WRITTEN BY S NAGARAJAN

Date: 4  SEPTEMBER 2018

Time uploaded in London – 6-17 AM (British Summer Time)

Post No. 5391

Pictures shown here are taken from various sources including google, Wikipedia, Facebook friends and newspapers. This is a non- commercial blog.

திருநெல்வேலியிலிருந்து ஆர்.சி.ராஜா அவர்களை ஆசிரியராகக் கொண்டு மாதம் தோறும் வெளிவரும் ஆரோக்கிய மேம்பாட்டு மாத இதழ் ஹெல்த்கேர். இதில் ஜூலை 2018 இதழில் வெளியாகியுள்ள கட்டுரை. தொடர்பு மின்னஞ்சல் editor@tamilhealthcare.com

மூளை நன்கு செயல்பட எவ்வளவு நேரம் உடல்பயிற்சி செய்ய வேண்டும் ?

மூலம் : கிறிஸ்டோபர் வாஞ்செக்

தமிழாக்கம் : ச.நாகராஜன்

அனைவருக்குமே உள்ள கவலை வயதாக ஆக, மூளையின் செயல்பாடு குறைந்து கொண்டே வருகிறதே, ஞாபகமறதி அதிகமாகிறதே, உடலின் அவயவங்கள் ஒத்துழைக்க மாட்டேன் என்கிறதே என்பன போன்றவை தாம்!

நன்கு உடல்பயிற்சி செய்யுங்கள் என்பது பொதுவான அறிவுரை.

யோகா, தாய்-சி போன்றவற்றையும் பலரும் பரிந்துரை செய்கின்றனர்.

எதைச் செய்வது, எவ்வளவு நேரம் செய்வது என்பதில் ஒரே குழப்பம்.

தினசரி செய்யுங்கள் என்கின்றனர் சிலர். வாரத்திற்கு இவ்வளவு மணி நேரம் என்கின்றனர் சிலர்.

இப்படிச் செய்ய முடியாதவர்கள் கவலைப்படுகின்றனர்.

கவலை போக்கும் விதமாக இப்போது நல்ல செய்தி வந்துள்ளது.

ஆறு மாத காலத்தில் 52 மணி நேரம் உடல் பயிற்சி செய்தால் போதும் என்கிறது நவீன மருத்துவ ஆய்வு ஒன்று! இது மூளையை நன்கு செயல்படுத்த உதவும் என்கிறது ஆய்வு முடிவு!

பொதுவாக உடல்பயிற்சியானது, சிந்தனையாற்றலை நன்கு தூண்டி விடும்; உடலையும் மனதையும் பண்படுத்த உதவும்; மூளை செயல்பாட்டை அதிகரிக்கும்; அல்லது மூளை செயலிழப்பைத் தடுக்கும் என்பன போன்றவற்றை ஆய்வு முடிவுகள் அறிவித்துள்ளன!

நியூராலஜி கிளினிகல் ப்ராக்டீஸ் என்ற பத்திரிகையில் 30-5-2018 இதழில் வெளியாகியுள்ள கட்டுரை அகில உலக ஆய்வு ஒன்றை விரிவாக வெளியிட்டிருக்கிறது.

நடைப்பயிற்சி, ஓட்டம், வெயிட் தூக்குதல், யோகா, தாய்-சி எல்லாமே நலம் பயப்பவையே! இதில் எதைச் செய்தாலும் ஆறு மாதத்தில் 52 மணி நேரம் செய்தால் போதும்!

“இந்த 52 மணி நேரத்தையும் கூட உங்களுக்கு உகந்த முறையில் பிரித்துக் கொள்ளலாம். இப்போது ஒரு மணி நேரம்; பின்னால் இன்னொரு மணி நேரம் என்று” என்கிறார் ஆய்வைச் செய்த மியாமி மில்லர் ஸ்கூல் ஆஃப் மெடிசின் பல்கலைக் கழகத்தைச் சேர்ந்த ஜாய்ஸ் கோமஸ் -ஆஸ்மான் (Joyce Gomes-Osman) என்னும் நியூரோஸயிண்டிஸ்ட் பெண்மணி.

இது அனைவருக்கும் பெரிய ஆறுதல் அளிக்கும் செய்தியாகும். தினசரி ஒரு மணி நேரம் என்பது போன்ற கடுமையான விதி முறைகள் தேவை இல்லை.

குறைந்த தீவிரம் உடையவை யோகாவும் தாய்-சியும்.

அதிக தீவிரப் பயிற்சி என்பது வலுவை அதிகரிக்கும் கடினமான பயிற்சிகளும் ஏரோபிக் பயிற்சிகளும். இவை இரண்டுமே பலனளிக்கின்றன என்கிறார் கோமஸ்.

உடல் பயிற்சி சம்பந்தமாக முன்னர் செய்யப்பட்ட 100 ஆய்வுகளை இந்தப் புதிய ஆய்வு ஆராய்ந்தது. இதில் பங்கு கொண்டவர்கள் மூளை செயல்பாடு பற்றிய ஆய்வுக்கு உட்பட்டவர்கள். மொத்தம் 11000 பேர்கள் இவற்றில் பங்கு கொண்டனர். அவர்களின் சராசரி வயது 73!

ஆய்வு தந்த முடிவின் பொதுவான அம்சம் எந்த முறையில் உடல் பயிற்சி செய்யப்பட்டாலும் ஆறு மாதங்களில் 52 மணி நேரம் செய்தால் அவை மூளை சிந்தனையாற்றலைக் கூர்மைப் படுத்துகின்றன என்பதே!

இந்த 52 மணி நேரத்திற்குக் குறைவாகச் செய்யப்பட்ட பயிற்சிகள் நல்ல முடிவுகளைத் தரவில்லை என்பதே ஆய்வு தரும் செய்தி!

உடல் பயிற்சி சிகிச்சை முறையைத் தருகின்ற நியூரோ ஸயிண்டிஸ்ட் என்ற முறையில் கோமஸ், “என்னுடைய நோயாளிகளுக்கு ஒரு சரியான டோஸை தர ஆசைப்பட்டேன், இப்போது தான் அது சாத்தியமாகி இருக்கிறது” என்கிறார்.

