WRITTEN BY BRHANNAYAKI SATHYANARAYANAN

Post No. 8908

Date uploaded in London – –9 NOVEMBER 2020   

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

9-11-2020 அன்று லண்டனிலிருந்து ஒளிபரப்பப்பட்ட ஞானமயம் நிகழ்ச்சியில் இடம் பெற்ற உரை!

VISIT FACEBOOK.COM/GNANAMAYAM FOR VOICE RECORDING

ஆலயம் அறிவோம்!

வழங்குவது பிரஹன்நாயகி சத்ய நாராயணன்.

ஆலயம் அறிவோம் தொடரில் இன்று நமது யாத்திரையில் இடம் பெறும் தலம் 12 ஜோதிர்லிங்க ஸ்தலங்களில் மிகப் பழமையான ஒன்றான

ஸ்ரீ சைலம் தலமாகும்.

இந்தத் திருத்தலம் ஆந்திர மாநிலத்தில் கர்நூல் மாவட்டத்தில் உள்ள நல்லமலை என்ற குன்றில் அமைந்த்துள்ள திருத்தலம் ஆகும். கிருஷ்ணா நதி தீரத்தில் அழகிய குன்றில் அமைந்துள்ள இது ஹைதராபாத்திலிருந்து சுமார் 230 கிலோமீட்டர் தூரத்தில் உள்ளது. தேவார  மூவர் முதலிகளான திருஞானசம்பந்தர், திருநாவுக்கரசர், சுந்தரர் ஆகிய மூவராலும் பாடப்பட்ட திருத்தலமாகும் இது. திருப்பருப்பதம் என்ற பெயரைக் கொண்டது இது.

இங்கு மல்லிகார்ஜுனர் ஆலயம் அமைந்துள்ளது. அத்துடன் இங்குள்ள பிரமராம்பிகை சந்நிதி 51 சக்தி பீடங்களில் ஒன்றாகும். அத்துடன் 18 மஹா சக்தி பீடங்களில் ஒன்றாகவும் இது இலங்குகிறது.

மஹாபாரதத்திலும் பல புராணங்களிலும் இது குறிப்பிடப்படுவதால் இது மிக மிகப் பழங்காலத்திலேயே தோன்றியது என்பதை அறிய முடிகிறது.

பஞ்ச பாண்டவர்கள் வனவாச காலத்தில் இரு முறை இங்கு வந்ததாக புராணம் மூலம் அறிகிறோம்.

நான்கு புறமும் நான்கு கோபுரங்களைக் கொண்ட கோவிலில் மேற்கு நோக்கிய கோபுரம் மல்லிகார்ஜுன கோபுரம் என்ற பெயரைக் கொண்டுள்ளது. கிழக்கு கோபுரம் கிருஷ்ணதேவராயரின் பெயரால் அழைக்கப்படுகிறது. வடக்கு கோபுரத்தை 1677இல் சத்ரபதி சிவாஜி கட்டினார்; அவர் பெயரால் இந்த கோபுரம் அழைக்கப்படுகிறது. அம்பிகையை வணங்கி அவரிடமிருந்து பெற்ற வாளால் எதிரிகளை அழித்து ஹிந்து சாம்ராஜ்யத்தை அவர் நிறுவினார். இவர் கட்டிய கோபுரமே வடக்கு கோபுரம்.

கிழக்கு வாயிலில் நுழைந்தவுடன் கொடிக்கம்பமும் மண்டபமும் உள்ளன. அதை அடுத்து நந்தி மண்டபம் உள்ளது. இந்தியக் கோவில்களில் மிகப் பெரிய நந்திகளில் ஒன்றான இந்த நந்தியின் கொம்புகள் வழியே மல்லிகார்ஜுனரைத் தரிசிப்பது பெரும் பேறாகக் கருதப்படுகிறது.

அன்னை பிரமராம்பாள் கிழக்குப் பார்த்து கோயில் கொண்டு அருள் பாலித்து வருகிறாள். பிரமராம்பா பீடம் என்று அழைக்கப்படும் இந்த சக்தி பீடத்திற்கு தொன்று தொட்டு ஆயிரமாயிரம் பக்தர்கள் வந்த வண்ணம் உள்ளனர்.

கோவிலின் வெளி பிரகாரத்தில் திரிபலா எனப்படும் மூன்று மரங்கள் உள்ளன. மேதி, ரவி, ஜீவி ஆகிய மூன்று மரங்களை இங்கு காணலாம். இந்த அதிசய மரத்தின் அடியில் அமர்ந்து தத்தாத்ரேயர் தவம் புரிந்தததால் இது தத்தாத்ரேய விருட்சம் என்றே அழைக்கப்படுகிறது.

