WRITTEN BY S NAGARAJAN                     

Post No. 8931

Date uploaded in London – – –15 NOVEMBER 2020   

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

ஹெல்த்கேர் நவம்பர் 2020 இதழில் வெளியாகியுள்ள கட்டுரை!

பதார்த்த குண சிந்தாமணி!

ச.நாகராஜன்

12 கோடி நூல்கள்!

பாரத தேசத்தில் இயற்றப்பட்ட நூல்களில் 12 கோடி நூல்கள் உலகின் பல்வேறு இடங்களில் உள்ளன என்றும் இவற்றில் பெரும்பாலானவை சுவடிக் கட்டே திறக்கப்படாமல் உள்ள நிலை நிலவுகிறது என்றும் அறிஞர் பெருமக்கள் கூறுகின்றனர். டாக்டர் வி.ராகவன் பெரு முயற்சி செய்து உலகின் பல இடங்களுக்கும் சென்று சம்ஸ்கிருத நூல்களின் பட்டியல் ஒன்றைத் தயார் செய்தார்.

தமிழ் நூல்களை எடுத்துக் கொண்டோமெனில் உ.வே.சாமிநாதையர் அரு முயற்சி செய்து தன் ஆயுள்காலத்தில் பல நூல்களை ஆராய்ந்து வெளியிட்டார்.

சரஸ்வதி மஹாலில் உள்ள சுவடிகளை ஆராய்ந்து பதிப்பிக்கும் பணி அங்கு நடைபெற்று வருகிறது. என்றாலும் இப்பணிக்கு உரிய நிதி உதவி போதுமானதாக இல்லை என்பதை உறுதியாகச் சொல்லலாம்.

பதார்த்த குண சிந்தாமணி

இந்த நூல்களில் வைத்திய நூல்கள் ஏராளம். அவற்றில் ஒன்று பதார்த்த குண சிந்தாமணி. பிரமிக்க வைக்கும் ஆய்வுத் தகவல்களைத் தருவதால் இது அற்புத சிந்தாமணி என்ற பெயரையும் பெறுகிறது.

1508 பாடல்களைக் கொண்டுள்ள இந்த நூலில் விளக்கப்படாத பதார்த்தமே இல்லை என்று சொல்லலாம்.

தேரையர் இயற்றிய நூல்

இதை இயற்றியவர் தேரையர் என்னும் மாபெரும் சித்தர். மன்னன் ஒருவனின் காது வழியே புகுந்த தேரை ஒன்று அவன் தலையை அடைந்து அவனைப் பாதித்தது என்றும் அதை இவர் எடுத்ததால் தேரையர் என்ற பெயரைப் பெற்றார் என்றும் வரலாறு கூறுகிறது.

மருத்துவன் யார்? இதோ இலக்கணம்!

ஒரு மருத்துவனுக்கான இலக்கணம் தெளிவாக வரையறுக்கப்படுகிறது இப்படி:-

தெய்வ உபாசனை பலநூல் எல்லை காண்டல்

   திரிகரணசுத்தி பன்னோய் தீர்த்தனாளு

நைவகன்ற தீரமதி நுட்பம் சான்றோர்

   நட்பொழுக்க மேன்மை குணம் அன்புள்ளானாய்

மெய்வசுதை விகலையணங் குறை பதார்த்த

   விதியுடற்காதாரமடலங்கி மாந்தல்

கைவருமெண் பேதம் எலாம் உணர்ந்துற்றானாய்க்

 காணிலந்த மருத்துவன்கைக் கரணி யுண்ணே

பொருள் ; பல நூல்களை தீர ஆராய்ந்து நுணுகிக் கற்றல், மனம் வாக்கு, காயம் ஆகிய திரிகரணத்தால் பல நோய்களைத் தீர்த்தல்,, தீரம், புத்தி கூர்மை, சான்றோர் நட்பு, மேன்மை, நற்குணம், அன்பு ஆகிய நல்ல குணங்களை உடையோனாக உடல், நாடு, காலம், நோய், மருந்து, பொருள்களின் பண்பு, உடல் ஆதாரம், மடலம், உடல் பலம், பணிவு, எண் வகை பேதங்கள் இவற்றை உணர்ந்தவனே மருத்துவன் எனலாம்.