“இன்னும் அதிக செயல்பாட்டுடன் இருங்கள் என்று பொதுவாக நாங்கள் கூறி விடுகிறோம் எங்களிடம் சிகிச்சை பெற வருபவர்களிடம். ஆனால் அதன் அர்த்தம் என்ன? அவருக்கு தினமும் 30 நிமிடப் பயிற்சி தேவையா? அல்லது ஒரு மணி நேரம் தேவையா? எந்த விதமான உடல் பயிற்சி வேண்டும் என்பதைச் சொல்ல முடியாமல் இருந்தது. ஆனால் இப்போது தெளிவாக 52 மணி நேர லட்சியத்தை முன் வைக்க முடிகிறது” என்கிறார் அவர் முத்தாய்ப்பாக!

இதய நோயாளிகளுக்கு அவர்களின் உடல்நலத்தை மேம்படுத்த இதுவே வழி!

டாக்டர் டக்ளஸ் ஷார் என்பவர் ஓஹையோ ஸ்டேட் பல்கலைக் கழகத்தில் வெக்ஸ்னர் மெடிகல் மையத்தில் உள்ள மூளை செயல்பாடு மற்றும் நினைவுத் திறன் குறைப்பாடு பற்றிய மையத்திற்கு டைரக்டர். அவரும் இந்த ஆய்வு முடிவை ஏற்றுள்ளார். “மூளை செயல்திறனுடன் இயங்க உடல் பயிற்சி இன்றியமையாதது என்பதே முக்கிய செய்தி. நீண்ட கால அடிப்படையில் அதைச் செய்யவேண்டும். அவ்வளவு தான்” என்கிறார் அவர்.

ஷார் மேலும் கூறுகையில், “ உடல் பயிற்சியின் போது மூளையானது நன்கு செயலூக்கம் செய்யப்படுகிறது. நமது தசைகளை எப்படிக் கட்டுப்பாட்டிற்குள் வைக்க வேண்டும் என்பதை நாம் கற்க வேண்டும். ஆகவே பயிற்சிகளின் போது அதிக கவனம் தேவை. ‘use it or lose it’ – பயிற்சியைச் செய்யுங்கள்; அல்லது பலனை இழந்து விடுங்கள் என்பதே தாரக மந்திரம் என்கிறார்.

அத்தோடு தொலைக்காட்சியை பார்த்துக் கொண்டே இருந்து யாருடனும் பழகாமல் இருப்பது பயனளிக்காது என்றும் அவர் கூறுகிறார்,

பிரேஸில், ஸ்பெயின் ஆகிய நாடுகளில் உள்ள ஆய்வாளர்கள், உடல் பயிற்சியானது மூளையின் செயல்பாட்டு வேகம், திட்டமிடுதல், கவனம் கொள்ளுதல் ஆகியவற்றை மேம்படுத்துகிறது என்கின்றனர். பொதுவாக வயதாக ஆக, இவைதான் அனைவருக்கும் பொதுவாக ஏற்படும் பிரச்சினை என்பதால் இந்த ஆய்வின் முடிவு ஒரு வரபிரசாதமே.

இனி ஆறு மாதத்தில் 52 மணி நேர பயிற்சி என்பதை மேற்கொள்வோம். செயல்பாட்டுடன் கூடிய முளையால் உடல் இயக்கம் கொண்டு நலம் பெறுவோம்.

***

மூலம் : கிறிஸ்டோபர் வாஞ்செக்

தமிழாக்கம் : ச.நாகராஜன்

நன்றி : லைவ் ஸயின்ஸ்

WRITTEN BY LONDON SWAMINATHAN

swami_48@yahoo.com

Date: 3 September 2018

Time uploaded in London – 8-43 am (British Summer Time)

Post No. 5390

கொலைகார மூலகம் (THALLIUM) பற்றிய சுவையான தகவல்கள்! (Post No.5390)

உலகில் கண்டறியப்பட்டுள்ள நூற்றுக்கும் மேலான மூலகங்களில் ஒன்று தால்லியம் (THALLIUM) . இது கொலை வழக்குகளில் அடிபட்டதாலும், துப்பறியும் நாவல் புகழ் ‘அகதா கிறிஸ்டி’ நாவல்களில் அடிக்கடி தலைக் காட்டியதாலும் புகழ் பெற்றுவிட்டது.

இது ஒரு உலோகம். வெள்ளியை விட  அதிகம் கிடைக்கும்  உலோகம். இதன் பிறப்பே சர்ச்சைக்குரியது. அட! கர்ணன் போன்றோரின் பிறப்பில்தான் சர்ச்சை என்று நினைத்தால் ஒரு மூலகத்தின் பிறப்பிலுமா சர்ச்சை?

ஒரு பிரிட்டிஷ் விஞ்ஞானி சோதனைச் சாலையில் சல்ப்யூரிக் அ மிலக் குடுவையில் பச்சைக் கோட்டைக் கண்டார். ஆஹா, இது ஒரு புதிய பொருள் இதற்குத் தல்லியம் என்ற திருநாமாத்தைச் சூட்டுவோம் என்று கருதி நாமகரண சடங்கையும் நடத்தி விட்டார். அவர் பெயர் வில்லியம் க்ரூக்ஸ் WILLIAM CROOKES (1832-1919). இது 1861-இல் நடந்தது.

ஆனால் ப்ரான்ஸ் நாட்டில், 1862-இல் கிளாட் அகஸ்ட் லாமி CALUDE AUGUST LAMY (1820-1878) இதற்கும் ஒரு படி மேலே சென்று தால்லியத்தை வடிகட்டி, உலோகக் கட்டியாக செய்து, லண்டனில் உள்ள ஒரு கண்காட்சிக்கும் அனுப்பி விட்டார். அந்தக் கமிட்டி அவரைப் பாராட்டி ஒரு பதக்கமும் கொடுத்து விட்டது. பிரஞ்சு அகாடமி இவர்தான் இந்த மூலகத்தின் கண்டு பிடிப்பாளர் என்று அறிவித்துவிட்டது

ஒரிஜினல் விஞ்ஞானிக்கு வந்ததே கோபம்! அவருடைய விஞ்ஞான சஞ்சிகை மூலம் விட்டு விளாசினார். ஒவ்வொரு இதழிலும் பிய்த்துக் குதறினார். போகப் போக அது பிரான்ஸ்- பிரிட்டன் ‘ரசாயன’ யுத்தமாகப் பரிணமித்தது. “வாபஸ் வாங்கு, வாபஸ் வாங்கு , கொடுத்த மெடலை  வாபஸ் வாங்கு” என்ற கோஷம் பெரிதானது

நமக்கு வேண்டாமப்பா, இந்த வம்பு என்று சர்வதேச கண்காட்சிக் கமிட்டி அவருக்கும் ஒரு பதக்கத்தைக் கொடுத்தது.

