WRITTEN BY S NAGARAJAN

Post No. 10,008

Date uploaded in London –  23 AUGUST  2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

தள்ளாடும் தமிழகம்!

ச.நாகராஜன்

1  

தமிழகமே தள்ளாடுகிறது! ஆம், ஏராளமான ‘குடி மகன்களால்’ அது தள்ளாட்டம் போடுகிறது. சிந்திக்கும் திறனின்றி குடி நிறையப் பேரை ஆட்டிப் படைப்பதனால் அது தள்ளாடுவதில் வியப்பே இல்லை. தந்தையை விஞ்சிய விதத்தில் செயல்படும் மகனைப் பார்க்கவே வியப்பாக இருக்கிறது.

திராவிட முன்னேற்றக் கழகத்தின் “சாதனைகளில்” எதை முதல் சாதனையாக் முன் நிறுத்துவது என்பதில் அறிஞர் பெருமக்களுக்குள் ஒரே குழப்பம் என்பது உண்மை தான்! அத்துணை “சாதனைகள்!”

தாய்க்குலத்தோர் தவிக்க சம்பாதித்த அனைத்தையும் இழந்து தடுமாறும் எண்ணற்ற “குடி மகன்களுக்க்காக” இறைவனை பிரார்த்திப்போமாக!

போதையிலிருந்து விடுபட்டால் பாதை தடுமாறிய இவர்கள் வேதனை நீங்கி நல்வழிக்கு வரட்டும்!

2

அடுத்த சாதனை ஒவ்வொரு தமிழனையும் “கடன்காரனாக்கிய” சாதனை இன்னும் பெரிதோ?! தந்தை இலவச டிவியை வழங்கி அதன் மூலம் அதைப் பார்ப்பதற்கான விண்வழி இணைப்புகளுக்கு காசு வாங்கித் தன் குடும்பத்தைச் செழிக்க வைத்த உத்தி “சிறப்பானது” தான்!

இன்று ஒவ்வொருவனும் கடன்காரனாகித் தவிக்கும் நிலையை டபிள் வாட்ச் காரர் வெள்ளையறிக்கை மூலம் சுட்டிக் காட்டி சாதனை படைக்க உடனே ஒரு நல்ல தமிழர், ‘அய்யா நகைக் கடன் தள்ளுபடியால் வரும் தொகை இவ்வளவு, விவசாயக் கடன் தள்ளுபடியால் வரும் தொகை இவ்வளவு, பெண்களுக்கு மாதம் ஆயிரம் ரூபாய் தருவதால் வரும் தொகை இவ்வளவு, பஸ் இலவசப் பயணத்தால் வரும் தொகை இவ்வளவு’ என்று ஒரு நீண்ட கணக்கை விரைவாகப் போட்டு வெள்ளை போர்டில் அனைத்தையும் கூட்டி “அடடே! இது கடன் தொகையை விட அதிகமாகி விட்டதே! எங்களுக்கு இவ்வளவும் வேண்டாம், நீங்களே வைத்துக் கொண்டு கடன் தீர்ந்து விட்டது என்று பத்திரம் தந்து விடுங்கள் என்று பத்திரமாகச் சொல்லி விட்டார்.

இப்படிப்பட்ட புத்திசாலிகள் வேண்டாம் என்று தானே முதலில் சொன்னது போல குடிகாரக் கடைகளைத் திறந்து வைத்தோம், இவன் ஏன் அங்கு போகவில்லை என்று அவர்(கள்) கோபப்பட்டால் அதில் நியாயமே இல்லை!

3

அடுத்து ஒன்றியக் குழப்பத்தை திமுக முன் வைக்க, மத்திய வார்த்தையில் நிலையாக இருக்கும் நண்பர் “Take your seat” என்றால் நாற்காலியைக் கையில் எடுத்துக் கொள்வது என்பது அர்த்தம் இல்லை, நண்பரே. உட்காருவது தான் என்று சொல்ல, ஆங்கிலம் தெரியாத நிலையைக் கொண்ட அனைவரையும் மக்கள் இனம் காண முடிந்தது.

4

இரு வாரங்களுக்கு ஒரு குழப்பம் வைத்தால் தங்களின் மொத்த (505) வாக்குறுதியையும் மறந்து ஐந்து ஐம்பத்திரண்டு வாரங்களையும் கடந்து விடலாம் என்ற நிலையில் அடுத்ததாக கடவுள் மேலேயே கையை வைக்கும் விதமாக அர்ச்சனைக் குழப்பம்!

