WRITTEN BY S NAGARAJAN

Post No. 9813

Date uploaded in London – 4 JULY   2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

ஸ்வாமி விவேகானந்தர் சமாதி தினம் ஜூலை 4; அவர் நினைவைப் போற்றுவோம்!

உலகத்தோரின் துன்பத்தைக் கண்டு உருகி அழுத உத்தமர்!

ச.நாகராஜன்

ஸ்வாமி விவேகானந்தர் உள்ளம் பத்தரை மாத்து தங்கத்தை விடச் சுத்தமானது; விலை மதிப்பே கணக்கிட முடியாதது.

முதல் தடவை அமெரிக்காவை ஒரு கலக்கு கலக்கி ஹிந்து மத மேன்மையை அங்கு அனைவருக்கும் உணர்த்தி விட்டு அவர் இந்தியா திரும்பிய சமயம் அது. பலராம் போஸ் வீட்டில் அவர் தங்கியிருந்தார். ஒரு நாள் அவரைக் காண அவரது சக துறவியான துரியானந்தர் வந்தார். ஸ்வாமிஜி வாரந்தாவில் தனியே நடந்து கொண்டிருந்தார். ஆழ்ந்த சிந்தனை அவருக்கு. அவர் துரியானந்தர் வந்ததைக் கவனிக்கவே இல்லை. சிறிது நேரம் கழித்து மீராபாயியின் கீதம் ஒன்றை ஹம்மிங் செய்யலானார் ஸ்வாமிஜி. அப்போது அவர் கண்களிலிருந்து நீர் பெருகி ஓடிற்று. அவர் தன் கைகளால் முகத்தை மூடிக் கொண்டார். அங்கிருந்த கைப்பிடியைப் பிடித்துக் கொண்டு அதில் சாய்ந்தார். தொடர்ந்து பாட ஆரம்பித்தார்.

“ஓ! யாருமே எனது துயரைப் புரிந்து கொள்ள மாட்டேன் என்கிறார்களே!

யாருக்கு இரத்தம் வடியவில்லையோ, அவருக்கு வேதனை புரியாது”

அவர் கீதம் தொடர்ந்தது!

   பின்னால் இந்த சம்பவத்தைக் கூறிய துரியானந்தர், “ அவரது வார்த்தைகள் என் நெஞ்சைக் கூரிய அம்புகள் பிளந்தது போல் பிளந்தன. எனக்குக் கண்ணீரை வரவழைத்தன.” என்றார்.

ஸ்வாமிஜி எந்தக் காரணத்திற்காக இப்படி உருகுகிறார் என்பதை அறியாத துரியானந்தர் மிகவும் வருத்தப்பட்டார். ஆனால் அவர் மனதில் பளிச்சென ஒரு எண்ணம் தோன்றியது. “உலகினர் படும் துன்பங்களைக் கண்டு வேதனை தாள முடியாமல் தான் அவர் கண்ணீர் பெருக்கினார். ஒடுக்கப்பட்டவர்களுக்காகவே அவர் உருகி அழுதார்” – இந்த எண்ணம் தான் ஸ்வாமிஜியின் வருத்தத்திற்குக் காரணமாகத் துரியானந்தருக்குத் தோன்றியது.

ஸ்வாமிஜி உலகனைத்திற்கும் உரித்தானவர் அல்லவா!

*

இரண்டாவது முறையாக அமெரிக்க விஜயம் மேற்கொண்டார் ஸ்வாமிஜி. ஒரு நாள் நதிக் கரையோரம் அவர் நடந்து சென்று கொண்டிருந்தார். அங்கு நதிக்கரையில் ஒரு இளைஞர்கள் கூட்டம் குழுமி இருந்தது. அவர்கள் நீரில் தோன்றும் நீர்க்குமிழிகளைக் குறிபார்த்து சுட்டுக் கொண்டிருந்தனர்.  ஆனால் ஒருவருக்கும் வெற்றி தான் கிடைக்கவில்லை. ஸ்வாமிஜிக்கு இந்தக் காட்சி வேடிக்கையாக இருந்தது. அவர் பார்ப்பதைக் கண்ட இளைஞர்களுள் ஒருவன், “இது ஒன்றும் அவ்வளவு சுலபமான விஷயம் இல்லை, சார்! நீங்கள் வேண்டுமானாலும்  முயற்சி செய்து பாருங்கள்” என்றான்.