இனித்தான் சுவையான கதைகள்!

விஷம் வைத்து ஆட்களைத் தீர்த்துக் கட்டுவோர், அந்த சடலத்தை எரித்துவிட்டால், கொலைத் தடயம் மறைந்து விடும் என்று தப்புக் கணக்குப் போடுகிறார்கள். பிரிட்டனில் கிரஹாம் யங் என்பவர், ஒரு கொலை வழக்கில் வகையாகச் சிக்கிக் கொண்டார். அவரால் கொலை செய்யப்பட்ட (BOB EGLE) பாப் ஈகிள் என்பவரின் சடலத்தை எரித்த சாம்பல் கிடைத்தது . அதை ஆராய்ந்ததில் தால்லியம் அதிகம் இருந்தது கண்டறியப்பட்டது. இது குற்றம் தொடர்பான (FORENSIC SCIENCE) தடய அறிவியலில் ஒரு புதிய மைல் கல்லாக விளங்குகிறது. ஒரு சோதனையின் பெயர் அடாமிக் அப்ஸார்ப்ஷன் ஸ்பெக்ட் றோமெட்ரி . இந்த சோதனை நடத்தப்பட்ட போது, எந்த ஒரு சடலத்தை எரித்தாலும் காணப்படும் அளவுக்கும் மேலாக அந்த சாம்பலில் தால்லியம் இருந்தது தெரிந்தது. அவர் விஷம் வைத்துக் கொன்றது உறுதியானது.

அகதா கிறிஸ்டியின்  ‘ஆகாத’ நாவல்

அகதா கிறிஸ்டியை (AGATHA CHRISTE) அறியாத ஆங்கிலப் புதினப் பிரியர்கள் கிடையாது. அவர் 1961ஆம் ஆண்டில் தி பேல் ஹார்ஸ்(THE PALE HORSE) என்ற ஒரு துப்பறியும் நவீனத்தை வெளியிட்டார். அதில் தால்லியம் விஷக் கொலை வருகிறது. ஆனால் அப்படிப்பட்ட தடயத்தை எ[ப்படி திசை திருப்பிவிட முடியும் என்றும் எழுதி இருந்தார். அந்தக் கதையில் மந்திர தந்திர சாபங்கள்தான் (MAGIC CURSES) ஆளைக் கொன்றது என்ற பாணியில் கதைப்போக்கு இருந்தது.

1980 முதல் 1990 ஆண்டுகளில் இராக் நாடு, தனது அரசியல் எதிரிகளை ஒழித்துக் கட்ட தாலியத்தைப் பயன்படுத்தியதாக மேலை நாடுகள் செப்புகின்றன. இது இயற்கையில் ஆட்கள் இறந்தது போலவும் காட்டவும் உதவும்.

கிரஹாம் யங் என்ன செய்தார்?

இவர் இங்கிலாந்தில் ஹார்ட்போர்ட்ஷைரில் பொவிங்டன் என்ற ஊரில் வேலை பார்த்தார். தொழிற்சாலையில் சக ஊழியர்களின் ‘காப்பி’யில் தால்லியம் சல்பேட் (THALLIUM SULFATE) என்ற ரசாயனத்தைக் கலந்தார். பல ஊழியர்கள் நோயால் வருந்தினர். இருவர் இறந்தனர். ‘ஏனைய்யா! உமது தொழிற்சாலையில் இந்தக் கோரம் ? என்று வினவியபோது, ‘நுணலும் தன் வாயால் கெடும்’ என்ற பழமொழிக்கு இணங்க அவரே தன்னைக் காட்டிவிட்டார். ‘ஒருவேளை தால்லியம் காரணமாக இருக்கலாம்’ என்று உளறிவிட்டார்.

(நுணல்= தவளை)

பின்னர் டாக்டர்கள் பரிசோதனையில் அவர்கள் தால்லியத்தால் பாதிக்கப்பட்டது உறுதிப்படுத்தப் பட்டது.

யங் கைது செய்யப்பட்டு குற்றம் நிரூபிக்கப்பட்டதால் ஆயுள் தண்டனை 1972-ல் பெற்றார்.   1990-ல் தற்கொலை செய்துகொண்டார்.  இதில் துயரம் என்னவென்றால், அவர் ஏற்கனவே குடும்பத்தினருக்கு விஷம் வைத்த வழக்கில் கைது செய்யப்பட்டு, சிறையில் அடைக்கப்பட்டு, மன நோய்க்கான மருந்தைச் சாப்பிட்டவர். மனநோய் மருந்துகள் நன்றாக வேலை செய்கிறது என்று டாக்டர்கள் பகர்ந்தவுடன் அவர் விடுதலை செய்ய்ப்பட்டிருந்தார் அதற்குப் பின்னர்தான் பெரிய கொலை வழக்கு!

ஆனால் தால்லியம் ரசாயன விஷத்தால் இறந்த எல்லாவற்றையும் கொலை என்றும் கருதிவிடக்கூடாது.  1987ம் ஆண்டில் கயானா ( (GUYANA, தென் அமெரிக்கா) நாட்டில் 44 பேர் மர்மமாக இறந்தனர். நுற்றுக் கணக்கானோர் நோயில் வீழ்ந்தனர். அவர்கள் குடித்தது வெறும் பசுவின் பால். பின்னர் ஆராய்ந்ததில் கரும்புத் தோட்டத்தில் எலிகளைக் கொல்ல வைக்கப்பட்ட தால்லியம் கலந்த வெல்லக் கட்டிகளை அந்த பசுக்கள் மேய்ந்தது கண்டறியப்பட்டது. அதன் உடலில் ஏறியவிஷம் பாலில் கலந்து அப்பாவிகளைத் தப்பாகக் கொன்றது. தப்பாமல்  கொன்றது.

குறி வைத்தது எலியை; கொடுத்ததோ மனித பலியை!