இதில் அறிஞர்களும் நல்லோரும் ஆவேசமாய்ப் பல கேள்விகளை வைத்துள்ளனர்.

இறைவனோ அல்லது பக்தர்களோ இதைக் கேட்டார்களா?

கடவுள் இல்லை இல்லவே இல்லை என்ற ஈவெராவின் சிலை முன்னே அர்ச்சகர் ஆணை கிடைத்தவர்கள் போஸ் கொடுத்து போட்டோ எடுத்துக் கொண்டதிலிருந்தே இவர்கள் நாத்திகம் பேசி நாத்தழும்பேறியவர்களே தவிர நாவார தேவாரம் பாடும் கோஷ்டி இல்லை என்பதை அனைவரும் உணர்ந்து விட்டனர்.

இவர்களுக்கு ஆகம சிலபஸை யார் தந்தது? யார் தேர்வு வைத்தது? எவர் திருத்தினர்? எப்படி சர்டிபிகேட் வழங்கப்பட்டது? கேள்விகள் கணைகளாக வருகின்றன!

பிராமண – பிராமணர் அல்லாதவருக்கு இடையே ஒரு சண்டையையும் பிளவையும் ஏற்படுத்தும் முயற்சியும் கேள்விகளால் துவண்டு விட்டது.

40000 கோவில்களில் ஐந்து சதவிகிதமோ அல்லது அதிக பட்சமாக பத்து சதவிகிதமோ தான் பிராமண அர்ச்சகர்கள்! ஆகவே இதர கோவில்களில் ஆங்காங்கு உள்ள சம்பிரதாயப்படி பிராமணர் அல்லாதாரே முறைப்படி வழிபாடுகளை நடத்தி வருகின்றனர்.

இது ஒரு புறமிருக்க மசூதிகளில் தமிழில் வழிபாடு நடத்தக் கோராத தமிழக அரசு, சர்ச்சுகளில் (AMEN) ஆமெனைக் கூட தமிழில் சொல்ல வேண்டுமென்று சொல்ல முன் வராத தமிழக அரசு ஹிந்துக் கோவில்களை மட்டும் குறி பார்த்து வழிபாடுகளை பக்தர்களின் இஷ்டப்படி நடத்த விடாமல் செய்ய ஆரம்ப முயற்சிகளை மேற்கொள்வது ஹிந்து மதத்திற்கே ஆபத்தானது என்று பக்தர்கள் கூறுகின்றனர்.

அத்துடன் கடவுள் நம்பிக்கை இல்லாத அர்ச்சகர்கள் கோவிலில் நுழைவது ஏன், இதற்குப் பின்னர் உள்ள சதித்திட்டம் என்ன என்று கேட்கின்றனர்.

40000 ஏக்கர் கோவில் நிலம் பறி போயிருக்கிறது. அங்கு பல்வேறு கட்டிடங்கள் எழுந்துள்ளன.

சில ஏக்கர் நிலங்களை மீட்டு விட்டோம் என்று கூறும் தமிழக அரசு அது யார்  வசம் இது வரை இருந்தது, ஏன், எப்படி இருந்தது என்று தெரிவிக்க வேண்டும் என்று பக்தர்கள் கோருகின்றனர். இதுவரை நஷ்டத்தை ஏற்படுத்திய அவர்களிடமிருந்து கோவிலுக்குச் சேர வேண்டிய தொகை வசூலிக்கப்பட்டதா என்றும் கேட்கின்றனர்.

எல்லாவற்றிற்கும் மேலாக முத்தாய்ப்பானதும் முதலாவதுமான ஒரு விஷயம் இருக்கிறது.

இப்படிப்பட்ட அரசு ஆணை சுப்ரீம் கோர்ட் அளித்த தீர்ப்பிற்கு எதிரானது என்பது தான்!

இது contempt of the court ஆகுமா? அரசு ஆணை செல்லத்தக்கது அல்ல என்று சுப்ரம்ண்யம் சுவாமி போன்ற மூத்த அறிவாளிகள் கூறுகின்றனர்.

