WRITTEN BY LONDON SWAMINATHAN

Post No. 9543

Date uploaded in London – –28 APRIL  2021     

Contact – swami_48@yahoo.com

Pictures are taken from various sources for spreading knowledge.

this is a non- commercial blog. Thanks for your great pictures.

tamilandvedas.com, swamiindology.blogspot.com

if u want the article in word format, please write to us.

ப்லவ வருஷம் சித்திரை/வைகாசி  மாதம்

31 நீதி வெண்பா மேற்கோள்கள் /பொன்மொழிகள்

பண்டிகை/ விடுமுறை தினங்கள் – மே 1- மே தினம் , 14- அட்சய திருதியை, பரசுராம ஜெயந்தி, ரம்ஜான் , 17-சங்கர ஜெயந்தி,

25-வைகாசி விசாகம், 26-புத்த பூர்ணிமா, காஞ்சி மஹா பெரியவா ஜெயந்தி, சந்திர கிரஹணம்  (அக்கினி நட்சத்திரம் ஆரம்பம்- மே 4, முடிவு-28)

XXXX

ஏகாதசி மே 7, 22/23; அமாவாசை மே 11; பெளர்ணமி 26;

முஹுர்த்த தினங்கள் – 9,14,17, 23,24,28

XxxX

xxx

மே 1 சனிக்கிழமை

மந்திரங்கள் ஐந்தெழுத்துக்கு ஓப்பாகா–

ஆமந்திரம் எவையும் ஐந்தெழுத்தை ஒவ்வாவே

சோமசுந்த ரற்கு என்றே சொல்.

xxx

மே 2 ஞாயிற்று க்கிழமை

பெரியோரைச் சேரின் துன்பம் நீங்கும்; சத் சங்க மஹிமை-‘பெரியோ ரிடம்சேரில் அக்கணமே போமென்று அறி’

xxx

மே 3 திங்கட் கிழமை

நீற்றின் பெருமை-  சீராம் வெண்ணீற்றுத் திரிபுண்டரம் விடுத்தே

பேரான முத்தி பெறவிரும்பல்

xxx

மே 4 செவ்வாய் க்கிழமை

அடியார்கள் தியானத்தில் ஆண்டவர்களை எதிர்பார்ப்பர்–

கந்தமிகும் பூவலரப் பார்க்கும் பொறிவண்டு அரனன்பர்

தேவரவைப் பார்ப்பர் தௌிந்து.

xxx

மே 5 புதன் கிழமை

கற்றவர்க்கு நிகரில்லை–‘கல்லார் பலர்கூடிக் காதலித்து வாழினும்நூல்

வல்லான் ஒருவனையே மானுவரோ’

xxx

மே 6 வியாழ க்கிழமை

சேர்ந்த இடத்தின் பயன்- ‘சந்தனத்தைச் சேர்தருவும் தக்கமணம் கமழும்’

xxx

மே 7 வெள்ளி க்கிழமை

இனிய சொல்லே இன்பம் பயக்கும்–

அன்பறிவு சாந்தம் அருளுடையார் நல்வசனம்

இன்பமிகும் சீதள மாமே

xxx

xxx

மே 8 சனிக்கிழமை

. தீயோர் சொல் மிகவும் வருத்தம்- வெய்யகதிர்

எல்லோன் கிரணத் தெரியினிலும் எண்ணமிலார்

சொல்லே மிகவும் சுடும்.

xxx

மே 9 ஞாயிற்று க்கிழமை

தானம் மூவகை–

தானறிந்தோருக் குதவி தன்னால் அமையும்எனில்

தானுவந்து ஈதல் தலையாமே – ஆனதனால்

சொன்னால் புரிதலிடை சொல்லியும் பன்னாள்மறுத்துப்

பின்னாள் புரிவதுவே பின்.

