Post No. 9899

WRITTEN BY S NAGARAJAN

Date uploaded in London – 27 JULY   2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

வாரந்தோறும் திங்கள் கிழமை இந்திய நேரம் மாலை 6.30க்கு ஒளிபரப்பாகும் ஞானமயம் நிகழ்ச்சியில் 26-7-2021 அன்று ச.நாகராஜன் ஆற்றிய உரை.

எந்த நேரமும் ஞானமயம் நிகழ்ச்சிகளை யூ டியூபிலும் facebook.com/gnanamayam என்ற இணைய வழித் தொடுப்பிலும் காணலாம்.

பகவான் ஸ்ரீ ரமண மஹரிஷி! – 1

அன்பார்ந்த தமிழ் நெஞ்சங்களே, சந்தானம் நாகராஜன் வணக்கம்.

பாருக்கரிய பகவான் ரமண பதஞ்

சேரக் கிடைத்த இந்த சென்மம் போல் – யாருக்கும்

எத்தனை கோடிப் பிறவி ஏற்றாலும் வாய்ப்பரிதே

அத்தனை மாண்புள்ளதிதுவாம்.

ஸ்ரீ சாது ஓம் வாழி!

பல்லாயிரக்கணக்கான ரிஷிகளை யுகம் தோறும் பார்த்த பூமி பாரத பூமி. அவர்கள் யுகம் கடந்த நிலையான தர்மங்களை மக்களுக்கு உபதேசித்தவர்கள்.

ரிஷிகளைப் பற்றி சம கால மக்கள் நன்கு அறிந்து உணரும் வண்ணம் தோன்றி, லக்ஷக்கணக்கானோருக்கு அருள் பாலித்தவர் பகவான் ஸ்ரீ ரமண மஹரிஷி!

திருவண்ணாமலை பற்றிய புராண சம்பவங்கள் அனைவரும் அறிந்ததே. அக்னி ஸ்தலம் என்று மிகவும் போற்றித் துதிக்கப்படும் திருவண்ணாமலை உலகின் பழம்பெரும் மலை என்பதோடு அதிசய மலையும் கூட!

காலத்திற்குத் தக்கவாறு அடியார்களுக்கு அருள் புரிய சிவபிரான் உளங் கனிந்தார் போலும்; ரமண மஹரிஷியைத் தன் பால் திருவண்ணாமலைக்கு ஈர்த்து பல அருள் விளையாடல்களை அவரை வைத்து நிகழ்த்தச் செய்தார். பல்லாயிரம் மக்களை ஆன்மீகத்தில் உயர்த்த வழி வகுத்தார். திருவண்ணாமலையில் அருளாட்சி புரிந்த பகவான் ரமண மஹரிஷியின் வாழ்வு அதிசயமான ஒன்று; அன்பர்களுக்கு ஆனந்தம் தருவதும் கூட!

ரமண அவதாரம்

 அருப்புக்கோட்டைக்கு அருகில் உள்ள திருச்சுழியில் 1879ஆம் ஆண்டு டிசம்பர் 30ஆம் தேதி ஆருத்ரா தரிசன நாளன்று புனர்வசு நக்ஷத்திரத்தில் சுந்தரம் ஐயருக்கும் அழகம்மாளுக்கும் குழந்தையாக வந்துதித்தார் ரமணர். அவருக்கு வேங்கடராமன் என்று பெயரிடப்பட்டது.

மற்றவர்களைப் போலவே இருந்தாலும் கூட இள வயதிலேயே சகஜ சமாதி எனப்படும் அரிய நிலை வேங்கடராமனுக்கு இயல்பாக வாய்த்திருந்தது. ஒரு நாள் அவரது உறவினர் ஒருவர் நான் திருவண்ணாமலையிலிருந்து வருகிறேன் என்றார். திருவண்ணாமலை என்ற சொல் அவரை வெகுவாகப் ஈர்த்தது.