ஆக நீதிக்குப் புறம்பானது, தர்மத்திற்குப் புறம்பானது, பழக்க வழக்க சம்பிரதாயங்களுக்குப் புறம்பானது, ஜாதி கலவரங்களை ஏற்படுத்தக் கூடியது, கோவில் சொத்துக்களுக்கும் நிலங்களுக்கும் நகை, சிலைகள் உள்ளனவற்றிற்கும் ஆபத்தை விளைவிப்பது, தாங்கள் அளித்த வாக்குறுதிகளைப் பற்றி மக்கள் தங்களைப் பல கேள்விகள் கேட்காமல் திசி திருப்புவது உள்ளிட்ட பல காரணங்களுக்காக இந்தச் சட்டம் தவறானதாகும்! இது தனது அதர்மச் சுமையால் சுமை அழுத்தம் தாங்காது தானே விழுந்து விடும்!

It will fall on its own deadweight!

இறுதியாக திருமூலரின் எச்சரிக்கை ஒன்றையும் கூறி இந்தக் கட்டுரையை  முடிக்கலாம்:-

முன்னவனார் கோயில் பூசைகள் முட்டிடின்

மன்னவர்க்குத் தீங்குள வாரி வளம் குன்றும்

கன்னங் களவு மிகுத்திடும் காசினி

என்னரு நந்தி எடுதுரைத் தானே (திருமந்திரம் இரண்டாம் தந்திரம் – திருக்கோயிலிழிவு அதிகாரத்தில் -பாடல் எண் 518)

***

INDEX

திமுக ஆட்சி, குடித்தல் அதிகரிப்பு, கடன் சுமையும் இலவசங்களும் அதிகரிப்பு, ஒன்றியம் உள்ளிட்ட வார்த்தைக் குழப்பம், வழிபாடு மாறுதல்கள், அறிஞர்களின் ஆதங்கமும், கேள்விகளும்,

திருமூலர் திருமந்திரத்தில் எச்சரிக்கை

TAGS- திருமூலர் ,எச்சரிக்கை, திமுக ஆட்சி ,தள்ளாடும் ,தமிழகம்,

WRITTEN BY BRHANNAYAKI SATHYANARAYANAN

Post No. 10,007

Date uploaded in London – –   23 AUGUST  2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

லண்டனிலிருந்து ஞாயிறுதோறும் இந்திய நேரம் மாலை 6.30க்கு ஒளிபரப்பாகும் தமிழ்முழக்கம் நிகழ்ச்சியில் 22-8-2021 அன்று ஒளிபரப்பான உரை!

திருவள்ளூர் திருத்தலம்!

திங்கள் அப்பு வான் எரிகாலாகித் திசைமுகனார்

தங்கள் அப்பன் சாமியப்பன் பாகத்திருந்த வண்டுண்

தொங்கல் அப்பு நீள் முடியான் சூழ் கடல் சூட நின்ற

எங்கள் அப்பன் எம்பெருமான் எவ்வுள் கிடந்தானே!

திருமங்கை ஆழ்வார் திருவடிகளே சரணம்!

ஆலயம் அறிவோம்! வழங்குவது பிரஹன்நாயகி சத்யநாராயணன்.

ஆலயம் அறிவோம் தொடரில் இன்று நமது யாத்திரையில் இடம் பெறுவது 108 வைணவ திவ்ய க்ஷேத்திரங்களுள் ஒன்றாக அமைவதும் புண்யாவர்த்த க்ஷேத்திரமாகக் கொண்டாடப்படுவதுமான தொண்டை நாட்டுத் தலமான திருவள்ளூர் என்று இப்போது அழைக்கப்படும் திருஎவ்வுளூர் திருத்தலமாகும். இந்தத் தலமானது சென்னையிலிருந்து மேற்கே 40 கிலோமீட்டர் தொலைவில் அமைந்துள்ளது.

பெருமாள் திருநாமம் : திரு எவ்வுள்கிடந்தான் என்கிற  ஸ்ரீ வீ ரராகவப் பெருமாள்; தாயார் திருநாமம் : வஸுமதி தாயார் என்கிற கனகவல்லித் தாயார்    வனம் : வீ க்ஷாரண்யம்;  தீர்த்தம் : ஹ்ருத் தாப நாசினி தீர்த்தம்;

விமானம் : விஜய கோடி விமானம்

மிகவும் புராதனமான இந்தத் தலத்தின் விசேஷ மஹிமையை மார்க்கண்டேய புராணம் விரிவாகக் கூறுகிறது.

