Compiled by ச.நாகராஜன்

Date : 7 September  2015

Post No. 2132

Time uploaded in London: – காலை 8-50

மஹாகவி பாரதியார் பற்றிய நூல்கள்! – 6

ச.நாகராஜன்

பாரதியார் பிறந்த நாள்

அரவிந்த ஆசிரமம் அமுதன்

இது ஒரு புத்தகம் அல்ல. வானொலி உரை. அரவிந்த ஆசிரமத்தைச் சேர்ந்த அமுதன் அவர்களை புதுவை வானொலி நிலையத்தார் அழைத்து மஹாகவி பாரதியார் பற்றி உரை ஒன்றை நிகழ்த்துமாறு வேண்டினார்கள்.

பாரதியார் பிறந்த தினத்தன்று 11-12-1968ஆம் தேதி இது ஒலிபரப்பப்பட்டது.

அமுதன் அவர்கள் சிறுவயதிலேயே பாரதியாருக்கு அறிமுகமானவர். பின்னால் அரவிந்த ஆசிரமத்தில் மஹரிஷி அரவிந்தருடன் நெருங்கிப் பழகும் பாக்கியம் அவருக்குக் கிடைத்தது. அன்னை அவர்களின் அந்தரங்கக் காரியதரிசியாகவும் அவர் ஆனார்.

வைகறை என்ற இதழ் அரவிந்த ஆசிரமம் வெளியிடும் ஒரு அழகிய தமிழ் இதழ். பிப்ரவரி, ஏப்ரல்,ஆகஸ்டு, நவம்பர் மாதங்களில் வெளி வர ஆரம்பித்த இந்த இதழின் ஆசிரியப் பொறுப்பில் இருந்த அவர் அழகுற அருமையான தங்கம் நிகர் கட்டுரைகளைத் தேர்ந்தெடுத்து வெளியிட்டு வந்தார். இந்த வைகறையில் 1970ஆண்டு மலர் 1இல் இவரது வானொலி உரை முழு வடிவில் அப்படியே பிரசுரமானது.

பாரதி அன்பர்கள் அரவிந்தரின் தொடர்பினால் மஹாகவி எவ்வளவு மகிழ்ச்சியுற்றார், அரும் படைப்புகளைப் படைத்தார் என்பதை அறிவர். அந்த நெருங்கிய தொடர்பைப் பற்றியும் மஹாகவி பற்றியும் நன்கு விளக்கிக் கட்டுரைகளைப் படைத்தவர் அமுதன் அவர்கள்.

அமுதன் அவர்களின் வானொலி உரை

அவரது உரையின் பெரும் பகுதி, அரவிந்த ஆசிரமத்திற்கும் வைகறைக்கு நாம் செலுத்தும் உரிய நன்றியுடன், அவரது சொற்களிலேயே இதோ:-

“பாரதியார் புதுவையில் இருக்கும்போது அவருடன் நெருங்கிப் பழகினவர்களில் நானும் ஒருவன்; இந்த ஒரு காரணத்தினாலேயே நான் அவரை நன்கு தெரிந்து கொண்டு விட்டதாகவும் நான் ஏதோ ஏனையோர் இதுவரை சொல்லியிராத விவரங்களை சொல்லப் போவதாகவும் நினைக்கக் கூடாது. என்னை விட அவரை அறிந்து தெரிந்தவர்கள் இருக்கத்தான் வேண்டும். பாரதியாரைப் பற்றி எண்ணிறந்த கட்டுரைகள் வெளி வந்துள்ளன – பாரதியாரின் நாட்டுப்பற்று, பாரதியாரின் இலக்கியம், முக்கியமாக – அவர் கவிதை, பாரதியாரின் புதுவை வாழ்க்கை முதலிய.

சுருங்கச் சொல்லின் இவை எல்லாவற்றையும் விட அவர் நம் தமிழ்வானின் கீழ்த்திசையில் முளைத்த வெள்ளி.

நான் பாரதியாரை முதன் முதலில் பார்த்தது 1909. அவரை தரிசித்த ஒரு வாரத்திற்குள்ளேயே அவர் சாதாரண மனிதன் அல்ல என்பது பசுமரத்தில் அடித்த ஆணி போல் என் உள்ளத்தில் ஆழ்ந்து பதிந்து விட்டது. அன்று நானோ சிறுபிள்ளை.

பாரதியாரின் அசாதாரணத் தன்மை அவர் நடையிலும் உடையிலும், பாவனையிலும் பளிச்சென்று பிரகாசிக்கும்; அதை நாம் வேண்டாவிடினும் அதை கவனித்தே ஆக வேண்டியிருக்கும்.

பாரதியார் ஆதர்ச புருஷன் – கொண்ட ஆதர்சத்தில் முழுக்க ஈடுபட்டவர்; அவரிடம் எதிலும் அரைகுறை என்ற பேச்சே கிடையாது. ஒரு கொள்கையை அவர் உள்ளம் கண்டதும், அதைக் கொண்டதும், உடனே அந்த க்ஷணமே அதைக் கைக்கு மெய்யாக ஆக்கி விடப் பார்ப்பார், ஆக்கியும் விடுவார். கொள்கைக்கும் செய்கைக்கும் மத்தியில், அவர் வரை, இடைவெளி கிடையாது.

இன்று போல் அல்ல அன்று. இன்று நாம் ஒளியை விட்டு விலகி, மண்ணோடு மண்ணாய் விட்டோம். இன்று, “வருமானம் என்ன, செலவு என்ன, சாப்பாட்டிற்கு வழி என்ன, எவ்வளவு சேகரம் செய்தோம்?” என்பன போன்ற எண்ணங்களும் உணர்ச்சிகளும் தனி மனிதனையும் மக்கள் குழாத்தையும் ஆட்டிக் கொண்டிருக்கின்றன. அன்றோ மக்கள் உள்ளத்தில் தீ சுடர் விட்டெரியக் கண்டோம். அச்சுடரை மூர்த்திகரிக்கும் ஆதர்ச புருஷர்கள் மக்களிடை சஞ்சாரம் செய்தார்கள். அத்தகைய மூர்த்திகளில் ஒருவர் பாரதியார். அவர் மண்ணுலகில் நடமாடிய போது நாம் விண்ணுலகில் வாழ்வதாக நினைத்தோம். அவர் ‘விடுதலை’ என்னும் மந்திரச் சொல்லைக் கர்ஜித்த போது நாம் நமது தளைகள் அறுந்து இறக்கை கட்டி விண்ணில் பறப்பதாக எண்ணினோம். மண்ணும் ஒளிர்ந்தது.

