Picture posted by Lalgudi Veda

சூதாட்டத்துக்கு ரிக்வேதமும் தமிழ் வேதமும் எதிர்ப்பு (Post No.4905)

Written by London Swaminathan 

Date: 11 April 2018

Time uploaded in London –  21-20  (British Summer Time)

Post No. 4905

Pictures shown here are taken from various sources such as Facebook friends, Books, Google and newspapers; thanks. Pictures may be subject to copyright laws.

WARNING: PLEASE SHARE MY ARTICLES; BUT DON’T SHARE IT WITHOUT AUTHOR’S NAME AND THE BLOG NAME. BE HONEST; OTHERS WILL BE HONEST WITH YOU

தமிழ் வேதம் என்று திருவள்ளுவ மாலையில் புகழப்பட்ட திருக்குறளும், அதற்குப் பல ஆயிரம் ஆண்டுகளுக்கு முன் பாடப்பட்ட ரிக் வேதமும் சூதாட்டத்தின் கொடுமைகளை ஏசுகின்றன. சூதாட்டம் இன்றும் உலகெங்கிலும் இருக்கிறது. பல லட்சம் பேர் தினமும் லாட்டரி டிக்கெட் வாங்கி ஏமாறுகின்றனர். எங்கள் லண்டனுக்கு வந்தால் ஒவ்வொரு தெருவிலும் சூதாட்டக் கடைகள் (betting shops) இரண்டு மூன்று இருக்கும். பெட்’ bet கட்டி ஏமாறுவதற்கு ‘முன் காலத்தில் குதிரைப் பந்தயம் பின்னர் நாய் பந்தயம் என்று இருந்தன. இன்றோ பனி மழை பெய்யுமா, கால்பந்தில் யார் முதல் ‘கோல்’ போடுவார்கள் கிரிக்கெட்டில் எத்தனை ‘ரன்’களில் ஒரு அணி ஜெயிக்கும், தேர்தலில் யார் வெல்லுவார்கள்? என்று பல நூறு விஷயங்கள் சம்பந்தமாக பெட் BET கட்டி ஏமாறலாம்!

மஹாபாரதக் கதையின் அடிப்படையே சூதாட்டம்தான் என்பதை நாம் அறிவோம். மனு ஸ்ம்ருதியும் சூதாட்டத்தைக் கண்டிக்கிறது. இது போல திருவள்ளுவரும் ரிக்வேத ரிஷிகளும் சூதாட்டத்தைக் கண்டிக்கின்றனர்.

சூது என்ற தமிழ் சொல்லே ‘த்யூத’ என்ற ஸம்ஸ்க்ருத சொல்லில் இருந்து வந்தது என்று மொழியியல் வல்லுநர்கள் மொழிவர். ஆனால் நானோ தமிழும் ஸம்ஸ்க்ருதமும் ஒரே குடும்ப மொழிகள் என்றும் அவை கிளைவிட்டுப் பிரிந்து சில ஆயிரம் ஆண்டுகள் உருண்டு ஓடியதால் இரண்டும் வேறு மொழிகள் போல தோன்றுகின்றன என்றும் பல நூறு சொற்கள், சந்தி இலக்கணம், வேற்றுமை உருபுகள் மூலம் நிரூபித்து வருகிறேன். நிற்க.

சூது என்னும் தலைப்பில் வள்ளுவன் பத்து குறள் பாடி வசை பாடி இருக்கிறான். ஆகையால் மஹா பாரத காலத்துக்குப் பின்ன ரும் ஆயிரக் கணக்கான ஆண்டுகளாக சூதாட்டம் நடைபெற்று வருவதை  அறிகிறோம். அந்தக் காலத்தில் இப்போது போல betting shop பெட்டிங் ஷாப் இல்லாவிடினும் மன்றம், கழகம், சபா (அவை) என்ற இடங்களில் சூதாட்டக்காரகள் சந்தித்து விளையாடியதை அறிகிறோம்.

குறள் 931 முதல் 940 வரை சூதாட்டக் கொடுமைகளைப் பகரும். ரிக் வேதத்தில் பத்தாவது மண்டலம் 34 ஆவது பாடல் கவச ஐலூஷன் பாடியது. அதிலுள்ள கருத்துகளை வள்ளுவனும் பிற்காலத்தில் சொல்லி இருக்கிறான்.