1896ஆம் ஆண்டு ஜூலை மாதம் ஒரு நாள் அவருக்கு மரண பயம் தோன்றியது. தொடர்ந்து, மதுரையில் அவர் இருந்த இல்லத்தில் அவருக்கு ஏற்பட்ட அனுபவத்தால், பெறுதற்கரிய ஞானத்தில், உயர் நிலையை அவர் பெற்றார். 1896ஆம் ஆண்டு ஆகஸ்ட் மாதம் 29ஆம் தேதி ரயிலில் ஏறிய அவர் திருவண்ணாமலையை அடைந்தார் 1950ஆம் ஆண்டு ஏப்ரல் 14ஆம் தேதி  சமாதி நிலையை எய்தியது வரை திருவண்ணாமலையை விட்டு வேறு ஒரு இடத்திற்கும் அவர் செல்லவில்லை.

கடுமையான தவத்தின் மூலம் சேஷாத்ரி ஸ்வாமிகள், காஞ்சி பரமாசார்யர், நாராயண குரு உள்ளிட்ட மகான்கள் வியந்து போற்றும் மஹரிஷியாக அவர் திகழந்தார். காவ்யகண்ட கணபதி சாஸ்திரி அவரை அழைத்த ரமணர் என்ற பெயரால் அவரை உலகம் அறிந்து கொண்டது.

ஏராளமானோர் அவர் அருள் நாடி வரவே ரமணாசிரமம் உருவானது.

அற்புதங்கள் ஆயிரம்!

ரமணரின் வாழ்வில் நிகழ்ந்த அற்புதங்களுக்கு எண்ணிக்கையே இல்லை; நவீன காலத்திற்கேற்றபடி பல்வேறு அன்பர்களும் அவற்றைக் குறிப்புகளாக எடுத்ததோடு புத்தகங்களாக எழுதியும் வெளியிட்டனர்; ஆகவே தான் அதிகாரபூர்வமான ஆவணங்கள் மூலம் அவை அனைத்தையும் அறிந்து பரவசப்பட முடிகிறது.

நேரத்தைக் கருதி சில சம்பவங்களை மட்டும் இங்கு பார்ப்போம். அமுதத் துளியில் எந்தப் பகுதியைச் சுவைத்தாலும் இனிக்கும் என்பது போல பகவானின் வாழ்க்கையில் நிகழ்ந்த எந்த சம்பவமும் சுவையானதே; அரிய ரகசியத்தையோ செய்தியையோ அது சொல்வதும் இயல்பானதே.

ரமணரிடம் வந்த ஃப்ராங்க் ஹம்ப்ரீஸ்

 நூற்றுக் கணக்கான மேலை நாட்டோர் திருவண்ணாமலை வந்து ரமணரை தரிசனம் செய்து பயன் பெற்றனர்; தங்கள் அனுபவங்களைப் பல்வேறு நூல்களில் பதிவு செய்துள்ளனர்.

முதன் முதலாக வந்தவர் பிரிட்டனைச் சேர்ந்த ஃப்ராங்க் ஹம்ப்ரீஸ் என்பவர். அவர் 1911ஆம் ஆண்டு ஜனவரி மாதம் அஸிஸ்டண்ட் சூபரிடெண்டெண்டாக பம்பாய்க்கு வந்தார். பம்பாய் வரும் போதே அவரது உடல் நிலை மோசமானது. ஆஸ்பத்திரியில் அனுமதிக்கப்பட்ட அவர் தனது மனதை வலியிலிருந்து திருப்ப முயற்சி செய்து ஆவி உடலில் மேலெழும்பி சஞ்சரிக்க ஆரம்பித்து வெல்லூர் வரை வந்தார். அங்கு நரசிம்மய்யா என்பவரைப் பார்த்தார்.