ஓஷதிகள் நான்கு

இந்த பூமியில் ஓஷதி என்பது நான்கு வகைப்படும். அவையாவன மரம், செடி, கொடி, புல் ஆகியன. இவற்றை விரிவாக எடுத்துரைக்கிறது இந்த அற்புத சிந்தாமணி.

நவரத்தினங்கள் தீர்க்கும் வியாதிகள்

நவரத்தினங்களை எடுத்துக் கொண்டால் மாணிக்கம் சுரம் சன்னி தோஷங்கள், திரிதோஷம் தாக நோய், வாதப் பிரமேகம், கண் நோய் ஆகியவற்றைப் போக்கி உடலுக்கு நல்ல் அழகைத் தரும்.

வைரங்களில் ஆறுவகை உண்டு. இவை கண் நோய்களைப் போக்கி உடலுக்கு அழகு தரும்.

வைடூரியம் சிலேஷ்ம வாதம், சிலேஷ்மம், புளியேப்பம், காது சூலை, குஷ்டம், பித்தம் ஆகியவற்றைப் போக்கும்.

கோமேதகம் வாத பித்தம், மலக்கட்டு, மந்தாக்கினி, சுரத்தால் ஏற்பட்ட கெட்ட குணம் ஆகியவற்றைப் போக்கும்; உடல் அழகைத் தரும்.

புஷ்பராகம் சுக்கில விருத்தி, நல்ல அறிவு ஆகியவற்றைத் தரும். மேகம் முதலான நோய்களையும் போக்கும்.

பவளம் சுரம், ஜன்னி, இருமல், ருசியின்மை, சுக்கில நஷ்டம், அதிக தாகம், நாவறட்சி ஆகியவற்றைப் போக்கும்.

முத்து அத்திசுரம், சோபை, ருசியின்மை, பல

மின்மை, கண் நோய், பித்து, விஷம், சீதளம், கபம், தாது நஷ்டம் ஆகியவற்றைப் போக்கும்.

மரகதம் விந்துவைத் தரும். பதினெட்டு வகை பூத கப காசங்கள், விரணம், பல் வகை விஷங்கள், மது மேகம் ஆகியவற்றை நீக்கும்.

நீலம் குதி கால் வலி, மேக நீர், பித்தம், பாண்டு, அயர்ச்சி ஆகியவற்றைப் போக்கும்; நல்லறிவைத் தரும் சுக்கிலப் பெருக்கத்தை உண்டாக்கும்.

நீருக்கு உள்ள நோய் தீர்க்கும் சக்தி

நீர் என்று எடுத்துக் கொண்டால் ஆற்று நீர், கிணற்று நீர், அருவி நீர், ஓடை நீர் என்று சொன்னது போய் கார்பரேஷன் குழாய் நீர், கேன் நீர் ஆகிய இரண்டு மட்டுமே இன்றைய வாழ்க்கையில் காணப்படுபவை என்று சொல்லும் நிலை உருவாகி விட்டது.

ஆனால் பதார்த்த குண சிந்தாமணியோ காவிரி நீர், வைகை நீர், தாமிரபரணி நீர், கங்கை நீர், யமுனை நீர் என்று வரிசையாகப் பட்டியலிட்டு ஒவ்வொரு நீர் குணத்தை விவரித்து அது போக்கும் வியாதிகளையும் பட்டியலிடுகிறது.

மரம் என்று எடுத்துக் கொண்டால் ஒவ்வொரு மரத்தையும் அலசி ஆராய்ந்து அந்த மரத்தின் மருத்துவ குணத்தை விரிவாக அழகாக விளக்குகிறது.

மாதர் தம் முலைப் பால் மகிமையை விளக்குவதோடு பற்பல வகை மாதரின் முலைப் பால் பண்பையும் விவரிக்கிறது.