சூதாட்டத்தால்  உடை, செல்வம், உணவு, புகழ், கல்வி என்ற ஐந்தும் ஒருவன்  இடத்தில் வராது (939) என்பான் வள்ளுவன்.

ரிக் வேத சூதாட்ட துதியோ இதை நன்கு விளக்குகிறது: இதோ ரிக் வேத துதியின் சாராம்சம்:

1.சூதாட்டமும் சோம பானம் போல இன்பம் தருகிறது.

2.என் மனைவி என்னிடத்திலும் நண்பர்கள் இடத்திலும் அன்பாகவே இருந்தாள்; கோபித்ததே இல்லை; ஆனால் சூதாட்டம் காரணமாக நான் அவளை இழந்தேன்.

3.என் மாமியார் என்னை வசை பாடுகிறாள் என் மனைவி என்னை எதிர்க்கிறாள்; கிழட்டு குதிரை போல நான் உள்ளேன்.

4.சூதாட்டக் காரனை மனைவி முதல் எல்லோரும் ஏசுகின்றனர். தந்தையும் சகோதரரும் திட்டுகின்றனர்.

5.இனிமேல் ஆடக்கூடாது என்று நினைப்பேன் அந்த தாயக்கட்ட காயுருட்டும் சப்தம் என்னை இழுக்கிறது . நான் காதலியைச் சந்திக்கும் இடத்துக்கு ஓடுவதுபோல ஓடுகிறேன்.

6.காய் உருட்டுவதைப் பார்த்த உடனே ஆர்வம் வந்து விடுகிறது.

7.சூதாட்டக்காரனை காய்கள் வருத்துகின்றன.

8.எவருடைய கோபமும் சூதாட்டக் காய்களைப் பாதிப்பதில்லை. அரசனும் அதை வணங்குகிறான்.

9.இதோ காய்கள் மேலேயும் கீழேயும் உருண்டு போகின்றன. அவை இதயத் துடிப்பை அதிகரிக்கின்றன.

10.மனைவியும் மகனும் வருந்துகின்றனர். சூதாட்டக்காரன் கடன்பட்டதால் திருடவும் செய்கிறான்.

11.மற்றவர்களுடைய மனைவி மக்களைப் பார்த்து வருந்துகிறான்

12.இறுதியில் ஒரு புத்திமதியுடன் கவிதை முடிகிறது:

நான் சொல்லுவதை நம்பு;  சூதாட்டம் ஆடாதே; நிலத்தைப் பண்படுத்தி பயிர் செய்; இதனால் செல்வம் கிட்டும்; இன்பம் வரும்; பசுக்கள் அதிகரிக்கும்; மனைவியும் உடன் இருப்பாள்!

13.தானியங்களே! எங்களிடத்தில் நட்புடன் இருங்கள். உங்கள் கோபத்தை என் எதிரிமேல் திருப்பி விடுங்கள் எங்கள் எதிரிகள் உங்களிடம் மாட்டிக்கொள்ளட்டும்

பத்து குறள்களையும் ரிக் வேத தாயக்கட்டத் துதியையும் ஒப்பிட்டால் இரண்டிலும் ஒரே கருத்தைக் காணலாம்!!

எண் 53

1.இந்தப் பாடலில் வேறு சில சுவையான விஷயங்களும் வருகின்றன. ‘விபிதகா’ என்ற மரத்தின் விதைகள் பகடைக் காய்களாகப் பயன்படுத்தப்பட்டன.

2.மௌஜவம் என்ற மலையில் சோமரசச் செடிகள் வளருகின்றன.

3.பகடை ஆட்டத்தில் 53 காய்கள் உள்ளன. இதை லுட்விக் என்பவர் 15 காய்கள் என்று மொழி பெயர்த்துள்ளார். சம்ஸ்க்ருதத்தில் ‘த்ரி பஞ்ச’ என்ற சொல் உளது.

4.’மகத்தான படையின் சேனாபதி’ என்பதற்கு ‘பகடைக் காயின் மிக உயர்ந்த எண்ணிக்கை’ என்று மொழி பெயர்க்கின்றனர்.

5.ஒன்றுமில்லை என்று கையை விரிப்பதற்குப் ‘பத்து விரல்கள்’ என்ற சொற்றொடர் உள்ளது. சாயனருடைய பாஷ்யம் கொடுக்கும் தகவலை வைத்தே நாம் இப்படி மொழி பெயர்க்கிறோம்.