தால்லியம், எலி மருந்து, கண்ணாடித் தொழிற்சாலை  ஆகியவற்றில் பயன்படுகிறது அதன் ஐஸடோப் (ISOTOPE) இருதய நோய்ப் பரிசோதனைகளில் பயன்படுகிறது. ஒரு காலத்தில் தலையில் ஏற்படும் புழுக்களைக் கொல்லவும் (RINGWORMS IN SCALP) பயன்பட்டது. தலை முடியை உதிர வைத்தால்தான் தலையில் சிகிச்சை தரமுடியும் . தால்லியம் கலந்த ரசாயனப் பொருட்கள் அதைச் சுலபமாக செய்து முடித்தமையால் அதற்கு ‘முடி சூடும் பெருமை’ கிடைத்தது.

1930களில் தாலியம் அஸிடேட் ரசாயனத்தை முகத்தில் வளரும் முடியை அகற்றவும் பயன்படுத்தினர்.

‘தலை மயிரும் தால்லியமும்’– கதை முடிந்தது!

வேதியியல் பயிலும் மாணவர்களுக்கு உதவும் குறிப்புகள்:

Chemical symbol TI
Atomic number 81
Atomic weight 204.3833
Melting point 304 C
Boiling point 1457 C

–சுபம்–

WRITTEN BY S NAGARAJAN

Date: 1  SEPTEMBER 2018

Time uploaded in London – 6-55 AM (British Summer Time)

Post No. 5382

Pictures shown here are taken from various sources including google, Wikipedia, Facebook friends and newspapers. This is a non- commercial blog.

டைரக்டர் திரு கே.பாக்யராஜ் அவர்களை ஆசிரியராகக் கொண்டு வெளிவரும் வார இதழ் பாக்யா. அதில் 31-8-2018 தேதியிட்ட இதழில் அறிவியல் துளிகள் தொடரில் வெளியாகியுள்ள (எட்டாம் ஆண்டு இருபத்திஆறாம்) கட்டுரை

ஆச்சரியம் ஆனால் உண்மை; நீங்கள் நினைப்பதைக் “கேட்கலாம்”!

ச.நாகராஜன்

ஆச்சரியம் ஆனால் உண்மை! நாளுக்கு நாள் வளர்ந்து வரும் விஞ்ஞான உலகில் எதுவும் சாத்தியம்! நீங்கள் மனதில் நினைப்பதை உங்களால் கேட்க முடியும்!

இதற்கான ஒரு சாதனத்தை உருவாக்கியவர் இந்திய வமிசாவளியினரில் ஒருவர். பெயர் ஆர்னவ் கபுர்.இவரைப் பற்றி உலகப் பத்திரிகைகள் அனைத்தும் புகழ்ந்து தள்ளுகிறது.

அமெரிக்காவில் உள்ள மசாசூசெட்ஸ் இன்ஸ்டிடியூட் ஆஃப் டெக்னாலஜி (எம் ஐ டி என சுருக்கமாக அழைக்கப்படுகிறது) புதுமை சாதனங்களை உருவாக்குவதில் முதலிடம் பெற்ற ஒன்று. இதில் மீடியா லேப் என்று ஒரு பிரிவு சுமார் 30 ஆண்டுகளாக இயங்கி வருகிறது. அங்கு எதிர்காலம் உருவாக்கப்படுகிறது.

ஆறு மாடிக் கட்டிடத்தில் உள்ள மீடியா லேபில் 230 ஆய்வு மாணவர்கள் இருக்கின்றனர். அவர்கள் கலை, எஞ்சினியரிங், உயிரியல், இயற்பியல், குறியீடு ஆகிய துறைகளில் தங்கள் ஆய்வைச் செய்கின்றனர்.

இன்று நாம் காணும் டச் ஸ்கிரீன், தானியங்கி காரை ஓட்டுவிக்கும் ஆணைகள் போன்றவை இங்கு உருவாக்கப்பட்டவை தான்.

பைத்தியக்காரத்தனமான எண்ணங்கள் என்று பிறரால் எள்ளி நகையாடப்படும் எண்ணங்களை செயல்படுத்த விரும்புவோரின் களம் இது.

இன்று நாம் கூகிளில் எந்த இடத்தைப் பற்றிக் கேட்டாலும் பதில் பெறுகிறோமே, அது 1979இல் மீடியா லேபில் உருவானது தான்!

மூவி மேப் என்ற பெயரில் அன்று அது உருவாக்கப்பட, இன்று ஒவ்வொரு சந்து பொந்தையும் கூகிளில் நாம் காண்கிறோம்!

மிகப் பெரிய சோதனைக் கூடமான இதில் பாலைவனத்தில் பயிர் வளர்ப்பது எப்படி, கனவுகளை கட்டுப்பாட்டிற்குள் கொண்டு வருவது எப்படி, மனித மூளையை இண்டர்நெட்டுடன் இணைப்பது எப்படி போன்றவை ஆராயப்படுகின்றன.

கேட்டால் சிரிப்போம்; ஆனால் இவை மெய்ப்பிக்கப்படும் போது ஆவென்று வாயைப் பிளந்து ஆச்சரியப்படுவோம். இதை அறிவியல் உலகம் ‘எதிர்காலம் உருவாக்கப்படும் தொழிற்சாலை’ என்று செல்லமாகக் குறிப்பிடுகிறது!

மீடியா லேப்பில் ஒரு ஆய்வு மாணவராக இருக்கும் ஆர்னவ் கபுருக்கு மனம் நினைப்பதைக் ‘கேட்டால்’ என்ன என்று தோன்றியது.

விளைவு : ஆல்டர் ஈகோ என்ற சாதனம் அவரால் உருவாக்கப்பட்டுள்ளது. இது காதில் சொருகி வைக்கப்படும். ஒரு ஒலாவை அல்லது ஊபரை வரவழைக்க வேண்டுமென்றால் நீங்கள் அதை நினைத்தாலே போதும். அது ஓலா அல்லது ஊபருக்கு சொல்லப்பட்டு கார் உங்களை வந்து அடையும்!

இதை யூ டியூபில் அவர் சமீபத்தில் செய்து காண்பித்த போது உலகமே அயர்ந்து போனது. நீங்களும் இந்த யூ டியூப் டெமோவைப் பார்க்கலாம் (Arnav Kapoor’s Alter Ego YouTube video).

