WRITTEN BY S NAGARAJAN
Post No. 10,446
Date uploaded in London – – 15 DECEMBER 2021

Contact – swami_48@yahoo.com
Pictures are taken from various sources for spreading knowledge;
this is a non- commercial blog. Thanks for your great pictures.
tamilandvedas.com, swamiindology.blogspot.com

திரு அருட்பிரகாச வள்ளலார் – 2
ச.நாகராஜன்

கூடலூர் அப்பாசாமி செட்டியார் வீட்டில் ஒரு சமயம் சுவாமிகள் ஒரு அறையில் இருந்தார். அப்போது ஒரு மனிதர் தங்கு தடையின்றி உள்ளே நுழைந்து சுவாமிகள் இருந்த அறைக்குள் சென்றார். அவரை எங்கேயும் காணாததால் சுவாமிகளை வினவ, “அவர் ஒரு சித்தர். என்னைக் காண வந்தார். இந்நேரம் காசியில் இருப்பார். இதோ அவர் கொடுத்த லட்டு” என்றார் சுவாமிகள்.

அன்பர்களின் வேண்டுகோளுக்கிணங்க அவ்வப்பொழுது இரும்பு, ஈயம், செம்பு ஆகிய உலோகங்களைத் தங்கமாக மாற்றிக் காண்பிப்பார் சுவாமிகள். பின்னர் யாரும் அதை எடுக்காதபடி கேணிகளிலும் குளங்களிலும் எறிந்து விடுவார். அவருடனேயே இருந்த வேம்பையர் என்பவர் சுவாமிகள் உலோகங்களை மாற்றும் விதத்தையும் அதற்கென அவர் கொண்டிருந்த பொருள்களையும் நன்கு கவனித்து வந்தார். அந்தப் பொருள்களைச் சேகரித்து தானும் மற்ற உலோகங்களைத் தங்கமாக மாற்ற முயன்றார். அவர் கண் பார்வை உடனே மங்கி ஒளியை இழந்தது. என்ன செய்தும் கண் பார்வை வரவில்லை. சுவாமிகளிடம் வந்து தான் செய்த தவறை ஒளிக்காமல் சொல்லி மன்னிப்பு வேண்டினார் அவர். சுவாமிகள் நீரை எடுத்து அவர் கண்ணில் பூசவே கண்ணொளி அவருக்கு மீண்டது.

விருத்தாசலத்தில் வசித்து வந்தவர் வேங்கடேச ஐயர் என்பவர். அவர் ஒரு வக்கீல். ஞாயிற்றுக்கிழமைகளில் சுவாமிகள் ஆற்றும் பிரசங்கங்களுக்குத் தவறாமல் வருகை புரிந்து அதைக் கேட்டு முடிந்த பின்னர் இரவு நேரத்தில் மூன்று மைல் தூரமுள்ள காட்டுப் பாதையைக் கடந்து அவர் ஊர் திரும்புவது வழக்கம். காட்டுப் பாதையில் செல்லும் போது அவர் முன்னர் (ஆள் யாரும் இல்லாமல்) இரு தீவட்டிகள் மட்டும் போய்க் கொண்டிருக்கும். அதை ஏந்துபவர் யாரும் இருக்க மாட்டார்கள். சுவாமிகளின் அருட்செயலே இது என்பதை உணர்ந்த ஐயர் வடலூருக்கு வந்து அங்கேயே தங்கி சுவாமிகளின் பூரண அருளுக்குப் பாத்திரர் ஆனார்.

சுவாமிகளின் சத்திய தரும சாலையில் ஒரு நாள் இரவு திடீரென்று நூறு பேர் வந்து சேர்ந்தனர். சமையல் எல்லாம் முடிந்து அனைவரும் உண்ணும் தருணம் அது. என்ன செய்வது என்று அனைவரும் தவித்தனர். ‘பிச், இலை போடுங்கள் எல்லோருக்கும்’ என்று கூறிய சுவாமிகள் தானே அனைவருக்கும் பரிமாற ஆரம்பித்தார். இருந்த உணவு நூறு பேருக்கும் போதுமானதாக இருந்தது. அனைவரும் திருப்தியுடன் உண்டனர்.

வடலூரில் ஒரு சமயம் மழை இல்லாமல் போனது. அனைவரும் வருந்துவதைக் கண்ட சுவாமிகள் நன்கு மழை பொழிய அனுக்கிரகித்தார். அதே போல புதுப்பேட்டையைச் சேர்ந்தவர்கள் சுவாமிகளை தங்கள் ஊருக்கு அழைத்துச் சென்று அங்கிருந்த இரண்டு கிணறுகளிலும் நீர் இன்மையைச் சொல்லி அருள் புரிய வேண்டினர். சுவாமிகள் அனுக்கிரகம் செய்தார். உடனே இரு கிணறுகளும் நிரம்பியதோடு அவற்றின் நீரும் இனிமையானது. அந்தக் கிணறுகள் இன்று வரை வற்றவில்லை என்பது குறிப்பிடத்தகுந்தது.