பாரதியார் வாழ்ந்த காலம் மண்ணில் விண்ணைக் கண்ட காலம்.பாரதியார் தன் பாடல்களைப் பாடிய மாதிரி வேறெவரும் பாடி நான் கேட்டதில்லை – அந்த ஆவேசம், அந்த சக்தி, அந்த உத்ஸாஹம், அந்த தாண்டவம் நான் மீண்டும் காணவில்லை.

பாரதியார் வாக்கில், அவர் சொல்லில் ஓர் அமாநுஷ்யம், தைவதம் மிளிர்ந்தது – அது தெய்வ சம்பத்தல்லவா?

எவரிடமும் அவருக்கு அவநம்பிக்கையே கிடையாது – பச்சைக் குழந்தை உள்ளம். தன் பொருள், பிறர் பொருள் என்பதும் அவரிடம் கிடையாது – ஒருவித சரளம், அவர் பிறரிடம் சல்லாபம் செய்யும்போது.

பட்டினத்துப்பிள்ளை: “பொய்யாய்ப் பழங்கதைக் கனவாய் மெல்லப் போனதுவே”

பாரதி: “சுவை புதிது, பொருள் புதிது, வளம் புதிது சொற்புதிது, சோதி மிக்க நவ கவிதை எந்நாளும் அழியாத மகா கவிதை”

மேனி சிலிர்க்க வைக்கும் மெய்யுரை

எப்படிப்பட்ட உரை! மண்ணகத்தில் விண்ணகத்தைக் கண்ட காலத்தில் மஹாகவியுடன் நெருங்கிப் பழகும் பேறு பெற்ற பெரியவர் அல்லவா அமுதன்!

அவர் உரை மேனி சிலிர்க்க வைக்கிறது. பாரதி அன்பர்கள் போற்றிப் பாதுகாக்க வேண்டிய அற்புத உரை இது!

*************

Default Co. Ltd

Written by S NAGARAJAN

Date : 31 ஆகஸ்ட்  2015

Post No. 2111

Time uploaded in London : 12-11

By ச.நாகராஜன்

பதிப்புகள் பல விதம்; ஒவ்வொன்றும் ஒரு விதம்!

மஹாகவி பாரதியார் போன்ற ஒரு பெரும் கவிஞனை காலம் எப்போதோ ஒரு முறை தான் தோற்றுவிக்கிறது

வாழ்ந்த காலத்தில் அவரைக் கொண்டாடாமல், அவரைச் சற்றே வறுமையில் வாட விட்டு விட்டது தமிழ்ச் சமுதாயம்.

ஆனால் இப்போது அவரது பெருமை நன்கு புரிந்து விட்ட நிலையில் காலத்தை வென்ற கவிஞன் என்று அவன் போற்றப்படும் நிலையில் அவனுக்குத் தமிழர்கள் சிலர் இழைக்கும் கொடுமைக்கும் துரோகத்திற்கும் ஒரு முற்றுப் புள்ளி வைக்கப்பட்டே ஆக வேண்டும்.

மஹாகவிக்கு துரோகமா என்று விழிகளில் வியப்பைத் தேக்க வேண்டாம்.

அவர் நமக்கு விட்டுச் சென்ற படைப்புகளை உள்ளது உள்ளபடி வெளியிடாமல் தங்களின் ‘கெட்ட’ நோக்கத்திற்கு இசைந்த வகையில் வெளியிடுவதைத் தான் இங்கு துரோகம் என்று குறிப்பிடுகிறோம்.

அறியாமல் செய்தாலும் பிழை பிழை தான்! ஆகவே பாரதி ஆர்வலர்கள் இந்தப் பதிப்பாளர்கள் குறித்து ஜாக்கிரதையாக இருக்க வேண்டும். நல்ல பதிப்பையே தேடிப் பிடித்து வாங்க வேண்டும். சரியான தலைப்புகள், சரியான பாடம் தெரிந்த போது தனது பிரதியில் அதை மாற்றிக் கொள்ள வேண்டும்.

மனம் போன படி மாற்றலாமா?

பல்வேறு வித நோக்கங்கள்! அதற்கு பலி மஹாகவி! அது தான் வருத்தமாய் இருக்கிறது.

முதலில் எழுத்துக்களை மாற்றி வெளியிடுதல் தவறல்லவா. ஷ, ஸ, ஹ, ஜ போன்ற எழுத்துக்களைக் கையாளுவதில் அவருக்குத் தடை இருந்ததே இல்லை. ஸ்வ சரிதை என்பதை பல பதிப்புகள் சுய சரிதை என்று மாற்றி வெளியிடுவதைப் பார்க்கலாம்.

எழுத்துச் சீர்திருத்தம் பற்றிய அவரது தீர்க்கமான சிந்தனை பற்றிய   அருமையான சம்பவங்கள் உண்டு, (அவற்றை எனது தனிக் கட்டுரையில் காணலாம்)

ஆகவே அவர் எழுதிய எழுத்துக்களை அப்படியே அவரது படைப்புகளில், கதை, கவிதை, கட்டுரையில் வெளியிட வேண்டும்.

அடுத்து தலைப்புகளை மாற்றுதல்.

ஶ்ரீ கிருஷ்ணன் மீது ஸ்துதி என்பது அவர் கொடுத்த தலைப்பு, கண்ணனை வேண்டுதல் என்பது புதிய தலைப்பு. எளிமைப் படுத்துகிறார்களாம்! மனம் போன படி தலைப்பு, வார்த்தைகளை ‘எளிமைப் படுத்த’ இவர்கள் யார்?” ஸ்வ சரிதை என்பது 1948ஆம் ஆண்டு பாரதி பிரசுராலயம் கொடுத்திருக்கும் தலைப்பு. சிலர் இதை சுயசரிதம் என்றும் கனவு என்றும் தலைப்பு கொடுத்து பிரசுரிக்கின்றனர்.

