ஜூலை 2017 நற்சிந்தனை காலண்டர்

(ஹேவிளம்பி வருடம் ஆனி- ஆடி)

Written by London Swaminathan
Date: 29 June 2017
Time uploaded in London- 21-47
Post No. 4037

 
Pictures shown here are taken from various sources such as Facebook friends, Books, Google and newspapers; thanks.

விழா நாட்கள்:- விவேகாநந்தர் நினைவு தினம்-4; குரு பூர்ணிமா-8;

தட்சிணாயன புண்யகாலம்-17;  ஆடி அமாவாசை-23; ஆடிப் பூரம்-26;

நாக பஞ்சமி- 27

அமாவாசை-23; பௌர்ணமி-8; ஏகாதசி- 4, 19.

சுபமுகூர்த்த நாட்கள்- 3, 16

ஜூலை 1 சனிக்கிழமை

சுடர் ஆழியான் அடிக்கே சூட்டினென் சொல் மாலை

இடர் ஆழி நீங்குகவே

ஜூலை 2 ஞாயிற்றுக் கிழமை

என்று கடல் கடைந்தது? எவ்வுலகம் நீர் ஏற்றது?

ஒன்றும் அதனை உணரேன் நான்

ஜூலை 3 திங்கட் கிழமை

பார் அளவும் ஓர் அடிவைத்து, ஓர் அடியும் பார் உடுத்த

நீர் அளவும் செல்ல நிமிர்ந்ததே

ஜூலை 4 செவ்வாய்க் கிழமை

ஆல மர நீழல் அறம் நால்வர்க்கு அன்று உரைத்த

ஆலம் அமர் கண்டத்து அரன்

ஜூலை 5 புதன் கிழமை

அரன் நாரணன் -நாமம்; ஆன் விடை, புள்- ஊர்தி

உரை-நூல், மறை; உறையும் கோயில் -வரை, நீர்

ஜூலை 6 வியாழக் கிழமை

கரு அரங்கத்துள் கிடந்து கை தொழுதேன், கண்டேன்

திருவரங்கம் மேயான் திசை

ஜூலை 7  வெள்ளிக் கிழமை

திசையும் திசை உறு தெய்வமும் தெய்வத்து இசையும் கருமங்கள் எல்லாம் – அசைவு இல் சீர்க் கண்ணன்

ஜூலை 8 சனிக்கிழமை

மண்ணும் மலையும் மறி கடலும் மாருதமும்

விண்ணும் விழுங்கியது மெய் என்பர்- உலகு அளவும் உண்டோ உன் வாய்?

ஜூலை 9 ஞாயிற்றுக் கிழமை

வாய் அவனை அல்லது வாழ்த்தாது; கை உலகம்

தாயவனை அல்லது தாம் தொழா;

