Written by S NAGARAJAN

Post No.2264

Date: 22 October 2015

Time uploaded in London: 9-02 AM

Thanks for the pictures.

Don’t use pictures. Don’t reblog for at least a week.

ச.நாகராஜன்

தியாஸபி இயக்கம்

தியாஸபி இயக்கம் பிரம்மாண்டமான ஒன்றாக 19ஆம் நூற்றாண்டில் உருவானதும் அதில் சென்னை முக்கியப் பங்கு ஆற்றியதும் வரலாறு நமக்குத் தரும் உண்மைகள்.

ஆவி உலக ஆராய்ச்சிகள், அதி தேவ புருஷர் தோற்றம் என்று பல்வேறு புதுச் செய்திகளை உலக மக்கள் சற்று அதிசயத்துடன் பார்த்தனர்.

மஹாகவி பாரதியார் தியாஸபியை கிண்டல் செய்தார். ஸ்வாமி விவேகானந்தரோ தியாஸபியை அக்கு வேறு ஆணி வேறாகக் கழட்டி விட்டார்.

எந்த ஒருவரை மிக பிரம்மாண்டமான நிலையில் தியாஸபி உட்கார வைத்ததோ அந்த மாபெரும் சிந்தனா புருஷர் ஜே கே (ஜே கிருஷ்ணமூர்த்தி) தியாஸபியைத் தாமே துறந்த போது, கடைசி மரண அடியாக அது அமைந்தது.

இருந்தாலும் வேகமாக அது வளர்ந்ததற்கான காரணம் மேடம் ப்ளாவட்ஸ்கியின் அற்புத ஆற்றல்கள்.

ப்ளாவட்ஸ்கியின் அற்புதங்கள்

சரித்திரத்தை அலசும் போது ஸ்காஃப் (Pskoff) என்ற நகரில் அவர் ஆற்றிய அற்புதங்கள் பின் வருமாறு குறிப்பிடப்படுகின்றன:

• மனதில் நினைக்கப்பட்ட கேள்விகளுக்குத் தெளிவான எழுத்து மூலமான அல்லது வாய்மொழியான பதில்களை அவர் தந்தார். அதாவது தாட் – ரீடிங் (thought reading) அவருக்குக் கை வந்த கலையாக இருந்தது
• பல்வேறு வியாதிகளுக்கு லத்தீனில் மருந்துகள் எழுதித் தரப்பட்டு பின்னால் குணப்படுத்தப்பட்டன.
• யாருக்கும் தெரியாத ரகசியங்கள், ஒருவரின் அந்தரங்க ரகசியங்கள் குறிப்பிட்ட நபருக்கு மட்டும் தெரிவிக்கப்பட்டு சந்தேகங்கள் தவிடுபொடியாக்கப்பட்டன.
• ஒரு நாற்காலி போன்ற சாமான்களின் எடை அல்லது நபர்களின் எடை ஆகியவற்றில் நினைத்தவுடன் மாறுதலை ஏற்பட வைத்தார்.
• முன்பின் தெரியாதவரிடமிருந்து கடிதங்கள் பெற்று உடனடி பதில்களை அவர்களின் கேள்விகளுக்குத் தந்தார்.
• நிகழ்வில் நேரடியாக ஒருவரின் பொருள்களை நகர்த்தினார்
• தான் விரும்பிய இசை ஸ்வரங்களை வானில் ஒலிக்கச் செய்தார்.

செஸ் டேபிள் நிகழ்வு

ஸ்காஃப் நகரில் நடந்த ஒரு சம்பவம் அனைவரையும் அதிர வைத்தது. அவரது மாமனார் யாஹோன்டோஃப் (Yahonotoffs) இல்லத்தில் நடந்தது அது.

மேடம் ப்ளாவட்ஸ்கியைப் பார்க்க ஏராளமானோர் வந்திருந்து ஹாலில் சேர்களில் அமர்ந்தனர். அவரது சகோதரர் லியோனைட் அவர்களைச் சுற்றி வந்து ஒரு இடத்தில் நின்றார். மீடியம்கள் ஒருவரின் எடையை அதிகமாக்கவும் குறைக்கவும் முடியும் என்று கூறப்பட்டதைச் சுட்டிக் காட்டி அவர், “நீ இது சரிதான் என்கிறாயா? உன்னால் அப்படிச் செய்ய முடியும் என்கிறாயா?” என்று கேட்டார்.

“மீடியம்களால் நிச்சயம் செய்ய முடியும். சில சமயம் நானே அதைச் செய்திருக்கிறேன்” என்றார் ப்ளாவட்ஸ்கி.

“நீங்கள் இப்போது முயற்சி செய்ய முடியுமா?” என்றார் பார்வையாளர்களுள் ஒருவர்.

அனைவரும் அதை வேண்டவே, “நான் முயற்சி செய்து பார்க்கிறேன்” என்றார் அவர்.

“இதோ இந்த செஸ் டேபிளை தரையில் வைக்கிறேன். யார் வேண்டுமானாலும் இதை இப்போது தூக்கிப் பார்க்கலாம். அப்புறம் அதை நான் ஃபிக்ஸ் செய்கிறேன். பிறகு அதை யாராலும் தூக்க முடியாது” என்றார் அவர்.

“அதை நீங்கள் தொடவே மாட்டீர்களா?” என்றார் ஒருவர்.

“நான் ஏன் அதைத் தொட வேண்டும்?” என்றார் அவர்.

