WRITTEN BY S NAGARAJAN

Post No. 10,373

Date uploaded in London – –   24 NOVEMBER  2021         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

ஸ்ரீ சத்ய சாயி பாபா! – 2

ச.நாகராஜன்

தொடர்ந்து வந்த சில ஆண்டுகளில் ஆயிரக்கணக்கில் பக்தர்கள் சேர்ந்தனர்.

பாபா இருக்குமிடம் பிரசாந்தி நிலையம் என்ற பெயருடன் உருவானது. ஆயிரக்கணக்கான அருள் விளையாடல்களை அவர் நடத்த ஆரம்பிக்க உலகமே பிரமித்தது. நேரத்தைக் கருதி ஒரு சில முக்கிய அற்புதங்களை மட்டும் இங்கு பார்ப்போம்.

ஒவ்வொரு மனிதரைச் சுற்றியும் ஒரு ஒளிவட்டம் உண்டு.ஆங்கிலத்தில் இதை அவ்ரா (AURA) என்று குறிப்பிடுவர். இந்த ஒளிவட்டத்தைப் பற்றி ஆராய்ந்தவர்களுள் தலையாய விஞ்ஞானி அரிஜோனா பல்கலைக் கழகத்தைச் சேர்ந்த டாக்டர் ஃப்ராங்க் பாரனோஸ்கி என்பவராவார். அவர் தொடர்ந்து செய்த ஆராய்ச்சிகளால் எந்த வித சாதனமுமின்றி ஒரு மனிதரின் அவுராவை தனது வெறும் கண்களாலேயே பார்க்கும் திறனைப் பெற்றவர். அவர் பாபாவை தரிசித்தார். ஆனந்தம் கொண்டார். 1979ஆம் ஆண்டு மே மாதம் 19ஆம் தேதி பிருந்தாவன் அருகே ஸ்ரீ சத்ய சாயி கல்லூரி கட்டிடங்களின் திறப்பு விழாவில் ஸ்ரீ சத்ய சாயி கட்டிடங்களைத் திறந்து வைக்க, தொடர்ந்து நடந்த பயிற்சி முகாமில் எட்டாம் நாளன்று பாரனோஸ்கி உரை நிகழ்த்தினார். அந்த உரையில், “நான் அமெரிக்க நாட்டுத் தலைவர் ஃபோர்ட், இங்கிலாந்து ராணி இரண்டாவது எலிஸபத் நெதர்லாந்து ராணி வில்லெயுல்மினா ஆகியோர் இருந்த மேடைகளில் பேசியுள்ளேன்” என்று கூறிய அவர் ஸ்வாமியின் ஒளிவட்டம் இளஞ்சிவப்பு நிறத்தில் இருப்பதையும் அது அவர் பேசும் நபர் அல்லது தொடும் நபரை ஊடுருவி பிறகு திரும்பி வருவதையும் கண்டதாகவும், அவருடைய சக்தி எங்கும் பரவி இருப்பதாகவும் கூறினார். அவரது பிரேமை ஒளிவட்டத்தைக் கண்டு வியந்த அவர், Love Walking on Two Feet – நடமாடும் பிரேமை உருவம் – என்று அவரை வர்ணித்தார்.

