WRITTEN BY S NAGARAJAN

Post No. 9447

Date uploaded in London – –  –2 APRIL  2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

புத்த பிரானே! எனக்கு அந்த லட்டைக் கொடுங்கள்! : கர்ம சதகம்!   

ச.நாகராஜன்

‘கர்ம சதகம்’ என்பது புத்த மதத்தின் பிரதானமான கர்ம பலன் சம்பந்தமான நூல். இதில் 120 அவதானங்கள் உள்ளன. ஒவ்வொரு அவதானத்திற்கும் ஒரு குட்டிக் கதை உண்டு. அது அற்புதமாக கர்ம பலன்களைப் பற்றி விளக்கும்.

ஒரு குட்டிக் கதை இங்கே தரப்படுகிறது.

கதையின் பெயர் : ‘அதை எனக்குக் கொடுங்கள்!’

ஒரு அந்தணச் சிறுவன் புத்தரிடம் வந்தான். அப்போது ஒருவர் புத்தரின் திருவோட்டில் ஒரு லட்டை இட்டார். அதைப் பார்த்த அந்த அந்தணச் சிறுவன், “புத்த பிரானே! அந்த லட்டை எனக்குக் கொடுங்கள்” என்று கூவினான்.

கருணையே திரு உருவமான புத்த பிரான் அந்தச் சிறுவனுக்கு உடனடியாக லட்டைத் தருவதாகச் சொன்னார் – ஒரு நிபந்தனையின் பேரில்!

என்ன அந்த நிபந்தனை?

புத்தர் கூறினார் : “குழந்தாய்! ‘இந்த லட்டு எனக்கு வேண்டாம்’ என்று நீ சொன்னால் உனக்கு இந்த லட்டை நான் தந்து விடுகிறேன்.”

உடனே அந்தப் பையன், “புத்தரே, எனக்கு அந்த லட்டு வேண்டாம்” என்றான்.

தான் வாக்களித்தபடியே புத்தர் உடனடியாக அந்த லட்டை அந்தப் பையன் கையில் கொடுத்தார்.

பல சீடர்களும், பொது மக்களும் இந்தச் சம்பவத்தைப் பார்த்த வண்ணம் இருந்தனர். புத்தரின் அணுக்கத் தொண்டரான அனதபிந்ததரும் இதைப் பார்த்தார். அவருக்குத் தூக்கி வாரிப் போட்டது. அன்று புத்தருக்கு பிக்ஷையாகக் கிடைத்தது அந்த ஒரு லட்டு தான். அதையும் அந்தப் பையன் கேட்டு வாங்கிக் கொண்டான். புத்தர் அன்று பட்டினி அல்லவா கிடப்பார்!

அனத்பிந்ததர் அந்தப் பையனை நோக்கி, “ பையா! உனக்கு ஐநூறு பொன் நாணயங்களைத் தருகிறேன். அந்த லட்டை புத்தருக்குத் திருப்பித் தந்து விடு” என்றார்.

பையன் இணங்கினான். லட்டை புத்தரிடமே திருப்பித் தந்தான்.

அனைத்து சீடர்கள் மனதிலும் ஒரு கேள்வி ஓடியது. ஏன் புத்த பிரான் அந்தப் பையனிடம், “எனக்கு இந்த லட்டு வேண்டாம்” என்று சொல்லச் சொன்னார்?

ஒருவர் புத்தரிடமே இந்தக் கேள்வியைக் கேட்டு விட்டார்.

உடனடியாக புத்தர் பதில் அளித்தார். அதில் தான் கர்ம பலன் விளக்கம் கிடைத்தது.

“சீடர்களே! இதோ இந்த அந்தணச் சிறுவன் எனக்கு இன்னும் வேண்டும் இன்னும் வேண்டும் என்று பல்லாயிரம் ஜென்மங்களாகத் தன் தேவைக்கு  ஒரு அடிமையாக ஆகி விட்டான். ஆகவே தான் அவனிடம் ‘அந்த லட்டு எனக்கு வேண்டாம்’ என்று சொல்லச் சொன்னேன். அது அவனுக்கு அந்தப் பழக்கத்தை விட ஒரு வழி காட்டியாக அமையட்டும் என்றே அப்படிச் சொன்னேன். அவன் ஆசையை விடுத்து உயரிய நிலைக்கு உயர வேண்டும் அல்லவா, அதற்காக இதைச் செய்தேன்.”

