Written by S Nagarajan

swami_48@yahoo.com

Date: 3 April 2019

GMT Time uploaded in London – 15-39

Post No. 6222

Pictures shown here are taken from various sources including google, Wikipedia, Facebook friends and newspapers. This is a non- commercial blog. ((posted by swamiindology.blogspot.com AND tamilandvedas.com))

பாக்யா 15-3-2019 இதழில் அறிவியல் துளிகள் தொடரில் வெளியாகியுள்ள ஒன்பதாம் ஆண்டு இரண்டாம் கட்டுரை – அத்தியாயம் எண் 418

2018ஆம் ஆண்டின் சில விநோதமான கண்டுபிடிப்புகள்! – 2

ச.நாகராஜன்

ஒவ்வொரு ஆண்டும் ஏராளமான விஞ்ஞான விநோதங்களை அறிவியல் அறிஞர்கள் தெரிவிக்கின்றனர். 2018இல் அவர்கள் கண்ட விநோதங்களின் தொடர்ச்சி இது:

வெப்ப அலையால் வேக வைக்கப்பட்ட வௌவால்கள்!

ஒவ்வொரு ஆண்டும் பூமியின் வெப்பநிலை கூடிக் கொண்டே போகிறது. 2018, ஜனவரியில் ஆஸ்திரேலியாவில் நியூ சவுத் வேல்ஸில் வெப்பம் 111.5 டிகிரி பாரன்ஹீட்டைத் தொட்டது. அதாவது 44.2 டிகிரி செல்ஸியஸ்! பறந்து கொண்டே இருந்த 200 வௌவால்கள் இந்த வெப்பத்தால் ஆகாயத்திலேயே உயிருடன் வறுத்தெடுக்கப்பட்டு தொபேரென்று  தரையில் இறந்து வீழ்ந்தன. கேட் ரையான் என்ற பெண் விஞ்ஞானி, “இவை உயிருடன் வறுக்கப்பட்டன. அவற்றின் மூளையை வெப்பம் தாக்கவே அவைகளால் தாக்குப் பிடிக்க முடியவில்லை. இறந்து வீழ்ந்தன” என்கிறார்.

தீயைத் திருடும் ஆஸ்திரேலிய பறவைகள்!

ப்ரோமெதியஸ் என்னும் ஹீரோ கடவுளரிடமிருந்து தீயைத் திருடி மனிதர்களுக்கு அளித்தான் என்று கிரேக்க நாட்டில்  பழம் பெரும் கதை ஒன்று உண்டு. இந்தக் கதையைப் போலவே இப்போது ஆஸ்திரேலியப் பறவைகள் தீத் துண்டுகளை (தீ கங்குகள்) ஏற்கனவே காட்டுத் தீ பரவிய இடத்திலிருந்து தூக்கிக் கொண்டு இதர இடங்களில் சென்று போட்டு அங்கும் தீயைப் பற்ற வைக்கின்றன. ஃபயர்ஹாக் (firehawks) என்னும் பறவைகள் கூட்டாகவும் சில சமயம் தனியாகவும் இப்படி தீயைப் பற்ற வைக்கின்றன. அவை ஏன் இப்படிச் செய்கின்றன என்று விஞ்ஞானிகள் ஆராயப் புகுந்தனர். புல்வெளிகளில் ஒளிந்து கொண்டிருக்கும் அவற்றின் இரைகள், இப்படித் தீயைப் பற்ற வைப்பதால் வெப்பம் தாங்காமல் வெளியிடங்களுக்கு ஓடும். அப்போது அவற்றை அந்தப் பறவைகள் பிடித்துத் தங்களுக்கு உணவாக்கிக் கொள்ளும்.

தும்மலைத் அடக்காதீர்கள்!

