WRITTEN BY S NAGARAJAN

Post No. 9558

Date uploaded in London – –  –3 May   2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great

மலைப்பாம்பு விழுங்கிய சிறுவனைக் காப்பாற்றியது எப்படி?

ச.நாகராஜன்

சிறை இலக்கியம்!

சுதந்திரப் போராட்டத்தில் எவ்வளவோ தியாகங்கள்! எவ்வளவோ வீரர்கள் தங்கள் சொத்து சுகத்தை இழந்து சிறையில் வாடினார்கள்.

அந்தச் சிறைவாசத்தில் மலர்ந்தது ஒரு சிறைவாச இலக்கியம். பண்டிட் ஜவஹர்லால் நேரு சிறையிலே படித்தார்; எழுதினார். மஹாத்மா காந்திஜி சிறையிலே படித்தார்; எழுதினார். வினோபா பாவே கீதைச் சொற்பொழிவுகளை சகாக்களுக்காக சிறையிலே நிகழ்த்தினார்; அது கீரைப் பேருரைகளாக மலர்ந்தது. ராஜாஜி ஜெயில் டைரி எழுதினார். அது சரித்திரக் குறிப்பாக மாறியது. அதே போல சுதந்திரப் போராட்ட வீரரான பட்டாபி சீதாராமையா சிறையிலே பல அருமையான சுவையான செய்திகளைப் படித்தார்; சேகரித்தார். தேதியிட்டு எழுதப்பட்ட அந்தக் குறிப்புகள் பின்னால் Feathers  and Stones என்று அழகிய புத்தகமாக மலர்ந்தது.

அதில் சில பகுதிகளை இங்கு பார்க்கலாம். அவரது செய்தி சேகரிக்கும் பாங்கு மற்றும் அழகிய நடை ஆகியவற்றிற்காக.

7-11-1942 தேதியிட்ட அழகிய தகவல் இது.

இதோ அவரது எழுத்து (தமிழாக்கம் என்னுடையது) :

மௌலானா சில பழைய சரித்திரப் புத்தகங்களை ஆர்டர் செய்திருந்தார். அதில் கிராமப் புறத்தில் வாழும் மக்களின் நுண்ணறிவு பற்றிய செய்திகள் இருந்தன. ஒரு செய்தி இது!

xxx

மலைப்பாம்பு விழுங்கிய சிறுவன்!

ஒரு மிகப் பெரிய மலைப்பாம்பு ஒரு பையனை விழுங்க ஆரம்பித்தது. அவன் கால்களைப் பிடித்து அது இழுக்க அவன் ஓவென்று அலறினான். என்னென்னவோ முயற்சிகளைச் செய்து பார்த்தான் அந்தச் சிறுவன். ஒன்றும் பலிக்கவில்லை. பாம்பு பிடித்த பிடி விடவில்லை. பாம்பின் கண்களில் புழுதியை வாரி இறைத்தான். ஆனால் அதுவோ கொஞ்சம் கொஞ்சமாக அவனை மார்பு வரை விழுங்கி விட்டது. அவன் கைகளை வெளியில் நீட்டிக் கொண்டு ஓவென்று உரக்கக் கத்தினான். அந்தக் கூக்குரலைக் கேட்டு கிராம மக்கள் குழுமினர். பாம்பின் தலையில் அடித்தால் அது அந்தப் பையனையும் பாதிக்கும். ஏனெனில் அவன் உடலின் பெரும்பகுதி அந்தத் தலைப் பகுதியில் தான் இருந்தது. வாலைப் பிடிக்கலாமோ என்றால் அது கோபத்தில் பையனை ஏதாவது செய்து விட்டால் என்ன செய்வது? ஆகவே அவர்கள் யோசித்தனர். அனைவரும் கழிகளை எடுத்துக் கொண்டு பாம்பின் முதுகெலும்பில் அடித்தனர். அது இறந்தது. பையன் காப்பாற்றப்பட்டான். அவனை உடனே வெளியில் இழுத்தனர். அவன் உயிருக்கு ஆபத்து ஒன்றும் ஏற்படவில்லை. உடம்பு முழுவது சிறு சிறு காயங்கள் மட்டும் இருந்தன.

பின்னர் அனைவரும் பாம்பின் உடலைப் பிளந்தனர். உள்ளே பார்த்தால் ஒரு ஆடும் ஒரு முயலும் இருந்தது.

xxxx

கழுகு தூக்கிச் சென்ற குழந்தை!

அதே புத்தகம் இன்னொரு சம்பவத்தையும் குறிப்பிட்டிருந்தது.

