WRITTEN BY S NAGARAJAN

Pictures are taken from various sources; thanks.

 அறிவியல் துளிகள் தொடரில் பாக்யா 16-9-2016 இதழில் 293ஆம் அத்தியாயமாக வெளியாகியுள்ள கட்டுரை

அற்புத அறிவியல் எழுத்தாளர் ஐஸக் அஸிமாவ்! – 2

ச.நாகராஜன்

“வாழ்க்கையைப் பற்றிய ஒரு சோகமான விஷயம் இப்போது என்னவெனில் ,சமுதாயம் விவேகத்தைச் சேகரிப்பதை விட  விஞ்ஞானம் அதிவேகமாக அறிவைச் சேகரிக்கிறது” – ஐஸக் அஸிமாவ்

 அஸிமாவ் தினமும் எழுதும் விதம் சற்று  விசித்திரமானது. ஜன்னலே இல்லாத சிறிய அறையில் எழுதுவது அவருக்கு மிகவும் பிடிக்கும். இதற்கு ஒரு காரணமும் உண்டு. சூரிய வெளிச்சத்தில் பத்து நிமிடம் இருந்தாலும் போதும், அவரது தோல் எரிச்சலடைந்து வேதனையைத் தரும். அப்படி ஒரு உடல் வாகு அவருக்கு இருந்தது!

காலையில் ஏழரை மணிக்கு டைப்ரட்டரின் முன்னால் அமர்ந்தார் என்றால் இரவு பத்து மணி வரை அவரது எழுத்துப் பணி தொடரும்!

விமானத்தில் பறப்பது அவருக்குப் பிடிக்காது. கார் அல்லது சொகுசுக் கப்பலில் தான் பெரும்பாலும் அவர் பயணங்களை மேற்கொள்வார். மிக அவசியமான நேரங்களில் மட்டும் விமானத்தில் பயணமாவார். இராணுவத்தில் அவர் பணியாற்றிய போது விமானப் பயணம் கட்டாயமாக மேற்கொள்ள வேண்டிய ஒன்றாக ஆனது. ஏராளமான விண்வெளிப் பயணங்கள், நட்சத்திரப் பயணங்கள் என்பதையெல்லாம் எழுத்தில் வடித்துக் கொட்டிய அந்த அதிசய மனிதர் வாழ்நாளில் இரண்டே இரண்டு  முறை மட்டுமே விமானப் பயணம் மேற்கொண்டார் என்பது ஒரு அதிசயமான செய்தி!

Limericks எனப்படும் ஆங்கிலக் குட்டிக் கவிதைகளை எழுதுவதில் அவருக்கு அலாதி பிரியம் உண்டு. ஆனால் அவை கொஞ்சம் அசிங்கமாகவே இருக்கும்.

கடவுள் நம்பிக்கை இல்லை என்றாலும் கூட ஒழுக்க நெறிகளை அவர் வலியுறுத்தினார். பகுத்தறிவே துணை என்றார் அவர்.

அவரைத் தேடி பல விருதுகள் வந்தன. அவரைப் போற்றி ஒரு விண்கல்லிற்கு ஆஸ்ட்ராய்ட் 5020 அஸிமாவ் என்று பெயரிடப்பட்டது.

பைபிளைப் பற்றி இரண்டு தொகுதிகளாக 1300 பக்கங்களில், ‘அஸிமாவ் கைட் டு தி பைபிள்’ (பைபிளுக்கு அஸிமாவின் வழிகாட்டி) என்ற நூலை அவர் எழுதினார். இதில் பழைய ஏற்பாடு மற்றும் புதிய ஏற்பாடில் உள்ள அனைத்தும் சொல்லப்பட்டது.

அவரது மரணமோ  சோகமாக நிகழ்ந்தது. 1983இல் இதய அறுவை சிகிச்சை ஒன்றின் போது உடலில் செலுத்தப்படக் கூடாத தடை செய்யப்பட்ட இரத்தம் அவர் உடலில் செலுத்தப்பட்டது. இதனால் ஹெச் ஐ வி தொற்றால் அவர் பாதிக்கப்பட்டார். ஆகவே 1992இல் மரணமடைந்தார். இப்படி ஒரு நோய் அவரைத் துன்புறுத்தியது பத்து வருடங்கள் ரகசிய்மாகவே இருந்தது.

தனது சுயசரிதத்தை மூன்று  முறை அவர் எழுதியுள்ளார். மூன்றாவது நூல் மட்டும் அவர் இறந்த பின்னர் வெளி வந்தது. அவரது மனைவி ஜேனட் அஸிமாவ் இந்த மூன்று சரிதங்களையும் சுருக்கி ஒரு நூலை வெளியிட்டார். அதில் தான் அவர் இறந்தது எதனால் என்பது தெரிய வந்தது.

கடைசியாக அஸிமாவின் எழுத்து நடையைப் பற்றிச் சொல்லியாக வேண்டுமே! ஒரு சிறிய எடுத்துக்காட்டின் மூலமாக நகைச்சுவை கலந்த அவரது நடையை உணர முடியும்

அஸிமாவின் எழுத்துக்கு ஒரு சாம்பிள் இதோ:

நுண்ணறிவு என்பது தான் என்ன?

நான் இராணுவத்தில் பணியாற்றிய போது ராணுவ வீரர்களுக்கான சோதனையில் நூற்றுக்கு நான் 160 மார்க்குகள் பெற்றேன்! யாருமே அப்படி ஒரு மதிப்பெண்ணைப் பெற்றதில்லை என்பதால் இரண்டு மணி நேரம் என்னைச் சுற்றி ஒரே கூத்தும் கும்மாளமுமாக இருந்தது.