ஒரு இரவில் சுவாமிகளும் மஞ்சக்குப்பம் கோர்ட்டு சிரஸ்தார் இராமச்சந்திர முதலியாரும் ஒரு மாட்டு வண்டியில் ஏறி வடலூரிலிருந்து மஞ்சக்குப்பம் சென்று கொண்டிருந்தனர். வழியில் சில கள்வர்கள் வண்டியை மறித்தனர். முதலியார் கையிலிருந்த வைர மோதிரத்தைக் கழட்டுமாறு அவர்கள் அதட்டினர். சுவாமிகள் அக்கள்வரை நோக்கி ‘அவசரமோ’ என்றார். அவரை அடிக்க கள்வர் கையை ஓங்க, ஓங்கிய கைகள் அப்படியே நின்றன. அவர்களின் கண் பார்வையும் போனது. பின்னர் அவர்கள் சுவாமிகளிடம் மன்னிக்குமாறு வேண்ட ‘பிச்’ என்னும் மகா மந்திரத்தை சுவாமிகள் கூறினார். இழந்த பார்வையை மீண்டும் பெற்ற கள்வர்கள் அன்று முதல் களவுத் தொழிலை விட்டு விட்டு சன்மார்க்க நெறியில் நின்றனர்.

குறிஞ்சிப்பாடியில் உள்ள வணிகர் ஒருவர் வடலூர் நோக்கி வந்து கொண்டிருந்தார். ஜலங்கழிக்க மறைவில் ஒதுங்கும் போது புற்றரவு ஒன்று அவரைத் தீண்டி விட்டது. உடனே அவர் “இராமலிங்கத்தின் மீது ஆணை” என்று கூறவே அப்பாம்பு புற்றில் நுழையாமல் அப்படியே நின்று விட்டது. அதை அவர் கவனியாமல் பயந்து அங்கிருந்து விரைவாக அகன்று வீடு போய்ச் சேர்ந்தார். விஷம் அவரை ஒன்றும் செய்யவில்லை. பின்னர் அவர் வடலூர் வந்து சுவாமிகளை தரிசனம் செய்த போது, “அட, பிச்! ஒரு உயிரை எத்தனை நாள் தான் பட்டினி போடுகிறது?! மூன்று நாட்கள் ஆயிற்றே. உடனே போய் ஆணையை விடுதலை செய்யும்!” என்றார் சுவாமிகள். வியப்படைந்த அந்த வணிகச் செட்டியார் உடனே பாம்பு இருந்த இடத்திற்கு விரைந்தார். அங்கு புற்றின் வாயிலில் பாம்பு பரிதாபமாக படுத்துக் கிடந்தது. செட்டியார் ஆணையை விடுதலை செய்ய பாம்பு புற்றுக்குள் நுழைந்தது.

சுவாமிகளின் அன்புக்கு பாத்திரமான தேவநாயகம் பிள்ளை என்பவரின் ஒரே புதல்வரான ஐயாசாமி என்பவர் நோய்வாய்ப்பட்டார். இருபது வயதே ஆன அவரை வைத்தியர்கள் கை விட்டு விட்டனர். அவர் ‘ஒ’வென்று அரற்றி சுவாமிகளை நினைத்துப் பிரார்த்தனை செய்தார். அன்று இரவே 11 மணிக்குப் பின்னர் அவர் இல்லம் வந்து சேர்ந்த சுவாமிகள் அவருக்கும் புதல்வருக்கும் திருநீறு கொடுத்து அருளி, “நாளை குணமாகும்” என்றார். மறு நாள் வியாதி குணமானது.

ஆனால் அவர் தேவநாயகம் வீட்டில் இருந்த அதே சமயம் வடலூர் சத்திய தரும சாலையில் சுவாமிகள் உபந்யாசம் செய்த வண்ணம் இருந்திருக்கிறார். இது பின்னால் தெரிய வர அனைவரும் இரு இடங்களில் ஒரே சமயத்தில் அவர் இருந்ததை எண்ணி பிரமித்தனர்.

ஒரு நாள், வெளியே சென்ற சுவாமிகள் வரவில்லையே என்று எண்ணிய வேலூர் சண்முகம் பிள்ளை என்பார் சாலையை விட்டு வெளியே போய்ப் பார்த்தார். அங்கே சுவாமிகளுடைய அங்கங்கள் எல்லாம் தனித்தனியே கிடந்தன. ஐயோ என்று அலறி அந்த அன்பர் புலம்பித் தவித்த வேளையில் சுவாமிகள் திடீரென்று அவர் கண் முன்னே தோன்றினார்., “இனி நீர் இது மாதிரி வந்து பார்க்காதீர்” என்று அவரை சுவாமிகள் எச்சரித்தார். அவரும் மகிழ்ச்சியுடன் சுவாமிகளைப் பின் தொடர இருவரும் சத்திய தரும சாலையை அடைந்தனர்.
* தொடரும்

tags- வள்ளலார் – 2,

WRITTEN BY LONDON SWAMINATHAN
Post No. 10,445
Date uploaded in London – – 14 DECEMBER 2021