பசுவின் மூத்திரம் தரும் நற்பயனில் ஆரம்பித்து ஒரு பெரிய பட்டியலையே காணும் போது வியப்படைகிறோம்.

சமையல் வகையில் உள்ள ஒவ்வொரு பதார்த்தத்தையும் எடுத்து அதன் மருத்துவப் பண்புகளை அக்கு வேறு ஆணி வேறாக அலசும் இது போல் ஒரு நூல் இன்னொன்று இல்லை என்று கூறும் அளவு நுட்பமான விஷயங்கள் பதார்த்த குண சிந்தாமணியில் உள்ளன.

65 தலைப்புகளில் அரிய விஷயங்கள்

பாயிரம், பஞ்ச பூதம், திணை, நீர், பால், மோர், நெய், மதுரம், பாகு, வெல்லம், மது, தேன், மரம், செடி, கொடி, புல், மரத்தின் சமூலம், செடியின் சமூலம் கொடியின் சமூலம், மரத்தின் கிழங்கு,செடியின் கிழங்கு, கொடியின் கிழங்கு, புல்லின் கிழங்கு, மரத்தின் வேர், மர இலை, கொடியின் இலை, கீரை வகை, மரத்தின் மலர், கொடியின் பூ, மரத்தின் பிஞ்சு, மரத்தின் காய், செடியின் காய், கொடியின் காய், மரத்தின் பழம், செடியின் பழம், மரத்தின் வித்து, செடியின் வித்து, கொடியின் வித்து, தானியம், புன்செய் தானியம்,   

இறைச்சி, பறவை இறைச்சி, மீன் கறி, கடைச்சரக்கு, பாசாணம், உலோகம், நவரத்தினம், மருத்துவன், பத்தியம், தினக் கிரமாலங்காரம், எண்ணெய் முழுக்கு, துணி வகை, புசிப்பு, உண்கலம், சோறு, கஞ்சி, சித்திரான்னம், பலகாரம், பரிமளப்பூச்சு, தாம்பூலம், வாகனம், விசிறி, புணர்ச்சி, பதார்த்த ஜீரண கால அளவை, நோயணுகா விதி என இப்படி 65 தலைப்புகளில் பிரமிக்க வைக்கும் அரிய தகவல்களைத் தருகிறது இந்த நூல்.

சித்தர் அருளிய அருமையான ஆய்வு நூல்

ஒரு பிரம்மாண்டமான பல்கலைக் கழகம் பல கோடிகள் செலவழித்து பல நூறு பெயரைப் பணியில் அமர்த்தினாலும் இப்படிப்பட்ட நுணுக்கமான விஷயங்களைத் திரட்ட முடியுமா என்பது சந்தேகமே.

மருத்துவத்தில் ஆர்வமுள்ளவர்களோ, சாமான்யரோ, எவரானாலும் சரி இந்த நூல் அனைவருக்குமே ஒரு அரிய வரபிரசாதம். அல்லோபதி வைத்தியரோ, ஹோமியோபதி வைத்தியரோ, சித்த வைத்தியரோ யாராக இருந்தாலும் சரி, அவர்கள் அனைவருக்கும் பயன்படும் நூல் பெரும் சித்தரான தேரையர் அருளிய அற்புத சிந்தாமணி.

படிப்போம்! பதார்த்த குணம் அறிவோம்!! பயன் பெறுவோம்!!!

***

முக்கியக் குறிப்பு : இணைய தளத்தில் இந்த நூலை இலவசமாக டவுன் லோட் செய்து கொள்ளலாம்.

tags– பதார்த்த குண சிந்தாமணி, தேரையர்,

–subham–

WRITTEN BY S NAGARAJAN                     

Post No. 8928

Date uploaded in London – – –14 NOVEMBER 2020   

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

உடல் ஒரு மரம்? அருணகிரிநாதரின் வர்ணனை! உடலே கோயில் – அப்பரின் சிந்தனை!!

