WRITTEN BY S NAGARAJAN

Post No. 9261

Date uploaded in London – –14 FEBRUARY  2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

ஹெல்த்கெர் பிப்ரவரி 2021 இதழில் வெளியாகியுள்ள கட்டுரை!

கொரானா காலத்தில் தெரிந்து கொள்ள வேண்டிய அடிப்படை உண்மைகள் சில!

ச.நாகராஜன்

கொரானா காலத்தில் தெரிந்து கொள்ள வேண்டிய அடிப்படை உண்மைகள் சுவாசத்தைப் பற்றியதாகும். இது கொரானா காலத்திற்கு மட்டும் பொருந்தாது; எந்தக் காலத்திற்கும் பொருந்தும் உண்மைகளாகும்.

சுவாசிப்பது என்பது ஜீவனுடன் இருப்பதாகும்.

நாடோடிப் பாடல் ஒன்று உண்டு:

தூங்கையிலே வாங்குகிற மூச்சு;

அது சுழி மாறிப் போனாலும் போச்சு!

ஆம், கொரானாவினால் பாதிக்கப்பட்டவர்கள் மூச்சு விடத் திணறுவதைப் பார்க்கும் போது பகீர் என்கிறதில்லையா?

நன்கு சுவாசிப்பதானது என்னென்ன நன்மைகளைத் தருகிறது?

1. இதய நோய்களைத் தடுக்கிறது; தவிர்க்கிறது. முக்கியமாக மாரடைப்பைத் தடுக்கிறது.
2. மனச்சோர்வை வரவிடாமல் செய்கிறது. கவலையைப் போக்குகிறது.
3. வயிற்றில் அமிலத்தன்மையைத் தடுப்பதோடு மலச்சிக்கலை இல்லாமல் செய்கிறது.
4. நல்ல தூக்கத்தை உறுதி செய்கிறது. நல்ல தூக்கம் உடல் செயல்பாட்டை நன்கு பாதுகாப்பதோடு நாள் முழுவதும் புத்துணர்ச்சியைத் தருகிறது.
5. ஆஸ்த்மாவை அதிகமாக்காமல் அத்துடன் போராடி கட்டுப்பாடாக வைக்க உதவுகிறது.
6. நல்ல ஆக்கபூர்வமான சக்தியை உடலுக்கு நல்குகிறது.
7. நுரையீரலை நன்கு பாதுகாப்பதனால் நீடித்த ஆயுளை உறுதி செய்கிறது.
8. ஒவ்வாமை எனப்படும் அலர்ஜிகளை வேரோடு களைகிறது.
9. சக்தி நிறைந்த வாழ்வைத் தருகிறது; அதனால் மன நிம்மதி ஏற்படுகிறது.

ஆகவே சரியாக சுவாசிக்க வேண்டும்; ஆரோக்கியத்தை உறுதிப் படுத்த வேண்டும்; அதை மேம்படுத்திக் கொண்டே இருக்க வேண்டும்.

நல்ல சுவாசத்தைக் கொள்ள பிராணாயாமம் உதவுகிறது; என்றாலும் இதை யோகா மாஸ்டரிடமிருந்தே கற்க வேண்டும்- பக்க விளைவுகள் ஏற்படாமல் இருக்க!

ஒரு எளிய முறை மூச்சை நன்கு உள்ளே இழுப்பதாகும். பிறகு நீண்ட ‘ஓம்’ என்ற ஒலியை எழுப்பினால் வெளி விடும் மூச்சு தானாகவே நீண்டு விடும்.

நாசியில் உள்ள இடது மற்றும் வலது துவாரங்கள் வழியே சுவாசிக்கும் முறை சிறந்தது என்றாலும் இதை யோகா மாஸ்டரிடமே கற்றுக் கொள்ள வேண்டும்.

இந்த வேக யுகத்தில் அனைவரும் வேக வேகமாக சுவாசிக்கிறோம். லயத்துடன் இல்லாமல் மனம் போன போக்கில் சுவாசிக்கிறோம். அத்துடன் வாகனப் புகையால் மாசுபடுத்தப்பட்ட சாலைகள் வழியே சென்று புகைக் காற்றை – சுவாசத்தை – உள்ளிழுக்கிறோம்.