இந்த தலத்தில் தான் ஆதி சங்கரர் சிவானந்த லஹரியை இயற்றி அருளினார் என்ப்தை வரலாற்றின் மூலம் அறிகிறோம். பால்தாரா, பஞ்சதாரா என்ற இரு நீரூற்றுகளின் அருகே அவர் தவம் புரிந்து வந்தார்.

பல்வேறு அழகிய சிற்பங்கள் நிறைந்துள்ள இந்தக் கோவிலில் பார்வதி திருமணம், அர்ஜுனன் தவம், சந்திரவதி கதை, மார்கண்டேயன் கதை, தட்ச யாகம், சிவ தாண்டவம், கஜாசுர சம்ஹாரம், சிபி சக்ரவர்த்தியின் கதை உள்ளிட்டவற்றைச் சித்தரிக்கும் சிற்பங்கள் பார்ப்போரை பிரமிக்க வைப்பவையாகும்.

இந்த தலத்தில் நந்திகேசர் அருள் பெற்றதைப் பற்றிய சுவையான வரலாறு ஒன்று உண்டு.

நீண்டகாலம் மகப்பேறில்லாத சிலாதர் என்ற மஹரிஷி ஈசனை வேண்டி  நெடுங்காலம் கடும் தவம் இயற்றினார். சிவபிரான் அவர் முன் தோன்றி அவருக்கு இரு மகன்கள் பிறக்குமாறு ஆசீர்வதித்தார். இறைவன் அருளால் நந்திகேசனும் பர்வதன் என்ற மகனும் பிறந்தனர்.

ஒருமுறை சனகாதி முனிவர்கள் சிலாதரின் ஆசிரமத்திற்கு வந்தனர்.  நந்திகேசன் அவர்கள் காலில் விழுந்து வணங்கினார். நந்திகேசனை ஆசீர்வதிக்க ரிஷிகள் தங்கள் கரங்களை உயர்த்த முயன்று அப்படியே நிறுத்திக் கொண்டனர்.

இதனால் திகைத்த சிலாதர் காரணம் என்ன என்று அவர்களை வினவ, அவர்கள், ‘தங்கள் மகனின் ஆயுட்காலம் முடியவிருக்கிறது, அதனால் எங்களால் ஆசீர்வதிக்க முடியவில்லை’ என்று பதில் கூறினர்.

இதனால் வருந்திய சிலாதரை நோக்கி நந்திகேசர், “தந்தையே வருந்த வேண்டாம்; தவம் செய்து சிரஞ்சீவித்வம் அடைவேன்” என்று உறுதி கூறித் தவம் செய்யப் புறப்பட்டார். நந்திகேசரின் கடும் தவத்தால் மகிழ்ந்த சிவபிரான், “நந்திகேசன் தேவ கணங்களின் தலைவனாக ஆகட்டும்; அத்துடன் எனது வாகனமாகவும் ஆகக் கடவன்” என்று ஆசீர்வதித்தார்.

நந்திகேசன், சிவபெருமானைச் சுமக்கும் ஆற்றல் பெற்ற தலம் இதுவே.

எட்டு சிகரங்கள், ஒன்பது  கோவில்கள், ஒன்பது நந்திகள் கொண்டுள்ள ஜோதிர்லங்க ஸ்தலம் இது ஒன்று தான்!

கரவு இலா மனத்தர் ஆகி, கை தொழுவார்கட்கு  என்றும்,

இரவில் நின்று எரி அது ஆடி இன் அருள் செய்யும் எந்தை,

மருவலார் புரங்கள் மூன்றும் மாட்டிய வகையர் ஆகிப்

பரவுவார்க்கு, அருள்கள் செய்து, பருப்பதம் நோக்கினாரே

        என்று அப்பர் பிரான் இங்கு எழுந்தருளியுள்ள சிவபிரானைப் பாடிப் போற்றுகிறார். சுந்தரரோ, ‘சிவனைப் பாடிப் பரவும் தமிழ்மாலைகள் சொல்ல வல்லார் உயர் வானகம் ஆண்டு அங்கு இருப்பார்’ எனக் கூறி சொர்க்கப் பேறு கிடைப்பதை உறுதி செய்கிறார்.