இந்த அனுபவத்திற்குப் பிறகு ஒருவாறாக அவர் மார்ச் மாதம் உடல் நிலை தேறினார். அதே மாதம் 18ஆம் தேதி வெல்லூருக்கு அவர் வந்தார். அங்கு தான் ஆவி உடலில் பார்த்த நரசிம்மய்யாவை நேரில் கண்டு வியந்தார். மீண்டும் உடல் நிலை மோசமாகவே ஊட்டிக்குச் சென்ற அவர் அதீதமான தனது அனுபவங்களை நரசிம்மய்யாவிற்குக் கடிதம் மூலம் எழுதி விளக்கம் கேட்டு வந்தார். ஏதேனும் ஒரு பெரிய மகானைச் சந்திக்க முடியுமா என்ற தனது ஆவலைக் கடிதம் மூலம் தெரிவித்த அவர் வெல்லூர் வந்த போது தன் மனதில் தோன்றிய ஒரு குகையின் படத்தையும் குகை வாயிலில் நிற்கும் மகானின் படத்தையும் வரைந்து நரசிம்மய்யாவிற்குக் காட்டினார். அந்த மகான் தான் ரமணர்.

இப்படி எங்கேயோ பிறந்து எங்கேயோ வளர்ந்த பல அயல் நாட்டினருக்கும் அருள் பாலித்து அவர்களைத் தன் பக்கம் ஈர்த்தவர் ரமணர்.

உலகின் மிகப் பெரும் எழுத்தாளரான பால் பிரண்டன் (Paul Brunton) ரமணரைச் சரண் அடைந்த சம்பவம் சுவையான ஒன்று. காஞ்சி மஹாபெரியவாளைச் சந்தித்த பிரண்டன் அவரைத் தனக்குக் குருவாக இருந்து வழிகாட்ட முடியுமா என்று கேட்ட போது அவர் ரமணரைத் தரிசிக்குமாறு அருளுரை புகன்றார். அதன்படி ரமணரைச் சந்தித்த பிரண்டன் தான் கேட்க விரும்பிய கேள்விகளுக்கெல்லாம் அவர் சந்நிதியில் உடனுக்குடன் தன் மனதிலேயே பதில் கிடைப்பது கண்டு வியந்தார்.

பகவான் ரமணருடனான தன் அனுபவங்களையும் ரமணரின் உபதேசங்களையும் பல நூல்களின் வாயிலாக அவர் வெளிப்படுத்தினார்.

உலகம் முழுவதும் ரமணரின் புகழ் பரவ ஆரம்பித்தது. பால் பிரண்டனின் ‘எ செர்ச் இன் சீக்ரட் இந்தியா” (A Search In Secret India) பல்லாயிரம் பிரதிகள் விற்பனையான அருமையான ஒரு புத்தகம். அனைவரும் படிக்க வேண்டிய ஒன்று.

மிகவும் பிரபலமான ஆங்கில எழுத்தாளரான சாமர்செட் மாம் (Somerset Maugham) திருவண்ணாமலைக்கு ரமணரை தரிசிக்க வந்தார். தான் கேட்க வேண்டிய கேள்விகளைக் கவனமாக குறிப்பெடுத்துக் கொண்டு அவர் சந்நிதியின் முன் அமர்ந்தார். ஒவ்வொரு கேள்வியாக அவர் மனதில் எழ அதற்கான அற்புதமான பதில் அவர் மனதிலேயே தோன்றியது. ஒரு கேள்வியையும் அவர் கேட்கவில்லை. ஹிந்து மதம் பற்றிய அவரது ‘பாயிண்ட்ஸ் ஆப் வியூ’ என்ற புத்தகம் அரிய சம்பவங்களையும் கருத்துக்களையும் கொண்ட நூலாகும்.

பகவான் ரமணரின் கருணை மழை அனைவருக்கும் பொதுவானது.

பகவானிடம் அருளாசி பெற பாரதத்தின் முதல் ராஷ்ட்ரபதி பாபு ராஜேந்திர பிரசாத் வந்தார். அருளாசி பெற்றார்.

ராஜாஜி வந்தார். மகாகவி பாரதியார் வந்தார். இன்னும் மைசூர் மஹாராஜா, பரோடா மஹாராஜா, மஹாத்மா காந்திஜியின் செயலாளரான மஹாதேவ தேசாய், பரமஹம்ஸ யோகானந்தா, நாராயண குரு, காவ்ய கண்ட கணபதி சாஸ்திரிகள், பால் பிரண்டன், சாட்விக், சாமர்செட் மாம்,திலிப் குமார் ராய் உள்ளிட்ட ஏராளமான துறவிகள், தேசியத் தலைவர்கள், பேரறிஞர்கள், எழுத்தாளர்கள், கலைஞர்கள் வந்தனர். ரமண தரிசனத்தால் பெரும் பேறு பெற்றனர்.