வாழ்க்கை முழுவதுமே இதே போன்ற மதிப்பெண்ணையே பெற்று வந்ததால் எனது அறிவைப் பற்றிய ஒரு உயர் அபிப்ராயம் எனக்கு இருந்தது.  மற்றவர்களும் என்னை அறிவாளி என்றே நினைக்க வேண்டும் என்றும் நினைத்து வந்தேன்.

இந்த மதிப்பெண்கள் என்னைக் கேள்வி கேட்பவர்களின் சாதாரணமான் கேள்விகளுக்கு நான் நல்ல பதிலைச் சொல்ல வேண்டும் என்ற அவசியத்தைத் தரும் என்று எதிர்பார்க்கக் கூடாது தான்!

உதாரணமாக ஒரு ஆட்டோ மெக்கானிக்கை நான் சந்தித்த விஷயத்தைச் சொல்லலாம். அவருக்கும் இண்டெலிஜெண்ட் டெஸ்டுக்கும் சம்பந்தமே இல்லை. ஆகவே அவரை விட நான் பிரமாதமான அறிவாளி என்றே என்னைப் பற்றி நான் எண்ணிக் கொண்டிருந்தேன்.

அந்த மெக்கானிக்கை நான் சந்தித்த போதெல்லாம் அவர் ஜோக்குகளைச் சொல்லி மகிழ்வது வழக்கம்.

ஒரு நாள் காரின் அடியிலிருந்து தலையை மட்டும் நீட்டினார் அவர்.

“டாக்டர், ஒரு செவிட்டு ஊமை ஒரு நாள் ஆணி வாங்க கடைக்குப் போனார்.ஒரு கையில் இருந்த விரலை ஊன்றிக் காண்பித்து இன்னொரு கையால் சுத்தியலால் அடிப்பதைப் போல அந்த விரலின் மீது அடித்துக் காண்பித்தார். கடைக்காரர் ஆணிகளைக் கொண்டு வந்தார் அதில் தனக்குத் தேவையான சைஸை அவர் எடுத்துக் கொண்டு சென்றார்.

டாக்டர், அடுத்தாற்ப் போல அந்தக் கடைக்கு வந்தவர் கண் பார்வையற்ற குருடர். அவர் கத்தரிக்கோலை வாங்க வந்தார். அவர் எப்படி கத்தரிக்கோலை வாங்கினார்?” என்று கேட்டார் மெக்கானிக்.

மிக்க அறிவுத் திறமையுடன் நான் இரு விரல்களாலும் கத்தரிக்கோல் அசைவது போல அசைத்துக் காட்டினேன்.

உடனே அந்த மெக்கானிக் கலகலவென்று சிரித்து, “ அட, மக்கு டாக்டரே, அவர் தனது வாயைத் திறந்து கத்தரிக்கோல் வேண்டும் என்று கேட்டார்” என்றார்.

தொடர்ந்த அவர், “இன்று முழுவதும் எனது வாடிக்கையாளர்களிடம் இந்தக் கேள்வியைத் தான் கேட்டேன்” என்றார்

“நிறைய ஆள்களைப் பிடித்து விட்டீர்களோ” – நான் கேட்டேன்.

“ஆமாமாம் நிறைய பேரை. ஆனால் நிச்சயம் உங்களைப் பிடித்து விடுவேன் என்று எனக்குத் தெரியும்!”

“அது எப்படி என்னைப் பிடிப்பது பற்றி அவ்வளவு நிச்சயம்?” – நான் கேட்டேன்..

“ஏனென்றால் மெத்தப் படித்த மேதாவியாயிற்றே நீங்கள். அவ்வளவாக ஸ்மார்ட்டாக உங்களால் இருக்க முடியாதே!”

சற்று அசடு வழிந்தேன் நான்!”

அஸிமாவ் எழுதாத பொருளே இல்லை என்பதால் அவரை யார் வேண்டுமானாலும் படிக்கலாம்! மாபெரும் மேதை அவர்!

அறிவியல் அறிஞர் வாழ்வில் ..  

பிரபல அமெரிக்க விண்வெளி வீரரான ஸ்டோரி மஸ்க்ரேவ்   (Story Musgrave)  ஒரு விஞ்ஞானி. எலக்ட்ரீஷியனாக வேலை பார்த்தவர். ஒரு கணித மேதை. ஒரு கம்ப்யூட்டர் ப்ரோக்ராமர். ஒரு மெக்கானிக் ஒரு பைலட். ஒரு சர்ஜனும் கூட.

இப்படிப் பன்முகத் திறமை கொண்ட அபூர்வமான இந்த மனிதர் நாஸாவில் 30 ஆண்டுகள் பணி புரிந்தார். 1983ஆம் ஆண்டிலிருந்து ஆறு முறை அவர் விண்ணில் பறந்தார். ஸ்பேஸ் ஷட்டில் திட்டத்தில் முனைப்புடன் அவர் ஈடுபட்டார். 1983இல் ஸ்பேஸ் ஷட்டில் சாலஞ்ஜரில் ஆரம்பித்த விண்வெளி வாழ்க்கை 1996இல் ஸ்பேஸ் ஷட்டில் கொலம்பியாவில் முடிவுற்று 61ஆம் வயதில் பணி ஓய்வு பெற்றார். அமெரிக்காவின் ஐந்து ஸ்பேஸ் ஷட்டில்களிலும் பறந்த ஒரே வீரர் இவர் தான்! விண்ணில் பறந்ததால் வாழ்க்கை பற்றிய தன் கருத்தில் எந்த ஒரு மாற்றமும் ஏற்படவில்லை என்கிறார் அவர்!