–சுபம்–

Date- 8 April 2018

British Summer Time- 7-19 am

Written  by S Nagarajan

Post No.4893

Pictures are taken from various sources; thanks.

23-3-2018 பாக்யா வார இதழில் அறிவியல் துளிகள் தொடரில் வெளியாகியுள்ள (எட்டாம் ஆண்டு நான்காம்)  கட்டுரை

அட்லாண்டிஸ் மகா மர்மம் – அதிசயத் தகவல்கள்! – 1

ச.நாகராஜன்

அட்லாண்டிஸ் என்னும் மர்மத் தீவு அட்லாண்டிக் பெருங்கடலின் மத்தியில் உள்ளது.

இந்த அட்லாண்டிஸ் என்னும் அற்புதத் தீவு திடீரென்று மறைந்து போனது. அது தான் மர்மம். மிக பிரம்மாண்டமான அதிசயக்கத்தக்க நாகரீகத்தைக் கொண்டிருந்த மக்கள் அட்லாண்டிஸ் மக்கள்! கனவு தேசம் என்றே அதைச் சொல்லலாம். அந்த நாகரிகத்தின் ஞானம் மட்டும் இருந்தால் போதும் உலகம் அமைதியின் சொர்க்கமாகத் திகழும்! ஆகவே தான் லட்சியவாதிகள், மாயாஜால நிபுணர்கள், புது யுகம் காண விழைவோர் ஆகியோர் இதைப் பற்றி ஆராய்கின்றனர்.

ஆயிரக் கணக்கான புத்தகங்கள் இது வரை அட்லாண்டிஸ் பற்றி வெளியாகியுள்ளன. பல்லாயிரக்கணக்கில் பத்திரிகைக் கட்டுரைகளும் இணையதளக் கட்டுரைகளும் சுவாரசியமான தகவல்களை அள்ளி வீசுகின்றன.

இதை ஆராய்வதிலேயே தன் கோடிக்கணக்கான பணத்தைச் செலவிட்டோர் ஏராளம். தன் இன்னுயிரை விட்டவர்களும் கூட உண்டு!

அட்லாண்டிஸ் பற்றிய முதல் தகவலைத் தருபவர் கிரேக்க தேசத்து அறிஞரான பிளேட்டோ! தனது டயலாக்ஸ் – உரையாடல்கள் – என்ற நூலில் அட்லாண்டிஸ் பற்றி அவர் குறிப்பிடுகிறார். கிறிஸ்துவுக்கு முன் 330ஆம் ஆண்டு எழுதப்பட்ட நூல் இது!

அகழ்வாராய்ச்சி நிபுணரான பேராசிரியர் கென் ஃபெடர் (Ken Feder – Encyclopedia of Dubious Archaeology) தனது என்சைக்ளோபீடியா ஆஃப் டியூபியஸ் ஆர்கலாஜி என்ற நூலில், “அட்லாண்டிஸ் எல்லோரும் நினைப்பது போல ஒரு அருமையான இடம் இல்லை.மாறாக செல்வம் நிரம்பிய தொழில்நுட்பத்தில் மிகவும் முன்னேறிய, ராணுவத்தில் பலம் வாய்ந்த ஒரு நாடு. இதனால் லஞ்ச லாவண்யம் பெருகிய நாடாகவும் அது திகழ்ந்தது” என்கிறார்! ஏதன்ஸின் புகழ் பாட பிளேட்டோ அட்லாண்டிஸைப் பயன்படுத்திக் கொண்டார். அட்லாண்டிஸ் இன்று இருக்குமானால்

நம் அனைவரையும் கொன்றிருக்கும் அல்லது அடிமைகளாக ஆக்கி இருக்கும். மற்றவர் யாரும் எழுதாத அட்லாண்டிஸ் பிளேட்டோவின் கற்பனையில் விளைந்த ஒன்று என்கிறார் பேராசிரியர்.

அட்லாண்டிஸ் பற்றி ஆராய்ச்சியாளர்கள் பல கொள்கைகளை வகுத்துள்ளனர். அவற்றில் சில:-

அட்லாண்டிஸ் நாகரிகம் சுமார் 9000 வருடங்களுக்கு முன்பு இருந்தது. ஒரு பிரம்மாண்டமான கடற்படையை அது கொண்டிருந்தது!  ஒரே நாளில் அது கடலுக்கடியில் மூழ்கியது!