அமெரிக்காவில் ஒரு பெரிய நிறுவனத்தின் நிர்வாகி வால்டர் கோவான் என்பவர். அவர் தனது மனைவி எல்ஸியுடன் இந்தியா வந்து ஸ்வாமியை தரிசித்தார். சென்னையில் 1971 டிசம்பரில் எட்டாவது அகில இந்திய ஸ்ரீ சத்ய சாயி சேவா நிறுவனங்களின் மாநாட்டில் கலந்து கொள்ள அவர் வந்த போது கன்னிமாரா ஹோட்டலில் தங்கி இருந்தார். டிசம்பர் 20ஆம் தேதி காலையில் திடீரென்று அவருக்கு மாரடைப்பு ஏற்பட்டது. உடனடியாக ஆஸ்பத்திரிக்கு எடுத்துச் செல்லப்பட்ட அவர் அங்கு காலமானதாக அறிவிக்கப்பட்டு அவர் நாசியிலும் காதுகளிலும் பஞ்சும் வைக்கப்பட்டது. அவர் சவத்தை அப்புறப்படுத்த டாக்டர் உத்தரவிட்டார். பிறகு தனது அலுவலைக் கவனிக்கச் சென்ற அவர் திரும்பி கோவானின் அறைக்கு வந்த போது அவர் உயிருடன் இருந்தார். பஞ்சு அகற்றப்பட்டிருந்தது. இதயத் துடிப்பு சீராக இருந்தது. என்ன நடந்தது என்று டாக்டர் பிரமித்தார். பணியாளர்கள் சிவப்பு நிற அங்கி அணிந்த ஒருவர் கோவானைப் பார்க்க வந்ததாகவும் உடனே அவர் உயிர் பிழைத்தார் என்றும் கூறினர் கோவானே நடந்தது என்ன என்பதைப் பின்னர் விளக்கினார்.

தான் இறந்து வெகு உயரம் சென்றதாகவும் பாபா தன்னுடன் வந்ததாகவும் அவர் கூறினார். ஒரு இடத்தில் மேஜை ஒன்றில் தலைவராகக் காணப்பட்ட ஒருவரிடம் கோவானைப் பற்றிய பல ஆவணங்கள் பல மொழிகளில் தரப்பட்டன.அவை அவர் பல் வேறு காலங்களில் பல்வேறு கலாசாரங்களில் உயர்ந்த பதவி வகித்து வந்ததை அவை குறிப்பிட்டன. அதை பாபா மொழிபெயர்த்துக் கூறினார். அந்தத் தலைவரிடம் பாபா, கோவானைத் தன்னுடைய பாதுகாப்பில் அனுப்பி வைக்குமாறு கூற தலைவர் அதற்கு இணங்க இருவரும் அறையை விட்டு வெளியே வந்தனர். தான் மீண்டும் உயிருடன் இருப்பதை உணர்ந்ததாக கோவான் கூறினார். இப்படி இறந்த ஒருவர் மீண்டும் உயிர் பெற்ற சம்பவம் நம் காலத்திலேயே நம் கண் முன்னாலே நடந்திருக்கிறது என்பது எத்துணை ஆச்சரியமான ஒன்று!

டாக்டர் பகவந்தம் கேம்பிரிட்ஜில் படித்த சுலபத்தில் மசியாதவர். சித்து வேலைகளைக் கண்டால் அவருக்குப் பிடிக்காது. ஒரு முறை அவர் பாபாவைச் சந்தித்த போது அவரிடம் பாபா பகவத் கீதை வேண்டுமா, நான் கொடுத்தால் படிப்பீர்களா என்றார். ”இன்றே படிக்காவிட்டாலும் அதை பொக்கிஷமாகப் பாதுகாப்பேன்” என்றார் பகவந்தம்.

அவர் பார்த்துக் கொண்டே இருக்க கையை அசைத்தார் பாபா. அதிலிருந்து சிறிய அளவில் ஒரு கீதை புத்தகம் சிருஷ்டிக்கப்பட்டிருந்தது. விஞ்ஞான மனப்பான்மை கொண்ட பகவந்தம் அதிசயித்து அது எந்த பிரஸ்ஸில் அடிக்கப்பட்டது என்று கேட்டார்.
‘சாயி பிரஸ்ஸில். தெலுங்கு எழுத்துக்களில் அடிக்கப்பட்டிருக்கிறது. ஏனெனில் உங்களுக்குப் படிக்கச் சுலபமாக இருக்கும்” என்றார் பாபா. பகவந்தம் பாபாவின் அணுக்கத் தொண்டராக ஆனார்; பகவான் தெலுங்கில் ஆற்றிய சொற்பொழிவுகளை ஆங்கிலத்தில் மொழிபெயர்க்கும் பாக்கியத்தையும் பெற்றார்.