தும்மலை அடக்கவே அடக்காதீர்கள் என்பது விஞ்ஞானிகளின் அறிவுரை. இதற்கான சம்பவம் ஒன்றை அவர்கள்  கூறுகின்றனர். இங்கிலாந்தைச் சேர்ந்த 34 வயதான ஒருவர் தன் தும்மலை அடக்கப் பார்த்து மூக்கைப் பிடித்துக் கொண்டு வாயையும் மூடிக் கொண்டார். கழுத்தில் தோல் பகுதியில் குமுறுவது போன்ற உணர்வு ஏற்படவே டாக்டரிடம் ஓடினார். கழுத்துப் பகுதியில் தோலின் கீழ் காற்றுக் குமிழிகளைக் கண்ட அவர்கள் மேல் தொண்டைப் பகுதியில் அவை ஒரு ஓட்டையையும் போட்டு விட்டதைக் கவனித்தனர். நல்ல வேளையாக உயிருக்கு ஆபத்து இல்லாமல் அவர் பிழைத்தார். இரண்டு மாதங்களில் அவர் பூரண குணமடைந்தார். இதை ஆய்வு செய்த விஞ்ஞானிகள் தும்மலை அடக்காதீர்கள் என்ற அறிவுரையைப் பத்திரிகை வாயிலாகத் தெரிவித்துள்ளனர்.

விசித்திரமாக ஸ்பூனை விழுங்கியவர்!

‘Born with a Silver Spoon’ என்று அதிர்ஷ்டசாலிகளைச் சொல்வது வழக்கம். ஸ்பூனை விழுங்கிய ஒருவரைப் பார்த்த டாக்டர்கள் ஆச்சரியத்தால் அயர்ந்து போன சம்பவம் ஒன்றும் அக்டோபர் 2018இல் நடந்திருக்கிறது. மிஸ்டர் ஜாங் என்று அவரை அழைக்கின்றனர். சீனாவில் ஜின்ஜியாங் மாகாணத்தில்  உள்ள ஜெனரல் ஹாஸ்பிடலுக்கு அவர் வந்தார். ஒரு ஸ்டீல் ஸ்பூனை தான் விழுங்கி விட்டதாகவும் ஒரு வருடமாக அது உள்ளே இருப்பதாகவும் இப்போது வலி ஏற்பட்டிருப்பதாகவும் அவர் தெரிவிக்கவே மூன்று டாக்டர்கள் சேர்ந்து இரண்டு மணி நேரம் ஆபரேஷன் செய்து மார்புக்கூட்டின் நடுவில் உள்ளே போய் மாட்டிக் கொண்டிருந்த ஸ்பூனை எடுத்தார்கள். அதன் நீளம் எட்டு அங்குலம். இப்படி ஒரு நபரை இதுவரை தாங்கள் கண்டதே இல்லை என்று கூறிய டாக்டர்கள் அவரை உயிர் பிழைக்க வைத்து பத்திரமாக வீட்டிற்கு அனுப்பி வைத்தனர்.

கராத்தே கிக் கரப்பான்கள்

ஒட்டுண்ணிக் குளவிகள் என்னும் ஒருவகை உயிரினம் கரப்பான்களைப் பொறுத்த வரையில் அபாயகரமான உயிரினம் என பிஎம்சி ஈக்காலஜி (BMC Ecology)என்ற அறிவியல் இதழ் தெரிவிக்கிறது. மரகதமணி குளவி (Emerald Jewel Wasp) என்ற இந்த உயிரினம் கரப்பான்களின் கால்களின் மீது ஒருவகை திரவத்தைப் பாய்ச்சுகின்றன. அது கரப்பான்களின் ரத்த ஓட்டத்தைத் தடுத்து மூளையைத் தாக்கவே அது செயலிழந்து உயிர் இருந்தும் ஜோம்பி போல அசையாமல் இருந்து அந்தக் குளவிகளுக்கு இரையாகுமாம். ஆனால் இப்போது இதை ஆராய்ந்து வரும் விஞ்ஞானிகள்,”இது வரை கரப்பான்கள் தப்பிக்கவே தப்பிக்காது என எண்ணி இருந்தோம்.ஆனால் ஒரு கராத்தே கிக்கைக் கொடுத்து தங்கள் மூளை செயலிழந்து போவதைச் சில கரப்பான்கள் தடுப்பதைப் பார்க்கிறோம். இந்த கராத்தே கிக் அவற்றின் நரம்புகள் செயல் இழப்பதைத் தடுக்கிறது” என்று ஆச்சரியத்துடன் கூறுகின்றனர்.