எதை கபுர் நினைத்தாலும் ஆல்டர் ஈகோ அவர் பேசாமல் இருக்கும் போதே அதைச் செய்து விடுகிறது.

இயந்திரமும் மனித மனமும் இணையும் காலம் தொடங்கி விட்டது என்கிறார் அவர்.

அவரை 60 நிமிடங்கள் என்ற தொடருக்காக பேட்டி கண்ட ஸ்காட் பெல்லி அதிசய அனுபவத்தை அடைந்தார்.

‘நீங்கள் உங்களுக்குள்ளாக பேசும் போதே உங்கள் மூளை எலக்ட் ரிகல் சிக்னல்களை உங்கள் குரல் நாண்களுக்கு அனுப்புகிறது. அந்த சிக்னல்களை நீங்கள் எடுத்து ஒருவர் என்ன பேச நினைக்கிறார்’ என்பதைக் கண்டு பிடிக்க முடியும் என்கிறார் ஆர்னவ்.

இந்த சிக்னலை பெறுகின்ற சாதனத்தைத் தான் வடிவமைத்துள்ளார் ஆர்னவ்.

பேசாமல் இருக்கும் போதே இந்த சிக்னல்கள் பெறப்பட்டு அவை ஒரு கம்ப்யூட்டருக்கு அனுப்பப்படுகின்றன. உடனடியாக நினைத்தது செயல்படுத்தப்படுகிறது.

எடுத்துக்காட்டாக சில கேள்விகளை ஸ்காட் பெல்லி கேட்டார்:

ஸ்காட்: 45689 என்ற எண்ணை 67 ஆல் வகுத்தால் வருவது?

ஆர்னவ் மனதிற்குள்ளாக இந்தக் கேள்வியைக் கேட்டு கணினிக்கு அனுப்புகிறார். பின்னர் மண்டைஓட்டின் வழியே கணினி அனுப்பும் அதிர்வுகளை உட்காதில் கேட்கிறார். விடையைச் சொல்கிறார்.

ஆர்னவ் : விடை 681.925

ஸ்காட் : மிகச் சரியான விடை. பல்கேரியாவில் உள்ள பெரிய நகர் எது? அதன் ஜனத்தொகை என்ன?

ஆர்னவ் மனதிற்குள்ளாக இதை எண்ணி அவர் சாதனம் மூலமாகக் கம்ப்யூட்டருக்கு அனுப்புகிறார்.

ஆர்னவ் : சோபியா 12.10 லட்சம் ஜனத்தொகை

ஸ்காட் : அட, இண்டர்நெட்டே உங்கள் தலைக்குள் இருக்கும் போல் இருக்கிறதே!

ஆர்னவ்: ஆம், அதைப் பெறத்தான் இந்த சாதனம்.

இப்படித் தொடரும் கேள்விகளும் பதில்களும் நம்மை வியக்க வைக்கின்றன.

இந்த மீடியா லேபிற்கு நிதி எப்படி வந்து சேருகிறது? இதில் 90 நிறுவனங்கள் இணைந்து நிதி உதவியை அளிக்கின்றன.  உலகின் மிகப் பெரிய விளையாட்டு சாதனம் தயாரிக்கும் லெகோ, தோஷிபா, ஜெனரல் எலக்ட்ரிக் போன்ற பிரம்மாண்டமான நிறுவனங்கள் நிதியை அள்ளித் தருகின்றன. மீடியா லேப் 302 அதிசயக் கண்டுபிடிப்புகளுக்கான பேடண்ட் உரிமைகளைப் பெற்றுள்ளது! மீடியா லேப் தரும் நவீன கண்டுபிடிப்புகள் கேட்கவே நம்ப முடியாதவை.

எடுத்துக்காட்டாக பெட்டிக்குள் பயிர் வளர்ப்பது ஒன்று. பெட்டிகள் குளிர்சாதன வசதி கொண்டவை. அந்தப் பயிர்கள் ஆனந்தமாக வளர்கிறதாம். வருடத்திற்கு ஐந்து அறுவடை நிச்சயம்!

நம்ப முடியாத இப்படிப்பட்ட கண்டுபிடிப்புகள் நாளைய உலகை மாற்றப் போவது நிச்சயம்

ஆர்னவ் கபுரின் உங்கள் எண்ணத்தின் படி பேசாமலேயே ஆணையிட்டு எதையும் செய்ய முடியும் என்பதும் இதில் ஒன்று.

அவரது யூடியூப் காட்சியைத் தான் பாருங்களேன், ஒரு முறை!

அறிவியல் அறிஞர் வாழ்வில் ….

ரொபாட் இயலில் மிகப் பெரிய விஞ்ஞானியான கெவின் வார்விக் ரொபாட்டுகளைப் பற்றி ஜாக்கிரதையாக இருக்க வேண்டும் என்று அடிக்கடி சொல்லி வருகிறார்.ஸ்டீபன் ஹாகிங்கும் இதையே சொல்லி வந்தார். இவர்கள் இருவரும் சொல்வதை மெய்ப்பிப்பது போல ஒரு சம்பவம் நடந்து விட்டது.

ஃபேஸ்புக்கின் ஆய்வுப் பிரிவு இரண்டு ரொபாட்டுகளைச் செய்தது. இவை ஒன்றுக்கொன்று பேசும் வல்லமை படைத்தவை. ஆகவே இதற்கு சாட்பாட்ஸ் (Chatbots) என்று பெயர். ரொபாட்டுகளின் பெயர் ஆலிஸ் மற்றும் பாப். (Alice and Bob).

இவைகளுக்குக் கற்றுக் கொடுக்கப்பட்ட பாஷை கடினமாக இருக்கிறது என்று எண்ணிய இவை தமக்கு எளிதான ஒரு பாஷையை தாமே உருவாக்கிக் கொண்டு பேச ஆரம்பித்து விட்டன.

இவைகள் பேசிக் கொண்டது விஞ்ஞானிகளுக்குப் புரியவில்லை.

அரண்டு போன விஞ்ஞானிகள் திகைத்தனர். இவை பேசுவது என்ன என்று தெரியாமல், ஏதேனும் ஏடாகூடமாக அவை திட்டம் போட்டால்!

அவ்வளவு தான், சோதனையையே ஃபேஸ்புக் நிறுத்தி விட்டது.

இது அபாயமானது என்பதை விஞ்ஞானிகள் உணர்ந்து கொண்டனர்.