அமெரிக்காவில் பிரபலமான சைக்கியாட்ரிஸ்ட் டாக்டர் சாமுவேல் சாண்ட்விஸ் (Dr. Samuel Sandweiss)என்பவர், தானே பாபாவிடம் பல அனுபவங்களைப் பெற்றார்.

Amazing! Unbelievable! Unthinkable! என்று தனது அனுபவங்கள் பலவற்றால் அவர் வியந்து கூறினார். இனி Psychiatry யே இல்லை! இனி உலகை Saichiatry யே ஆளும் என்று சிலேடையாக எழுதினார். அவரது Sai Baba The Holy Man and the Psychiatrist என்ற நூல் உலகப் புகழ் பெற்ற நூல்.

பாரா சைக்காலஜி எனப்படும் அதீத உளவியல் துறையில் நிபுணத்வம் கொண்ட பல விஞ்ஞானிகள் பாபாவிடம் வந்து அவரை ஆராய ஆரம்பித்தனர். கார்லிஸ் ஓஸில் என்ற விஞ்ஞானி பாபாவின் அனுமதியைப் பெற்று அவரை ஆராய ஆரம்பித்தார். அவருடன் ஹரால்ட்ஸன் என்பவரும் சேர்ந்தார்.

அங்கையை அசைத்து விபூதியை வரவழைத்து அவர்களிடம் தந்தார் பாபா. பல அதிசய அனுபவங்களைப் பெற்ற அவர்கள் 1975இல் கலிபோர்னியாவில் நடந்த பல்கலைக் கழக அதீத உளவியல் ஆராய்ச்சி நிறுவனத்தின் மகாநாட்டில் இந்த அற்புதங்களில் மோசடி இருப்பதற்கான சான்றாக எதையும் தங்களால் கண்டு பிடிக்க முடியவில்லை என்றனர்.

***   தொடரும்

tags- சத்ய சாயி பாபா! – 2

WRITTEN BY S NAGARAJAN

Post No. 10,369

Date uploaded in London – –   23 NOVEMBER  2021         

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

வாரந்தோறும் திங்கள் கிழமை இந்திய நேரம் மாலை 6.30க்கு ஒளிபரப்பாகும் ஞானமயம் நிகழ்ச்சியில் 22-11-2021 அன்று ச.நாகராஜன் ஆற்றிய உரை.

எந்த நேரமும் ஞானமயம் நிகழ்ச்சிகளை யூ டியூபிலும் facebook.com/gnanamayam என்ற இணைய வழித் தொடுப்பிலும் காணலாம். இந்த உரை மூன்று பகுதிகளாகத் தரப்படுகிறது.

ஸ்ரீ சத்ய சாயி பாபா! – 1

அன்பார்ந்த தமிழ் நெஞ்சங்களே, சந்தானம் நாகராஜன் வணக்கம். நமஸ்காரம்.

நாளை நவம்பர் மாதம் 23ஆம் தேதி. அவதார புருஷர் ஸ்ரீ சத்ய சாயி பாபா அவர்களின் ஜெயந்தி தினம். அதையொட்டிய இந்த உரையில் எனது அனுபவங்கள் சிலவற்றைப் பகிர்ந்து கொண்டு பிறகு பாபாவைப் பற்றிச் சொல்ல எண்ணுகிறேன்.