முன்னொரு காலத்தில் அசுர குலத்தில் உதித்த மது, கைடபன் ஆகிய இரு ராக்ஷஸர்களை வதம் செய்ய மஹாவிஷ்ணு அவர்களுடன் கோர யுத்தம் ஒன்றைச் செய்தார், அவர்கள் மீது தனது சுதர்ஸன சக்கரத்தை ஏவினார். அப்போது அந்த அசுரர்கள் பயந்து ஓடி வந்து இந்தத் தலத்தில் ஒளிந்தார்கள். மஹாவிஷ்ணு விமானத்திலிருந்து அவர்களை வதம் செய்தார். ஆகவே இங்கிருக்கும் விமானத்திற்கு  ஸ்ரீ விஜயகோடி விமானம் என்ற பெயர் ஏற்பட்டது.

கிருத யுகத்தில் ப்ரத்யும்ன மஹாராஜன் என்னும் ஒரு அரசன் புத்திரப் பேறு வேண்டி மஹாவிஷ்ணுவை நோக்கித் தவம் புரிந்தான். அவனது தவத்தை மெச்சிய விஷ்ணு பகவான் அவன் முன்னே தை அமாவாசை தினத்தன்று தோன்றி அவனுக்குக் காட்சி அளித்தார். உனக்கு என்ன வேண்டும் என்று கேள் என்று விஷ்ணு அருள் பாலித்துக் கூற, அந்த அரசன் எனக்கு புத்திரப் பேறு தருமாறு வேண்டுகிறேன் என்றும் இன்று தை அமாவாசை தினம் என்பதால் இங்குள்ள தீர்த்தம் எல்லா புண்யதீர்த்தங்களை விட அதிக மஹிமை உள்ளதாக ஆக வேண்டுமென்றும் பிரார்த்தித்தான்.

அவன் கேட்ட இரு வரங்களையும் அருளினார் மஹா விஷ்ணு.

இன்னொரு வரலாறும் இந்தத் தலத்தைப் பற்றி உண்டு. முன்னொரு காலத்தில் தர்மஸேன மஹாராஜன் என்பவனுக்கும் அவள் மனைவியான கௌதமி என்பவளுக்கும் ஒரு அழகிய பெண் குழந்தை பிறந்தது. பேரழகுடன் விளங்கிய அவள் யௌவனப் பருவத்தை அடைந்து ஒரு நாள் நந்தவனத்தில் மலர் கொய்து கொண்டிருந்தாள். அங்கு அவள் முன்னே  ஸ்ரீ வீரராகவன் ஒரு அழகிய ராஜகுமாரனாகத் தோன்றினார். அவளை மணக்க விருப்பம் தெரிவித்து வீரராகவன் அவளது தந்தையை அணுக, அவரும் சம்மதித்து உமது ஊர், பெயர், வம்சம் முதலானவற்றைக் கூற வேண்டும் என்று கூறினார்.

உமது பெண்ணை எனக்கு மணம் முடித்துக் கொடுப்பீர்கள் என்றால் காலம் காலமாக நான் இங்கேயே இருப்பேன் என்று உறுதி கூறிய வீ ரராகவர், திருமணக் கோலத்தில் வஸுமதியின் கையைப் பிடித்தவாறே  ஸ்ரீ வீரராகவன் சந்நிதியில் சென்று அந்தர்தியானமானார்.

தனக்குப் பெண்ணாக அவதரித்தவள் மஹாலக்ஷ்மியே என்பதையும் வந்து அருள் பாலித்தது மஹாவிஷ்ணுவே என்பதையும் புரிந்து கொண்ட மன்னனும் மற்றோரும் அவர்களை ஸேவித்து ஆனந்தம் அடைந்தனர். 

    அவரது திருக்கல்யாண மஹோத்ஸவ ஞாபகமாக இன்று வரை தை பூரட்டாதிக்கு பத்து நாள் முன் தொடங்கி திருக்கல்யாண உற்சவம் இங்கு நடைபெறுகிறது.