அவரது பேச்சைக் கேட்ட இளைஞர்களில் ஒருவர் அந்த செஸ் டேபிளை இறகு போலத் தூக்கினான்.

பின்னர் கீழே வைத்தான்.

“ஆல் ரைட்” என்ற மேடம் இப்போது அந்த டேபிளின் மீது தன் அகன்ற நீல நிற விழிகளை வைத்த கண் எடுக்காமல் பார்த்தார். பின்னர் தன் பார்வையை அகற்றாமல் அந்த இளைஞனை சைகையால் அதைத் தூக்குமாறு பணித்தார். அவன் அந்த டேபிளை பழையபடி அலாக்காகத் தூக்க முயன்றான். முடியவில்லை. தன் பலம் முழுவதும் பிரயோகித்தான் முடியவில்லை. இரண்டு கைகளாலும் குனிந்தவாறு தூக்க முயன்றான். ஆனால் முடியாமல் முயற்சியில் தோற்றான்.

லியோனைட், “ஆஹா, இது நன்றாக இருக்கிறதே” என்றார். ஆனால் அவருக்கு திடீரென்று ஒரு சந்தேகம் தோன்றியது. அந்த இளைஞனும் தன் சகோதரியும் முன்னரே பேசி வைத்து இப்படி ஒரு டிராமா போடுகிறார்களோ!

திடீரென்று அவர், “நான் இதைத் தூக்கிப் பார்க்கிறேனே!” என்றார். அவர் செஸ் டேபிளைத் தூக்க முயன்றார். முழு பலத்தையும் பிரயோகித்தார், ஆனால் முடியவில்லை. வெறி வந்தது போல தன் மார்பை டேபிளின் மீது வைத்து தன் கைகளை அப்படியே டேபிளைச் சுழற்றி பலத்துடன் தூக்க முயன்றார். மூன்று கால்களுடன் கூடிய அந்த டேபிள் ஆடியது. மரம் நொறுங்கும் சப்தம் கேட்க கால்கள் முறியலாயின. ஆனால் டேபிளை அவரால் தூக்க முடியவில்லை.

தன் முயற்சியில் தோற்ற அவர், “HOW STRANGE’ என்று கூவினார்.

அந்த வார்த்தைகளையே மேடத்தின் வெற்றிக்கான அங்கீகாரமாக அனைவரும் எடுத்துக் கொண்டனர்.

ஒவ்வொருவராக இப்போது முன் வந்து டேபிளைத் தூக்கிப் பார்த்து அது பயன் தராது என்பதைத் தாமே தெரிந்து கொண்டு வியந்தனர்.

இதைத் தொடர்ந்து மேடம் பல்வேறு அற்புதங்களை அந்த நகரில் நிகழ்த்தவே நகரமே அவருக்கு அடிமையானது.

அபூர்வ சக்தி கொண்ட ஒருவராக உலகம் அவரைப் பார்க்க அவர் நிகழ்த்திய ஏராளமான நிகழ்ச்சிகள் காரணமாக அமைந்தன.

ஒரு கொலை கேஸில் குற்றவாளியைக் கூட அவர் கண்டு பிடித்தார்.

 மேடம் ப்ளாவட்ஸ்கியின் வாழ்க்கை சுவை நிரம்பிய ஒன்று. தியாஸபியின் வளர்ச்சி மற்றும் ஆவி உலக ஆராய்ச்சி ஆகியவற்றை அறிய விரும்புவோர் மேடம் ப்ளாவட்ஸ்கியின் வாழ்க்கை வரலாற்றையும் படித்தே ஆக வேண்டும்!

*************

Compiled by London swaminathan

Post No.2263

Date: 21 October 2015

Time uploaded in London: 20-00

Thanks for the pictures.

Don’t use pictures. Don’t reblog for at least a week.

வானத்தில் தொங்கிய கோட்டைகளை அழித்து அசுரரை வென்று சுவர்க்கத்தைக் காத்த தூங்கெயில் எறிந்த தொடித் தோட் செம்பியன் (சோழன்) கதையை மணிமேகலை காவியத்தின் வாயிலாக அறிவோம். முப்புரம் எரித்த சிவன் கதையை அறிவோம். இப்படி ஆகாயத்தில் தொங்கிக் கொண்டிருந்த கோட்டைகள், தங்கம், வெள்ளி, இரும்புக் கோட்டை பற்றிய புராணக் கதைகள் எல்லாம் கற்பனையோ என்று கருதியோருக்கு ஒரு வியப்பான செய்தி!

லண்டனிலுள்ள எல்லா பத்திரிக்கைகளும் புகைப்படங்களுடன் வெளியிட்ட செய்தி, யூ ட்யூபில் பல லட்சம் பேர் காண்ட காட்சி இது. தென் சீனாவில் ஆகாயத்தில் பெரிய கட்டிடங்களின் மாயத்தோற்றத்தைக் கண்டு மக்கள் வியந்தனர். அதைப் புகைப்படம், வீடியோ படமும் எடுத்து டெலிவிஷன், யூ ட்யூப் ஆகியவற்றில் பகிர்ந்தனர்.