xxx

மே 10 திங்கட் கிழமை

உயர்ந்தோர் கைம்மாறு கருதார்–

எல்லோர் தமக்கும் இனிதுதவல் அன்றியே

நல்லோர் தமக்குதவி நாடாரே

xxx

மே 11 செவ்வாய் க்கிழமை

நல்லோரை அறிய வாக்கு– வாக்குநயத் தாலன்றி கற்றவரை மற்றவரை

ஆக்கைநயத் தால்அறியல் ஆகாதே

xxx

மே 12 புதன் கிழமை

தீயோர் நண்ணிய நல்லோர்க்கும் தீமையே–

நல்லொழுக்கம் இல்லார் இடம்சேர்ந்த நல்லோர்க்கும்

நல்லொழுக்க மில்லாச்சொல் நண்ணுமே

xxx

மே 13 வியாழ க்கிழமை

உண்மையை சிலரே விரும்புவர்–

சத்தி யம் எக்காலும் சனவிருத்த மாகுமே

எத்தயபொய் யார்க்கும் இதமாகும்

xxx

மே 14 வெள்ளி க்கிழமை

துயருண்டு இல்லத்தில்– மாசுபுரி

மாயா மனைவியராம் மாக்கள் மகவென்னும்

நாயால் கடிப்பித்தல் நாடு.

xxx  

மே 15 சனிக்கிழமை

விருப்பு பல்வகைத்தது–

கல்லார் பகைசேர் கலகம் விரும்புவர்

நல்லார் விரும்புவர் நட்பு.

xxx

மே 16 ஞாயிற்று க்கிழமை

. நீத்தார் நுகர்ப்பொருள் நண்ணலாகாது– கற்றருளை

வேட்ட பெரியோர்  பெருமையெலாம் வேறொன்றைக்

கேட்ட பொழுதே கெடும்.

xxx

மே 17 திங்கட் கிழமை

தீயொழுக்கம் தீமையே நல்கும்–

சீலம் குலம்அடியாள் தீண்டின்கெடும் கணிகை

ஆலிங்கனம் தனநா சமாகும்

xxx

மே 18 செவ்வாய் க்கிழமை

மணமகன் இவனாவான்-

பெண்ணுதவுங் காலைப் பிதாவிரும்பும் வித்தையே

எண்ணில் தனம்விரும்பும் ஈன்றதாய் – நண்ணிடையில்

கூரியநல் சுற்றமும் குலம் விரும்பும் காந்தனது

பேரழுகு தான்விரும்பும் கண்.

xxx

மே 19 புதன் கிழமை

. அடிய வர்பொருள் கவர்தலாகாது–

அந்தோ புரமெரித்த அண்ணலடி யார்பொருள்கள்

செந்தீயினும் கொடிய தீக்கண்டாய்

xxx

மே 20 வியாழ க்கிழமை

தீயோர் கேண்மை தீயவே பயக்கும்–

நிந்தையிலாத் துயர் வரும் நிந்தையரைச் சேரிலவர்

நிந்தையது தம்மிடத்தே நிற்குமே

xxx

மே 21 வெள்ளி க்கிழமை

தீயவர் நற்சொல் ஏற்கார்–

கன்மமே பூரித்த காயத்தோர் தம்செவியில்

தன்மநூல் புக்காலும் தங்காதே

xxx

மே 22 சனிக்கிழமை

நல்லோர் நண்ணம்பற்கு உயிருமளிப்பர்– நூலின் நெறி

உற்றோர் இடுக்கண் உயிர்கொடுத்தும் மாற்றுவரே

மற்றோர் புகல மதித்து

xxx

மே 23 ஞாயிற்று க்கிழமை

இவர்களுக்கு இவையில்லை–

ஆசைக்கில்லையாம் மானம்.

xxx

மே 24 திங்கட் கிழமை

தீயவருக்கு இடம்கொடுக்கக் கூடாது–

நன்றறியாத் தீயோர்க் கிடமளித்த நல்லோர்க்கும்

துன்று கிளைக்கும் துயர்சேரும்

xxx

மே 25 செவ்வாய் க்கிழமை

இதற்கு இதுவழகு–

கண்ணுக்கு இனிய சபைக்குமணி கற்றோனே

xxx

மே 26 புதன் கிழமை

நல்லவர் தீயவர் கல்வியின் பயன் —

வல்லவர்பால் கல்வி மதம்ஆ ணவம்போக்கும்

அல்லவர்பால் கல்வி அவையாக்கும்

xxx

மே 27 வியாழ க்கிழமை

நல்லதாயினும் எண்ணிச்சொல்லுக–

இதமகித வார்த்தை எவர்கேனும் மேலாம்

இதமெனவே கூறிலிதமன்றே

xxx

மே 28 வெள்ளி க்கிழமை

மூவகையினர் ஈகைத்தன்மை—

உத்தமர்தாம் ஈயுமிடத்து ஓங்குபனை போல்வரே

மத்திமர்தாம் தெங்குதனை மானுவரே – முத்தலரும்

ஆம்கமுகு போல்வர் அதமர் அவர்களே

தேம்கதலியும் போல்வார் தேர்ந்து.

