Written by S NAGARAJAN

Date: 26 May 2017

Time uploaded in London:-  5-58 am

Post No.3942

Pictures are taken from different sources; thanks.

contact: swami_48@yahoo.com

பாரதி இயல் 

பாரதி அன்பர்கள் நிச்சயம் படிக்க வேண்டிய நூல்!

மஹாகவி பாரதியார் பற்றிய நூல்கள் – 31 -2

ஸ்ரீ அரவிந்த தரிசனம் – அமுதன் நினைவு அஞ்சலி – 2

அமுதனாரின் வார்த்தைகளில் அவரது நினைவு அஞ்சலி தொடர்கிறது .. ..

  பாரதியார் வீட்டிலோ அல்லது மடுக்கரை ஏரி முதலிய இடங்களிலோ பந்தி போஜனம் நடக்கும் போது எவ்வித வித்தியாசமும் இல்லாது பறையன், பள்ளி, பார்ப்பனன் என்று சொல்லப்படும் அனைவரும் ஒன்றாக உட்கார்ந்து சாப்பிடுவோம். இது இன்று சகஜமாகத் தோன்றலாம். அன்றோ எங்களில் பலர் இப்படி நடந்ததை வீட்டில் சொல்லவே மாட்டோம்.

***

 சில சில வேளைகளில் பாரதியார் சக்தி உபாஸனை பற்றி ஸ்ரீ அரவிந்தரிடம் கேட்டதாகச் சொல்லுவார்.

***

‘ஆர்யா’ பத்திரிகை வெளி வரப் போவதைப் பற்றி புதுவையில் அப்போதிருந்து வந்த தமிழ்க்கவி பாரதியார், அவர் நண்பர்கள் முதலியோரிடையே கனத்த  பேச்சு வார்த்தைகள் நடந்தன. ஒரு நவயுகம் உதயமாகப் போவதாகவும், அதுவும், முக்கியமாக மனித வர்க்கத்துக்கே அந்த நவயுகம் எனவும், அதற்கு ரிஷி ஸ்ரீ அரவிந்தர் என்றும் வதந்தி அந்நாளில் உலவியது. அவ்வதந்திக்கு மூல புருஷர் பாரதியார் தான்.

*** 

சுப்பிரமணிய பாரதியார் மகாத்மா காந்தியைத் தான் பார்க்கப் போவதாகவும் என்னைத் தன்னுடன் வரும்படியும் அழைத்தார். அந்த சமயம் வ.ரா.,ஸ்ரீ இராஜகோபலாச்சாரியார் இல்லத்தில் வாஸம். 1919ஆம் ஆண்டு . மாதம், தேதி நினைவில்லை….

மகாத்மா காந்தியைப் பார்க்க மக்கள் திரள் திரளாய் வந்து  கொண்டிருந்தார்கள். பாரதியாருடன் நானும் அங்கு வந்து சேர்ந்தேன். வேலியால் சூழப்பட்ட ஒரு பெரிய தோட்டத்தின் நடுவில் அழகான பங்களாவில் பிரவேசித்த் போது வெளியில் ஒருவர் பாதரட்சைக்கு மெருகு கொடுத்துக் கொண்டிருந்ததைக் கண்டேன். அவர அணுகி பாரதியார் வ்ந்திருக்கும் கருத்தைத் தெரிவித்தேன்.

அவர் தலை நிமிர்ந்து என்னைக் கண்டதும் உள்ளம் பூரித்து கையிலிருந்த செருப்பு முதலியவற்றைப் போட்டு விட்டு என்னை வாரி அணைத்துக் கொண்டார். அது சமயம் சிறிது தொலைவில் வாசலுக்கருகில் பின்புறத்தில் பாரதியார் நின்று கொண்டு நான் கொண்டு வரும் பதிலுக்காகக் காத்துக்கொண்டிருந்தார்.என்னை உபயகுசலங்கள் விசாரித்து விட்டு, ‘என்னை தர்மசங்கடத்தில் கொண்டு சேர்த்து விட்டாய். காந்திஜியைப் பார்ப்பது அவ்வளவு சுலபமல்ல. முதலில் ராஜாஜியிடம் தெரிவிக்க வேண்டும்.பிறகு அவர் காந்திஜியைக் கேட்டு நாள் குறிப்பிடுவார். இது நடக்கக் கூடிய காரியமல்ல’ எனச் சொல்லி முடித்தார்.

இந்த பதிலை பாரதியாரிடம் தெரிவிக்க தைரியம் இல்லாததினால், “நீங்களே வந்து பாரதியாரிடம் விஷயத்தைத் தெரிவித்து விடலாமே” என்று சொன்னேன். வாசலுக்கருகில் பின்புறத்தில் நின்று கொண்டிருக்கும் பாரதியரை வணங்கி விட்டு, வ.ரா. சொல்லுகிறார் : ”உள்ளே வந்து அமருங்கள். இராஜகோபாலாச்சாரியார் இது வேளை ஸ்நாநதிகளை முடித்திருப்பார். நீங்களே அவரிடம் வந்து காரியத்தை நேரில் தெரிவிக்கலாம்” என்றார்.

