas.com, swamiindology.blogspot.com

பெரும்பாலான தமிழ் மக்கள் இரண்டு பழமொழிகளை சர்வ சாதாரணமாகப் பயன்படுத்துவர்; என்ன செய்தாலும் கஷ்டம் நீங்கவில்லை என்பதைக் குறிக்க ,

‘காசிக்குப் போயும் கருமம் தொலையவில்லை’ ;

 ‘ராமேஸ்வரம்  போயும்  சனீஸ்வரன் விடவில்லை’ –

என்று முனகுவர். இவை  ஆழமான பொருள் உடைய பழமொழிகள்.

முதலில் ஒரு திருத்தம் ; சனீ’ஸ்வரன்’ என்று அவருக்கு ஈ’ஸ்வரன்’ பட்டம் கிடையாது ; சனை: +சரன் = மெதுவாக செல்பவன் என்று சம்ஸ்கிருதத்தில் சொல்லுவார்கள். சூரியனை பூமி சுற்றுவதற்கு 365 + கால் நாட்கள் ஆகும். ஆனால் சனிக் கிரகம் சூரியனைச் சுற்றி வருவதற்கு 30 ஆண்டுகள் ஆகும்.  ஜோதிட சாஸ்திரம் கணக்கில் எடுத்துக் கொள்ளும் கிரகங்களில் மிகவும் ‘மந்த கதி’ உடையது சனிக் கிரகம் . ஆதி காலத்திலேயே இந்துக்களுக்கு வானியல் (astronomy) அத்துபடி ; ஆகையால் இப்படிப் பெயரிட்டனர்.

விதிகளில் மூன்று வகையான விதிகள் உண்டு. அவற்றில் ஒன்றை எல்லோரும் அனுபவித்தே தீர வேண்டும்; அதை ‘பிராரப்த கர்மா’ என்பர். ஆனால் கடவுளைக் கும்பிடுவோருக்கு அதை அனுபவித்தாலும் அதன் கஷ்ட நஷ்டம் பெரிதாகத் தோன்றாது. பெரிய சன்யாசிகளுக்கு பெரிய நோய்கள் வந்ததை நாம் அறிவோம். வெளியிலிருந்து பார்க்கும் நமக்கு அவர்கள் கஷ்டப்படுவது போலத் தோன்றும்; அவர்களோ பிரம்மானந்தத்தில் திளைத்துக் கொண்டு இருப்பர்.

Long Q in Kasi/ Benares /varanasi

இப்போது பழமொழிகளுக்கு விளக்கம் காண்போம் –

கங்கை நதி புனிதமானதுதான்; அப்படியானால் அதில் வாழும் மீன்கள் எல்லாம் புனிதம் செய்தவையா ? அவை எல்லாம் சுவர்க்கத்துக்குப் போய் விடுமா? இல்லை என்கிறார் ராமகிருஷ்ண  பரம ஹம்சர்.

சிலர் என்னதான் செய்தாலும் அவர்களின் கர்ம வினைகள் விடுவதில்லை. யார் அந்த சிலர் ?

ஐந்து வகையான பாவங்களைச் செய்தவர்கள் தீர்த்த யாத்திரை செய்தும் பயனில்லை. எத்தனை புனிதக் கடல்களில், ஆறுகளில் குளித்தாலும் அவர்கள் பாவம் தொலைவதில்லையாம்.

****

“Here’s the smell of blood still.  All perfumes of Arabia will not sweeten this little hand.” 

  • Lady Macbeth in Shakespeare’s Macbeth
  •  

சேக்ஸ்பியர் எழுதிய புகழ்பெற்ற ‘மாக்பெத்’ (Macbeth) நாடகத்தில் ஒரு மேற்கோள் வருகிறது ; திருமதி மாக்பெத் , டங்கன் (Duncan) என்னும் மன்னனையும் பலரையும் கொன்ற பின்னர் அவள்  கையில் ரத்தக் கரை படிந்துள்ளது ; அவள்  உறக்கமின்றி  கையில் ஒரு மெழுகுவர்த்தியுடன் அலையும் பொது சொல்லும் வாசகம் –

“இன்னும் என் கைகளில் ரத்த நாற்றம் வீசுகிறது. அரேபியா நாட்டிலிருந்து வரும் அத்தனை வாசனைத் திரவத்தை ஊற்றினாலும் இது நல்ல மணமாக மாறாது” – என்று சொல்லி வருத்தப்படுகிறாள்.

இது போல கீழ்கண்ட ஐந்து வகையான பாவங்களைச் செய்தோர் கங்கை, காவிரியில் மூழ்கும்போது வருத்தப்பட்டு பாவ மன்னிப்பு கேட்டாலும், போகாதாம். யார் அந்த ஐவர்?

“1.வாழ்நாளில் பாவங்களை மட்டுமே செய்தவர்கள், 2.கடவுள் நம்பிக்கையற்றோர் , 3.சந்தேகப் பேர்வழிகள், 4.கடவுளை எதிர்த்துப் பேசும் நாஸ்தீக வாதிகள் , 5.எதையும் தவறான கண்ணோட்டத்தில் காண்போர்-  ஆகிய இந்த ஐந்து வகையினரும் எந்தத் தீர்த்தத்தில் போய் நீராடினாலும் பலனில்லை!” — வாயு புராணம் 77-127

இது வாயு புராணம் சொல்லும் விஷயம் .