அன்றாடம் காலை நேரத்தில் நல்ல தூய காற்று இருக்கும் பூங்காங்கள், சோலகள், கடற்கரை என முடிந்த மட்டில் நமது இயற்கை சூழ்நிலைகளை அனுசரித்து நல்ல சுவாசத்தை அனுபவிக்க வேண்டும்.

இந்த சுத்தமான காற்று உள்ள சூழ்நிலையில் 30 நிமிடம் அன்றாடம் நடைப் பயிற்சி மேற்கொண்டால் அது இன்னும் சிறப்பாக அமையும்.

நடைப்பயிற்சியின் பலன்களும் நமக்குச் சேரும்.

உடல் வெப்பத்தைத் தவிர்க்க உதவும் உணவு வகைகளைப் பற்றியும் சற்று தெரிந்து கொள்வது நல்லது.

கோடை காலம் ஆரம்பிக்க இருப்பதால் ஆயுர்வேதம் கூறுவது போல வெப்பத்தை அதிகரிக்கும் உணவு வகைகளைத் தவிர்க்க வேண்டும். இது பித்தம் கூடுவதைத் தடுக்கும்.

உடலில் நீர்ச்சக்தியை அதிகரிப்பதே நமது நோக்கம் என்பதால் கீரை வகைகளை அதிகமாகச்  சேர்த்துக் கொள்ள வேண்டும்.

வெள்ளரிக்காய், வாடர்மெலான், ஆரஞ்சுப் பழம், கரும்பு, திராக்ஷை ஆகியவற்றை உண்ணலாம்.

மாங்காய் உமிழ் நீர் சுரப்பதை அதிகமாக்கி தாகம் ஏற்படுவதைக் கட்டுப்படுத்துகிறது.

நல்ல மாம்பழமும் உருளைக் கிழங்கும் சக்தி இழப்பை ஈடு செய்கிறது.

வெட்டிவேரை நீரில் போட்டு அந்த நீரைக் குடிப்பது குளுமையைத் தரும்.

ராகி, தேங்காய், வெங்காயம், மோர், இளநீர் ஆகியவை உடலுக்கு நல்லது.

தவிர்க்க வேண்டியவை :

பப்பாளிப் பழம், அதிக அளவிலான ஊறுகாய்கள், மிளகாய் சேர்ந்த கார உணவுகள், அமிலத்தை உருவாக்கும் உணவு வகைகள் ஆகியவை தவிர்க்கப் பட வேண்டும்.

விடமின்கள் பற்றிய அறிவும் நமது உடலைப் பாதுகாப்பதில் மிகப் பெரும் பங்கு வகிக்கிறது.

விடமின் ஏ : கண்பார்வைக்குத் தேவையானது விடமின் A. வண்ணங்களை அறியவும், இரவுப் பார்வைக்கும் இது தேவை.

விடமின் பி (B) : இது ஒரு பெரிய தொகுதி. இதில் ஏராளமான வகைகள் உள்ளன. ஒவ்வொரு அங்கத்திற்கும் ஆக்ஸிஜனை ஏந்திச் செல்லும் ரத்த செல்களுக்கு இது உதவுகிறது.

விடமின் சி (C) : நோய்வாய்ப்படுவதையும் காயம்பட்டால் ரத்த வெளிப்போக்கையும் தடுக்க உதவுவது விடமின் சி.

விடமின் டி (D) :வலுவான எலும்புகள், உறுதியான பற்கள் தேவை என்றால் விடமின் டியை உணவு வகைகளில் சேர்த்துக் கொள்ள வேண்டும். இதற்குத் தேவையான கால்சியம் உடலில் சேர்வதை இது உறுதிப் படுத்துகிறது.

விடமின் இ (E) கண் மற்றும் உடல் திசுக்கள் வலிமையுடன் இருக்க விடமின் இ உதவுகிறது. தோல் பளபளத்து மினுமினுக்க விடமின் இ தேவை.