அனைவர் மீதும் அவரது கருணை மழை சமமாக இருந்தது.

  – தொடரும்

tags- பகவான்,  ரமண மஹரிஷி,

WRITTEN BY BRHANNAYAKI SATHYANARAYANAN

Post No. 9895

Date uploaded in London – –   26 JULY   2021          

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

லண்டனிலிருந்து ஞாயிறுதோறும் இந்திய நேரம் மாலை 6.30க்கு ஒளிபரப்பாகும் தமிழ்முழக்கம் நிகழ்ச்சியில் 25-7-2021 அன்று ஒளிபரப்பான உரை!

வசனமிகவேற்றி மறவாதே, மனது துயராற்றில் உழலாதே

இசை பயில் சடாக்ஷரமதாலே  இகபர சௌபாக்யம் அருள்வாயே

பசுபதி சிவாக்யம் உணர்வோனே பழநி  மலை வீற்றருளும் வேலா

அசுரர் கிளை வாட்டி மிக வாழ, அமரர் சிறை மீட்ட பெருமாளே!

அருணகிரிநாதர் திரு நாமம் போற்றி, போற்றி!

ஆலயம் அறிவோம்! வழங்குவது பிரஹன்நாயகி சத்யநாராயணன்.

ஆலயம் அறிவோம் தொடரில் இன்று நமது யாத்திரையில் இடம் பெறுவது முருகனின் ஆறு படைவீடுகளில் மூன்றாவது படை வீடாக அமையும் பழநி என்று அனைவராலும் அறியப்படும் திருவாவினன் குடி ஆகும். இந்தத் தலம் தமிழகத்தில், கொங்கு நாட்டில் திண்டுக்கல் மாவட்டதில் அமைந்துள்ளது. திண்டுக்கல்லிலிருந்து 57 கிலோமீட்டர் தொலைவிலும் மதுரையிலிருந்து இது 123 கிலோமீட்டர் தூரத்திலும் உள்ளது. மலையின் அடிவாரத்தில் உள்ள கோவிலின் மூலவர் குழந்தை வேலாயுதர்.

மலை மீதுள்ள கோவிலின் மூலவர் தண்டாயுதபாணி நவபாஷாண மூர்த்தி. தல விருக்ஷம் – நெல்லி மரம். தீர்த்தம் – ஷண்முக நதி.

பழனியில் முருகன் கோவில் கொண்டுள்ளதைப் பற்றிய பிரசித்தமான வரலாற்றை அனைவரும் அறிவர். ஒரு முறை மாம்பழம் ஒன்றை நாரத முனிவர் சிவபிரானிடம் அளிக்க அவருடன் இருந்த இரு குமாரர்களான விநாயகர் மற்றும் முருகனை நோக்கி அவர், “யார் உலகை முதலில் சுற்றி வருகிறாரோ அவருக்கே இந்தக் கனி” என்றார். உடனே முருகன் தன்  மயில் வாகனத்தில் ஏறி அதிவேகத்துடன் உலகை வலம் வரப் புறப்பட்டார். ஆனால் விநாயகரோ சிவபிரானையும் பார்வதி தேவியையும் வலம் வந்து “நீவீரே உலகம். உம்மை வலம் வந்து விட்டேன்” என்றார். இதனால் சிவபிரான் அவரிடம் அந்தக் கனியைத் தந்தார். உலகைச் சுற்றி விட்டு அங்கு வந்த முருகன், கனி விநாயகர் கையில் இருப்பதைக் கண்டு, வெகுண்டு அங்கிருந்து அகன்றார். பழநித் தலத்தில் தண்டாயுதபாணியாக நின்றார். பார்வதி தேவியும் சிவபிரானும் அவரை நோக்கி, “பழம் நீ அப்பா ஞானப் பழம் நீ அப்பா” என்று கூறி அவரது கோபத்தைத் தணித்து, இந்தத் தலத்தை முருகன் இருக்கும் தலமாக பெருமையுறச் செய்தனர். திரு ஆவினன் குடி என்ற பெயருக்கான காரணம் திரு – லக்ஷ்மி, ஆ – காமதேனு, இனன் – சூரியன், கு – பூமி, டி – அக்னி ஆகியோர் இந்தத் தலத்தில் வந்து வழிபட்டமையால்  இது திருவாவினன் குடி என்ற பெயரைப் பெற்றது.