Contact – swami_48@yahoo.com
Pictures are taken from various sources for spreading knowledge.
this is a non- commercial blog. Thanks for your great pictures.
tamilandvedas.com, swamiindology.blogspot.com

கரிகால் சோழன் வைத்திருந்த பருந்து வடிவ யாக குண்டம் பற்றியும் அவன் ரிக் வேதத்தில் சொன்னபடி 7 அடிகள் நடந்து சென்று நண்பர்களை வழி அனுப்பினான் என்றும் முடத்தாமக்கண்ணியார் என்ற சங்க காலப் புலவர் பொருநர் ஆற்றுப்படையில் பாடியிருப்பதை 2012ம் ஆண்டு இங்கே எழுதினேன்.
பின்னர் பாணினியும் இதையே இலக்கண சூத்திரத்தில் 2700 ஆண்டுகளுக்கு முன்னரே சுட்டிக் காட்டி இருப்பதையும் 2020ம் ஆண்டுக்கு கட்டுரையில் குறிப்பிட்டேன் (பழைய கட்டுரைகளின் இணைப்புகளைக் கீழே காண்க)
இப்போது புதிய விஷயம் என்னவென்றால் இது அதர்வண வேதத்திலும் உளது; ரிக் வேதத்தில் உள்ள நிறைய மந்திரங்கள் சிற்சில மாற்றங்களுடன் அதர்வண வேதம் முழுதும் விரவிக்கிடப்பதைக் காணலாம். பொருநர் ஆற்றுப்படையில் செப்பிய இந்த 7 அடி நட்பு விஷயம் ,இதோ அதர்வண வேத துதியில் :–

காண்டம் 5, துதி 11; சூக்தம் 153- வினா விடை
இந்தக் கவிதை உரையாடல் வடிவில் அமைந்துள்ளது. இதில் ‘7 அடி’ விஷயம் தவிர ‘வளி வழங்கு மாஞாலம்’ (atmosphere) என்ற அறிவியல் செய்தியும் உளது. இதை புறநானூற்றுப் புலவரும் எடுத்தாண்டுள்ளார் .

இந்த துதியில் மந்திரம் 9, மந்திரம் 10 ஆகியவற்றில் ‘7 அடி விஷயம்’ வருகிறது :–

மந்திரம் 9
வருணனை நோக்கி அதர்வன் சொல்கிறான்- எல்லா மானிடர் இடையே , திசைகளின் நடுவே உனது உயரிய தோத்திரங்கள் வருக ; நீ எனக்கு கொடுக்காமல் வைத்திருக்கும் பொருளை எனக்கு இப்போது அளி ; நீ எனக்கு நெருங்கிய 7 அடி நண்பன் நம்மிடையே நிலவும் ஒரே நெருக்கம்- பிணைப்பு நம்மை ஒன்று சேர்க்கட்டும் .
மந்திரம் 10- வருணன் பதில்
நம்மிடையே உள்ள ஒரே பிறப்பு – ஒரே பிணைப்பு நம்மை இணைப்பதை நான் அறிவேன் ; நான் உன்னுடைய நிரந்தர, உறுதியான நண்பன்; ஆகையால் கொடுப்பதாகச் சொல்லி, பின்வாங்கிய நான், அந்தப் பரிசை இப்போது அளிக்கிறேன்

இது போன்ற சுமார் 20 உரையாடல் கவிதைகள் (Dialogue Poems) உலகின் மிகப் பழமையான ரிக் வேதத்திலும் உளது . அவை, யாக யக்ஞங்கள் முடிந்தவுடன் நடித்துக் காண்பிக்கப்பட்டன; உலகில் , நாட்டிய நாடகம் தோன்றியது நமது நாட்டில்தான். உலகில் நடராஜர் போலவும், மஹா காளி போலவும் dance டான்ஸ் ஆடும் கடவுளர் வேறு எங்கும் கிடையாது .