பாரதியார், “நான் தெய்வ ஆக்ஞை பெற்று காந்திஜியைக் காண வந்திருக்கிறேன். அவரை உட்னே பார்க்க வேண்டும்” என்று கூறவே கூடத்தில் அமர்ந்திருந்த பாரதியார் சொன்னதைக் கேட்ட இராஜகோபாலாச்சாரி கேட்டு பிரமித்து ஒரு சிறிது தயங்கி, பிறகு, “இதோ  பதில் கொண்டு வருகிறேன்” என்று சொல்லிக் கொண்டே காந்திஜியைக் காணச் சென்றார்.

பாரதியார் காந்திஜியைப் பார்த்துத் திரும்பியது இரண்டு நிமிடம் கூட இருக்காது. பங்களாவில் அரைக் கணம் கூடத் தங்காது வ.ரா.விடம் விடையும் பெறாது என் கையைப் பிடித்து இழுத்துக் கொண்டே பங்களாவை விட்டு வெளீயே பறந்து விட்டார் பாரதியார், வில்லை விட்டுக் கிளம்பிய அம்பைப் போல.

காந்திஜியுடன் என்ன நடந்தது என்று எனக்குச் சொல்ல யாருமே இல்லை. என்னென்னவோ வதந்தியெல்லாம் கிளம்பியது. அவ்வளவு தான்.

**

அமுதனின் இந்த வரலாற்றுக் குறிப்பில் மகாத்மா காந்திஜியை பாரதியார் சந்தித்த போது என்ன நடந்தது என்பதைத் தெரிந்து கொள்ள  முடியாவிட்டாலும் வ.ரா. அவர்கள் எழுதிய பாரதியார் சரித்திரத்தில் அதைக் காண முடிகிறது.

இந்தத் தொடரில் வ.ரா.வின் நூலைப் பற்றிய கட்டுரை முன்பே வெளி வந்துள்ளது அதில் இதைக் காணலாம்.

அடுத்து அமுதனாரின் குடுமி பற்றிய விஷயம்.

அவர் அரவிந்த ஆசிரமத்தில் தங்கி இருந்த போது ஒரு நாள் இரவு அவரது குடுமி பற்றிப் பேச்சு வந்தது.

மறு நாள் எழுந்து பார்த்த போது அமுதனின் குடுமியைக் காணோம்.

அதைப் பற்றி அவரது வார்த்தைகளில் கூறி இருப்பதைக் காண்போம்  :-

“தற்போடைய நிலைக்கு அநுதாபம் காட்டக் கூடியவர் பாரதியார் ஒருவர் தான் என்று எண்ணி அவரிடம் சென்றேன். விஷயத்தையெல்லாம் கேட்டு விட்டு,”வெளியே வர உனக்குத் தைரியமுண்டா? உண்டானால் இப்போதிருந்தே என்னோடிருந்து விடு” என் கலங்கிக் குழம்பிய நெஞ்சுக்கு அமைதி தராது அழுத்தம் திருத்தமாய்ச் சொன்னார். …..

ஸ்ரீ அரவிந்தர் தான் என் சிகையை எடுத்து விட ஆக்ஞாபித்ததாக பிறகு கேள்விப்பட்டேன்.

                       *

நூலின் இறுதி அத்தியாயத்தில் அமுதன் அவர்கள் புதுவை வானொலி நிலையத்தில் 11-12-1966 அன்று பாரதியார் பற்றி ஆற்றிய உரை இடம் பெற்றுள்ளது.

இந்த உரையை முன்பே இந்தத் தொடரில் விவரித்திருக்கிறோம்.

**                                                                                                                                                       

123 பக்கங்கள் கொண்ட இந்த நூலை பாரதி அன்பர்கள் அனைவரும் வாங்கிப் படிக்கலாம்.

அரவிந்த ஆசிரமத்தில் உள்ளவர்கள் இன்றும் கூட அமுதனாரின் வழியில் அற்புதமாகத் தொண்டாற்றி வருவதை என் அனுபவத்தில் நான் கண்டுள்ளேன்.

சில மாதங்களுக்கு முன்னர் பாரதியார் பற்றிய ஒரு குறிப்புக்காக ஆசிரமத்தை மின்னஞ்சலில் தொடர்பு கொண்டேன். மறு நாள் ஆச்சரியப்ப்டும் விதத்தில் பங்களூருவில் இருக்கும் எனக்கு புதுவை ஆசிரமத்திலிருந்து போன் வந்தது. அதில் விவரமாக பதிலைச் சொன்ன ஆசிரம அன்பர் அது சம்பந்தமான ஆவணம் எங்கிருக்கிறது என்பதையும் விளக்கினார்.