கவிஞனின் உள்ளத்தைத் தெரிவிக்கும் தலைப்புகளையே மாற்றலாமா?

அடுத்து மஹாகவி ராகம், ஸ்வரக் குறிப்புகளைத் தன் பாடல்களுக்குத் தந்துள்ளார். அதை விடுத்து பாடல்களைப் பதிப்பது இன்னுமொரு தவறு!

வார்த்தைகளையே மாற்றுவது அல்லது மனம் போன படி ‘தமிழ்ப் படுத்துவது’, சில வரிகளை மறைப்பது அல்லது மாற்றுவது என்று பாரதியார் பல ‘தமிழர்களிடம்’ படாத பாடு படுகிறார்.

சீர் பிரித்து பிரசுரிப்பது ஒரு வழக்கமாக ஆகி விட்டது இப்போது; மர்ரே கம்பெனியின் கம்ப ராமாயணப் பதிப்பின் நேர்த்தியைக் கண்டோர் “தாமும் அதுவாகப் பாவித்து” பாரதியாரை “சீர் பிரிக்கிறார்கள்”! இதிலும் பல விதம்!!

பரலி சு.நெல்லையப்பர் ஆங்கிலேய அதிகாரிகள் பாரதியாரின் பாட்டுக்களை தடை செய்து விடுவார்கள் என்ற நோக்கத்துடன் நாட்டுப் பாட்டு என்ற நூல் தலைப்பில் அவரது கவிதைகளை வெளியிட்டார்; பரப்பினார். இது புரிந்து கொள்ளக் கூடிய ஒன்று. ஆனால் சுய லாபங்களுக்காக அவரை மாற்றுவது தான் வேடிக்கை!

தமிழினம் காப்பதாக ‘தம் இனம்’ காப்போர்!

சில ‘இஸம்’களிடம் அவர் மாட்டிக் கொண்ட விந்தையையும் பல பதிப்புகளில் பார்க்கிறோம். கம்யூனிஸ்டுகளின் பாரதி ஒரு விதம்! திராவிட– ஆரியம் என்ற பிரிவினைக் கொள்கை கொண்டோரின் பாரதி இன்னொரு விதம்! பார்ப்பன எதிரிகள் என்று தம்மை பகிரங்கமாகச் சொல்லி கொள்வொர் பாரதியைத் துணைக்கு அழைத்து அவருக்கு ‘ட்ரீட்மெண்ட்’ கொடுப்பது இன்னொரு விதம்!

இத்தனைக்கும் மீறிய மகாகவி அவர். அவரை உள்ளபடி தேடிக் கண்டு பிடிப்பது அவர் மறைந்த நூறு ஆண்டுகளுக்குள்ளேயே மிகவும் சிரமமான காரியமாக ஆகி விட்டது.

1936ஆம் ஆண்டு ஐந்தாம் பதிப்பாக தேசீய கீதங்கள் என்று தலைப்பிட்ட நூலை பாரதி பிரசுராலயம்,திருவல்லிக்கேணி, சென்னை வெளியிட்டுள்ளது. இந்த நூலைப் பார்த்து இன்றுள்ள பலரது பதிப்புகளையும் பார்க்கும் போது வேதனை தான் பிறக்கிறது. முதலில் தமிழை இப்படிப்பட்ட வக்கிரம் பிடித்தவர்களிடமிருந்து காக்க வேண்டும்.

தமிழினம் காப்போம், தமிழைக் காப்போம் என்ற கோஷத்தை முன் வைத்து ‘தம் இனத்தை மட்டும்’ – வாரிசுகளைக் காக்கும் இவர்களை இனம் கண்டு இவர்களிடமிருந்து தமிழர்கள் முதலில் தம்மைக் காத்துக் கொள்ள வேண்டும், இல்லையா?!

பாரதியாரைத் தம் பக்கம் தவறாகத் துணைக்கு இழுப்பவர்கள் பாரதியாருக்கு மரியாதை செய்பவர்களா அல்லது துரோகிகளா?

சிந்திப்போம்! பாரதியாரைக் காப்போம்!!

**************

Article No. 2095

Written by ச. நாகராஜன்
Date : 24 August  2015
Time uploaded in London :– 10-10

ச.நாகராஜன்

2. பாரதி நினைவுகள்

பாரதி பற்றிய இந்த நூலை எழுதியவர் யதுகிரி அம்மாள். இதன் முதற் பதிப்பு 1954 செப்டம்பர் மாதம் அமுத நிலையம் பிரைவேட் லிமிடட்-ஆல் வெளியிடப்பட்டது. நூலின் அன்றைய விலை 30 காசுகள் மட்டுமே! 87 பக்கங்கள் அடங்கிய இந்த நூலை “பாரதியின் தோழராக விளங்கிய என் பிதா ஶ்ரீ ஶ்ரீ ஶ்ரீநிவாஸாச்சாரியாரின் திருவடித் தாமரைகளில் இச் சிறு நூலை அன்புக் காணிக்கையாக சமர்ப்பிக்கிறேன்” என்று சமர்ப்பணம் செய்துள்ளார் யதுகிரி அம்மாள்.

அறிமுகம் என்ற உரையில் ரா.அ.பத்மநாபன் கூறுவது:-

“வாசகர்கள் முன் உள்ள இந்த “பாரதி நினைவுகள்” நூலை எழுதிய ஶ்ரீமதி யதுகிரி அம்மாள் மண்டயம் ஶ்ரீ ஶ்ரீநிவாஸாச்சாரியாரின் மூத்த புதல்வி. புதுவையில் பாரதியார் இருந்த சமயம் சிறுமியாக இருந்தவர். பாரதியாருடன் பல்லாண்டுகள் நெருங்கிப் பழகி, அவரது அன்புக்குப் பாத்திரமாகும் பேறு பெற்றிருந்தவர். தமது சிறு வயதில் பாரதியாரைத் தாம் அறிந்த வகையில் கவிஞரை நமக்கு விவரிக்கிறார் ஶ்ரீமதி யதுகிரி அம்மாள்”         (ரா.அ.பத்மநாபன், சென்னை, 3—9-54இல் எழுதியது)

“பாரதியாரைப் பற்றி எனக்குத் தெரிந்ததைப் பிறரும் அறியச் செய்யலாம் என்று ஏதோ எழுத முன் வந்தேன். இக்குறிப்புகள் 1938-39-ல் எழுதப்பட்டவை. இன்ரு அச்சேறுகின்றன” என்று முன்னுரையில் குறிப்பிடுகிறார் யதுகிரி (28-7-1954இல் எழுதப்பட்டது முன்னுரை)

நூலில் 26 அத்தியாயங்கள் உள்ளன.