மற்ற விண்வெளி வீரர்கள் எல்லோரும் விண்ணில் பறந்தவுடன் ஒரு ஓவர் வியூ எஃபக்ட் (Overview effect) ஏற்பட்டு விட்டதாகக் கூறுவது வழக்கம். பிரக்ஞை பற்றிய உணர்வில் ஒரு பெரும் மாற்றம் ஏற்படுவதை ஓவர்வியூ எஃபக்ட் என்பர். ஆனால் இது தனக்கு ஏற்படவில்லை என்று கூறினார் அவர். இந்த ‘விண்வெளி பிரக்ஞை விளைவு’ தனிப்பட்ட நபராகவோ அல்லது அரிய உயிரின வகைக்கு ஏற்படும் ஒன்றாகவோ எந்த விதத்திலும் தனக்கு நிகழவில்லை என்றும் எப்போதும் போலத் தான் இருப்பதாகவும் அவர் கூறி அனைவரையும் பிரமிக்க வைத்தார்.

ஏனைய வீரர்களோ உலகைப் பற்றிய பார்வையில் தங்கள் உணர்வில் பெரிய மாற்றம் ஏற்பட்டு விட்டதாகக் கூறினர்.

எளிமையாக இருந்து விண்வெளிப் பயணத்தை அனுபவித்த பல்துறை மேதாவி என்று அவரைக் கூறலாமோ!

*********

Translated by London swaminathan

Pictures are taken from various sources; thanks.

From Arthur Miles’ book The Land of the Lingam 

Ammonite Fossils

1933-ஆம் ஆண்டில் இந்து மதத்தையும், குறிப்பாக சிவ லிங்க வழிபாட்டையும் குறைகூறி ஆர்தர் மைல்ஸ் என்பவர் ஒரு புத்தகம் வெளியிட்டார். பக்கத்திற்குப் பக்கம் இந்து மத பழக்க வழக்கங்களை  “பகுத்தறிவுப் பகலவன்கள்”(?!?!) குறைகூறுவது போல எழுதினாலும் நிறைய விவரங்களைத் தருகிறார். அதில் ஒன்று சாலக்ராமம் பற்றியது.

ஆங்கிலத்திலிருந்து மொழிபெயர்த்தவர் லண்டன் சுவாமிநாதன்:-

சாளக்கிராமம் என்பது வெழுமூன இருக்கும் ஒரு கல். அதற்குள் விஷ்ணு சக்கரம் போல அச்சு இருக்கும். இது உண்மையில் உயிரியல் அறிஞர்கள் சோதனைக் கூடங்களில் சேர்த்து வைக்கும் படிம அச்சுகளாகும் FOSSILS. அதாவது மில்லியன் அல்லது கோடிக்கணக்கான ஆண்டுகளுக்கு முன் வாழ்ந்த உரியினங்களின் கல் அச்சு.

இந்துக்களுக்கு இந்த படிம அச்சுகள் மிகவும் புனிதமானவை. சங்கு சக்கரம் போலப் பதிவான சித்திரம், விஷ்ணுவின் அடையாளம் என்று இந்துக்கள் கருதுவதால் அதற்கு தினமும் அபிஷேகம் ஆராதனை செய்து பூஜிப்பர்.

இது குறித்து ஆர்தர் மைல்ஸ் எழுதிய விஷயங்களை ஆங்கிலத்தில் அப்படியே வெளியிட்டேன். அதன் சுருக்கத்தைக் காண்போம்:

1.சாளக்ராமம் தோன்றிய கதை:—

ஒரு நாட்டியம் ஆடும் பெண்மணி பேரழகி. அவளுக்கு ஈடு இணையான

அழகுள்ள ஒரு ஆண்மகனும் கிடைக்கவில்லை. ஆகை யால் இமய மலைக்குப் போய்த் தவம் செய்வோம் என்று புறப்பாட்டாள். அங்கு விஷ்ணு வந்தார். அவருடைய பேரழகைக் கண்டவுடன் இந்தப் பெண் தவத்தை எல்லாம் விட்டுவிட்டு அவரிடம் சென்று என்னைத் திருமண ம் செய்து கொள்ளுங்கள் என்றார். அவரோ மானுடனாகப் பிறந்த நடன மாதுவைக் கைப்பிடிக்க விரும்பவில்லை. இருந்த போதிலும் இப்படிப்பட்ட பேரழகியை விடக்கூடாதென்று ஒரு வழி கண்டுபிடித்தார். பெண்ணே நீ கண்டகி நதியாகப் (GANDAKI RIVER) பிற ந்து வா. நான் அங்கே கிடக்கும் சாலக்ராமமாக அவதரிக்கிறேன். நீ என்னை எப்போதும் தழுவிச் செல்லலாம் என்றார்.

இந்தக்தையின் உண்மைப் பொருள்: நேபாள நாட்டிலுள்ள கண்டகி நதியில்தான் அதிகமாக இவ்வகை படிம அச்சுகள் FOSSILS கிடைக்கின்றன. அது விஷ்ணுவின் அம்சம். அதை உணர்த்த இந்தப் புனைக்கதை உருவாக்கப்பட்டது. இந்துக்கள் எதையுமே நேரடியாகச் சொல்லாமல் அடையாள க் குறி யீட்டுகளால் (symbolic story) காட்டுவர் அப்படிப்பட்ட ஒரு கதை இது.