புரியவில்லையா?

சில எடுத்துக்காட்டுகளைப் பார்ப்போம்.

முழுக்க முழுக்க பாவங்களை மட்டும் செய்துவிட்டு, கங்கையில் போய் குளித்தால் பாவம் போய்விடும் என்று நினைப்பது மூடத்தனம் ; பாடங்களையே படிக்காமல் பரீட்சை எழுதப் போகும் நாளன்று பிள்ளையார் கோவிலைச் சுற்றப் போனால், அவனுடைய நண்பர்களே, ‘சாகப்போகும் நேரத்தில் மட்டும் சங்கர சங்கரா என்று சொல்கிறாயே’ என்று கிண்டல் செய்வார்கள்.

அது சரி, மேலேயுள்ள ஐந்தில் நம்பிக்கையற்றோர், நாஸ்தீக வாதிகள் என்று இரண்டு வகை உள்ளதே ; இரண்டும் வேறு வேறா ? ஆமாம் வேறுதான்; கடவுள் இல்லை என்று பிரசாரம் செய்பவன் (Atheist) நாஸ்தீகன் ; அதிலும்கூட புத்தரைப் போல கடவுள் பற்றி ஒன்றுமே சொல்லாமல் ‘கமுக்க’மாக இருக்கும் பேர்வழிகளை ஆக்நேய வாதிகள் (Agnostic) என்பர். தன் மீதே எந்த நம்பிக்கையும் இல்லாதவர்கள் மற்றொரு வகை. ‘நான் உருப்படவே மாட்டேன்’ என்று நினைப்போர். அர்ஜுனன் இப்படி நினைத்தபோது, ‘சம்சய  ஆத்மா விநஸ்யதி’ – என்று பகவான் கிருஷ்ணர் கீதையில் எச்சரிக்கிறார். அதாவது ‘சந்தேகப் பேர்வழிகள் அழிந்தே போவார்கள்’.

கடைசி வகைக்கு வருவோம். எதையும் தவறாககே காண்போர். இது துரியோதனன் வகை. தர்மனையும் துர்யோதனனையும்  அனுப்பி, தம்பிகளா! ஊரை ஒரு சுற்று சுற்றிப் பார்த்துவிட்டு நல்லவர், கெட்டவர் லிஸ்ட் (List) டைக் கொடுங்கள் என்று கிருஷ்ணர் கேட்டார். “இந்த ஊரில் ஒரு பயல் கூட நல்லவன் இல்லை. I am sorry; no list is available ‘ஐ ஆம் ஸாரி ; நோ லிஸ்ட் ஐஸ் அவைலபிள்’  என்று சொல்லிவிட்டான் துரியோதனன்” (ஒரு ஆளும் நல்லவன் இல்லை. எல்லோரும் கெட்டவர் ; ஆகையால் பட்டியலுக்கு அவசியமில்லை ).

தர்மன் என்னும் யுதிஷ்டிரன் சொன்னான்; “கண்ணா, நான் எப்படி லிஸ்ட் (How can I give you a List?) கொடுக்க முடியும்? எல்லோரும் நல்லவர்கள். எதற்கப்பா List  லிஸ்ட்? யாரிடம் நல்ல குணம் இல்லை? உபநிஷத்துகள் சொல்லுவது போல ‘எல்லோரும் அம்ருதஸ்ய புத்ராஹா’  (அமிர்தம் உண்ட தெய்வீக மனிதர்கள்) என்று சொல்லிவிட்டான். நம் நண்பர்களினிடையேயும் அரசியலிலும் பார்க்கிறோம். எதைச் சொன்னாலும் ‘அதை எதிர்ப்பதே எம் தொழில்’ என்போர். இது போல தெய்வீக காரியங்களிலும் துசுக்கு சொல்லுவோர் உண்டு. அதை ஐந்தாவது வகை எனலாம்..

தீர்த்த யாத்திரை செய்யாமலேயே பலன் பெறும் ஒரு வகை பற்றியும் ஒரு செய்தி உள்ளது. காசி காண்டம் என்னும் சங்கிரசம்ஹிதை பகுதியில் ஒரு செய்யுள் சொல்கிறது —

நிக்ருஹீதேந்திரியக்ராமோ  யத்ரைவ  வஸதே  நரஹ

தஸ்ய தத்ர குருக்ஷேத்ரம் நைமிஷம் புஷ்கரம்  ததா

இதன் பொருள்–

“ஐம்புலன்களையும் அடக்கியவனுக்கு அவன் வீடுதான்  குருக்ஷேத்ரம், நைமிசாரண்யம் , புஷ்கரம் போன்ற புனித தீர்த்தங்கள் ஆகும்”.

சம்ஸ்கிருதத்தில் இன்னொரு வாசகமும் உண்டு:–

“ஸ ஸ்நாதோ யோ தமஸ்நாதஹ  ஸ்ரத்தா சுத்த மனோமலஹ” –  என்று.

இதன் பொருள் —

“யார் நன்றாகக் குளித்தவன் என்றால், புலனடக்கம் என்னும் தீர்த்தத்தில் குளித்து, மன அழுக்கை , நம்பிக்கையால் கழுவுபவனே நன்றாகக் குளித்தவன் ஆவான்”.

