WRITTEN BY S NAGARAJAN

Date: 21 March 2016

Post No. 2651

Time uploaded in London :–  5-46 AM

( Thanks for the Pictures)

DON’T REBLOG IT AT LEAST FOR A WEEK!  DON’T USE THE PICTURES; THEY ARE COPYRIGHTED BY SOMEONE.

(for old articles go to tamilandvedas.com OR swamiindology.blogspot.com)

நையாண்டி மடல் 6

அனுமனைப் பிடித்தவரை ஆலோசகர் ஆக்குகிறோம்!

ச.நாகராஜன்

என் இனிய முட்டாள்களே!

வாக்குக் கொடுத்தபடி இந்தக் கட்டுரையில் கட்டிங் பற்றிய இரகசியங்களை ஆரம்பிக்கிறோம்.

ஆனால் உள்ளபடியே ஒன்று சொல்லக் கடமைப் பட்டுள்ளேன். இந்தக் கட்டுரையை ஆரம்பிக்கும் போதே உள்ளங்கை அரிக்கிறது.

தம்பீ! கழகக் கண்மணீ!!

இதற்கு டாக்டர் தேவையில்லை என்பதை நீயே நன்கு அறிவாய்.

உன் கை வைத்தியமே போதும். புரிந்து கொண்டிருப்பாய்.

‘இந்தியத் திருநாட்டில் ஆங்காங்கே கோலாகலம், குதூகலம். இவற்றில் பங்கேற்பீர்களா?’ என வடவர் சேனல்கள் நம்மை மடக்கிக் கேட்கின்றன.

பெருமிதத்துடன் கூறுகிறோம்- பங்கேற்க மாட்டோம் என்று!

என்னை?

தொன்னையில் நெய் வழியும் போது கையை ஏந்துபவன் கபோதி அல்லவோ! இந்தத் தத்துவத்திற்கு இணங்க பல மாநில கோலாகலங்களில் இந்த முட்டாள்கள் கழகம் பங்கு பெறாது என்பதைத் திட்டவட்ட்மாகத் தெளிவு படுத்துகிறேன்.

ஏன் இந்த முடிவு என்கிறாயா?

இங்கு தான் இருக்கிறது இரகசியம்!

நமது கொள்கைகளின் ஆணி வேரைச் சொல்ல வேண்டியது இங்கு என் தலையாய கடமை ஆகிறது.

மொத்தமும் சுருட்டு

மொத்தமும் சுருட்டு; உனக்கு நீயே; நாளையும் நாமே என்ற மூன்று முத்தான கொள்கைகளின் அடிப்படையில் வளர்பவர்கள் நாம்!

மொத்தமும் சுருட்டு என்பதற்கான உள் அர்த்தம் உனக்கே தெரியும். வெளி அர்த்தத்தை மட்டும் இங்கு பகிர முடியும்!

பீடி குடிக்காதே, சிகரட் உடல் நலத்திற்குத் தீங்கு பயக்கும் என்று தான் விளம்பரங்கள் வருகின்றனவே தவிர சுருட்டு பிடிக்காதே என்று சேனலில் எதிலாவது பார்த்த்து உண்டா, நீ?!

ஆகவே நல்ல எண்ணத்தில் மொத்தமும் சுருட்டு என்கிறோம் நாம்!

உனக்கு நீயே என்ற கொள்கையின் படி எங்கும் நீ பதவிக்காக நிறக் வேண்டாம். தீட்டாக நாம் கருதும் ஓட்டுக்காக அலைய வேண்டாம். உனக்கு வேண்டிய பதவியை, உனக்கு வேண்டிய காலம் வரைக்கும் நீயே நிர்ணயித்துக் கொள்! இந்தப் பதவிக்குப் போட்டி போட்டு உன்னிடம் வருவோருக்கு நீ காண்பிக்க வேண்டிய அறிவிப்புப் பலகை நாளையும் நாமே என்பது தான்! மறந்து விடாதே. பலகையில் அன்றாடம் தேதியை மாற்ற மறக்காதே!