விஞ்ஞானிகள் எப்பொழுதுமே அதிசயங்களை ஒப்புக்கொள்ள மாட்டார்கள். ஆகவே அவர்கள் இது பருவநிலை காரணமாக நடக்கும் ஒரு அபூர்வ நிகழ்ழ்சி என்கிறார்கள். அதாவது நிலத்தின் மீதோ, நீர் நிலையின் மீதோ காற்றுமண்டலம் வெப்பமானால் தூரத்திலுள்ள கட்டிடங்களை இப்படிப் பிரதிபலிக்கும் என்றும் இந்த அபூர்வ தோற்றத்துக்கு Fata Morgana Fஏடா மோர்கனா என்று பெயர் என்றும் சொல்லுகிறார்கள். ஜியாங்சி, போஷான் ஆகிய  Jiangxi and Foshan,  இரண்டு தென் சீன நகரங்களின் மக்கள் இந்த மாயத் தோற்றத்தைக் கண்டனர். வானளாவிய கட்டிடங்கள் ஆகாயத்தில் இருப்பது போல அவர்கள் பார்த்தனர்.

நாம் வாழும் காலத்திலுள்ள வீடியோ, டெலிவிஷன், பேஸ் புக், யூ ட்யூப் ஆகியவற்றை மறந்து விட்டு இது இல்லாத யுகத்தில் இப்படி நடந்திருந்தால், மக்கள் இப்படி நடந்ததைக்கூட ஒப்புக் கொள்ளமாட்டார்கள். ஏதோ பைத்தியம் உளறுகிறதென்று சொல்லிவிட்டுப் போயிருப்பார்கள். இப்பொழுது வீடியோ காமெரா முதலியவற்றின் மூலம் உலகிற்குக் காட்ட முடிகிறது.

விஞ்ஞானிகள் என்னதான் விளக்கம் கொடுத்தாலும், இன்னும் ஐயப்பாடு இருக்கத் தான் செய்யும். அடிக்கடி இப்படி நிகழ்ந்தால் அவர்கள் சொல்லுவதை மக்கள் ஏற்பர். ஏதோ அதிசயமாக இப்படி நடந்தால் பல விதமான கொள்கைகள் உருவாகும் சிலர் இது அமெரிக்கா செய்த வேலை என்றும் அவர்களுடைய Project Blue Beam,”ப்ராஜெக்ட் ப்ளூ பீம் என்பதன் ஒரு சதி வேலை இது என்றும் கருதுவர். மற்றும் சிலர் இது சீனாவே, அவர்களுடைய ஹோலோக்ராபிக் (Holograpgic) டெக்னாலஜி பற்றி மக்களின்  கருத்தை அறிய இப்படி செய்து பார்த்தது என்பர். இது நடந்து ஒரு மாதம் ஆகியும் இன்னும் எல்லோரும் ஏற்கும் விளக்கம் கிடைக்கவில்லை.

லண்டனில் பறக்கும் தட்டு! விழுந்து நொறுங்கியது!!

இப்படி சீனச் செய்தி பரபரப்பை ஏற்படுத்திய அதே நேரத்தில் லண்டன் தெரு ஒன்றில் மர்ம வாஹனம் ஒன்று வந்து விழுந்து நொறுங்கியது பரபரப்பை ஏற்படுத்தியது. கிங்ஸ்டன் என்னும் பகுதியில் இரவில் இனம் தெரியாத எந்திரம் போன்ற ஒர் பொருள் பெரிய சப்தத்துடன் விழுந்தது. உடனே மக்கள், போலீசுக்கும் ஆம்புலன்சுக்கும் டெலிபோன் செய்யவே அவர்கள் பறந்தோடி வந்தனர். அதைப் பார்த்த போலீஸ் அதிகாரிகள் ஒரு பறக்கும்தட்டு விழுந்து நொறுங்கியது போல இருக்கிறது என்று வருணித்தவுடன் பலருக்கும் மேலும் வியப்பு ஏற்பட்டது. ஆனால் அங்கே வெளி உலக மனிதர்கள் எவரும் இல்லை.

வேறு சிலர் இது பீட்ஸா கடை அடுப்பு போல இருக்கிறது என்கின்றனர். ஆனால் இதுவரை சரியான விளக்கம் இல்லை. சில நேரங்களில் ராணுவம் தொடர்பான சோதனைகள் போன்றவற்றைப் போலீசார் தெரிந்தாலும் சொல்ல மாட்டார்கள். போலீசாரும் குழம்பிப் போயிருப்பதாக லண்டன் பத்திரிக்கைகள் எழுதுகின்றன.

-சுபம்-

கனடா நாடு ஆண்டுதோறும் பேய்கள் பற்றிய தபால்தலைகளை வெளியிடுகிறது

Written by S NAGARAJAN

Post No.2224

Date: 8   October 2015

Time uploaded in London:  16-17

Thanks for the pictures.

Don’t use pictures. Don’t reblog for at least a week.

பாக்யா வார இதழில் கடந்த நாலரை ஆண்டுகளாக வெளி வந்து கொண்டிருக்கும் அறிவியல் துளிகள் தொடரில் 25-9-2015 இதழில் 240வது அத்தியாயமாக வந்த கட்டுரை

பிரேதக் கடத்தல்

ச.நாகராஜன்

“சுவர்க்கத்திற்குப் போக விரும்புபவர்கள் கூட இறக்க விரும்புவதில்லை.” –  ஸ்டீவ் ஜாப்ஸ்

மனிதன் இறக்கும் போதும் கூடத் தன்னை நல்ல விதமாக “அனுப்பி வைப்பதையே” விரும்புகிறான். எரித்தாலும் சரி, புதைத்தாலும் சரி, கௌரவமாக அனுப்புங்கள் என்பதே ஒவ்வொருவரின் வேண்டுதலும்!