மேட் மைக்கின் சாகஸம்!

2018 மார்ச் மாதம் 61 வயதான ஒருவர் தானே செய்த ராக்கெட்டை விண்ணில் ஏவினார். அவர் பெயர் மேட் மைக்(Mad Mike- பைத்தியக்கார மைக்).பூமி தட்டையானது தான் என்பதை நிரூபிப்பதற்காக இதை அவர் ஏவினாராம். பூமி உருண்டை என்று சிறு குழந்தை கூடச் சொல்லும்! ஆனால் அதை நம்ப மறுக்கும் பைத்திய மைக்கின்  ராக்கெட் 1900 அடி உயரம் வரை பறந்தது.’எனது அடுத்த ராக்கெட் இன்னும் அதிக உயரம் பறக்கும்’ என்கிறார் பைத்தியக்கார மைக்!

இப்படி எண்ணற்ற விநோதச் செய்திகளை 2018இல் கண்டதாக விஞ்ஞானிகள் கூறுகின்றனர். சாம்பிளுக்காகச் சில சுவையான செய்திகளை மட்டும் இங்கு பார்த்தோம்.

அறிவியல் அறிஞர் வாழ்வில் .. ..

ஹோவர்ட்           ஃபீல்டிங் (Howard Fielding) ஐந்து வயது குழந்தையாக இருந்த போது அப்பா ஆல்ஃப்ரெட் (Alfred) கொண்டு வந்த பிளாஸ்டிக் பப்பிள் ஷீட்டை கைகளால் நோண்டி ஒவ்வொரு பப்பிளாக டப் டப் என்று உடைத்துக் கொண்டிருந்தது. ஆனால் இன்றோ பப்பிள் ராப் (Bubble Wrap) பாக்கிங் ஷீட்டைத் தயாரிக்கும் அவரது நிறுவனம் உலகளாவிய விதத்தில் உயர்ந்து நிற்கிறது. ஆல்ப்ரெட் பப்பிள் ராப் பிளாஸ்டிக் ஷீட்டை தற்செயலாகத் தான் கண்டுபிடித்தார். அவர் கண்டுபிடிக்க முனைந்தது வால்பேப்பர் எனப்படும் சுவரொட்டி பேப்பர்களில் விதவிதமான டிசைனைப் போட்டு டெக்ஸர்ட் வால்பேப்பரைத் (Textured Wallpaper) தயாரிக்க வேண்டும் என்பது தான். 1957இல் இரண்டு பிளாஸ்டிக் திரைச்சீலைகளை வெப்பத்தினால் ஒட்டிப் பார்த்த போது அவர் நினைத்தது வரவில்லை. மாறாக காற்றுக் குமிழிகள் ஆங்காங்கே அடைக்கப்பட்ட பிளாஸ்டிக் ஷீட் தான் வந்தது. அதை என்ன செய்வது என்று முதலில் அவருக்கும் அவரது நண்பருக்கும் புரியவில்லை. என்றாலும் கூட அதற்குக் காப்புரிமை பெற்றனர். 1961இல் அது மிகப்பெரிய பாக்கிங் மெட்டீரியல் என்ற அந்தஸ்தைப் பெற்றது. முக்கியமாக கம்ப்யூட்டர் நிறுவனமான ஐ.பி.எம் அதை ஒரு வரபிரசாதமாகக் கருதியது.