உலையில் போடுவதற்காக வைத்திருந்த அரிசியில் கால் பங்கு கூட இல்லை என்று செல்லம்மா தவிக்கையில், பாரதியார், “வா, செல்லம்மா, இந்தக் குருவிகளைப் பார்! எவ்வளவு சந்தோஷமாக இருக்கின்றன” என்று கூறி அரிசியைக் குருவிகளுக்குப் போட்ட சம்பவம் விட்டு விடுதலையாகி என்ற அத்தியாயத்தில் விவரமாகத் தரப்பட்டுள்ளது.

பாம்பாட்டி பாடிய பாட்டில் ஒரு பாடலை எழுதித் தருவதாக பாரதியார் யதுகிரியிடம் கூறி விட்டு மறுநாள் “பாரத தேசமென்று பெயர் சொல்லுவார்” பாடலை எழுதிக் கொண்டு வந்து பாடிக் காட்டிய சம்பவம் பாரத தேசமென்று பெயர் சொல்லுவார் என்ற அத்தியாயத்தில் தரப்பட்டுள்ளது.

போட்டிக்கு எழுதப்பட்ட செந்தமிழ் நாடெனும் போதினிலே என்ற பாடல் எழுந்த வரலாற்றையும் அதை வ.வெ.ஸு. ஐயர் வெகுவாகப் பாராட்டியதையும் செந்தமிழ் நாடெனும் போதினிலே என்ற அத்தியாயம் சுவையாக விவரிக்கிறது.

காணி நிலம் வேண்டும் என்ற பாடல் எப்படி எழுந்தது? ஜப்பானில் புதிய சட்டம் ஒன்று பிறப்பிக்கப்பட்டது. அதன் படி அந்த ராஜ்யத்தை ஒரே சமனாகப் பிரித்து எல்லா ஜப்பானியருக்கும் ஆளுக்கு இவ்வளவு என்று பிரித்துக் கொடுத்து விடுவது, இனி பிச்சைக்காரர்களும், சோம்பேறிகளும் தங்கள் தேசத்தில் இருக்கக் கூடாது என்று செய்தார்கள். இதைப் பார்த்த புதுவை சுதேசியார் நம் நாட்டில் ஒரு குடும்பம் பிழைக்க எவ்வளவு நிலம் வேண்டும் என்று ஆராய்ந்தனர்.

அதற்கு விடையே காணி நிலம் வேண்டும் என்ற பாரதியாரின் பாட்டு,

ஏராளமான சம்பவங்கள். உள்ளத்தைத் தொடுபவை சில. உருக்குபவை சில. உணர்ச்சி ஊட்டுபவை பல.

பாரதி ஆர்வலர்கள் நிச்சயம் படிக்க வேண்டிய புத்தகம் இது.

****

Written by S NAGARAJAN

Date : 31 July 2015

Post No. 2030

Time uploaded in London : 7-51 am

By ச.நாகராஜன்

பாரதியாரின் “சிவாஜி” கவிதை

1910 பிப்ரவரி முதல் தேதியிட்ட விஜயா இதழில் பாரதியாரின் முஸ்லீம்கள் பற்றிய கருத்துக்களைப் பார்த்தோம்.

இதற்கு முன்பாகவே 1906ஆம் ஆண்டு இந்தியா இதழில் தொடர் கவிதையாக வெளியிடப்பட்டக் கவிதைத் தொடர் தான் ‘சத்ரபதி சிவாஜி தனது சைநியத்தாருக்குக் கூறியது’ என்ற கவிதைத் தொடர்.

1906ஆம் ஆண்டு நவம்பர் 17, 24, டிசம்பர்1, 6 ஆகிய தேதியிட்ட இந்தியா இதழ்களில் தொடராக இது வெளி வந்தது.

இன்னும் வரும் என்ற குறிப்புடன் வெளி வந்த இதன் தொடர்ச்சி வெளிவரவில்லை.

190 வரிகள் உள்ள கவிதையில் பாரத நாட்டின் சிறப்பு, துருக்கரின் அதர்மச் செயல்கள், அவர்கள் இன்னல்கள் தருவது அவர்களை வெல்லும் புனிதப் போரில் பங்கு கொள்ள –மிலேச்சரை வெற்றி கொள்ள – தூயவரையும், வீரர்களையும் அழைப்பது, அநாரியத் தன்மையை அடையாதே, ஈடிலாப் புகழினோய், எழுகவோ எழுக என அர்ஜுனனை கண்ணபிரான் கீதையை உபதேசித்து விழிப்புறச் செய்து பற்றலர் தமையெலாம் பார்க்கிரையாக்கியது என வரிசையாக விவரிக்கும் அற்புத நடையைக் காண்கிறோம்.

சிவாஜியின் வீர உரை என்றும் இந்திய நாட்டினருக்குப் பொருந்தும் வகையில் கவிதை வரிகள் ஒளிர்கின்றன.

அவுரங்கஜீபின் அழிவுக்குக் காரணம் அதர்மம் என்று மகாகவி கூறியுள்ளதை நோக்கி விட்டு அந்த அதர்மங்கள் முகலாயர் காலத்தில் என்னென்ன என்பதைப் பட்டியலிட்டுக் காட்டுகிறார் மகா கவிஞர்.