xxx

மே 29 சனிக்கிழமை

மூவகையார் தன்மைகள்—

உற்ற மறையகத்தின் உய்க்குமவன் உத்தமனே

மற்றம் மறைபகர்வோன் மத்திமனே – முற்றிழையே

அத்தம் உறலால் புகல்வான் அதமனென

வித்தக நூலோதும் விரித்து

மே 30 ஞாயிற்று க்கிழமை

நல்லதாயினும் எண்ணிச்சொல்லுக–

இதமகித வார்த்தை எவர்கேனும் மேலாம்

இதமெனவே கூறிலிதமன்றே

xxx

மே 31 திங்கட் கிழமை

கற்றவராயினும் தீயோர் தீயவரே–

தீயவர்பால் கல்வி சிறந்தாலும் மற்றவரைத்

துயவரேன்று எண்ணியே துன்னற்க

xxx

BONUS VERSES…………………………………..

அழகைக்கொடுப்பன—

அன்னமனையாய் குயிலுக்கு ஆனவழகு யின்னிசையே

கன்னல் மொழியார்க்கு கற்பாமே – மன்னுகலை

கற்றோர்க்கு அழகு கருணையே ஆசைமயக்கு

அற்றோர்க்கு அழகு பொறையாம்.

xxx

துன்பத்திலும் நல்லவர் நல்லவராவார்–

 நலிந்தாலும் உத்தமர்பால்

நற்குணமே தோன்றும் நயந்து

xxx

tags–  மே மாத,  நற்சிந்தனை,  காலண்டர், 

WRITTEN BY S NAGARAJAN

Post No. 9542

Date uploaded in London – –  –28 APRIL  2021   

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

திருக்குறளில் அந்தணரும் வேதமும்!

ச.நாகராஜன்

உலகம் முழுமைக்கும் வாழ்வாங்கு வாழும் வழியைச் சொல்லும் திருக்குறள் இந்து மதத்தின் அற நூலே ஆகும். அது இந்து மதம் பெரிதும் போற்றும் வேதத்தைப் போற்றும் நூல். ஆகவே வேதம் மற்றும் இந்து மதத்தின் கொள்கைகளான வேதமே அறத்தின் அடிப்படை, புனர்ஜென்மம் உண்டு போன்றவற்றை மறுக்கும் பகுத்தறிவுவாதிகளும் புனர்ஜென்மத்தை மறுக்கும் செமிடிக் மதங்களைச் சார்ந்தோரும் அதைத் தங்களுடையது என்று சொல்வது முடியாத காரியம் – உண்மையின் அடிப்படையில் – திருக்குறளின் அடிப்படையில்!

அந்தணர் என்ற சொல்லை இரு முறையும் அந்தணன் என்ற சொல்லை ஒரு முறையும் 1330 குறள்களில் திருவள்ளுவர் கையாளுகிறார்.

குறள் எண் 8 – அறவாழி அந்தணன் தாள் சேர்ந்தார்க்கு அல்லால்

                பிறவாழி நீந்தல் அரிது

அறவாழி அந்தணன் என்பது இங்கு இறைவனைக் குறிக்கிறது. அவனது தாளைப் பணியாதார்க்கு பிறவிக் கடலைக் கடப்பது அரிது.

குறள் எண் 30 – அந்தணர் என்போர் அறவோர் மற்றெவ்வுயிர்க்கும்

                 செந்தண்மை பூண்டொழுகலான்

எல்லா உயிர்களிடத்தும் செம்மையான அருள் கொண்டு இருக்கும் அறநெறி வழி நிற்போர் அந்தணர் எனப்படுவர்.

குறள் எண் 543 – அந்தணர் நூற்கும் அறத்திற்கும் ஆதியாய்

                  நின்றது மன்னவன் கோல்

அந்தணர் போற்றும் வேதத்திற்கும் அறத்திற்கும் அடிப்படையாக நின்று அமைவது மன்னவனின் செங்கோலே!