எவருக்கும் விலையுண்டு என்பதை விலையில்லாப் புத்தகம் கூட வாங்கிப் படிக்காத எனக்கா தெரியாது?

கஷடப்பட்டு ஆடி ஓடி அவலாகி நொந்து நூடில்ஸாகி வெற்றி பெற்றவர்களைப் பார்த்து அவர்களின் உள்ளங்கையைக் கொஞ்சம் உரசினால் போதும், நம் முட்டாள்கள் கழகத்தில் முன்னணி உறுப்பினர்களாக – கண்மணிகளைக் காப்பவர்களாகக்- களம் இறங்கி விடுவார்கள்.

இங்கு தான் நிற்கிறது, கட்டிங்!

இதை நான் கண்டுபிடித்த இரகசியத்தையும் அதைப் பரவலாக்கிய விதத்தையும் இதற்கு உதவும் அபாயகரமான ஆயுதத்தையும் பற்றி உன்னிடம் பகிர வருகிறேன், பகிரங்கமாக!

இதற்கிடையில் இன்று நாம் கேள்விப்பட்ட செய்தி இது! நமது மாண்புமிகு அதிகாரிகள் ஓடிக் கொண்டிருந்த காரில் ஆடிக் கொண்டிருந்த சில பேர்வழிகளைப் பிடிக்க அவர்கள் முழித்த முழியினாலும் உளறளினாலும் சந்தேகப்பட்டு காரை சோதனை செய்த போது யாரைப் பிடித்தார்கள் என்கிறாய்?

அனுமன் சிலையை பிடித்தோம்

அனுமாரை! ஆமாம்! அஞ்சிலே ஒன்றான வாயு பெற்றான், அஞ்சிலே ஒன்றான கடலைத் தாவி அஞ்சிலே ஒன்றான வான் வழியே சென்று அஞ்சிலே ஒன்று ஆன பூமியின் மகளைக் கண்டதாகக் கூறப்படுகிறதே, அவனைத் தான்!

அந்த அனுமன் சிலையை ஆவணம் இல்லாததால் பிடித்தோம் என்று சொல்ல , ஐயோ நாங்கள் பஜனையில் அல்லவா மெய்மறந்து ஆடிக் கொண்டிருந்தோம், மெய்மறந்து ராம் ராம் என்று உருகிப் பாடிக் கொண்டிருந்தோம் என்று அவர்கள் கதற கோவிலில் நிறுவ வேண்டிய அனுமன் அரசு கருவூலத்தில் தற்காலிகமாகத் தஞ்சம் அடைந்துளான் தற்போது!

இந்த மாண்புமிகு அதிகாரிகளைக் கண்டு மனம் மிக மகிழ்கிறோம்!

இவர்கள் வேண்டி விரும்பிக் கேட்டுக் கொண்டதற்கிணங்க இவர்களை உயர் மட்ட கொள்கைப் பரப்பு ஆலோசகர்களாக உடனடியாக நியமிக்கிறோம்.

அத்தோடு ஐயன் வள்ளுவன சிலை உள்ளிட்ட ஆன்று அவிந்து அடங்கிய கொள்கைச் சான்றோரை குதூகலக் கும்பலிடமிருந்து காப்பாற்ற வேண்டி தார்பாலின் போட்டு மூடி மறைத்த சிங்கங்களை -எங்கள் தங்கங்களையும் உயர் மட்ட ஆலோசகர் குழுவில் இணைக்கிறோம்.