இந்தப் பாடலைப் பற்றி ஒரு கதை வழங்கி வருகிறது; முதலில் அதர்வனுக்கு வருணன், ஒரு புள்ளிகள் மிக்க ஒரு பசு அளித்தார் ; பின்னர் அதை திரும்ப அழைத்துக் கொண்டார். அப்போது நடந்த உரையாடலே இந்தக் கவிதை .
xxx
புற நானூற்றில் காற்று மண்டலம் (Atmosphere)
பூமியைச் சுற்றி மட்டுமே காற்று மண்டலம் (atmosphere) உண்டு என்பதை தற்கால விஞ்ஞானம் கூறியது. 2000 ஆண்டுகளுக்கு முன்னர் புறநானூற்றில் தமிழர்கள் அதை விண்டுரைத்தனர். ஆனால் அதற்கும் சில ஆயிரம் ஆண்டுகளுக்கு முன்னரே அதர்வண வேத ரிஷி பாடிவிட்டார்

‘வளி வழங்கு திசையும்’ என்று குறுங்கோழியூஊர் கிழாரும் – பாடல் 20; ‘வளி இடை வழங்கா வானம் சூடிய’ என்று வெள்ளைக்குடி நாகனாரும் — பாடல் 36- காற்று மணடலம் பற்றிப் பாடினார்கள். அதற்கு அப்பால் என்ன என்பதைப் பாடவில்லை ; அதையும் பாடுகிறார் வேத காலப் புலவர்

மந்திரம் 5
வருணனே ! உன்னை நீயே நிர்வகித்துக் கொள்ளும் திறமைசாலியே! புத்திசாலி இயக்குனரே! எல்லா பரம்பரைகளையும் நீ அறிகிறாய்.
பிழை அறியாப் பெருமானே! இந்த பிராந்தியத்துக்கும் அப்பால் எது உளது ? மிகத் தொலைவில் உள்ளதிற்கும் அப்பால் தூரத்தில் எது உளது?

மந்திரம் 6
வருணன் பதில்
இந்த வளி மண்டலத்துக்கு அப்பால் ஒன்றுள்ளது ; அதைத் தாண்டியும் ஏதோ இருக்கிறது ; அடைவதற்கு மிகக் கடினமாமனது; அவ்வளவு தூரம்! வருணனான நான் அதை அறி ந்து உனக்கு அறிவிப்பேன்;
ஈகைக் குணமற்ற பாணிகள் (Miserly Baniya= Phoenicians) கீழே செல்லட்டும்; அதற்கும் கீழே தாசர்கள் செல்லட்டும்
xxx
இந்த மந்திரங்களுக்கு 125 ஆண்டுகளுக்கு முன்னர் அடிக்குறிப்பு எழுதியோர் கூறியதாவது –

Ralph T H Griffith க்ரிப்பித் சொல்வது-
“வளி மண்டலத்து அப்பால் சுவர்க்கம் (Heaven) உள்ளது; அதற்கப்பால் முடிவே இல்லாத மண்டலம் (Infinity) .
இந்த வினா- விடைப் பகுதி தெளிவற்று உள்ளது.”

Muir முயர் , என்பவர் சொல்லுவது –
“வளி மண்டலத்துக்கு அப்பால் என்ன இருக்கிறது? மிகத் தொலைவில் உள்ளத்திற்கும் முன்னால் என்ன இருக்கிறது? தவறு இழைக்காதவனே சொல்!
வளி மண்டலத்துக்கு அப்பால் ஒன்று இருக்கிறது; அதற்கு முன்னால் பக்கத்தில் வேறு ஒன்று இருக்கிறது. அதை அணுகமுடியாது”

125 ஆண்டுகளுக்கு முன்னர் வேதத்தை மொழிபெயர்த்தவர்களே இவ்வளவு விஞ்ஞான விஷயங்களை வேத குறிப்புகளில் எழுதி வைத்துள்ளனர் .
அதர்வண வேதத்தில் உள்ள மூலிகை மற்றும் விஞ்ஞான விஷயங்களை ஆராய ஒரு தனி மகாநாடு கூட்டுவது அவசியம்!

MY OLD ARTICLES :- —-

கரிகால் சோழனின் பருந்து வடிவ யாக குண்டம்https://tamilandvedas.com › கரிக…· 

18 Jan 2012 — சங்கத் தமிழ் நூல்கள் சங்க கால மன்னர்கள் செய்த பல அபூர்வ யாகங்கள் குறித்து …

பாணினியும் கரிகால் சோழனும் (Post No.8888)https://tamilandvedas.com › பாண…· 

4 Nov 2020 — கரிகாலன் பற்றிய அதிசய விஷயங்கள் என்ன? 1.கரிகால் சோழன், பருந்து வடிவ யாக குண்டம் ..

கரிகால் சோழனின் பருந்து வடிவ யாக குண்டம்https://tamilandvedas.com › கரிக…· Translate this page
18 Jan 2012 — கரிகால் சோழன் வேத நெறி தவறாது ஆண்டவன். 2000 ஆண்டுகளுக்கு முன் ஆண்ட இவன் சோழ …

பாணினியும் கரிகால் சோழனும் (Post No.8888)https://tamilandvedas.com › பாண…· Translate this page
4 Nov 2020 — 18 Jan 2012 — கரிகால் சோழன் வேத நெறி தவறாது … 2000 ஆண்டுகளுக்கு முன் ஆண்ட இவன் சோழ …