இன்னொரு வரலாறும் உண்டு. ஆதியுகத்தில புருபுண்யர் என்னும் அந்தணர் தன் மனைவியான ஸதீ என்பவளுடன் புத்திரப் பேறு வேண்டி சாலியக்ஞம் என்னும் யாகத்தைச் செய்தார். அவரது பக்தியை மெச்சிய பகவான் அவருக்கு அருள் பாலிக்க, ஒரு புத்திரர் பிறந்தார்.

சாலியக்ஞம் செய்து பிறந்ததால் அவருக்கு சாலிஹோத்ரன் என்ற பெயர் ஏற்பட்டது. பெரும் தவத்தால் ஸ்ரீசாலிஹோத்ர மஹரிஷி  என்ற பெயரைப் பெற்ற அவர் மிகுந்த தவத்தை இந்தத் தலத்தில் மேற்கொண்டார். அவரது தவத்தை மெச்சிய விஷ்ணு அவர் முன் ஒரு வயோதிக அந்தணராகத் தோன்றினார். அவர் திருப்தி உறும்படி அவருக்கு சாலிஹோத்ரர் அமுது படைத்தார்.

பூரணமாய் அமுது உண்ட அந்த அந்தணர் ‘திருப்தன் ஆனேன், நடந்து வந்த சிரமம் நீங்க படுத்துறங்க எவ்வுள்’ என்று கேட்டார்.

சாலிஹோத்ரர் தன் பர்ணசாலையைச் சுட்டிக் காட்ட அவர் தெற்கே திருமுடியை வைத்து படுக்க வானில் தேவர் அனைவரும் கூடி துந்துபி முழங்கி மலர் மாரி பொழிந்தனர்.

பகவான் அவர் முன் தோன்றி அருள் பாலித்ததோடு இன்று வரை அங்கு வரும் அனைவருக்கும் அருள் பாலித்து வருகிறார்.

சேஷ சயனத்தில் சயனித்து தனது நாபியில் தோன்றிய பிரம்மாவுக்கு ஒரு கையால் ப்ரணவத்தை உபதேசித்தும்  மற்றொரு திருக்கையால் சாலிஹோத்ர மஹரிஷியின் சிரசில் அபயப்ரதானம் செய்து கொண்டும் தெற்கே சிரசும் வடக்கே திருவடி நிலைகளையும் வைத்து அருள் பாலிக்கிறார்

ஸ்ரீவீ ரராகவப் பெருமாள்.  அனைத்து பாவங்களையும் போக்கும் அரும் தலம் இது. அத்துடன் இங்கு வந்து வழிபடுவோரின் அனைத்து வியாதிகளும் உடனே நீங்கி விடும். ஆகவே பக்தர்கள் பரவசத்துடன் வைத்ய வீரராகவன் என்று பெருமாளை அழைக்கின்றனர்.

ஒரு சமயம் தீராத வயிற்றுவலியால் அவதிப்பட்ட அருட்பிரகாச வள்ளலார் பெருமான் இங்கு வந்து வீரராகவரை திருஎவ்வுளூர் வீரராகவப் பஞ்சகம் பாடிப் போற்றினார். உடனே வயிற்று வலி நீங்கியது. இந்தத் தலத்தில் திருமங்கையாழ்வாரும் திருமழிசை ஆழ்வாரும் மங்களாசாஸனம் செய்துள்ளனர்.

காலம் காலமாக ஆயிரக்கணக்கான பக்தர்களுக்கு அருள்பாலித்து வரும்    ஸ்ரீவீ ரராகவப் பெருமாளும் வஸுமதித் தாயாரும்அனைவருக்கும் சர்வ மங்களத்தைத் தர ஞானமயம் சார்பில் பிரார்த்திக்கிறோம். 

அருள் பிரகாச வள்ளலார் அருள் வாக்கு இது:     

தண்ணமர் மதியே சாந்தந் தழைத்த சத்துவனே போற்றி                                       

வண்ண மா மணியே போற்றி மணிவண்ணத் தேவா போற்றி!                            

அண்ணலே எவ்வுள்ளூரில் அமர்ந்தருளாதி போற்றி! 

விண்ணவர் முதல்வா போற்றி! வீரராகவனே போற்றி!  

நன்றி வணக்கம்!                   