ஸ்வாமிஜி ஒன்றும் சொல்லவில்லை. அவனிடமிருந்து துப்பாக்கியைப் பெற்றுக் கொண்ட அவர் குறி பார்த்து நீர்க் குமிழிகளைச் சுடலானார். ஒன்றல்ல, இரண்டல்ல, பன்னிரெண்டு குமிழிகளைத் தொடர்ந்து அவர் சுட்டார்.

இளைஞர்கள் அனைவரும் பிரமித்துப் போயினர். இவர் ஒரு மார்க்கர் – குறி பார்த்துச் சுடுவதில் வல்லவர் – என்று அவர்கள் பேசிக் கொண்டனர்.

ஸ்வாமிஜி அவர்களிடம் கூறினார்:” நான் எனது வாழ்க்கையில் ஒரு போதும் துப்பாக்கி ஏந்தி சுட்டதில்லை. இப்படிச் சுட முடிந்ததற்கான காரணம் கான்செண்ட்ரேஷன் – ஒரு முனைப்பட்ட கவனக் குவிப்பு தான் “ என்றார்.

*

நூற்றுக் கணக்கான அபூர்வமான சம்பவங்கள் ஸ்வாமிஜியின் வாழ்க்கையில் நிகழ்ந்துள்ளன.

அவர் ஜூலை நான்காம் தேதி சமாதி எய்தினார். அவர் நினைவைப் போற்றுவோமாக!

***

INDEX

ஸ்வாமி விவேகானந்தர்

ஸ்வாமி துரியானந்தர்

மீராபாய் கீதம்,

உலகினருக்கான கீதம்

அமெரிக்கா இரண்டாவது முறை விஜயம்

நீர்க்குமிழிகளைக் குறிபார்த்து 12 முறை சுட்டது,

ஒருமுனை கவனக் குவிப்பு தான் காரணம்

ஜூலை 4, ஸ்வாமிஜி சமாதி தினம்

tag- ஸ்வாமி விவேகானந்தர்

WRITTEN BY S NAGARAJAN

Post No. 9811

Date uploaded in London – 4 JULY   2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great

பகவான் ரமண மஹரிஷி வாழ்வில் அற்புத சம்பவங்கள்!

ச.நாகராஜன்

பகவான் ரமண மஹரிஷி வாழ்வில் ஏராளமான அற்புத சம்பவங்கள் நடந்துள்ளன. இவற்றை மஹரிஷியின் அணுக்கத் தொண்டர்கள் நன்கு பதிவு செய்து வைத்துள்ளனர். அவற்றில் சிலவற்றை இங்கு காண்போம்:

1

ஸ்ரீ T.V. கபாலி சாஸ்திரிகள் 3-9-1886 அன்று சென்னையில் மைலாப்பூரில் பிறந்தவர். 17-8-1953 அன்று பாண்டிச்சேரியில் மறைந்தார்.

1911ஆம் ஆண்டு அவர் மஹரிஷியின் வட்டத்துக்குள் வந்தார். அவர் The Maharshi என்று ஒரு புத்தகத்தை எழுதியுள்ளார். அதில் அவர் குறிப்பிடும் ஒரு சம்பவம் இது:

ஒரு சமயம் மஹரிஷி மலை மீது வசித்துக் கொண்டிருந்தார். வேடன் ஒருவன் ஒரு மயிலைக் கொல்ல எத்தனித்தான். மஹரிஷி அவனிடம் அதைக் கொல்ல வேண்டாம் என்றார். “போ, சாமி, நீ யாரு அதைச் சொல்ல” என்று கூறிய அவன் மஹரிஷியின் வார்த்தைகளைப் புறக்கணித்தான். தனது வேலையைச் செய்து முடித்தான். மறுநாள் அவனுக்கு ஒரு விபத்து ஏற்பட்டது. எந்தக் கையால் மயிலை முடித்தானோ அதே கை வெட்டுண்டது. மஹரிஷி அதற்காக வருத்தப்பட்டார். “ஆனால் என்ன செய்யறது? விஷயத்தைக் கற்றுக் கொள்வதற்கு முன் ஜனங்கள் இப்படிப்பட்டதை அனுபவிக்க வேண்டி இருக்கிறது” என்றார்.