2. சாளக்ராம மகிமை:-

நேபாள நாட்டைச் சேர்ந்த ஒரு வீரன் (க்ஷத்ரியன்) எதேச்சையாக ஒரு சாளக்ராம கல்லை வாயில் வைத்து கொண்டு நீந்தி வந்தார். அவருக்கு அதிர்ஷ்டத்துக்கு மேல் அதிர்ஷ்டம் அடித்தது. அவருக்கு அரச பதவியும் கிடைத்தது. பின்னர் விஷ்ணுவே வந்து மேக ரூபமாக அவரை சுவர்க்க லோகத்துக்கு அழைத்துச் சென்றார். அதற்குப் பிறகு கண்டகி நகர சாளக்கிராம கற்களின் மகிமை உலகிற்குத் தெரிந்தது. இப்பொழுது அது பஞ்ச்சாயதன பூஜையின் ஒரு பகுதியாக இந்துக்களின் வீட்டின் பூஜை அறையில் உள்ளது!

3.சாளக்கிராம கல்லை மதிப்பிடுவது எப்படி?

சாளக்கிராம கற்களை எடுக்கும் உரிமை அந்தக் காலத்தில் நேபாள மன்னர்களிடம் மட்டுமே இருந்தது. அவர்கள் அந்த உரிமையைக் குத்தகைக்கு விடுவர். ஆனால் யார் அவற்றைக் கண்டுபிடித்தாலும் அதை அரசரிடம் கொடுக்க வேண்டும். அவர்கள் அதிலுள்ள சக்கரம், குறிப்பிட இடத்திலுள்ள ஓட்டை இவற்றைக் கொண்டு மதிப்பிடுவர். அதற்குப் பின் அதைச் சுத்தம் செய்துவிட்டு ஒரு தராசின் ஒரு தட்டில் வைப்பர். ஒவ்வொரு கல்லுக்கும் சமமான அரிசியை மற்றொரு தராசுத் தட்டில் வைப்பர். மறு நாள் (24 மணி நேரத்தில்) அரிசியின் எடை அதிகரித்து அந்தத் தட்டு கீழே தாழ்ந்திருந்தால் அதன் மதிப்பு அதிகம். அரிசியின் அளவு இரு மடங்கு கூட ஆனதுண்டாம். அரிசியின் அளவு அதே மாதிரி நீடித்தாலோ அல்லது குறைந்தாலோ சாளக்கிராமத்துக்கு மதிப்பில்லை.

4.அதர்வ வேதத்தில் சாளக்ராமக் கல்

சாளக்ராமக் கல் இல்லாத வீடு சுடுகாட்டுக்குச் சமம் என்றும் அங்கே சமைக்கப்பட்ட உணவு நாயின் விட்டைக்குச் சமம் என்றும் அதர்வண வேதம் கூறுவதாக ஆர்தர் மைல்ஸ் எழுதுகிறார். சாளக்ராமக் கல்லின் அபிஷேக நீர்  மகிழ்ச்சியை அளிக்கும் என்றும் அதை அபிஷேகம் செய்து ஆராதிப்போர் வீ ட்டில் லட்சுமி நிரந்தரமாகக் குடியிருப்பதால் செல்வம் தழைக்கும் என்றும் இந்துக்கள நம்புகின்றனர்.

ஒரு காலத்தில் 4000 பவுண்டு கொடுத்து கூட அதை வாங்கினராம்.

5.கந்த புராணத் தகவல்

கந்த புராணத்தில்தான் சாளக்ராம மகிமை கூறப்பட்டிருக்கிறது. இதை வீட்டில் வைத்திருந்து பூஜை செய்யாமல் இருந்தால் துரதிருஷ்டம் பீடிக்கும். சாளக்ராமத்தில் உக்ர சக்ர சாளக்ராமங்கள் என்பன தீய விளைவுகளை ஏற்படுத்துமாம். அப்படி தீய விளைவை உண்டாக்கும் கற்கள் இருந்தால் அவைகளை க் கோவில்களில் கொடுத்து  விட்டால் ஒரு கஷ்டமும் வராது. கோவிலிலுள்ள மகத்தான சக்தி, பூஜைகளால் அவை உக்ரம் இழந்துவிடும்.

இறுதியாக சாலக்கிராமத்தில் போலி கற்களும் உண்டு. அதாவது மோசடி செய்வோர் அதன் மீது கருவிகளால் கோடு, ஓட்டைகளைப் போட்டு அவறறை சாளக்ராமம் என்று விற்பர். இவைகளைக் கண்டுபிடிப்பது எளிதல்ல. (ஆகையால் போலிகளைக் கண்டு ஏமாறாதீர்கள்).

-subham-

Written by S NAGARAJAN

Pictures are taken from various sources; thanks.

நடைச் சித்திரம்

எல்லோரும் அறிஞர்கள் ஆன காலம்!

ச.நாகராஜன்

காலம் கலிகாலம் என்று யார் சொன்னது?

பொய்.

வடிகட்டிய பொய்!

எல்லோரும் அறிஞர்கள்! எல்லோரும் விஞ்ஞானிகள்! எல்லோரும் டாக்டர்கள்! எல்லோரும் பேராசிரியர்கள்!

எந்த ஒரு சப்ஜெக்டிலும் யார் வேண்டுமானாலும் எப்போதும் வயது, அந்தசஸ்து, பால்,மதம், மொழி என்ற வேறுபாட்டையெல்லாம் கடந்து ‘அட்வைஸ்’ செய்யலாம்!