ஜூலை 10 திங்கட் கிழமை

அவர் அவர் தாம் தாம் அறிந்தவாறு ஏத்தி

இவர் இவர் எம்பெருமான் என்று சுவர்மிசைச்

சார்த்தியும் வைத்தும் தொழுவர்

ஜூலை 11 செவ்வாய்க் கிழமை

முதல் ஆவார் மூவரே; அம்மூவருள்ளும்

முதல் ஆவான் மூரி நீர் வண்ணன்

ஜூலை 12 புதன் கிழமை

பழுதே பல பகலும் போயின என்று அஞ்சி

அழுதேன்; அரவணைமேல் கண்டு தொழுதேன்

ஜூலை 13 வியாழக் கிழமை

வடி உகிரால்

ஈர்ந்தான் இரணியனது ஆகம்

ஜூலை 14  வெள்ளிக் கிழமை

தாமரை மலர்ச் சேவடியை வானவர் கைகூப்பி

நிரைமலர் கொண்டு ஏத்துவரால் நின்று

ஜூலை 15 சனிக்கிழமை

படை ஆழி; புள் ஊர்தி; பாம்பு- அணையான் பாதம்

அடை; ஆழி நெஞ்சே, அறி

ஜூலை 16 ஞாயிற்றுக் கிழமை

விரலோடு வாய் தோய்ந்த வெண்ணெய் கண்டு, ஆய்ச்சி

உரலோடு உறப் பிணித்த நான்று, குரல் ஓவாது ஏங்கி

ஜூலை 17 திங்கட் கிழமை

தொழுவார் வினைச் சுடரை நந்துவிக்கும் வேங்கடமே- வானோர்

மனச் சுடரைத் தூண்டும் மலை

ஜூலை 18 செவ்வாய்க் கிழமை

மலையால் குடை கவிழ்த்து, மா வாய் பிளந்து

சிலையால் மராமரம் ஏழ் செற்று, கொலையானை

போர்க்கோடு ஒசித்தனவும் பூங்குருந்தம் சாய்த்தனவும்

ஜூலை 19 புதன் கிழமை

ஆறிய அன்பு இல அடியார் தம் ஆர்வத்தால்

கூறிய குற்றமாக் கொள்ளல் நீ

ஜூலை 20 வியாழக் கிழமை

இரணியனைப் புண் நிரந்த வள் உகிர் ஆர் பொன் ஆழிக் கையால்

நீ மண் இரந்து கொண்ட வகை

ஜூலை 21  வெள்ளிக் கிழமை

வேதியர்கள் சென்று இறைஞ்சும் வேங்கடமே – வெண் சங்கம்

ஊதிய வாய் மால் உகந்த ஊர்

ஜூலை 22 சனிக்கிழமை

மீன் வீழக் கண்டு அஞ்சும் வேங்கடமே – மேல் அசுரர்

கோன் வீழக் கண்டு உகந்தான் குன்று

ஜூலை 23 ஞாயிற்றுக் கிழமை

புறன் உரையே ஆயினும், பொன் ஆழிக் கையான்

திறன் உரையே சிந்தித்திரு

ஜூலை 24 திங்கட் கிழமை

திருமகளும் மண்மகளும் ஆய்மகளும் சேர்ந்தால்

திருமகட்கே தீர்ந்தவாறு என் கொல்?

ஜூலை 25 செவ்வாய்க் கிழமை

மன மாசு தீரும்; அரு வினையும் சாரா;

தனம் ஆய தானே கைகூடும்

ஜூலை 26 புதன் கிழமை

தமர் உகந்தது எவ்வுருவம், அவ்வுருவம்தானே

தமர் உகந்தது எப் பேர், மற்று அப்பேர்

ஜூலை 27 வியாழக் கிழமை

மா தவத்தோன் தாள் பணிந்த வாள் அரக்கன் நீள் முடியை

பாதம் – அத்தால் எண்ணினான் பண்பு

ஜூலை 28  வெள்ளிக் கிழமை

வாரி சுருக்கி மதக் களிறு ஐந்தினையும்

சேரி திரியாமல் செந்நிறீஇ, கூரிய

மெய்ஞ்ஞானத்தால் உணர்வார் காண்பரே

ஜூலை 29 சனிக்கிழமை

சுழல் ஒன்று எடுத்து, ஒரு கை சுற்றி, ஓர் கைமேல்

சுழலும் சுராசுரர்கள் அஞ்ச அழலும்

செரு ஆ ழி ஏந்தினான்

ஜூலை 30 ஞாயிற்றுக் கிழமை

எண்மர், பதினொருவர், ஈர் அறுவர், ஓர் இருவர்

வண்ண மலர் ஏந்தி வைகலும் நண்ணி

ஜூலை 31 திங்கட் கிழமை

சென்றால் குடை ஆம்; இருந்தால் சிங்காசனம் ஆம்

நின்றால் மரவடி ஆம் நீள் கடலுள் என்றும் புணையாம் (ஆதிசேடன்)

நயவேன் பிறர் பொருளை; நள்ளேன் கீழாரோடு;

உயவேன் உயர்ந்தவரோடு அல்லால்; வியவேன்.

—Subham–

Written by London Swaminathan
Date: 28 June 2017
Time uploaded in London- 8-39 am
Post No. 4032
Pictures are taken from various sources such as Face book, Wikipedia and newspapers; thanks.

போர்ச்சுகல்லின் தலைநகரான லிஸ்பன் மாநகரில் ஐரோப்பிய ஹிந்து போரம் அமைப்பின் பொதுக்குழு கூட்டம் 23-06-2017ல் நடந்தேறியது. அதில் லண்டனிலிருந்து சென்ற அறுவர் குழுவில் நானும் இடம் பெற்றேன்.

(சாப்பாடு மட்டும் இலவசம்; மற்ற எல்லா செலவுகளும் எங்களுடையது. ஹரே க்ருஷ்ணா இயக்கத்தினர் அவர்களுடைய உணவு விடுதியில் எங்களுக்கு நல்ல சாத்வீக உணவு கொடுத்தனர். போர்ச்சுகல்லில் தங்கிய 4 நாட்களில் மசாலா, வெங்காயம், பூண்டு வாசனையே கிடையாது; வாழ்க ஹரே கிருஷ்ணா இயக்கம்))

பெல்ஜியம் நாட்டிலிருந்து வந்த பிரதிநிதி மஹாப்ரபுதாச, பொதுச்செயலர் என்ற முறையில் நல்ல செயல் திட்டங்களை முன் மொழிந்தார். வழக்கம் போல இந்த ஆண்டும் ஐரோப்பிய பார்லிமெண்டில் தீபாவளி விருந்து உண்டு என்று சொல்லி, அதற்காக தேதியைக் கொடுத்தார். கூட்டத்தின் இறுதியில் அடுத்த ஆண்டு இதாலியில் உள்ள ப்ளாரன்ஸ் நகரில் கூட்டம் நடத்தவும் இசைவு தெரிவிக்கப்பட்டது.

கூட்டத்தில் எழுப்பப்பட்ட முக்கிய விஷயங்கள்:

இந்துமதம் பற்றிப் பல நாடுகளில் பலவகையாக எழுதப்பட்ட பாடப் புத்தகங்கள் இருக்கின்றன. இவற்றில் பெரும் பிழைகளும் உள்ளன. பிழைகளைத் திருத்தி சரியான, ஒரே மாதிரியான பாடப் புத்தகம் கொண்டுவருவது நம் கடமை.