  ***

tags-  திருவள்ளூர் , வீரராகவப் பெருமாள்;ஆலயம் 

WRITTEN BY S NAGARAJAN

Post No. 10,004

Date uploaded in London –  22 AUGUST  2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

புராணத்துளிகள் மூன்றாம் பாகம்-அத்தியாயம் 12 கட்டுரை எண் 9841 வெளியான தேதி

12-7-2021

புராணத்துளிகள் : மூன்றாம் பாகம் – அத்தியாயம் 13

(41 முதல் – 45 முடிய)

ச.நாகராஜன்

41. மகாலக்ஷ்மி தோற்றம்

வைவஸ்த மனு பூர்வ ஜென்மத்தில் சுரதன் என்னும் பெயருடைய அரசனாக இருந்தான். ஒரு சமயம் அவனது பகைவன் அவனைத் தொற்கடித்தான். தனியே குதிரை மீதேறிச் சென்ற சுரதன் தீர்க்கதிருஷ்டி என்ற முனிவரது ஆசிரமத்தினுள் சென்று அவரை வணங்கினான். அவர் தேவியின் மஹிமையைப் பலவாறாகச் சொல்ல ஆரம்பித்தார். அதில் மகாலக்ஷ்மியைப் பற்றி அவர் கூறும் பகுதி இது:-

மகிஷாசுரன் சகல லோகங்களையும் சகல திக்பாலகர்களையும் வென்று ஆண்டு கொண்டிருக்கும் சமயத்தில் தேவர்கள் பிரமதேவரை அழைத்துக் கொண்டு சங்கரரும் விஷ்ணுவும் இருக்குமிடம் சென்று மகிஷாசுரனின் கொடுமைகளைக் கூறினர். அவனை வெல்லும் உபாயம் எது என்று சிந்தித்துக் கவலைப்பட, விஷ்ணுவிற்கு அதிக கோபம் உண்டாயிற்று. அதே போல ருத்ரமூர்த்திக்கும் கோபம் உண்டாயிற்று. இவ்வாறு யாவரிடத்தும் உண்டான கோபாக்னியானது ஒவ்வொரு ஓளியாக வெளி வரலாயிற்று.

அந்த ஒளிகளுள், ஆயிர சூரியப்ரகாசம் உள்ள சம்புவின் ஒளி முகமாகவும்,

யமனுடைய ஒளி தலை மயிராகவும்,

விஷ்ணுவினுடைய ஒளி கைகளாகவும்,

சந்திரனுடைய ஒளி ஸ்தன்யங்களாகவும்,

இந்திரனுடைய ஒளி இடையாகவும்,

வருணனுடைய ஒளி முழங்கால்களாகவும்,

பூதேவியினுடைய ஒளி நிதம்பமாகவும்,

பிரமனுடைய ஒளி பாதமாகவும்,

சூரியனுடைய ஒளி கால் விரல்களாகவும்,

வசுக்கள் ஒளி கை விரல்களாகவும்,

குபேரனுடைய ஒளி நாசியாகவும்,

பிரஜாபதியினுடைய ஒளி பற்களாகவும்,

அக்னியினுடைய ஒளி மூன்று நேத்ரமாகவும்,

சாத்தியர்களுடைய ஒளி இரண்டு புருவமாகவும்,

வாயுவினுடைய ஒளி இரண்டு காதுகளாகவும் ஆயின.

இவ்வாறு சகல தேவர்களுடைய தேஜோரூபங்களே ஓர் உருவாக மகிஷனை சம்ஹாரம் செய்ய மஹாதேவியானவள், மஹாலக்ஷ்மி என்னும் திருநாமத்துடன் தோன்றினாள்.

பின்னர், சிவன் சூலமும்,

விஷ்ணு சக்ரமும்,

வருணன் சங்கமும்,

அக்னி சக்தியும்,

வாயு வில்லும் பாணமும்,

இந்திரன் வஜ்ரம், ஐராவதம், கண்டாமணியும்,

யமன் காலகண்டமும்,

சூரியன் காந்திமாலையும்,

காலன் கடகமும் கவசமும்,

சமுத்திரராஜன் ஹாரம், வஸ்திரம், குண்டலம், சூடாமணி, தோள்வளை, சர்ப்பாபரணம், அட்டிகை நூபுரம் ஆகியனவற்றையும்,

விஸ்வகர்மா மோதிரமும்,

ஹிமவான் நானாவிதமான ரத்னங்களையும், சிம்மத்தையும்,

குபேரன் சுராபான பாத்திரத்தையும்,

ஆதிசேஷன் நாகஹாரமும் கொடுத்து மகிஷாசுரனைக் கொல்ல வேண்டுமென்று போற்றி வாழ்த்தினர்.