காலம் காலமாக பல லட்சம் பக்தர்கள் பயபக்தியுடன் வணங்கி வரும் மல்லிகார்ஜுனரும் தேவியும் அனைவருக்கும் சர்வ மங்களத்தை தர ஞானமயம் சார்பில் பிரார்த்திக்கிறோம்.   

நன்றி. வணக்கம்.

tags –  ஸ்ரீ சைலம்,   ஆலயம் அறிவோம்.

மஹரிஷி அக்னிபர் – ஐந்து கந்தர்வ மங்கைகளைக் கவர்ந்தவர்!

ச.நாகராஜன்

கந்தர்வ உலகில் சுக சங்கீதி, சுசீலன், ஸ்வரபேதி, சந்திரகாந்தன்,சுப்ரபன்  என்று ஐந்து கந்தர்வர்கள் இருந்தனர். அவர்களுக்கு முறையே ப்ரமோகினி, சுசீலை, சுஸ்வரை, சுதாரை, சந்திரிகை ஆகிய அழகிய பெண்கள் இருந்தனர்.

கந்தர்வ மங்கையர் என்பதால் அவர்களின் அழகு சுடர் விட்டுப் பிரகாசித்தது.

நிலவு போன்ற தேக காந்தியும், சந்திரனைப் போன்ற அழகிய முகமும், பார்ப்பவர்கள் மனதைக் கவரத்தக்கபடி அழகே ஒரு உருவம் எடுத்து வந்தது போன்ற அவர்களைக் கண்டால் யாருக்குத் தான் பிடிக்காது?

இந்த இயற்கை அழகோடு சர்வ ஆபரணங்களினால் அலங்காரம் செய்து கொண்டும், மிகுந்த சங்கீத ஞானத்தைக் கொண்டும் நானாவித லீலைகளைச் செய்து கொண்டும் அவர்கள் ஐவரும் குபேரனுடைய தோட்டத்தில் உல்லாசமாக இருந்து வந்தனர்.

ஒரு சமயம் வைகாசி மாதத்தில் பூலோகம் நோக்கி அவர்கள் ஐவரும் வந்தனர். நர்மதை நதி தீரத்தை அடைந்த அவர்கள் பார்வதி தேவியை பூஜிப்பதற்காக அங்கிருந்த நந்தவனத்திலிருந்து பலவித  மலர்களைப் பறித்துக் கொண்டு, ஸ்நானம் செய்தனர். லோகமாதாவை சந்தனம், புஷ்பம் ஆகியவற்றால் மிகுந்த பக்தியுடன் பூஜித்தனர். பின்னர் பாடல்களைப் பாடியும் நடனம் ஆடியும் மகிழ்ச்சியுடன் இருந்தனர்.

அப்போது அந்த நதி தீரத்திற்கு மாத்யான்ஹ சந்தி ஜெபம் செய்ய ஒரு பிரம்மசாரி வந்தார். அழகிய மேனி கொண்ட அவரது விசாலமான கண்கள், அகன்ற மார்பு, முழங்கால் வரை நீண்ட கைகளுடன், மான் தோல், தண்டம், இடுப்பில் தர்ப்பை ஆகியவற்றுடன் இருந்த அவரது யௌவன ஸ்வரூபத்தைக் கண்ட அந்த ஐந்து மங்கையரும் வேடனால் அடிக்கப்பட்ட மான்கள் போல மன்மத பாணத்தால் அடிக்கப்பட்டனர்.

ஐவரும் அவரைக் காம விகாரத்துடன் நோக்கினர்.

‘நமக்குத் தகுந்த ஒருவர் வந்து விட்டார்’ என்று தங்களுக்குள் பேசிக் கொண்ட அவர்கள், ‘இவர் யார்? கந்தர்வரா, கின்னரரா, சித்தரா அல்லது இஷ்டம் போல உருவை மாற்ற வல்லவரா, ரிஷி குமாரரா’ என்று யோசிக்க ஆரம்பித்தனர்.

‘பார்வதி தேவியை பூஜித்ததன் பலனாகவே இவர் இங்கு வந்திருக்கிறார்’ என்று எண்ணிய அவர்கள் இவர் மன்மதன் போலத் தோற்றமளித்தாலும் கூட ரதி தேவி இல்லையே, ஆகவே இவரை நாம் அணுகலாம் என்று நிச்சயித்தனர்.

இவர்கள் பேசுவது அனைத்தையும் அந்த பிரம்மசாரி கேட்டுக் கொண்டிருந்தார். அவர் வேதநிதி முனிவரின் குமாரர். அவர் பெயர் அக்னிபர்.

