WRITTEN BY S NAGARAJAN

Post No. 12,921

Date uploaded in London –  –   16 JANURARY 2024                 

Contact – swami_48@yahoo.com

Pictures are taken from various sources for spreading knowledge.

this is a non- commercial blog. Thanks for your great pictures.

tamilandvedas.com, swamiindology.blogspot.com

xxxx

10-1-2024 மாலைமலர் இதழில் வெளியாகியுள்ள கட்டுரை. இரு பகுதிகளாக இங்கு பிரசுரிக்கப்படுகிறது.

தாமஸ் ஆல்வா எடிஸன் – உழைப்பால் உயர்ந்த மேதை!

இன்னும் ஒரு முறை முயற்சிக்க வேண்டும்! – 1

ச.நாகராஜன்

வெற்றிக்கான வழிகாட்டி எடிஸன்

வாழ்க்கையில் வெற்றி பெற வெற்றிக்கான மந்திரத்தைத் தந்தவர் அமெரிக்கரான தாமஸ் ஆல்வா எடிஸன்.

“தோல்வி என்பது தோல்வியே அல்ல; அதை நீ ஒப்புக் கொள்ளாதவரை” என்று கூறியதோடு அப்படியே வாழ்ந்து காட்டிய மேதை எடிஸன்.

ஏராள்மான கண்டுபிடிப்புகளைத் தன் வாழ்நாளில் கண்டுபிடித்த எடிஸன் பெரிய உடல் குறைபாடுடன் வாழ்ந்தவர். ஆம், அவருக்குக் காது கேட்காது.

பள்ளியிலும் அவர் பயிலவில்லை. என்றாலும் கூடத் தளராத தனது உழைப்பினாலும், உற்சாகத்தினாலும் உலகை ஒளிர வைக்கும் மின்சார பல்பை முதலில் உருவாக்கினார். போனோகிராபை (கிராமபோன்) அவர் உருவாக்கினார். அனைவரையும் மனம் கவர வைக்கும் திரைப்படத் துறைக்கான  காமராவையும் அவரே கண்டுபிடித்தார்.

பிறப்பும் இளமையும்

அமெரிக்காவில் ஓஹையோ மாகாணத்தில் மிலன் என்ற ஊரில் 1847ஆம் ஆண்டு பிப்ரவரி மாதம் 17ஆம் நாளன்று சாமுவேல் எடிசன் மற்றும் ஜான்சி மேத்தியூஸ் ஆகிய இருவருக்கும் 7 வது மகனாக பிறந்தார் எடிசன். நான்கு வயது வரை அவருக்குப் பேச்சே வரவில்லை.

இளம் வயதில் ஸ்கார்லெட் எனும் காய்ச்சலினால் பாதிக்கப்பட்ட எடிசனுக்கு காது கேட்பதில் பிரச்சனை இருந்தது. பின்னால் ஒரு ஆபரேஷன் மூலம் குணப்படுத்திக் கொள்ளலாம் என்ற போதும் கூட அதை அவர் விரும்பவில்லை. ‘என் வாழ்க்கையில் ஒரு பறவையின் ஒலியையும் கூட நான் கேட்டதில்லை’ என்று பின்னால் அவர் குறிப்பிட்டார்.

மேஜையின் மீது தலையை வைத்து அங்கு எழும் அதிர்வுகளை அவர் மூளை கிரகித்தது. அதை வைத்தே நுட்பமான ஒலி அலைகளை அவர் துல்லியமாகக் கணித்தார். இந்த வியப்பூட்டும் திறனைக் கண்டு அனைவரும் பிரமித்தனர்.

தாயார் தந்த ஊக்கம்

அவர் ஏழாவது வயதில் பள்ளியில் சேர்ந்து படித்தது 12 வாரங்கள் மட்டுமே. ஹைபர் ஆக்டிவ் குழந்தை என்று சொல்லி அவரது தாயாரை பள்ளி நிர்வாகம் அழைத்து அவரை வீட்டுக்கு அழைத்துச் செல்லச் சொல்லி விட்டது.

அவரது தாயாரே அவருக்குக் கல்வி கற்றுத் தர ஆரம்பித்தார்.

‘என் வாழ்க்கையை வடிவமைத்தவர் எனது தாயார்’ என்று உளமுருகப் பின்னால் குறிப்பிட்டார் அவர்.

வீட்டின் அருகில் இருந்த ஒரு நீரோடையில் மூழ்கி இறக்கவிருந்தார் அவர்.

எதிலும் மிகவும் ஆழ்ந்து கவனத்தைச் செய்யும் எடிஸன் நூலகத்தில் உள்ள அனைத்துப் புத்தகங்களையும் படிக்க ஆரம்பித்தார்.

புதிய தொழில்நுட்பத்தில் ஈடுபாடு

ஆரம்ப காலத்தில் டெலகிராப் ஆபரேட்டராக அவர் பணி புரிந்தார்.

பதிமூன்றாம் வயதில் புகைவண்டியில் நாளிதழ்களை விற்க ஆரம்பித்தார். பின்னர் கிராண்ட் ட்ரங்க் ஹெரால்ட் என்ற பத்திரிகையை பிரசுரித்து அதை புகைவண்டியில் விற்க ஆரம்பித்தார்.