ஒரு பெரிய கழுகு ஒரு சிறு குழந்தையைத் தூக்கிச் சென்று விட்டது. கிராம மக்கள் குழந்தையின் தந்தை போட்ட கூக்குரலைக் கேட்டு குழுமி விட்டனர். கழுகோ குழந்தையை ஒரு பாறையின் மேல் வைத்து விட்டது. குழந்தையின் தந்தை பாறை மீது ஏறினார். ஆனால் வழுக்கி விழுந்து விட்டார். பின்னர் குழந்தையின் தாய் துணிச்சலுடன் பக்குவமாக பாறையின் மீது ஏறினார். குழந்தையைக் காப்பாற்றி விட்டார். குழந்தைக்கு ஒன்றும் ஆகவில்லை. அந்தக் கழுகு குழந்தைக்கு ஒரு தீங்கும் இழைக்காமல் பறந்து விட்டது.

xxx

சிறுத்தைகள் வேட்டையாடும் மான்கள்!

இன்னொரு குறிப்பு வேட்டையாடுவது பற்றியது. 1943இல் பதிவு செய்யப்பட்ட சுவையான குறிப்பு இது:-

ஹர்லாட் லாம்ப்ஸ் (Harlod Lamb) உருதுவிலிருந்து ஆங்கிலத்தில் மொழிபெயர்த்த ஒரு சம்பவம் இது. தைமூரைப் பற்றியது. அந்தக் காலத்தில், (ஏன் இந்தக் காலத்திலும் கூடத்தான்,) மான்களை வேட்டையாட மன்னர்கள் சிறுத்தைகளைப் பயன்படுத்துவார்களாம். எப்படி? சிறுத்தைகளின் கண்களைக் கட்டி விட்டு அவற்றை குதிரைகளின் மீது ஏற்றிக்கொண்டு செல்வார்கள். மான்கள் கூட்டமாக இருக்கும் இடத்திற்குச் சென்றவுடன் சிறுத்தைகளின் கண் கட்டை அவிழ்த்து குதிரையிலிருந்து அவற்றைக் கீழே இறக்கி விடுவார்கள். கண்களைத் திறந்தவுடன் எதிரிலிருக்கும் மான்களின் மீது பாய்ந்து அவற்றைச் சிறுத்தைகள் கொன்று விடுமாம். இது அவர்களுக்கு ஒரு பொழுது போக்கு!

இப்படி ஏராளமான செய்திகளைப் பார்க்கிறோம் பட்டாபி சீதாராமையா புத்தகத்தில்!

***

tags– மலைப்பாம்பு, பட்டாபி சீதாராமையா,சிறுத்தை

WRITTEN BY BRHANNAYAKI SATHYANARAYANAN

Post No. 9557

Date uploaded in London – – 2 May   2021          

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

லண்டனிலிருந்து ஞாயிறுதோறும் இந்திய நேரம் மாலை 6.30க்கு ஒளிபரப்பாகும் தமிழ்முழக்கம் நிகழ்ச்சியில் 2-5-2021 அன்று ஒளிபரப்பான உரை!

வாத்ஸல்ய ஸஹிதா தேனு: யதா வத்ஸ மனுவ்ரஜேத் |

ததானுகச்சேத் ஸா தேவி ஸ்வபக்தம் சரணாகதம் ||

தன்னைச் சரணாகதி அடைந்தவனை, கன்றை விட்டுப் பிரியாமல் தொடர்ந்து போகும் பசு போல வாத்ஸல்யத்துடன் அனுசரித்து தேவி ரக்ஷிக்கிறாள்

ஆலயம் அறிவோம்! வழங்குவது பிரஹன்நாயகி சத்யநாராயணன்.

ஆலயம் அறிவோம் தொடரில் இன்று நமது யாத்திரையில் இடம் பெறுவது 51 சக்தி பீடங்களில் யோனி பீடமாகத் திகழும் காமாக்யா ஆகும். அஸ்ஸாம் என்று இன்று அழைக்கப்படும் காமரூபத்தில் அமைந்துள்ள இது அஸ்ஸாம் தலைநகரான கௌஹாத்தியிலிருந்து 12 கிலோமீட்டர் தொலைவில் உள்ள நீலாச்சல் மலையில் அமைந்திருக்கிறது. கடல் மட்டத்திலிருந்து 700 அடி உயரத்தில், இந்த மலை மீது அமைந்துள்ள காமாக்யா தேவி ஆலயம் பழம் பெரும் சரித்திரத்தைக் கொண்டது. இதை காளிகா புராணமும் யோகினி தந்த்ரமும் விரிவாக விளக்குகிறது. வேத வியாஸரின் தேவி பாகவதமும் இந்தத் தலத்தைப் பற்றிக் கூறுகிறது. நான்கு ஆதி சக்தி பீடங்களில் இது ஒன்றாகும். பழைய காலத்தில் காமரூபம் என்று மிக பிரசித்தமாக இருந்த இது, பூமியின் மிகப் புனிதமான ஸ்தலம் என்று தந்திர சாஸ்திரங்கள் குறிப்பிடுகின்றன.