கெவின் வார்விக்கோ, “இது ஒரு முக்கியமான மைல்கல். ரொபாட் அபாயகரமானவை அல்ல என்று எவரெவர் நினைத்தார்களோ அவர்களுக்கு இந்த சம்பவம் ஒரு நல்ல பாடம். அவை என்ன பேசுகின்றன என்று நமக்குத் தெரியவில்லை. அவை இயங்கக்கூடியவையாக இருந்து ராணுவ ரொபாட்டாக இருந்தால், விளைவு ஆபத்தான ஒன்றாகும். இது தான் உலகின் பதிவு செய்யப்பட்ட ரொபாட்டுகளின் முதல் சம்பாஷணை! அவை நமது கட்டுப்பாட்டிற்குள் தான் இருக்கிறது என்று நாம் நினைத்தாலும் அவை என்ன பேசின என்பது நமக்குத் தெரியவே தெரியாது. ஜாக்கிரதை, ஸ்டீபன் ஹாகிங்கும் நானும் இது பற்றி பலமுறை எச்சரித்து விட்டோம்” என்கிறார்.

ஃபேஸ்புக் நிறுத்தி விட்ட சோதனை உலகில் பெரும் பரபரப்பை எற்படுத்தியுள்ளது!

குறிப்பு : முன்பொரு முறை பாக்யா வாசகர்களுக்கு தன் கையெழுத்திட்ட போட்டோவை அனுப்பி கெவின் வார்விக் வாழ்த்துக்கள் கூறியது வாசகர்களுக்கு நினைவிருக்கலாம்.

***

WRITTEN BY S NAGARAJAN

Date: 31 August 2018

Time uploaded in London – 9-18 AM (British Summer Time)

Post No. 5379

Pictures shown here are taken from various sources including google, Wikipedia, Facebook friends and newspapers. This is a non- commercial blog.

சென்னை வானொலி நிலையம் அலை வரிசை ‘ஏ’யில் 21-7-2108 முதல் 31-7-2018 முடிய தினமும் காலையில் ஒலிபரப்பட்ட சுற்றுப்புறச் சூழல் சிந்தனைகளில் இடம் பெற்ற பத்தாவது உரை.

விழிப்புணர்ச்சி அதிகரிக்கிறது!

உலகெங்கும் சுற்றுப்புறச் சூழலைக் காக்க வேண்டும் என்ற விழிப்புணர்ச்சி சமீப காலமாக அதிகரித்து வருகிறது.

பல நாடுகளில் புதிய தலைவர்கள் அரசுப் பொறுப்பை ஏற்றுள்ளனர். கிரீஸ், ஹங்கேரி உள்ளிட்ட நாடுகள் வெப்பநிலை உயர்வைத் தடுக்கும் தங்களது இலக்கை அடைந்து விட்டன. சீனா தனது நான்கு இலக்குகளில் ஒன்றை அடைந்து விட்டது. 50 நாடுகள் 2050ஆம் ஆண்டிற்குள் 100 சதவிகித தூய்மையை சுற்றுப்புறச் சூழலில் ஏற்படுத்த உறுதி பூண்டுள்ளன.

பாரிஸில் கூடிய க்ளைமேட் அக்கார்ட் எனப்படும் சீதோஷ்ண நிலை ஒப்பந்தம்,  நியூயார்க்கில் ஏற்பட்ட காடுகள் பற்றிய பிரகடனம் ஆகியவை நல்லதொரு நம்பிக்கையை உலக மக்களிடம் ஏற்படுத்தியுள்ளன.

நமது நாட்டில் புதிய விழிப்புணர்வுடன் மக்கள் செயல்பட ஆரம்பித்துள்ளனர். க்ளீன் இந்தியா மூவ்மெண்ட் எனப்படும் ஸ்வச்ச பாரத் அபிக்யான் (Swachh Bharat Abhiyan) என்ற திட்டத்தை பாரத அரசு தொடங்கியுள்ளது. இதன்படி சாலைகள், தெருக்கள்,சந்துகளில் சேரும் குப்பைகள் அகற்றப்பட்டு ஆரோக்கியமான சூழ்நிலை ஏற்படும். கழிப்பறைகள் ஏற்படுத்தப்பட்டு கிராம மக்களுக்கு மேம்பட்ட ஆரோக்கிய நல்வாழ்வு அளிக்கப்படும். 2014ஆம் ஆண்டு அக்டோபர் இரண்டாம் தேதி துவங்கப்பட்ட இந்தத் திட்டம் நாடெங்கும் நற்பயன்களை அளித்து வருகிறது

சூரிய ஆற்றலின் பயன்பாடு உலகெங்கும் அதிகரித்து வருகிறது.

பெட்ரோல், டீஸலைத் தவிர்த்து சூரிய சக்தியாலும், மின் சக்தியாலும் இயங்கும் கார்கள், பஸ்கள், லாரிகள் ஆகியவற்றின் பயன்பாடு அதிகரித்து வருகிறது.

மண்வளத்தைப் பற்றிய விழிப்புணர்ச்சி சமீப காலமாக அதிகரித்து வருகிறது. அற்புதமான இந்த வளத்தினால் தான் விவசாயம் செழிக்கிறது. உணவு தானியங்கள் விளைகின்றன.உலகம் இயங்குகிறது. இந்த வளமே நீரை வடிகட்டிக் குடிநீராக்கித் தருகிறது. பொருளாதார வளர்ச்சியை ஏற்படுத்துகிறது. ஆக மண்வளத்தைச் சீராக்கி மேம்படுத்தினால் உற்பத்தி பெருகும், சுற்றுப்புறச் சூழல் பெரிதும் மேம்படும் என்பதால் விவசாயப் பெருமக்களும் விஞ்ஞானிகளும் இணைந்து மண்வளத்தை மேம்படுத்தும் அரிய பணிகளில் இறங்கியுள்ளனர்.

நமது அரிய பூமியில் இந்த சமீப விழிப்புணர்வு எதிர்கால சந்ததியினருக்கும் உதவக் கூடிய ஒரு பெரிய வரபிரசாதமாகும்.

ஆக பல்வேறு துறைகளிலும் இளைய சமுதாயத்தினரிடம் ஏற்பட்டுள்ள இந்த வரவேற்கத்தக்க மாறுதலில் அவர்களுடன் அனைவரும் இணைந்து உலகை மாசற்ற சுற்றுப்புறச் சூழல் கொண்ட ஒன்றாக ஆக்குவோமாக!