தேவி சந்தோஷித்து கர்ஜித்து மகிஷனோடு யுத்தம் செய்வதற்காக வர, அந்த அசுரன் சிக்ஷுரன், துர்த்தரன், துன்முகன், பாஷ்கலன், தாம்பிரகன், பிடாலன் முதலானவர்கள் சூழ்ந்து வர தேவியை எதிர்த்துப் போர் செய்தான்.

தேவி அவர்களையெல்லாம் நாசம் செய்து மகிஷனையும் பாசத்தினால் கட்டி கத்தியினால் சிரசை வெட்டினாள்.

அது கண்டு தேவர்கள் அனைவரும் தேவியைப் போற்றி வாழ்த்தினர்.

இவ்வாறு மகாதேவி மகிஷனைக் கொல்ல மகாலக்ஷ்மியாய்த் தோன்றினள் என்று அறிவாயாக!

    -தேவி பாகவதம் பத்தாம் ஸ்கந்தம், 12ஆம் அத்தியாயம்

42. ஒவ்வோர் இந்திரிய உணர்வினால் ஒவ்வோர் ஜீவராசி நாசமடைவதற்கு உதாரணங்கள்!

கேட்பதாலும், ஸ்பரிச உணர்வினாலும், பார்வையினாலும், நாவின் ருசியாலும், மூக்கின் நுகரும் தன்மையாலும் நாசமடைவதற்கு உதாரணங்கள் பல உள்ளன.

புல்லாங்குழலின் இசையைக் கேட்டு புள்ளிமான் மயங்கி தான் இருக்கும் இடத்தை விட்டு அசையாமல் இருக்கிறது, உடனே அது வேடனால் பிடிக்கப்படுகிறது. இது காதால் கெடுவதற்கு உதாரணமாகும்.

புணர்ச்சியை விழையும் ஆண் யானையானது பெண் யானையைப் பின் தொடர்ந்து சென்று வேட்டைக்காரர்கள் அதைப் பிடிப்பதற்காக வெட்டியுள்ள படுகுழியில் விழுந்து பிடிக்கப் படுகிறது. ஸ்பரிச இன்பத்தால் கெடுவதற்கு இது உதாரணமாகும்.

மழைக்காலத்தில் எரியும் விளக்கைக் கண்டு விட்டில் பூச்சிகள் அது கனிந்திருக்கும் பழம் என்று நினைத்து அதில் விழுந்து எரிந்து தீய்ந்து போய் கண் பார்வையை இழக்கின்றன. இது கண் பார்வையால் கெடுவதற்கு உதாரணமாகும்.

தேனீக்கள் தேன் சுவையை விரும்பி அதைத் தன் தேன் கூட்டில் சேர்த்து வைத்திருக்க, வேடர்கள் தீயால் கூட்டினைக் கொளுத்தி அவற்றை விரட்டுவதும் சாகடிப்பதுமாகச் செய்து தேனைக் கவர்ந்து செல்கின்றனர்.

இது நாவால் கெடுவதற்கு உதாரணமாகும்.

தூண்டில் முள்ளில் கோர்த்துள்ள இறைச்சியின் நாற்றத்தை விரும்பி மீனானது அந்தத் தூண்டிலில் சிக்கி தன் உயிரை இழக்கிறது. இது நாசிப்புலனால் கெடுவதற்கு உதாரணமாகும்.

இப்படி ஒவ்வொரு இந்திரியத்தாலேயே ஒவ்வோர் ஜீவராசிகள் கெடும் போது பஞ்ச இந்திரியங்களைக் கொண்ட மனிதன் அடையக் கூடிய கேடுகள் கொஞ்சமாக இராது அல்லவா?

 கருடனுக்கு நாராயணர் கூறியது – கருட புராணம்

43. சிவாலயம் எழுப்புவதால் அடையும் பலன்கள்!