பல நூற்றாண்டுகளாக சரித்திர ஆசிரியர்களும், விஞ்ஞானிகளும், அகழ்வாராய்ச்சியாளர்களும் அட்லாண்டிஸ் உண்மையில் இருந்ததென்றால் எந்த இடத்தில் இருந்தது என்று விவாதத்தில் ஈடுபட்டு வந்துள்ளனர்.

I

இக்னேஷியஸ் டானெலி (Ignatius Donnelly)  என்பவர் 1882ஆம் ஆண்டு எழுதியுள்ள புத்தகத்தில்  (Atlantis, the Antedivluvian World) இன்னொரு அதி முன்னேறிய நாகரிகம் ஒன்று தான் அட்லாண்டிஸுக்கு அனைத்தையும் வழங்கி இருக்க வேண்டும் என்கிறார். பிளேட்டோ சொன்ன இடத்திலேயே இது மூழ்கி இருக்கலாம் என்று கூறும் அவர் பிளேட்டோ குறிப்பிடும் ஹெர்குலிஸ் தூண்கள் எனப்படும் இரு தூண்கள் ஜிப்ரால்டர் ஜலசந்தியின் நுழைவாயிலைக் குறிப்பதாக இருக்கலாம் என்கிறார். இன்னும் சிலர் அட்லாண்டிஸை பெர்முடா ட்ரை ஆங்கிள் விழுங்கி இருக்கலாம் என்கின்றனர். டானெலியின் வழியைப் பின்பற்றி சார்லஸ் பெர்லிட்ஸ் என்பவர் 1970களில் அட்லாண்டிஸ் பஹாமா தீவுகளுக்குச் சற்றுத் தள்ளி இருக்கிறது என்கிறார்.

பெர்முடா ட்ரை ஆங்கிள் மர்மமான இடம். பல நூறு கப்பல்கள் காணாமல் போன இடம் இதுவே. இந்தக் கொள்கையை ஆதரிப்போர் பிமினி என்ற கடற்கரையில் மனிதன் அமைத்தது போல உள்ள பல கட்டுமானங்களைச் சுட்டிக் காண்பிக்கின்றனர்.

இது ஒரு கொள்கை.

இன்னும் ஒரு கொள்கை இது:

சார்லஸ் ஹாப்குட் என்பவர் 1958ஆம் ஆண்டு ஒரு புத்தகத்தை வெளியிட்டார். இதற்கு பிரபல விஞ்ஞானியான ஆல்பர்ட் ஐன்ஸ்டீன் ஒரு முன்னுரை தந்துள்ளார். இந்தப் புத்தகத்தின் பெயர் ‘எர்த் ஷிப்டிங் தி க்ரஸ்ட்’ (Earth Shifing the Crust) இதில் பூமியின் மேலோடு 12000 ஆண்டுகளுக்கு முன்னால் இடம் பெயர்ந்தது என்றும் அது அண்டார்டிகாவை இடம் பெயரச் செய்து விட்டது என்றும் குறிப்பிட்டிருக்கிறார். இந்த கண்டமே முன்னேறிய நாகரிகத்தின் இடம் என்பது அவரது கருத்து. பூமியின் மேலோடு பெயர்ச்சியின் காரணமாக இந்த அருமையான நகரம் பனிக்கட்டிகளுக்கு அடியில் அமுங்கி விட்டது என்கிறார் அவர். இதைப் பல விஞ்ஞானிகளும் ஆதரிக்கின்றனர்.

இன்னும்  பல கொள்கைகள் உள்ளன. அவற்றை அடுத்துப் பார்ப்போம்.

அறிவியல் அறிஞர் வாழ்வில் .. ..

அமெரிக்க விண்வெளி வீராங்கனையான பெக்கி விட்ஸன் குழந்தைகளை விண்வெளி ஆர்வம் ஊட்டி உத்வேகப்படுத்த அவர்களைச் சந்திக்கிறார்.

சமீபத்தில் ஒரு சனிக்கிழமை அன்று குழந்தைகள் வரவழைக்கப்பட்டனர்.

செவ்வாய் கிரகம் பற்றி முதன் முதலில் விஞ்ஞானிகள் அறிந்தது எப்படி என்ற கேள்வி முதலில் எழுப்பப்பட்டது.

உடனடியாக இரு குழந்தைகள் பளீரென்று ‘க்யூரியாஸிடி’ என்று பதிலளித்து அனைவரையும் திகைக்க வைத்தன.