ஆகவே, கடத்தல்களில் மோசமான கடத்தல் பிரேதக் கடத்தல் தான் என்பதை அனைவரும் ஒப்புக் கொள்வர். மிகவும் பிரபலமானவர்களின் உடல்களைப் புதைத்தால் அபாயத்தையும் கூடவே புதைப்பது போலத் தான்.

சமீபத்தில், லைவ் ஸயின்ஸ் ஜூலை 2015 இதழில் ஸ்டீபனி பப்பாஸ் என்ற அறிவியல் ஆய்வாளர் தந்திருக்கும் தகவல் நம்மை பரபரப்படைய வைக்கிறது.

ஜெர்மனியில் உள்ள கல்லறை ஒன்றிலிருந்து பிரபல டைரக்டரான எஃப்.டபிள்யூ.மர்னாவ் என்பவரின் உடலைக் கடத்தப் பலமுறைகள் முயற்சிகள் நடந்திருக்கின்றன. இவர் 1922ஆம் ஆண்டு அந்தக் கால  மௌனப் படமான ‘நொஸ்பெராடு’ என்ற படத்தில் பேய்களைப் பற்றிச் சித்தரித்திருந்தார்.

இவர் 1931ஆம் ஆண்டு மரணமடைந்தார். ஜெர்மனியின் தென்மேற்கில் உள்ள ஸ்டான்டார்ஃப் கல்லறையில் இவரது உடல் முறைப்படி அடக்கம் செய்யப்பட்டது.ஆனால் இன்றோ?

இவரது தலையை, அதாவது மண்டைஓட்டைக் காணோம் என்ற தகவலை பிரபல பத்திரிகையான வாஷிங்டன் போஸ்ட் தருகிறது. அவரது கல்லறையில் மெழுகுவர்த்தி ஒன்று எரிந்து கொண்டிருந்தததாம்.

நிச்சயமாக பிசாசுப் பேர்வழிகளின் கைவரிசை தான் இது என்று அனைவரும் வருத்தத்துடன் கூறுகின்றனர். சில சமயம் கொள்ளைக்காரர்கள் இதற்கு ஒரு விலையை வைத்து சவத்தை வாங்க விரும்புவர்களிடம் அதை ஒப்படைப்பதும் உண்டு.

பிரபல நகைச்சுவை நடிகரான சார்லி சாப்ளின் 1977இல் இறந்தார். அவரது உடலை அடுத்த ஆண்டே திருட முயற்சித்தனர். அமைதிக்குப் பெயர் பெற்ற ஸ்விட்சர்லாந்தில் அமைதியாக மீளா உறக்கத்தில் இருந்த அவருக்கா இந்த கதி என்று உலகமே அல்லோலகல்லோலப் பட்டது. 2014இல் இண்டிபெண்டண்ட் பத்திரிகைக்குப் பேட்டி அளித்த அவரது மகன் உலகின் மோசமான சம்பவம் இது என்று விமரிசித்தார்.

உடலைத் திருப்பித் தர பெரும் தொகையை சவத் திருடர்கள் கேட்ட போது சார்லி சாப்ளினின் மனைவி பணம் தர மறுத்து விட்டார். செத்த உடலுக்கு என்ன மதிப்பு இருக்கிறது என்ற அவரது பதிலைக் கேட்டத் திருடர்கள் அதிர்ந்து போனார்கள்.

ஆனால் நல்ல வேளையாக இந்தப் பேச்சை ஒட்டுக் கேட்ட போலீஸார் கிழக்கு ஐரோப்பாவில் பதுங்கி இருந்த இரண்டு பிரேதத் திருடர்களைப் பிடித்தனர். ஒரிஜினல் கல்லறையிலிருந்து சற்று தூரத்தில் சவத்தைப் புதைத்து வைத்திருந்தது கண்டுபிடிக்கப்பட்டது.

ஆனால் ஆப்ரஹாம் லிங்கனுக்கே ஆபத்து என்பதைத் தான் யாராலும் ஜீரணிக்க முடியவில்லை! 1876இல் அவரது உடலுக்கு பெரும் தொகை பிணையாகக் கேட்கப்பட இருந்த ஒரு முயற்சியை ஆரம்பத்திலேயே ரகசிய போலீஸார் தகர்த்தனர். அவரது மகன் ராபர்ட் அறிவியல் ரீதியில் தன் தந்தையின் உடலைக் காப்பாற்றி விட்டார்.

சவப்பெட்டியை கெட்டியான எளிதில் தகர்க்க முடியாத கான்க்ரீட் சுவர் ஒன்றை அமைத்து அதன் கீழ் புதைத்து விட்டார் அவர்.

அதனால் அதை யாராலும் தோண்டி எடுக்க முடியாது, அப்போதும், இப்போதும், எப்போதும்!

அர்ஜெண்டினாவின் ஜனாதிபதியான ஜுவான் பெரானுக்கு 1955இல் மகத்தான சோதனை ஒன்று ஏற்பட்டது. பதனிடப்பட்டு இருந்த அவரது அன்பு மனைவி ஈவா பெரானின் உடலை ராணுவ அதிகாரிகள் கடத்திக் கொண்டு சென்று விட்டனர். அர்ஜெண்டினாவில் இடம் விட்டு இடமாக அந்தப் பிரேதம் “பயணம்” செய்து கொண்டிருந்தது. ஒருவழியாக பெரும் முயற்சியின் பேரில் ஸ்பெயினில் தஞ்சமாகப் புகலிடம் கொண்டிருந்த பெரான் 1971இல் அதைத் திரும்பப் பெற்றார். போனஸ் அயர்ஸில், நல்ல ஒரு கோட்டை போல அரண் செய்யப்பட்ட இடத்தில் அவர் தன் மனைவியை மீண்டும் நல்லடக்கம் செய்தார்.