திருக்கோயில் நகரில் ஒரு செய்தி. ஆயிரம் குடங்கள் ஒரு பெரிய கண்டெய்னரில் இருந்ததாம். இருக்கலாமா? நம் மேதகு உறுப்பினர்கள் அவற்றைக் கைப்பற்றி விட்டனர். அங்குள்ள பால்குடம் எடுக்கும் தாய்க்குலம், ‘நாங்கள் ஆர்டர் செய்ததை அள்ளிட்டுப் போறீங்க்ளேடா பாடையிலே போற பாவிங்களா’ என்று குய்யோ முறையோ என்று கத்த, சத்தம் போடாமல் அவை அனைத்தும் திருப்பிக் கொடுக்கப்பட்டன. இதில் தீரத்துடன் செயல் பட்டவர்களையும் நாம் நம் கழகத்தில் இணைக்கிறோம்.

பால் குடத்தைக் கைப்பற்றினால் சட்டியினால் நம்மை அடிப்பார்கள், புலியை முறம் கொண்டு விரட்டிய போர்க்கள வீராங்கனைகள். ஆகவே அந்த இடத்திலிருந்து நைஸாக நகர்ந்து விட்டோம்.

இப்போது போகும் வேகத்தைப் பார்த்தால் உறுப்பினர்களை விட முட்டாள் கழக ஆலோசகர்கள் அதிகமாகி விடுவார்களோ என அச்சப்படுகிறோம். துச்சமாக நினைக்க, இது ஒரு சின்னச் செய்தி அல்ல் என்பதால் மிச்சம் மீதி இன்றி இது பற்றி விசாரித்து கழகக் கண்மணிகளை இலட்சம் இலட்சமாகச் சேர்க்க வழி வகுப்போம்; அதற்கு அணி அணியாக.

புறநானூற்றுப் போர் வாளே பொங்கி வா!

புறநானூற்றுப் போர் வாளே பொங்கி வா!

அகநானூற்று அட்டகாசமே. ஆர்ப்பாட்டத்துடன் வா!

கலிங்கத்துப் பரணியின் கட்டாரியே, கடகடவென்று சிரித்து வா, சீறி வா!

குறுந்தொகையின் குத்தீட்டியே குமுறி வா!

இனி கட்டிங்கிற்கு வருவோம்:

நான் பிறந்தது வளப்பமான ப்ழைய கால சில்லாவிலே ஒரு குக்கிராமத்திலே என்பதை வரலாற்று அறிஞர்கள் உனக்குத் தெளிவு படத் தினமும் கூறி வந்திருப்பார்கள்.

அந்தப் பழைய பொன்னான நாளிலே தான் ‘ப்ள்ளிக்கு வா பள்ளிக்கு வா’ என்று நச்சரித்தான் ஒரு பழைய கால ஜாலக்காரன். அ –அம்மா; ஆ-ஆடு என்று ஆரம்பிக்கும்  மோசக்காரன்

அவனிடமே என் எண்ணத்தை வெளிப்படையாக வெடுக்கென்று சொன்னேன்: உன்னிடமிருந்து ஓடப் போகிறேன். அதற்காக நான் திருட்டு பிளேன் ஏறப் போகிறேன் என்று!

அவன் விழுந்து விழுந்து சிரித்தான்.- ஹ ஹ ஹா என்று,

‘பிளேன் வருவதற்கு விமான நிலையம் வேண்டுமடா, ஓடு பாதை வேண்டுமடா ஆயிரம் ஏக்கர் அளவுக்கு, முழு முட்டாளே’ என்றான்.

உடனே ஓடினேன், ஓடினேன், கிராமத்தைச் சுற்றி ஓடினேன். இரண்டே நிமிடங்களில் புறப்பட்ட இடத்திற்கு வந்து விட்டேன். ஏனெனில் உனக்கே தெரியும் குக்கிராமம் அந்த அளவுக்கு மிகச் சிறியதென்று. அங்கு கபடி விளையாடக் கூட் கையளவு திடல் இல்லை!

மாற்று வழியை யோசித்து மாநகருக்கு வந்து விட்டேன்.

கையிலே இருந்ததோ நாலணா! நாளைக்கு என்ன செய்வது?

என் நிலை கேட்டு.. .. ..  நிலை கெட்டு .. .. .. ..