சங்க இலக்கியத்தில் பொதினி என்று கூறப்படுகிறது இந்தத் தலம்.

மலையின் மீதுள்ள முருகனின் சிலையை பதினெட்டு சித்தர்களில் ஒருவரான போகர் ஸ்தாபித்தார். இந்தச் சிலை நவபாஷாணத்தால் ஆனது. சிலை காலப்போக்கில் பழமையானதை ஒட்டி இங்கு விக்ரஹ அபிஷேகம் எதுவும் செய்யப்படாமல் சந்தனப் பூச்சு மட்டும் பூசப்படுகிறது. இந்த சந்தனத்தைப் பெறுவதைப் பெரும் பாக்கியமாகக் கருதி பக்தர்கள் இதைப் பெறுகின்றனர். பழநி முருகனுக்கு பஞ்சாமிர்தம் நைவேத்யம் செய்யப்பட்டு விநியோகிக்கப்படுகிறது. இங்கு பக்தர்கள் காவடி எடுத்து முருகனை வழிபடுவது ஒரு தனிச் சிறப்பாகும்.

தைப்பூசம், பங்குனிஉத்தரம், சூர சம்ஹாரம் உள்ளிட்ட பல திருவிழாக்களில் பல்லாயிரக்கணக்கான பக்தர்கள் கலந்து கொள்கின்றனர். பழநியில் உள்ள தங்கத் தேர் மிகவும் புகழ்பெற்ற ஒன்றாகும்.

இங்கு மலை மீது போகருக்கான சமாதி உள்ளது. முருகன் சந்நிதியிலும் போகர் சந்நிதியிலும் மரகத லிங்கங்கள் உள்ளன. பழநியில் இடும்பனுக்கு ஒரு கோவில் உண்டு. இங்குள்ள சிவசக்தி மலைகளையும் இடும்பனையும் பற்றி, பழநித் தலபுராணமும் கொங்கு மண்டல சதகமும் விரிவாகக் கூறுகின்றன. சூரபன்மனுக்கு அஸ்திர சஸ்திர வித்தைகளைக் கற்றுக் கொடுத்த குரு இடும்பாசுரன்.முருகபிரான் அசுரர்களை அழித்த பின் நல்லறிவு பெற்ற அவன் தன் மனைவி இடும்பியோடு பொதியமலை வந்து,  அகத்தியப் பெருமானிடம் அடைக்கலம் புகுந்தான். அகத்தியர் அவனிடம் வடக்கே சென்று, அங்கே கேதாரத்தில் உள்ள சிவ, சக்தி ஆகிய இரு மலைகளைக் கொண்டு வந்தால் அவனுக்கு போகம், முக்தி இரண்டும் கிடைக்கும் என்று கூறி அருளினார். அகத்தியர் கூறியபடியே, இடும்பாசுரன் சிவ, சக்தி ஆகிய இரு மலைகளையும் தோள் சுமையாக, காவடியாகத் தூக்கி வந்தான். வழி தெரியாமல் இடும்பன் திருவாவினன் குடியை – பழனியை- அடைந்தான். பசி, தாகம் இரண்டும் அவனை வருத்த தன் தோளில் இருந்த சிவ,சக்தி,மலைகளைக் கீழே இறக்கி வைத்தான். பசி தாகம் நீங்கிய பின்னர் மலைகளை மீண்டும் தூக்கினான். ஆனால் மலைகள் இருந்த இடத்தை விட்டு அசையவில்லை. சந்தேகம் கொண்ட இடும்பன் மலைகளின் மீது ஏறிப் பார்த்தான். அங்கே தண்டம் தாங்கி இருந்த குமரவேல், இடும்பனை நோக்கி, “அசுரனே, இந்த மலைகளை இங்கேயே விட்டுச் செல்” என்றார். கோபம் கொண்ட இடும்பன் குமாரவேளின் மேல் பாய, நடந்த சண்டையில் இடும்பன் மாய்ந்தான்.