காமாக்யா தேவிக்கு திரிபுர பைரவி, அமிர்தா, காமா, காமதா, மங்கள கௌரி, காமரூபிணி, யோனிமண்டல வாஸினி, மஹாகாளி, மஹாமாயா, காமரூபா தேவி, காமேஸ்வரி, நீல பார்வதி என்று பல பெயர்கள் புராணங்களில் கூறப்பட்டுள்ளன. மேலும் இந்தத் தலத்தை காமரூபம், ஹரிக்ஷேத்திரம், பிரக்ஜோதிஷபுரம், காமகிரி, காமயோனி மண்டலம், மஹாமாயா ஸ்தானம், நீலாச்சலம், நீல் பர்வதம் என்று புராணங்கள் குறிப்பிடுகின்றன. இந்த கோவிலில் விக்ரஹம் ஏதும் இல்லை. மாறாக  யோனி வடிவத்தில் உள்ள ஒரு பாறை மட்டுமே இங்கு வணங்கப்படுகிறது. அங்கிருந்து ஒரு நீரூற்றிலிருந்து தொடர்ந்து நீர் சுரக்கிறது. அதைத் தீர்த்தமாக பக்தர்கள் போற்றுகின்றனர்.

ஒரு மலையின் மீது அமைந்துள்ள இந்தக் கோவிலுக்கு பூர்த்தியாகாத படிக்கட்டுகள் உள்ளன. இதைப் பற்றிய புராண வரலாறும் ஒன்று உண்டு. நரகாசுரன் என்னும் அசுரன் தேவியை மணக்க எண்ணினான். அதற்கு தேவி ஒரு நிபந்தனையை விதித்தாள். ஒரே இரவில் தன் கோவிலுக்கு நீலாச்சல் மலையில் படிகள் அமைக்க வேண்டும் என்பது தான் அந்த நிபந்தனை. அசுரன் படிக்கட்டுகளை அமைக்கும் போது தேவி காக்கையின் குரலை எழுப்பவே அசுரன் விடிந்து விட்டது என்று எண்ணி படிக்கட்டுகளைப் பூர்த்தியாக்காமல் விட்டுச் சென்றான். ஆகவே பூர்த்தியாகாத படிக்கட்டுகளே இன்றும் உள்ளன.

     பக்தர்களின் இஷ்டங்களை நிறைவேற்றுபவள் என்பதால் காமாக்கியா தேவி என்ற பெயரை அம்பாள் பெறுகிறாள்.

தச மஹா வித்யா என்று சொல்லப்படும் கமலாத்மிகா, தூமாவதி, தாரா, காளி, திரிபுரசுந்தரி, பைரவி, புவனேஸ்வரி, சின்னமஸ்தா, மாதங்கி, பகளாமுகி ஆகிய பத்து தேவியரில் திரிபுரசுந்தரி, மாதங்கி, கமலாத்மிகா ஆகிய மூவரின் விக்ரஹங்கள் பிரதான கோவிலில் இருக்க, மீதி ஏழு தேவியருக்கும் தனித் தனி கோவில்கள் அமைந்துள்ளன. தேவி உபாசகர்களுக்கு மிக முக்கிய ஸ்தலமாகத் திகழும் இந்த ஆலயம் தாந்திரீகர்களுக்கு பிரதானமான கேந்திரமாகத் திகழ்கிறது. ஆண்டுதோறும் இங்கு நடைபெறும் அம்புபச்சி மேளா என்ற திருவிழாவில் பல்லாயிரக்கணக்கில் தாந்திரீகர்களும் பக்தர்களும் கலந்து கொள்கின்றனர்.

காமாக்யா தேவியை பாண்டவர்கள் வழிபட்டதை மஹாபாரதம் கூறுகிறது. பீஷ்மபர்வத்தில் அர்ஜுனனும் யுதிஷ்டிரரும் காமாக்யா தேவியைப் பிரார்த்தித்ததைப் பற்றிய குறிப்பைக் காணலாம். 

பல்வேறு காலங்களில் படையெடுப்புகளால் கோவில் தகர்க்கப்பட்டாலும் கூட, அவ்வப்பொழுது ஆண்ட அனைத்து மன்னர்களும் ஆலயத்தைப் புதுப்பித்து வந்ததை வரலாறு விவரித்துக் கூறுகிறது.

