WRITTEN by S Nagarajan
swami_48@yahoo.com
Date: 27 April 2019
British Summer Time uploaded in London – 12-19
Post No. 6316
Pictures shown here are taken from various sources including google, Wikipedia, Facebook friends and newspapers. This is a non- commercial blog. ((posted by swamiindology.blogspot.com AND tamilandvedas.com))
தங்கப் பல்லக்கில் ஏற மறுத்த ராஷ்டிரபதி!
ச.நாகராஜன்
மஹா புருஷர்கள் மஹா புருஷர்கள் தான்! உயர்ந்த மனிதர்கள் உயர்ந்த மனிதர்கள் தான்!
இதை விளக்கும் ஒரு சம்பவம் பாரதத்தின் முதலாவது ராஷ்டிரபதி பாபு ராஜேந்திரபிரசாத் வாழ்க்கையில் நிகழ்ந்துள்ளது. அவர் கண்ட மஹா புருஷர் ஸ்ரீ சிருங்கேரி ஜகத்குரு சந்திரசேகர பாரதீ மஹாஸ்வாமிகள் ஆவார்.
1954ஆம் ஆண்டு. ஆகஸ்ட் மாதம். சிருங்கேரிக்கு மஹாஸ்வாமிகளை தரிசிக்க சிருங்கேரி வந்தார் பாபு ராஜேந்திர பிரசாத்.
அவருக்காக பலத்த வரவேற்பு ஏற்பாடாகி இருந்தது.
மஹாஸ்வாமிகளின் அந்தரங்க காரியதரிசியாக இருந்த ஸ்ரீ ஜி.எஸ்.நரசிம்மய்யா ராஷ்டிரபதியின் வருகையையொட்டி அவர் வருவதற்கு முதல் நாள் பிற்பகலில் மடத்தில் இருந்த வெள்ளிப் பல்லக்கை எடுத்து வெளியில் வைத்துச் சுத்தம் செய்து கொண்டிருந்தார். அப்போது ஆசார்யர் சாதுர்மாஸ்ய விரதத்தை மேற்கொண்டிருந்தார். விரதத்திற்காக அவர் சந்திரமௌலி தொட்டி என்ற கட்டிடத்தில் தங்கி இருந்தார். வெள்ளிப் பல்லக்கு சுத்தப்படுத்தப்படும் போது அந்தக் கட்டிடத்தில் உள்ள இரு கூடங்களை இணைக்கும் பாதை வழியாக ஆசார்யர் வந்தார். சுவர் வழியே இருந்த ஜன்னல் வழியாக வெள்ளிப் பல்லக்கு சுத்தம் செய்யப்படுவதைக் கண்டு நரசிம்மய்யாவிடம் விஷயம் என்ன என்று விசாரித்தார்.
பல்லக்கு ராஷ்டிரபதிக்காகத் தயார் செய்யப்படுகிறது என்பதைத் தெரிந்து கொண்ட அவர் ராஜேந்திர பிரசாத்தைப் பற்றி விசாரித்தார்.
அவரது உயர் குணங்கள் அவரை ஈர்த்தன.தேசத்திற்காக அவர் செய்த தியாகங்கள் உள்ளிட்ட அனைத்தையும் நரசிம்மய்யா ஒரு சில நிமிடங்களில் விவரித்து விட்டார். உடனே ஆசார்யர், ‘அவர் அப்படிப்பட்டவர் என்றால் அவரைத் தங்கப் பல்லக்கிலேயே அழைத்து வரலாமே’ என்றார்.
ஆசார்யரின் அபிப்ராயத்தைத் தெரிந்து கொண்ட நரசிம்மய்யா உடனே தங்கப் பல்லக்கை ஏற்பாடு செய்து விட்டார்.
ராஷ்டிரபதி தனது காரில் வந்து இறங்கினார்.