சமீபத்தில் 2009 டிசம்பர் 11ஆம் தேதி சைப்ரஸ் ஜனாதிபதியான டஸாஸ் பபடோபௌலஸ் என்பவரின் கல்லறையைக் காணச் சென்ற அவரது முன்னாள் மெய்காப்பாளர் அதிர்ச்சி அடைந்தார். அங்கு ஒரு பெரும் பள்ளம் தான் இருந்தது. அலறி அடித்துக் கொண்டு தேட ஆரம்பித்த போலீஸார் அவரது உடல் இன்னொரு கல்லறையில் ஒளித்து வைக்கப்பட்டிருந்ததைக் கண்டு பிடித்தனர். விசாரணையில் சகோதரர்கள் இருவரின் வேலை இது என்பது தெரிய வந்தது. அவர்களில் ஒருவன் ஆயுள் கைதியாக இருந்தான்.  அவனை சிறையிலிருந்து விடுவிக்க வெளியில் இருந்த ‘புத்திசாலியான’ அவனது சகோதரன் பிணையாக இந்த உடலைப் பயன்படுத்த திட்டமிட்டான். கடைசியில் பிடிபட்டான்.

திருடு போகும் பிரேதங்கள் ஒருபுறம் இருக்க, இறந்த பின்னர் உடலைத் தானம் செய்வோரின் எண்ணிக்கை அமெரிக்கா, பிரிட்டன், இந்தியாவில் அதிகரிக்க ஆரம்பித்துள்ளது.

ஆராய்ச்சிக்காகவும் மருத்துவ மாணவர்களின் கல்விக்காகவும் பலரும் தங்களின் உடலைத் தானமாகத் தருகின்றனர். இப்படி உடலைத் தானமாகத் தருவதில் சட்ட சிக்கல்கள் நிறையவே உள்ளன. முறைப்படி தனது விருப்பத்தைத் தெரிவித்தவரின் உடலே தானமாகப் பெறப்படும். அவரது நெருங்கிய உறவினர் மட்டுமே அந்த உடலைத் தானமாகத் தர முடியும்.

இந்தியாவில் ஏற்பட்டுள்ள விழிப்புணர்ச்சி காரணமாக உடல் அங்கங்களைத் தானமாகக் கொடுப்போரின் எண்ணிக்கைம் சமீப காலத்தில் அதிகரித்துக் கொண்டே போகிறது.

இந்த அங்கங்களைப் பெறுவோர் மறுவாழ்வு பெறுவதும் இதனால் அதிகரிக்கிறது. பத்திரிகைகளின் சரியான ஆதரவும் சமூக ஆர்வலர்களின் ஊக்கமும் இதில் பெரும் பங்கு வகிக்கின்றன.

‘இறந்த பின்னும் நீங்கள் ஃபேஸ்புக்கை பார்க்கலாம் இன்னொருவர் முகத்தில் உங்கள் கண்களைப் பொருத்துவதன் மூலம்’ என்ற ஈமெயிலைப் பெறாதவர் இன்று அநேகமாக இருக்கவே முடியாது.

இருந்தாலும் இறந்தாலும் பிறருக்கு உதவி செய்பவரே மேலோர்!

அறிவியல் அறிஞர் வாழ்வில்

பிரபல விஞ்ஞானியான தாமஸ் ஆல்வா எடிஸன் தன்னை ஒரு விஞ்ஞானி என்று சொல்லிக் கொண்டதேயில்லை. தன்னை ஒரு வியாபாரி என்று சொல்லிக் கொள்வதில் தான் அவருக்கு விருப்பம் அதிகம். ‘எதிலும் லாபம் எப்போதும் லாபம்’ என்பதே அவரது முக்கியக் குறிக்கோள். ஒரு சமயம் அவரை ஒரு விஞ்ஞானி என்று குறிப்பிட்டிருந்த ஒரு பத்திரிகை கட்டுரையைக் காண்பித்து அவர் தனது நண்பர் ஒருவரிடம் கூறினார் இப்படி:-“இதோ பார், தப்பாகப் போட்டிருக்கிறார்கள். நான் ஒரு விஞ்ஞானி இல்லை. நான் ஒரு கண்டுபிடிப்பாளன் (Inventor). ஃபாரடேயை எடுத்துக் கொள். அவர் ஒரு விஞ்ஞானி. அவர் பணத்திற்காக உழைக்கவில்லை. அவர் அதற்கு நேரமே இல்லை என்று சொல்லி விட்டார். ஆனால் நானோ அதற்காகத் தான் உழைக்கிறேன். நான் ஒவ்வொன்றையும் வெள்ளி டாலரின் அளவை வைத்தே தான் மதிப்பிடுகிறேன். அந்த அளவுக்கு அது வரவில்லை எனில், அது சரிப்படாது என்பதை அறிந்து கொள்வேன்”.