காமாக்யா ஆலயத்தின் கீழே முன்னூறு அடி தூரத்தில் பைரவிக்கு ஒரு ஆலயம் உள்ளது. 1971இல் ஸ்ரீ ராமகாந்த தேவ் சர்மா என்பவர் பைரவருக்கு ஒரு கோவிலை எழுப்பினார். அதற்கு அருகே அவர் கூர்மப்ரிஷ்த சக்ரத்தை பிரதிஷ்டை செய்தார். இது ஒரு அபூர்வமான வகை ஸ்ரீ சக்ரமாகும். தேவிக்கே உரித்தான ஸ்ரீ   சக்ரம் அனைத்து நலன்களையும் அளிக்க வல்லது என்பது குறிப்பிடத்தகுந்த ஒன்றாகும்.

காலம் காலமாக ஆயிரக்கணக்கான பக்தர்கள் வழிபட்டு வரும் ஸ்ரீ காமாக்யா தேவி அனைவருக்கும் சர்வ மங்களத்தைத் தர ஞானமயம் சார்பில் பிரார்த்திக்கிறோம்.

கங்கா பவானி காயத்ரீ ஸ காளீ  லக்ஷ்மீ ஸரஸ்வதி                     ராஜராஜேஸ்வரி பாலா ச்யாமளா லலிதா தச: ||                              தஸ்மாத் ஸங்கீர்த்தயேன் நித்யம் கலி தோஷ நிவ்ருத்தயே

நன்றி, வணக்கம்!    

tags- காமாக்யா தேவி,  ஆலயம்

WRITTEN BY LONDON SWAMINATHAN

Post No. 9554

Date uploaded in London – –1 May   2021           

Contact – swami_48@yahoo.com

Pictures are taken from various sources for spreading knowledge.

this is a non- commercial blog. Thanks for your great pictures.

tamilandvedas.com, swamiindology.blogspot.com

if u want the article in word format, please write to us.

உலகத் தமிழர் பேரமைப்பு வெளியிட்ட நாலாம் ஆண்டு நிறைவு மாநாட்டு மலரரில் என் கட்டுரை 2006ம் ஆண்டில் வெளியிடப்பட்டது. இதன் போட்டோ காப்பியை நான் இந்த பிளாக்கில் வெளியிட்டேன். இப்பொழுது அதை சாதாரண வோர்ட் WORD வடிவில் வெளியிடுகிறேன்.எழுதியவர் பெயரையும், பிளாக்கின் பெயரையும் நீக்காமல்  பலரும் வெளியிட்டால் தமிழ் வளரும்; தமிழர்கள் செழிப்படைவர்.

சுனாமி (TSUNAMI) என்னும் கடல்கோள் இலட்சக்கணக்கான உயிர்களைப் பலிகொண்ட பின்னர் மக்கள் இதைப் பற்றி அறிய பெரிய ஆர்வம் கொண்டுள்ளனர். தமிழ் இலக்கியத்தில் கடந்தகால கடல்கோள் (சுனாமி) தாக்குதல்கள் குறித்து நிறைய குறிப்புகள் உள்ளன.

      கடலுக்குத் தமிழில் “முந்நீர்” என்று ஒரு பெயர் உண்டு. சங்க இலக்கியத்தில் சுமார் நாற்பது இடங்களில் “முந்நீர்” என்ற சொல் வருகிறது. (புறநானூற்றுப் பாடல்களில் 9, 13, 20, 30, 35, 60, 66,137, 154 முதலியன) “நிலத்தைப் படைத்தலும் காத்தலும் அழித்தலுமாகிய மூன்று தொழில்கள் உடைமையின் முந்நீர்” என்று நச்சினார்க்கினியர் உரை கூறுகிறது. ஆகவே கடலின் அழிவு சக்தி குறித்தும் “சுனாமி” எனப்படும் இராக்கதப் பேரலைகள் குறித்தும், தமிழர்களுக்கு முன்பே தெரியும். நிலத்தைப் படைப்பதும் அழிப்பதும் கடல்தான்.

      தமிழை வளர்க்க அமைக்கப்பட்ட முதலிரண்டு தமிழ்ச் சங்கங்களையும் கடல் விழுங்கியதால் தற்போதுள்ள மதுரையில் மூன்றாவது தமிழ்ச்சங்கம் நிறுவப்பட்டது. இந்த சுனாமியை கடல்கோள் என்று பழைய உரைக்காரர்கள் குறிப்பர். தென் மதுரையையும் கபாடபுரத்தையும் கடல் விழுங்கியதால் மூன்றாவது தமிழ்ச்சங்கம் நிறுவப்பட்டது. இறையனார் களவியலுரையும் அடியார்க்கு நல்லாரின் உரையும் இதைப்பற்றி விளக்கமாகப் பேசுகின்றன. 