உன் கண்களில் பனிக்கும் நீரைப் பார்க்கிறேன். கலங்காதே!

அடுத்த மடலில் கட்டிங் பிறந்த வரலாறைத் தொடர்கிறேன்.

அதுவரை அன்பு நெஞ்சங்களே சற்று விடை கொடுங்கள்.

மு மு க தலைவர்

Rue de l’Étuve – Stoofstraat, Bruxelles – Brussel, België

WRITTEN BY S NAGARAJAN

Date: 19 March 2016

Post No. 2645

Time uploaded in London :–  8-29 AM

( Thanks for the Pictures)

DON’T REBLOG IT AT LEAST FOR A WEEK!  DON’T USE THE PICTURES; THEY ARE COPYRIGHTED BY SOMEONE.

(for old articles go to tamilandvedas.com OR swamiindology.blogspot.com)

Urinating boy statue in Brussels

நையாண்டி மடல் எண் 5

ஜம் ஜம் பங்கஜம் பங்கேற்கும் தலை நகர் சேனல் நிகழ்ச்சி!

ச.நாகராஜன்

என் அன்புக்குரிய முட்டாள்களே!

CUTTING  பற்றிய மடல் தயார்! அதை வெளியிடும் நேரத்தில் அவசரத் தொலைபேசி அழைப்பு என உதவியாளர் கூற யார் என்றேன்.

சொன்னார். என்னையா என்றேன்!

நமது அறிவுக் களஞ்சியங்கள் பணி புரியும் தலைநகரின் பல்கலைக் கழகம் என்றதும் உள்ளமெலாம் பூரித்தது. உடலெல்லாம் சிலிர்த்தது.

பேசினேன். வேறொன்றுமில்லை. ஆதரித்து ஒரு அறிக்கை வேண்டுமாம்.

தர வேண்டியதை நான் தந்தால், தர வேண்டியதை அவர்கள் தருவார்கள், இல்லையா? புரிந்து கொண்டாயா?

சரி விஷயத்துக்கு நேரடியாக வருகிறேன்.

இதில் என்ன தப்பு இருக்கிறதென்று எனக்குப் புரியவில்லை. 31 வயதே ஆன பச்சிளம் பாலகன் ஒருவன் சோலை நிரம்பிய பல்கலைக்கழகத்தின் நட்ட நடுப் பகுதியில் அழகிய மாலை நேரத்தில் அவசரமாக இயற்கை உபாதையைக் கழித்தான்.

ஒன்னுக்குப் போனான் என்று சொல்லி விட்டால் முட்டாள்களாகிய உங்களுக்கு சுலபமாகப் புரியும்.

சொல்லுங்கள், இதில் என்ன தவறு இருக்கிறது முட்டாள்களே!

சாலையிலே சிறுநீர் கழித்தானாம், பாலகன்! இது ஒரு தப்பா? அதை ஒரு பெண் பார்த்தாளாம்! அவள் பருவ மங்கையா, பார்க்க சிறுமியா?

கேட்கிறேன் அர்த்தமுள்ள அபூர்வமான இந்த வினாவை. விடை தருவார்களா, வீணர்கள்?

அந்தரங்க உறுப்பைக் காண்பித்ததாக புகார் கூறிய பருவ மங்கை தன் கண்ணை மூடிக் கொண்டு போயிருக்கலாம். புகாராவது கொடுக்காமல் இருந்திருக்கலாம்.

அந்தப் பாலகனை ஆசிரியை அழைக்க அவர்கள் உல்லாசமே, சல்லாபமே என்ற படத்தை வீடியோவில் நெருங்கி இருந்து பார்த்தார். இதில் என்ன தவறு?                                              ஐயகோ! இதையெல்லாம் அரசியல் ஆக்க நினைக்கிறார்கள் கோணல் புத்தியுள்ள கொடுமதியாளர்கள்.

Daily Mail pictures of urinating Stalin statue at Kiev, Capital of Ukraine. Anti Communist activists put it, but the authorities dismantled it later.