பொற்காலம் ஐயா இது, பொற்காலம்!!

காலையில் எழுந்து இத்யாதி காரியங்களை முடித்து விட்டு டிபன் சாப்பிட உட்கார்ந்தேன்.இட்லிக்கு சட்னி என்ற பெயரில் தேங்காயை மிக்ஸியில் ஒரு அலசு அலசி உப்பு போடாமல், கடுகு தாளிக்காமல் வந்தது ஒரு வஸ்து.

முழித்தேன்.

கடுகு சேர்த்தால் எட்டு கலோரி கூடி விடும்! உப்பு எவ்வளவு குறைக்க முடியுமோ அவ்வளவு குறைக்க வேண்டும்!

அப்பாவியாக நான், “வாட்ஸ் ஆப்பா? க்ரூப் அட்வைஸா’ என்று சகதர்மிணியை நோக்கிக் கேட்க தன் வாட்ஸ் ஆப் தகவலை அமுல் படுத்தியதை தோழிகளுக்குப் பெருமிதத்துடன் தெரிவிக்க அவள் விரைந்தாள்.

கடைக்குப் போக வேண்டும். ஸ்கூட்டர் சாவியைத் தேடினேன். மகன் ஓடி வந்தான் கையில் லாப் டாப்புடன், ஏதோ ஒரு சைட்டைப் பார்த்தவாறே

‘சாவி என் கையில் இருக்கிறது. தினமும் காலையிலும் மாலையிலும் நடக்க வேண்டும். நடப்பதே நல்லது. இன்னிக்கு ஒரு பத்தாயிரம் ஸ்டெப் போட்டால் போதும்’ கையில் ஒரு வாட்சைக் கட்டி விட்டான். அது நடக்கும் போது எத்தனை ஸ்டெப் போட்டோம் என்பதைக் காண்பிக்கும் வாட்ச் போன்ற ஒரு வஸ்து. விஞ்ஞான  விபரீதம்!

ஆமாம் என்றேன். நடக்க முடியாமல் நடக்க ஆரம்பித்தேன். ஒரு வழியாக வீடு வந்து சேர்ந்தாயிற்று.

அப்பாடா, நிம்மதியாக நியூஸ் சானலை ஆன் செய்தேன். பேரன் ஓடி வந்தான்.

அதை மாற்றி டிஸ்கவரி சானலுக்குப் போனான்.

‘தாத்தா, ரொம்ப பார்க்கக் கூடாது. கண் கெட்டு விடும். என் மிஸ் சொன்னாள்.’

ஓஹோ, அப்படியா?!

காலிங் பெல் அடித்தது. ஆஹா, பேப்பர் வந்து விட்டது!

சரி , கதவைத் திறந்து பேப்பரை வாங்கப் போனேன். இதை யாரும் தடை செய்து விட முடியாதல்லவா! நிம்மதியாகப் படிக்கலாம்!

அடுத்தவீட்டுக்காரர் பணிவுடன் ஒரு குட் மார்னிங் போட்டார்.

பேப்பர்காரரை நோக்கி அதட்டல் உருட்டலான பார்வையுடன், ‘நாளையிலிருந்து இங்கு பேப்பர் போடாதே!’ என்றார்.

பதறிப் போன நான், ‘ஏன்’ என்று பார்வையாலேயே கேட்டேன். பேச முடியவில்லை. அதனால்!!

‘ஸார் யார் தெரியுமா? ஆல் இந்தியா ரேடியோவில்  காலையில் சுற்றுப்புறச் சூழலைப் பாதுகாக்க வேண்டிய அவசியத்தை காலை மலர் நிகழ்ச்சியில் தினமும் பெசி வருபவர். ஒரு பேப்பரைத் தயாரிக்க எவ்வளவு மரங்கள் காடுகளில் அழிக்கப்படுகிறது, உனக்குத் தெரியுமா? பேசாமல் நீ கூட வேறு ஒரு வேலையைத் தேடிக் கொள்ளலாம். உனக்கும் நல்லது, நாட்டின் சுற்றுப்புறச் சூழலுக்கும் நல்லது!’

அவன் அரண்டு போய் ஓட ஆரம்பித்தான்.

நானோ! – ஙே என்று முழித்தேன்.

வேர்க்க விறுவிறுக்க வீட்டினுள் நுழைந்தேன்.

என் மருமகள், ‘ இந்த ஆல் இந்தியா ரேடியோவிற்குக் ஸ்கிரிப்ட், பாக்யாவிற்குத் தொடர்  எழுதுவது என்ற வேலை எல்லாம் வேண்டாம். இப்ப தான் என் ஃபிரண்ட் – அதான், பிஸியோதெராபிஸ்ட் பிரேமா ஸ்கைப்பிலே கூப்பிட்டு டெமோ செய்து காண்பித்தாள். நூறே நூறு பயிற்சிகள் தான். முதல் ஐந்தை இன்று ஆரம்பிக்கலாம். உடம்புக்கு ரொம்ப நல்லது!’

அடடா! என்ன அக்கறை!!

உலகத்திற்குத் தான் நம் மீது எத்தனை அக்கறை!!

சும்மாவா சொன்னார்கள் இரத்த பாசம் என்று!

எல்லோரும் அறிஞர்களே!

இப்போது சொல்லுங்கள், காலம் கலிகாலம் என்று யார் சொன்னது?