அதாவது புலன் அடக்கம் நதி; கடவுள் நம்பிக்கை நல்ல ‘சோப்பு’ (Soap).

மன அழுக்கு நம் உடலில் இருக்கும் அழுக்கு . அதைத் தேய்த்துக் கழுவுக ..

*******

பாரதியார் இன்னும் அழகாகச் சொல்லி விட்டார் –

“துணி வெளுக்க மண்ணுண்டு – எங்கள் முத்து

மாரியம்மா , எங்கள் முத்து மாரி .

தோல் வெளுக்கச்  சாம்பருண்டு -எங்கள் முத்து

மாரியம்மா , எங்கள் முத்து மாரி

மணி வெளுக்கச் சாணையுண்டு -எங்கள் முத்து

மாரியம்மா , எங்கள் முத்து மாரி

மனம் வெளுக்க வழியில்லை -எங்கள் முத்து

மாரியம்மா , எங்கள் முத்து மாரி “

என்று பாடிவிட்டு இதனால்தான் உன்னை அடைக்கலம் புகுந்தோம் என்று பாடி முடிக்கிறார் பாரதியார்.

******

அப்பரும் ‘கங்கை ஆடிலென்’…. என்ற தேவார பதிகத்தில் சொல்வார்–

கங்கை யாடிலென் காவிரி யாடிலென்

கொங்கு தண்குமரித்துறை யாடிலென்

ஓங்கு மாகடல் ஓத நீராடிலென்

எங்கும் ஈசனெனா தவர்க்கில்லையே

–ஐந்தாம் திருமு றை

அதாவது சிவனை மனதில் ஆழமாகப் பதித்து பக்தி செலுத்தாமல்,

மேம்போக்காகப் பலன் கிடைத்தால் கிடைக்கட்டும் என்று அரைகுறை மனதுடன் செல்வோருக்கு தீர்த்த யாத்திரை  பலன் தராது.

*******

பட்டினத்தாரும் வியந்து பாடுகிறார்

ஆரூரர் இங்கிருக்க

அவ்வூர்த் திருநாளென்

றூர்கள்தோறும்

உழலுவீர்; — நேரே

உளக்குறிப்பை நாடாத

ஊமர்காள்! நீவீர்

விளக்கிருக்கத் தீத்தேடுவீர்!.

Tags – கங்கை யாடிலென், காசிக்குப் போயும், ராமேஸ்வரம், சனீஸ்வரன், தீர்த்த யாத்திரை 

Xxx  SUBHAM XXX

பயணம் பற்றி வேதத்தில் சுவையான செய்திகள்! (Post No. 4946)

பயணம் பற்றி வேதத்தில் சுவையான செய்திகள்! (Post No4946)

 

RESEARCH ARTICLE WRITTEN by London Swaminathan 

 

Date: 24 April 2018

 

Time uploaded in London –  21-04  (British Summer Time)

 

Post No. 4946

 

Pictures shown here are taken from various sources such as Facebook friends, Books, Google and newspapers; thanks. Pictures may be subject to copyright laws.

 

 

 

WARNING: PLEASE SHARE MY ARTICLES; BUT DON’T SHARE IT WITHOUT AUTHOR’S NAME AND THE BLOG NAME. BE HONEST; OTHERS WILL BE HONEST WITH YOU.

 

 

உலகிலேயே மிகவும் பழைய பயணச் செய்திகள் இந்து மத நூல்களில்தான் உள்ளன. எனது ஆங்கில ஆய்வுக் கட்டுரையின் சுருக்கத்தை மட்டும் முன்வைக்கிறேன்.

 

ராமன் கால் நடையாக உத்தர பிரதேசத்தில் இருந்து இலங்கை வரை சென்றதை நாம் அறிவோம்.

ராமனுக்குப் பிறகு, மஹாபாரதப் போரில் நடு நிலை வகித்த பலராமன் பாரத யாத்திரை (தீர்த்த யாத்திரை) என்றதை உலக மஹா இதிஹாசம் மஹாபாரதம் இயம்பும்.

 

தமிழில் சிலப்பதிகாரத்தில் தீர்த்த யாத்திரை பற்றி மிகத் தெளிவான விஷயங்கள் இருக்கின்றன.

 

ஆதிசங்கரர், போக்கு வரத்து வசதி இல்லாத காலத்தில் அடர்ந்த காடுகளையும் உயர்ந்த மலைகளையும் தாண்டி இமயம் வரை சென்று ஐந்து இடங்களில் மடங்கள் நிறுவியதையும் படித்திருப்பீர்கள்.

ராமனுஜர், குருநானக் போன்ற மஹான்கள் பாரதம் முழுதும் பயணம் செய்து புனிதத் தலங்களை தரிசித்தனர். புத்தர் வட இந்தியா முழுதும் பிரசாரம் செய்தார். மாமன்னன் அசோகனோ கப்பல் மூலம் தன் மகனையும் மகளையும் இலங்கை முதலிய இடங்களுக்கு அனுப்பி தர்மப் பிரசாரம் செய்தான்.

அவ்வையார் சுந்தரமூர்த்தி சுவாமிகள் முதலியோர் கைலாஷ் வரை சென்றனர். இப்படி அடுக்கிக்கொண்டே போகலாம்.