From Leaves from a Diary, Book :  The Maharshi

2

T.K. சுந்தரேச ஐயர் பகவானின் அணுக்கத் தொண்டர்களில் ஒருவர். அவர் பகவானுடனான தனது அனுபவங்களை At the Feet of Bhagavan என்று எழுதியுள்ளார். 38 அத்தியாயங்களில் நிறைய வியப்பூட்டும் சம்பவங்களைப் படித்து மகிழலாம்.

அதில் ஒரு சம்பவம் இது:

ஒரு நாள் காலை உணவுக்குப் பின்னர் பகவானின் பக்தர்களுடன் சுந்தரேச ஐயர் ஹாலில் இருந்தார்.  தத்துவம் ஒன்றைப் பற்றி பகவான் விரிவாக விளக்கிக் கொண்டிருந்தார். மணி 10.45 ஆயிற்று. யாருக்கும் நேரம் போனதே தெரியவில்லை. அப்படி ஒரு ஈர்ப்பான உரை. 10.45க்கு சுந்தரேச ஐயரின் பக்கம் திரும்பிய பகவான், “அட, பையா, நீ இன்னும் ஸ்கூலுக்குப் போகவில்லையா?” என்றார்.

“பகவான், இன்றைக்கு ஞாயிற்றுக்கிழமை. ஸ்கூல் கிடையாது” என்றார் அவர்.

பகவான் சிரித்தார். “நீ ஸ்கூலுக்குப் போகற லக்ஷணம் நன்னாயிருக்கு. இன்றைக்கு திங்கள் கிழமை. ஓடு. உனது ஹெட்மாஸ்டர் உனக்காக கேட்டில் காத்துக் கொண்டிருக்கிறார்” என்றார் அவர்.

அவ்வளவு தான்; சுந்தரேச ஐயர் ஓடினார். அது இடைவேளை நேரம். கேட்டை அடைந்த போது ஹெட்மாஸ்டர் பகவான் கூறியதூ போலவே அங்கு நின்று கொண்டிருந்தார். அவரது பொடி டப்பியைக் கையில் வைத்துக் கொண்டு கொஞ்சம் பொடியை எடுத்து உறிஞ்சியவாறே அவருக்காகக் காத்துக் கொண்டிருந்தார்.

மஹரிஷி கூறிய அதே வார்த்தைகளை ஹெட்மாஸ்டர் சுந்தரேசனிடம் கூறினார்:” என்ன, சார், இன்னிக்கு திங்கள்ங்கறது மறந்து போச்சா? ஒருவேளை மஹரிஷி அதை உனக்கு ஞாபகப்படுத்தி இன்னிக்கு ஸ்கூல் உண்டுன்னு சொன்னாரோ”

உடனே சுந்தரேசன் கூறினார்:” ஆமாம், சார்! நான் மறந்து போய்விட்டேன். மஹரிஷிதான் என்னை இங்கு அனுப்பினார்.”

ஹெட்மாஸ்டர் சிரித்தார். “போ, க்ளாஸ்ரூமுக்குப் போ” என்றார் அவர்.

இப்படி மஹரிஷி தனக்கு நினைவு படுத்திய நிகழ்ச்சியை சுந்தரேச ஐயர் நினைவு கூர்கிறார்.

3 

தவத்திரு குஞ்சு ஸ்வாமிகள் பகவானின் பழைய பக்தர்களில் ஒருவர். அவர் ‘எனது நினைவுகள்’ என்று ஒரு நூலை எழுதியுள்ளார். அதில் தனது பெயரை ‘குற்றேவல் குஞ்சு சுவாமி’ என்று குறிப்பிடுகிறார். 70 அத்தியாயங்களையும் 11 அநுபந்தப் பகுதிகளையும் கொண்ட அருமையான நூல் இது.