இதை கண்டித்து இன்றைய இரவு , “இந்தியா அறிய விரும்புகிறது” நிகழ்ச்சியில் ஒரு விவாதம் நடைபெற உள்ளது, அல்லவா? அதற்கு நம் கழகத்தின் சார்பில் மகளிர் பேரணியின் மாண்புமிகு முட்டாள் ஆன ஜம் ஜம் பங்கஜம் அவர்கள் அனுப்பப்படுகிறார்.

அதென்ன அவர் பெயர் தாய்த் தமிழில் இல்லையே எனக் கலங்கல் வேண்டா. அலட்டல் வேண்டா.

அருமைத் தம்பீ! எம்பீ! நம்பீ!

வடவர்களின் ஆதிக்கத்தில் உள்ள சேனல்களில் அவர்கள் விரும்பும் பெயர் இருந்தால் தானே நாம் இடம் பெற முடியும்? உரிமையைப் பெற முடியும்? சிந்தி!

ஜம் ஜம் பங்கஜம், “மேலாடை நழுவி விழ, பூவாடை பூசி வர” பாடலுக்கு எத்தனை முறை மேலாடையை நழுவ விட்டுள்ளார் என்பதை எண்ணுவதற்காகவே எண்ணற்ற முறைகள் அந்தப் படத்தைப் பார்த்த கழகக் கண்மணிகளின் எண்ணிக்கையை யாவரே அறிவர்?!

அவர் இந்த விவாதம் நடக்கும் அரங்கத்தில் தனக்கே உரிய ஸ்டைலில் ஆடையை அடிக்கடி நழுவ விட அதை நான்கு காமராமேன்களும் படம் பிடிக்க மற்றவர்கள் பக்கம் காமராக்களும் திரும்புவதில்லை அவர்களுக்கு வாய்ப்பும் வழங்கப்படுவதில்லை என்ற உண்மையை உனக்குச் சுட்டிக் காட்டக் கடமைப்பட்டுள்ளேன். உள்ளம் குளிர்கிறதா?

அங்கு கூலிக்காக வரவழைக்கப்பட்ட 90 பார்வையாளர்களும் எதிரி கட்சிக்கென வந்திரக்கும் சிறு நரிக் கூட்டத்தைச் சிதற அடித்து விட மாட்டார்களா? அவர்களுக்குப் பேச இடம் கொடுத்தால் தானே!

இந்த நிகழ்ச்சியை நடத்தும் பெண்மணி ஜம் ஜம் பங்கஜம் பங்கு கொள்ளும் நிகழ்ச்சிகளில் எல்லாம் டி ஆர் பி ரேட் எகிறுகிறது என்பதற்குத் தானே காரணம் என நினைத்தாராம்.

குட்டிப் பெண்மணி! என் கண்மணி! அப்படி இல்லை அம்மணீ! அதற்கான காரணம் ஜம் ஜம் பங்கஜத்தின் லிப்ஸ்டிக்கும் தலையை அடிக்கடி கோதி விட்டுப் பார்க்கும் கொக்கரிக்கும் கண் சிமிட்டுப் பார்வையும் தான்! இதை சேனல் இயக்குநர் அந்தப் பெண்மணீயிடம் சொன்ன போது அவர் மருண்டார்; சுருண்டார்.

என்றாலும் அவருக்கு அடுத்த நாட்டிலிருந்து வரும் படியை எண்ணி, வரும்படியை எண்ணி, வாய் மூடி பணியைத் தொடர்கிறார்.

கொஞ்ஜம் கொஞ்ஜமாக நம் ஜம் ஜம் ஜாம் ஜாம் என்று அந்தச் சேனலையே முட்டாள்களுக்கு உரியதாக ஆக்கப் போகிறார், அன்பர்களே, நண்பர்களே!

“என்னையா, கன்னையா, என்னையா பார்க்கிறாய்?