ஆயினும் இவைகளுக்கு எல்லாம் முன்னர் தோன்றிய ஐதரேய பிராஹ்மணத்தில் உள்ள செய்தி மிகவும் சுவையானது.

ஹரிசந்திரன் கதையை எல்லோரும் அறிவர்; உண்மையே பேசி, மிகவும் இக்கட்டுள்ளாகி, இறுதியில் உலகப் புகழ்பெற்ற சூரியகுல மன்னன். இக்க்ஷ்வாகு சூரியகுல முதல் மன்னன். அவ்வரிசையில் 28ஆவது மன்னன் ஹரிச்சந்திரன். அவனுடைய மகன் ரோஹிதன்  காட்டுக்குள் ஆறு ஆண்டுகள் இருந்தான். அவன் ஒவ்வொரு முறை கிராமத்துக்குத் திரும்பி வந்த போதும் இந்திரன் பிராமணன் வடிவில் வந்து அவனைப் பயணம் செய்து கொண்டே இரு, அதனால் பல நன்மைகள் விளையும் என்கிறான்.

 

உலகின் மிகப்பழைய பிரயாணப் பொன்மொழிகள் இவைகள்தாம். இதோ அந்தப் பயணப் பொன்மொழிகள்:-

இந்து சந்யாசிகள் ஓரிடத்தில் ஓரிரவுக்கு மேல் தங்கக்கூடாது என்றும் விதி உள்ளது. ம ழைக்காலத்தில் மட்டும், ஒரே இடத்தில் தங்கி நான்கு மாத (சாதுர்மாஸ்ய வ்ரதம்) நோன்பு அனுஷ்டிக்க வேண்டும்

 

ரோஹித, காட்டிற்குச் சென்றான். ஓராண்டுக்குப் பின்னர் கிராமத்துக்குத் திரும்பி வந்தான்; அங்கு இந்திரன், பிராமணன் உருவத்தில் சென்றான். அவனிடம் சொன்னான்:” பயணம் செய்யாதவனுக்கு இன்பம் இல்லை, ரோஹித! இதை நாம் அறிவோம். நாம் மனித சமுதாயத்தில் வாழ்கையில், நல்லவனும் கூட கெட்டுப்போக வாய்ப்பு உண்டு. இதை மனிதர்களே இல்லாத இடங்களுக்குப் பயணம் செய்தால் தவிர்க்க முடியும்; பயணம் செய்வோரின் நண்பன் இந்திரன்; ஆகையால் அலைந்துகொண்டே இரு.

-ஐதரேய பிராஹ்மணம் 7-3-15

மீண்டும் ஓராண்டுக்குப் பின்னர் ரோஹித, கிராமத்து குத் திரும்பி வந்தான்; மீண்டும் இந்திரன் அவனிடம் சென்று சொன்னான்: “அலைந்து திரியும் ஒருவனுடைய கால்கள், மலருக்குச் சமமானவை. அவனுடைய ஆன்மா வளர்ந்து பழங்களை அனுபவிக்கும். மேலும் ஒருவன் பிரயாணம் செய்யும்போது ஏற்படும் துன்பங்களால் அவனது பாவங்கள் நஸித்துப் போகும்; ஆகையால் அலைந்து கொண்டே இரு.

 

ஒரு பிராமணன் இப்படிச் சொல்வதைக் கேட்டு அவனும் காட்டுக்குள் அலைந்தான்.

மீண்டும் ரோஹித, கிராமத்துக்கு வந்த போது, மாறு வேடத்தில் சென்ற இந்திரன் சொன்னான்:

யார் ஒருவன் உடகார்ந்து இருக்கிறானோ அவனது அதிர்ஷ்டமும் உட்கார்ந்து விடும்

அவன் எழுந்திருந்தால் அதிர்ஷ்டமும் எழுந்து நிற்கும்;

அவன் தூங்கினால் அதிர்ஷ்டமும் தூங்கிவிடும்;

அவன் நகர்ந்தால், அதுவும் நகரும்; ஆகவே அலைந்து திரி.

 

இதைத் தமிழில் உள்ள பழமொழிகளுடன் ஒப்பிடலாம்:

குந்தித் தின்றால் குன்றும் (அதிக அளவுள்ள செல்வமும்) கரையும்;

திரை கடலோடி திரவியம் தேடு.

 

உழைப்பவனுக்கு செல்வம் கிடைக்கும், தங்கும் என்பதே இதன் பொருள்

இப்படிச் சொன்னவுடன் ரோஹித காட்டுக்குச் சென்று விட்டு ஓராண்டுக்குப் பின்னர் திரும்பி வந்தான்.

 

கலி (யுகம்) கீழே இருக்கிறது; த்வாபர யுகம் மேலே சுற்றிக் கொண்டிருக்கிறது; த்ரேதா (யுகம்) எழுந்து நிற்கிறது, கிருத யுகம் நடந்து செல்கிறது; ஆகவே, ரோஹித நீயும் நட.

 

இதை இப்படியும் சொல்லலாம்: தூங்கும் மனிதன் கலியுகம் போன்றவன்;

விழித்துக் கொள்பவன் த்வாபர யுகம் போன்றவன்;

எழுந்து நிற்பவன் த்ரேதா யுகம் போன்றவன்;

பயணம் செய்பவன் கிருதயுகம் போன்றவன்.