வங்க தேசம், பாகிஸ்தான், ஆப்கனிஸ்தான் போன்ற பல நாடுகளில் இந்துக்களுக்கு எதிராக ஏராளமான கொடுமைகள் நடக்கின்றன. இவைகளை யாரும் வெளியிடுவதே இல்லை. அவர்களைக் காப்பாற்றுவது நம் கடமை.

இதைவிட முக்கியமானது– இந்துக்களே இந்து மதத்தைக் குழப்புவதாகும். மற்ற மதத்தில் உள்ள உப பிரிவுகளைவிட (sub sects, movements, cults) நம் மதத்தில் பிரிவுகள் அதிகம்; தற்காலத்தில் ஏராளமான சங்கங்கள், இயக்கங்கள், அமைப்புகள் வேறு தோன்றிவிட்டன.  கிறிஸ்தவர்கள் பேசும்போது நான் கத்தோலிக்க அமைப்பைச் சேர்ந்தவன்; எங்கள் கொள்கையின்படி……….. என்று துவங்குவார். ப்ராடெஸ்டெண்ட் மதபோதகர் பேசுகையில் தன்னை சரியாக அறிமுகப் படுத்திக்கொண்டு, எங்கள் கருத்துப்படி…………….. என்று பேசுவார். ஆனால் இந்துக்கள் மட்டும் தான் சேர்ந்த அமைப்பின் கருத்து என்று சொல்லாது, தாந்தான் இந்துமதத்தின் பிரதிநிதி போலப் பேசுவதால், அதைக் கேட்கும் இந்து அல்லாத வெளிநாட்டினர் ஒன்றும் புரியாமல் திகைத்துப் போகிறார்கள். நமது , குழந்தைகளுக்கோ பெரும் குழப்பம் ஏற்படுகிறது.

அவர்களுக்கு நம் மதம் — மேலும் புரியாத புதிராக விடுகிறது! ஆகையால் யார் பேச எழுந்தாலும், எங்கு சென்று பேசினாலும், அவர்கள் எந்த இயக்கத்தைச் சார்ந்தவர்கள் என்று சொல்லிவிட்டு தங்களுடைய அணுகுமுறை இது– பார்வை இது —என்பதைச் சொல்ல வேண்டும்.

இதை மஹாப்ரபுதாச சொன்னபோது எல்லோரும் ஆதரவு தெரிவித்தனர்.

இது பற்றி நான் பேசியதாவது:

“இந்துமத்தின் மிகப்பெரிய பலம் — பலவகையான அமைப்புகள், இயக்கங்கள் இருப்பது (Biggest strength of Hinduism is Diversity).

இந்துமத்தின் மிகப்பெரிய பலவீனமும் அதே — பலவகையான அமைப்புகள், இயக்கங்கள் இருப்பது. (Biggest weakness of Hinduism is Diversity).

நமக்குள் ஒற்றுமைதான் அதிகம்; ஆனால் நாம் பின்பற்றும் மேம்போக்கான வழிமுறைகள், சடங்குகள் நம் குழந்தைகளை மிகவும் குழப்பும்; வெளிநாட்டினரை மிகவும் குழப்பும். ஆகையால் நாம் எந்த இயக்கத்தைச் சேர்ந்தவர், நாம் எந்த வழியைத் தேர்ந்தெடுத்து இருக்கிறோம் என்று விளக்கிப் பேசுவது நல்லது என்றேன். சற்று முன்னர் நாம் யோகம், ஆசனம் ஆகியவற்றைப் போதிக்கும் இயக்கங்கள் பற்றி விவாதித்தோம். அதில் கூட நமக்குக் கருத்து வேறுபாடுகள் இருந்தன. நம்க்குள்ளேயே இவ்வளவு என்றால் , விஷயமே தெரியாதவர்கள் குழம்ப்பிப் போவார்களே!! என்றேன்.

கூட்டத்திற்கு வந்த மற்றவர்கள் சொன்ன கருத்துகள்:

சிவ லிங்க வழிபாடு — அருவ வழிபாட்டின் சிறப்பை விளக்க வந்த வழிபாடு— என்பதை அறியாமல் அது பற்றி வெளிநாட்டுப் புத்தகங்களில் ஆபாசமாக எழுதப்பட்டதை ஒருவர் எடுத்துக் காட்டினார் ( நான் அவரிடம் தனிப்பட்ட முறையில் பேசுகையில் இது பற்றி காஞ்சி சுவாமிகள் சொன்ன அற்புதமான விளக்கத்தை என் பிளாக் கட்டுரையில் போட்டிருப்பது பற்றிச் சொன்னேன்).

வெளிநாடுகளில் மக்கட் தொகை கணக்கெடுப்பின்போது, படிப்பறிவில்லாத பலர் தான் சேர்ந்த இயக்கத்தின் பெயரைச் சொல்லி விடுகின்றனர். அப்படிப்பட்ட ஒரு ஐட்டம் (item) அந்த லிஸ்டில்(list) இல்லாததால், அவர்களை  இந்து என்று குறிக்காமல், எந்த மதமும் சாராத பட்டியலில் சேர்த்துவிட்டுப் போய்விடுகிறார்கள். இதனால் இந்துக்களின் எண்ணிக்கை குறைவாகக் காட்டப்படுகிறது!!