–subham–

TAGS- ஏழு அடி நட்பு , கரிகாலன், அதர்வண வேதம், வளி வழங்கு மாஞாலம்

WRITTEN BY S NAGARAJAN
Post No. 10,443
Date uploaded in London – – 14 DECEMBER 2021

Contact – swami_48@yahoo.com
Pictures are taken from various sources for spreading knowledge;
this is a non- commercial blog. Thanks for your great pictures.
tamilandvedas.com, swamiindology.blogspot.com

வாரந்தோறும் திங்கள் கிழமை இந்திய நேரம் மாலை 6.30க்கு ஒளிபரப்பாகும் ஞானமயம் நிகழ்ச்சியில் 13-12-2021 அன்று ச.நாகராஜன் ஆற்றிய உரை.
எந்த நேரமும் ஞானமயம் நிகழ்ச்சிகளை யூ டியூபிலும் facebook.com/gnanamayam என்ற இணைய வழித் தொடுப்பிலும் காணலாம். இந்த உரை மூன்று பகுதிகளாகத் தரப்படுகிறது.

திரு அருட்பிரகாச வள்ளலார் – 1
ச.நாகராஜன்

அன்பார்ந்த தமிழ் நெஞ்சங்களே சந்தானம் நாகராஜன் வணக்கம். நமஸ்காரம்.

திரு அருட்பிரகாச வள்ளலார் பெருமானின் திவ்ய சரித்திரம் ஒவ்வொரு தமிழனும் தெரிந்து கொள்ள வேண்டிய ஒன்றாகும்.

தமிழர்களின் நல்வினைப் பயனாக அவரது சரித்திரத்தை “திரு அருட்பிரகாச வள்ளலார் தலை மாணாக்கர் தொழுவூர் வேலாயுத முதலியார் எழுதிய உண்மைகள்” என்று அவரே தலைப்பிட்டு 77 பக்கங்களில் தருகிறார்.

‘பரதகண்டத்தின் பண்பு’ என்று முதலாம் பகுதி ஆரம்பிக்கிறது, ’திருமருதூர் என்று மறைந்தார்’ என்று 117ஆம் பகுதி முடிகிறது.

இந்தப் பகுதிகளில் வள்ளலார் வாழ்வில் நிகழ்ந்த அற்புதங்கள் பல சிறப்பாகக் கூறப்பட்டுள்ளன. ஏழாவது பகுதியில் தெய்வத் தந்தையார் திரு அவதாரம் என்ற தலைப்பில் அவர் தரும் ஜனனக் குறிப்பு இது. அவரது ஜாதகத்தையும் தந்துள்ளார் அவர்.

“வள்ளலார் பெருமான் கலி 25-48 சுபானு வருடம், தட்சணாயனம், வருஷ ருது புரட்டாசி மாதம், 21ந் தேதி, பூர்வ பக்ஷம், துதியை திதி, ஞாயிற்றுக்கிழமை, இளஞாயிறே போன்று உதயாதி 29 நாழிகை, மீன லக்கினம், சித்திரை நட்சத்திரம் 4ஆங் கால் துலா ராசி (5-10-1823) கூடிய சுப தினத்தன்று நம் தெய்வத் தந்தையார் திரு மருதூர்ப் பதியிலே திரு அவதாரம் செய்தார்.”

ராமலிங்கம் என்று பெயரிடப்பட்ட அருட்குழந்தை அம்பலக் காட்சியை சிதம்பரத்தில் கண்டது. குழந்தையைப் பார்த்த பெரும் மகானான அப்பய்ய தீக்ஷிதர், “இக்குழந்தை அம்பலவாணரின் அருட் குழந்தையே” என்று வாழ்த்தினார்.

பெருமான் ஓதாது அனைத்தையும் உணர்ந்தார்.

வள்ளலாரின் தமையனார் சபாபதி பிள்ளை திருஞானசம்பந்தர் சரித்திரத்தை ஒரு நிகழ்ச்சியில் சொல்ல இருந்த போது திடீரென்று சுகவீனமுற்றார். வள்ளலார் பெருமான அந்த நிகழ்ச்சியில் சிறப்புரை ஆற்றி அனவரையும் மகிழ்வித்தார்; வியக்க வைத்தார்!

மாணவர் தொழுவூர் வேலாயுத முதலியார் தானே கடினமான நடையில் சிலேடைப் பாடல்களைப் பாடி பெருமானாரிடம் அவரை சோதிக்கக் கருதி, “சங்க காலத்துப் புலவர்கள் பாடியது இது” என்று சில ஓலைச் சுவடிகளைக் கொடுத்தார். அவற்றை ஒரு கணம் நோக்கிய பெருமான், “அப்பா, இவை பொருள் இலக்கணம் தேறாக் கற்றுக் குட்டி பாடியவை” என்றார். திகைத்துப் போன முதலியார் அன்றிலிருந்து அவரது அத்யந்த சீடரானார்.