‘மாதவர் நோன்பும் மடவார் கற்பும் காவலன் காவல்’ என்ற மணிமேகலை வரிகளை பரிமேலழகர் தனது உரையில் சுட்டிக் காட்டுகிறார்.

இது தவிர பார்ப்பார் கண் என்ற சொல்லை ஒரு இடத்தில் -குறள் எண் 285இல் – எதிர்பார்ப்பவரிடத்தில் –  என்ற பொருளில் பயன்படுத்துகிறார்.

அருள் கருதி அன்புடையர் ஆதல் பொருள்கருதிப்

பொச்சாப்புப் பார்ப்பார் கண்

அடுத்து குறள் எண் 134. இதில் பார்ப்பான் என்ற சொல் பார்ப்பனன் என்ற பொருளிலும் ஒத்துக் கொளல் என்பது வேதம் ஓதுதல் என்ற பொருளிலும் மிகத் தெளிவாக அமைகிறது.

மறப்பினும் ஓத்துக் கொளலாகும் பார்ப்பான்

பிறப்பொழுக்கங் குன்றக் கெடும்

கற்ற வேதத்தை ஒருவேளை மறந்து விட்டான் என்றாலும் கூட அதை மீண்டும் ஓதிக் கொள்ளலாகும். ஆனால் பார்ப்பானின் பிறப்பு ஒழுக்கம் குன்றினால் கெட்டு விடும். இங்கு பரிமேலழகர் தனது உரையில், “அந்தணனது உயர்ந்த வருணம் தன் ஒழுக்கம் குன்றக் கெடும்” என்கிறார்.

ஆக வேதம் ஓதுதலை மறப்பினும் கூட பிறப்பு ஒழுக்கத்திலிருந்து ஒரு நாளும் ஒரு பார்ப்பான் விலகக் கூடாது என்று வலியுறுத்துகிறார் வள்ளுவர்.

அடுத்து மறைமொழி என்று வேதத்தை ஒரு குறளில் குறிப்பிடுகிறார் வள்ளுவர். குறள் எண் : 28

நிறைமொழி மாந்தர் பெருமை நிலத்து

மறைமொழி காட்டி விடும்

சான்றோரின் பெருமையை நிலவுலகில் அவரால் கூறப்படும் மறைமொழி காட்டி விடும். மறைமொழி என்பது வேதம்.

ஆனால் சிலரோ இதைத் திரித்து பழமொழி என்கின்றனர். பழமொழியை யார் வேண்டுமானாலும் கூறலாம் என்பதால் மறை மொழி என்பதற்கு வேதம் என்ற பொருளே சிறந்தது.

மணக்குடவர் தன் உரையில் “ கல்வி உடைய மாந்தரது பெருமையை அவரால் சொல்லப்பட்டு நிலத்தின் கண் வழங்கும் மந்திரங்களே காட்டும்” என்கிறார்.

பரிமேலழகரும் மந்திரங்கள் என்ற பொருளையே கூறுகிறார். ஆக மறைமொழி என்பது வேத மந்திரங்கள் என்பது தெளிவாகிறது.

அடுத்து மறை என்ற சொல்லை ஏழு இடங்களில் வள்ளுவர் பயன்படுத்துகிறார்.

குறள் எண் 847இல் அருமறை சோரும் அறிவிலான் என்று வள்ளுவர் கூறுவதற்கு பொருளாக பரிமேலழகர் “பெருதற்கு அரிய உபதேசப் பொருளைப் பெற்றாலும் உட்கொள்ளாது போக்கும் புல்லறிவாளன்” என்கிறார். ஆக இங்கு மறையை உபதேசப் பொருள் என்றே கொள்ளலாம்.

குறள் எண் 590இலும் 695இலும் மறை என்பது ரகசியம் என்ற பொருளில் வருகிறது. குறள் எண் 1076இலும் “தாம் கேட்ட மறை” என்பதற்கு தாம் கேட்ட இரகசியங்களை எல்லோருக்கும் சொல்லும் கயவரை, ‘பறை’ என்கிறார்.