“ஆலயம் அழித்தலும், அருமறை பழித்தலும்,                                    

பாலரை, விருத்தரைப் பசுக்களை ஒழித்தலும்                                       

மாதர் கற்பழித்தலும் மறையவர் வேள்விக்                                            

கேதமே சூழ்வதும் இயற்றி நிற்கின்றார்                                                

 சாத்திரத் தொகுதியைத் தழல்படுக்கின்றார்                                   

கோத்திர மங்கையர் குலங் கெடுக்கின்றார்                                              

எண்ணில, துணைவர்காள், எமக்கிவர் செயுந் துயர்                                    

 கண்ணியம் மறுத்தனர், ஆண்மையுங் கடிந்தனர்,                               

பொருளினைச் சிதைத்தனர், மருளினை விதைத்தனர்                                  

திண்மையை அழித்து பெண்மையிங் களித்தனர்                                               

பாரதப் பெரும்பெயர் பழிப் பெயராக்கினர்                                                 

சூரர் தம்  மக்களைத் தொழும்பராய்ப் புரிந்தனர்                                                    

வீரியம் அழிந்து மேன்மையும் ஒழிந்து நம்                                                       

ஆரியர் புலையர்க் கடிமைகள் ஆயினர்”

அதர்மத்தின் முழுப் பட்டியலை இதை விட வேறு யாரால் இப்படிச் சொல்ல முடியும்?

எழுகவோ எழுக!

“மற்றிதைப் பொறுத்து வாழ்வதோ வாழ்க்கை?”        

என்ற சிவாஜி மஹாராஜாவின் வார்த்தைகளில் தன் கருத்தை ஏற்றிக் கூறுகிறார் மகா கவிஞர்.

“மொக்குள் தான் தோன்றி முடிவது போல                                      

மக்களாய்ப் பிறந்தோர் மடிவது திண்ணம்”

என்பதைச் சுட்டிக் காட்டும் கவிஞர் “எழுகவோ எழுக” என அறைகூவல் விடுக்கிறார்.

அற்புதமான இந்தக் கவிதை பாரதியார் இந்தியா எப்படி எழ வேண்டும் என்ற தன் உள்ளக் கிடக்கையைத் தெளிவாக விளக்கும் ஒரு கவிதை.

தர்ம பாரதம்

அதர்மப் பட்டியலுக்கு எதிராக தர்ம நாடு பாரதம் எப்படி இருக்கும்?

ஆலயங்கள் உயிர்ப்புடன் வாழும், அருமறை தழைக்கும்,                                    

பாலரும், விருத்தரும் போற்றப்பட்டு வாழ்வர்                                      

  பசுக்கள் வாழ்விக்கப்படும்                                                                 

மாதர் கற்புடன் இருக்க மறையவர் வேள்வி எங்கும் நடக்கும்                                                                          சாத்திரத் தொகுதி தழைக்கும்                                                         

கோத்திர மங்கையர் குலம் ஓங்கும்                                                                                   

கண்ணியம் இருக்கும், ஆண்மை ஓங்கும்,                                                     

பொருள் செழித்து வளரும், மருள் ஒழியும்                                      

திண்மை பெருகும் ஆண்மை மிளிரும்                                               

பாரதப் பெரும்பெயர் உலகெங்கும் போற்றப்படும்                                                 

 சூரரின் வீரியம் கூடும் மேன்மை பெருகும்                                                                

நம் ஆரியர் உலகத் தலைமை கொள்வர்

என்றல்லவா இப்படி தர்ம பாரதம் விளங்கும்!

ஆனால் துருக்கர் விதைத்த மருள் இன்னும் இந்த நாட்டை விட்டு நீங்காமல் இருப்பது நமது தவத்தின் குறைவே ஆகும்!

இந்தக் கவிதையின் குறிப்பில் மகாகவி ஹிந்துக்களும் மகமதியர்களும் ஒரு தாய் வயிற்றுக் குழந்தைகள் போல நடந்து கொள்ள வேண்டுமென்பதை பலமுறை வற்புறுத்தியுள்ளதை நினைவு கூர்கிறார்.

சிவாஜி கூறியுள்ள வீர வசனங்களை நியாயப் படுத்தும் விதமாக மகாகவி பாரதியார் இந்தக் குறிப்புரையில் கூறியுள்ளதை அடுத்த கட்டுரையில் பார்ப்போம்.

அத்தோடு அதர்மத்தின் கோரப் பிடியில் ஹிந்து சொத்துக்கள் கொள்ளை போன விவரத்தையும் ஒரு சிறிது நோக்குவோம்.

இதைப் படிக்கும் நேயர்கள் 190 வரிகள் கொண்ட இந்தக் கவிதையை ஒரு முறை படித்து கவிதை கூற வரும் பாரத சக்தியைத் தம்முள் ஏற்றிக் கொண்டால் இனி  வருவதை நன்கு படிக்க ஏதுவாகும்.

                                      –தொடரும்

(Picture from face book: Ramapriya ramanuja dasi)

தமிழ் திரைப்படங்களில் ராமர் – 2

by ச.நாகராஜன்

Post No 1635; Dated 9th February 2015

ஒரு வில், ஒரு சொல், ஒரு இல்!

தமிழர் தம் நீண்ட வரலாற்றை எடுத்துக் கொண்டு பார்த்தால், ராமர் தமிழ் குடும்பங்களின் பின்னணியாகத் திகழ்வது தெரியவரும். அவர் கால் படாத இடம் தமிழ்நாட்டில் இல்லை என்னும் அளவுக்கு பல தல புராணங்கள் அவரது பெருமையைச் சுட்டிக் காட்டுகின்றன. இராமேஸ்வரத்தில் சேது அமைத்து இராவணனை வதம் செய்த அவரை தமிழ்க் குடும்பங்கள் வழிபட்டு வருவதில் ஆச்சரியப்படுவதற்கு ஒன்றுமில்லை.

ஒரு வில், ஒரு சொல், ஒரு இல் என்றே அறநெறி கொண்டவன் அவன்.

துஷ்டர்களுக்கு ஒரே பாணம் – ஒரு வில்!

சரணம் என்று வந்தோர்க்கு அபயம் என்ற வாக்கு – ஒரு சொல்!

ஜென்மம் முழுவதும் இணைந்து வாழ ஒரு மனைவி – ஒரு இல்!