வெளிநாடுகளுக்குக் கம்ப்யூட்டர்களை அனுப்பும் போது அது உடையாமல் இருக்க நியூஸ்பேப்பர்களை உருண்டைகளாக்கி அவற்றைச் சுற்றி வைப்பது அதுவரை வழக்கமாக இருந்தது. ஆனால் நியூஸ்பேப்பர்களின் மோசமான தரமற்ற மை பாக்கிங் செய்யப்பட்ட பொருள்களின் மீது பட்டு அவற்றின் தரத்தைக் கெடுத்தது. இந்த நிலையில் பப்பிள் ராப் வந்தவுடன் அதை பயன்படுத்த ஆரம்பித்தவுடன் ஒரு வித புகாரும் வரவில்லை. இதைப் பார்த்த சிறு நிறுவனங்கள் அனைத்தும் பப்பிள் ராப் பிளாஸ்டிக் ஷீட்டை பயன்படுத்த ஆரம்பித்தன.இன்று உலகெங்கும் பப்பிள் ராப் ஷீட் சக்கை போடு போடுகிறது.

தற்செயல் கண்டுபிடிப்பு பாக்கிங் செய்யும் விதத்தில் பாதுகாப்பை உறுதி செய்தது ஆச்சரியம் தானே!

**

Written by S.Nagarajan

swami_48@yahoo.com

Date: 14 March 2019

GMT Time uploaded in London – 10-57 am

Post No. 6192

Pictures shown here are taken from various sources including google, Wikipedia, Facebook friends and newspapers. This is a non- commercial blog. ((posted by swamiindology.blogspot.com AND tamilandvedas.com))

.﷽﷽﷽﷽﷽﷽﷽﷽﷽﷽﷽﷽﷽﷽﷽﷽﷽﷽﷽

8-3-2019 பாக்யா இதழில் வெளியாகியுள்ள அறிவியல் துளிகள் தொடரில் ஒன்பதாம் ஆண்டு முதல் கட்டுரை – அத்தியாயம் 417

 2018ஆம் ஆண்டின் சில விநோதமான கண்டுபிடிப்புகள்! – 1

ச.நாகராஜன்

ஒவ்வொரு ஆண்டும் ஏராளமான விஞ்ஞான விநோதங்களை அறிவியல் ஆராய்ச்சியாளர்கள் கண்டு பிடிக்கின்றனர்; வெளி உலகிற்கு அறிவிக்கின்றனர். 2018ஆம் ஆண்டும் ஏராளமான விநோதமான கண்டுபிடிப்புகளை வெவ்வேறு விஞ்ஞானிகள் கண்டுபிடித்துள்ளனர். அவற்றில் சில:

யுரேனஸுக்கு மட்டும் போகாதீர்கள்!

எந்த கிரகம் போனாலும் யுரேனஸுக்கு மட்டும் போக வேண்டாம் என்பது விஞ்ஞானிகளின் தற்போதைய அறிவுரை. ஏனெனில் நாற்றம் தாங்க முடியாதாம்.ஹைட்ரஜன் சல்பைடு தரும் நாற்றம் அனைவரும் அறிந்த ஒன்று தான். பூமியில் எல்லா சாக்கடைகளிலும் அடிக்கும் நாற்றம் தான் இது. ஹவாயில் அமைக்கப்பட்டுள்ள ஜெமினி நார்த் டெலஸ்கோப் யுரேனஸின் வளிமண்டலம் எப்படி இருக்கும் என்பதை ஆய்வு செய்து தந்த விவரங்களின் அடிப்படையில் விஞ்ஞானிகள் யுரேனஸ் நாற்றம் பிடித்த ஒரு கிரகம் என்ற முடிவுக்கு வந்துள்ளனர். துரதிர்ஷ்டம் பிடித்த மனிதன் தான் அங்கு போவான் என்று ஜோக் வேறு அடிக்கின்றனர் அவர்கள். ஆக்ஸ்போர்ட் பல்கலைக்கழகத்தைச் சேர்ந்த பாட்ரிக் இர்வின் என்ற ஆய்வாளர் தனது அறிக்கையில் இந்த விவரங்களைத் தந்து விட்டு, “அங்கு மைனஸ் 328 டிகிரி பாரன்ஹீட் இருப்பதாலும் அந்த வளிமண்டலம் ஹைட்ரஜன், ஹீலியம் மற்றும் மெதேன் வாயுக்கள் நிரம்பி இருப்பதாலும் ஒரே நாற்றமாக இருக்கும்” என்று முத்தாய்ப்பாகக் கூறுகிறார்.