சங்கத் தமிழ் நூலான கலித்தொகையும் சங்கக் காலத்துக்குப்பின் எழுந்த சிலப்பதிகாரமும் பாண்டிய நாட்டின் தென் பகுதியை கடல் விழுங்கியதைப் பின்வருமாறு கூறுகின்றன:

“மலிதிரை யூர்ந்துதன் மண்கடல் வௌவலின்
மெலிவின்றி மேற்சென்று மேவார்நா டிடம்படப்
புலியொடு வில் நீக்கிப், புகழ் பொறித்த கிளர்கெண்டை,
வலியினால் வணக்கிய, வாடாச்சீர்த் தென்னவன்”  – கலித்தொகை 104

(முற்காலத்தில் கடல் பொங்கிப் பாண்டியனின் நாட்டை விழுங்கியது. ஆனாலும் பாண்டியன் தளர்ந்து விடவில்லை. அருகில் உள்ள சேர சோழ நாடுகளை வென்று புலிக்கொடி வில்கொடியை நீக்கி அவைகளைப் பாண்டிய நாட்டுடன் சேர்த்துக் கொண்டான்)

பஃறுளி யாற்றுடன் பன் மலை அடுக்கத்துக்
குமரிக் கோடும் கொடுங்கடல் கொள்ள
வடதிசைக் கங்கையும் இமயமும் கொண்டு,
தென்திசை ஆண்ட தென்னவன் வாழி

– சிலப்பதிகாரம், காடுகாண் காதை:19-22

(கடல் சினந்து எழுந்து பஃறுளி என்னும் ஆற்றையும் பல மலைகளையும் குமரிக்  கோட்டையும் மூழ்கடித்தது. அதற்குப் பின்னர் பாண்டிய மன்னன் வட்திசைக்குச் சென்று கங்கை ஆற்றையும் இமயமலையையும் வெற்றி  கொண்டான்)

      சிலப்பதிகாரத்தில் மற்றொரு பாடலுக்கு உரை எழுதிய அடி யார்க்கு நல்லார் 700 காதம் பரப்புடைய 49 நாடுகளைக் கடல் விழுங்கியதாகக் கூருகிறார். அந்த 49  நாடுகளின் (வட்டாரங்களின்) பெயர்களையும் நமக்கு அளிக்கிறார். தலைச்சங்க காலத்தில் தோன்றிய தமிழ் நூல்கள் எதுவும் நமக்குக் கிடைக்கவில்லை. இடைச்சங்கக் காலத்தில் எழுந்த தொல்காப்பியமும், வேறு சில பாடல்களும்  மட்டும்  நமக்குக் கிடைத்தன.

      கொற்கையிலிருந்த தலைநகர் மதுரைக்கு மாற்றப்பட்டதைப் பிளினியும் (Pliny) குறிப்பிடுவதால் இந்த கடல்கோள்கள் கி. மு. முதலிரண்டு நூற்றாண்டுகளில் ஏற்பட்டிருக்கலாம்.

      பல சங்கப் பாடல்கள் சுனாமிக்குக் காரணமான நில அதிர்ச்சி குறித்தும் (Earth quake) கடல் எல்லை மீறுவது பற்றியும் பொதுவாக பாடுகின்றன.

“நிலம்புடை பெயரினும் நீர் திரிந்து பிறழினும்
இலங்குதிரைப் பெருங்கடற்கு எல்லை தோன்றினும்”  

– குறுந்தொகை 373

“நிலம், நீர், தீ ஆகியன அவைகளின் இயல்பான நிலையிலிருந்து மாறினாலும் கடல் எல்லை மாறுபட்டாலும்” என்று கூறுவதிலிருந்து இத்தைய இயற்கை மாற்றங்களை மக்கள் அறிந்தது தெரிகிறது.

      “பெருநிலங்கிளறினும்” (நற்றிணை 201) “நிலம்புடை பெயர்வதாயினும்” (நற்றிணை 9) “நிலத்திறம் பெயருங்காலை யாயினும்” (பதிற்றுப்பத்து 63-6) “நிலம்புடை பெயர்வதாயினும்” (புறநானூறு 34-5) ஆகிய அடிகள் நில அதிர்வு பற்றியும் நிலம் அழிந்துபட்டு எல்லை மாறுவது பற்றியும் பேசுகின்றன.