இது விசயமாக நாங்கள் (Hindu Forum of Britain)  பிரிட்டனில் புதிய யோசனைகளை அரசுக்குத் தெரிவித்து வருகிறோம்.

ஹரே க்ருஷ்ணா இயக்கம், சுவாமிநாராயண் இயக்கம் போன்ற பெயர்களை எழுதி அடைப்புக் குறிக்குள் “இந்து” என்று எழுதுவது ஒரு யோசனை. ஆனால் முதலில் இதை அந்த இயக்கங்களும் ஏனையோரும் ஒப்புக்கொள்ளவேண்டும். ஆகையால் இந்த யோசனைகளை அனுப்பி இதைவிட வேறு என்ன முறைகள் உள்ளன என்றும் கேட்டு வருகிறோம்.

ஆக நமக்குள்ள பிரச்சனைகளை நாம் ஆக்க பூர்வமாக அணுகி நம் குழந்தைகளுக்கும், நம்மை அணுகும் வெளிநாட்டினருக்கும் தெளிவு பிறக்கச் செய்வது நம்முடைய தலையாய கடமை.

-சுபம்–

Written by S NAGARAJAN

Date: 28 June 2017

Time uploaded in London:-  6-18 am

Post No.4031

Pictures are taken from different sources such as Face book, Wikipedia, Newspapers etc; thanks. 

ஹிந்து தர்ம அறநெறிக் கதை

பாவத்தின் தந்தை யார்? அரசனின் கேள்வி – பண்டிதரின் திண்டாட்டம்!

ச.நாகராஜன்

அரசன் ஒருவனுக்குத் திடீரென்று சந்தேகம் ஒன்று வந்தது.

பாவத்தின் தந்தை யார்?

அரசவையில் இருந்த பண்டிதரை தனது நண்பன் போலவே அவன் நடத்தி வந்தான்.

அவரை நோக்கி, “பாவத்தின் தந்தை யார்? இதற்கான சரியான பதிலை நீங்கள் சொல்ல வேண்டும்.” என்றான்.

பண்டிதருக்கோ பெரும் குழப்பம் ஏற்பட்டது.

யார் பாவத்தை உருவாக்கினார்கள்? யாரைப் பாவத்தின் தந்தை என்று சொல்வது?

அவரது முகத்தில் நிலவிய குழப்பத்தைக் கண்ட அரசன், “சரி, இதற்கு உடனடியாகப் பதில் சொல்ல வேண்டாம். ஒரு வாரத்திற்குள் பதில் சொல்லுங்கள். ஆனால் சரியான பதிலைச் சொல்லாவிட்டால் தகுந்த தண்ட்னை உண்டு” என்று எச்சரித்தான்.

வீடு திரும்பிய பண்டிதர் தனக்குத் தெரிந்த நூல்களை எல்லாம் புரட்டினார். சரியான பதிலைக் காணோம். தெரிந்தவர்களிடம் கேட்டுப் பார்த்தார். அவர்கள் உதட்டைப் பிதுக்கினர்.

நாட்கள் கழிந்தன.

ஊரில் ஓடும் நதிக்கரையின் ஓரமாக சோகமான முகத்துடன் அவர் நடந்து சென்று கொண்டிருந்தார்.

நாளைக்குள் பதில் சொல்ல வேண்டுமே!

அவர் முகத்தில் நிலவிய குழப்பதைப் பார்த்த தாசி ஒருத்தி பண்டிதரை அழைத்தாள்.

“என்ன பண்டிதரே! எப்போதும் உற்சாகமாகப் போவீர்கள். இன்று ஒரே சோகமாக இருக்கிறது முகம். என்ன விஷயம்?” என்று கேட்டாள்.

பண்டிதர், “பாவத்திற்குத் தந்தை யார் என்று தெரியாமல் தவிக்கிறேன்” என்று புலம்பினார்.

“அட, இது தெரியாதா? எனக்குத் தெரியுமே” என்று அவள் லேசாகச் சொன்னாள்.

பண்டிதருக்குத் தூக்கிவாரிப் போட்டது.

இவ்வளவு நம்பிக்கையுடன் சொல்கிறாளே, பதில் தெரியும் என்று!!

“பதிலைச் சொல்லேன்” என்று கெஞ்சினார் பண்டிதர்.

“சொல்கிறேன். ஆனால் இங்கல்ல, எனது வீட்டிற்கு வாரும். அங்கு வர தட்சிணையாக ஒரு பொன் காசு தருகிறேன்.” என்ற அவள் ஒரு பொற்காசைத்  தந்தாள்.

அதை வாங்கிக் கொண்ட பண்டிதர் தன் மனதிற்குள் இதற்கு பிராயச் சித்தம் செய்து கொள்ளலாம் என்று தனக்குத் தானே சமாதானம் சொல்லிக் கொண்டார்.

தாசியின் வீட்டை அடைந்த பண்டிதர், “இப்போது பதிலைச் சொல்லேன்” என்றார்.