இதை அறிந்த இடும்பி குமரவேளைத் துதித்து அருள் வேண்டினாள்.

முருகனின் கிருபையால் இடும்பன் உயிர் பிழைத்து அவரைத் துதித்தான். தனக்குக் குற்றேவல் செய்து வருமாறு இடும்பனை முருகன் பணித்தார். ஆக இப்படிப்பட்ட ஏராளமான வரலாறுகள் பழநியைப் பற்றி உண்டு. அருணகிரிநாதர்  இந்தத் தலத்தில் முருகனை வழிபட்டு 95 திருப்புகழ் பாடல்களைப் பாடி அருளியுள்ளார். பழநியில் நெடுங்காலம் தங்கி அதன் சிறப்புக்களையும் வரலாறுகளையும் அறிந்த அவர் ‘அதிசயம் அநேகமுற்ற பழநி மலை’ என்று கூறிப் பாராட்டுகிறார். பழநி மலையை வலம் வருவது பாவத்தைப் போக்கும். மலை மீது ஏற யானைப் பாதை ஒன்றும், படிக்கட்டுகள் மீது ஏறிச் செல்லும் வழியும் உண்டு. மலை மீதுள்ள கோவிலை அடைய விஞ்ச் (Winch) வசதியும் உண்டு.

காலம் காலமாக ஆயிரக்கணக்கான பக்தர்களுக்கு அருள்பாலித்து வரும் பழநி முருகன் அனைவருக்கும் சர்வ மங்களத்தைத் தர ஞானமயம் சார்பில் பிரார்த்திக்கிறோம்.   அருணகிரிநாதரின் அருள் வாக்கு இது.   

சேந்தனைக் கந்தனைச் செங்கோட்டு வெற்பனைச் செஞ்சுடர் வேல்

வேந்தனை செந்தமிழ் நூல் விரித்தோனை விளங்கு வள்ளிக்

காந்தனைக் கந்தக் கடம்பனைக் கார்ம்யில் வாகனனைச்

சாந்துணைப் போதும் மறவாதவர்க்கு ஒரு தாழ்வில்லையே

வெற்றி வடி வேலனுக்கு அரோகரா! நன்றி வணக்கம்!       

****

tags- போகர், சமாதி, பழனி, பழநி, 

WRITTEN BY S NAGARAJAN

Post No. 9894

Date uploaded in London – 26 JULY   2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

ஆல் இந்தியா ரேடியோ சென்னை வானொலி நிலையம் சென்னை A அலைவரிசை 720 HZ ச.நாகராஜனின் சுற்றுப்புறச்சூழல் சிந்தனைகளை 16-7-2021 முதல் 25-7-2021 முடிய ஒலிபரப்புகிறது. நேரம் காலையில் தமிழ்ச் செய்திகள் முடிந்தவுடன், சரியாக 6.55க்கு ஆரம்பிக்கும் காலைமலர் நிகழ்ச்சியில் முதல் ஒலி பரப்பாக இது அமையும். ஆன்லைன் நிகழ்ச்சியாக கணினி, ஐபாட் மூலமாகவும் இதைக் கேட்கலாம்.

தொடுப்பு : https://onlineradiofm.in/stations/all-india-air-chennai-pc

உரை எண் : 5 – 20-7-21 அன்று காலை ஒலிபரப்பப்பட்டது

சூரிய சக்தியைப் பயன்படுத்துவோம்!

ஒரு நாட்டின் பொருளாதார வளர்ச்சிக்கும் மக்களின் மேம்பாட்டிற்கும், ஆற்றல் இன்றியமையாதது. நிலக்கரி, இயற்கை வாயு, எண்ணெய் வளம் உள்ளிட்ட படிம எரிபொருள்களாலேயே உலகில் ஆற்றல் உருவாக்கப்படுகிறது. இந்த படிம எரிபொருள்கள் எதிர்மறை விளைவுகளை ஏற்படுத்தி நச்சு வாயுக்களை வளி மண்டலத்தில் கலக்கச் செய்கிறது.   