இது தான் அவனது அறநெறி.

Vishnu with Sridevi and Bhudevi

ராமர் போல துஷ்டர்களிடமிருந்து என்னைக் காத்து, அபயம் என உன்னையே கரம் பிடிக்கும் என்னைப் போற்றி நேசித்து, வாழ்நாள் முழுவதும் என் ஒருத்தியுசடனேயே வாழ வேண்டும் என்ற முப்பெரும் நெறிகளைச் சுட்டிக் காட்டி அதையே நான் விழைகிறேன் என்பதைப் பாடல் மூலம் சொல்ல வேறு எந்த ஒரு சந்தர்ப்பம் தான் கிடைக்கும், ஒரு பெண்ணுக்கு!

ஆக, பெண் பார்க்கும் படலத்தில் ராமரைப் பற்றிப் பாடுவது சரியானது தான் என கவிஞரும், பட இயக்குநரும், வசனகர்த்தாவும் நினைத்திருந்தால் அது சரிதானே!

இந்த வகையில் ராமர் எத்தனை ராமனடி பெண்களின் மனதைக் கவர்ந்த ஒரு பாடல் என்றால் அதில் வியப்பதற்கு என்ன இருக்கிறது?

Sita in Asoka Vana in Sri Lanka

ராஜாராமனும் சீதாராமனும்

இதை இயற்றிய சம்பவம் பற்றி கவிஞர் கண்ணதாசன் குறிப்பிடுகையில், “உத்தரகாண்டத்தில் ராஜாவான ராமனின் ஆணைப்படி சீதையைக் காட்டில் விட்டு விட்டு அயோத்திக்குத் திரும்பி வந்த லட்சுமணன் மாளிகையில் ராமர் அழுது கொண்டிருப்பதைப் பார்த்து வியந்து, நீங்கள் தானே சீதையைக் காட்டில் விட ஆணையிட்டீர்கள், பின் அழுவது ஏன் என்று கேட்க, ராமர், “அப்படி ஆணையிட்டது ராஜாராமன், இப்போது அழுவது சீதாராமன்” என்று ராமர் பதில் சொல்கிறார். இதைப் படித்து உத்வேகம் பெற்று ராமர் எத்தனை ராமரடி பாடலை இயற்றினேன்” என்று சொன்னாராம்!

வசந்தத்தில் ஓர் நாள்

ஆக இந்த வகையில் இன்னும் ஒரு பெண் பார்க்கும் படலத்தில் வரும் ஒரு பாடலைப் பார்ப்போம். படம் மூன்று தெய்வங்கள். வெளியான ஆண்டு 1971. படத்தை இயக்கியவர் தாதா மிராஸி. பாடலைப் பாடியவர் பி.சுசீலா. இசை அமைத்தவர் எம்.எஸ்.விஸ்வநாதன். இயற்றியதோ கவிஞர் கண்ணதாசன் தான்! ராகம்:தர்பாரி கானடா

பாடலைப் பார்ப்போம்:

வசந்தத்தில் ஓர் நாள் மணவரை ஓரம் வைதேகி காத்திருந்தாளோ தேவி
 வைதேகி காத்திருந்தாளோ              வசந்தத்தில் ஓர் நாள் மணவரை ஓரம் வைதேகி காத்திருந்தாளோ தேவி
 வைதேகி காத்திருந்தாளோ  வைதேகி காத்திருந்தாளோ

மையிட்ட கண்ணோடு மான் விளையாட           மௌனத்தில் ஆழ்ந்திருந்தாளோ தேவி
                                தேவர்கள் யாவரும் திருமண மேடை அமைப்பதை பார்த்திருந்தாளோ தேவி

திருமால் பிரம்மா சிவன் எனும் மூவர்                        காவலில் நின்றிருந்தாளோ தேவி
                                     காவலில் நின்றிருந்தாளோ தேவி
         வைதேகி காத்திருந்தாளோ

வசந்தத்தில் ஓர் நாள் மணவரை ஓரம் வைதேகி காத்திருந்தாளோ தேவி
வைதேகி காத்திருந்தாளோ

பொன்வண்ண மாலை ஸ்ரீராமன் கையில்
       பொன்வண்ண மாலை ஸ்ரீராமன் கையில்
                                மூவரும் கொண்டுத் தந்தாரோ அங்கே

       பொங்கும் மகிழ்வோடு மங்கல நாளில்
                              பொங்கும் மகிழ்வோடு மங்கல நாளில்
                              மங்கையை வாழ்த்த வந்தாரோ

அங்கே
  சீரோடு வந்து சீதனம் தந்து சீதையை வாழ வைத்தாரோ தேவி

    தேவி வைதேகி காத்திருந்தாளோ

வசந்தத்தில் ஓர் நாள் மணவரை ஓரம் வைதேகி காத்திருந்தாளோ
          தேவி வைதேகி காத்திருந்தாளோ
தேவி வைதேகி காத்திருந்தாளோ

Sugreeva – Vali fighting

காட்சி அமைப்பு அந்தக் காலப் படப்பிடிப்பின் படி மிக பிரமாதமாக அமைந்திருந்தது. நாகேஷ் பிரம்மா. சிவாஜிகணேசன் விஷ்ணு. முத்துராமன் சிவன். அவர்கள் மலையைத் தொட்டுத் தர சிவகுமார் மாலையை சந்திரகலாவிற்கு அணிவிப்பதாக காட்சி அமைகிறது.பாடலைப் படத்தில் பாடுபவர் சந்திரகலா. அந்தக் காலத்தில் தெலுங்கு, கன்னடம், தமிழ், ஹிந்தி என  பல மொழிப் படங்களிலும் கொடி கட்டிப் பறந்தவர். பாடல் காட்சியின் பின்னணியில் தேவ லோகக் காட்சிகள் இடம் பெறுகின்றன. குணசித்திர நடிகரான எஸ்.வி.சுப்பையா, வி.எஸ்.ராகவன் என காட்சி களை கட்டுகிறது.

ராமரைப் பாடலில் கொண்டுள்ள திரைப்படங்களில் மூன்று தெய்வங்களும் ஒன்று.

-தொடரும்.