விடமின் கே (K) இது ரத்தம் உறைவதைத் தடுக்கிறது. ரத்தக் கட்டிகள் ஏற்படுவது இதனால் தடுக்கப்படுகிறது. பால் சம்பந்தப்பட்ட பொருள்களும், கீரையும் விடமின் கே உடலில் சேர்வதற்குத் தேவை.

புத்தம் புதிய கறிகாய்கள், பால்  உள்ளிட்டவை அன்றாட உணவில் சேர்க்கப்பட்டால் ஆரோக்கியம் உறுதி செய்யப்படும்.

ஆக,

சரியாக மூச்சு விடல், காலத்திற்கு ஏற்ற உணவு, (இந்தக் கட்டுரையில் கோடை காலத்திற்கான உணவு வகைகளைப் பார்த்தோம்) விடமின்கள் சமச்சீர் அளவில் உள்ள உணவு ஆகிய இந்த மூன்றையும் எண்ணி வாழ்க்கையை அமைத்துக் கொண்டால் கொரானா உள்ளிட்ட கொடும் நோய்களைப் போ போ என்று சொல்லலாம்!

***

tags- கொரானா,  உண்மைகள்,

WRITTEN BY S NAGARAJAN

Post No. 9257

Date uploaded in London – –13 FEBRUARY  2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

SECOND PART OF GNANAMAYAM BROADCAST; IF YOU WANT TO LISTEN TO HIS SPEECH, PLEASE  GO TO FACEBOOK.COM/ GNANAMAYAM

   நான்காம் வயதில் சாந்தி தேவி என்ற குழந்தை தனது முன் ஜென்மத்தில் தான் கேதார் நாத் கௌபேயின் மனைவியாக இருந்ததாகக் கூறினாள். மதுராவிலிருந்து சற்று தள்ளி இருந்த ஊரில் வாழ்ந்து வந்த கேதார் நாத் ஒரு துணி வியாபாரி. அவர் இருக்கும் விலாசத்தை அந்தக் குழந்தை தந்ததோடு முன் ஜென்மத்தில் நடந்த அனைத்து விவரங்களையும் விளக்கமாகக் கூறியது. கேதார் நாத் மறுமணம் செய்து கொண்டிருந்தார்.அவர் சாந்திதேவியைப் பார்க்க வந்த போது உடனே அவரை அவள் அடையாளம் காட்டினாள். தனது பழைய வீட்டிற்குச் சென்ற சாந்தி தேவி அங்கே தன் நகைகள், பணம் இவற்றைப் புதைத்து வைத்திருந்த இடத்தையும் சுட்டிக் காட்டினாள். அவள் வீடு இருந்த குறுகிய சந்தில் அவளை அனைவரும் கை நீட்டி வரவேற்ற போதிலும் அவர் சரியாக தன் மாமனாரிடம் போய் நின்று அவரை அடையாளம் காட்டினாள்.

சாந்தி தேவி 11-12-1926 அன்று பிறந்தார். 27-12-1987 அன்று மறைந்தார்.

மஹாத்மா காந்திஜியின் கவனத்திற்கு இந்த கேஸ் கவனத்திற்கு வந்தது.உடனே அவர் ஒரு கமிஷன் அமைத்தார், இது உண்மைதானா என்று சரி பார்ப்பதற்கு.  சாந்திதேவியை மதுராவிற்கு 15-11-1935 அன்று அழைத்துச் சென்றனர் கமிஷன் உறுப்பினர்கள். சாந்தி தேவி அனைவரையும் அடையாளம் காட்டி வெவ்வேறு சான்றுகளைக் காட்டவே கமிஷன் உண்மையாகவே லக்டி தேவியின் மறு ஜென்மமே என்று உறுதி செய்தனர்.

இயான் ஸ்டீவன்ஸன் அவரை 1986ஆம் ஆண்டு சந்தித்து பேட்டி கண்டார். இன்னொரு ஆய்வாளரான கே.எஸ்.ராவட் (K.S.Rawat) என்பவரும் அவரைத் தீர ஆராய்ந்தார். சாந்தி தேவி இறப்பதற்கு நான்கு நாட்கள் முன்பு கூட அவரைச் சந்தித்து பேட்டி கண்டார்.