சின்னையா, சீர் ஐயா, நீ சிரித்தால் நான் வேர்க்கிறேன்”

என்ற ஜம் ஜம்மின் நடனக் காட்சியை சின்ன உடையில் சின்னத் திரையில் அதே விவாதத்தின் போது ஒரு சின்ன ப்ரேக் என்று சொன்னவுடன் பார்க்கலாம் என்பதை மறந்து விடாதீர்கள்.

தலை நகரின் பல்கலைக் கழக பேராசிரியர்களுக்குப் பேராதரவு தர முட்டாள்கள் கழகம் முன்னே நிற்கும், இனி யார் வேண்டுமானாலும் எங்கு வேண்டுமானாலும் இயற்கை உபாதைகளைக் கழிக்கலாம், ஆசிரியைகள் மாணவர்கள் பேதமின்றி நினைத்த இடத்தில் நினைத்த போது அந்தரங்கம் பேசலாம் என்ற என் கொள்கை முழக்கத்தை நீங்கள் வேண்டி விரும்பிக் கேட்டதற்கிணங்க இப்போது அறிவிக்கிறேன்.

அடுத்த மடல் கட்டிங் பற்றியே என்று அறுதியிட்டு உறுதி கூறி விடை பெறுகிறேன்.

மு மு கழகத் தலைவர்

–subham-

WRITTEN BY S NAGARAJAN

Date: 12 March 2016

Post No. 2622

Time uploaded in London :–  6-14 AM

( Thanks for the Pictures)

DON’T REBLOG IT AT LEAST FOR A WEEK!  DON’T USE THE PICTURES; THEY ARE COPYRIGHTED BY SOMEONE.

(for old articles go to tamilandvedas.com OR swamiindology.blogspot.com)

நையாண்டி மடல் எண் 4

கொள்கை என்ன என்று கேட்ட கோமாளிகள்!

ச.நாகராஜன்

என் இனிய முட்டாள்களே!

நியாயமாக CUTTING  பற்றித் தான் இந்த மடலை உனக்கு வரைய வேண்டுமென்று விரும்பியிருந்தேன். ஆனால் நேற்று நடந்த ஒரு விஷயம் என் சிந்தனையைத் தூண்டியது; சிரிக்கவும் வைத்தது!

நமது முட்டாள்கள் கழகத்தைச் சேர்ந்த தீவிரத் தொண்டர்கள் மூன்று பேர் என்னை நோக்கி நமது கழகக் கொள்கைகள் என்ன என்று கேட்டு விட்டனர். கேள்விகளா? என்னிடமா? விழிகள் சிவக்கும் முன்னர் அவர்கள் இருந்த இடத்தின் போர்டு என்னைக் கவர்ந்தது.சிரித்தேன். சிலிர்த்தேன்

அது டாஸ்மாக் கடை! அங்கு வேறு என்ன தான் முட்டாள்களால் கேட்க முடியும்?!

சுருக்கமாக, நமது கொள்கை என்னெவென்றால் நமக்குக் கொள்கையே கிடையாது என்பது தான். மாறி வரும் உலகில், கொள்கை ஒன்றை நிரந்தரமாகக் கொள்வது பகுத்தறிவுக்கு உகந்ததா? ஒத்ததா? நீயே சிந்தி! சீரிய முடிவை எடு.

இருந்தாலும் கேட்பவர்க்கு என்ன பதில் சொல்வது என்று சில முட்டாள்கள் கேட்கலாம். அதற்காகவே இந்த மடல்.

மதுரை! சங்கம் வளர்த்த மதுரை!! தமிழ் வளர்த்த மதுரை!!! ஆறு கடந்தன்ன அகல் நெடும் தெருக்கள் இருந்த மதுரை! ஐயகோ! இன்று அங்கு அனுப்பானடி சாக்கடை ஒன்று மட்டுமே அகன்று இருக்கிறது!

இந்த இழிநிலை மாற வேண்டாமா? சாக்கடைகள் சடுதியில் மறைய வேண்டாமா?