செவ்வாய்க்கு கொண்டு போக வேண்டிய முக்கிய பொருள் என்ன என்று கேட்ட போது குழந்தைகள், “தண்ணீர், தண்ணீர் தான் மிக அளவில் வேண்டும்” என்று பதில் அளித்தனர்.

பெக்கி விட்ஸன் நீரை மறு சுழற்சி செய்து பத்திரமாகப் பாதுகாக்க வேண்டியதன் அவசியத்தை விளக்கும் போது குழந்தைகள் மௌனமாக உன்னிப்பாக அவர் சொல்வதைக் கேட்டன.

ரீ சைக்ளிங் என்ற வார்த்தை அவர்களது ஆழ் மனதில் நன்கு பதிந்து விட்டது.

விண்வெளி வீரர்களின் ஆரோக்கியம் பற்றி அவர்கள் கேட்ட கேள்விக்கு வீராங்கனை, “இதற்கு விஞ்ஞான முன்னேற்றமே காரணம்” என்றார்.

கூட்ட இறுதியில் எத்தனை பேர் செவ்வாய் கிரகம் செல்ல ஆசைப்படுகிறீர்கள்? என்று கேட்ட போது அனைவரும் ஒரே குரலில் நாங்கள் அனைவரும் செல்ல ஆசைப்படுகிறோம் என்று கூறியது அனைவரையும் ஆச்சரியப்படுத்தியது.

இந்தியாவிலும் இப்படிப்பட்ட உத்வேகக் கூட்டம் நடக்க வேண்டும் என்று அனைவரும் ஆசைப்படுவது நியாயம் தானே!

***

அதிசய ரத்தினக் கற்கள்- கம்பன் பாடல்களில்! (Post No.4884)

Research article Written by London Swaminathan 

Date: 5 April 2018

Time uploaded in London –  8-49 am (British Summer Time)

Post No. 4884

Pictures shown here are taken from various sources such as Facebook friends, Books, Google and newspapers; thanks. Pictures may be subject to copyright laws.

WARNING: PLEASE SHARE MY ARTICLES; BUT DON’T SHARE IT WITHOUT AUTHOR’S NAME AND THE BLOG NAME. BE HONEST; OTHERS WILL BE HONEST WITH YOU

சுமார் ஆயிரம் ஆண்டுகளுக்கு முன்னர், தமிழில் ராமாயணத்தைத் தந்தான் கவிச் சக்ரவர்த்தி கம்பன். அவன் காலத்தில் சோழ வள நாடு சோறு மட்டுமின்றி ரத்தினக் கற்களிலும் செழிப்பாக இருந்தது. இதை அ வனது பாடல்களில் காண முடிகிறது. அது மட்டுமா?

அதிசய நாக ரத்தினம் பற்றியும், தொட்டதை எல்லாம் தங்கமாக்கும் ‘ஸ்பர்ஸ்வேதிக்’ கல் பற்றியும் கம்பன் பாடுகிறான். இது அக்கால நம்பிக்கைகளை எடுத்துக் காட்டுகிறது

‘ஸ்பர்ஸவேதி’ என்னும் கல்லை சித்தர்கள் வைத்திருந்தார்கள் என்றும் அதனால் அவர்கள் வேண்டிய அளவுக்குத் தங்கக் கட்டிகளைப் பெற்றார்கள் என்றும் இந்துக்கள் நம்புவர். மேலை நாட்டிலும் மத்திய காலத்தில் இப்படி ஒரு நம்பிக்கை இருந்தது.

கம்பன் சொல்வான்; ராமன் ஒர் ஸ்பர்சவேதிக் கல் போலும்; அவன் தொட்டதெல்லாம் தங்கம் ஆகி விடுகிறதே என்று!

நாகரத்தினம் உண்டு என்றும், இதைக் கொண்டே நாகங்கள் இரை தேடும் என்றும் தமிழர்கள் நம்பினர் (காளிதாசன் காவியங்களிலும், சங்கத் தமிழ் பாடல்களிலும் உள்ள விஷயங்களை ஏற்கனவே ஒரு ஆராய்ச்சிக் கட்டுரையில் கொடுத்துள்ளேன்)

கம்பன் இதைச் சொல்கிறான்:-

சுந்தர காண்டத்தின் நிந்தனைப் படலத்தில் சீதையைத் தேடி அசோக வனத்துக்குள் வந்த ராவணனை வருணிக்கும் கம்பன் செப்புவான்:-

ஒரு மணி தேடும் பல் தலை அரவின்

உழைதொறும் உழைதொறும் உலாவி

காம மயக்கத்தால் சீதை இருக்கும் இடத்தை மறந்து போன ராவணன், தன் ஒப்பற்ற மாணிக்கத்தை  இழந்த பல தலைப் பாம்பு போலப் பற்பல இடங்களிலும் அவளைத் தேடித் திரிந்தபடி வந்தான்.