மிகுந்த புத்திசாலியான அந்த ரிஷிகுமாரர் தனக்குள் யோசிக்க ஆரம்பித்தார்.

‘விஸ்வாமித்திரர், பராசரர், கண்டு முனிவ்ர், தேவலர் உள்ளிட்ட பல பெரிய ரிஷிகள் கூட பெண் மயக்கத்தினால் தம் வசம் இழந்து தவத்தை இழந்தனர். ஆகவே என்ன செய்தால் இவர்களின் காமவலையிலிருந்து தப்பிக்கலாம்’ – இப்படி எண்ணமிட்ட அக்னிபர் அவர்கள் தம்மை அணுகுமுன் தாம் வீட்டிற்குச் செல்வதே சரி என்ற முடிவுக்கு வந்தார். தனது யோகபலத்தால் தன் உருவை மறைத்துக் கொண்டு வீடு போய் சேர்ந்தார்.

கந்தர்வ மங்கையர் ஐவரும் இந்த அற்புதத்தைக் கண்டு திகைத்தனர்.

“இவர் இந்திரஜாலம் அறிந்த மாயக்காரரோ’ என்று புலம்பினர். மறுநாள் எப்படியும் நதி தீரம் வந்து தானே ஆக வேண்டும் என்று எண்ணிய அவர்கள் ஐவரும் அந்த இரவை அங்கேயே கழித்தனர்.

மறுநாள் காலை சூரியோதயம் சமயம் ஸ்நானம் செய்ய வழக்கம் போல அக்னிபர் அங்கே வந்தார்.

“ஏ! காதலரே! எம்மை ஏமாற்றி விட்டு நேற்று சென்று விட்டீர். இன்று அப்படி முடியாது” என்று கூறியவாறே ஒடிச் சென்று அவரைத் தழுவிக் கொண்டனர்.

அக்னிபர், “நீங்கள் சொல்வது எனக்கு அநுகூலமாகவே இருக்கிறது. ஆனால் நான் இப்போது குருகுலவாசத்தில் வித்யாப்யாசம் செய்து வருகிறேன். ஆகவே விதிகளுக்கு மாறாக பெண்களுடன் உடலுறவு கொள்வது தகாது. இது ப்ரம்மசரிய விரதத்திற்கு பங்கமாகி விடும்” என்றார்.

கந்தர்வ மங்கையரோ அவரைப் பலவாறாக நிர்ப்பந்திக்க ஆரம்பித்தனர். தங்களை காந்தர்வ விவாஹம் செய்து கொள்ளலாம் என்று அவர்கள் கூறினர்.

அக்னிபர், “குருவின் அனுமதியின்றி என்னால் ஒன்றும் செய்ய முடியாது” என்று கூறினார்.

அதற்கு அவர்கள், ‘நீர் ஒரு ஒரு முட்டாள் என்பதில் சந்தேகமே இல்லை. ஏனெனில் ஒரு புத்திமானானவன் வலுவில் வரும் உத்தம அழகியை தள்ளவே மாட்டான். அதை தர்மசாஸ்திரமும் ஆமோதிக்கிறது. உத்தமமான பெண்ணாக இருந்தால் அவளை ஏற்றுக் கொள் என்று தர்மசாஸ்திரம் கூறுகிறது.

நாங்களோ தேவ லோகத்துப் பெண்கள். நீர் அரிய தவம் செய்தாலும் கூட எங்களைப் போன்ற தெய்வீக மங்கையர் உமக்குக் கிடைப்பது அரிது! இருந்தாலும் எம்மை நீர் விலக்கினால் பிரம்மா படைத்த உமது புத்தியைப் பற்றி  என்ன தான் சொல்வது?!” என்றனர்.

அக்னிபர், “ ஒ! மான் போன்ற விழிகளைக் கொண்ட மங்கையரே! தர்மத்தையே செல்வமாகக் கொண்டவர்கள் அதை எப்படிக் கைவிட முடியும்? தர்மம், அர்த்தம், காமம், மோக்ஷம் ஆகிய நான்கு புருஷார்த்தங்களையும் சாஸ்திரவிதிப்படி கடைப்பிடித்தால் தான் அது பலனைக் கொடுக்கும். ஆகவே இந்த நேரம் கெட்ட நேரத்தில் – அகாலத்தில் – ஒரு போதும் உங்களை பாணிகிரஹனம் செய்து கொள்ள மாட்டேன்” என்று உறுதிபடக் கூறினார்.