முகமில்லாத தவளை

கனெக்டிகட் காடுகளில் ஜில் ஃப்ளெமிங் என்ற பெண் ஆய்வாளர் ஒரு விசித்திரமான பிராணியைப் பார்த்து அதிசயித்தார். அது ஒரு தவளை. அதற்கு முகமே இல்லை. ஆனால்  தாவித் தாவி இதர தவளைகளைப் போல அது அங்கும் இங்கும் போகிறது!

 இதை இரண்டு வருடங்களுக்கு முன்னர் அவர் பார்த்தார்; தொடர்ந்து ஆராய்ந்தார் – இப்படி ஒரு பிராணி இருக்க முடியுமா என்று. வெவ்வேறு விதமான விளக்கங்கள் அவருக்கு வந்தாலும் எதுவும் திருப்திகரமான ஒன்றாக இல்லை. அது தூங்கிக் கொண்டிருக்கும் போது பறக்கும் பூச்சி ஒன்று அதைத் தாக்கி அதன் முகத்தை அழித்திருக்கலாம் என்பதும் ஒரு விளக்கம். முகம் மட்டுமே அழிக்கப்பட்ட நிலையில் இதர உடல் பகுதிகள் இருப்பதால் அதனால் தாவ முடிகிறது! அவருக்கு பல விளக்கங்கள் வந்தாலும் அதிசயமான முகமற்ற தவளை தாவித் தாவிக் குதிப்பதை வியப்புடன் தான் அவர் பார்க்கிறார்!

கல்லறையில் காண்பது புதுவகை உயிரினமா?

2004ஆம் ஆண்டு சீனாவில் சீன சக்கரவர்த்தி க்வின் ஷி ஹுவாங்கின்  பாட்டியான லேடி ஜியாவின் கல்லறை தோண்டி எடுக்கப்பட்டது.இவர் வாழ்ந்தது கி.மு. 259 முதல் 210 முடிய உள்ள காலம் ஆகும். அவர் கல்லறையில் ஏராளமான எலும்புக்கூடுகளும் எலும்புகளும்  இருந்தன. அவற்றை ஆராய்ந்து பார்த்ததில்,அவரது வளர்ப்புப் பிராணிகளாக அவை இருக்கக் கூடும் என்று அனுமானிக்கப்படுகிறது. இதில் ஒரு எலும்புக் கூடு மட்டும் உலகில் அறிந்திராத ஒரு வகை உயிரினத்தின் எலும்புக்கூடாக இருப்பது விஞ்ஞானிகளுக்கு பிரமிப்பை ஊட்டுகிறது. ஐஸ் காலத்தில் வாழ்ந்து அருகி மறைந்து விட்ட உயிரினமான ஜுஞ்ஜி இம்பெரியலிஸ் (Junzi Imperialis)ஆக இது இருக்கலாமோ என விஞ்ஞானிகள் நினைக்கின்றனர். இதன் எடை 6 கிலோ தான். இது பலவித இலைகள் மற்றும் பழங்களைத் தின்று வாழும் பிராணி. லண்டன் யுனிவர்ஸ்டி காலேஹ் புரபசரான ஹெலன் சாட்டர்ஜி என்ற பெண்மணி இதில் தன் ஆராய்ச்சியைத் தொடர்கிறார்.

நாயிடமிருந்து வந்த புது வகை பாக்டீரியா!