                                        ஆகவே மனித குலம் மாற்று முறையில் தயாராகும் ஆற்றலை எதிர்நோக்குகிறது. ஒரு பெரும் வரபிரசாதமாக சூரிய ஆற்றல் தங்கு தடையின்றி எங்கும் இலவசமாகக் கிடைக்கும் ஒரு அரிய சக்தி. இந்த சூரிய சக்தியைப் பயன்படுத்தி சோலார் கார்கள் எனப்படும் சூரிய ஆற்றலில் இயங்கும் கார்கள் வடிவமைக்கப்பட்டு உபயோகத்திற்குத் தயாராக உள்ளன. இதன் மூலம் பெட்ரோல், டீஸல் உள்ளிட்ட படிம எரிபொருள்களிலிருந்து உலகம் விடுதலை பெறும்; சுற்றுப்புறச் சூழலுக்கு ஏற்படும் மாசும் குறையும்; அபாயமும் மறையும்.                                                                                                                                                               

இன்று புழக்கத்தில் வந்துள்ள சோலார் பேனல்கள் (Solar Panels) நச்சு வாயுக்களை வெளிப்படுத்தாது. சோலார் பேனல்களால் உருவாக்கப்படும் 879 மெகாவாட் ஆற்றலானது ஐந்து லட்சத்தி நாற்பதினாயிரம் டன்கள் கழிவுப் பொருளை மறுசுழற்சிக்கு உள்ளாக்கிப் பெறும் ஆற்றலுக்குச் சமம். ஒரு மெகாவாட் என்பது பத்து லட்சம் வாட்களாகும் (Watts). சோலார் பேனல்களை தயாரிக்க நீர் தேவைப்படுவதில்லை என்பதால் அரிய நீர்வளமும் சேமிக்கப்படுகிறது. சூரிய ஆற்றல் தெளிவானது, மாசில்லாதது, அதிகம் செலவில்லாதது.            ஒரு ஐந்து கிலோவாட் சூரிய ஆற்றல் மின் அமைப்பை ஒருவர் 25 ஆண்டுகள் பயன்படுத்தினால் அது 2,98,108 பவுண்ட் கார்பன் டை ஆக்ஸைட் உருவாவதைத் தடுக்கும். புகை மூட்டத்தை உருவாக்கும் நச்சு வாயுவான நைட்ரஜன் ஆக்ஸைடில் 928 பவுண்டுகள் என்ற அளவு தடுக்கும், அமில மழையை உருவாக்குகின்ற சல்பர் டை ஆக்ஸைடில் 840 பவுண்டுகள் உருவாவதைத் தடுக்கும், ஆஸ்த்மாவை உருவாக்கும் துகள்மங்களில் (particulates) 57 பவுண்ட் உருவாவதைத் தடுக்கும். படிம எரிபொருள்களைப் பயன்படுத்தி 25 வருடங்களில் ஒருவர் ஓட்டும் சுமார் மூன்று லட்சம் மைல்களில் வரும் நச்சுப் புகை வெளியேற்றத்தைத் தடுக்கும. இப்படி உலகளாவிய விதத்தில் பல லட்சம் பேர்கள் சூரிய ஆற்றலைப் பயன்படுத்த ஆரம்பித்தால் ஏற்படும் நல்விளைவுகள் நம் கற்பனைக்கும் அப்பாற்பட்டதாக அமையும். அடுத்த பத்து ஆண்டுகளில் இல்லங்கள், அலுவலகங்கள், பொது இடங்கள் உள்ளிட்ட அனைத்து சூரிய ஆற்றல் பயன்படுத்தப்படும் என்ற நல்ல செய்தியை வரவேற்று சூரிய ஆற்றலைப் பயன்படுத்துவோம். புவியை மாசில்லாத பூமியாக மாற்றுவோம்!

–subham–

சூரிய சக்தி