முனிகுமாரரின் திடமான பதிலைக் கேட்ட அவர்கள், அவரை விடவில்லை.

காமவெறி அதிகமானதால் அவரைக் கட்டிப் பிடித்து ஆலிங்கனம் செய்தனர். இன்னும் காம லீலைகளை ஆரம்பித்தனர்.

ஆனால் அக்னிபர் கொஞ்சமேனும் தன் உறுதியிலிருந்து தளரவில்லை. அவர்கள் மீது அவர் கோபம் கொண்டார்.

“நீங்கள் ஐந்து பேரும் பிசாசுகளாக மாறக் கடவீர்” என்று ஒரு சாபத்தைக் கொடுத்தார்.

இதனால் மிகவும் சோகமடைந்த அந்த ஐந்து கந்தர்வ மங்கையரும், “குற்றமற்ற எங்களுக்கு இப்படி ஒரு சாபம் கொடுக்கலாமா? உமக்கு அநுகூலம் செய்ய வந்தோம். எமக்குக் கெடுதி செய்து விட்டீர். நீர் தர்மநாசம் செய்பவர் என்பது நிச்சயமாகி விட்டது. ஆசையுள்ளவர்கள், பக்தர்கள், நண்பர்கள் ஆகியோர் விஷயத்தில் கோபம் கொண்டு தீமை இழைப்பவர்கள் இம்மையிலும் மறுமையிலும் நல்லதை அடைய மாட்டார்கள். எமக்கு இப்படி கொடிய சாபத்தைக் கொடுத்த நீரும் பிசாசாகக் கடவது” என்று பதில் சாபம் கொடுத்தனர்.

ஆக அக்னிபரும் அந்த ஐந்து கந்தர்வ மங்கையரும் பிசாசுகளாக மாறினர். அங்கும் இங்கும் அலைந்து  மிகவும் துன்பப்பட்டனர்.

சிறிது காலம் சென்றது. அப்போது லோமசர் என்ற மஹரிஷியை அவர்கள் கண்டனர். அவரைக் கண்ட அவர்கள் அவரை ஆகாரமாகப் புசிக்கலாம் என்று அவரை நெருங்கினர்.

ஆனால் அவரது தவ வலிமையினால் அவரது அருகில் கூட அவர்களால் போக முடியவில்லை.

அக்னிபர் லோமசரை பூர்வ ஜென்ம புண்ணியத்தால் வணங்கினார்.

“ஹே! முனிவரே! சாதுக்களின் சேர்க்கை மிகுந்த பாக்கியவான்களுக்கே கிடைக்கும். கங்கை முதலிய புண்ணிய தீர்த்தங்களில் ஸ்நானம் செய்வதை விட சாதுக்களின் சகவாசம் மேலானது என்பது உண்மை” என்று சொல்லி தனது பூர்வ விருத்தாந்தத்தை விவரமாக எடுத்துக் கூறி விமோசனம் வேண்டினார்.

லோமசர் அவர்கள் பால் மிகவும் பரிதாபப்பட்டார்.

அனைவரையும் நோக்கி, “நீங்கள் அனைவரும் என்னுடன் வாருங்கள். ரேவா நதியில் என்னுடன் ஸ்நானம் செய்யுங்கள். சாபம் நீங்கி சுகம் பெறுவீர்கள்” என்று கூறி அவர்களை ஆசீர்வதித்தார்.

அனைவரும் ரேவா நதியில் ஸ்நானம் செய்தவுடன் பிசாசு உருவம் நீங்கி தங்கள் அழகிய சுய உருவங்களை அடைந்தனர்.

முனி குமாரரான அக்னிபர் லோமசரின் உத்தரவின் பேரில் அந்த ஐந்து கந்தர்வ மங்கையரையும் மணந்து அவர்களுடன் சுகமாய் வாழலானார்.

இறுதியில் அனைவரும் சுவர்க்கத்தை அடைந்தனர்.

 மஹரிஷி அக்னிபரின் வரலாற்றை இப்படி பாத்ம புராணம் விரிவாகக் கூறுகிறது!

tags- மஹரிஷி, அக்னிபர்

WRITTEN BY S NAGARAJAN                     

Post No. 8902

Date uploaded in London – – –8 NOVEMBER 2020   

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

ஆயுளை குறைத்துக் கொள்ளாதீர்கள்!