கட்டுரையை எழுதியவர் :– லண்டன் சுவாமிநாதன்
ஆராய்ச்சிக் கட்டுரை எண்- 1474; தேதி 11 டிசம்பர், 2014.
Today is Bharathyar’s Birth Day

அமிழ்தம் அமிழ்தம் என்று கூவுவோம்—நித்தம்
அனலைப் பணிந்து மலர் தூவுவோம்
தமிழில் பழமறையைப் பாடுவோம்—என்றும்
தலைமை பெருமை புகழ் கூடுவோம்

பாரதியார் ஒரு தீர்க்கதரிசி. அவர் சொன்னதெல்லாம் நடந்து வருகிறது. சந்திரமண்டலத்தியல் கண்டு தெளிவோம் என்றார். நாம் சந்திரனுக்கு விண்கலம் அனுப்பி வெற்றி கண்டு விட்டோம். சிங்களத் தீவினுக்கோர் பாலம் அமைப்போம் என்றார். இன்னும் ஐம்பது ஆண்டுகளுக்குள் இலங்கைக்கு சாலைப் பாலம் அமைத்து விடுவோம். எல்லோரும் அமர நிலை எய்தும் நன்முறையை இந்தியா உலகிற்களிக்கும் என்றார். நாம் வல்லரசு ஆகும் காலம் வெகுதூரத்தில் இல்லை. அப்போது நாம் சொல்வதை எல்லோரும் கேட்பர்.

தேமதுரத் தமிழ் ஓசை உலகமெலாம் பரவும் வகை செய்தல் வேண்டும் என்றார். இன்று உலகெங்கும் தமிழ் பள்ளிகளும் தமிழ் சங்கங்களும் தமிழ் கோவில்களும் உள. சொல்லில் உயர்வு தமிச் சொல்லே அதை தொழுது படித்திடடி பாப்பா என்றார். இன்று தமிழ் மொழி செம்மொழியாக் கப்பட்டுவிட்டது. மறைவாக நமக்குள்ளே பழங்கதைகள் பேசுவதிலோர் மகிமை இல்லை. திறமான புலமை எனில் வெளிநாட்டோர் அதை வணக்கம் செய்தல் வேண்டும் என்றார். இன்று இந்தியர்கள் திறமையை உலகமே கண்டு வியந்து பெரிய பதவிகளைக் கொடுத்து உயர்ந்த சம்பளத்தில் அமர்த்தியுள்ளது.

தமிழில் பழமறையைப் பாடுவோம், வேதம் என்றும் வாழ்கவென்று கொட்டு முரசே என்றும் பாடினார். வேதத்தின் பெருமைதனை உலகம் போற்றத் துவங்கிவிட்டது. அவர் எதை எதை எல்லாம் மற்றவர்கள் செய்ய வேண்டும் என்று எதிர் பார்த்தாரோ அதைத் தானே செய்தும் காட்டினார்.
அவர் பாடல்களில் நிறைய வேத மந்திரங்கள் மொழிபெயர்க்கப்பட்டுள்ளன. இதோ சில எடுத்துக் காட்டுகள்:

அயம்லோகாஹா ப்ரியதமஹ = அனைத்திலும் இனியது இவ்வுலகம் என்று அதர்வ வேதம் கூறுகிறது. இதை உலகு இன்பக் கேணி என்று மொழி பெயர்த்தார்:
ஒன்று பரம்பொருள் நாம் அதன் மக்கள்
உலகின்பக் கேணி என்றே – மிக
நன்று பல்வேதம் வரைந்த கை
பாரத நாயகி தன் திருக் கை — என்று பாடினார்.

ஏகம் சத் விப்ராஹா பஹூதா வதந்தி = உண்மை ஒன்றே; அறிஞர்கள் அதைப் பலவாறாகப் புகல்வர் – என்று கடவுள் ஒருவரே என்று ரிக் வேதம் சொன்னதையும் மேற்கூறிய வரிகளில் காணலாம்.

இந்துக்கள் பிள்ளையாரைத் தொழாமல் எந்தக் காரியத்தையும் செய்யமாட்டார்கள். சுக்லாம் பரதரம் என்று மந்திரத்தைச் சொல்லித் தலையில் குட்டிக் கொண்டு அமிர்த தாரை விழும் இடத்தில் ‘’அக்யூபிரஸ்ஸர்’’ கொடுத்துவிட்டுத்தான் எல்லா பூஜைகளையும் தொடங்குவர்.. அதை அவர் அழகிய தமிழில்
வெள்ளாடை தரித்த விட்டுணு என்று செப்பிய மந்திரத் தேவனை
=சுக்லாம் பரதரம் விஷ்ணும் சசிவர்ணம் என்று சொல்கிறார்.

இப்பொழுது எல்லா இந்துக்களுக்கும் ஓம் பூர் புவஸ்ஸுவஹ தத் சவிதுர் வரேண்யம், பர்கோ தேவஸ்ய தீமஹீ என்ற காயத்ரி மந்திரம் தெரியும். இதை அவர் அழகிய தமிழில்
“செங்கதிர்த் தேவன் சிறந்த ஒளியினைத் தேர்கின்றோம்—அவன்
எங்கள் அறிவினைத் தூண்டி நடத்துக” — (காயத்ரி மந்திரம்)
என்று மொழி பெயர்த்தார். சம்ஸ்கிருதம் தெரியாதவர்களும் இந்தத் தமிழ் மந்திரத்தைச் சொன்னால் அறிவு தெளிவு பெறும். நினைத்ததெல்லாம் கைகூடும்.

தர்மம் சர, சத்யம் வத, ……….. என்று தைத்ரீய உபநிஷத் சொல்கிறது. அதைத் தூய தமிழில்,

வேத வானில் விளங்கி, ‘அறம் செய்மின்
சாதல் நேரினும் சத்தியம் பூணுமின்
தீதகற்றுமின் என்று திசை எல்லாம்
மோத நித்தம் இடித்து முழங்கியே — என்று மொழி பெயர்த்தார்.