அதில் ஒரு சம்பவம் இது:

வடக்கே இருந்து பெரிய பண்டிதர் ஒருவர் ஸ்ரீ பகவானை தரிசிக்க வந்தார். சிலநாள் ஆசிரமத்திலேயே அவர் தங்கியிருந்தார். பண்டிதர் தினமும் ஸ்ரீ பகவான் அருகில் உட்கார்ந்து கொண்டு சம்ஸ்கிருதத்திலேயே உபநிஷத்துகளிலிருந்தும் மற்றும் பல நூல்களிலிருந்தும் சுலோகங்களை இடைவிடாது சப்தமாக வாசித்துக் கொண்டிருப்பார். அங்கு குழுமியிருந்த மற்றவருக்கெல்லாம் ஸ்ரீபகவானிடம் பேசவோ தியானம் செய்யவோ அது பெரிய இடையூறாக இருந்தது. ஸ்ரீ பகவான் பொறுமையாக அவர் சொல்வதை எல்லாம் கேட்டுக் கொண்டிருக்கும் போது மற்றவர்களால் ஒன்றும் செய்ய முடியவில்லை. இப்படியாக பத்து தினங்கள் ஓடின. ஒரு நாள் காலையில் ஸ்ரீ பகவான் அருகில் இடம் காலியாக இருந்தது. சப்தமும் இல்லை. பண்டிதர் அங்கே ஒரு மூலையில் அடங்கி அமர்ந்திருந்தார். குஞ்சு சுவாமிகள் ஆச்சரியத்துடன் பார்ப்பதைக் கண்ட பகவான் “பண்டிதரும் நம் போல் ஆகி விட்டார்” என்று சிரித்துக் கொண்டே மலையாளத்தில் சொன்னார்.

“ஆம்! அநுபவம் ஒன்றுமில்லாமல் ஏட்டுப் படிப்பை மட்டும் வைத்துக் கொண்டு தானும் ஈடேற முடியாது. பிறரையும் தூக்கி விட முடியாது. ஞான தினகரனாம் ஸ்ரீ பகவானிடம் வந்தடைந்தவர்கள் பண்டிதராயினும், பாமரராயினும் தங்களிடம் உள்ள அறியாமை, அகங்காரம், மனச்சுமை யாவும் தீர்ந்து ஸ்ரீ பகவானின் அருட்பார்வையால் பரம சாந்தி பெற்று உய்வது யாவரும் அறிந்த உண்மையன்றோ” – என்று இப்படிக் கூறி இந்த நிகழ்ச்சியை நம்மிடம் பகிர்ந்து கொள்கிறார் ஸ்ரீ குஞ்சு ஸ்வாமிகள்!

 எனது நினைவுகள் – குற்றேவல் குஞ்சு சுவாமி

***

INDEX

1. Book The Maharshi by Sri T.V. Kapali Sastru
2. Book At the Feet of Bhagavan by Sri T.K.Sundaresa Iyer
3. Book : எனது நினைவுகள் – குற்றேவல் குஞ்சு சுவாமி

மயிலைக் கொன்ற வேடனுக்கு நேர்ந்த கதி

ஸ்கூலுக்கு போக நினைவு படுத்திய மஹரிஷி

தானாக அடங்கிய பண்டிதர்!

ரமணாசிரம நினைவுகள் – பகவான் ரமண மஹரிஷி

குறிப்பு: மேற்கூறிய நூல்கள் அனைத்தையும் ரமணாசிரமம், திருவண்ணாமலையிலிருந்து அன்பர்கள் பெறலாம்.

****

TAGS- ரமண மஹரிஷி, அற்புதங்கள்,

WRITTEN BY S NAGARAJAN

Post No. 9807

Date uploaded in London – 3 JULY   2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

புராணத்துளிகள் மூன்றாம் பாகம்-அத்தியாயம் 10 கட்டுரை எண் 9729 வெளியான தேதி 14-6-2021

புராணத்துளிகள் : மூன்றாம் பாகம் – அத்தியாயம் 11 (30-33)

ச.நாகராஜன்

30. ஓம் தோன்றியது எப்படி?

சூதர் சௌனகாதியரை நோக்கிக் கூறியது :

பிரணவம் பரம் என்றும் அபரம் என்றும் இரு வகைப்படும். பரம் என்பது சிதானந்த ஸ்வரூபமாகிய சிவமேயாகும்.

அபர பிரணவமாவது மாயாமய ஸ்வரூபமான சுத்த சொரூபமாகும்.

இந்த மந்திரத்தால் சிவ ஞான சித்தியுண்டாம். பரசிவவாச்சியத்திற்கு வாசகமாகும். சிவத்தை அடைவதற்குக் காரணமாக இருக்கின்றது.