பொற்காலம் ஐயா இது, பொற்காலம்!!

***********

Written by S NAGARAJAN

Pictures are taken from various sources; thanks.

பாக்யா வார இதழில் அறிவியல் துளிகள் தொடரில் வெளியாகியுள்ள கட்டுரை

அற்புத அறிவியல் எழுத்தாளர் ஐஸக் அஸிமாவ்! – 1

ச.நாகராஜன்

“நாத்திகத்திற்கு பதிலாக பகுத்தறிவிற்கே நான் முன்னுரிமை அளிக்கிறேன்” – ஐஸக் அஸிமாவ்

ஆங்கில இலக்கியத்தில் ஸயின்ஸ் ஃபிக் ஷன் எனப்படும் அறிவியல் புனைகதைகளுக்குத் தனி ஒரு இடம் உண்டு.

அறிவியல் புனைகதைகளுக்கான என்சைக்ளோபீடியாவில் சுமார் 96 அறிவியல் பகுதிகள் இடம் பெற்றுள்ளன. ஆயிரக் கணக்கான கதைகள் மற்றும் நாவல்கள் அறிவியலில் நாம் நினைத்தும் பார்க்க முடியாத அற்புதங்களை கதைகள் வாயிலாகச் சுட்டிக் காட்டுகின்றன. குறைந்த பட்சம் பிரபலமான எழுத்தாளர்கள் 108 பேரின் பட்டியலை அறிவியல் ஃபிக் ஷன் என்சைக்ளோபீடியா பட்டியலிட்டுத் தருகிறது.

இந்த எழுத்தாளர்களின் எழுத்தைப் படிப்பது ஒரு சுகம் என்றால் இவர்களைப் பற்றி அறிவது  இன்னும் சுகமான அனுபவம்.

குறிப்பிடத்தகுந்த பலரில் ஒருவர் ஐஸக் அஸிமாவ். (தோற்றம் 2-1-1920 மறைவு 6-4-1992) அஸிமாவ் பற்றி இந்தத் தொடரில் பாக்யா 13-7-2012 இதழில் 72ஆம் அத்தியாயத்தில் சில விவரங்களைப் படித்திருக்கிறோம். அதில் சொல்லப்படாத ஏராளமான சுவையான செய்திகளை இனி காண்போம்.

பிரபல எழுத்தாளரான இவரின் படைப்புகள் பிரம்மாண்டம் என்ற அளவில் உலகினரால் பேசப்படுகின்றன.

500 அறிவியல் தொகுதிகளை அவர் எழுதியும் தொகுத்தும் இருக்கிறார். 90000 கடிதங்களையும் அஞ்சல் அட்டைகளையும் எழுதியுள்ளார். தனது வாழ்நாளில் வருடத்திற்கு குறைந்தபட்சமாக பத்து புத்தகங்களையாவது எழுதுவதை அவர் பழக்கமாகக் கொண்டிருந்தார். தொடாத துறை இல்லை என்பது போல தத்துவத்தைத் தவிர அனைத்துத் துறைகளிலும் அவர் தன் படைப்பாற்றலைக் காட்டினார். அவரது தனிப்பட்ட சொத்தாக இருக்கும் கையெழுத்துப் பிரதிகள் பாஸ்டன் பல்கலைக் கழகத்தில் முகர் நினைவு நூலகத்தில் இன்றும் பாதுகாக்கப்பட்டு வைக்கப்பட்டுள்ளன. அந்தப் படைப்புகள் 464 பெட்டிகளில் 232 அடி நீளமுள்ள அலமாரிகளில் வைக்கப்பட்டுள்ளன.

இவரது படைப்புகளில் 40 நாவல்களும் 382  சிறுகதைகளும் 280க்கும் மேலான கட்டுரைகள் அடங்கியுள்ள நூல்களும் அடங்கியுள்ளன.

எதிர்காலம் தன்னைப் பற்றி எப்படிக் கணிக்க வேண்டும் என்றும் அவர் தன் விருப்பத்தைத் தெரிவித்துள்ளார்.

ஒரு புத்தகம் எழுதிய எழுத்தாளராகவோ அல்லது பல புத்தகங்களைப் படைத்த படைப்பாளியாகவோ தன்னை  மதிப்பிடக் கூடாது என்றும் தனது மொத்தப் படைப்புகளுக்காகவும் அவற்றில் எண்ணிக்கைக்காகவும், தரத்திற்காகவும், அத்துடன் கூட அவற்றில் சொல்லப்பட்ட ஏராளமான விதவிதமான பொருள்களை வைத்துமே தன்னை நினைவு கொள்ள வேண்டும் என்றும் அவரே கூறியிருக்கிறார். அத்தோடு இது போல இன்னொருவர் இப்படிச் செய்யவே முடியாது என்பதும் அவரது நம்பிக்கை.

ரஷியாவில் உள்ள பெட்ரோவிச்சி என்னுமிடத்தில் ரஷிய தம்பதிகளான அன்னா ராக்கேல் பெர்மன் அஸிமாவுக்கும் ஜுடா அஸிமாவுக்கும் மகனாகப் பிறந்தார் ஐஸக் அஸிமாவ் . இவரது பிறந்த தேதி என்னவென்று யாருக்கும் தெரியாது. 1919ஆம் ஆண்டு அக்டோபார் 4ஆம் தேதியிலிருந்து 1920 ஜனவரி 2க்குள் ஏதோ ஒரு நாளில் இவர் பிறந்திருக்க வேண்டும். ஆனால் ஜனவரி 2ஆம் தேதியைத் தனது பிறந்த நாளாக அவரே தேர்ந்தெடுத்துக் கொண்டார்.