அவர் ஒரு பிரம்மாண்டமான கோடைகால வாசஸ்தல மாளிகை ஒன்றைக் கட்டியிருந்தார். அதைப் பற்றி அவருக்கு ஏகப்பட்ட கர்வம். அந்த மாளிகையில் அதிக உடலுழைப்பின்றி காரியங்களை ஆற்றவல்ல ஏராளமான இயந்திர சாதனங்களை அவர் அமைத்திருந்தார். ஒரு சமயம் அவர், அவற்றை ஒவ்வொன்றாகத் தன் நண்பர்களுக்குக் காண்பித்தவாறே மாளிகையைச் சுற்றி வந்து கொண்டிருந்தார்.செல்லும் வழியில் திருப்பம் ஒன்றில் சுழல் குகை போன்ற ஒரு வழியில் செல்ல வேண்டியிருந்தது. அந்தச் சுழல் குகையைக் கடக்க பெரும் பிரயத்தனம் செய்தவாறே அனைவரும் கடந்தனர்.

அவர்களின் ஒருவர் கேட்டார்:” மிஸ்டர் எடிஸன், இப்படிப்பட்ட அருமையான சாதனங்களை நீங்கள் அமைத்துள்ளீர்கள். இந்த குகை மட்டும் ஏன் இப்படி அமைக்கப்பட்டிருக்கிறது? இந்த வழியைச் சுழற்றிச் சுழற்றி நாங்கள் நொந்து போனோம்”

இதைக் கேட்ட எடிஸன் ஹாஹாஹா என்று சிரித்தார். “நண்பரே! இந்த சுழல் வழியை நீங்கள் ஒவ்வொருவரும் தள்ளும் போதும் எனக்கு மேலே மாடியில் உள்ள தொட்டியில் எட்டு காலன் தண்ணீர் நிரம்புகிறது. நீங்கள் வழியையா கடக்கிறீர்கள்? எனக்குத் தண்ணீர் நிரப்புகிறீர்கள்” என்றார் அவர்.

நண்பர்கள் வியப்பு மேலிட விழுந்து விழுந்து சிரித்தனர்.

எதிலும் லாபம் எப்போதும் லாபம்; இப்படி ஒரு அபூர்வ விஞ்ஞானி!

*****************

Research article written by S NAGARAJAN

Post No.2207

Date: 2^nd  October 2015

Time uploaded in London: 5-52 am

(My elder brother S NAGARAJAN is a regular contributor to Bhagya, Jnanalayam, Nilacharal, Ezine and several other magazines and blogs: swaminathan)

தற்பொழுது விற்பனையாகி வரும் ஞானஆலயம்அக்டோபர் 2015 இதழில் வெளியான கட்டுரை.

பாரத ரத்னா அப்துல்கலாம் அவர்கள் கனவு காணுங்கள் என்று இளைஞர்களை ஊக்குவித்தார். கனவு காண எப்படி வேண்டுதல் புரிய வேண்டும் என்ற மந்திரத்தோடு அபூர்வமான விஷயங்களைப் போதிக்கிறது நம் அக்னிபுராணம்!

கனவில் கண்ட உலக சரித்திரம்!

அக்னி புராணமும் ஆர்னால்ட் டாய்ன்பியும்!!

ச.நாகராஜன்

துஸ்ஸ்வப்ன நாசன:

நல்ல கனவுகளைக் காணுங்கள் என்பதே ஹிந்து சாஸ்திரங்கள் தரும் உபதேசம்! துஸ்ஸ்வப்ன நாசன: (தீய கனவுகளை நாசம் செய்பவன் நாமம் 926) என்றே விஷ்ணுசஹஸ்ரநாமம் விஷ்ணுவைத் துதிக்கிறது. அசோகவனத்தில் திரிஜடா, சீதையிடம் தான் கண்ட நல்ல கனவைத் தெரிவிக்க, அதன் பின்னர் அனுமன் சீதையை தரிசிக்க அதுவே ராமாயணத்தின் முக்கிய திருப்புமுனைக் கட்டமாக அமைகிறது!

அக்னிபுராணம் தரும் அறிவுரை

கனவுகளைப் பற்றி அக்னி புராணம் பிரமிக்கத் தக்க விஷயங்களை அள்ளித் தருகிறது. பல்வேறு கனவின் பலன்கள், எந்த ஜாமத்தில் கண்டவை பலிக்கும் என்பன போன்றவை அதில் துல்லியமாக விளக்கப்பட்டுள்ளன. ஒரு நல்ல கனவை முதலில் கண்டு விட்டுப் பின்னர் கெட்ட கனவைக் கண்டால் கெட்ட கனவே பலிக்கும். ஆகவே நல்ல கனவைக் கண்ட பின்னர் உறங்காதே என்ற ஆலோசனையையும் அது அன்புடன் வழங்குகிறது. ஆகவே தான் நம் முன்னோர்கள் நல்ல கனவைக் கண்டவுடன் மகிழ்ச்சியுடன் எழுந்து அனைவரிடமும் அது பற்றிக் கூறி மகிழ்வர்; நல்லதை எதிர்நோக்கிக் காத்திருப்பர்.

ஹஸ்டன் ஸ்மித் என்ற அறிஞர் இந்து மதத்தில் மதமே கலை; கலையே மதம் என்று பொருத்தமுறக் கூறுகிறார்.

நமது கோவில் சிற்பங்கள், அங்குள்ள நாட்டியங்கள், இசை, அலங்காரம் என்று அனைத்தையும் அலசி ஆராய்ந்தால் நமது மதமே நமது கலை; நமது கலையே நமது வாழ்க்கை முறை என்பது விளங்கும்.