பையனைப் பார்த்தவுடன் அவனது கர்ம சரித்திரத்தை பல்லாயிரம் ஜென்மங்கள் ஊடுருவி புத்தர் கண்டார். அந்தப் பையனுக்கு தன் கர்மம் பற்றி ஒன்றும் தெரியாது; அதிலிருந்து தப்பிக்க வழியும் தெரியாது.

“வேண்டும், இன்னும் வேண்டும்” – அது தான் அவனுக்குத் தெரியும்.

எல்லையற்ற கருணை கொண்ட புத்தர் இதைக் கருணையினால் செய்தார்;தண்டிப்பதற்காக அல்ல.

அவனது கர்மங்களின் சரித்திரத்தை நன்கு அறிந்த அவர் அதில் தலையிட்டு அவன் விடுதலை பெற ஒரு சந்தர்ப்பத்தை உருவாக்கித் தந்தார்.

நமது அன்றாட வாழ்க்கையில் தீய பழக்கம் ஒன்றிற்கு அடிமையான ஒருவன் தன் மீட்சிக்கான எண்ணத்தைத் திருப்பித் திருப்பி எண்ணியவாறே இருந்தால் அந்தப் பழக்கத்திலிருந்து விடுபட முடியும். புத்தரின் இந்தச் செய்கை, ஒரு கர்ம பலனின் எல்லையற்ற தீமையிலிருந்து விடுபட வழி காட்டுகிறது. வாயிலிருந்து வெளி வரும் ஒரு சின்ன வார்த்தை கூட வாழ்க்கையையே மாற்றி விட முடியும் என்பதை புத்தர் எடுத்துக் காட்டுகிறார், இதனால்!

இந்தச் சம்பவம் நமக்கு ஒரு பெரும் உத்வேகத்தைத் தருகிறது. ஒரு சின்ன நல்ல செயல் அல்லது எண்ணம் கூட நம்மை மாபெரும் தீங்கிலிருந்து விடுவிக்க வழி வகுக்கும் என்பதை இது காட்டுகிறது.

இப்படி 120 கதைகள் கர்ம சதகத்தில் உள்ளன. கர்ம  பலனைப் பற்றி அறிய விரும்பும் ஒருவர் கர்ம சதகத்தை அவசியம் படிக்க வேண்டும்!

***

tags-   கர்ம சதகம், லட்டு, புத்தர்

WRITTEN BY S NAGARAJAN                     

Post No. 8679

Date uploaded in London – – –14 SEPTEMBER 2020   

Contact – swami_48@yahoo.com

Pictures are taken from various sources for spreading knowledge; this is a non- commercial blog. Thanks for your great pictures.

புத்தர் வழியில் …..!

ச.நாகராஜன்

புத்த பிரான் தனது வாழ்நாள் காலத்தில் ஏராளமான இடங்களுக்குச் சென்று உபதேச நல்லுரை அருளினார்.

அவரது சீடர்கள் பல்லாயிரக்கணக்கில் பெருகினர். அவர் பரி நிர்வாண நிலையை அடைந்த பிறகு இந்த எண்ணிக்கை பல லட்சமாக மாறி பல கோடிகளாகப் பெருகியது.

புத்தரின் தலையாய சீடர்களாகக் கருதப்படுபவர் பத்துப் பேர்.

1)சரிபுத்ரா 2) மொகல்லனா 3) மஹா கஸ்யபர் 4) சபூதி 5) பூர்ண மைத்ராயணி புத்ரா 6) காத்யாயனர் 7) அனுராதா 8) உபாலி 9) ராகுலர் 10) ஆனந்தா (இந்த வரிசை மாற்றியமைக்கப்பட்டும் இருக்கிறது; சில சீடர்களின் பெயரும் மாற்றி உரைக்கப்படுவதும் உண்டு)

புத்தரின் உரைகளை அப்படியே நமக்கு நல்கியவர் ஆனந்தா.