முன் காலத்தில் பிரமதேவர் சிவ சின்னமான திருநீறு, கண்மணி தரித்து, பஞ்சாட்சர ஜபம் செய்து, இந்திரிய நிக்ரஹம் செய்து பரமசிவனை நோக்கி மூன்று வருடம் கோரமான தவம் செய்தார்.

பரமசிவனுடைய அநுக்ரஹத்தைப் பெற்று ஸ்வர்க்கம், அந்தரம், பூமி ஆகிய மூன்றையும் படைத்தார்.

பிறகு தபாக்கினியால் அந்த மூன்றையும் எரித்து விட்டார்.

அதிலிருந்து அக்னி, காற்று, சூரியன் ஆகிய மூன்றும் உண்டாயின.

அந்த மூன்றையும் அவர் தபாக்கினியால் எரித்தார்.

அவற்றிலிருந்து ரிக், யஜுர், சாமம் என்ற மூன்று வேதங்கள் உண்டாயின.

அந்த வேதங்களை அவர் தகித்தார்.

அவற்றிலிருந்து மூன்று வியாக்ருதிகள் உண்டாயின.

அவற்றையும் தகித்தார்.

அவற்றிலிருந்து அகார, உகார, மகாரங்கள் தோன்றின.

அந்த மூன்றையும் ஒன்று சேர்த்து அவர் பிரணவமாக்கினார். (ஓம்)

                  ஸ்கந்த புராணம் , சூத சம்ஹிதை, யக்ஞவைபவ காண்டம்,  

                                                   நான்காவது அத்தியாயம்

31. ஓம் என்ற பிரணவத்தின் மஹிமை!

பிரணவத்தில் பரசிவமே பிரதிபிம்ப ரூபமாக விளங்குகிறார்.அதனால் பிரணவத்தை சிவ வாசகம் என்று அறிஞர்கள் கூறுவார்கள். பிரணவமும் சிவமும் இரும்பும் அதில் கலந்த நெருப்பையும் போல அபேதமாக இருக்கும். இதை ஜபித்தால் எல்லா மந்திரங்களையும் ஜபித்தது போலாகும். இதற்குத் தெய்வம் பரசிவமே.

ஸ்கந்த புராணம் , சூத சம்ஹிதை, யக்ஞவைபவ காண்டம்,  

                                                   நான்காவது அத்தியாயம்

32. ஓம் என்ற பிரணவ உச்சரிப்பால் ஏற்படும் பலன்கள்!

அகர உகர மகாரங்களாகிற மூன்றுக்கும் பிரமன் விண்டு முத்தேவர்களும், சிவப்பு, வெளுப்பு, கறுப்பு என்னும் மூன்று நிறமும், ஜாக்கிரம், சொப்பனம், சுழுத்தி என்னும் மூன்று அவஸ்தைகளும், பூமி, அந்தரம், சொர்க்கம் என்னும் மூன்று ஸ்தானங்களும், உதாத்தம், அநுதாத்தம், ஸ்வரிதம் என்னும் மூன்று ஸ்வரங்களும், ரிக், யஜுர், சாமம் என்னும் மூன்று வேதங்களும், காருகபத்தியம், ஆகவனீயம், தக்ஷிணாக்கினீயம் என்னும் மூன்று அக்னிகளும், சத்வ, ரஜஸ், தமோ என்னும் முக்குணங்களும், படைத்தல், காத்தல், அழித்தல் என்னும் முத்தொழில்களுமாக ஆக்கப்பட்டன. இந்த மூன்றினாலும் மூன்று விரல் சந்துகளிலும் நியாசம் செய்தலாகிய் அங்க நியாசத்தையும் உந்தி, இதயம், சிரஸ் ஆகிய மூன்று இடத்திலும் வைத்து அங்க நியாசம் செய்து இந்த மந்திரத்தை பத்து லட்சம் முறை செய்தால் சகல சித்திகளும் உண்டாகும். பரமசிவன் அருள் உண்டாகும்.

பாசம் நீங்கும். ஞானம் உதிக்கும். முக்தியும் சித்திக்கும்.

