Written by london swaminathan

Date: 1 February 2016

Post No. 2497

Time uploaded in London :–  10-11 AM

( Thanks for the Pictures  ) 

DON’T REBLOG IT AT LEAST FOR A WEEK!  DON’T USE THE PICTURES; THEY ARE COPYRIGHTED BY SOMEONE.

(for old articles go to tamilandvedas.com OR swamiindology.blogspot.com; contact 

swami_48@yahoo.com)

இந்துக்கள், ராசிச் சக்கரத்தை மேஷ, ரிஷபம் முதலிய 12 ராசிகளாகப் பிரித்து, அதனடிப்படையில் பொதுப் பலன்களைக் காண்கிறார்கள். இன்றும் கூட ஆங்கில, தமிழ் பத்திரிக்கைகள் ஜோதிடப் பலன் கூறும் பகுதிகளை வெளியிடுகின்றன. இது போலவே சீனர்கள் ராசிச் சக்கரத்தை 12 ஆகப் பிரித்து அவைகளுக்கு பிராணிகளின் பெயர்களைக் கொடுத்திருக்கிறார்கள். பிப்ரவரி 8, 2016 ஆம் ஆண்டு முதல் ஓராண்டு, குரங்கு ராசியின் கீழ் வருகிறது. இதற்கான பலன்கள் சீனப் பத்திரிக்கைகளில் உள்ளன.

நான் ஜனவரி 2016ல் ஹாங்காங்கிலும் ஆஸ்திரேலியாவிலும் 16 நாட்கள் சுற்றுப் பயணம் செய்தபோது கண்ட காட்சிகளை மட்டும் எழுதுகிறேன்.

1.நான் சாப்பிடப் போன பெரும்பாலான வீடுகளிலும், உணவு விடுதிகளிலும் சிவப்பு நிற ரிப்பனில் சீன எழுத்துக்கள் பொறிக்கப்பட்ட அதிர்ஷ்டப் பட்டைகள் தொங்கின. எனது குடும்பத்தினரும், என்றாவது ஒரு நாள் லாட்டரி பரிசு கிடைக்கும் என்ற நம்பிக்கையில் ஹாங்காங் மார்க்கெட்டில் சில அதிர்ஷ்ட சின்னங்களை விலைக்கு வாங்கினர்.

எல்லாருடைய வீடுகளிலும் கடையிலும் சிரிக்கும் புத்தர் சிலைகள் இருக்கின்றன. இதுவும் ஒரு அதிர்ஷ்டச் சின்னம்.

2. ஹாங்காங்கில் பெரிய அலங்காரத் தோட்டத்துடன் உள்ள புகழ்பெற்ற Wong Tai Sin கோவிலுக்குப் போனோம். வாங் டாய் என்பவர் 1600 ஆண்டுகளுக்கு முன்னர் வாழ்ந்த ஒரு புனிதர். அவர் பெயரில் இக்கோவில் இருந்தாலும், மும்மதத்தினரின் சின்னங்கள், சிலைகள் இங்கே உள்ளன. அங்கு கன்பூஷியஸ், டாவோ, புத்தர் போன்ற பெரியோர்களை வணங்குகின்றனர். கோவிலுக்கு வெளியே பிரகாரத்தில் 12 ராசிகளைக் குறிக்கும் 12 பிராணிகளும் இரண்டு ஆள் உயரத்துக்கு சிலைகளாக வடிவமைக்கப்பட்டுள்ளன. அதன் கீழ், அந்தந்த ராசிக்காரர்கள் நின்று தனது விருப்பத்தைச் சொன்னால், அது நிறைவேறும் என்ற நம்பிக்கை உள்ளது. இதன் காரணமாக எல்லா சீனர்களும் அதன் கீழ் நின்று புகைப்படம் எடுத்துக் கொண்டனர்.

இங்கு 5 பெங்சுயி சின்னங்களும் (உலோகம், மரம், நிலம், நீர், தீ) இருக்கின்றன. மேலும் கோவிலுக்கு வெளியே குறிசொல்லுவோர் கடைகளும் இருக்கின்றன. அங்கு போய், காசு கொடுத்து சோதிடம் கேட்கலாம். மூன்று முனிவர் மண்டபம், கன்பூசியஸ் மண்டபம் ஆகியன உள்ளன.

கோவிலுக்கு வருவோர் மண்டியிட்டு, ஊதுவத்தி கொளுத்தி வழிபடுவர். நம்பிக்கையுடையோர் ‘கௌசிம்’ முறையில் ஜோதிடம் பார்ப்பர். ஒரு மூங்கில் குழாயிலுள்ள அதிர்ஷ்டக் குச்சிகள் விழுமாறு குலுக்குவர். அப்படிக் குலுக்குபவர், தன் மனதில் என்ன வேண்டுமோ அதை நினைத்துக் குலுக்குவர். முதலில் விழும் குச்சியைக் கொடுத்து அதே நம்பருள்ள ஒரு சீட்டை வாங்குவர். அதைசோதிடரிடம் காட்டினால் அவர் அதற்கு விளக்க்ம் சொல்லுவார். நம்மூரில் கிளி எடுத்துக் கொடுக்கும் கார்டை, ஒரு கிளி ஜோசியன் படித்து விளக்குவது போல இது.

உங்கள் ராசி எது?

இத்துடன் பிரசுரிக்கப்படும் சீன ராசிச் சக்கரத்தைப் பார்த்தால் உங்கள் ராசி எது என்று தெரியும்.