“என் படுக்கை அறைக்கு வாருங்கள். இருபது பொற்காசு தந்து பதிலைச் சொல்கிறேன்” என்றாள் அவள்.

பண்டிதர் அவளது படுக்கை அறைக்குச் சென்றார். அடடா, என்ன அற்புதமான சயன அறை!

“சரி, இப்போது பதிலைச் சொல்லேன்” என்றார் பண்டிதர்.

“வந்தது வந்தீர்கள். என் மடியில் அமரந்து கொண்டு பதிலைக் கேளுங்கள். வாயில் கொஞ்சம் சுவையான மாமிசத்தை வேறு சாப்பிடலாம்” என்றாள் அவள்.

“சும்மா உட்கார வேண்டாம். நூறு பொற்காசுகள் தருகிறேன். என் மார்பைப் பாருங்கள். அதை அலங்கரிக்கும் வைர மாலையையும் கூடவே தருகிறேன்” என்றாள் அவள்.

பண்டிதர் அவர் மார்பகங்களைப் பார்த்தார். அதில் அலங்கரிக்கும் வைர மாலை அவர் கண்களைக் கவர்ந்தது.

“சரி, பெரிதாக பிராயச்சித்தம் செய்து கொள்ள வேண்டியது தான்!” என்று அவர் மனதை சமாதானப் படுத்திக் கொண்டு அவள் மடியில் அமர்ந்தார்.

ஒரு மாமிசத் துண்டை கையில் எடுத்து வாயில் போட இருந்த தருணம், அந்த தாசி திடீரென் எழுந்தாள். பண்டிதரைத் தூக்கித் தள்ளியதோடு பளார் என்று  ஒரு அறை அவரது கன்னத்தில் விட்டாள்.

பண்டிதர் துடிதுடித்துப் போனார்.

“இப்போது தெரிந்ததா, விடை? பாவத்தின் தந்தை ஆசை, பண்டிதரே, பேராசை. தெரிந்ததா, பதில்?” தாசியின் குரல் பண்டிதரின் மனதில் ஆழப் பதிந்தது.

அவருக்கு க்ஷண நேரத்தில் ஞானம் கிட்டியது.

கையில் இருந்த பொற்காசுகளை எல்லாம் தூக்கி எறிந்தார்.

சாலை வழியே “விடை தெரிந்து விட்டது, விடை தெரிந்து விட்டாது” என்று கத்திக் கொண்டே ஓடலானார்.

நேராக அரண்மனைக்குச் சென்ற பண்டிதர் மன்னரைச் சந்தித்தார். மக்கள் கூட்டமும் பெருகி விட்டது.

“மன்னா! விடை தெரிந்து விட்டது. பாவத்தின் தந்தை யார் என்று எனக்குத் தெரிந்து விட்டது” என்று சொல்லி விட்டு நடந்ததை அனைத்தும் அப்படியே சொன்னார்.

“மன்னா! எனக்குத்  தகுந்த தண்டனை கொடுத்து விடுங்கள். பண்டிதராய் இருந்தும் ஒரு இழிவான காரியத்திற்கு இணங்கினேன். என்னை தேச பிரஷ்டம் செய்து விடுங்கள்” என்று உருக்கமாக வேண்டினார்.

“ஆஹா! பாவத்தின்  தந்தை ஆசையா? பேராசையா. சரியான் பதில்” என்று மகிழ்ச்சியுடன் கூவிய மன்னன் பண்டிதரை ந்ண்பன் என்ற முறையில் கட்டிக் கொண்டார்.

“நாட்டை விட்டு வெளியேறுவதா? ஒருக்காலும் இணங்க மாட்டேன் அதற்கு! உங்களுற்க்கு ஞானம் வந்து விட்டதை உணர்கிறேன். இந்தக் கணம் முதல் நீங்களே எனது குரு. ஒரு நாளும் தவறான வழியில் செல்ல முடியாத நீங்களே எனக்குத் தகுந்த வழிகாட்டி. என்னை சீடனாக ஏற்றுக் கொள்ளுங்கள்” என்றான் மன்னன். பண்டிதரை அடி பணிந்து வணங்கினான்.

ஆமாம், பாவத்தின் தந்தை பேராசை தான்!

***

Written by London Swaminathan
Date: 27 June 2017
Time uploaded in London- 7-19 am
Post No. 4029
Pictures are taken from various sources such as Face book, Wikipedia and newspapers; thanks.

உலகின் மிகப் பெரிய பணக்கார குடும்பங்களில் ஒன்று ராக்பெல்லர் குடும்பம். எண்ணெய், எரி வாயு ஆகிய இரண்டு  தொழில்களிலும் கோடிக் கணக்கில் சம்பாதிப்பவர்கள். ஒரு முறை ஒரு அமெரிக்க பத்திரிக்கை  நிருபர் அவரிடம் கேள்வி கேட்டார்.

மிஸ்டர் ராக்பெல்லர், பில்லியன் டாலர் கணக்கில் சம்பாதிக்கிறீர்கள். இன்னும் எவ்வளவு சம்பாதிக்கப் போகிறீர்கள்? உங்கள் நோக்கம் என்ன? என்று கேட்டார்.