அவரைப் பற்றி முதலில் பார்ப்போம்.

ஆனந்தா

புத்தரின் 10 முக்கிய சீடர்களுள் முதன்மையானவர் ஆனந்தா. புத்தரின் வாழ்நாள் காலத்தில் கடைசி 25 வருட காலம் அவருடனேயே இருந்தவர் அவர்; புத்தரின் தந்தை வழியில் அவருக்கு நெருங்கிய உறவினரும் கூட!

ஆனந்தருக்கு அபாரமான ஞாபக சக்தி உண்டு.

ஒரு முறை கேட்டதை அப்படியே கிரகித்து மனதில் ஏற்றி விடுவார். மறுபடியும் அதை எப்போது கேட்டாலும் அப்படியே சொல்வார்.

புத்தர் எப்போதெல்லாம் உபதேச நல்லுரைகளை அருளினாரோ அப்போதெல்லாம் ஆனந்தர் உடனிருந்தார். ஆகவே புத்தரின் உபதேசங்களை அப்படியே அவர் மனதில் ஏற்றி விட்டார்.

புத்தபிரானின் மறைவுக்குப் பின்னர் – பரிநிர்வாணத்திற்குப் பின்னர் –  அவரது 500 சீடர்கள் – பிக்குகள் அடங்கிய முதல் மஹாசபையில் ஆனந்தர் முக்கிய பங்கை வகித்தார்.

புத்தரின் உபதேச உரைகளைச் சொல்லுமாறு அனைவரும் அவரைக் கேட்க அப்படியே வார்த்தை மாறாமல் புத்தபிரானின் அருளுரைகளை அவர் கூறினார்.

அந்த உரைகள் உடனடியாக அனைவராலும் மனதில் கிரகிக்கப்பட்டன; நூல் வடிவில் உருவாயின!

பெண் பிட்சுணிகளை சங்கத்தில் சேர்க்குமாறு புத்தரை வற்புறுத்தி வேண்டிக் கொண்டவரும் ஆனந்தரே. அவரால் தான் பிக்ஷுணிகள் சங்கத்தில் சேர முடிந்தது.

போதி தர்மர் (காலம்: வருடம் 528)

போதிதர்மரின் வரலாறு பல அதிசய நிகழ்வுகள் அடங்கிய ஒன்று. பாரதத்திலிருந்து தனியாக சீனாவிற்குச் சென்றார் அவர். தியானம் எப்படிச் செய்வது என்பதை அவர் அங்கு கற்பித்தார். அவரது வழிமுறை பிரபலமானது. அதுவே சான் புத்தப் பிரிவிற்கு (Chan Buddism) வழி கோலியது. ஆகவே சான் பிரிவின் நிறுவனராக உலகினரால் அவர் கொண்டாடப்படுகிறார். அவர் எழுத்து வடிவில் சில அருளுரைகளை நல்கியுள்ளார். என்ற போதிலும் அவரது Two Entries and Four Practices என்ற விரிவுரையே சான் பிரிவின் முக்கிய நூலாக அமைந்து விட்டது.

த்யானம் என்ற சம்ஸ்கிருத வார்த்தையே சீன மொழியில் சன்னா என்று அழைக்கப்பட்டது. அது மருவி சான் ஆனது. மனதை வழிப்படுத்தி அதன் உண்மையான ஸ்வரூபத்தை – புத்தா மனத்தை – அறிய வழி வகுப்பதே சான் தியான முறையாகும்.

லிஞ்ஜி ஜுவான் (Linji Yixuan) (காலம் : வருடம் 866)

சான் பிரிவில் லிஞ்ஜி எனப்படும் முறையை நிறுவியவர் லிஞ்சி ஜுவான். இது ஜப்பானிய மொழியில் ரிஞ்ஜாய் (Rinzai) என அழைக்கப்படுகிறது. டாங் வமிசம் (Tang Dynasty) ஆண்ட போது தோன்றியது இது. இவர் சற்றுக் கடுமையான நடைமுறைகளைக் கையாண்டவர். தனது சீடர்களைத் தீவிரப் பயிற்சி செய்யுமாறு அவர் கூறுவார். உரத்த குரலில் கடுமையாகப் பேசுவார். சீடர்களை அடிப்பதும் உண்டு.