***

WRITTEN BY LONDON SWAMINATHAN

Date: 29 August 2018

Time uploaded in London – 16-59 (British Summer Time)

Post No. 5374

Pictures shown here are taken from various sources including google, Wikipedia, Facebook friends and newspapers. This is a non- commercial blog.

மிருகங்கள் குடி போதையில் தள்ளாடுவது ஏன்?

மார்க்கோ போலோ கண்ட அதிசயம் என்ன?

ஆண்கள் விந்துக்களின் வீரியம் குறைவது ஏன்?

உடலும் வாயும் உள்ளிப்பூண்டு (GARLIC) மணம் கமழ்ந்தது ஏன்?

தரை பெயரிலும், சந்திரன் பெயரிலும் மூலகம் தோன்றியது ஏன்?

ட்யூனா (TUNA) மீன்களை மக்கள் அதிகம் வாங்குவது ஏன்?

WARNING எச்சரிக்கை– எந்த ஒரு மருத்துவக் கட்டுரையைப் படித்துவிட்டும் நீங்களாக எதையும் எடுத்துக் கொள்ளக்கூடாது. டாக்டர்களைக் கலந்தாலோசித்து மருந்து சாப்பிடுங்கள்; எங்கள் லண்டனில் கூட போலி டாக்டர்களை அவ்வப்போது பிடித்து வருகின்றனர். மேலும் ‘அளவுக்கு மிஞ்சினால் அமிர்தமும் விஷம்’ என்பதை நினவிற் கொள்க.

செலீனியம் (SELENIUM) என்றால் என்ன?

உலகில் இதுவரை கண்டுபிடிக்கப்பட்ட மூலகங்களில் இதுவுமொன்று.

மூலகம் (ELEMENT) என்றால் என்ன?

அதுதான் மூலப் பொருள். இந்த பிரபஞ்சத்தை உருவாக்கிய 115-க்கும் மேலான பொருள்கள். இரும்பு, தங்கம், வெள்ளி, வைரம்(கார்பன்), ஹைட்ரஜன், ஆக்ஸிஜன் — முதலியன.

இனி செலீனியம் பற்றிய சுவையான செய்திகளைக் காண்போம். ஆண்களின் விந்துக்கள் குறைந்தால் பெண்கள் ‘கர்ப்பம்’   தரிப்பது கடினம். இது ஆராய்ச்சியில் கண்டு பிடிக்கப்பட்ட விஷயம். செலீனியம் அதிகமுள்ள உணவுப் பொருட்களை ஆண்களுக்குக் கொடுத்துப் பார்த்தார்கள். உடனே விந்துக்களின் வீரியம் அதிகரித்தது.

பொதுவாக மாமிசப் பொருட்களிலும், ட்யூனா (TUNA) மீன் வகைகளிலும் இது உள்ளது. ஆனால் உடலுக்குத் தேவை மிகவும் குறைவு. அப்படியானால் சைவ உணவுக்கார்கள் (VEGETARIANS) என்ன செய்வது? அவர்கள் முட்டைக்கோசு, பிராக்கோலி போன்ற காய்கறிகளையும், நிலக்கடலை (PEANUTS), காளான் (BUTTON MUSHROOMS மஷ்ரூம்), பிரேஸில் நட்- (BRAZIL NUT)முதலியவற்றை சாப்பிட்டால் போதும்

லண்டனில் குழந்தை பிறக்க இயலாமைக்கு ஆண்மகன் தான் காரணமா என்று அறிய விந்து ஆராய்ச்சி (SPERM COUNT) செய்வர். பரிசோதனைச் சாலையில் விந்துவை எடுத்த சில மணி நேரத்துக்குள் கொண்டுவரச் சொல்வர். இதன் மூலம் ஸ்பெர்ம் கவ்ண்ட் (SPERM COUNT)  செய்யப்படும்.

செலீனியம் என்பது பற்றிச் சில சுவையான செய்திகளும் உண்டு. இதை ஆராய்ச்சி செய்த முதல் விஞ்ஞானி BERZELIUS மிகவும் நாறிப்போனார். அதாவது வாயைத் திறந்தாலே பூண்டு (GARLIC) மணம் ‘குப் குப்’ பென்று வந்தது. அவரை வாடகைக்கு வைத்த வீட்டுக்    காரருக்கு கடும் கோபம்; ஒரு நாள் சத்தம் போட்டுவிட்டார். ஏனைய்யா, மூளையே இல்லையா; பூண்டு சாப்பிட்டுவிட்டு வாயைக்கூட கழுவமாட்டீரா? என்று; அவர் பேந்தப் பேந்த முழித்தார். ஏனெனில் அவர் உள்ளிப் பூண்டையே தொடவில்லை. பின்னர்தான் தெரிந்தது. அவர் செய்த செலீனிய ஆராய்ச்சியில் சில காம்பவுண்டுகள் COMPOUNDS– அதாவது கூட்டுப் பொருட்கள்– உடலில் நேரடியாக நுழைகிறது என்பதும் அவை மணம் வீசும் பொருட்கள் என்றும்.

செலீனியம் (SELENIUM) என்றால் சந்திரன், நிலவு என்று பொருள்.

ஸ்வீடனின் தலை நகரான ஸ்டாக்ஹோமில் 1817ல் ஜோன்ஸ் ஜாகப் பெர்ஸீலியஸ் (Jons Jacob  Berzelius இதைக் கண்டுபிடித்தார். அவருக்கு முன்னர் ஒருவர் கண்டுபிடித்த பொருள் டெல்லூரியம் (Tellurium) ; அதைச் சூடுபடுத்தினால் முள்ளங்கி மணம் வீசும். செலீனியத்தை சூடு படுத்தினாலும் முள்ளங்கி சமைக்கும் மணம் வீசியது; ஆனால் அது வேறு, இரு வேறு என்று தெரிந்தவுடன் சந்திரன் (செலீன் Selene) என்று பெயர் சூட்டினார். ஏன்? டெல்லூரியம் என்றால் (Tellus) பூமி என்று பெயர். அதற்குப் போட்டியாக செலீன் – நிலவு என்று வைத்தார். மணத்தினால் நிகழ்ந்த திரு ‘மணம்’!