வடவைத்தீயும் மடங்கலும்

      கடலுக்கடியில் “வடவை” என்னும் தீ எரிந்து கொண்டிருப்பதாகவும் அது ஊழிக்காலத்தில் கடல் நீருடன் எழுந்து வந்து உலகை அழிக்கும் என்றும் சங்கநூல்களுக்கு உரை எழுதியோர் கூறுகின்றனர். வடவைத்தீயை “வடமுகாக்கினி” என்றும் அது குதிரை வடிவமுள்ள பெருந்தீ என்றும் வடமொழி நூல்கள் குறிப்பிடுகின்றன. “வடவை” என்பது கடலுக்கடியில் உள்ள எரிமலைகளா (Submarine Volcanos)  என்று தெரியவில்லை. இந்தியாவில் ஆந்திரப் பிரதேசத்தில் ராட்சதப் பேரலைகள் வந்து ஆயிரக் கணக்கானோரை உயிர்ப்பலி கொண்டபோது மர்மத்தீ ஒன்று கடலில் தோன்றியது. இது புயலின் போது பேரலைகளின் உராய்வினால் ஏற்பட்ட மின்சார சக்தி என்று அப்போது விஞ்ஞானிகள் கருத்துத் தெரிவித்தனர். இதுதான் வடவை தீயா என்றும் தெரியவில்லை. ஆனால் வடவைத் தீ தோன்றும் போது கடல் பொங்கி எழுந்து நாட்டை அழிக்கும் என்று புலவர்கள் நம்பியது உறுதியாகத் தெரிகிறது.

BIG BANG AND BIG CRUNCH

      சங்க இலக்கியத்தில் வரும் மற்றொரு சொல் “மடங்கல்”. இதற்கு உரை எழுதிய ஆசிரியர்கள் ஊழிக்காலத்தில் உலகம் மடங்கிப் போவதை (அழிவதை) இப்படிக் கூறிவதாக எழுதியுள்ளனர். இப்படிப் பிரபஞ்சம் உருவானதற்கு மாபெரும் வெடிப்பு (Big Bang) காரணம் என்று கூறும் வானநூல் அறிஞர்கள் இது ஒரு சுருங்கி (மடங்கி) அழியும் (Big Crunch) என்றும் கூறுகின்றனர். இந்த விளக்கம் சங்கக் காலத்திலேயே இருப்பது வியப்புக்குறியது. (மடங்கல்: பரிபாடல் 1-47, 3-8, கலித்தொகை 2-3, 105-20, 120-8, 122-1, பதிற்றுப்பத்து 62-8 முதலியன)

பாண்டியனும் பரசுராமனும்

      தமிழ்ச் சங்கத்தை அழித்த கடற்கோளுக்குப் பாண்டியனின் செயல்தான் காரணம் என்று பாடல் கூறுகிறது. (சிலப்பதிகாரம் XI 11-17) வடிம்பலம்ப நின்ற பாண்டியன் தனது பாதச்சுவடுகள் போல செய்து அதை கடல் கழுவும்படி கடற்கரையில் வைத்ததாகவும் கடல் பொங்கியபோது வேலை எரிந்து அதை அடக்கியதாலும் கடலுக்குக் கோபம் ஏற்பட்டதாகச் சிலப்பதிகாராமும் திருவிளையாடல் புராணமும் கூறும். இவை பழங்காலச் சடங்குகளையும் நம்பிக்கையையும் காட்டுகின்றன. ஆனால் கடல் பொங்கி நாட்டை அழித்தது உண்மை. இக்கதைகளை புராணக் கதைகள் என்று சொல்லி ஒதுக்கி விடாமல் அதன் பின்னுள்ள உண்மைகளை உய்த்தறிவது நம் கடமை. தென்கிழக்கு ஆசியாவில் கூட கடற்கரையில் மன்னர்கள் பாதங்களைச் (அடிச்சுவடு) செய்து வழிபடும் வழக்கம் இருந்தது. காளிதாசன் என்ற மாபெரும் வடமொழிக் கவிஞனும் சிவனின் பாதச்சுவடுகளைக் குறிப்பிடுவான். இன்றும் இலங்கையில் சிவனின் – புத்தரின் பாதச்சுவடுகள் உள்ளன.

      பரசுராமன் (விட்டுணுவின் பத்து அவதாரங்களில் ஒன்று) கேரளத்துக்கு வந்தபோது கடலும் மலையும் ஒட்டியிருந்ததாம். பரசுராமனின் வேண்டுகோளுக்கிணங்கி கடல் பின்னோக்கிச் சென்று கேரள மாநிலத்தை அவருக்கு வழங்கியதாகவும் புராணங்களும் கேரள மகாத்மியங்களும் கூறுகின்றன. இதிலுள்ள அறிவியல் உண்மை என்னவென்றால் கடல் சுவற வேல்விட்ட பாண்டியன் ஆட்சி செய்த காலாத்தில் தமிழ்நாட்டிலும் பரசுராமன் வந்தபோது கேரளத்திலும் கடல் பின்வாங்கிச் சென்றது என்பதுதான். கடல் எல்லை மாறி நிலம் வெளிப்பட்ட புவியியல் மாற்றம்தான் இப்படி புராணக்கதைகளாக மாறிவிட்டன .