ஒற்றியூரில் ஒரு நாள் இருந்த போது, அன்றிரவு சத்திரத்தில் ஒரு குருக்கள் வந்து அவருக்கு அன்னமளித்துச் சென்றார். மறுநாள் விசாரித்த போது அந்தக் குருகள் வெளியூர் சென்று இரண்டு நாட்கள் ஆயிற்று என்ற விவரம் வெளி வந்தது. தியாகப் பெருமானே குருக்களாக வந்தது ஊர்ஜிதமாயிற்று.

ஒரு முறை திருவொற்றியூரில் தரிசனத்திற்காக எல்லோரும் செல்லும் கீழண்டை மாட வீதி வழியாகச் செல்லாமல் பெருமானார் தேரடி வீதி வழியாகச் சென்றார். அங்கு இருந்த ஒரு நிர்வாண சந்யாசி போவோர் ஒவ்வொருவரையும் பார்த்து, ‘கழுதை போகிறது, மாடு போகிறது’ என்று சொல்வது வழக்கம். ஆனால் அவர் பெருமானாரைப் பார்த்து, “இதோ உத்தம மனிதன் போகிறான்” என்றார். அவரிடம் சென்று பெருமானார் சிறிது நேரம் சில உரைகளைக் கூற அன்றே அந்த சந்யாசி அந்த இடத்தை விட்டு அகன்றார்.

ஒரு நாள் இரவு நேரம் வீட்டிற்குத் தாமதமாக வந்ததால் திண்ணையில் படுத்தார் வள்ளலார். அவரைத் தட்டி எழுப்பிய தமக்கையார் அமுது படைத்தார். மறுநாள் தமக்கையார் தான் கதவை உட்தாளிட்டு இருந்ததாகவும் வெளியே வரவே இல்லை என்றும் வியப்புடன் கூறினார். அமுது படைத்தது வடிவுடைய நாயகியே என அனைவரும் தெளிந்தனர்; வியந்தனர்!

கருங்குழி என்னும் ஊரில் ஒரு நாள் வேங்கட ரெட்டியார் வீட்டில் அவரது வேண்டுதலின் பேரில் வள்ளலார் தங்கி இருந்தார். அன்று இரவு ரெட்டியார் வெளியூர் செல்ல வேண்டி இருந்ததால் விளக்கை ஏற்றி விட்டு அருகிலிருந்த மண்பாண்டத்தில் பழகுவதற்காக நீரை நிரப்பி விட்டுச் சென்றார். பாக்களை இயற்றிக் கொண்டிருந்த வள்ளலார் விளக்கு அருகில் எண்ணெய் இருக்கிறதென்று எண்ணி அதை எடுத்து ஊற்றியவாறே இருந்தார். விளக்கு நீரால் எரிந்து கொண்டே இருந்தது. விடியற்காலையில் வீடு வந்த ரெட்டியார் நடந்ததை உணர்ந்து பரவசமெய்தினார். அன்று முதல் அனைவரும் பெருமானாரை தெய்வமாகக் கருதலாயினர். சுவாமிகள் தண்ணீரால் விளக்கை எரித்த அந்த அறையை இன்றும் தைப்பூசத்தன்று அன்பர்கள் தரிசித்து வருகின்றனர்.

முத்து நாராயண ரெட்டியார் என்பவர் கண் பார்வையற்று வருந்தினார். சுவாமிகளிடம் தன் குறையைச் சொல்லவே அவருக்கு திருநீறு கொடுக்கவே அவருக்குக் கண் பார்வை வந்தது. இதனால் மனம் மிக மகிழ்ந்த ரெட்டியார் தன் செல்வம் முழுவதையும் அவர் பெயருக்கு எழுதி வைப்பதாகச் சொன்னார். அதை ஏற்க மறுத்த சுவாமிகள், ‘சீனிவாசப் பெருமாள் கோவிலுக்கு எழுதி வைத்து விடுங்கள்’, என்றார்.

கூடலூரில் அப்பாசாமி செட்டியார் என்ற அன்பருக்கு வாழைத் தோட்டம் ஒன்று இருந்தது. அதில் சென்ற போது சுவாமிகளை பேயன் வாழைமரத்திலிருந்த பாம்பு ஒன்று தலையில் தீண்டி விட்டது. அனைவரும் பதறினர். பாம்பைக் கொல்ல எத்தனித்தனர். சுவாமிகள் ‘அது தானாகவே இறந்து விடும். அது இறப்பதற்காகவே என்னைத் தீண்டியது’, என்றார். பாம்பின் விஷம் சுவாமிகளை ஒன்றும் செய்யவில்லை. சிறிது நேரத்தில் பாம்பு இறந்தது.
* தொடரும்

tags- இராமலிங்கம், அருட்பிரகாச,  வள்ளலார் , கருங்குழி

WRITTEN BY BRHANNAYAKI SATHYANARAYANAN

Post No. 10,439

Date uploaded in London – – 13 DECEMBER 2021
Contact – swami_48@yahoo.com
Pictures are taken from various sources for spreading knowledge;
this is a non- commercial blog. Thanks for your great pictures.
tamilandvedas.com, swamiindology.blogspot.com

லண்டனிலிருந்து ஞாயிறுதோறும் இந்திய நேரம் மாலை 6.30க்கு ஒளிபரப்பாகும் தமிழ்முழக்கம் நிகழ்ச்சியில் 12-12-2021 அன்று ஒளிபரப்பான உரை!