ராக்பெல்லர் சிறிதும் தயங்கவில்லை; தனது கை விரல்களை ஒரு அங்குல இடைவெளிக்கு ( கட்டை விரல் கீழே, மற்ற நான்கு விரல்களும் மேலே) விரித்துக்கொண்டு இன்னும் கொஞ்சம்தான் என்றார். எவ்வளவு பொருள் பொதிந்த வாசகம்; எவ்வளவு அர்த்த புஷ்டியான வாக்கியம்! அக்ஷர லக்ஷம் பெறும்.

ஆசைக்கு அளவே இல்லை என்பதை சிறு விரல்களால் காட்டி விட்டார். அலை ஓய்ந்து சமுத்திர ஸ்நானம் செய்தவனும் இல்லை; போதும் இனிமேல், எனக்கு வேண்டாம் என்று சொல்லும் பணக்காரனும் இல்லை.

ஆர். எஸ்.எஸ் தலைவர் குருஜி மாதவ சதாசிவ கோல்வல்கர் மதுரை முகாம் ஒன்றில் பேசுகையில் கூறினார்; ஆசையே கூடாது; எல்லாம் பொது மக்களுடையது என்பதை உணர்த்தும் முகத்தான் நம் முன்னோர்கள் யாகத்தில் நெய்யை விடும் போது “இதம் ந மம” (இது என்னுடையது அல்ல) என்று சொல்லி விடுவர். அது மட்டுமல்ல. ஆசைத் தீயை அணைக்க முடியாது என்பதையும் இந்த யாக யக்ஞங்கள் உணர்த்தும். எப்படி நெய்யை  விட விட அக்னி சுவாலை விட்டு எரியுமோ அதே போல ஆசைக்குத் தீனி போடப் போட, ஆசைத்தீயும் வளரும் என்றார்.

ராம கிருஷ்ண பரமஹம்சர் இதை ஏழு ஜாடி அம்பட்டன் கதையில் இன்னும் அழகாக விளக்குகிறார். மஹாத்மா காந்தியும் போதும் என்ற எண்ணம் வளர வேண்டும் ;எல்லோருக்கும் எல்லாமும் கிடைக்க வேண்டும் என்றார். தமிழர்களோ ஆயிரக் கணக்கான ஆண்டுகளுக்கு முன்னரே “போதும் என்ற மனமே பொன் செய்யும் மருந்து” என்று சொல்லி வைத்தனர்.

நான் முன்னரே எழுதிய ஏழு ஜாடி அம்பட்டன் கதையைப் படிக்கவில்லையானால் இதோ படியுங்கள்:–

ராமகிருஷ்ண பரமஹம்சர் சொன்ன பேய்க்கதையை வள்ளுவன் குறள் 565-ல் சொன்னதை 20 ஆண்டுகளுக்கு முன் லண்டனில் இருந்து வந்த ‘’மேகம்’’ பத்திரிக்கையில் எழுதினேன்.

ஏற்கனவே எழுதிவிட்டதால் பேய்க் கதையை மிகவும் சுருக்கமாகப் பார்போம்:

‘’ராஜாவுக்கு முடிவெட்டும் ஒரு நாவிதன் காட்டு வழியாக வந்தான். மரத்தின் மீதிருந்த பிரம்ம ராக்ஷசன் (பேய்), உனக்கு ஏழு ஜாடி தங்கம் வேண்டுமா? என்று கேட்டது. யாருக்குதான் ஆசை இருக்காது? நாவிதனும் வேண்டும் என்று சொல்லவே ஏழு ஜாடி தங்கம் கிடைத்தது. ஆனால் ஒரே ஒரு குறை! ஒரு ஜாடியில் மட்டும் தங்கம் கொஞ்சம் குறைவாக இருந்தது. அதை எப்படியாவது நிரப்பவேண்டும் என்ற ஆசை வந்தது. உழைத்து உழைத்து ஓடாகிப் போய் எத்தனை போட்டாலுல் ஜாடி நிரம்பவே இல்லை.

ராஜாவுக்கு முடி வெட்டப் போகும் போதெல்லாம் மகிழ்ச்சியாக அவருடன் பேசிவிட்டு கூடுதலாகப் பணத்துடன் திரும்புவது அவனது வாடிக்கை. ஆனால் ஏழு ஜாடி தங்கம் வந்த பின் அந்த மகிழ்ச்சி எல்லாம் மாயமாய்ப் பறந்தோடி விட்டது. முகம் வாடியது, உடலும் மெலிந்தது. இவனது நடத்தையில் மாற்றம் வந்தது ராஜாவுக்கும் தெரிந்தது. எவ்வளவோ கேட்டுப் பார்த்தார். ஒரு வேளை நாடே சீர் கெட்டுப் போய்விட்டதோ என்று ராஜாவை வேறு வகை பயம் பிடித்துக்கொண்டது.. இவன் எவ்வளவு கேட்டும் சொல்லாமல் எப்போது பார்த்தாலும், கூடக் காசு வேண்டும் என்று சொன்னவுடன், ஒரு நாள் ராஜாவுக்குக் கோபம் வந்துவிட்டது, ‘’ஏ, சனியனே, என்ன? எங்கேயாவது ஏழு ஜாடித் தங்கத்தை எடுத்துவந்து விட்டாயா?’’ இப்படிப் பணத்துக்காக பேயாகப் பறக்கிறியே!’’ என்று திட்டினார்.