அவருக்குப் பூரண கும்ப மரியாதை அளிக்கப்பட்டது. உள்ளூர்ப் பிரமுகர்கள் அறிமுகப்படுத்தப்பட்டனர். பின்னர் தங்கப் பல்லக்கு காரின் அருகில் கொண்டு வரப்பட்டது.
அதில் ஏறி அமருமாறு ராஜேந்திர பிரசாத் வேண்டிக் கேட்டுக் கொள்ளப்பட்டார்.
பல்லக்கைப் பார்த்த ராஜேந்திர பிரசாத் தயங்கினார். அதைப் பற்றி விசாரிக்க ஆரம்பித்தார்.
அது ஜகத்குரு மட்டுமே பவனி வரும் பல்லக்கு என்பதை அறிந்து திடுக்கிட்டார்.
தன்னைச் சுட்டிக் காட்டி, “அது அப்படி இருக்கும் போது என்னை அதில் ஏறச் சொல்கிறீர்களே” என்று கூறி பல்லக்கில் ஏற மறுத்து விட்டார்.
காரிலேயே சென்றார். பல்லக்கு எனக்கு முன்னால் போகட்டும் என்றார் அவர்.
அவர் தங்குமிடம் சந்திரமௌலி தொட்டியிலேயே ஏற்பாடு செய்யப்பட்டிருந்தது.
“இங்கு யார் தங்குவது வழக்கம்?” என்றார் ராஜேந்திர பிரசாத்.
சாதுர்மாஸ்ய விரதத்திற்காக ஜகத்குரு அவர்களே இங்கு வந்து பின்னால் உள்ள ஒரு அறையில் தங்கி இருக்கிறார் என்று பதில் வந்தது.
இதைக் கேட்டுத் திகைத்துப் போனார் அவர்.
ஜகத்குரு தங்குமிடத்தில் தன்னைப் போன்ற “சாமானியன்” தங்கலாமா என எண்ணினார் போலும்!
“இந்தப் புனிதமான கட்டிடத்தில் நான் எப்படி சாப்பிடவோ தூங்கவோ முடியும், அது பெரும் அபசாரம் அல்லவா, என்னால் முடியாது” என்று பரபரப்புடன் சொல்லி விட்டார் அவர்.
அவரை அனைவரும் சமாதானப்படுத்த ஆரம்பித்தனர்.
அவர் அங்கு தங்குவது தான் ஜகத்குருவிற்கு மகிழ்ச்சியை அளிக்கும் என்று முத்தாய்ப்பாக அவர்கள் கூறியவுடன் அதை ஏற்று அங்கேயே தங்கினார் அவர்.
விசேஷ அர்ச்சனை நடந்தது. இரு முறை இரு ஜகத்குருக்களின் தரிசனமும் ஆசீர்வாதமும் அவருக்குக் கிடைத்தது.
பெரும் மகிழ்ச்சியுற்றார் அவர்.
நான் முன்பே இங்கு வந்திருக்க வேண்டும் என்று தனது எண்ணத்தை வெளியிட்டார் அவர்.
மகத்தான ஆசார்யர்களை உயர்ந்த மனிதர்கள் சந்திக்கும் போது ஏற்படும் வெளிப்பாடுகள் பார்ப்பவரைப் பரவசமாக்குகின்றன!
***
ஆதாரம் : ஸ்ரீ ஜி.எஸ்.நரசிம்மய்யா எழுதியுள்ள கட்டுரை-
இடம் பெற்ற நூல் :-
ஸ்ரீ குரு கிருபா விலாஸம் மூன்றாம் பாகம், 333 பக்கங்கள், விலை ரூ 150/ வெளியிட்டோர் : ஸ்ரீ சந்திரசேகர பாரதீ ப்ரஹ்ம வித்யா டிரஸ்ட். கிடைக்குமிடம் : ஸ்ரீ சிருங்கேரி மடம், சிருங்கேரி.
***
Tamil and Vedas 