 

இதைக் கேட்டு ரோஹிதன் மேலும் ஓராண்டு காட்டுக்குச் சென்றான்.

 

சூதாட்டத்திலும் காயுருட்டும் போது நான்கு என்பது கிருத யுகத்தைக் குறிக்கும்; இதுதான் மிகவும் அதிக மதிப்பு உடையது.

அவன் திரும்பி கிராமத்துக்கு வந்தபோது, மாறுவேடம் தரித்த இந்திரன் சொன்னான்.

யார் ஒருவன் பயணம் செய்கிறானோ அவனுக்கு தேனும், அத்திப் பழமும் கிடை க்கும். சூரியனின் அழகைப் பார். தினமும் அலைந்து திரிந்தும் அவன் பொலிவுதான் குறைந்ததா? ஆகையால் தொடர்ந்து நட.

 

மேலும் சில மேற்கோள்கள்

வெளிநாடு செல்லாமல், ஒருவனுக்குப் புகழ் கிட்டாது; அறிவோ சாதனைகளோ வராது – கதா கோசம்

 

நமக்கும் தாய், தந்தை,  சஹோதரன்,நண்பன் ஆகியோருக்கும் உள்ள தொடர்பு, பந்தம் எல்லாம் அன்ன சத்திரத்தில் சந்திக்கும் பயணிகளின் உறவைப் போன்றது தாந் மஹா பாரதம், சாந்தி பர்வம்.

 

 

பயணத்தின் முக்கியத்துவத்தை உலகிலேயே பழைய நூலான ரிக்வேதத்தின் துணை நூலான ஐதரேய பிராஹ்மணம் வலியுறுத்துவது போல வேறு எங்கும் காண முடியாது!

 

பிராமணர்களுக்கும் பெண்களுக்கும் தடை

 

பிராமணர்கள் கடல் கடந்து வெளி நாடு செல்லக்கூடாது என்று மநுஸ்ம்ருதி தடை போடுகிறது.

 

பெண்கள் வெளிநாடு செல்லக்கூடாது என்று தொல்காப்பியம் தடை போடுகிறது. (இவை இரண்டும் பற்றி முன்னரே விரிவான கட்டுரை த, ந்துள்ளேன்)

 

–சுபம்

தீர்த்த யாத்திரை அவசியமா? (Post No.3072)

b_id_406817_kawadiyan

Written by London swaminathan

Date: 19th August 2016

Time uploaded in London: 5-40 AM

Post No.3072

 

Pictures are taken from various sources; thanks for the pictures.

 

காசிக்கும் ராமேஸ்வரத்துக்கும் சென்று நீரில் மூழ்கினால் பெரும் பயன் கிட்டும்; பாவங்கள் தொலையும் என்பது நல்ல நம்பிக்கைதான். ஆனால் அதைவிட சுலபமான, செலவில்லாத, ஒரு எளிய தீர்த்த யாத்திரை பற்றிக் கூறுகிறது ஒரு அழகான சம்ஸ்கிருத ஸ்லோகம்:-

 

க்ஷமா தீர்த்தம் தபஸ்தீர்த்தம் தீர்த்தம் இந்த்ரிய நிக்ரஹ:

சர்வ பூத தயா தீர்த்தம் த்யானம் தீர்த்தம் அனுத்தமம்

 

பொறுமை என்ற தீர்த்தம்

 

தவம் என்ற தீர்த்தம்

 

புலனடக்கம் என்ற தீர்த்தம்

 

எல்லா உயிரிடத்திலும் அன்பு என்ற தீர்த்தம்

 

தியானம் என்ற தீர்த்தம்

 

சத்ய/ உண்மை தீர்த்தம்

 

ஏதானி பஞ்சதீர்த்தானி சத்யதீர்தம் ச சர்வதம்

தேஷு திஷ்டந்தி சர்வஸ்ய தேஷு ஸ்நானம் சமாசரேத்

ஐந்து தீர்த்தங்களோடு சத்ய தீர்த்தத்தையும் சேர்த்துக்கொள்ளுங்கள்; உடலிலேயே இருக்கும் அதில் எப்போதும் குளியுங்கள்

இவ்வைகளுக்கு மேலான தீர்த்தம் எதுவுமில்லை!

இதில் ஏதேனும் ஒன்று இருந்தால் கூட தீர்த்த யாத்திரைக்கும் மேலான பலன் கிடைத்துவிடும்!

 

   கழுதைக்கு கங்கா ஜலம்

 

இதை விளக்க ஏகநாத் வாழ்வில் நடந்த ஒரு சின்ன சம்பவத்தைக் கூறலாம்:

 

மஹாராஷ்டிர மாநிலமும் தமிழகத்தைப் போலவே ஏராளமான அடியார்கள் வாழ்ந்த பூமி; அங்கும் நாயன்மார்கள், ஆழ்வார்கள் போல பலர் வாழ்ந்தனர். அவர்கள் பல்வேறு தொழில்களைச் செய்தவர்கள்; சமூகத்தின் பல்வேறு பிரிவுகளைச் சேர்ந்தவர்கள்; எப்படி தமிழ்நாட்டில் நந்தனார், கண்ணப்பர் போன்றோர் போற்றப்பட்டனரோ அப்படி கீழ்மட்டத்தில் இருந்தோரும் புனிதராக வழிபடப்படும் பூமி மஹாராஷ்டிரம்.