      (அகத்திய முனிவர் விந்திய மலையை பங்கம் செய்தார், கடலைக் குடித்தார் என்பதெல்லாம் அவர் நிலம் வழியாக தென்னிந்தியாவுக்கு வந்து தென்கிழக்கு ஆசியாவரை சென்று நாகரிகத்தை நிலைநாட்டினார் என்பதையே கூறுகிறது)

      இராவணன் மலையை தூக்கியதாகவும் சிவபெருமான் கோபம் கொண்டு அவன் கைகளையும் தலையையும் நசுக்கிப் பின்னர் அவன் மன்னிப்புக் கேட்டு ஓடியதாகவும் ஒரு கதை (தேவாரப் பாடல்களிலும்  புராணத்திலும்) உள்ளது. ராமனின் தண்டனை பொறுக்காமல் சீதையை பூமாதேவி நிலத்தைப் பிளந்து அழைத்துச் சென்றதாகவும் இராமாயணம் கூறுகிறது. இவை எல்லாம் அந்தந்த காலத்தில் நடந்த பூகம்பங்கள்தான். (Earth quakes) காலப்போக்கில் ஏதாவது இரண்டு நிகழ்ச்சிகளை தொடர்புபடுத்தி மக்கள் கதை கட்டிவிடுகின்றனர். தற்காலத்தில் கூட ஒருவர் தேர்தலில் படுதோல்வி அடைந்தால், ‘மண்ணைக் கவ்வினார்’, ‘மூக்குடைப்பட்டார்’, ‘முகத்தில் கரிபூசிக் கொண்டார்’, ‘பலத்த அடி வாங்கினார்’ என்றெல்லாம் பத்திரிக்கைகள் எழுதும். ஆனால் இவைகளின் உண்மைப் பொருள் என்ன என்று எல்லாருக்கும் விளங்கும்.

      கடலுள் மாய்ந்த இளம்பெருவழுதி என்ற பாண்டிய மன்னனின் பாடல் புறநானூற்றில் உள்ளது. இந்த பாண்டிய மன்னன் சுனாமியில் இறந்தானா அல்லது கடற்படையெடுப்பில் இறந்தானா என்பது ஆராய்ச்சிக்குரிய செய்தி.

      ஊழிக்காலத்தில் கடல் பொங்கி எழுவதைத் தாயங்கண்ணனார் (புறம் 397) இப்படிப் பாடுகிறார்.  

பசும்பொன் னுலகமும் மண்ணும் பாழ்பட

விசும்பில் ஊழி ஊழ்ஊழ் செல்ல – பரிபாடல் 2-1/4

ஊழியின் இறுதியில் உலகம் முழுதும் இருள் பரவிக் கடல் பொங்கி எழுந்து நிலப்பகுதிகளை எல்லாம் மூழ்கடிக்கும். என்றும் பின்னர் பன்னிரு சூரியர்களும் வடவைத் தீயும் தோன்றி நீரை வற்றச் செய்யும் என்றும் அரிசில் கிழார் எழுதிய பாடலுக்கான (பதிற்றுப் பத்து 72-8/16) உரை கூறுகிறது. மற்றொரு பாடல் (62-5) மடங்கல் பற்றி விரிவாகக் கூறுகிறது. இறைவனிட்ட சாபத்தால் கடற்கோள் தோன்றும் என்று சிலப்பதிகாரம் கூறுகிறது.

வானவன் விழாக்கோண் மாநகரொழிந்தது

மணிமேகலா தெய்வ மற்றது பொறாஅள்

அணிநகர்தன்னை யலைகடல் கொள்கென

விட்டனள் சாபம் பட்டதிதுவால்

இந்திர விழாவை மன்னன் கொண்டாடா விட்டால் மன்னனது நாட்டை கடல் அழிக்கும் என்பது இதன் பொருள்.

      வராகவதாரத்தில் விட்டுணு பன்றி (Wild Boar)  வடிவம் கொண்டு பூமியை கடலிலிருந்து மீட்டதாக கூறுவதும் புவியியல் மாற்றத்தையே (Geological Change after the Ice Age) . கடல் நீரால் மூடியிருந்த உலகில் நீர் வடிந்து நிலப்பகுதி வெளியானது என்ற உண்மையைத்தான் புராணக்கதை வழியாகத் தருகிறார்கள். இது போன்ற பல உண்மைகள் சங்க இலக்கியத்தில் மறை பொருளாகக் கூறப்பட்டுள்ளன. அவைகளை பகுத்தறிவது நம் கடமை.