ஆனந்த குமாரஸ்வாமி (1877-1947) ஒரு பெரும் கலைஞர். இந்து மதச் சிறப்புகளை கலைஞனுக்கே உரித்த வகையில் நுணுக்கமாக உலகினருக்கு விவரித்தவர். அவர் அக்னி புராணத்திலிருந்து ஒரு அழகிய மந்திரத்தை எடுத்துக் காட்டி ஒரு கலைஞன் பெரிய காரியத்தைத் தொடங்கும் முன்னர் முதல் நாள் இரவில் கனவில் அதை நிறைவேற்றுவதற்கான வழிகளைக் காண்பிக்குமாறு வேண்டுதல் புரியும் மந்திரத்தைக் கூற வேண்டும் என்கிறார். கலை என்பது ஒரு யோகம் என்கிறார் அவர். கனவுக்கும் பெரிய திட்டத்தை நனவாக்கும் செயலுக்கும் உள்ள நெருக்கத்தை நல்ல முறையில் அடைய அக்னி புராணம் கூறும் முறையில் பிரார்த்தித்துச் செய்தால் அது பிரம்மாண்டமான வெற்றியைப் பெறும் என்கிறார் அவர். Visualization என்னும் காட்சிப்படுத்தல் பற்றி ஆதிசங்கரரும் அற்புதமாக விளக்கியுள்ளார்.

கனவுப் படைப்பாளிகளுக்கு நவீன வரலாற்றில் பஞ்சமே இல்லை. நூற்றுக்கணக்கான பேர்களில் மாதிரிக்கு 14 பேரை அட்டவணையில் தனியே காணலாம்!

ஐன்ஸ்டீனின் மனச்சித்திரம்

உலகின் அதிசயமான கண்டுபிடிப்புகள் எல்லாம் விசுவலைசேஷன் என்ற காட்சிகள் மூலமாகவே பெரும்பாலும் கண்டுபிடிக்கப்பட்டுள்ளன. இதற்கு ஐன்ஸ்டீனும் விதி விலக்கல்ல. ஒளியின் வேகத்தின் மீதேறிச் செல்வது போன்ற காட்சியே உலகின் பிரம்மாண்டமான கண்டுபிடிப்பான தியரி ஆஃப் ரிலேடிவிடியயைக் கண்டுபிடிக்க அவருக்கு உதவியது. அதனால் தான் அடிக்கடி அவர் மனச்சித்திரத்தை வற்புறுத்தி வந்தார் வாழ்நாள் முழுவதும்.

ஆர்னால்ட் டாய்ன்பியின் உலக சரித்திரம்

உலகின் சரித்திரத்தை எழுதிய ஆர்னால்ட் டாய்ன்பி (1889-1975) ஒரு அற்புதப் படைப்பாளி. ‘A STUDAY OF HISTORY’’ என்ற அவரது படைப்பு 30 லட்சம் சொற்கள் அடங்கியது. 26 நாகரிகங்களைப் பற்றி 12 தொகுதிகளில் அவர் விளக்கியுள்ளார். ஒரு மனிதனால் இப்படி துல்லியமாக சரித்திரக் காட்சிகளை எழுதி விட முடியுமா என்ன/

இதை எப்படி எழுத முடிந்தது என்பதை அவரே விளக்கியுள்ளார். படுத்தவுடன் கனவில் பக்கம் பக்கமாகச் சொற்கள் அடங்கிய காட்சிகள் விரியுமாம். எழுந்தவுடன் அதை அப்படியே எழுதி விடுவாராம். கனவில் அகக் கண்ணில் விரிந்த காட்சிகள் படலம் படலமாக வர உலக சரித்திரம் மிளிர்ந்தது. அக்னி புராணம் கூறும் கனவுக் காட்சிகளுக்கு அவரே சரியான சான்று. கனவின் மூலமாக உத்வேகம் பெற்ற அறிஞர் அவர்.

பற்றிக் கொள்; காத்திரு

கடவுளைப் பற்றியும் கடவுளுக்கும் மனிதனுக்கும் உள்ள தொடர்பைப் பற்றியும் விளக்கப் புகுந்த அவர் இதற்கு விடையாகத் தனது கனவு ஒன்றையே விவரிக்கிறார்!

இந்தக் கனவில் சிலுவையின் அடிப்பாகத்தைப் பிடித்துக் கொண்டு தான் இருப்பதை அவர் கண்டார். யார்க்‌ஷைரில் ஆம்பிள்ஃபோர்த் அப்பேயில் (Abbey of Ampleforth) பெனிடிக்‌ஷன் பீடத்தின் மேல் உள்ள சிலுவையையே அவர் கண்டார்.

பிறகு தெளிவான லத்தீனில் கம்பீரமான ஒரு அசரீரி ஒலித்தது!

“ஆம்ப்ளெக்ஸஸ் எக்ஸ்பெக்டா”

இதன் பொருள்? “பற்றிக் கொள்; காத்திரு” (CLING AND WAIT என்பதாகும்.

(ஷீர்டி சாயி அன்பர்களுக்கு அவர் கூறும் ச்ரத்தை; பொறுமை என்ற இதே அர்த்தம் தொனிக்கும் இரு வார்த்தைகள் நினைவுக்கு வருகிறதா!)

சென்ற நூற்றாண்டின் மாபெரும் சிந்தனையாளரான அவரது கனவு நமது உள்ளத்தில் சிலிர்ப்பூட்டும் இறை நினைப்பை ஊட்டுகிறதல்லவா?