இது போன்ற தொடர்களை ஆதாரத்துடன் எழுத இப்படிப்பட்ட அன்பர்கள் குழு இல்லையேல் எதுவும் சாத்தியமில்லை.

அந்த அன்பருக்கு இங்கு இந்தக் கட்டுரை மூலம் எனது நன்றியைத் தெரிவித்துக் கொள்கிறேன்.

                                     -தொடரும்

Research article Written by London Swaminathan

Date: 18 May 2017

Time uploaded in London: 16-43

Post No. 3919

Pictures are taken from various sources such as Face book, google and Wikipedia; thanks.

contact: swami_48@yahoo.com

(I have already posted the English version of this article yesterday)

வேதங்களை சங்க காலத் தமிழர்கள் மறை என்று அழகாக மொழி பெயர்த்தனர். ஏனெனில் நிறைய ரஹசியங்கள் நிறைந்தவை. மறை என்றால் மறைவான பொருளுடைத்து. அதனால்தான் காஞ்சி பரமாசார்ய சுவாமிகள் போன்றோர் வேதத்தின் அர்த்ததைப் பற்றிக் கவலைப்படாமல் அதை சொல்லி வாருங்கள்; அந்த மந்திர சப்தமே பலன் தரும் என்பர்; அது மட்டுமல்ல ஒரு அழகான கதையும் சொல்லுவார்.

ஒரு கண் தெரியாத குருடன் விளக்கை எடுத்துச் சென்றதைப் பார்த்து எதிரே வந்தவர்கள் பரிகசித்தனராம். அவன் அவர்களைப் பார்த்து,எனக்கு கண் தெரியாதது உண்மையே; உங்களைப் போன்றோர் இருட்டு நேரத்தில் என் மீது மோதி விடக் கூடாதல்லவா? என்றானாம்.

இதே போல நாம் வேதத்தின் பொருள் விளங்காத, அந்தகர்களாக இருந்தாலும், வேதம் என்னும் விளக்கை- ஞான தீபத்தைக் கையில் ஏந்திச் சென்றால் — எதிர்காலத்தில் ஆதி சங்கரர் போன்ற ஒரு தீர்க்கதரிசி தோன்றி உலக மக்களை உய்விப்பர் என்னும் கருத்து வரும்படி காஞ்சி சங்கராசார்ய சுவாமிகள் 91894-1994) அருள்மொழி வழங்கியுள்ளார்.

வேதத்தின் பொருளை விளக்க முற்பட்ட, மொழிபெயர்க்க முன்வந்த வெளிநாட்டுக்காரகள் வரிக்கு வரி இந்துக்களைக் குறை கூறுவர். அந்தப் புத்தகங்களைப் படிக்கும் போது ஒரே சிரிப்பாக வரும். அவர்களுடைய மொழிபெயர்ப்புகளை உளறுவாயன் உளறல் என்று சொல்லுவதா அல்லது தமாஷ் என்று சொல்லுவதா என்று தெரியவில்லை. இதை நீங்களே கண்டு பிடிக்கலாம்.

ஒரு குறிப்பிட்ட மந்திரத்துக்கு ஒவ்வொரு ஐரோப்பியரும் என்ன பொருள் சொல்லுகின்றனர் என்று அருகருகே வைத்துப் பார்த்தால் குபீரென்று சிரித்து விடுவீர்கள். புத்தரும் ஆரிய என்ற பதத்தைப் பிரயோகித்தார்; சங்க இலக்கியப் புலவர்களும் ஆரிய என்ற சொல்லைப் பயன்படுத்தினர். பாரதியாரும் ஆரிய என்ற சொல்லைப் பயன்படுத்தியுள்ளார். இவர்கள் அனவரும் கனவான்கள், பண்பாடுடையோர், முனிவர்கள், இமயமலை வாழ் மக்கள் என்ற பொருளில் பயன்படுத்தினர். ஆனால் வெள்ளைக்கார்கள் மொழி பெயர்ப்பு முழுவதிலும் ஆரியர் என்பது ஒரு இனம் என்று மொழிபெயர்த்து அதற்கு அடுத்தவரியில் இது திராவிடர்களுக்கு எதிரானது என்று சேர்த்து இருப்பர். இந்தப் பொருள் எந்த இந்திய இலக்கியத்திலும் இல்லாதது.

எங்கெல்லாம் அவர்களுக்குப் பொருள் தெரியவில்லையோ அங்கெல்லாம் இது ஆரியர்களின் உளறல் (gibberish) என்றும் ஒரு வரி சேர்ப்பர்; சில இடங்களில் இது யாருக்கும் பொருள் விளங்காத விஷயம் (obscure) என்பர். உண்மையில் வேதம் முழுதும் அடையாள பூர்வமாக, சங்கேத (symbolism) மொழியில் பல விஷயங்களைச் சொல்ல வந்த நூல். பிற்காலத்தில் தமிழில் அப்பர், திருமூலர், சிவ வாக்கியர் போன்ற பெரியோரின் பாடல்களில் இப்படி எண்களைப் பயன்படுத்துவதைக் காண லாம். அறிஞர் பெருமக்களின் வியாக்கியானத்தால்தான் அவைகளின் உட்பொருளை நாம் அறிய முடியும்..