திங்களூர்

ஒன்று கொலாம் அவர் சிந்தை உயர் வரை
ஒன்று கொலாம் உயரும் மதி சூடுவர்
ஒன்று கொலாம் இடு வெண்தலை கையது
ஒன்று கொலாம் அவர் ஊர்வது தானே
திருநாவுக்கரசர் திருவடி போற்றி!

ஆலயம் அறிவோம்! வழங்குவது பிரஹன்நாயகி சத்யநாராயணன்.

ஆலயம் அறிவோம் தொடரில் இன்று நமது யாத்திரையில் இடம் பெறுவது நவகிரகங்களில் மனதிற்கு அதிபதியான சந்திர பகவானின் சிறப்புத் தலமான திங்களூர் திருத்தலம் ஆகும். தமிழகத்தில், திருவையாற்றிலிருந்து மூன்று கிலோமீட்டர் தொலைவிலும் கும்பகோணத்திலிருந்து 33 கிலோமீட்டர் தொலைவிலும் இது அமைந்துள்ளது.

இங்குள்ள கைலாச நாதர் கோவில் மிகவும் சிறப்பு வாய்ந்த கோவில் ஆகும்
இறைவனின் திருநாமம் : ஸ்ரீ கைலாச நாதர்
அம்மன் : பெரியநாயகி ஸ்தல வ்ருக்ஷம் : வில்வ மரம்
தீர்த்தம் : சந்திர புஷ்கரணி விசேஷ மூர்த்தி: சந்திர பகவான்

இத்தலத்தைப் பற்றிய புராண வரலாறுகள் பல உண்டு. பாற்கடலை கடைந்த போது ஆலகால விஷம் உருவாகவே அதை சிவபிரான் குடித்து தன் கண்டத்தில் அடக்கினார். அப்போது விஷத்தின் தாக்கத்தினால் தேவர்கள் மயக்கமுற்றனர். அந்த விஷத்துடன் எழுந்து வந்த சந்திர பகவான் தேவர்களின் மயக்கத்தை நீக்கினார். ஆகவே இத்தலம் திங்களூர் என்னும் பெயரைப் பெற்றது. இங்கு ஒவ்வொரு ஆண்டும் பங்குனி உத்திரத்தன்று காலை உதயத்தின் போது 6 மணிக்கு சூரிய ஒளி லிங்கத்தின் மீது பட்டு சூரிய பூஜை நடக்கும். அதற்கு மறுநாள் பௌர்ணமி பிரதமை அன்று மாலை 6 மணிக்கு சந்திரனின் ஒளி லிங்கத்தின் மீது படும்; அன்று சந்திர பூஜை நடக்கும். இங்கு சந்திர பகவானுக்குத் தனி சந்நிதி உள்ளது.

இங்கு தான் 63 நாயன்மார்களில் ஒருவரான அப்பூதி அடிகள் பிறந்தார்.
இங்குள்ள ஆலயம் கிழக்கு நோக்கி அமைந்துள்ளது என்ற போதிலும் தெற்குப் பக்க வாயிலே பிரதான வாயிலாக உள்ளது. கர்ப க்ருஹத்தில் கைலாச நாதர் கிழக்கு நோக்கி இருந்து அருள் பாலிக்கிறார். அம்மன் பெரிய நாயகி தெற்குப் பார்த்துக் காட்சி அளிக்கிறார். வெளி பிரகாரத்தில் வலம் வரும் போது விஷம் தீர்த்த விநாயகர், சுப்ரமண்யரை தரிசிக்கலாம். இன்னும் தக்ஷிணாமூர்த்தி, கஜலெக்ஷ்மி, பைரவர் உள்ளிட்ட சந்திகளும் இங்கு அமைந்துள்ளன.
கோவிலுக்கு முன்பு சந்திர தீர்த்தம் அமைந்துள்ளது.