நாயை வளர்ப்பவர்கள் தங்கள் நாய்கள் ஒரு போதும் கடிக்காது என்று பெருமை பாராட்டுவது வழக்கம். ஆனால் துரதிர்ஷ்டவசமாக க்ரெக் மண்ட்யூஃபெல் என்ற விஸ்கான்ஸின் மாகாணத்தைச் சேர்ந்த அமெரிக்கர்  தன் நாயைத் தன் மேல் நக்க விட்டது தப்பு என்ற முடிவுக்கு வர நேர்ந்தது. அவரது நாய் அவரை நக்கவே அவர் காப்னோசைடோபாகா (Capnocytophaga) என்ற ஒரு புதுவகை பாக்டீரியாவால் பாதிக்கப்பட்டு விட்டார். அதனால் அவரது கால்களைத் துண்டிக்க வேண்டி வந்து விட்டது. கைகளிலும் ஒரு பகுதியைத் துண்டிக்க வேண்டி நேர்ந்தது. இந்த பாக்டீரியா வீட்டு வளர்ப்பு பிராணிகளில் பொதுவாகக் காணப்படும் ஒன்று. ஆனால் எந்த ஒரு பிராணியும் மனிதனை அளவுக்கு அதிகமாகச் சுரண்டி அந்த பாக்டீரியாவை இரத்தத்தில் கலக்கச் செய்தால் அபாயகரமான விளைவுகள் ஏற்படுமாம். இதில் நிபுணரான டாக்டர் சில்வியா முனோஸ் பிரைஸ் என்ற பெண்மணி, “இப்படி நேர்வது அரிதிலும் அரிது; என்றாலும் இப்படி நேர்ந்தால் விளைவு விபரீதம் தான்” என்கிறார். 99 சதவிகிதம் இப்படி ஏற்பட சான்ஸே இல்லை என்பதும் அவர் தரும் குறிப்பு.

இன்னும் சில விநோதக் கண்டுபிடிப்புச் செய்திகளை அடுத்துக் காண்போம்.

அறிவியல் அறிஞர் வாழ்வில் .. ..

சார்லஸ் டார்வின் (பிறப்பு 12-2-1809 மறைவு 19-4-1882) தென் அமெரிக்காவிற்கு ஹெச். எம். எஸ். பீகிள் என்ற கப்பலில் 1831 முதல் 1836 முடிய பயணம் செய்து ஆய்வுகளை மேற்கொண்டு தனது 27ஆம் வயதில் பிரிட்டனுக்குத் திரும்பினார். அதன் பின்னர் அவர் பிரிட்டனை விட்டு எங்கும் செல்லவில்லை. அவரது உடல் நலம் பெரிதும் பாதிக்கப்பட்டதால் 1842ஆம் ஆண்டு டவுன் ஹவுஸில் தனது சொந்த வீட்டிற்குச் சென்று விட்டார். அங்கிருந்த தோட்டம் வீடு உள்ளிட்டவற்றில் அவர் அதிக கவனம் செலுத்தலானார். நாற்பது ஆண்டுகள் கழித்து அவர் இறக்கும் வரை அவர் அந்த வீட்டை விட்டு வேறெங்கும் செல்லவில்லை.

எல்லா விதைகளும் உரங்களும் அவர் இல்லத்திற்கே வருமாறு செய்யப்பட்டன. அவர் இயல்பாகவே ஒரு தாவர இயல் நிபுணர். மலர்கள் மட்டும் ஏன் விதவிதமான வண்ணங்களுடனும் இதழ்களுடனும் அமைப்புகளுடனும் தோன்றுகிறது என்பதை எண்ணி எண்ணி வியந்தார். இந்த ஆராய்ச்சியில் வெகுவாக கவனம் செலுத்திய அவர் இது ஒரு இயல்பான தேர்வு (Natural Selection) என்ற முடிவுக்கு வந்தார். இதில் தெய்வீக கர்த்தாவின் கற்பனா வேலைக்கு இடமில்லை (natural selecation rather than the imaginative work of a Divine Creator) என்றார். இது கடும் எதிர்ப்புக்குள்ளானது.அனைவரும் அவரது இந்தக் கருத்தை எதிர்த்தனர்.