குறள் எண் 1138இலும்1254இலும் ‘மறை இறந்து மன்று படும்’ காமமானது மறைத்திருத்தலையும் மீறி ஊர் உலகிற்கு வெளிப்படும் என்கிறார்.

குறள் எண்1180இலும் (காமத்துப் பால் கண்விதுப்பழிதல் அதிகாரத்தில்) ‘மறைபெறல்” என்ற வார்த்தை மறைத்து வைத்திருத்தல் என்ற பொருளில் வருகிறது.

அடுத்து அவி என்ற வார்த்தையை இரு இடங்களில் வள்ளுவர் பயன்படுத்துகிறார்.

குறள் எண் : 259

அவி சொரிந்தாயிரம் வேட்டலின் ஒன்றன்

உயிர்செகுத் துண்ணாமை நன்று

வேள்வித் தீயில் நெய் முதலிய அவிகளைச் சொரிந்து ஆயிரம் வேள்விகளைச் செய்வதை விட ஒரு உயிரைக் கொன்று அதன் மாமிசத்தைச் சாப்பிடாமல் இருப்பது நல்லது.

அவி என்பது நெய் முதலிய வேள்வியில் இடுவனவாம். அந்த வேள்வியினால் வரும் பயனை விட இந்த விரதத்தால் வரும் பயன் பெரிது என்பது

பரிமேலழகர் உரை.

இன்னொரு குறள் : எண் 413

செவியுணவிற் கேள்வி உடையார் அவியுணவின்                     ஆன்றாரோடு ஒப்பர் நிலத்து

இந்த பூமியில் செவி உணவாகிய கேள்வியினை உடையவர்கள் அவியை உணவாகக் கொண்ட ஆன்றாரோடு – தேவர்களோடு – ஒப்பாவார்.

அறிவால் நிறைந்தவர் என்பதால் ஆன்றார்; துன்பம் அறியாதவர் என்பதால் தேவர் – இது பரிமேலழகர் உரை.

(தேவரை மனம் போன போக்கில் நடக்கும் கயவரோடு ஒப்பிடும் ஒரு குறளும் உண்டு. குறள் எண் 1073 – “தேவர் அனையர் கயவர்!”)

ஆக திருவள்ளுவர் காட்டும் சமுதாயம் வேதம் நிறைந்த தமிழ்நாடு என்பதை அறிகிறோம். அதில் பார்ப்பான் பிறப்பொழுக்கம் குன்றாமல் வாழ வேண்டும் என்று வள்ளுவர் அறிவுறுத்துவதைக் காண்கிறோம். அந்தணர் என்போர் அனைத்து உயிர்களிடத்தும் அன்பு செலுத்தும் அருளாளர் என்பதையும் அறிகிறோம்.

வேள்வி, அவி சொரிதல்,  ஆகிய வேத கால பழக்கங்களையும் தேவர் பற்றியும் கூட வள்ளுவர் குறிப்பிடுவதையும் பார்க்கிறோம்.

வள்ளுவர் பாரதீய பண்பாட்டின் அடிப்படையில் குறளைப் படைத்திருக்கிறார் என்பதற்கான சான்றுகளில் மேலே காட்டும் குறள்களும் நல்ல சான்றாகும்.

ஒரு சின்ன உண்மை:-

1967க்குப் பின்னர் வந்த திருக்குறளுக்கான உரைகளில் 99 சதவிகித உரைகளை ஒரு நகைச்சுவைக்காகப் படிக்கலாமே தவிர, பொருள் விளங்கிக் கொள்ளப் படிக்கக் கூடாது. எப்படி எல்லாம் வள்ளுவரைத் திரிக்கலாம் என்பதை “கயிறு திரித்துப் பழக்கப்பட்ட” “உ.பி.க்களின்” உரைகளிலும் தங்களைக் காப்பாற்றிக் கொள்ள உ.பி.களுக்கு ஜால்ரா போடும் “தமிழ் அறிஞர்களின்” உரைகள் மற்றும் கட்டுரைகளிலும் கண்டு திடுக்கிடலாம்!

வள்ளுவரை இவர்களிடமிருந்து காப்பாற்றுவோம் – நம்மை நாமே காப்பாற்றிக் கொள்ள!

***

tags– அந்தணர், அந்தணன், மறைமொழி, பார்ப்பான், திருக்குறள்