வேதத்தில் உள்ள எவ்வளவோ ரஹசியங்கள் பற்றி பல கட்டுரைகள் எழுதிவிட்டேன். இன்று 17 என்ற மாய எண்ணின் குறிப்புகளைக் காண்போம்.

யஜூர் வேதத்தில் ருத்ரம் சமகம் என்ற பகுதியில் சமகத்தில் இப்படி எண்களை அடுக்கிக் கொண்டே போவர். உலகின் மிகப் பெரிய எண்கள் பிராமண நூல்களில் உள்ளன. அதற்குப் பின்னர் அதை சமண பௌத்த நூல்கள் செப்பின. தசாம்ச (Decimal, Binary) முறையை உலகிற்குக் கற்பித்து பூஜ்யம் என்ற எண்ணை உருவாக்கி உலகில் கம்யூட்டர் மொழியை உருவாக்க உதவினர். ஆனால் எண் 17 என்று எதற்காக ஒரு விநோத எண்ணைத் திரும்பத் திரும்ப குறிப்பிடுகின்றனர் என்று தெரியவில்லை. இதுபற்றி யஜூர் வேத தைத்ரீய சம்ஹிதையில் குறைந்தது ஆறு ஏழு இடங்களில் வருகிறது

பிரஜாபதியின் எண் 17 என்று ஒரு இடத்தில் சொல்லுவர்.

ஆறு, குளம், ஏரி, கடல், மழை நீர் முதலிய இடங்களில் இருந்து யாகத்துக்கு நீர் கொண்டு வரவேண்டும் என்ற பட்டியலில் 17 நீர்நிலைகள் என்று முடிப்பர்.

யாகங்களுடன் இணைந்தது குதிரை பூட்டிய தேர் பந்தயம் ஆகும் . இதில் ஒரு வீரன் 17 அம்புகள் எய்தி இடத்தைக் குறிப்பான் என்று வருகிறது

அப்பொழுது 17 டமாரங்கள் முழங்க வேண்டுமாம்.

இன்னும் ஒரு மந்திரம்:

ஒரு அசைச் சொல்லுடன் அக்னி வாக் (பேச்சு)கை வென்றான்

இரு அசைச் சொற்களுடன் அஸ்வினி தேவர்கள் உற்சாகத்தை வென்றனர்

விஷ்ணு மூன்று அசைச் சொற்களுடன் மூவுலகத்தை வென்றார்

சோமா நான்கு அசைச் சொற்களுடன் காலநடைகளை வென்றார்

பூசன் ஐந்து பங்க்தியை வென்றார்

பிரஜாபதி 17  சொற்களுடன் 17 மடங்கு ஸ்தோமாவை வென்றார்.

இப்படிப் பல மந்திரங்கள்!

யாகத்தில் 4 முக்கிய புரோகிதர்கள், அவர்களுக்கு உறுதுணையானோர் நால்வர், அவர்களுக்குப் பல வகைகளில் எடுபிடி வேலை செய்வோர்– என்று 17 பேரைச் சொல்லுவர்.

17 என்பது ஒரு மர்மமான எண்!

“தமிழில் பழ மறையைப் பாடுவோம்” என்று பாரதி முரசு கொட்டினான். “வேதம் என்று வாழ்க வென்று கொட்டு முரசே” என்றான் பாரதி.

நாமும் முடிந்தவரை வேதத்தை வாழ்த்துவோம். அது நம்மை வாழ்த்தும்; வாழ்விக்கும்.

-சுபம்-

Written by S NAGARAJAN

Date: 16 May 2017

Time uploaded in London:-  6-08 am

Post No.3912

Pictures are taken from different sources; thanks.

contact: swami_48@yahoo.com

நகைச்சுவை விருந்து

கம்யூனிஸ ஜோக்குகள்!

ச.நாகராஜன்

கம்யூனிஸ ஜோக்குகள் பேச்சு சுதந்திரத்தையும் கருத்து சுதந்திரத்தையும் எப்படியெல்லாம் கம்யூனிஸம் அடக்கி விடும் என்பதைத் தெரிவிப்பவை. கம்யூனிஸ கொள்கைகள் அது பிறந்த நாட்டிலேயே செத்து மடிந்த போதும் கூட இன்றும் காம்ரேடுகள் இங்கு அதைக் கட்டி அழுவது விசித்திரமே!

சில கம்யூனிஸ ஜோக்குகள் இதோ:-

சராசரி நாள்!

கம்யூனிஸ்ட் ஆட்சியில் நாட்களைத் தள்ளுவது கஷ்டம் தான்!

ஆனால் காம்ரேடுகள் அதை ஒப்புக் கொள்வார்களா, என்ன?