S NAGARAJAN

1

அருணகிரி நாதர் அருளியுள்ள ஒரு அற்புதமான பாடல் ‘எழுபிறவி நீர் நிலத்தில்’ எனத் தொடங்கும் பாடல்.

இதில் அவர் உடலை ஒரு மாமரமாக வர்ணிக்கிறார்.

ஏழு பிறவிகள் என்னும் நீர் கொண்டது நிலம். இந்த நிலத்தில் நல்வினை மற்றும் தீவினை ஆகியன வேர்களாகும். அவற்றில் ஊன்றிக் கொண்டு துன்பம் என்னும் முளைகள் முளைத்து வளர்கின்றன. மாயை எனப்படும் பொய்த்தோற்ற உணர்ச்சிகள் கிளைகளாக செழிப்புற்று வளர்கின்றன. அவற்றில் காமம் என்னும் தளிர்கள் துளிர்கின்றன. அஞ்ஞானம் என்னும் இலைகள் மிகப் பெரிதாக வளர்கின்றன. கேடு என்னும் பூ மொட்டுகள் விட்டு அரும்புகின்றன. விளைவு. மரணமே பழமாகப் பழுத்து வருகிறது. கடைசியில் முறிந்து அழிகின்ற மாமரமாக உடல் இலங்குகிறது. அந்த மரத்தின் அருமையான நிழல் அதன் பண்பை இழந்து அழிகிறது.

ஆக இப்படிப்பட்ட நிழல் தரும் உடல் என்னும் குடை அழிந்து போகும் முன்னரேயே எனக்கு உபதேசத்தைத் தந்து அருள்வாயாக.

தவறான (வழுவு) நெறி பேசிய தக்ஷன் அமைத்த யாகசாலைக்குச் சென்று சந்திரன் சூரியன் இந்திரன் உள்ளிட்ட தேவர்களையும் திருமாலின் நாபியில் உதித்த பிரமன், சக்ரம் ஏந்திய திருமால் ஆகியோரது வலிமை மறைந்து ஒடுங்க அவர்களை எதிர்த்து அடக்கிய உக்ரமான சிவபிரானின் புதல்வனே, அழகிய கலாபமயில் மீது ஏறி எட்டு மலைகளையும் வென்று வலம் வந்த வேலனே!

வலிமை கொண்ட அசுரர் தம் சேனை அழிபட்டு முறியும்படியாக அவர்களை மோதி வெட்டி அழித்து தேவர்களை சிறையிலிருந்து மீட்ட பெருமாளே!

பாடல் இது தான்:-

எழுபிறவி நீர்நிலத்தி லிருவினைகள் வேர்பிடித்து

     இடர்முளைக ளேமுளைத்து …… வளர்மாயை

எனுமுலவை யேபணைத்து விரககுழை யேகுழைத்து

     இருளிலைக ளேதழைத்து …… மிகநீளும்

இழவுநனை யேபிடித்து மரணபழ மேபழுத்து

     இடியுமுடல் மாமரத்தி …… னருநீழல்

இசையில்விழ ஆதபத்தி யழியுமுன மேயெனக்கு

     இனியதொரு போதகத்தை …… யருள்வாயே

வழுவுநெறி பேசுதக்க னிசையுமக சாலையுற்ற

     மதியிரவி தேவர்வஜ்ர …… படையாளி

மலர்கமல யோனிசக்ர வளைமருவு பாணிவிக்ர

     மறையஎதிர் வீரவுக்ரர் …… புதல்வோனே

அழகியக லாபகற்றை விகடமயி லேறியெட்டு

     அசலமிசை வாகையிட்டு …… வரும்வேலா

அடலசுரர் சேனைகெட்டு முறியமிக மோதிவெட்டி

     அமரர்சிறை மீளவிட்ட …… பெருமாளே.

*

2

அருணகிரிநாதர் உடலை மரமாக வர்ணித்தார் எனில் அப்பர் பிரான் உடலை வேறு விதமாகச் சொல்கிறார்.