அனுமன் கடலைத் தாண்டிய வேகத்தில் கடல் நீர் கிழிந்ததாம். அதில் பாதாள லோகமும் அங்கே வாழும் நாகர்களுடைய ரத்தினங்களும் மின்னியதாம்.

கீண்டது வேலை நல் நீர் கீழ் உறக் கிடந்த நாகர்

வேண்டிய உலகம் எல்லாம் வெளிப்பட மணிகள் மின்ன

–கடல் தாவு படலம், சுந்தர காண்டம்.

உருக் காட்டுப் படலத்தில் ராமனின் மோதிரத்தை அனுமான் சீதையிடம் கொடுத்தவுடன், மாணிக்கத்தைத் தேடும் பாம்புக்கு அந்த ரத்தினம் கிடைத்து விட்டால் எவ்வளவு மகிழ்ச்சி கொள்ளுமோ அது போல சீதையின் மன நிலை இருந்ததாம்.

‘இழந்த மணி புற்று அரவு எதிர்ந்தது எனல் ஆனாள்’– என்பான்.

வேதிகை மணி

அதிசயமான வேதிகை மணி பற்றிய பாடலும் சுந்தர காண்டம் உருக்காட்டுப் படலத்திலேயே வருகிறது:-

நீண்ட விழி நேரிழைதன் மின்னின் நிறம் எல்லாம்

பூண்டது ஒளிர்பொன் அனைய பொம்மல் நிறம் மெய்யே

ஆண்தகைதன் மோதிரம் அடுத்த பொருள் எல்லாம்

தீண்டு அளவில் வேதிகை செய்தெய்வ மணிகொல்லோ

பொருள்:-

நீண்ட கண்களையும் சிறந்த அணிகலன்களையும் உடைய சீதையின் மின்னல் போன்ற உடலின் நிறமானது, மோதிரத்தின் ஒளியால் பொன்னிறம் பெற்றுப் பொலிவும் பூண்டது. இது உண்மை! எனவே, இராமனது மோதிரம் தன்னை நெருங்கும் எல்லாப் பொருள்களும் தன்னைத் தீண்டுகிற மாத்திரத்தில் பொன்னாக மாற்றுகின்ற தெய்வத் தன்மை பெற்ற ஸ்பரிசவேதி என்னும் ரசவாத குளிகைதானோ?

ஆரண்ய காண்டம், சூர்ப்பநகை சூழ்ச்சிப் படலத்தில் ராவணன் மாணிக்கத் தேரில் ஏறி வந்ததாகவும் அங்கே ஒன்பது மணிகளால் (நவரத்னம்) ஆன மரங்கள் இருந்ததாகவும் கூறுகிறான்

‘மாணிக்க மானத்திடை மண்டபம் காண வந்தான்‘

‘பொற்பு உற்றன ஆய் மணி ஒன்பதும் பூவில் நின்ற‘

நவரத்தினத் தேர், நவரத்தின மோதிரம்!

ராமன் ஏறிய தேர் பற்றிய வர்ணனை மிகவும் சுவையானது;-

பொன் திரள் அச்சது வெள்ளிச் சில்லி புக்கு

உற்றது வயிரத்தின் உற்ற தட்டது

சுற்று உறு நவமணி சுடரும் தோற்றத்து

ஒற்றை ஆழிக் கதிர்த் தேரொடும் ஒப்பதே

–பால காண்டம்

ராமனின் தேரின் அச்சு-தங்கம், சக்கரம்-வெள்ளி, தேர்த் தட்டு- வைரம், பார்டர்- நவ அர் ரத்தினக் கற்கள், சூரியனின் ஒற்றைச் சக்கரம் போன்றது.

கிட்கிந்தா காண்டம், கார்காலப் படலத்தில் நவ ரத்தின மோதிரம் பற்றிய வருணனை வருகிறது:

நானிறச் சுரும்பும் வண்டும் நவமணி அணியின் சார- என்ற பாடலில் பல நிறங்களுடைய சுரும்புகளும் வண்டுகளும் நவ மணிகள் இழைக்கப் பெற்றுக் கைகளில் அணிந்து கொள்ளும் மோதிரம் வளை போலக் காந்தள் மலரில் மொய்த்தன– என்று வருகிறது.