நாளைய தினத்தைப் பற்றி விஞ்ஞான ரீதியாகவும் தர்க்கரீதியாகவும் ரஷியாவில் சொல்லப்படும் அறிவிப்பு :

இன்று சராசரியான ஒரு நாள். – நேற்றைய தினத்தை விட மோசமான நாள்; நாளைய தினத்தை விட நல்ல நாள்!

உண்மையையே சொல்லும் ப்ராவ்தா

ப்ராவ்தா என்ற ரஷிய பத்திரிகை செய்தியை வெளியிடும் விதத்தைப் பற்றி ஏராளமான ஜோக்குகள் உண்டு. அவற்றில் ஒன்று இது:-

ப்ராவ்தா பத்திரிகைக்கு வந்த ஒரு டெலிபோன் அழைப்பு:-   ஐவான் ஐவனோவிச் லண்டாவ் இன்ஸ்டிடியூட்டில் (Landau Institute) உள்ள தனது லாபரட்டரியில் கோல்ட் ஃப்யூஷன் (cold fusion) சோதனையில் மாபெரும் வெற்றியை அடைந்திருக்கிறாராமே, நீங்கள் பிரசுரித்திருக்கும் அந்தச் செய்தி  உண்மையா?

இதற்கு ப்ராவ்தாவின் பதில்:

ஆமாம், அந்தச் செய்தி உண்மை தான். ஆனால் அதில் சில சின்னத் திருத்தங்கள் உள்ளன. இன்ஸ்டிடியூட் லண்டாவில் இல்லை. அது டப்னாவில் (Dubna) உள்ளது. சோதனையைச் செய்தது ஐவான் ஐவனோவிச் அல்ல; செய்தவர் பியோட்ர் பியோட்ரோவிச். அவர் சாதனை படைத்தது கோல்ட் ஃப்யூஷனில் இல்லை; மாறாக அவர் செய்தது இஸ்ரேலுக்கு ஓடிப்போனது தான்!

கடவுளும் உருளைக்கிழங்கும்

விஞ்ஞான ரீதியாக விவசாயம் செய்வதில் முனைந்த மாஸ்கோ அரசின் போலிட்பீரோ விஷயம் தெரித தனது காம்ரேட் ஒருவர் தலைமையில் குழு ஒன்றை மாஸ்கோவிற்கு அருகில் உள்ள ஒரு கூட்டுறவுப் பண்ணைக்கு அனுப்பியது.

“உருளைக்கிழங்கு விளைச்சல் எல்லாம் எப்படி இருக்கிறது, தோழரே!” என்று கேட்டார் குழுவின் தலைவர்.

“பிரமாதமாய் இருக்கிறது, காம்ரேட்” என்று ஆரம்பித்த விவசாயி, ‘ எல்லா உருளைக்கிழங்குகளையும் ஒரே இடத்தில் சேகரித்துக் குவித்தால் அது தரையிலிருந்து கடவுளின் சொர்க்கம் வரை போய் விடும்” என்று பெருமிதத்துடன் தெரிவித்தார்.

குழுத் தலைவர் கோபமாக, “ என்ன சொல்கிறாய், தோழா, இது சோவியத் யூனியன். இங்கு கடவுளே கிடையாது, உனக்குத் தெரியாதா?” என்று கேட்டார்.

“ஆமாம், ஆமாம், இது சோவியத் யூனியன் தான். இங்கு உருளைக்கிழங்கும் கிடையாதே, அது தெரியாதா உங்களுக்கு?”

என்று பதில் சொன்னார் அந்த விவசாயி.

நான்கு பேருக்குத் தெரியும் நடந்தது என்னவென்று!

வார்ஸாவுக்குச் சென்று கொண்டிருந்த ஒரு புகைவண்டியின் பெட்டி ஒன்றில் நான்கு பேர் அமர்ந்திருந்தனர்.

ஒருவர் ரஷியர்; இன்னொருவர் ஒரு விவசாயியின் வயதான மனைவி. மூன்றாமவர் ஒரு இளவயது அழகி; நான்காமவர் போலந்தைச் சேர்ந்த ஒரு லாஜிக் புரபஸர்.

நெடு நேரம் புகைவண்டியில் அவர்கள் பேசாமலேயே அமர்ந்திருந்தனர்.ஒரே நிசப்தம்!

திடீரென்று புகைவண்டி ஒரு குகைக்குள் சென்றது. பெட்டியில் ஒரே இருள். திடீரென்று நிசப்தத்தைக் கலைக்கும் வகையில் ஒரு முத்தமிடும் சப்தம் கேட்டது; அடுத்து பளார் என்று ஒரு அறை விழுந்த சப்தம் கேட்டது.

புகைவண்டி குகையிலிருந்து வெளியேற, வெளிச்சம் வந்தது.

ரஷியர் மிகவும் கலவரமான முகத்துடன் வெளிறிக் காணப்பட்டார். அவரது ஒரு கன்னம் மற்றதை விடச் சிவந்து இருந்தது.