நைமிசாரண்யத்தில் குழுமி இருந்த முனிவர்களைப் பார்த்து சூதர் கூறியது:- எவன் ஒருவன் சிவபெருமானுக்கு ஆலயம் எழுப்புகிறானோ அவன் தினந்தோறும் அப்பெருமானைப் பூஜித்ததால் உண்டாகும் பலனைப் பெறுகிறான். அது மட்டுமல்ல, அவன் குலத்தில் பிறந்த முன்னோர்களில் நூறு தலைமுறையினர் சிவலோகம் செல்வர். பெரிதாக இருந்தாலும் சரி, சிறியதாக இருந்தாலும் சரி, ஒருவன் மனத்தால் ஆலயம் எழுப்ப வேண்டும் என்று நினைத்தாலேயே அவன் ஏழு ஜென்மங்களில் செய்த பாவங்களிலிருந்து விடுபடுவான். அவன் ஆலயம் கட்டி முடித்தானாகில் சகலமான போகங்களையும் அடைவான்,

கருங்கற்களைக் கொண்டு ஆலயம் எழுப்புவானாகில், அக்கற்கள் ஒவ்வொன்றுக்கும் ஒவ்வோர் ஆயிரம் வருஷம் சிவ லோகத்தில் இருக்கும் பாக்கியத்தைப் பெறுவான். சிவலிங்கத்தைச் செய்பவன் சிவ லோகத்தில் அறுபதினாயிரம் வருஷம் இருப்பான். அவன் வமிசத்தவரும் சிவ லோகத்தை அடையும் பலனைப் பெறுவர்.

சிவலிங்கம் பிரதிஷ்டை செய்ய எண்ணியவன் எட்டுத் தலைமுறைக்கு இறந்த தன் முன்னோர்களைத் தன்னுடன் சிவ லோகத்தை அடையச் செய்வான். ஒருவனால் செய்ய முடியவில்லை என்றாலும், பிறர் செய்ததைக் கண்டு, நாமும் செய்திருந்தால் நற்கதி அடையலாமே என்று நினைத்தாலேயே போதும், அவன் முக்தி அடைவான்.

• சிவ புராணம் – அத்தியாயம் சிவாலயம் எழுப்புவதால்

அடையும் பலன்கள்

44. சிவனை பூஜித்து நன்மை அடைந்தவர்கள்!

பகவானை ஆராதித்து எத்தனையோ பேர் நன்மை அடைந்துள்ளனர்.

சதமகன் என்னும் அசுரன் சிவபெருமானைக் குறித்து நூறு வருஷம் கடும் தவம் செய்து அவர் அனுக்ரஹத்தால் ஆயிரம் நகரங்களை அடைந்தான்.

யாக்ஞவல்கியர் என்னும் முனிவர் பகவானை ஆராதித்து உத்தம ஞானத்தை அடைந்தார்.

வாலகில்யர் என்னும் முனிவர் பகவானி அனுக்ரஹத்தால் ஒருவராலும் வெல்ல முடியாத கருடனை வெற்றி கண்டார்.

இன்னும் எத்தனை எத்தனையோ!

–  சிவ புராணம்

45. ஹரிச்சந்திரன் சரித்திரத்தைக் கேட்பதின் பலன்!

எவன் ஒருவன் ஹரிச்சந்திர சரித்திரத்தைக் கேட்கின்றானோ, அவன் நாடோறும் சுகமே அடையப் பெறுவான். அதுமட்டுமல்ல, சுவர்க்கத்தை வேண்டியவன் சுவர்க்கத்தையும், புத்திரப் பேறு வேண்டியவன் புத்திரப் பேற்றையும், நல்ல மனைவியை வேண்டியவன் நல்ல மனைவியையும், ராஜ்யத்தை வேண்டியவன் ராஜ்யத்தையும் பெறுவான்.

இவ்வாறு சூத பகவான் நைமிசாரண்யவாசிகளிடம் கூறினார்.

-தேவி பாகவதம் ஏழாம் ஸ்கந்தம் அத்தியாயம் 27

***

INDEX

மகாலக்ஷ்மி தோற்றம்

ஒவ்வொரு புலனாலும் ஏற்படும் நாசம்

சிவாலயம் எழுப்பினால் ஏற்படும் பலன்கள்

சிவபூஜை தரும் நன்மைகள்

ஹரிச்சந்திரன் கதை

tags- மகாலக்ஷ்மி தோற்றம், சிவாலயம், சிவபூஜை