புகைவண்டியில் ஒரு நாள் மூன்று வயது குழந்தையை விபத்திலிருந்து அவர் காப்பாற்றவே குழந்தையின் தந்தை அவருக்கு டெலகிராபியை கற்றுத் தந்தார். இதனால் அவருக்கு அந்தத் தொழில்நுட்பத்தில் ஆழ்ந்த ஈடுபாடு ஏற்பட்டது.

1876ஆம் ஆண்டு கலிபோர்னியாவில் மென்லோ பார்க்கில் தனக்குத் தானே ஒரு சிறிய சோதனைச் சாலையை அவர் அமைத்துக் கொண்டு புதிய கண்டுபிடிப்புகளில் ஈடுபடலானார்

மின்சார பல்பு

ஒன்றரை வருடம் அரும்பாடு பட்டு உலகின் முதல் இன்காண்டஸ்சென்ட் பல்பை – வெப்பத்தால் ஒளிரும் பல்பை – கண்டுபிடித்தார்.

அது உலகையே மாற்றியது; உலகமே ஒளிமயமாக வழி வகுத்தது. 1879ஆம் ஆண்டு டிசம்பர் மாதம் 31ஆம் தேதி தனது சோதனைச்சாலையிலேயே பல்பை அமைத்து ஒளிர வைத்து அனைவரையும் ஆச்சரியப்பட வைத்தார்.

அமெரிக்க ஜனாதிபதி ருதர்போர்டு பி. ஹேயஸ் அவரை அழைக்கும் அளவு அவர் புகழ் பரவ ஆரம்பித்தது.

அடுத்து போனோகிராப் (கிராமபோன்), திரைப்பட காமரா ஆகியவற்றை அவர் கண்டுபிடிக்கவே உலகம் பிரமித்தது. 1896ஆம் ஆண்டு ஏப்ரல் மாதம் 23ஆம் தேதி உலகின் முதல் திரைப்படத்தை அவர் திரையிட்டுக் காட்டினார்.

ஹென்றி போர்டின் மாடல் டி காருக்காக செல்ஃப் ஸ்டார்டருக்கான பேட்டரியையும் அவர் உருவாக்கித் தந்தார்.

தனது பகுதியில் வாழும் மக்களுக்கு மின்சார விநியோகத்திற்கான கருவிகளையும் அவர் கண்டுபிடித்துத் தரவே மக்கள் வெகுவாக அவரைப் பாராட்ட ஆரம்பித்தனர்.

ஸ்டாக் டிக்கர் என்ற அவரது கண்டுபிடிப்பு தகவல் பரிமாற்றத்திற்கு வெகுவாக உதவ ஸ்டாக் மார்க்கட் அதைப் பயன்படுத்த ஆரம்பித்தது. 40000 டாலரை அவர் பெற்றார். இது அவரது வாழ்க்கையில் பொருளாதார முன்னேற்றத்திற்கு வழி வகுத்தது.

அதிலிருந்து அவருக்கு வெற்றி மேல் வெற்றி தான் வந்தது.

தோல்வியே வெற்றிக்கான முதல் படி

மின்சார பல்பைக் கண்டுபிடிப்பதில் ஆயிரம் முறை தோல்வி அடைந்து விட்டீர்களே என்று அவரைப் பார்த்துக் கேட்ட போது, “யார் அடைந்தது தோல்வி, ஆயிரம் வழிகளில் இதைச் செய்ய முடியாது என்று நான் கண்டுபிடித்திருக்கிறேன்” என்று பதில் கூறினார்.

தோல்வி என்பதை அவர் ஏற்கவே இல்லை. நாளுக்கு பதினெட்டு மணி நேரம் உழைத்த அவர் 1093 கண்டுபிடிப்புகளுக்கு வடிவமைப்பு உரிமையைப் பெற்றார். 2500 குறிப்பு புத்தகங்களில் தனது சோதனைகளை அவர் எழுதி வைத்திருந்தார்.

திருமண வாழ்வு

ஆயிரத்தி எண்ணூற்று எழுபதுகளில் தனது நிறுவனத்தில் வேலை பார்த்த 16 வயது பெண்ணான மேரி ஸ்டில்வெல்லை எடிஸன் திருமணம் செய்து கொண்டார். இரு குழந்தைகள் பிறந்தன. டெலகிராபி மீதுள்ள ஆர்வத்தினால் ஒரு குழந்தைக்கும் டாட் என்றும் இன்னொரு குழந்தைக்கு டேஷ் என்றும் செல்லமாகப் பெயரிட்டு அழைத்தார்.  மேரி 1884ஆம் ஆண்டு மரணமடையவே 1886இல் மினா மில்லர் என்பவரை திருமணம் செய்து கொண்டார். இதன் பின்னர் அவர் நியூ ஜெர்ஸியில் வெஸ்ட் ஆரஞ்ச் என்னுமிடத்திற்குச் சென்று அங்கு ஒரு பெரிய சோதனைச் சாலையை நிறுவினார். முதலில் ஐந்து கட்டிடங்களாக இருந்த ஆய்வுக்கூடம் 25 ஏக்கர் பரப்பளவில் பத்தாயிரம் பேர்களை வேலைக்கு அமர்த்திய பெரும் நிறுவனமாக வளர்ந்தது.

அதிகமாக சம்பளம் தராத போதும் கூட இளைஞர்கள் அவரிடம் வேலை பார்க்க போட்டி போட்டுக் கொண்டு வந்தனர்.

***     தொடரும்