ஆகவே கொண்டேன் கோபம்! கண்டேன் விடையை!! ‘மதுரையைத் துறைமுகமாக்கு’ என்ற கொள்கை முழக்கத்தை உங்கள் முன் வைக்கிறேன்.

இது என்ன கிறுக்குத் தனமாக இருக்கிறது என்று சொன்னால் அவர்கள் வடவர்கள் என்று புரிந்து கொள்! நாம் வாழ்வதை விரும்பாத மடையர்கள் என்று தெரிந்து கொள்!

மதுரையைத் துறைமுகமாக்க கழகப் பொறியாளர்கள் விரிவான திட்டம் பல வைத்திருக்கின்றனர். அருகிலிருக்கும் கடலில் இருந்து ஒரு கால்வாயை வெட்டு; அதில் கடல் நீரைக் கொட்டு; பாராட்டாக, உன் முதுகில் ஒரு சொட்டு!

கால்வாய் அமைக்கிறேன் என்பதில் எனக்கு எவ்வளவு காசு பெயரும் தெரியுமா? அதில் உங்களது – கழகக் கண்மணிகளின் பங்கு பற்றிச் சொல்லவும் வேண்டுமா?

ஆண்டுகள் பல கழிந்தாலும் அமைக்க முடியாத திட்டம் என்று கோமாளிகள் கொக்கரித்தால் பதில் இதோ:- கடற்கரை அருகே உள்ள ஏதேனும் ஒரு நகரம் ஒன்றுக்கு மதுரை என்று பெயர் சூட்டி விட்டால் போயிற்று!

ஆக அடுத்த கொள்கை அமேஸான் நதியையும் அழகர் கோவில் ஆகாச கங்கையையும் இணை என்பது தான்!

ஆகாச கங்கை மறைந்தல்லவா உள்ளது என்று கேட்பவர்கள் காட்டுமிராண்டிகள்! அதைக் கண்டுபிடி; பிறகு அமேஸானை இணை என்கிறோம் நாம்,!

அமேஸானை சந்திரனுக்கு குழாய் மூலம் அனுப்பி அதை அழகர்கோவிலுடன் இணைக்க பத்து லட்சம் கோடி அளவில் நமது திட்டம் தயார்!

சுரண்டல் திட்டம் என்கிறார்களா, சுயநலமிகள்? அவர்கள் மனதில் என்ன ஓடுகிறது என்பதை அறிவேன் நான். சந்திரனிலிருந்து நாம் உழைத்துக் கொண்டு வரும் நீருக்குச் சந்திர தீர்த்தம் என்று பெயர் வைக்கத் தீர்மானிக்கிறார்கள் கொடூர சாணக்கியர்கள்.

அதை மதி நீர் என்றே அழைப்போம் என்பதை அப்போதைக்கு இப்போதே சொல்லி வைத்து விடுகிறேன்.

அன்பர்களே! நண்பர்களே!! ‘கொண்டையிலே ரோஜாப்பூ, கூடையிலே தாழம்பூ; தாழம்பூவில் பாம்பூ’ என்ற அரிய தமிழ் படத்திற்கு நான் திரைக்கதை, பாடல், வசனம் எழுதியது உங்களுக்கே தெரியும். அது நமது தியேட்டரில் நூறு நாட்கள் ஓடுகிறது. ஆனால் குல்லுக பட்டர்கள் மற்ற அனைத்து தியேட்டர்களிலும் இதை ஒரே காட்சியுடன் நிறுத்தி விட்டனர்.

அவர்களுக்கு ஒன்று சொல்வேன்; அதுவும் நன்று சொல்வேன். அமெரிக்க ஆலிவுட்டிலிருந்து வந்த ஆங்கிலேய திரைக்கதை வசனகர்த்தா ஆர்னால்ட் எப்படி அரிய தமிழில் இப்படி ஒரு டைட்டிலை டைட்டாக வைத்தீர்கள் என்று கேட்டு வியந்தார்.