ஸ்டான்லி என்ற ஒரு தம்பியும் மான்யா என்ற ஒரு தங்கையும் ஐஸக்கின் உடன் பிறப்புகள். அவருக்கு மூன்று வயதாகும் போது அவரது பெற்றோர் அமெரிக்காவிற்குக் குடியேறினர். நியூ யார்க்கில் ப்ரூக்ளினில் வசித்த போது ஐந்து வயதிலேயே ஐஸக் நன்கு எழுதவும் படிக்கவும் கற்றார். அஸிமாவின் பெற்றோர்கள் ஒரு மிட்டாய் கடையையும் புத்தகக் கடையையும் நடத்தி வந்தனர். அங்கு தான் தனக்குப் படிக்கவும் எழுதவும் ஆர்வம் பிறந்தது என்று பின்னாளில் ஐஸக் குறிப்பிட்டார்.

பள்ளியில் அவரது அபாரமான அறிவைக் கண்ட கடைசி பெஞ்சுக்காரர்களுக்கு அவரைக் கண்டால் பிடிக்கவில்லை. அவருக்கு அடிக்கடி தொல்லை கொடுக்க ஆரம்பித்த அவர்களைத் தன் புத்தி சாதுரியத்தால் வெகு எளிதாக சமாளித்தார். நல்ல உடல் வலுவுடன் படிப்பதில் பின் தங்கியுள்ள ஒருவனுக்கு அவர் உதவி செய்ய ஆரம்பிக்கவே அந்தப் பையன் அஸிமாவின் மெய்காப்பாளராக மாறினான். அதிலிருந்து அவருக்கு யாரும் தொந்தரவு கொடுக்கவில்லை!

எட்டு வயதாகும் போது அமெரிக்க குடியுரிமையை அவர் பெற்றார். பதினோராம் வயதில் தனது முதல் கதையை எழுதினார். 19ஆம் வயதிலேயே தனது படைப்புகளுக்கு பெருத்த சன்மானம் பெற ஆரம்பித்தார்.

அஸிமாவின் தந்தைக்கு அவர் இப்படி கதைகள் எழுதுவது பிடிக்கவில்லை. ஆனால் அறிவியல் புனைகதைகளில், அறிவியல் அதாவது ஸயின்ஸ் இருக்கிறது என்று அஸிமாவ் சொல்லவே அவர் அதை ஆதரித்து கதை எழுதுவதைத் தடை செய்யவில்லை!

‘மரூன்ட் ஆஃப் வெஸ்டா’ (Marooned Off Vesta -1939)  என்ற முதல் கதையிலிருந்து எழுத ஆரம்பித்த அஸிமாவ் இரண்டு வருடங்களுக்குள் 32 கதைகளை எழுதி பிரபலமாகி விட்டார். அவரது நைட் ஃபால் (Night Fall) என்ற 32வது கதை அறிவியல் புனைகதைகளில் சிறந்த கதைகளுள் ஒன்றாக இன்றும் போற்றப்படுகிறது. (இந்தக் கதையின் சுருக்கம்     பாக்யா   13-7-2012 இதழில் இந்தத் தொடரின் 72ஆம் அத்தியாயத்தில் சுருக்கமாகத் தரப்பட்டுள்ளது.)

கொலம்பியா பல்கலைக்கழகத்தில் இரசாயனத்தில் பி.ஹெச்டி பட்டத்தைப் பெற்ற அவர் பாஸ்டன் பல்கலைக்கழகத்தில் பேராசிரியாகப் பணிபுரிய ஆரம்பித்தார். இறுதிக்காலம் வரை அவர் அந்தப் பல்கலைக்கழகத்துடனான தொடர்பை விடவே இல்லை.

ஸயின்ஸ் அண்ட் ஸயின்ஸ் ஃபிக் ஷன் என்ற மாதப் பத்திரிகையில் ஒரு தொடரை அவர் 1958 நவம்பரிலிருந்து எழுத ஆரம்பித்தார். இந்தத் தொடரில் கதைகள் அல்லாத இதர விஷயங்களே இடம் பெற்றன. எதைப் பற்றி வேண்டுமானாலும் எழுதலாம் என்ற சுதந்திரத்தை ஆசிரியர் தந்து விட்டதால் தான் இறக்கும் வரையில் தொடர்ந்து அவர் பல விஷயங்கலைப் பற்றியும் இதில் எழுதி வந்தார். இந்தத் தொடர் மிகவும் பிரபலமானது. 399 இதழ்களில் தொடர்ந்து இந்தப் படைப்புகள் வெளி வந்தன.

‘அறிவியலுக்கான நுண்ணறிவுக் வழிகாட்டி’ என்று பொருள்படும் ‘தி இண்டெலிஜெண்ட் கைட் டு ஸயின்ஸ் ‘ என்ற  ஒரு களஞ்சியத்தை அவர் எழுதி வெளியிட்டார். இது மிகவும் பிரபலமாகி இவருக்குப் பெரும் புகழைப் பெற்றுத் தந்தது. இதனால் தனது பல்கலைக்கழகப் பொறுப்பிலிருந்து விலகி முழு நேர எழுத்தாளராக மாறி படைப்பாற்றலில் முழுதுமாக கவனம் செலுத்த ஆரம்பித்தார்.

அறிவியல் அறிஞர் வாழ்வில் .. . 