உடலை ஒரு வீடாகக் கொள்கிறார் அப்பர் பிரான். அந்த வீட்டில் உள்ளம் என்பது ஒரு அகல் விளக்கு – தகளி!

அந்த தகளியில் தீபம் ஏற்ற நெய் வேண்டுமே! அது தான் நமது இறை உணர்வு.

நெய் விளக்கிற்கு திரி நமது உயிரே தான். இப்படி உயிர் என்னும் திரியுடன்  உணர்வு என்னும் நெய் ஊற்றி உள்ளம் என்னும் அகல் விளக்கை ஏற்றினால் திருக்கடம்பூர் தாதையின் கழல் அடியைக் காணலாம்.

திருக்கடம்பூர் கடலூர் மாவட்டத்தில் உள்ள கரக்கோயில் ஆகும். கரக்கோயில் என்பது தேர் போன்ற வடிவை உடையதாக இருக்கும்.

பாடலைப் பார்ப்போம்:-

உடம்பு எனும் மனை அகத்து உள்ளமே தகளி ஆக

மடம் படும் உணர் நெய் அட்டி உயிர் எனும் திரி மயக்கி

இடம் படு ஞானத் தீயால் எரி கொள இருந்து நோக்கில்

கடம்பு அமர் காளை தாதை கழல் அடி காணலாமே!

அவரே உடலைக் கோயிலாகச் சித்தரிக்கும் பாடலும் ஒன்று உண்டு.

காயமே கோயில் ஆகக் கடி மனம் அடிமையாக

வாய்மையே தூய்மையாக மன மணி இலிங்கமாக

நேயமே நெய்யும் பாலா நிறைய நீர் அமைய  ஆட்டிப்

பூசனை ஈசனார்க்குப் போற்றவிக் காட்டினோமே – நான்காம் திருமுறை

உடம்பே கோயில்

நல்ல மனமே அடிமை.

வாய்மையே தூய்மை (சுத்தம்)

மனதினுள் மணி என ஜொலிக்கும் ஆன்மாவே இலிங்கம்

அன்பே நெய்யும் பாலும்,

இப்படி அன்பை வைத்து பக்தியுடன் பூஜை செய்து இறைவனைப் போற்றினோம்.

இப்படி உடலை இன்னும் பல்வேறு விதமாக உருவகப்படுத்தியுள்ளனர் அருளாளர்கள்.

அனைத்துமே அருமையானவை; அரிய உண்மைகளைப் புலப்படுத்துபவை!

tags-  உடல் ஒரு மரம்,  அருணகிரிநாத, வர்ணனை, 

***

WRITTEN BY LONDON SWAMINATHAN

Post No. 8925

Date uploaded in London – –13 NOVEMBER 2020   

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

வேதத்தில் அற்புதமான வானியல் செய்திகள் உள்ளன. ஒரு வருஷத்தை 12 மாதங்களாகப் பிரித்து மாதத்தை இரண்டு பட்சங்களாகப் பிரித்து,  அதை 30 நாட்களாக்கி , ஒரு நாளை 60 நாழிகை ஆக்கி சாதனை செய்தது வேறு எந்த கலாசாரத்திலும் இல்லை . ஆண்டையும் தக்ஷிணாயணம், உத்தராயணம் என்று பிரித்ததும் வேறு எங்கும் காணக்கிடக்கில. அதுமட்டுமல்ல ; ஒரு வருஷத்தை மேலை நாட்டினர் நான்காகப் பிரித்தகாலையில் நாம் மட்டும் வேத காலத்திலேயே ஆறு பருவங்களாகப் பிரித்த அற்புதமும் வேறு எங்கும் இல .  இதில் மிகப்பெரிய அதிசயம் என்னவன்றால் வேதங்களுக்கு சில ஆயிரம் ஆண்டுகளுக்குப் பின்னர் எழுந்த தமிழ் இலக்கியமும் அப்படியே ‘ஆறு பருவம்’, ‘நாற்படை’ என்று பேசுவதாகும் . நாம் உண்டாக்கிய நாற்படை  இன்று உலகெங்கும் செஸ் என்ற பெயரில் கோடி கட்டிப் பறப்பதைக் காண்கிறோம் . பிரம்மாண்டமான எண்கள் யஜுர்வேதத்தில் இருப்பதும் அதை அப்படியே தமிழர்களும் சங்கம், சமுத்திரம், பதுமம் என்ற சம்ஸ்கிருதத் சொற்களோடு பயன்படுத்துவதும் வியப்பிலும் வியப்பு.