மாஜு டாவோய் ( Mazu Daoyi) (காலம் : 709-788)

சான் பிரிவில் பிரபலமான மாஸ்டர் மாஜு. புத்த நிலையை எப்படி அடைவது, அதற்கு மனதிற்கு என்ன பயிற்சிகள் தர வேண்டும் என்பதை அற்புதமாக இவர் சொல்லிக் கொடுப்பார். திடீரென்று க்ஷண நேரத்தில் ஞான நிலையை எய்தும் கடினமான வழிகளை இவர் உபதேசித்தார்.

இப்படி புத்த தர்மத்தில் நூற்றுக் கணக்கான தலைமை ஆசார்யர்கள் தோன்றி பிக்ஷுக்களை வழி நடத்தினர்.

tags- மாஜு டாவோய், போதி தர்மர், ஆனந்தா, புத்தர்

Written by LONDON SWAMINATHAN

Post No.7680

Date uploaded in London – 11 March 2020

Contact – swami_48@yahoo.com

Pictures are taken from various sources for spreading knowledge; this is a non- commercial blog. Thanks for your great pictures.

2600 ஆண்டுகளுக்கு முன்னர் மகத சாம்ராஜ்யத்தை ஆண்ட மாமன்னனின் பெயர் பிம்பிசாரன். அவனுடைய மனைவியின் பெயர் மஹாராணி க்ஷேமா . அவள் அழகின் இலக்கணம். தங்கத்தில் வார்த்தெடுத்த பொற்சிலை. உலகம் வியக்கும் அழகி. சதா சர்வ காலமும் தன்  அழகை தானே கண்டு வியப்பாள் . ‘மேக்  அப்’ (Make up) சாதனங்களுடன்தான் நடப்பாள் ; தூங்குவாள் . அத்தகைய குணத்தை எப்படி மாற்றுவது என்று பிம்பிசாரன் தவித்தான்.

புத்தர் பிரானின் வழி நடந்தவன் பிம்பிசாரன். மகத  சாம்ராஜ்யத்தின் தலை நகரான ராஜக்ருஹத்தில் இருந்த ‘வேலு வனம்’ என்ற மிகப்பெரிய தோட்டத்தை புத்த சங்கத்துக்கு தானமாக அளித்தவன் . அந்த மாபெரும் அரசாங்க தோட்டத்தில் புத்தர் வந்து தங்கி அருளுரை ஆற்றிக்கொண்டிருந்தார் .

பிம்பிசாரனுக்கு ஒரு ஆசை .

அன்பே! ஆருயிரே! தேனே, மானே, கற்கண்டே ! நாம் இருவரும் இன்று புத்தர் பிரானைச் சந்தித்து நமஸ்கரித்து வருவோம் என்றான். அவள் மாட்டேன் என்று தலையை அசைத்தாள். அதற்கென்ன, உனக்கு எப்போது சவுகரியமோ அப்போது தோழிகளுடன் சென்று அவர் பாத கமலங்களைப் பூஜித்து வா என்றான் கெஞ்சலாக , கொஞ்சலாக !

மாட்டவே மாட்டேன் ! புத்தனும் வேண்டாம், பித்தனும் வேண்டாம் என்றாள் மஹாராணி க்ஷேமா.

அவள் மனதில் நிழல் ஆடிய விஷயம் பிம்பிசாரனுக்குப் புரிந்தது. ஸதா ஸர்வ காலமும் ‘மேக் அப்’ (Toiletries)  சாதனங்களுடன் உலா வரும் தன்னை புத்தர் உதாசீனப்படுத்திவிடுவாரோ  என்று அவள் அஞ்சுவது அவனுக்குத் தெரிந்தது.

PLAN – B

ஆகையால் பிளான் ஏ – க்குப் பதிலாக பிளான் -பி (Plan B) யை  அமல் படுத்தினான் .