 

நிவ்ருத்தி, ஞானதேவ், சோபான முக்தாபாய் ஏக கநாத், நாமதேவ் , துக்காராம், சமர்த்த ராமதாஸ் போன்றோர் தினசரி பஜனைகளில் பாடப்படும் பேறு பெற்றவர்கள்.

 

ஒரு முறை ஏகநாத், பல அடியார்கள் புடை சூழ காசிக்குச் சென்று புனித கங்கையில் நீராடி விட்டு இரண்டு பானைகளில் கங்கை ஜலத்தை எடுத்துக் கொண்டு நடந்தார். தோளில் ஒரு கம்பை வைத்துக் கொண்டு அதன் இரு புறங்களிலும் கங்கை ஜல குடங்களை தொங்க விட்டுக் கொண்டு ராமேஸ்வரம் வரை வருவர். அங்குள்ள சிவலிங்கத்துக்கு அந்த கங்கை நீரால் அபிஷேகம் செய்வர். அப்பொழுதுதான் யாத்திரை நிறைவு பெறும் என்பது ஐதீகம்.

 

ஏக நாதரும் கங்கை நீரைச் சுமந்து கொண்டு ராமேஸ்வரத்தை நோக்கி நடந்துவந்தார். அடியார்கள் கோஷ்டி பின்னால் நடந்து வந்தது. அப்பொழுது கடுமையான கோடை காலம்,வெய்யில் எல்லோரையும் வாட்டி வதைத்தது. மக்கள் ஆங்காங்கே நின்று தாக சாந்தி செய்து வந்தனர்.

donkey-1

ஒரு பொட்டல் காட்டில் ஒரு கழுதை வாடி வதங்கி சோர்ந்து நிற்பதை ஏகநாதர் கண்டார். அது தாகத்தினால் தவிப்பதை உணர்ந்தார். கண்ணுக்கெட்டிய தூரம் வரை தண்ணீர் என்பதே இல்லாத வறண்ட பூமி அது. உடனே இரண்டு பானைகளிலும் இருந்த கங்கை நீரை கழுதைக்கு வார்த்தார். அதைக் குடித்தவுடன் கழுதைக்கு உயிர் வந்ததது. அது ‘காழ் காழ்’ என்று கத்திக்கொண்டு துள்ளிக் குதித்து ஓடியது.

 

சிறிது நேரம் கழித்து,  அடியார்கள் கோஷ்டியும் அவ்விடம் வந்து சேர்ந்தது. ஏகநாதரின் காவடியின் இரு புறப் பானைகளும் காலியாக இருப்பதைக் கண்டு என்ன ஆயிற்று என்று வினவினர். அவர் கழுதைக்கு கங்கா ஜலம் கொடுத்து காப்பாற்றியதை பெருமிதத்துடன் பகர்ந்தார்.

அதைக்கேட்ட பல பக்தர்கள் பொங்கி எழுந்தனர். என்ன அபவாதம் செய்துவிட்டீர்! கங்கை நீரைக் கழுதைக்குக் கொடுத்து பாவத்தை கட்டிக்கொண்டீர்களே. இப்பொழுது ராமேஸ்வரம் சென்றால் எதை வைத்து அபிஷேகம் செய்யப்போகிறீர்? என்று கேள்விக்  கணைகளை த் தொடுத்தனர்.

 

ஏகநாதர் அமைதியாகச் சொன்னார்:

“என்னுடைய அன்பு சிவ பெருமானுக்குத் தெரியும்; அது போதும். அவர் என்னை மன்னித்து விடுவார்.”

 

ஆக உயிர்களிடத்தில் அன்பு காட்டுவது தீர்த்த யாத்திரைக்குச் சமம் என்பதை ஒரு பெரிய மகான் நமக்குக் கற்பித்துவிட்டார்.

 

அதனால்தான் இன்றும் அவர் புகழைப் பாடிக்கொண்டிருக்கிறோம்.

 

நீதி, உயர்ந்த மதி, கல்வி — அன்பு

நிறைய உடையவர்கள் மேலோர்

உயிர்களிடத்தில் அன்பு வேணும்; — தெய்வம்

உண்மை என்று தானறிதல் வேண்டும்.

–மஹா கவி பாரதி.

 

–subham–

 

 

 

‘மதுரை பார்க்காதவன் கழுதை’

meenakshi temple

By London Swaminathan Post No. 898 Dated 10th March 2014

(Please read my earlier post to know the mysteries of the Madurai temple
“The Wonder that is Madurai Meenakshi Temple” — posted in September in tamilandvedas.wordpress.com and in October 2011 in swamiindology.blogspot.com)

மதுரை பார்க்காதவன் கழுதை என்று மலையாளப் பகுதியில் ஒரு பழமொழி உண்டாம்! மதுரை நகரின் அழகையும் கோவிலின் அழகையும் கண்டவர்கள் கட்டாயம் ‘’ஆமாம் இது உண்மையே’’ — என்று ஒப்புக் கொள்வார்கள். மேலும் மதுரை என்பது கேரளத்தின் எந்தப் பகுதியில் இருந்து பயணம் செய்தாலும் வெகுதூரம் இல்லை.