சந்திர தோஷம் உள்ளவர்கள் இங்கு நீராடி விட்டு இறைவனை தரிசிப்பது மரபு. திங்களூரில் சிறந்த சிவனடியாராகத் திகழ்ந்த அப்பூதி அடிகள் திருநாவுக்கரசர் பால் பெரும் அன்பு கொண்டவர். அவர் பெயரால் தண்ணீர்ப் பந்தல் அமைத்து அனைவருக்கும் சேவை செய்து வந்தார். ஒரு சமயம் அங்கு விஜயம் செய்த திருநாவுக்கரசர் தனது பெயர் கொண்ட தண்ணீர்ப் பந்தல், அன்னதான சாலை, மருத்துவ சாலை ஆகியனவற்றைக் கண்டு வியப்புற்று இதை அமைத்தவர் யார் என்று கேட்க அனைவரும் அப்பூதி அடிகள் பற்றிக் கூறினர். அவரது இல்லம் சென்றார் நாவுக்கரசர். அவரைக் கண்ணுற்ற அப்பூதி அடிகளார் மனம் மிக மகிழ்ந்து அவருக்கு அமுது படைக்கத் தயாரானார். வீட்டிலிருந்த தன் மூத்த மகனை அழைத்து வாழை இலை பறித்து வருமாறு அனுப்ப, அவன் வாழை இலை பறிக்கும் போது, அவனை ஒரு நாகம் தீண்டி அவன் இறந்தான். துக்கம் தாளாத அப்பூதி அடிகள் திருநாவுக்கரசருக்கு அமுது படைப்பதை நிறுத்தாது, மகனின் சவத்தை மூடி விட்டுப் பரிமாறலானார். மகனுக்குத் திருநீறு இட வேண்டும், அவன் எங்கே என்று கேட்டார் நாவுக்கரசர். அப்பூதி அடிகளார் புலம்பி அழுதார். உடனே நடந்ததை அறிந்த அப்பர் பிரான் அவனது சவம் அருகே சென்று ‘ஒன்று கொலாம்’ என்று தொடங்கும் ‘விஷம் தீர்த்த திருப்பதிகத்தைப்’ பாடினார். அவன் உடனே உயிர்த்தெழுந்தான். அனைவரும் மகிழ்ந்தனர். இந்த வரலாற்றைப் பெரிய புராணத்தில் சேக்கிழார் பெருமான் 45 பாடல்களில் மிக அழகுற விளக்குகிறார்.

இந்த ஆலயத்தில் உள் மண்டபத்தில் இடப்புறம் அப்பூதி அடிகள், அவர் மனைவியார், மகன் மூத்த திருநாவுக்கரசு, இளைய திருநாவுக்கரசு ஆகியோரின் மூர்த்தங்கள் பிரதிஷ்டை செய்யப்பட்டிருப்பதைக் கண்டு தரிசிக்கலாம்.

‘சந்த்ரமா மனஸோ ஜாத’ என்று புருஷ ஸூக்தம் போற்றும் சந்திரனே மனதிற்கு அதிபதி. இவனே உடலுக்கு காரகன். சரீர பலம் மனோ பலம் இரண்டுமே உலக வாழ்க்கையின் வெற்றிக்கு மூல பலம் ஆகும். ஜனன லக்னத்தின் படி நல்ல பலன்களை ஒரு ஜாதகத்தில் காண முடியவில்லை எனில் சந்திரனை லக்னமாகக் கொண்டு பலன்களைச் சொல்ல வேண்டும் என்று விதி உள்ளது. இதையே தான் ‘விதி கெட்டா மதியைப் பாரு’ என்ற முது மொழி உணர்த்துகிறது.

தென்கிழக்கு திசை சந்திரனுக்கு உரியது. உகந்த நிறம் வெள்ளை. மூலிகைக்கு அதிபதி சந்திரன். செல்வத்தைத் தருபவன் என்று சந்திரனை யஜுர் வேதம் புகழ்கிறது. முத்து சந்திரனுக்கு உகந்த ரத்தினமாகும். வெள்ளை குதிரை சந்திரனின் வாகனம். மலர் – வெள்ளை அரளி மலர். அதி தேவதை நீர்; ப்ரத்யதி தேவதை கௌரி. நெல்லும் பச்சரிசியும் சந்திரனுக்கு உகந்த தானியம். சமித்து – எருக்கு.

காலம் காலமாக ஆயிரக்கணக்கான பக்தர்களுக்கு அருள்பாலித்து வரும் பெரிய நாயகியும் ஸ்ரீ கைலாஸ நாதரும், சந்திர பகவானும் அனைவருக்கும் சர்வ மங்களத்தைத் தர ஞானமயம் சார்பில் பிரார்த்திக்கிறோம்.

ததிசங்க துஷாராபம் க்ஷீ ரோதார்ணவ சம்பவம் |
நமாமி சசிநம் ஸோமம் சம்போர் மகுட பூஷணம் ||

தயிர், சங்கு பனி போன்ற வெண்மையானவன். பாற் கடலிலிருந்து தோன்றியவன். முயல் சின்னம் உடையவன். ஸோமன் என்று வேதத்தால் அழைக்கப்படுபவன். சிவனின் ஜடாமகுடத்தின் ஆபரணம். அந்த சந்திரனை நமஸ்கரிக்கிறேன்.

நன்றி, வணக்கம்!

TAGS- சந்திரன் ,திங்களூர், கைலாச நாதர் கோவில் ,அப்பூதி அடிகள்