தோழிமார்களைக் கூப்பிட்டு வேலு வனத்தின் புகழ் பாடுங்கள் ;அதன் இயற்கை அழகை விதந்து ஓதுங்கள். அவளை எப்படியாவது வேலு வனம் போகத் தூண்டி விடுங்கள் என்றான். அத்தனை தோழி மார்களும் வேலுவனத்தின் புகழை கோரஸ் (Chorus)  பாடினார்கள் . மன்னனின் பிளான் -பி ( Plan B) பலித்தது.

“அத்தான் ! நான் வேலு வனம் போக ஆவன செய்யுங்கள்” என்றாள் மாமன்னனிடம் .

அதற்கென்ன , கண்ணே!  இதோ 4 வெள்ளைக் குதிரைகள் பூட்டிய  தங்க ரதம் நிற்கிறது. உனக்குத் துணையாக ரத ,கஜ ,துரக, பதாதி நாற்படைகளும் வரும் ; அமைச்சர் பெருமக்களும் உடன் வந்து உபசரிப்பர் என்றார் .

மந்திரிமார்களுக்கு ரஹஸ்ய உத்தரவும் பிறப்பித்தார் . இன்று மாலை சூரியன் அஸ்தமிப்பதற்குள்  இவளை புத்தர் சந்நிதிக்கு அழைத்துச் சென்று விடுங்கள் ; பின்னர் அரண்மனைக்கு வாருங்கள் என்று.

தங்க ரதத்தில் தங்கச் சிலை பவனி வந்தாள் ; நாள் முழுதும் வேலு வனக் குயில்களுடன் பாடினாள் ; மயில்களுடன் ஆடினாள் ; கிளி, மான் ஆகியவற்றைக் கொஞ்சி விளையாடினாள்.

மாலை சூரியன் மலை வாயில் விழத் துவங்கினான் ; அவளும் அரண்மனைக்குப் போக ஆயத்தமானாள் ; தோழிமார்கள் ,” தலைவி போகும்போது புத்தர் பிரானை வேடிக்கை பார்த்துக் கொண்டே போவோமே” என்றனர். அவளோ வேண்டாம் ரொம்ப (Very tired)  ‘டயர்டாக’ இருக்கு. டைரக்ட்டாக (direct) வண்டியை அரணமனைக்கு விட்டு என்றாள் .

புத்தர் உருவாக்கிய பேரழகி !

மாமன்னரின் கட்டளையை மனதிற்கொண்ட மந்திரிமார்கள் நேரடியாக தங்க ரத்தத்தை வேலு வனத்துக்கு விட்டு புத்தர் பார்வையில் நிறுத்தினர். அரண்மனை வந்துவிட்டது என்று எண்ணி ரதத்தில் இருந்து இறங்கிய உலக மஹா அழகி ஒரு அரிய காட்சியைக் கண்டாள். புத்தர் பிரானுக்கு ஒரு உலகப் பேரழகி விசிறி வீசிக்  கொண்டிருந்தாள் ; ரம்பா , மேனகா, ஊர்வசி , திலோத்தமா , ரதி ஆகியோரின் ஓவியங்களைக் கண்டிருந்த அவளுக்கு ஒரே (Big confusion) ‘கன்பியூஷன்’ ; ஓவியம் எல்லாம் சேர்ந்து ஒட்டுமொத்தமாக உயிர்பெற்று வந்து விட்டனவோ என்று நினைத்தாள் ; தன்னுடைய  பொன் வண்ண உடலையும் நோட்டமிட்டாள் . புத்தர் பிரான் அருகில் நிற்கும் பேரழகியின் பக்கத்தில் நிற்கக்கூட  தனக்கு அருகதை இல்லை என்பதை உணர்ந்தாள் ; இப்படி எண்ண ஓட்டம் மனதில் ஆற்றுவெள்ளம் (stream of thoughts)  போல பிரவாஹித்த தருணத்தில் மேடையில் மேலும் ஒரு அற்புதம் நடந்தது ; அந்த உலக மஹா அழகி வயதாகி ‘மாமி’ (aunty) போல ஆனாள் ; கண்ணைக் கசக்கிக் கொண்டு மீண்டும் பார்த்தாள்; அழகி ‘கிழவி’ ஆய் , ‘டமால்’ என்று கீழே விழுந்தாள் ; புத்தரின் உபன்யாசத்தை செவிமடுக்க வந்த கூட்டமோ இதைக் கொஞ்சமும் கவனியாது அவரது உபன்யாச ஆனந்தத்தில் நீச்சல் அடித்துக் கொண்டிருந்தது . புத்தர் பிரான் தம்மபதத்தின் 347ஆவது ஸ்லோகத்தை திருவாய் மலர்ந்தருளி விளக்கிக் கொண்டிருந்தார்