விவேக சிந்தாமணி ஆசிரியரோவெனில் புனிதத் தலங்கள் எதற்கும் போகாதவர்களை கழுதை என்கிறார்!

பூதலத்தில் மானிடராய்ப் பிறப்பதரிது எனப்
புகல்வர்; பிறந்தோர் தாமும்
ஆதிமறை நூலின் முறை அருள் கீர்த்தி ஆம்
தலங்கள் அன்பாய்ச் சென்று
நீதி வழுவாத வகை வழக்குரைத்து
நல்லோரை நேசம் கொண்டு
காதவழி பேர் இல்லார், கழுதை எனப்
பாரில் உள்ளோர் கருதுவரே.

பொருள்: மானிடராய்ப் பிறப்பதரிது. பிறந்தாலும் சாத்திரப்படி தயவு, புகழுடன் வாழ்ந்து, தல யாத்திரை செய்யவேண்டும் நியாயம் தவறாமல் வழக்கு தீர்த்து, நல்லோருடன் பழகி ஒரு பத்து மைல் தூரத்துக்காவது புகழ் பரவ வேண்டும் அல்லது அவனைக் கழுதையின் மறு பிறப்பே என்று உலகம் கருதும்!

details2

ஆதி சங்கரர் என்ன சொல்கிறார்?

ஆதி சங்கரர் எழுதிய வினா – விடை துதியில் (பிரஸ்னோத்தர ரத்ன மாலிகா) ஒரு கேள்விக்கு அழகான பதில் தருகிறார்:
யார் முடமானவன்? என்ற கேள்விக்கு சங்கரர் தரும் பதில்
கடைசி காலத்தில் யாத்திரை செல்பவன் முடமானவன்.
அதாவது, இளமைக் காலம் முழுதும் மற்ற விஷயங்களில் செலவழித்து விட்டு சாகிற நேரத்தில் சங்கரா, சங்கரா என்பவர்களையே ஆதி சங்கரர் இப்படி முடமானவன் என்கிறார்.

திருமூலரும் யாத்திரை பற்றிப் பின்வருமாறு சொல்லுவார்:

நாடும் நகரமும் நல் திருக்கோயிலும்
தேடித் திரிந்து சிவபெருமான் என்று
பாடுமின் பாடிப் பணிமின் பணிந்தபின்
கூடிய நெஞ்சத்துக் கோயிலாக் கொள்வனே

பொருள்: நாடு நகரம் தோறும் உள்ள எல்லா கோவில்களுக்கும் சென்று சிவ பெருமானைப் பாடிப் போற்றி துதியுங்கள். இப்படிச் செய்தால் அவன் உங்கள் பக்தியை மெச்சி உள்ளக் கோவிலில் எழுந்தருளி உங்களுக்கு அருள் புரிந்து கொண்டே இருப்பான்.
details

இதையே தேவார மூவரும், மாணிக்க வாசகரும், ஆழ்வார்களும் செய்தனர். ஏறத் தாழ 300 ஊர்களில் உள்ள கோவில்கள் அவர்களால் புத்துயிர் பெற்றன. சுந்தரர், சேரமான் பெருமாள் நாயனார், அவ்வையார் ஆகியோர் கயிலாய யாத்திரை சென்றனர். கண்ணின் சகோதரன் பாரதப் போரில் ப்ங்கேற்காமல் யாத்திரை சென்றான். பாரதம் முழுதும் வலம் வந்தான். ஆதிசங்கரர் நாடு முழுதும் வலம் வந்து நான்கு மடங்களைத் தாபித்தார். சென்ற இடமெல்லாம் கோவில்களில் சக்கரங்களைப் பதித்து மந்திர உருவையும் ஆகர்ஷண சக்தியையும் உண்டாக்கினார்.

சிலப்பதிகாரத்தில் வடக்கில் இருந்து கன்யாகுமரிக்கு யாத்திரை வந்தோர் பற்றிய குறிப்புகள் உண்டு. மகாபாரதத்திலும் ராமாயணத்திலும் யாத்திரையின் பெருமை பேசப்படுகிறது.

tower close up

அப்பர் என்ன சொல்கிறார்?

ஆயினும் கங்கையில் நீராடினாலும் காவிரியில் நீராடினாலும் உண்மை பக்தி இல்லாவிடில் பயனில்லை என்கிறார் அப்பர்:

கங்கை ஆடிலென் காவிரி ஆடிலென்
கொங்கு தண் குமரித்துறை ஆடிலென்
ஓங்கு மாகடல் ஓதநீர் ஆடில் என்
எங்கும் ஈசன் என்னாதவர்க்கு இல்லையே (5-99-2)

கங்கை, காவிரி நதிகள், கன்யாகுமரிக் கடல் ஆகியவற்றில் நீராடும் போது மட்டுமில்லாமல், எப்போதும் இறைவன் பற்றிய சிந்தனை இல்லாவிடில் பயன் ஒன்றும் இல்லை. ராமகிருஷ்ண பரமஹம்சரும் இதையே வேறு ஒரு விதமாகக் கூறுவார். கங்கை நதியில் நீராடினால் பாவம் எல்லாம் போய்விடும் என்றால் அதில் வாழும் மீன்கள் எல்லாம் நமக்கும் முன்னால் சொர்க்கத்துக்குப் போய்விடும்என்று. இதன் பொருள் என்னவென்றால் பழைய பாவங்களுக்கு மனம் வருந்தி இனி எக்காலத்தும் பாவம் செய்ய உறுதி எடுக்க வேண்டும் என்பதாம். சுற்றுலாப் பயணங்களின் ஒரு பகுதியாக ரிஷிகேஷ், ஹரித்வார் செலுவோருக்கு ஏதோ கொஞ்சம் பயன் கிட்டும்.