இப்போதும் கூட யாரும் பேசவில்லை. அவரவர் தீவிர யோசனையில் ஆழ்ந்திருந்தனர். அவர்கள் நினைத்தது என்ன, தெரியுமா?

வயதான பெண்மணி நினைத்தது:-  ரஷிய மடையனுக்கு நன்கு வேண்டும். அழகி கொடுத்த அடி பிரமாதம்!

ரஷியர் நினைத்தது:- என்ன அநியாயம்! போலந்துக்காரன் கொடுத்த முத்தத்திற்கு நானா பலிக்கடா? என்னை எதற்கு அடிக்க வேண்டும்?

இளம் அழகி நினைத்தாள்:- என்ன விசித்திரம் இது! ரஷிய ஆபீஸர் அந்த வயதான பெண்மணியையா முத்தமிட வேண்டும்? என்ன அநியாயம்?

போலிஷ் லாஜிக் புரபஸர் நினைத்தார்:- அடடா! தேசபக்தியுள்ள அருமையான போலந்துக்காரன் அல்லவா நான்! என் கையை நானே முத்தமிட்டுக் கொண்டு கொடுத்தேன் ஒரு அடியை ரஷியனின் கன்னத்தில்! யாரும் அதை புரிந்து கொள்ளவில்லை, யாராவது புத்திசாலியாக இருந்தால் தானே!

***

Written by London Swaminathan

Date: 13 May 2017

Time uploaded in London: 6-34 am

Post No. 3904

Pictures are taken from various sources; thanks.

contact: swami_48@yahoo.com

தமிழில் அழகான, ஆழமான பொருள் பொதிந்த பழமொழிகள் உள. ஒருவன் செய்யும் காரியம் எவ்வளவுதான் நல்லதானாலும் இடமும் நேரமும் சூழ்நிலையும் சரியாக இல்லாவிடில் நல்ல பெயர் கிடைக்காது

பாம்புப் புற்றுக்கு அருகில் ஒரு கயிறு கிடந்தாலும் அதைப் பாம்பென்றே மக்கள் கருதுவர்; சஹவாச தோஷம்!

பனைமரத்துக்கு அடியில் நின்று பாலைக் குடித்தாலும், அதன் வெண்மை நிறமும், இடமும் அதைக் கள் என்று நினக்கச் செய்யும்.

நிந்தையிலாத் தூயவரும் நிந்தையைச் சேரில் அவர்

நிந்தையது தம்மிடத்தே நிற்குமே – நிந்தைமிகு

தாலநிழல் கீழிருந்தான் றன்பால் அருந்திடினும்

பாலதனச் சொல்லுவரோ பார்.

-நீதி வெண்பா (எழுதியவர் பெயர் கிடைக்கவில்லை)

பொருள்:-

பனை மரத்தின் அடியின் உடகார்ந்துகொண்டு பசுவின் பாலைக் குடித்தாலும், பிறர் அதைப் பால் என்று சொல்லுவரோ? நீ அதனை நினைத்துப் பார். அதுபோல நல்ல பெயருடைய மேலோர், கெட்டவர்களுடன் சேர்ந்தால் அவர்களுடைய கெட்ட பெயர் இவர்களையும் ஒட்டிக்கொள்ளும்.

பழுதும் பாம்பும்

இதே கருத்தை வலியுறுத்த இன்னொரு பாடலையும் பாடி வைத்தார் அந்தப் புலவர்!

நல்லொழுக்கம் இல்லாரிடம் சேர்ந்த நல்லோர்க்கு

நல்லொழுக்கமில்லாச் சொல் நண்ணுமே – கொல்லும் விடப்

பாம்பென உன்னாரோ பழுதையே ஆனாலும்

தூம்பு அமரும் புற்று அடுத்தாற் சொல்

-நீதி வெண்பா (எழுதியவர் பெயர் கிடைக்கவில்லை)

ஓட்டைகள் மிக்க புற்றுக்குப் பக்கத்தில் கயிறே கிடந்தாலும், அதை கொல்லக் கூடிய விஷப் பாம்பு என்று சொல்லுவார்கள் அல்லவா? நீயே சொல்! அது போல நல்ல ஒழுக்கம் இல்லாதவர்களுடன் சேர்ந்த நல்லோரையும் பழிச் சொல் வந்து சேரும்.

அழகான இரண்டு உவமைகள் மூலம் நமக்கு உயரிய கருத்துக்களைச் சொல்வர் தமிழ்ப் புலவர். இளம் வயதிலேயே இந்தச் செய்யுட்களை மனப்பாடம் செய்தால், அவை நம் மனதில் பசு மரத்தாணி போலப் பதியும்.

வாழ்க தமிழ்! வளர்க தமிழ்ப் புலவர்தம் பெருமை!