ஆயிரத்தி தொள்ளாயிரத்து அறுபதுகளின் முற்பகுதியில் நவம்பர் மாதம் 23 ஆம் தேதியை ஒட்டிய முன் தினமொன்றில் மதுரையிலிருந்து ஸ்ரீ சத்ய சாயி பாபாவின் பக்தர்களின் குடும்பங்கள் பல புட்டபர்த்திக்குச் செல்லத் திட்டமிட்டன. அதில் எனது குடும்பமும் ஒன்று. எனது தந்தையார் தினமணி ஸ்ரீ வெ.சந்தானம் எங்களையும் ஒரு காரில் அழைத்துச் சென்றார். மதுரையில் பெரும் வியாபாரியும் ஸ்ரீ சத்ய சாயி பாபாவின் பக்தருமான ஸ்ரீ P.S.A சுப்ரமணியம் செட்டியார் தலைமையில் LIC இல் பணி புரிந்த பெரிய அதிகாரி ஸ்ரீ K R K பட் உள்ளிட்டோர் அவரவர் காரில் சென்றோம்.

புட்டபர்த்தி அடைந்தவுடன் அங்கு ஸ்ரீ கஸ்தூரி அவர்களைச் சந்தித்தோம். அந்தக் காலத்தில் இப்போது காணும் பிரம்மாண்டமான புட்டபர்த்தி இல்லை.

பிரசாந்தி நிலையம் மிகச் சிறிய கட்டிடமாக இருந்தது. அருகே பல சிறிய வீடுகள். அதில் ஒன்றில் ஸ்ரீ கஸ்தூரி இருந்தார். அவருடன் அளவளாவி மகிழ்ந்தோம். மறு நாள் ஸ்ரீ பாபா எங்களை இண்டர்வியூவுக்கு அழைத்தார். எனது தந்தையாருக்கு தன் அங்கை அசைவில் கையை அசைத்து தனது விஸிடிங் கார்ட் ஒன்றை வரவழைத்துக் கொடுத்தார். பல அருளுரைகளையும் கூறினார்.

மிகுந்த மகிழ்ச்சி அனைவருக்கும். திரும்பி ஊர் வந்து சேர்ந்தோம். அன்று முதல் SAI ACTIVITIES சாயி சேவா தொடங்கியது.

எனது தந்தையார் ஏராளமான சாயி கீர்த்தனைகளை இயற்றினார். நேரம் காலம் இல்லை. நினைத்த போது கீர்த்தனைகள் எழும். அதை உடனே எழுதிக் கொள்வார். சங்கீத வித்வான்கள் பலரும் அதைப் பாடி மகிழ்ந்தனர். அதை சாயிபாபாவிடம் சமர்ப்பித்த போது அது ஏற்கனவே எழுதும் போதே சமர்ப்பிக்கப்பட்டு விட்டது என்றும் பதங்கள் நடனமாடி வந்திருக்கின்றன என்றும் அவர் கூறி அருளினார்.

நான் சேவா தள் அமைப்பில் சேர்ந்து வாராவாரம் மதுரை ஜெனரல் ஹாஸ்பிடல் சென்று சேவை செய்வது, அதி காலை 5 மணிக்கு நகர சங்கீர்த்தன், ஞாயிறு அன்று ஸ்டடி சர்க்கிள், கோவிலில் உழவாரப் பணி, அருகில் உள்ள கிராமங்களுக்குச் சென்று மெடிகல் கேம்ப் உள்ளிட்டவற்றில் ஈடுபட்டேன். ஏராளமான இடங்களில் பஜனை நடைபெறும். ஒவ்வொருவருக்கும் ஒரு திவ்ய அனுபவம். பல படங்களிலிருந்து விபூதி மழை பொழியும். பகவான் மதுரை விஜயம் செய்தார். அவரது பேச்சை சுத்தானந்த பாரதியார் மொழி பெயர்த்தார்.

சென்னை மாநிலத்தில் மாநில அளவிலான சேவா தள் பேச்சுப் போட்டியில் பங்கு கொண்டேன். அதில் மாநிலத்திற்கான முதல் பரிசைப் பெற்றேன்.சென்னை ஆபட்ஸ்பரியில் நடந்த விழாவில் பாபாவின் திருக்கரங்களினால் அவர் எழுதிய ராமகதா ரஸ வாஹினி நூலை -அவர் கையெழுத்திட்டுக் கொடுத்த நூலை – அவரிடமிருந்து பெறும் பெரும் பாக்கியத்தையும் பெற்றேன்.