செலீனியம் குறைவதற்கும் புற்று நோய் அதிகரிப்பதற்கும் கூட தொடர்பு உண்டு என்று ஆராய்ச்சிகள் காட்டுகின்றன. ஆனால் உடலுக்குத் தேவையான செலீனியமோ 450 மைக்ரோகிராம்கள்தான்

செலீனியத்துக்கு ஓர் அதிசய சக்தி உண்டு. அதன் மீது ஒளிபட்டால் அது மின்சாரத்தை ஆயிரம் மடங்கு வேகமாக கடத்தியது. இதனால் இதை போட்டொகாப்பி (Photocopying) எடுக்கும் ஜெராக்ஸ் (Xerox) கருவிகளில் பயன் படுத்துகின்றனர். ஆனால் இதை டெலிவிஷனில் பயன்படுத்த ஆரம்ப காலத்தில் நடந்த முயற்சிகள் வெற்றி பெறவில்லை.

இதை கண்ணாடித் தொழிற்சாலைகளிலும் பெயிண்ட் உற்பத்தியிலும் பயன்படுத்துகின்றனர்.

பூமியில் செலீனியம் மிகவும் குறைவாகவே கிடைக்கிறது. சாக்கடையில் உள்ள பொருட்களை ஒருவகை பாக்டீரியாக்கள் செலீனியம் காம்பவுண்டுகளை உண்டாக்கி காற்று மண்டலத்தில் கலக்கச் செய்கின்றன. அவை மீண்டும் மழை மூலம் பூமிக்குத் திரும்பி வரும்.

சில இடங்களில் ஆடு, மாடுகள் குடிபோதையில் நடப்பது போல நடந்தன. ஏன் என்று ஆராய்ந்தபோது மாடுகள்  செலீனியத்தை அதிகம் ஈர்க்கும் தாவரங்களை மேய்ந்தது தெரிந்தது. மா ர்க்கோ போலோ (Marco Polo in Turkestan) துர்கிஸ்தான் சென்றபோது இப்படி மிருகங்கள்  தள்ளாடி நடை போட்டதை எழுதி வைத்துள்ளார். மில்க் வெட்ச் (Milk Vetch) என்று சொல்லப்படும் தாவரங்களை சாப்பிட்டதன் விளவு இது! அமெரிக்காவின் சில பகுதிகளில் இது அதிகம். ஆகையால் அங்குள்ள இடையர்கள் இந்த தாவரத்தை ‘பைத்தியச் செடி’ என்று அழைப்பர். ஆடு மாடுகளை அந்தப் பக்கம் போகாமல் பார்த்துக் கொள்வர்.

1983-ல் அமெரிக்காவின் கலிபோர்னியா மாநிலத்தில் உள்ள கெஸ்டர்டன் நீர்த்தேக்கத்தில் சாக்கடை நீர் கலந்ததால்  செலீனியம் அதிகரித்து  அங்கு வளர்ந்த பறவைகளைக் கொன்றது; பல உருமாறிப் பிறந்தன.

செலீனியத்துக்கு ஒரு அபூர்வ குணம் உண்டு. அதை தனியாக சாப்பிட்டால் அது விஷம், ஆனால் மற்ற விஷப் பொருட்களான காட்மியம், மெர்குரி (பாதரஸம்) ஆர்செனிக், தால்லியம் ( Cadmium, Mercury, Arsenic, Thallium) ஆகியவற்றை அது அடித்துவிடும். கடலிலுள்ள ட்யுனா (Tuna) மீன்கள் அதிக அளவு பாதரஸத்தை  எடுத்தாலும் அதற்குச் சமமாக செலீனியம் அணுக்களையும் கடலில் இருந்து எடுத்து விஷத்தை விஷத்தால் முறித்துவிடும். இது தெரியாததால் 1970-ல் ஒரு கூத்து நடந்தது.  அமெரிக்காவில் ட்யுனா  மீன் டப்பக்களை ஆரய்ந்தபோது மெர்குரி /பாதரஸம் அதிகம் இருந்தவுடன் சூப்பர் மார்க்கெட்டுகளில் இருந்த லட்சக் கணக்கான டின்களை எடுத்து அழித்தனர். பின்னர் முற்கால மிருகங்களை மியூஸியம்களில் உள்ள பாட்டில்களில் ஆராய்ந்தபோது அவற்றிலும் அதே அளவு மெர்குரி இருந்தது தெரிந்தது. ஆக தற்கால புறச்சூழல் மாசுக்கும் (pollution) மெர்குரிக்கும் தொடர்பு இல்லை என்ற ஞானோதயம் பிறந்தது. பின்னர் நடந்த ஆராய்ச்சிகளில் கடல் வாழ் மீன்களும் ஸீல் (Seal, Walrus) வால்ரஸ் போன்ற பிராணிகளும் ஒரு அபூர்வ வேலையை செய்வது தெரிந்தது. அவை எடுக்கும் ஒவ்வொரு மெர்குரி அணுவுக்கும் சமமாக ஒரு செலீனியம் அணுவை எடுத்து ஈடு கட்டுகின்றன. இயற்கைதான் எவ்வளவு அற்புதங்களை செய்கிறது!!

செலீனியம் (EELENIUM) இரண்டு வகைகளில் கிடைப்பது ஒரு ரசாயன அதிசயம்;  இது உலோக ரூபத்திலும் பொடி ரூபத்திலும் கிடைக்கிறது.

செலீனியம் குறைந்தால் உடலில்  ரத்த அழுத்தம் ,புற்று நோய், ஆண்மை இழப்பு முதலியன ஏற்படும்

SELENEUM

SYMBOL –Se

ATOMIC NUMBER 34

ATOMIC WEIGHT- 78-96

MELTING POINT 217 C

BOILING POINT 685 C

OXIDE- SeO2

DEFICIENCY CAUSES- INFERTILITY, HIGH BLOOD PRESSURE, ANAEMIA, CANCER, ARHRITIS, PRE MATURE AGING, MUSCULAR DYSTROPHY, MULTIPLE SCEROSIS

DISCOVERED BY JONS JACOB BERZELIUS IN 1817 (STOCKHOLM, SWEDEN)

வாழ்க செலீனியம்- வளர்க பிள்ளைப் பேறு!

–subham–