–சுபம்–

Written by S NAGARAJAN

Date: 11 May 2017

Time uploaded in London:-  6-26 am

Post No.3897

Pictures are taken from different sources; thanks.

contact: swami_48@yahoo.com

பாரதி இயல்

மஹாகவி பாரதியார் பற்றிய நூல்கள் – 30

சென்று போன சில நாட்கள் : எஸ்.ஜி.ராமானுஜலு நாயுடுவின் நூல்

ச.நாகராஜன்

    மஹாகவி பாரதியாரின் நண்பர்களில் ஒருவர் எஸ்.ஜி. ராமானுஜலு நாயுடு. புதுச்சேரியில் அவருடன் நெருங்கிப் பழகியவர். அவர் அமிர்த குணபோதினி என்ற மாதப் பத்திரிகையில் பாரதியாரைப் பற்றிய பல குறிப்புகளை சென்று போன சில நாட்கள் என்ற தலைப்பில் எழுத ஆரம்பித்தார்.

1928ஆம் ஆண்டு நவம்பர், டிசம்பர் 1929ஆம் ஆண்டு ஜனவரி, மார்ச், ஏப்ரல், மே ஆகிய ஆறு  மாதங்களில் வெளி வந்த அவரது கட்டுரைகள் பல சுவையான செய்திகளைத் தெரிவிக்கின்றன.

அவற்றில் ஒரு சில பகுதிகளை மட்டும் இங்கு காண்லாம்.

*

    அந்தக் காலத்தில் பாரதியார் தீவிர தேசபக்தராயிருந்தார். எதிலும் நிதானத்தையே யனுசரித்து நின்ற ஸ்ரீமான் ஜி.சுப்பிரமண்ய ஐயரின் கொள்கைகளில் பாரதியார் வேறுபட்டுப் பிரிந்து இந்தியா என்ற தமிழ் வாரப் பத்திரிகையைத் தொடங்கி அதற்கு ஆசிரியராக அமர்ந்தார்.அப்பத்திரிகையின் சொந்தக்காரர் வேறொருவராவார். பாரதியாரின் தமிழ் நடை அது  முதற்கொண்டு ஒரு புதுவழியில் மாறியது. அதற்கு முன்னர் எவரும் அவ்வழியில் பத்திரிகையை நடத்தவில்லையென்று சொல்லும்வாறாக வெகு சிறப்புடனும் திறமையுடனும் எழுதி வரத் தொடங்கினார். சிறுசிறு பதங்களுடன் கூடிய ஒரு நவீன கம்பீர நடை. இந்தியா பத்திரிகை சனிக்கிழமை தோறும் வெளியாகி வந்தது. நாலாயிரம் பிரதிகள் வரைப் போய்க்கொண்டிருந்தது.

*

1907ஆம் வருஷத்தில் பரிமளா என்ற நாவலை அச்சிட நாம் சென்னை சென்றிருந்த சமயம் ஒரு கொடிய முறை ஜ்வரத்தினால் வருந்தும்படியாக, பாரதியாரே பரிமளா ‘புரூப்;கள் முக்காற் பாகத்தையும் திருத்தி முடிவு செய்து, அந்த நாவலைப் பற்றி இந்தியா பத்திரிகையின் தலையங்கத்தில் ஆறு கலங்கள் வரை மதிப்புரை வரைந்தார். அதிலே மொழி பெயர்க்குந் தொழிலைக் குறித்தும் தமிழின் இயற்கை இனிமையைக் குறிக்கும்  ‘அங்கனாமணி’ என்பதிலும் ‘பெண்மணி’ என்ற தமிழ்ச் சொல் மிக்க இனிமையுடையது என்றும் விஸ்தாரமாக வரைந்தார்.

*

பாரதியாரைப் பிடித்துத் தருவோருக்கு நூறு ரூபாய் பரிசு தரப்படுமென்று ஒவ்வொரு போலீஸ் ஸ்டேஷன்களிலும் விளம்பரம் ஒட்டப்பட்டிருந்தது. அதிலே அவரது உயரம் இத்தனை அடியென்றும், கஞ்சா, புகையிலை உபயோகிப்பவரென்றும், பூணூலை எடுத்துவிட்டவரென்றும் இன்னும் பல குறிப்புகளும் தெரிவிக்கப்பட்டிருந்தன.

*

புதுச்சேரியில் பாரதியார் வாழ்ந்த காலையில் ‘தமிழ்நாட்டைப் பற்றி நல்ல கருத்துகள் அமையப் பெற்றதும் அதன் பெருமையை விளக்கக்கூடியதுமான பாடல்களை புனைந்து அனுப்புவோருக்கு இன்ன வெகுமதி தரப்படும்’ என்று ஒரு விளம்பரம் சுதேசமித்திரன் பத்திரிகையில் வெளியிடப்பட்டிருந்தது….