ஸ்கந்த புராணம் , சூத சம்ஹிதை, யக்ஞவைபவ காண்டம்,  

                                                   நான்காவது அத்தியாயம்

33. அருணாசலேஸ்வரரின் மஹிமை : பகவான் ரமண மஹரிஷி மொழி பெயர்த்து அருளியது!

அருணாசலநாதருடைய காந்தியால் ஸகல பாபங்களும் தஹிக்கப்பெற்ற பக்தகோடிகள் நாட்டில் எங்கும் சுகமாய் இருக்கிறார்கள். (45)

அருணாத்ரீசனைப் பிரதக்ஷிண, நமஸ்கார, தபோ நியமங்களால் ஆராதித்தவர்களுக்குச் சம்பு வசமாகிறார். வேறு எவ்விதத் தவத்தாலும், தானங்களாலும், யோகங்களாலும், அருணாசல தரிசன சமமான பிரீதி சம்புவுக்கு உண்டாவதில்லை (46-47)

சுயம்புவான அருணகிரியைச் சுற்றிலும் வானுறையும் வேதங்கள், இதிஹாஸங்கள் எல்லாம் கிரிகள் வடிவாய் நின்று துதிக்கின்றன. (48)

அருணாசல மஹிமை முழுவதையும் நானாவது, விஷ்ணுவாவது, கோடி வருஷங்களில் கூடச் சொல்லி முடியாது. விஷ்ணுவை முன்னிட்ட தேவர்களும், கற்பக விருக்ஷங்களும் மறைந்திருந்து அருணாசலத்தை ஸதா ஸேவிக்கின்றார்கள். (49-50)

அருணாசல லிங்கத்தை என்றும் பூஜிப்பவர்களுக்கு வியாதி, பீடை, மனோதுக்கம், முதலான கலி தோஷங்கள் எவையும் இரா. (52)

சூதர்:

என்றிவ்வாறு பிரம்மாவின் முகத்தினின்றும் வெளிவந்த உதாரமான் அருணகிரி கதாம்ருதத்தை இரு காதுகளாலும் மனம் பூரிக்கக் கேட்டு, ஸனக முனிவர் தவத்தின் பயனை அடைந்தார்.

அருணாசல மாஹாத்மியம் : ஸ்கந்த  மஹா புராணம் – பூர்வ பாகம் அத்தியாயம் 13- ஈசன் அருணாசலத்திற்கு ஸர்வோத்தம வரம் அருளுதல் (பகவான் ரமணர் மொழி பெயர்த்து அருளியது)

***

INDEX

ஸ்கந்த புராணம், ஓம் தோன்றிய விதம், ஓம் -பிரணவத்தின் சிறப்பு, பிரணவத்தைஉச்சரிப்பதால் ஏற்படும் பலன்கள், அருணாசல மஹிமை, பகவான் ரமணர் மொழி பெயர்ப்பு.

tags- ஓம் , பிரணவத்தின் சிறப்பு ,

Research Article WRITTEN BY LONDON SWAMINATHAN

Post No. 9806

Date uploaded in London –2 JULY   2021           

Contact – swami_48@yahoo.com

Pictures are taken from various sources for spreading knowledge.

this is a non- commercial blog. Thanks for your great pictures.

tamilandvedas.com, swamiindology.blogspot.com

நட்புறவு பற்றியும், விருந்தோம்பல் பற்றியும் 2000 ஆண்டுகளுக்கு முன்பு எவரேனும் பாட்டு பாடியிருப்பார்களா, அதுவும் ரிக்வேதமும் தமிழ் வேதமும் பாடிய அளவுக்குப் படியிருப்பார்களா என்பது சந்தேகமே . நட்பு பற்றி  திருக்குறளில் திருவள்ளுவர் பல அதிகாரங்கள் பாடி இருக்கிறார். ரிக் வேதத்திலோ துதிக்கு துதி நண்பன், நட்புறவு (Friend and Friendship) என்ற சொற்கள் வருகின்றன. அதே போல விருந்தோம்பல் (Hospitality) பற்றியும் இந்தியாவில் மட்டுமே பாடல்கள் இருக்கும். 2300 ஆண்டுகளுக்கு முன்னரே அசோகன் கல்வெட்டுகள் மூலம் நெடுஞ் சாலை நெடுகிலும் சத்திரங்களும் சாப்பாட்டு (Boarding and Lodging) வசதிகளும் இருந்ததை அறிகிறோம்.