பாணினிக்கு பதஞ்சலி  எழுதிய பேர் உரை — மஹா பாஷ்யத்தைப் – படிக்கையில் இப்படியும் ஒருவர் உரை எழுத முடியுமா என்று வியந்து குன்றின் மேல் நின்று கூச்சல் போடத் தோன்றுகிறது! ஆந்தை வடிவ வியூகம், ஆந்தை வடிவ கட்டிடம் பற்றி பாணினி க்கு காத்யாயனர் எழுதிய விளக்கக் குறிப்புகளை படிக்கையில் “அம்மாடியோவ், அப்படியோவ்” என்று கத்தும்படி தோன்றும். மின்னல் வர்ணத்தை வைத்து பருவக்குறிப்புகளைத் தரும் பதஞ்சலியை என்னவென்று வியப்பது. இளம்பூரணரும் பேராசிரியரும் பதஞ்சலியைக் கரைத்துக் குடித்ததால் அதெ பாணியில் உரை எழுதியது மகா அதிசயம். பதஞ்சலி வாழ்ந்ததோ அவர்களுக்கெல்லாம் ஆயிரம் ஆண்டுகளுக்கு முன்னர்.

இப்படி சூப்பர்லேட்டிவ் (SUPERLATIVES- LARGEST, OLDEST, BEST, MOST ANCIENT) உரிச் சொற்களைப் போட்டு எழுதியவுடன்

“சரிதாம்ப்பா , உன் வாயை மூடு , இனி வரப்போகும் , கண்டுபிடிப்புகளை சொல்லு. இன்டர்நெட் பற்றி இந்துக்கள் கதைத்தார்களா? அல்லது கம்ப்யுட்டர் ,மொபைல் போன், பேஸ்புக் , கூகிள் மேப் , ஜூம் ZOOM , கிரெடிட் கார்டு , ஈ மெயில் , E MAIL இணையம் பற்றி ஏதேனும் செப்பினர்களா? என்ற கேள்விகளுக்கு ஏற்கனவே பதில் எழுதிவிட்டேன். இனி வரப்போகும் கண்டுபிடிப்புகளையும் மகா பாரத மருத்துவ அற்புதங்களையும் எழுதி இருக்கிறேன் .

இப்போது ‘சப்ஜெக்ட்’டுக்கு வருவோம்

அமா + வாஸ்யை என்றால் என்ன?

ஒரு மாதத்தை இரண்டு பிரிவுகளாகப் பிரித்த இந்துக்கள் சூரிய, சந்திரன் இயக்கத்தை நன்கு அறிந்ததால் கிரஹணம் ஏற்படுவதைக் கூட முன் கூட்டி அறிந்தனர். இதை அறிந்த கிருஷ்ண பரமாத்மா சூரிய கிரஹணத்தைப் பயன்படுத்தி ஜெயத்ரத்தனை  வீழ்த்திகியதை நாம் அறிவோம் ; எனது பழைய கட்டுரையில் காண்க

ஒவ்வொரு பவுர்ணமி நாளன்றும் சந்திரன் ஒரு குறிப்பிட்ட நட்சத்திரத்துக்கு அருகில் வருகையில் அதை  மாதத்தின் பெயர் ஆக்கி அதை மிகப்பெரிய திருவிழா ஆக்கியதையும் காஞ்சிப் பெரியவரின் அற்புதமான உரையில் காண்க. அத்தனையும் பரிபாடல், சிலப்பதிகார காலம் முதல் தமிழர்கள் அப்படியே பின்பற்றியதையும் காண்க.