ச.நாகராஜன்

‘ஜீவேம சரத சதம்’ என்பது வேதம் நமக்கு இட்டிருக்கும் கட்டளை – நூறு வயது வாழ்வோமாக!

இப்படிச் சொல்லி விட்டு அது ஒதுங்கி விடவில்லை.

100 வயது வாழ்வதற்கு என்னவெல்லாம் செய்ய வேண்டும், எதையெல்லாம் செய்யக் கூடாது என்றும் வழி காட்டி இருக்கிறது.

இந்த வேத நெறிகளை பல்வேறு நூல்கள் எளிதாகப் புரியும் வண்ணம் கூறி உள்ளன.

சுபாஷித ஸ்லோகங்கள் இந்த வகையில் பெரும் வழிகாட்டி ஸ்லோகங்களாக அமைந்துள்ளன.

ஆயுள் விருத்தியைப் பற்றி சில சுபாஷிதங்களைப் பார்ப்போம்.

சர்வலக்ஷண ஹீனோபி ய: சதாசாரவாந்தர: |

ச்ரத்யானோனசூயச்ச சதம் வர்ஷாத் ஜீவதி ||

நல்ல குணங்கள் இல்லாவிட்டாலும் கூட தனது செயலில் புண்யமான செயல்களைச் செய்து சிரத்தையுடனும் பொறாமை இல்லாமலும் இருக்கும் ஒருவன் நூறு ஆண்டுகள் வாழ்வான்.

**

பாலார்கோ யக்ஞதூம்ரச்ச பாலஸ்த்ரீ நிர்ஜரோதகம் |

ஆயுஷ்யவர்தகம் நித்யம் ராத்ரௌ க்ஷீரான்னபோஜனம் ||

உதய சூரியன், யாகத்திலிருந்து எழும் புகை, இளம் பெண், ஊற்றிலிருந்து ஊறும் தெள்ளிய நீர் ஆகியவை ஆயுளை நீடிக்க உதவுபவை. அத்துடன் இரவில் பால் கலந்த உணவும் ஆயுளை நீடிக்கும்.

**

வ்ருத்தார்க: ப்ரேததூம்ரஸ்ச் வ்ருத்த ஸ்த்ரீ தில்லரோதகம் |

ஆயுஷ்ய நாசகம் நித்யம் ராத்ரௌ தத்யன்ன போஜனம் ||

நடுப்பகலில் உள்ள சூரியன், எரியும் சிதையிலிருந்து எழும் புகை, வயதான ஸ்த்ரீ, சேற்றிலிருந்து எடுக்கப்பட்ட நீர் ஆகிய அனைத்தும் ஆயுளைக் குறைப்பவையாகும். அத்துடன் இரவில் தயிர் சாதம் சாப்பிடுவதும் ஆயுளைக் குறைக்கும்.

**

தீபநிர்வாணகந்தம் ச சஹ்ருத்வாக்யமருந்ததீம் |

ந ஜிக்னந்தினி ந ச்ருண்வந்தி ந பச்யந்தி கதாயுஷ: ||

 அணைக்கப்பட்ட தீபத்திருந்து எழும் நாற்றம், நண்பனின் புத்திமதி, அருந்ததி நட்சத்திரம்  ஆகியவை முகரப்பட்டதில்லை, கேட்கப்பட்டதில்லை, பார்க்கப்பட்டதில்லை – குறைந்த ஆயுளை உடையவனால்!

**

வேதோக்த ஆசீர்வாதம் அனைவரையும் நல்ல முறையில் வாழ்த்துகிறது இப்படி:

சர்வே பவந்து சுகின: சர்வே சந்து நிராமயா: |

சர்வே பத்ராணி பச்யந்து மா கஸ்சித் துக்க பாக்பவேத் ||

அனைவரும் சந்தோஷத்துடன் இருக்கட்டும்.

அனைவரும் வியாதிகள் இல்லாமல் இருக்கட்டும்.

அனைவரும் தங்களைச் சுற்றி நல்லனவற்றையே பார்க்கட்டும்.

அனைவரும் ஒரு போதும் துக்கம் அடையாமல் இருக்கட்டும்.

வேத பிரார்த்தனையைச் செய்வோம்; அனைவரும் சுகமாக இருக்கட்டும்.

*

எல்லோரும் இன்புற்றிருக்க நினைப்பதுவே அல்லாமல்

வேறொன்றறியேன் பராபரமே – தாயுமானவர்

tags -ஆயுள் 

***