ரிக் வேதத்தில் பத்து மண்டலங்களில்  ஆயிரத்துக்கும் மேலான துதிகள் உள்ளன. அவற்றில் 10,000 மந்திரங்கள் உள்ளன. ஒவ்வொன்றும் ஒரு குறள் போல  வரிகள் உள்ளவை. சில குறள்களையும் மந்திரங்களையும் ஒப்பிட்டுப் பார்ப்போம்

சம்ஸ்க்ருதத்தில் வேதம் இருந்தது. அது தமிழில் இல்லையே என்ற குறையை தமிழ் மறை, தமிழ் வேதம் நீக்கிவிட்டது என்று திருவள்ளுவ மாலையில் ஒருவர் தமிழ் வேதத்தைப் புகழ்ந்துரைத்துள்ளார்

ரிக்.1-5-1

ரிஷி மதுச் சந்திர வைச்வாமித்திரன்  தன்னுடைய சகாக்களை நண்பர்களே! (Comrades)  இங்கே வாருங்கள், உட்காருங்கள் இந்திரனைப் பாடுங்கள் என்று அழைக்கிறார்.

1-6-9

அதே ரிஷி வானுறையும் தெய்வங்கள் என்கிறார். நாம் வள்ளுவர் குறளி ல் வையத்துள் வாழ்வாங்கு வாழ்பவன் வான் உறையும் தெய்வத்துள்  வைக்கப்படும் என்கிறார்

இந்திரனின் தோழர்களான மருத் தேவர்களை அழைக்கும் பொழுது  “வானிலிருந்து அல்லது சொர்க்கத்திலிருந்து வாருங்கள்) என்கிறார் .

வையத்துள் வாழ்வாங்கு வாழ்பவன் வானுறையும்

தெய்வத்துள் வைக்கப் படும்.

(அதிகாரம்: இல்வாழ்க்கை குறள் எண்:50 )

xxx

1-8-8

மற்றவர்களுக்கு உதவுவோரை ஊரின் நடுவிலுள்ள பழுத்த மரத்துடன் ஒப்பிடுகிறார் வள்ளுவர் . ரிஷி மதுச் சந்தஸும் அதையே சொல்கிறார்.

“தொழுபவனுக்கு இந்திரனுடைய மொழிகள் சத்தியமாகின்றன . அவை பலவித நன்மைகளைத் தரும்.பழுத்த

பழங்களைத் தாங்கும் மரங்கள் போல இருக்கின்றன.”

இதைச் சொல்லும் கவிஞரின் பெயரை தமிழில் மொழி பெயர்த்தால் தேன் கவி (Mr Honey Poem) என்று அமையும்! என்ன பொருத்தம் பாருங்கள்!!

பயன்மரம் உள்ளூர்ப் பழுத்தற்றால் செல்வம்

நயனுடை யான்கண் படின் (குறள் 216)

[அறத்துப்பால், இல்லறவியல், ஒப்புரவறிதல்]

xxxx

1-9-8

தோன்றிற் புகழொடு தோன்றுக என்கிறார் வள்ளுவர். அதாவது புகழ் தரும் செய்கைகளைச் செய்து, உலகை விட்டு நீங்கிய பின்னரும் புகழ் தாங்கிய பெயரை விட்டுச் செல்ல வேண்டும் என்பது வள்ளுவனின் கொள்கை.

தோன்றின் புகழொடு தோன்றுக அஃதிலார்

தோன்றலின் தோன்றாமை நன்று. ( குறள் எண் – 236)

ரிஷி மதுச் சந்தஸும் அதையே விரும்புகிறார்.

“இந்திரனே , சகடங்களில் ஏந்தி வரப்படும் உணவுகளையும் ஆயிரம் வழிகளால் வரும் புகழையும் எங்களுக்கு அளிக்கவும்”.

xxx

1-10-9

உடுக்கை இழந்தவன் கைபோல ஆங்கே

இடுக்கண் களைவதாம் நட்பு.(குறள் 788)

என்கிறார் வள்ளுவர்.