ஒவ்வொரு சிலையும் சிவப்பு நிற ரிப்பனால் அலங்கரிக்கப்பட்டுள்ளது. சீனர்களுக்கும் புத்த மதத்தினருக்கும் சிவப்பு- அதிர்ஷ்ட வர்ணம். இந்துக்களுக்கும் அப்படியே. கல்யாணக் கூரைப்புடவை முதல் அம்மனுக்கு சார்த்தும் புடவை வரை எல்லாம் சிவப்பு வர்ணத்திலேயே இருக்கும்.

வாங் டாய் சின் கோவிலைச் சுற்றி பெரிய தோட்டம் இருக்கிறது. சின்னக் குளம், நீர்வீழ்ச்சி, சீன பாணி அலங்கார மண்டபங்கள் ஆகியன உண்டு.

3.ஆஸ்திரேலியாவில் மிகப் பெரிய புத்தர் கோவில் இருக்கிறது. பூமியின் தென்பகுதியில் மிகப்பெரிய கோவில் இந்த  நான் டியன் Nan Tien Temple கோவில்தான். இது சிட்னி நகரிலிருந்து 50 மைல் தொலைவில் உல்லாங்காங் என்னுமிடத்தில் இருக்கிறது. மூன்று அடுக்குகளில் அமைந்துள்ள இந்தக் கோவிலில் ஒரு புத்தர், 3 புத்தர்கள், 5 புத்தர்கள் என்று வெவ்வேறு சந்நிதிகள் உள்ளன. மேலேயுள்ள இரண்டு இடங்களிலும் செருப்புகள் அணியக்கூடாது. மற்ற எல்லா புத்தர் கோவில்களிலும் செருப்புகளை அணிந்தவாறு வழிபடலாம்.

இங்கும் சரி, ஹாங்காங் புத்தர் கோவிலிலும் சரி ஏராளமான கூட்டம். ஹாங்காங் கோவிலில் ஜேப்படித் திருடர்கள் (பிக் பாக்கெட்) ஜாக்கிரதை என்று ஒலிபெருக்கியில் அறிவித்துக் கொண்டே இருக்கின்றனர்.

4.சிட்னி அருகிலுள்ள கோவிலில் சீனர்களின் ஜோதிட நம்பிக்கையை மேலும் காண முடிந்தது. கற்பக மரம் போல விருப்பத்தைப் பூர்த்தி செய்யும் ஒரு மரம் இருக்கிறது. கோவிலில் விற்கும் சிவப்பு நிற ரிப்பனை பத்து டாலர் கொடுத்து வாங்கி அந்த மரத்தின் மீது எறிகிறார்கள். இப்படிச் செய்தால் நீங்கள் நினைத்த காரியம் வெற்றி பெறும். நாங்களும் 20 டாலருக்கு ரிப்பன் வாங்கி எறிந்தோம். லாட்டரி பரிசு விழுந்தால் உங்களுக்கும் சொல்லுவேன். நீங்களும் செய்யலாம்.

5.கோவிலுக்கு வெளியேயுள்ள திறந்த வெளியில் சீன ராசிச் சக்கரத்தின் 12 பிராணிகளும் பெரிய – ஆளுயர – பொம்மைகளாக நிற்கின்றன. அதன் கீழ் சீன மொழியிலும், ஆங்கிலத்திலும் ஒவ்வொரு ராசிக்கான பலன்களும் எழுதப்பட்டுள்ளன. அவரவர்கள் தனது ராசிக்கான பிராணியின் கீழ் நின்று புகைப்படம் எடுத்துக் கொண்டனர்.

சீனர்கள், ஜோதிட நம்பிக்கைக்காக எவ்வளவு செலவழிக்கின்றனர் என்பதை நினைத்தால் வியப்பாக இருக்கிறது. கம்யூனிசமோ, மாவோவின் கலாசாரப் புரட்சியோ, அவர்களின் நம்பிக்கையை அசைக்கவில்லை.

6.ஹாங்காங்கில் ஒரு முக்கிய சுற்றுலா இடம் விக்டோரியா பீக் அல்லது பீக் ட்ராம் (Victoria Peak or Peak Tram) என்பதாகும். ஒரு ட்ராம் ரயிலில் மிக உயரத்துக்குக் கொண்டு செல்லுவார்கள். அங்கிருந்து ஹாங் காங் முழுவதையும் ஒரு பறவை பார்ப்பது போலப் பார்க்கலாம். அங்கும் கூட 12 ராசிகளைச் சித்தரிக்கும் அதிர்ஷ்ட சின்னத்தை வைத்திருக்கின்றனர். சீனர்கள் எங்கெங்கு வசிக்கிறார்களோ அங்கெங்கெல்லாம் நான் மேலே சொன்ன எல்லா சின்னங்களையும் காணலாம்!

7.சிட்னியிலிருந்து லண்டனுக்குத் திரும்பும் வழியில், மீண்டும் ஹாங்காங் வந்தோம். அங்கு விமான நிலையத்தில் 15-ஆம் எண் ‘கேட்’டில் விமானத்தில் ஏறும் வழியில், பிரிட்டிஷ் ஏர்வேய்ஸ், பெரிய குரங்கு (Year of Monkey) பொம்மையுடன் இனிய புத்தாண்டு வாழ்த்துக்கள் தெரிவித்துள்ளனர். அங்கே ஜோதிட நம்பிக்கையும் கலாசார நம்பிக்கையும் ஒன்றுடன் ஒன்று இணைந்து எல்லைகள் மறைந்து விடுகின்றன.

-சுபம்-