ஆனாலும் தன் வாழ்நாள் முழுவதும் இதே கொள்கையுடன் இருந்த அவர் இடைவிடாது மலர்களின் மீதும் அதன் விதவிதமான அமைப்புகளின் மீதும் கவனம் செலுத்தி வந்தார்.

இந்த மலர் ஆராய்ச்சியைப் பற்றி அவர் தனது சுயசரிதையில் கூறுகையில்,  ‘எனது அறிவியல் வாழ்க்கையில் பல வண்ணமுடைய பசுமை மாறாச் செடிகளினுடைய அமைப்புகளின் அர்த்தத்தை கண்டுபிடிப்பதில் இருந்த ஒரு திருப்தி வேறெதிலும் எனக்குக் கிடைக்கவில்லை’ என்று எழுதினார். (“I do not think anything in my scientific life has given me so much satisfaction as making out the meaning of the structure of these plants.”).

ஒரு மகிழ்ச்சிகரமான செய்தி!

ஒரு மகிழ்ச்சிகரமான செய்தியை தமிழ் நெஞ்சங்களுடன் பகிர்ந்து கொள்ள விழைகிறேன்.

பாக்யாவில் கடந்த எட்டு வருடங்களாக வெளியாகி வரும் அறிவியல் துளிகள் தொடரில் வெளியாகியுள்ள அறிவியல் செய்திகளைக் காணொளிக் காட்சியாகக் காணலாம் என்பதே அந்தச் செய்தி.

ஆம், டிசம்பர் 14, 2018 அன்று www.youtube.com இல்    ‘ASacredSecret’ (ஒரே வார்த்தை, மூன்று காபிடல் லெட்டர்ஸ்- இதை மறக்காமல் பதிவு செய்ய வேண்டும்; சப்ஸ்க்ரிப்ஷன் இலவசம்) என்ற சேனல் துவங்கப்பட்டுள்ளது.

இதில் அறிவியல் அறிவோம், ஆன்மீக அறிவியல் அறிவோம், ஆங்கிலம் அறிவோம், படப் பாடல்களோடு ஒரு பயணம் செய்வோம் உள்ளிட்ட ஏராளமான பகுதிகள் இடம் பெற்று வருகின்றன. எனது 3000க்கும் மேற்பட்ட கட்டுரைகள் மற்றும் 108 புத்தகங்களில் இடம் பெற்றுள்ள சுவையான செய்திகளைத் தரும் இந்த முயற்சியில் கடந்த இரு மாதங்களில் இந்த சேனலில் சுமார் 150க்கும் மேலான  காணொளிக் காட்சிகள் (20 ஆங்கிலத்திலும் ஏனையவை தமிழிலுமாக) இடம் பெற்றுள்ளன. உலகின் தலை சிறந்த 4000 விஞ்ஞானிகளில் 10 பேரே இந்தியர்கள் என்ற செய்தி (டைம்ஸ் ஆஃப் இந்தியா 4-1-2019 இதழ்) வெளியாகியுள்ள இன்றைய நாட்களில் அறிவியல் வளர்வது இன்றியமையாத தேவையாகிறது. அன்பர்கள் அனைவரும் இந்தக் காணொளிக் காட்சிகளின் மூலம் பயன்பெற வேண்டுகிறேன். உலகெங்கிலுமிருந்து இவற்றிற்குப் பெருகி வரும் ஆதரவு நல்ல ஊக்கத்தை அளிக்கிறது. அனைவருக்கும் எனது உளமார்ந்த நன்றியைத் தெரிவித்துக் கொள்கிறேன்.

அன்பன் ச.நாகராஜன்

****