இவ்வாறு நவரத்தினம், தங்கம், வெள்ளி பற்றிய குறிப்புகள் நிறையவே உள்ளன. இவை சோழர் கால செல்வ வளத்தின் எதிரொலி என்றால் மிகையாகாது.

My Old Articles: –

கம்பன், காளிதாசன் | Tamil and Vedas

https://tamilandvedas.com/tag/கம்பன்-காளிதாசன்/

18 Oct 2016 – விஷத்தை நீக்கும் இரத்தினக் கற்கள். மனு தம சாத்திரமும் விஷம் பாதிக்காமல் இருக்க அதற்கான ரத்தினக் கற்களை அணிய வேண்டும் என்கிறது (மனு 7-218).காளிதாசன் சொல்லுகிறான்:- ரகுவம்சம் 2-32. திலீபன் மேய்த்த தெய்வீகப் பசுவை சிங்கம் தாக்கியது. உடனே கோபமடைந்த …

ரத்தினக் கற்கள் | Tamil and Vedas

https://tamilandvedas.com/tag/ரத்தினக்-கற்கள்/

22 வகை ரத்தினக் கற்கள். மனிதருள் மாணிக்கம் என்று சிலரைப் போற்றுகிறோம்; ஆங்கிலத்தில் அவன் ஒரு ரத்தினம்என்று நல்லோரைப் போற்றும் மரபுச் சொற்றொடர் உண்டு. மாமன்னன் விக்ரமாதித்தன் அரசவையில் உலக மஹா கவிஞன் காளிதாசன் உள்பட ஒன்பது அறிஞர்கள் இருந்ததை …

நாகரத்தினம் பற்றி வராகமிகிரர் கூற்று …

https://tamilandvedas.com/…/நாகரத்தினம்-பற்றி-…

13 Feb 2015 – முடிவுரை: யாரேனும் எங்கேனும் நாகரத்தினக் கல் இருக்கிறது என்று சொன்னால் அவர்களிடம் ஏமாந்து போய்விடாதீர்கள். சங்கத் தமிழ் இலக்கியத்திலும் சம்ஸ்கிருத இலக்கியத்திலும் ஏதோ ஒரு உவமையாகத் தான் இதைப் பயன்படுத்தி இருக்கிறார்கள். நாக ரத்தினம் என்பது …

மாணிக்கம் | Tamil and Vedas

https://tamilandvedas.com/tag/மாணிக்கம்/

முடிவுரை: யாரேனும் எங்கேனும் நாகரத்தினக் கல் இருக்கிறது என்று சொன்னால் அவர்களிடம் ஏமாந்து போய்விடாதீர்கள். சங்கத் தமிழ் இலக்கியத்திலும் சம்ஸ்கிருத இலக்கியத்திலும் ஏதோ ஒரு உவமையாகத் தான் இதைப் பயன்படுத்தி இருக்கிறார்கள். நாக ரத்தினம் என்பது உவமையே …

TAGS- ரத்தினக் கற்கள், நவரத்தினம், நாக ரத்தினம், வேதிகை மணி,  தங்கம் ஆக்கும் கல்

—சுபம்–

Written by London Swaminathan 

Date: 21 MARCH 2018

Time uploaded in London – 21-16

Post No. 4838

Pictures shown here are taken by london swaminathan

WARNING: PLEASE SHARE MY ARTICLES; BUT DON’T SHARE IT WITHOUT AUTHOR’S NAME AND THE BLOG NAME. BE HONEST; OTHERS WILL BE HONEST WITH YOU.

தமிழ்நாட்டில்  விழுப்புரம் அருகிலுள்ள திருவக்கரை– வக்ரகாளியம்மன் கோவிலாலும், பாடல் பெற்ற சிவன் கோவிலாலும் பக்தர்கள் இடையே பிரபலமான இடம். ஆனால் கோவிலுக்கு சில மைல் தொலைவில் ஒரு பெரிய இயற்கை அதிசயம் இருப்பது பலருக்கும் தெரியாது.

புவியியல் துறையினர் ஒரு போர்டா (board)வது வைத்து மக்களை ஈர்க்க வேண்டும்

என்ன அதிசயம்?