நாவிதனுக்குத் தூக்கிவாரிப் போட்டது, ‘’ராஜா, மன்னித்துவிடுங்கள், புதையல் கிடைத்ததை உங்களிடம் சொல்லவில்லை. மன்னித்துவிடுங்கள். வீட்டுக்கு ஓடிப்போய் கொண்டுவந்து 7 ஜாடி தங்கத்தையும் ஒப்படைத்துவிடுகிறேன் என்றான் நாவிதன். ராஜாவோ, சிரித்துக் கொண்டே, ‘’அந்த ஏழு ஜாடி தங்கத்தை இங்கே கொண்டுவந்து விடாதே. ஓடிப்போய் மரத்துக்கு அடியில் வைத்துவிட்டுத் திரும்பிப் பார்க்காமல் வந்து விடு’’ என்றார்.

நிறையாத ஏழாவது ஜாடி என்பது மனிதனின் பேராசையைக் குறிக்கும். அது எப்போதுமே நிறையாதது. அதுதான் வள்ளுவர் சொன்ன ‘பேய் காத்த செல்வம்’. ராமகிருஷ்ண பரமஹம்சரும் சொன்ன இக்கதை, நாடு முழுதும் நிலவிய கதை. அதைத் தமிழ்நாட்டோரும் அறிந்திருந்தனர். வள்ளுவன் இதை

‘’அருஞ்செவ்வி இன்னாமுகத்தான் பெருஞ்செல்வம்

பேஎய்கண் டன்னது உடைத்து’’ (குறள் 565)—என்றார்.

பொருள்: மக்களால் எளிதில் காண முடியாத, கோபம் கொண்ட மன்னனிடம் இருக்கும் செல்வம், பேய் காத்த செல்வம் போலப் பயன்படாது.

ஆசைத் தீயை அணைப்போம்; அமைதியாக, இன்பமாக வாழ்வோம்.

–subham–

The above story is from my old post —வள்ளுவன் சொன்ன சுவையான கதைகள்; posted on 18 July 2012

Tiruvalluvar statue in London | Tamil and Vedas

https://tamilandvedas.com/tag/tiruvalluvar-statue-in-london/

மரத்தின் மீதிருந்த பிரம்ம ராக்ஷசன் (பேய்), உனக்கு ஏழு ஜாடிதங்கம் வேண்டுமா? என்று கேட்டது. யாருக்குதான் ஆசை இருக்காது?

இதம் ந மம | Tamil and Vedas

https://tamilandvedas.com/tag/இதம்-ந-மம/

31 Oct 2016 – இந்த,” இதம் ந மம” ( என்னுடையது அல்ல) என்பது புறநானூற்றில் கடலுள் மாய்ந்த இளம் பெருவழுதி என்ற மன்னர் பாடிய பாட்டிலும் …

–subham–

rime Minister of Portugal Antonio Costa presented Narendra modi, PM of India with a jersey autographed by the famous footballer Chritiano Ronaldo 24th June 2017

Written by S NAGARAJAN

Date: 27 June 2017

Time uploaded in London:-  6-07 am

Post No.4028

Pictures are taken from different sources such as Face book, Wikipedia, Newspapers etc; thanks. 

உத்வேகமூட்டும் வீரர்

ரொனால்டோவின் நன்றி!

ச.நாகராஜன்

“எந்நன்றி கொன்றார்க்கும் உய்வுண்டாம் உய்வில்லை

செய்நன்றி கொன்ற மகற்கு”

என்பது வள்ளுவர் வாக்கு.

உண்மையில் நடந்த ஒரு சம்பவம் இந்தக் குறளுக்குத் தகுந்த ஒரு எடுத்துக்காட்டாகும்.

மிக பிரபலமான ஃபுட் பால் விளையாட்டு வீரரான கிறிஸ்டியானோ ரொனால்டோவின் (Christianao Ronaldo) வாழ்க்கையில் இளமைப் பருவத்தில் நடந்த சம்பவம் இது.

ஸ்பெயின் தேசத்தின் மிகச் சிறந்த ஃபுட்பால் வீரர் என்ற பெயரைப் பெற்றவர் அவர்.

அவருக்கு ஆல்பர்ட் என்ற ஒரு அருமை நண்பர் உண்டு. அவரைப் பற்றி ரொனால்டோ ஒரு இணையதள் பேட்டியில் இப்படிக் குறிப்பிட்டார்:

“எனது ஃபுட்பால் வாழ்க்கையில் ஆல்பர்ட்டுக்கு ஒரு முக்கிய பங்கு உண்டு.லிப்ஸனில் நாங்கள் இருவரும் ஒரு ஃபுட்பால் கிளப்பில் விளையாடிக் கொண்டிருந்தோம். ஒரு நாள் லிப்ஸன் ஸ்போர்டிங் கிளப்பிலிருந்து உயர் அதிகாரிகள் எங்கள் விளையாட்டைப் பார்க்க வந்தனர். அவர்களில் ஒருவர், “உங்களில் அதிகம் ஸ்கோரை எடுப்பவருக்கு  ஸ்போர்டிங் கிளப் ஃபுட்பால் அகாடமியில் சேர சிபாரிசு செய்வோம்” என்றார்.