மதுச்சந்தஸ் சொல்கிறார்

“அனைத்தையும் கேட்பவனே, என் அழைப்புக்கு உடனே செவிகொடுக்கவும். என்னுடைய இந்த துதியை நண்பனின் மொழிகளைப் போல அருகில் வைத்துக்கொள்”.

Xxx

1-16-5

மயிர் நீப்பின் வாழாக் கவரிமான் என்று ஒரு குறளில் வள்ளுவர் பாடுகிறார். இப்படி மயிரை இழந்தவுடன் இறக்கும் பிராணி இப்போது எதுவும் இல்லை. இதை ஆங்கிலத்தில் மொழிபெயர்ப்போர் சடை எருமை எனப் பொருள்படும் YAK யாக் என்னும் மிருகத்தை குறிப்பிடுகின்றனர்.

மயிர்நீப்பின் வாழாக் கவரிமா அன்னார்

உயிர்நீப்பர் மானம் வரின்

(அதிகாரம்:மானம் குறள் எண்:969)

இதே பொருளும், குழப்பமும் ரிக் வேதத்திலும் உளது

இதை பாடியவர் மேதாதிதி காண்வர் .

அவரும் கெளரா (கவரி) என்ற சொல்லைப் பயன்படுத்துகிறார்.

இதை மொழி பெயர்ப்போர் ‘தாகம் கொண்ட மான்போல’, ‘எருமை போல’ என்று மொழிபெயர்ப்பார்கள்.

கவரி வீசுதல் என்போம். அதிலுள்ள முடி வெண்மையாக இருக்கும்.  கெளரா என்றாலும் வெண்மையே.

கவரி முடி என்பதில் இருந்துதான் பெண்கள் அணியும் சவுரி முடியும் வந்ததோ?

Xxx

1-20-8

மனிதன் தெய்வமாகலாம் என்ற கருத்தை வள்ளுவர் ஒப்புக்கொள்கிறார்

வையத்துள் வாழ்வாங்கு வாழ்பவன் வான்உறையும்

தெய்வத்துள் வைக்கப் படும். (குறள் 50)

ரிஷி மேதாதிதி காண்வன்  ரிபுக்கள் என்னும் தேவர்களை போற்றிப் பாடுகையில் சொல்கிறார்

“வேள்வியைத் தங்கும் ரிபுக்கள் (Rhbus) மானிட வடிவங்களில் இருந்தார்கள் அவர்கள் தங்கள் நற் செயல்களால் உயர்ந்து தேவர்களோடு கிடைப்பதை பகிர்ந்து கொண்டார்கள்”.

xxx

1-23-19

நீர் = அமிர்தம்

“நீரில் அமிர்தம் உண்டு. நீரில் மருந்து இருக்கிறது. ஆகையால் அதை போற்றுங்கள்” — ரிஷி மேதாதிதி காண்வன் 

1-23-20

“நீரே, நான் நீண்ட காலம் சூரியனைக் காண, என் உடலில் எல்லா நோய் நீக்கும் மருந்துகளையும் நிரப்புங்கள் “–ரிஷி மேதாதிதி காண்வன் 

இவ்வாறு ரிக் வேதம் ஆறு மந்திரங்களில் நீரைப் போற்றுவதைக் கண்டு, படித்துத்தான் திருவள்ளுவரும் 10 குறள்களை வான் சிறப்பு என்ற அ திகாரத்தில் பாடினாரோ என்று எண்ண வேண்டியிருக்கிறது.

தானம் தவம்இரண்டும் தங்கா வியன்உலகம்

வானம் வழங்கா தெனின்

(அதிகாரம்:வான் சிறப்பு குறள் எண்:19)

வான் நின்று உலகம் வழங்கி  வருதலால்

தான்அமிழ்தம் என்றுணரற் பாற்று. (குறள் எண்:11)

ஒரு குறளில் வேதம் பயன்படுத்தும் அமிர்தம் என்ற சொல் வருவதும், பகவத் கீதையில் வரும் தானம், தவம் என்ற மேலும் இரண்டு ஸம்ஸ்க்ருதச் சொற்கள் இன்னொரு குறளில் வருவதும் என் கருத்துக்குச் சான்று பகரும்.

–தொடரும் ………………………………

tags- ரிக் வேதம், தமிழ்வேதம், திருக்குறள் , ரிஷி, மதுச்சந்தஸ் , மேதாதிதி காண்வன்