   பாரதியாரின் புதுவை நண்பரான வாத்தியார் சுப்ரமணிய ஐயரவர்களும் மற்றும் சில நண்பர்களும் அந்த விளம்பரத்தின் படி ஒரு பாடல் செய்ய வேண்டுமென்று பாரதியாரை நிர்ப்பந்தப் படுத்தினர். அவர்கள் அதிகாரம் செய்யப் பாத்தியதை பெற்றவர்கள். பாரதியார் இவர்களின் விருப்பத்தைக் கேட்டு புன்னகை கொண்டார். வேறு பதில் சொல்லவில்லை. அதன் பின்பு வாத்தியார் ஐயரவர்கள், “வெகுமதிக்கு, நான் உங்களைப் பாடச் சொல்லவில்லை. சங்கத்துப் பண்டிதர் அநேகரின் முன்பு உங்கள் கவி ஜோடி கேட்கட்டுமே என்று தான் சொல்லுகிறேன். சங்கத்தார் கவி கேட்பது தமிழ் நாட்டைப் பற்றி செந்தமிழில் பாடிக் களிக்கட்டும் என்ற நோக்கத்துடன் தான்; ஆகையால் இந்த விஷயத்தில் நீங்கள் ஏன் லோபித்தனம் காட்ட வேண்டும்? என்று குத்திப் பேசிக் கேட்டார். “அதற்கு நான் சொல்லவில்லை” என்று இழுத்தார் பாரதியார். வாத்தியார், “அதெல்லாம் போகிறது, எங்களுக்குத் தேவை ஸ்வாமி” என்று ஒரே போடு போட்டு விட்டார்.

    பாரதியார் அதற்கு “நான் கட்டாயம் பாட்டு எழுதி விட்டு  மூச்சு விடுகிறேன். அது வேண்டுமென்கிற சங்கத்தைச் சேர்ந்த நண்பர்கள் அனைவரும் சர்க்காருக்கு நண்பர்கள். எனது கவியை ‘நல்லது’ என்று அவர்கள் உரத்துச் சொல்லக் கூடப் பயப்படுகிறவர்கள், அதனால் தான் தாமதித்தேன்” என்று சொல்லி ஒரு நிமிஷ நேரம் பூப்பூவாய் நகைத்தார். உடனே வரைவதற்கு எழுதுகோலைக் கொண்டார்.

“செந்தமிழ் நாடெனும் போதினிலே – இன்பத்

    தேன் வந்து பாயுது காதினிலே – எங்கள்

தந்தையர் நாடென்ற பேச்சினிலே – ஒரு

     சக்தி பிறக்குது மூச்சினிலே”

என்று பல்லவி எழுதி வாசித்துக் காண்பித்தார். வாத்தியார் மலைத்தார். எடுத்த விஷயங்கள் அத்தனையும் பல்லவியிலேயே சுருக்கமாக முடிந்து விட்டது.

*

பாரதியார் எவ்வளவோ காலம் வாழப் போவதாக எண்ணியிருந்தார். எவ்வளவோ வேலைகள் செய்ய நினைத்திருந்தார். ஒரு வாரப் பத்திரிகை தொடங்க வேண்டுமென்று நம்மிடம் தர்க்கித்தார். பழைய இந்தியாவின் காரமான நடை கூடாதென்று நாம் சொன்னதையும் ஒப்புக் கொண்டார். 1920ஆம் வருஷத்து சுதேசமித்திரன் அனுபந்தத்தில் நல்ல வேலை செய்தார். 1921ஆம் வருஷ ‘மித்திரன்’ அனுபந்தத்திற்கு இல்லாமல் போய்விட்டார். அவர் வாழ்த்திச் சென்ற தமிழ்நாட்டில் சமீபத்தில் அவரது கீதங்களை அரசாங்கத்தினர் தடுத்து விட்ட ‘திருவிழாவும்’ நடந்தது. நற்காலமாய் அந்தத் தடை நிவர்த்திக்கப்பட்டது தமிழகத்தின் பாக்கியமே. பாரதியார் 1907ஆம் வருஷத்தில் தமது நண்பரொருவர் மரித்ததற்காக இரங்கிச் சில பாடல்கள் புனைந்தார். அச்சமயம் நாமும் அருகிலிருந்தோம். அவற்றின் இரண்டு அடிகளை இப்பொழுது பாரதியாருக்கே உபயோகித்து இவ்வியாசத்தை முடிக்கின்றோம்.

“அந்தோ மறலி நம் அமுதினைக் கவர்ந்தான்

நொந்தோ பயனில்லை; நுவலயாதுளதே!”

*

பாரதியாரைப் பற்றி இப்படி ஆறு இதழ்களில் ராமானுஜலு நாயுடு அவர்கள் அருமையாக எழுதியுள்ள இந்தக் கட்டுரைகள் அவர் இறந்த ஏழு ஆண்டுகளிலேயே வந்திருப்பது குறிப்பிடத் தகுந்தது.

 பாரதியார் அன்பர்கள் அவசியம் படிக்க வேண்டிய நூல் ‘சென்று போன சில நாட்கள்’

****