ஆரம்பத்தில் கிறிஸ்தவத்தில் அபார பற்று உடையவராக அவர் இருந்தார். 1944ஆம் ஆண்டு அவர் மனைவி ரோஸலிண்ட் மர்ரேயை விவாகரத்து செய்ய வேண்டி இருந்தது. தன் மனைவி தன்னை விட்டுப் பிரிய கிறிஸ்தவ மதத்தின் வறண்ட ஒரு கொள்கையே காரணம் என்ற முடிவுக்கு அவர் வந்தார். கிறிஸ்தவ மதத்தின் மீதான பிடிப்பு தளரவே புத்த மதம் அவரை ஈர்த்தது.

சமரஸ மத நோக்கு கொண்ட மகாத்மா காந்திஜியை அவர் பெரிதும் போற்றினார். “சமுதாயத்தைக் காக்க வந்த நவீன மீட்பர்” (Modern savior of Society) என்று அவர் காந்திஜியைக் கொண்டாடினார்.

அவரது விரிந்த பார்வை ஹிந்து மதத்தின் பால் திரும்பியது. ஹிந்து மதம் காட்டும் உண்மைகளை உணர்ந்து பெரிதும் அதிசயித்தார் அவர்.

உலக சரித்திரத்தை எழுதியவர் உலகின் எதிர்காலமே இனி ஹிந்து மத நோக்கில் சென்றாலேயே செழிக்கும் என்று முத்தாய்ப்பாக இறுதியில் எழுதி தனது பத்தாவது பாகத்தை முடித்தார்.

கனவில் அவர் கண்ட காட்சி எதிர்காலத்தை ஆளும் ஹிந்து மதக் காட்சி என்றால் அது சரியான காட்சி தானே! தென்னாடுடைய சிவன் எந்நாட்டவர்க்கும் உரியவன் அல்லவா!

அவர் கூறுவதை அப்படியே காண்போம்: – “The indian religions are not exclusive minded. They are ready to allow that there may be alternative   approaches to the mystery. I feel sure that in this they are right and that this catholic minded Indian religions spirit is the way of salvation for human beings of all religions in an age in which we have to learn to live as a single family if we are not to destroy ourselves.”

“இந்திய மதங்கள் மற்ற எதையும் ஒத்துக்கொள்ளாத மனப்பான்மை கொண்டவை அல்ல. இறைமர்மத்திற்கு விடை காண இன்னும் வேறு பல அணுகுமுறைகளும் உண்டு என்பதை அவர்கள் அனுமதிக்கத் தயார்! இதில் அவர்கள் கூறுவது சரியே என்பதில் நான் உறுதி கொள்கிறேன். நம்மை நாமே அழித்துக் கொள்ளாது, ஒரே குடும்பமாக வாழக் கற்றுக் கொள்ள வேண்டிய நிலையில் உள்ள ஒரு யுகத்தில் வசிக்கும் எல்லா மதங்களையும் சார்ந்துள்ள மனிதர்களுக்கு இப்படிப்பட்ட பரந்த மனப்பான்மையுள்ள இந்திய மதங்களின் உணர்வே உய்வதற்கான வழியாகும்.”

பெரிய மேதை தன் கனவில் கண்ட அகக்காட்சியில் உலகம் உய்வதற்கும் அனைத்து மதத்தினரும் ஏற்றுக் கொள்ளும் அற்புதமான பரந்த மனப்பான்மை இந்து மதத்தில் உள்ளது, அதை ஏற்போம் என்று கூறுவது இன்றைய நிலையில் எவ்வளவு பொருத்தமாக உள்ளது!

********************

கனவுப் படைப்பாளிகள்

———————————————————————————————————————————————-

எண்           கண்டவர் பெயர்               படைப்பு

————————————————————————————————————————————————

01               ஐன்ஸ்டீன்                    தியரி ஆஃப் ரிலேடிவிடி

02               ராபர்ட் லூயி ஸ்டீவன்ஸன்   1892இல் எழுதிய Across the Plains

03               ஆர்னால்ட் டாய்ன்பி          உலக சரித்திரம்

04             சாமுவேல் டெய்லர் கூல்ட்ரிட்ஜ்   குப்ளாகான் (கவிதை)

05             ராமானுஜன்                    கணிதக் கண்டுபிடிப்புகள்

06             கெக்குலே                 பென்ஸீனில் கார்பன் அணுக்கள் அமைப்பு

07        பெர்ட்ரண்ட் ரஸ்ஸல்            பல கணிதத் தீர்வுகள்

08        ஜேம்ஸ் காமரான்         ஹாலிவுட் படம் – தி டெர்மினேடர்

09        ரெனி டெஸ்கார்டெஸ்     அறிவியல் அணுகுமுறை மற்றும் கார்டீஸியன்

கோ ஆர்டினேட் சிஸ்டம்

10        மேரி ஷெல்லி           உலகின் முதல் அறிவியல் நாவலான

“ப்ராங்கென்ஸ்டீன்”

11        பால் மக்கார்ட்னி            பிரசித்தி பெற்ற இசைப்பாடல் “Yesterday”

12        நீல்ஸ் போர்                 அணுவின் அமைப்பு

13    ஃப்ரெடெரிக் பாண்டிங்     (நோபல் பரிசு பெற்றவர்) பெனிசிலின் இஞ்ஜெக்‌ஷன்

14    எலியாஸ் ஹோ            தையல் மெஷின்

————————————————————————————————————————————————————