திருவக்கரையில் ஒரு கல் மரப் பூங்கா இருக்கிறது. அங்கே இரண்டு கோடி ஆண்டுப் பழமையான கல் மரங்கள் இருக்கின்றன. 247 ஏக்கர் பரப்புக்கு இந்தக் கல் மரங்கள் இருந்தாலும், சிறிய இடத்தை மட்டும் பொது மக்களின் பார்வைக்காக ஒதுக்கியுள்ளனர். அனுமதி இலவசம். ஒர் காவற்காரர் மட்டும் அங்கேயிருந்து வருவோர் போவோரிடம் ஒரு நோட்டுப் புத்தகத்தில் கையெழுத்து வாங்குகிறார்; பாராட்ட வேண்டிய பணி.

கல் மரம் என்றால் என்ன?

கோடிக்கணக்கான ஆண்டுகளுக்கு முன் காடுகளில் இருந்த சில மரங்கள் மட்டும் காலப்போக்கில் கல் போல ஆகி விடுகின்றன. அதாவது மரத்தில் இருந்த செல் cell போன்ற உயிருள்ள பகுதிகளில் சிலிகா silica எனப்படும் மணல் புகுந்து கற்கள் ஆகி விடுகின்றன. ஆனால் தோற்றத்தில் மரங்கள் எப்படி இருக்குமோ அப்படியே இருக்கும். இவ்வாறு 30 மீட்டர் நீளம் வரை மரங்கள் இருக்கின்றன. குறுக்களவு சுமார் ஒன்றரை மீட்டர்.

இந்த மரங்கள் பக்கத்திலுள்ள காடுகளில் இருந்து வெள்ளத்தில் அடித்து வரப்பட்டதாக ஆராய்ச்சியாளர் எண்ணுகின்றனர்.

அது எப்படித் தெரிந்தது?

இந்த மரங்களின் கிளைகள், இலைகள் இல்லாததால் இப்படி அடித்து வரப்பட்டிருக்கும் என்பது அவர்களின் துணிபு.

இந்த மரங்கள் பூக்கும் தாவரங்கள் (angiosperms), பூவாத் தாவரங்கள்(gymnosperms) ஆகிய இரண்டு வகையைச் சேர்ந்ததாகும்.

இவற்றைப் பாதுகாப்பதால் என்ன நன்மை?

உலகில் இப்படிப்பட்ட பல பூங்காக்கள் இருக்கின்றன. தமிழ்நாட்டில் அரியலூர் அருகில்கூட ஒரு கல் மரப் பூங்கா உளது. கல்லாகிப் போன மரங்களில் கூட ஆண்டுதோறும் ஏற்படும் வளையங்கள் (annular rings) இருப்பதால் இவை எவ்வளவு பழமையான மரங்கள் என்பதும் அக்கால காலநிலை எப்படி இருந்தது என்பதும் தெரியும்.

இதை முதலில் 1781ஆம் ஆண்டில் ஒரு ஐரோப்பியர் பார்த்து எழுதி வைத்துச் சென்றார். இப்பொழுது இது புவியியல் துறையின் (Geological Survey of India) கட்டுப்பட்டில் இருக்கிறது

மரங்கள் பற்றிய விவரங்கள், அவை எப்படித் தோன்றின என்ற விவரங்கள் அனைத்தும் பெரிய போர்டுகளில் இரு மொழிகளில் எழுதியும் வைத்துள்ளனர்.

சில பகுதிகளில், கோடிக் கணக்கான ஆண்டுகளுக்கு முன்னர் நிகழ்ந்த எரிமலை வெடிப்பு, வறட்சி முதலியனவற்றை அறியக்கூட கல் மரங்கள் உதவுகின்றன.

(யாரைக் கடவுள் காப்பாற்றுவார்?  பிளாக்குகளிலும், ஃபேஸ்புக்கிலும் வரும் கட்டுரைகளைத் திருடாமல் — எழுதியவர் பெயருடன் வெளியிடுபவர்களைக் கடவுள் காப்பாற்றுவார். யாருக்கு அரசியல், சமூக விஷயங்களில் கருத்துச் சொல்லவும், குறை கூறவும், கண்டிக்கவும் உரிமை உள்ளது? மற்றவர் படங்களையும் படைப்புகளையும் திருடாதவனுக்கு பேஸ்புக்கிலும் பிளாக்குகளிலும் கருத்துச் சொல்ல உரிமை உண்டு)

—சுபம்—