பிருஹத் ஆரண்யக உபநிஷதத்தில் வரும் புகழ் பெற்ற
அசதோ மா சத் கமய
தமஸோ மா ஜ்யோதிர் கமய
ம்ருத்யோர் மா அம்ருதம் கமய — என்ற மந்திரத்தை
இருளை நீக்கி ஒளியினைக் காட்டுவாய்
இறப்பை நீக்கி, அமிர்தத்தை ஊட்டுவாய் — என்று அற்புதமாக மொழிபெயர்த்துள்ளார்.

பாரதியாரின் பாடலில் அதர்வ வேதத்தின் தாக்கத்தை அதிகம் காணமுடிகிறது.
கண்ணம்மா என் காதலி – என்ற பாடலில்
பாயும் ஒளி நீ எனக்கு, பார்க்கும் விழி நான் உனக்கு
தோயும் மது நீ எனக்கு, தும்பியடி நான் உனக்கு
வீணையடி நீ எனக்கு, மேவும் விரல் நான் உனக்கு
பூணும் வடம் நீ எனக்கு, புது வயிரம் நான் உனக்கு
வான மழை மது நீ எனக்கு, வண்ண மயில் நான் உனக்கு
பானம் அடி நீ எனக்கு, பாண்டமடி நான் உனக்கு

என்பதெல்லாம் அதர்வண வேத (14-2-71) கல்யாண மந்திரத்தின் பாணியில் இருக்கிறது:

இதே போல சக்திக்கு ஆத்ம சமர்ப்பணம் என்ற கவிதையில் கை முதல் துவங்கி ஒவ்வொரு அங்கத்தையும் இறைவன் பணியில் பயன்படுத்துவது அதர்வண வேத (19-60) மந்திரத்தின் பாணியில் இருக்கிறது:

ஈசாவாஸ்யம் இதம் சர்வம் யத் கிஞ்ச ஜகத்யாம் ஜகத் — என்ற ஈசாவாஸ்ய உபநிஷத வாக்கியம்
துச்சமெனப் பிறர் பொருளைக் கருதலாலே
சூழ்ந்ததெல்லாம் கடவுள் எனச் சுருதி சொல்லும்
என்ற வரிகளில் காணலாம்

இப்படி பாரதி பாடல் முழுதும் வேத முழக்கத்தைக் காணலாம். அவர் பாடியதெல்லாம் வேத மந்திரம் போன்ற சக்தியுடையவை. ஏனெனில் உள்ளத்தில் ஒளி உண்டாகில் வாக்கினிலே ஒளி உண்டாகும் என்று அவரே பாடி வைத்துள்ளார். பாரதி பாடலை நேரம் கிடைக்கும் போதெல்லாம் படியுங்கள் உங்கள் உடலிலும், வீட்டிலும் பாசிட்டிவ் வைப்ரேஷன்ஸ் பரவுவதைக் காண்பீர்கள்.

இதோ அவர் எடுத்தாண்ட சில வேத மந்திரங்கள்:
ஜீவா ஜ்யோதிர் அஸுமஹி – ரிக்வேதம்
பொருள்:- அறிவொளி துலங்க நாம் வாழ்வோம்.

ஸர்வ ஆஷா மம மித்ரம் பவந்து
எட்டு திக்கும் என் நண்பர் குழாம் ஆகட்டும் (அதாவது யாதும் ஊரே, யாவரும் கேளிர்)
ஆநோ பத்ராஹா ருதவோ யந்து விஸ்வதஹ – ரிக் வேதம்
அனைத்து திசைகளில் இருந்தும் உயர்ந்த எண்ணங்கள் எங்களை வந்தடைவதாகுக.

அதர்வ வேத மந்திரம் : மணமகளிடம் சொல்கிறான்:–
நம் இருவர் பார்வையும் இனிதாகட்டும்
நம்முடைய முகத்தில் நல் இணக்கம் பிரதிபலிக்கட்டும்
உன் இதயத்தில் எனக்கு இடம் கொடு
நாம் ஈருடல், ஓருயிர்

மணமகள் சொல்கிறாள்:–
இதோ இந்த ஆடையால் உன்னைப் போர்த்துகிறேன்
இது மனுவிடம் இருந்து வந்தது
நீ எனக்கு மட்டுமே சொந்தம் ஆவாயாக
மற்ற எந்தப் பெண்ணையும் புகழாதே
–அதர்வ வேதம் 7-36/37

ஓ இந்திரனே! இந்தப் பெண்ணையும் ஆணையும்
சக்ரவாகப் பறவைகள் போல சேர்த்து வைப்பாயாக
நல்ல வீட்டில் சுகமாக வசித்து
குழந்தைகளுடன் முழு வாழ்வு வாழட்டும்

நான் இது, நீ அவள்
நான் பாட்டு, நீ கவிதை
நான் வானம் நீ பூமி
நாம் இருவரும் கூடி வாழ்வோம்
குழந்திகளுக்கு பெற்றோர் ஆஅவோம்
–அதர்வ வேதம் 14-2

என்னுடைய முந்தைய பாரதி பற்றிய கட்டுரைகள்:
1.மனம் ஒரு பெண், மனம் ஒரு புலி (Posted on 17-2-2014)
2.Quotes from the Greatest Tamil Poet Bharati (11-12-2013)
3.வாழ்க்கையில் வெற்றி பெற பாரதி அட்வைஸ் 10-12-2013
4.பாரதியுடன் 60 வினாடி பேட்டி (16-1-2012 & 10-9-2014)
5.பாரதியின் பேராசை (Posted on 27-12-2012)
6.பாரதி பாட்டில் பகவத் கீதை (Posted on 10-12-2012)
7.பேய்கள் பற்றி பாரதி & விவேகாநந்தர் (Posted on 29-11- 2012)
8.சொல்லில் உயர்வு தமிழ்ச் சொல்லே (Posted on 10-9-2012)
9.பாரதி பாட்டில் பழமொழிகள் (Posted on 25-6-2012)
10.உங்களுக்கு வள்ளுவனையும் பாரதியையும் தெரியுமா? (27-3-2014)
11.காலா என் காலருகே வாடா! ஞானிகளின் ஞானத் திமிர் (23-3-2014)
12.ஆரிய பாரதி வாழ்க (செப் 10, 2014)