சித்தர்கள் என்ன சொல்கிறார்கள்?
நட்ட கல்லைத் தெய்வம் என்று நாலு புட்பம் சாத்தியே
சுற்றி வந்து முணுமுணுத்துச் சொல்லும் மந்திரம் ஏதடா
நட்ட கல்லும் பேசுமோ நாதன் உள்ளிருக்கையில்
சுட்ட சட்டி சட்டுவம் கறிச்சுவை அறியுமோ
durga

என்று சிவவாக்கியர் இன்னும் அழகாகச் சொல்லுவார். பானைக்குள் சுவையான சர்க்கரைப் பொங்கல் இருக்கிறது. அதன் சுவை சுட்ட சட்டிக்கும், சட்டுவத்துக்கும் (கரண்டி) தெரியுமா? இது போல அர்த்தமின்றி சடங்குகளைச் செய்வோருக்கு என்ன பயன். உள்ளுக்குள்ளே உறையும் இறைவனை விட்டு ஊர் ஊராக யாத்திரை போய், கல்லின் மீது நாலு புஷ்பங்களை மட்டும் போட்டால் முக்தி கிடைத்து விடுமா?

நிற்க.

கொஞ்சம் சுய சரிதை!
25 ஆண்டுகளுக்கு முன் பி.பி.சி. தமிழோசையில் பணியாற்றியபோது எனது ‘’வினவுங்கள் விடை தருவோம்’’ நிகழ்ச்சிக்காக வாரம் தோறும் புத்தகம் வாங்க கடைகளுக்குப் போவேன். லண்டன் டாட்டன்ஹாம் ரோடு வழியே சென்றபோது ‘’100 உலக அதிசயங்கள்’’ என்ற ஆங்கிலப் புத்தகத்தைப் பார்த்தேன். நிறைய நேயர்கள் எனக்கு உலக அதிசயங்கள் பற்றி கேள்விகளை அனுப்பியதால் புத்தகத்தைப் புரட்டினேன். முதலில் தென்பட்டது மதுரை மீனாட்சி கோவில்தான்! ஒரே ஆச்சரியம்!! உடனே ‘’டில்’’லுக்குப் போய் பணத்தைக் கொடுத்துவிட்டு ரயில் (அண்டர்கிரவுண்ட்) பயணத்தின் போதே புத்தகத்தைப் படிக்கத் துவங்கினேன். அதை வெளியிட்டவர்கள் நம்மவர் இல்லை. பிரிட்டிஷ் ஆட்டோமொபைல் அஸோசியேஷன் வெளியிட்டது அது. மதுரையின் பெருமையை இன்று உலகமே அறியும். 25 ஆண்டுகளுக்கு முன் இந்த அளவுக்குத் தெரியாது. கூட்டம் மிகக் குறைவு.

1858 Madurai

Madurai in 1858

தினமும் மாலை வேளைகளில் மதுரை சித்திரை வீதியில் ஒரு ஆடிட்டர் வீட்டுத் திண்ணையில் நடக்கும் இலவச சம்ஸ்கிருத வகுப்புக்குச் செல்லும்போது நானும் என் சகோதரர்களும் மீனாட்சி கோவில் ஆடி வீதிகளில் ஓடிப் பிடித்து விளையாடுவோம். இப்பொழுது அங்குள்ள கூட்டத்தைப் பார்த்தால் கற்பனையும் செய்யமுடியாது. புதுக்கோட்டை ஸ்ரீ சாந்தானந்த சுவாமிகள் சஹஸ்ர சண்டி மஹா யக்ஞம் நடத்துவதற்காக நிதி சேர்க்க நாங்கள் ஆடி வீதியில் ஸ்ரீ அனந்தராம தீட்சிதரின் உபந்யாசம் ஏற்பாடு செய்திருந்தோம். அந்த 40 நாட்களிலும் ஆன்மீகப் புத்தகக் கடை வைத்து அதன் முலமும் நிதி உண்டாக்கிக் கொடுத்தோம் .அதுபோன்ற தருணங்களில் ஆடிவீதி 10,000 பேருடன் நிரம்பி வழியும். அல்லது சித்திரைத் திருவிழா நடக்கும் காலங்களில் மட்டும் கூட்டம் இருக்கும். இப்போதோ திருப்பதி பாலாஜி கோவிலுடன் போட்டியில் இறங்கிவிட்டாள் என் அன்னை மீனாட்சி!!

‘’மாடு கட்டிப் போரடித்தால் மாளாது செந்நெல் என்று
ஆனைகட்டிப் போரடிக்கும் அழகான தென் மதுரை’’ – வாழ்க !!
எம் அன்னை மீனாட்சி புகழ் ஓங்குக!!

Contact swami_48@yahoo.com