Xxxxx subham xxxxx

tags- சுனாமி, சங்க இலக்கியம், கடல்கோள், பஃறுளி , குமரிக்கோடு,

வடவைத் தீ , மடங்கல், முந்நீர்

WRITTEN BY S NAGARAJAN

Post No. 9553

Date uploaded in London – –  –1 May   2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

நரகத்திற்குச் செல்பவன் யார்? ஸ்வர்க்கமும் போற்றுபவன் யார்?

ச.நாகராஜன்

நல்ல நல்ல சுபாஷித ஸ்லோங்கள் இதோ:-

ஸா பார்யா யா ப்ரியம் ப்ரூதே ச புத்ரோ யத்ர நிர்வ்ருதி: |

தன்மித்ரம் யத்ர விஷ்வாஸ: ஸ தேஷோ யத்ர ஜீவ்யதே ||

இனிமையாகப் பேசும் மனைவியே உண்மையான மனைவி, சுலபமாக அணுகக் கூடிய மகனே நல்ல மகன், நம்பிக்கைக்குரிய நண்பனே நல்ல நண்பன். இப்படி இருக்கக்கூடிய தேசத்தில் தான் நாம் வசிக்க வேண்டும்.

She is the real wife who speaks sweetly, he is the true son with whom father feels at ease, he is a real friend who can be trusted and that is the true abode where we can make our living.

    Translation by Kalyana- Kalpataru, September 2018

*

மித்ர த்ரோஹி க்ருதக்னஸ்ச யஸ்ச விஷ்வாஸதாதக: |

த்ரயஸ்தே நரகம் யாந்தி யாவஸ்சந்த்ராதிவாகரௌ ||

மித்ர துரோகி, நன்றியில்லாத ஒருவன், நம்பிக்கை மோசம் செய்தவன் – இந்த மூவரும் சூரிய சந்திரர் உள்ள வரை நரகத்திலேயே இருப்பர்.

A person who has turned a traitor to his friend, one who is ungrateful and who has betrayed his trust – these three go to hell and remain there as long as the moon and the sun shine. He whose heart is fearless and yet

Translation by Kalyana- Kalpataru, December 2018

*

உதயே ஸவிதா ஸ்வதோ ரக்தஷ்சாஸ்தமனே ததா |

சம்பத்தௌ ச விபத்தௌ ச மஹதாமேகரூபதா ||

உதய காலத்திலும் சூரியன் சிவப்பாகக் காட்சியளிக்கிறான். அஸ்தமன காலத்திலும் சிவப்பாகக் காட்சியளிக்கிறான். மஹத்தான பெரியோர் அதே போல செல்வம் இருந்த போதும், அது இல்லாத போதும் (சம்பத் இருந்த போதும் விபத்து காலத்திலும்) கூட ஒரே மாதிரியாக இருக்கின்றனர்.

The sun is red at its rising and red also at the time of its setting. The great people remain what they are in their prosperity as well as in adversity.

Translation by Kalyana- Kalpataru, August 2019

அபயம் ஹ்ருதயம் யஸ்ய சதயம் சாபி ஸர்வதா |

ஜயஸ்தஸ்ய யஷஸ்தஸ்ய ச ஸ்வர்கோபி ப்ரஷஸ்யதே ||

எவன் ஒரு அஞ்சாநெஞ்சனாக இருந்து, தயை உடையவனாக இருக்கிறானோ

அவன் எங்கும் வெற்றியையே அடைவான், புகழைப் பெறுவான், அவனை ஸ்வர்க்கமும் போற்றும்.

He whose heart is fearless and yet full of compassion, becomes victorious and famous and even in heaven he is eulogized.

Translation by Kalyana- Kalpataru, September 2019

*

குணோ பூஷயதே ரூபம் சீலம் பூஷயதே குலம் |

சித்திர்பூஷயதே வித்யாம் போகோ பூஷயதே தனம் ||

ஒருவனின் உருவத்தை அலங்கரிப்பது அவனது குணம், ஒருவனது ஒழுக்கமே அவனது குலத்தை அலங்கரிக்கிறது, ஒருவனது பண்பே அவனது கல்வியை அலங்கரிக்கிறது, ஒருவனது போகமே அவனது செல்வத்தை அலங்கரிக்கிறது.

Meritorious excellence adorns a person, noble disposition adorns a family, successful accomplishment adorns learning and happy use of money adorns

Wealth.

Translation by Kalyana- Kalpataru, November 2019

****

tags – நரக  ,    ஸ்வர்க்கம்