அதற்கு என் பதில் என்ன தெரியுமா? ஒரு புன்சிரிப்பூ!

ஆனால் இதில் நான் எழுதிய அரிய தமிழ்ப் பாடல்களை நீங்கள் நன்கு அறிவீர்கள்!

வஞ்சியின் நெஞ்சமே! கொஞ்சமாய் கொஞ்சுமே! – இனி

உன் மடி மஞ்சமே! நான் தஞ்சமே!!

ஙொய்யாலோ! கொய்யாலோ! டிகி டிகிப்பி டிங்காலோ

என்ற இந்த இலக்கணத்துடன் கூடிய பாடலுக்கு தமிழ் அறிஞர்களும் முனைவர்களும் எப்படி கொண்டு கூட்டிப் பொருள் கொள்ளலாம்; இதன் சிறப்பான பொருள் என்ன என்பது பற்றிச் சந்துக்குச் சந்து சிந்து பாடி பட்டி மன்றம் அமைத்துக் கொண்டாடி வருவதை நீங்களே அறிவீர்கள்.

ஒரு கழக முட்டாள் இதைத் தன் முனைவர் பட்ட ஆய்வுக்காக எடுத்துக் கொண்டிருப்பதையும் இங்கு நான் சுட்டிக்காட்டக் கடமைப்பட்டுள்ளேன். இவருக்கு முனைவர் பட்டம் வழங்கப்பட்டு விட்டது என்றே கொள்ளலாம்; (இல்லாவிடில் என்ன நடக்கும் என்று நான் சொல்லி நீங்கள் தெரிந்து கொள்ள வேண்டியதில்லை)

முனைவர்களைப் பற்றி மட்டுமே ஒரு தமிழ் மடல் எழுத என் கை துடிக்கிறது! அதையும் விரைவில் எழுதி விடுவேன் என்று உறுதி கூறுகிறேன்!

உலக ஒலிபரப்பு நிறுவனமான ஏபிசி துரோகிகளின் தூண்டுதலின் பேரில் என்னைப் பேட்டி காண வந்தது – இந்தப் படம் விஷயமாக!

அவர்களை வரவேற்றேன். அவர்களுக்கு வாகை மலர் சூடினேன். பேப்பரையும் கொடுத்தேன். என்ன இது என்றனர். நீங்கள் கேட்க வேண்டிய கேள்விகள் என்றேன்.மயங்கி விழுந்தனர் மாபெரும் பேட்டியாளர்கள்!

இப்படி நாங்கள் பார்த்ததே இல்லையே, நாங்கள் அல்லவா கேள்விகளைத் தயாரிக்க வேண்டும் என்று அவர்கள் திகைக்க இந்தக் கேள்விகளுக்கு துணைக் கேள்விகள் மட்டும் நீங்கள் கேட்கலாம்; ஆனால் நான் அதற்கு பதில் கூற மாட்டேன் என்றேன்.

அவர்கள் போன இடம் தெரியவில்லை; இனி வரமாட்டார்கள் என்பது என் கணிப்பூ! இவர்கள் நம்மைப் பற்றி ஆய்வு செய்து வருபவர்கள்! அது எனக்குத் தெரியாதா, அவர்களை என்னால் முறிக்க முடியாதா, என்ன?!

அடுத்த மடலில் கட்டிங் பற்றிச் சொல்ல விழைவேன். தியேட்டர் உள்ளிட்ட இடங்களில் வழக்கம் போல உரிய கட்டிங்கை கொடுத்து விட்டிருப்பீர்கள் என்று நம்புகிறேன். நண்பர்களையும் அன்பர்களையும் இப்படி நிறையக் கொடுக்க ஊக்குவியுங்கள் என்று வேண்டி விரும்பிக் கேட்டுக் கொள்கிறேன்.

முட்டாள்கள் முன்னேற்றக் கழகத் தலைவர்

–subham-