நிலவு 15 நாள் வளரும் – அது சுக்கில/ வெள்ளை பக்ஷம்

நிலவு 15 நாள் தேயும் ; அது கிருஷ்ண/ கருப்பு  பக்ஷம்

தமிழர்கள் மஹா கெட்டிக்காரர்கள் சுக்ல/ கிருஷ்ண என்ற ‘கலர்’களைத் தூக்கி எறி ந்துவிட்டு  வளர் பிறை , தேய்  பிறை என்று அழகாகப் பெயர் சூட்டினர். . தமிழர்கள் எவ்வளவு பெரிய விஞ்ஞானிகள் என்பதை வாய்மை உண்மை, மெய்மை (Mano, Vaak, Kaaya) என்று சொன்னதிலும் ஒளி/ஒலி (Light and Sound) என்று சொல் உண்டாக்கியத்திலும் புலிக்குப் பிறந்தது (Cat and Tiger belong to same family) பூனையாகுமா? என்ற பழமொழியில் இருப்பதையும் நெல்லும் புல்லும் ஒரே பேமிலி (Paddy, Grass belong to same family) என்று சொன்னதிலும், அண்டத்தில் உள்ளது பிண்டத்திலும் (Macrocosm is in Microcosm)  உளது , உள்ளது போகாது, இல்லது வாராது (Energy can neither be created nor destroyed)  என்று சொன்னதிலும்,  இருப்பதை ஏற்கனவே காட்டிவிட்டேன்

நிலவைக் காணாத நாளுக்கு ‘அமா வாசை’ என்று நாமகரணம் செய்தனர் இந்துக்கள் .

அமா வாஸ்ய என்றால் ‘சேர்ந்து வசிப்பது’ என்று பொருள்.

வசிப்பது என்ற சம்ஸ்கிருதச் சொல்லை தமிழர்கள் இன்றும் பயன்படுத்தி வருகிறோம்

சூரியனும் சந்திரனும் சேர்ந்து வசிக்கும் நாள் அமா வாசை;  அமா என்றால் ‘சேர்ந்து’ என்று பொருள்.

வெள்ளைக்காரர்களுக்குப் பெயர் கிடைக்காததால் அதை நியூ மூன் new moon  என்று பெயர் சூட்டினர் . அங்கு நியூ new எதுவும் இல்லை. அரேபியர்களோ மூன் moon – நிலவு பற்றி கணக்குத் தெரியாததால் ரம்ஜான் நாள் எது என்று கூட அறிவிக்க முடியாமல் வா னத்தைப் பார்த்துக் கொண்டிருப்பர். நாமோ கிரஹண ம் ஏற்படும் நிமிடத்தை, வினாடியை கூட பல நுற்றாண்டுகளுக்கு முன்னரே பஞ்சாங்கத்தில் எழுதி வருகிறோம்.

சூரியனுக்கு மிக அருகில் சந்திரன் இருப்பதை “சேர்ந்து= அமா”என்று சொல்கிறோம். அதாவது சந்திரனும் சூரியனும் ஒரே நேர் கோட்டில் வருகின்றன சந்திரனின் நிழல் பூமியில் பட்டால்  அதன் பெயர் சூரிய கிரஹணம் . அதாவது நிழல் விழும் பகுதியில் வாழும் மக்கள் சூரியனைப்  பார்க்க இயலாது.

சந்திர கிரஹணம் பவுர்ணமி  அன்றுதான் நிகழும் ;

சூரிய  கிரஹணம் அமாவாசை   அன்றுதான் நிகழும்; .

ஒரு அமாவாசை முதல் மறு அமாவாசை வரை  ஒரு மா தம் என்று கணக்கிடும் வழக்கம் தெலுங்கர், கன்னடியர் இடையே உண்டு .

வாழ்க ஜோதிடம், வளர்க வானியல்

tags- அமாவாசை, அம்மாவாசை

Xxx  subham xxxx