இன்னும் பிரசாந்தி நிலைய அனுபவங்கள், மாநாடு, ஆங்காங்குள்ள ஊர்களில் ஏற்பட்ட அனுபவங்கள் என அடுத்தடுத்து ஏராளம் ஏற்படலாயின.

அவர் கலியுகத்தில் அவதரித்த மாபெரும் அவதாரம் என்பதை உணர்ந்த கோடிக் கணக்கான பக்தர்களில் அடியேனும் ஒருவனாக ஆகியதோடு மட்டுமின்றி அவரது வரலாற்றை தமிழில் அற்புத அவதாரம் ஸ்ரீ சத்ய சாயி பாபா என்ற நூலாக எழுதி டிசம்பர் 2002இல் வெளியிட்டேன். 368 பக்கங்கள் கொண்ட அந்த நூலில் அவரது பல உரைகளின் பகுதிகளும் கூட ‘அம்ருத சாகரம் என்னும் சாயி உபதேச மஞ்சரி’ என்ற இணைப்பாகத் தரப்பட்டிருந்தது. இந்த எனது முன் உரையுடன், இனி அவரது வாழ்க்கை சரிதத்திற்கு வருவோம்.

      ஆந்திர மாநிலத்தில் அனந்தப்பூர் மாவட்டத்தில் தர்மாவரம் அருகே உள்ளது புட்டபர்த்தி என்னும் சிறிய கிராமம். இங்கு க்ஷத்திரிய வம்சத்தைச் சேர்ந்த ராஜு வம்சத்தினர் நெடுங்காலமாக வசித்து வந்தனர். பாரத்வாஜ கோத்திரத்தையும் ஆபஸ்தம்ப சூத்திரத்தையும் சேர்ந்த ஸ்ரீ கொண்டம ராஜு ‘ரத்னாகர’ என்ற பெயரைக் கொண்டவர். ஆகவே இவரை ரத்னாகர கொண்டமராஜு என அனைவரும் அழைப்பர். இவருடைய மனைவி லக்ஷ்மம்மா சத்ய நாராயண பூஜையைப் பயபக்தியுடன் செய்து வந்தவர். இவருக்கு இரு மகன்கள் பிறந்தனர். இவருடைய மூத்த மகனான பெத்த வெங்கமராஜு ஈஸ்வரம்மா என்பவரை மணந்தார். இந்த தம்பதியினருக்கு 1926ஆம் ஆண்டு நவம்பர் மாதம் 23ஆம் தேதி காலை எட்டு மணிக்கு திருவாதிரை நக்ஷத்திரத்தில்  மூன்றாவது மகனாக அவதார புருஷர் சத்ய நாராயணன் அவதரித்தார். தன் அவதார பணியை நிறைவேற்றக் காத்திருந்த பாலகன் ,1940ஆம் ஆண்டு அக்டோபர் மாதம் இருபதாம் தேதி பள்ளிக்கூடம் நோக்கிச் சென்ற பாலகன், திரும்பி வந்து தன் புத்தகங்களை அண்ணன் வீட்டில் எறிந்து விட்டு, “என் பக்தர்கள் என்னை அழைக்கின்றனர். நான் கிளம்பி விட்டேன்” என்றார்.

அன்று தனது பக்தரான கலால் இன்ஸ்பெக்டரின் வீட்டிற்குச் சென்றார். அங்கு வீட்டைச் சுற்றி இருந்த மாந்தோப்பில் ஒரு கல்லின் மீது அமர்ந்து,

“மானஸ பஜரே குரு சரணம், துஸ்தர பவ சாகர தரணம்” என்று பாடி தனது முதல் உபதேசத்தை ஆரம்பித்தார்.

***   தொடரும்

tags- சத்ய சாயி பாபா! – 1, sathya sai