பிரபல அமெரிக்க விண்வெளி வீரரான எட் லூ பணி ஓய்வு பெற்று விட்டபின் செய்ய முயன்றிருக்கும் பணி வானளாவிய உயர்ந்த பணி!

   ஆமாம், அவர் செய்யப் போகும் பணி பூமியைக் காப்பது தான். அயல்கிரகவாசிகளிடமிருந்து அவர் பூமியைக் காக்க முனையவில்லை. மாறாக, பூமியை நோக்கி மோத வரும் விண்கற்களிலிருந்து பூமியைக் காப்பதே அவர் திட்டம். இதற்காக பி- 612 என்ற ஒரு அமைப்பை அவர் அமைத்துள்ளார்.  இந்த அமைப்பின் மூலமாக் செண்டினல் (Sentinel) தஎன்ற ஒரு விண்வெளி டெலஸ்கோப்பை விண்வெளியில் அவர் அமைக்கப் போகிறார். நன்கொடையாளர்கள் மனமுவந்து பல லட்சம் டாலர்களை அவரிடம் தந்துள்ளனர்.2018ஆம் ஆண்டு வாக்கில் இந்த டெலஸ்கோப் விண்ணில் நிறுவப்படும். இதன் மூலம் விண்கற்கள் கண்காணிக்கப்படும்.

2000ஆம் ஆண்டிலிருந்து எட்டு முறை ஹிரோஷிமாவில் போடப்பட்ட அணுகுண்டிற்குச் சமமான அளவுக்கு மோதல்கள் பூமியில் ஏற்பட்டுள்ளன. ஒரு விண்கல் மோதலினால் தான் டைனோஸர் இனமே பூமியில் அழிந்து பட்டது. ஆகவே எதிர்காலத்தில் நமது பூமியில் வாழ் மக்களைக் காக்கவும் அரும் நகரங்களைக் காக்கவும் இந்தத் திட்டம்  உதவும்

வானளாவிய பணியை வானளாவிய உயரத்தில் செய்ய இருக்கும் எட் லூ போற்றப்பட வேண்டியவர் தானே!

*************

Written by London Swaminathan

Date: 11 September 2016

Time uploaded in London: 7-03 AM

Post No.3142

Pictures are taken from various sources; thanks.

உடலில் ஒவ்வொரு அங்கமும் எப்படி இருந்தால் அதனால் என்ன பலன் என்று கூறும் சாத்திரம் சாமுத்ரிகா லக்ஷண சாத்திரம் ஆகும். இது குறித்து வராஹ மிஹிரர் சொன்ன விஷயங்களை ஏற்கனவே எழுதினேன்.

கம்பனும் ராமாயணத்தில் இது பற்றி பல குறிப்புகளைக் கொடுக்கிறான். சம்ஸ்கிருதத்தில் ஆஜானு பாஹு என்பர். அதை அவன் நீண்ட நெடுந்தோள், தாள்தோய் தடக்கை என்றெல்லாம் வருணிப்பான்.

இதோ ஒரு பாடல்:

சங்கு சக்கரக்குறி உள தடக்கையில் தாளில்

எங்கும் இத்தனை இலக்கணம் யாவர்க்கும் இல்லை

செங்கண் விற்கரத்து இராமன் அத் திரு நெடுமாலே

இங்கு உதித்தனன் ஈண்டு அறம் நிறுத்துதற்கு இன்னும்.

-நட்பு கோட் படலம், கிஷ்கிந்தா காண்டம், கம்ப ராமாயணம்

பொருள்:–

சுக்ரீவனிடம் அனுமன் சொல்லுகிறான்

இராமனுக்கு பெரிய கைகளிலும் கால்களிலும் சங்கு, சக்கர அடையாளங்கள் உள்ளன. இததகைய உயர்ந்த இலக்கணங்கள் எந்த உலகத்திலும் எவர்க்கும் இல்லை. ஆகையால் சிவ ந்த கண்களையும் வில்லை ஏந்திய கைகளையும் உடைய இராமன் இப்போது அறத்தை நிலை நிறுத்துவதற்கா க உலகில் அவதரிக்கும் திருமாலே ஆவான். மேலும்……………..

கைகளில் மட்டும் சங்கு ச்க்கர ரேகை இருப்பதே ஆபூர்வம்; இவனுக்கோ கைகளிலும் கால்களிலும் இப்படி சங்கும் சக்கரமும் காணப்படுகின்றன.

(எனக்கு ஒரு சிந்தனை: இப்படிக் கை, கால்களில் சாமுத்ரிகா லட்சண ரேகைகள் இருந்ததைத் தான் பிற்காலத்தில் உண்மையிலேயே கைகளில் சக்கரமும் சங்கும் இருப்பது போல உருவம் செய்துவிட்டார்களோ? ஆராய்ச்சிக்குரிய விஷயம்!)

ஐந்து உறுப்புகள் நீண்டதாக இருப்பது நல்லது என்று சம்ஸ்கிருத நூல்களும் மொழியும்:

பாஹூ நேத்ரத்வயம் குக்க்ஷிர்த்த்வே து நாசே ததைவ ச

ஸ்தனயோரந்தரம் சைவ பஞ்ச தீர்கம் ப்ரசக்ஷதே

பொருள்:-

நீண்ட கைகள், நீண்ட கண்கள், மூக்கு, வயிறு, முலைகள் இருக்க வேண்டும் என்று சொல்லப்படும்.

My earlier post:

Scientific proof for Samudrika Lakshanam

Posted by Santhanam Swaminathan on 18 Mar 2013

–Subahm–