“சிலந்தி வலை பின்னி அதற்குள்ளேயே அகப்பட்டுக்கொண்டு வளைய வருவது போல ஆசைவலை  பின்னி அகப்பட்டுக் கொள்கிறான் மனிதன்; எவன் ஒருவன் அந்த வலையைக் கிழித்துக்கொண்டு வருகிறானோ அவனே ஜனன- மரணச் சூழலிருந்து விடுபட்டு உயர்நிலையை அடைகிறான்” என்று உபதேசித்தார் ; மஹாராணியும் புத்தரின் பாத கமலங்களில் விழுந்து வணங்கிவிட்டு அரண்மனைக்கு விரைந்து ஏகினாள் .

மன்னனும் எதிர்கொண்டழைத்து அன்பே! வேலு வனம் எப்படி இருந்தது ? “என்று வினவினார் ; அவளோ விடையிறுத்தாள் – புத்தரையும் கண்டேன் என்றாள் . “அட, அப்படியா ? நீ அதிர்ஷ்டசாலிதான்” என்றான் .

“உம்மைவிட நான் அதிர்ஷ்ட சாலி

கண்டேன் அவர் திருப்பாதம்!

கண்டறியாதன கண்டேன்!!”.

நீவிர் இதுவரை அறியாததையும் அறிந்தேன்;  எனக்கு இந்த அரண்மனை வாழ்வு வெறுத்துவிட்டது ; நன் புத்த பிக்ஷுணியாக விரும்புகிறேன் என்றாள் ; மன்னரும் நல்ல நாள் பார்த்து அவளைத் தங்கப் பல்லக்கில் வைத்து புத்த சங்கத்துக்கு அனுப்பினான்.

மஹாராணி க்ஷேமா வாழ்ந்த பிஹார் மண் அற்புத சக்தி வாய்ந்தது ; புத்தர் பிரான் உலாவும் முன்னரே ஜனக மாமன்னனையும் ஸீதா தேவியையும் கண்ட  பிரதேசம் அது. மைத்ரேயியும் கார்க்கி வாசக்கனவியும் அவர்களுக்கு ஆயிரம் ஆண்டுகளுக்கு முன்னரே சர்வதேச தத்துவ மகாநாட்டில் பங்கேற்று யாக்ஞ வாக்ய ரிஷியைக் கேள்வி கேட்ட நாடு அது. அப்பேற்பட்ட புனிதப் பெண்மணிகளுக்கு நிகராக க்ஷேமாவும் உயர்ந்ததால் வியப்பதற்கு ஒன்றுமிலை ; பிற் காலத்தில் புத்தமத சன்யாசினிகளின் புகழ் பாடிய தேரி கதாவில் க்ஷேமாவின் உபதேசமும் இடம் பெற்றுள்ளது. அவள் ச்ரவஸ்த்தி நகரில் முகாமிட்டிருந்த காலையில் குரு ஒருவரைக் காண தாகம் கொண்டு அலைந்த மன்னன் பிரசேனஜித் அவளிடம் வாதம் செய்து ஞானம் பெற்ற கதைகளும் உள .

புத்தம் சரணம் கச்சாமி

தம்மம் சரணம் கச்சாமி

சங்கம் சரணம் கச்சாமி

(தம்மம் என்பது ‘தர்ம’ என்ற சொல்லின் கொச்சை வடிவம். புத்த மதத்தினரின் வேதப் புஸ்தகம் தம்மபதம் எனப்படும் ; இதில் புத்தரின் உபதேசங்கள் உள )

–subham–