எங்களது டீம் மூன்றுக்கு பூஜ்யம் என்ற கோல் கணக்கில் ஜெயித்தது.

முதல் கோலை நான் எடுத்தேன். இரண்டாவது கோலை ஆல்பர்ட் எடுத்தார்.அடுத்தாற்போல பந்து எதிரணிக்குச் செல்லுகையில் அந்த அணியின் கோல் கீப்பர் ஒன்றும் செய்ய இயலாத நிலையை ஆல்பர்ட் ஊகித்தறிந்தார். ஆனால் பந்தை அவரே கோலுக்குச் செலுத்தாமல் என்னிடம் தள்ளி விட்டார். நான் பந்தை அடித்து கோலை எடுத்தேன். இரண்டு கோல்களைப் போட்டதால் என்னையே அகாடமியில் சேர சிபாரிசு செய்தனர். அங்கு சேர்ந்தது என் ஃபுட்பால் வாழ்க்கையில் ஒரு பெரிய திருப்பு முனையாக் அமைந்தது. பின்னால் பல வேற்றிகளைப் பேற அதுவே வழி வகுத்தது.

பந்தயம் முடிந்த பிறகு ஆல்பர்ட்டிடம் நான், “ஏன் அந்த் கோலை நீயே எடுக்கவில்லை. என்னிடம் பந்தைத் தள்ளி விட்டு என்னை கோல் ஸ்கோர் செய்ய வைத்தாயே, ஏன்?” என்று கேட்டேன்.

அதற்கு ஆல்பர்ட்,”என்னை விட நீ நன்கு பெரிய ப்ளேயராக வர முடியும் என்பதால் தான்! உனக்கு ஒரு பெரிய எதிர்காலம் காத்திருக்கிறது. அதனால் தான்” என்று பதில் கூறினார்.

சில வருடங்கள் கழிந்தன.ஒரு பத்திரிகையாளர் ஆல்பர்ட்டை சந்தித்தார்.

மேலே கண்ட சம்பவம் உண்மை தானா என்று அவர் கேட்டார்.

அதற்கு ஆல்பர்ட்,”எனது ஃபுட் பால் வாழ்க்கையில் நான் ஒன்றும் பெரிதாகச் சாதித்து விட முடியாது என்பது எனக்கு நன்கு தெரியும். ஆனால் ரொனால்டோ நிச்ச்யம் பெரிய ஆளாக வருவார் என்று நம்பினேன். ஆகவே தான் அவருக்கு கோல் அடிக்க வாய்ப்பை ஏற்படுத்தினேன்.இப்போது நான் வேலை ஏதும் இல்லாமல் இருக்கிறேன். ஆனால் என்னுடன் விளையாடிய ரொனால்டோவோ பெரும் புகழ் பெற்றவராக ஆகி விட்டார்” என்று கூறினார்.

பத்திரிகையாளர் உடனே ஆல்பர்ட்டிடம்,” உங்களுக்கு வேலை இல்லை என்கிறீர்கள். ஆனால் பார்த்தால் நல்ல செல்வச் செழிப்புடன் இருப்பதாகக் காணப்படுகிறீர்களே”. இதன் இரகசியம் என்ன?” என்று வியந்து கேட்டார்.

“அட, அதுவா!இதெல்லாம் ரோனால்டோ எனக்கு அளித்தது தான்! அனைத்து பரிசுகளும் ரொனால்டோ தந்தவையே. இன்னும் அவர் என்னைத் தினமும் நினைத்துக் கொண்டிருக்கிறார். நன்றியுடன் அவர் தரும் பரிசுகளே என்னிடம் உள்ளன. என்னை வாழ வைக்கின்றன” என்றார்.

பத்திரிகையாளர் பிரமித்தார். அவர் வாயிலாக உலகம் ரொனால்டோவின் நன்றி பாராட்டும் பெரும் குணத்தை அறிந்தது.

செய் நன்றி கொன்றவர்க்கு உய்வே இல்லை என்பதைத் தெரிந்து கொள்வது ஒன்று. அதை உள்ளத்தில் ஏற்றி நன்றி பாராட்டுவது இன்னொன்று.

ரொனால்டோவின் நன்றி பாராட்டும் குணம் வள்ளுவர் வழி வாழும் செம்மல் அவர் என்பதைக்  காட்டுகிறது.

உத்வேகமூட்டும் செயலைப் புரிபவர் எங்கிருந்தாலும் எந்த நாட்டைச் சேர்ந்தவரானாலும் நல்லவரே!

ரொனால்டோ ஃபுட்பால் வீரர் மட்டுமல்ல; அரிய குணம் கொண்ட அற்புத மனிதரும் கூட!

***