சரகர் தன் சரக சம்ஹிதையில் பூர்வ ஜென்மம் பற்றி மிக விளக்கமாகக் கூறி இருக்கிறார். மஹாபாரதத்தில் வரும் சிவ- பார்வதி சம்வாதமும் குறிப்பிடத் தகுந்த ஒன்று. பூர்வ ஜென்மத்தில் செய்த கர்மங்களின் பலனுக்கான பலனை இந்த ஜென்மத்தில் பெறுவது பற்றி பார்வதி கேட்க சிவபிரான் பதில் அளிக்கிறார். மிக சுவையான இந்த உரையாடல் முழுவதையும் அநுசாஸனபர்வத்தில் காணலாம். குறிப்பாக 217வது அத்தியாயம் முதல் 228வது அத்தியாயம் முடிய பூர்வ ஜென்ம கர்மங்களையும் அதற்கான இந்த ஜன்ம பலன்களையும் படிக்கும் போது பிரமிப்பும் வியப்பும் ஏற்படும்.

ஆனால் இப்படி பூர்வ  ஜென்ம நினைவுகள் அதிசயமாக சிலருக்கே ஏற்படுகின்றன.

ஒருவரை ஹிப்நாடிஸ நிலைக்குக் கொண்டு சென்று அவது பூர்வ ஜென்மங்களைக் கண்டு பிடித்துக் கூறுவது இப்போது சகஜமாகிறது. அதிகாரபூர்வமான நிபுணரான நல்ல ஒரு நாடி ஜோதிடர் கூறும் நாடி ஜோதிடத்திலும் கூட ஒருவரின் பூர்வ ஜென்மம் கூறப்படுகிறது.

ஒருவரின் பூர்வ ஜென்மத்தைச் சரியாகக் கூறி அனைவரையும் அசத்தியவரில் உலகப் புகழ் பெற்றவர் எட்கர் கேஸ். (Edgar Cayce)

 அவர் கூறிய 2500 வாழ்க்கைப் பதிவுகள் – அதாவது Life Readings –  இன்றும் பாதுகாக்கப்பட்டு வருகின்றன! ஆராய்ச்சியாளர்களுக்கு உதவியாக உள்ளன!

 குறிப்பிட்ட ஒருவரைப் பற்றிய முன் ஜென்ம சம்பவங்களை ஹிப்நாடிஸ நிலையில் இருந்தவாறே ‘படிப்பார்’ கேஸ். கேஸுக்கு அடிக்கடி விசித்திரமான தந்திகளை அனுப்பி வந்த ஒரு தந்தி அலுவலகப் பெண்மணி யார் அந்த கேஸ், எதற்கு அவருக்கு இவ்வளவு தந்திகள் வருகின்றன என்று வியந்தாள். அவரை நேரில் பார்க்க வந்தாள். அவளது முன்பிறப்பைப் ‘படித்த’ கேஸ், அவரிடம், “தந்தி அலுவலகத்தில் பணி புரிந்து வாழ்க்கையை ஏன் நீ வீணாக்கிக் கொள்கிறாய். முன் ஜென்மத்தில் நீ ஒரு சிறந்த ஓவியர். ஒரு கலைக்கல்லூரியில் சேர்ந்து புகழையும் பணத்தையும் நீ அடையலாம்” என்றார். உடனே அந்தப் பெண்மணியும் தான் பார்த்து வந்த வேலையை விட்டு விட்டு ஓவியக் கல்லூரியில் சேர்ந்தாள். தன் திறமையைக் கண்டு அவளே ஆச்சரியப்பட்டாள்; முன்னேறினாள். 

   ஒருவரின்  முன்பிறவிக் குறிப்புகளைக் கூறுவதோடு அவற்றைச் சரி பார்க்க உதவும் ஆவணங்கள் இருக்கும் இடம் அல்லது விவரத்தைத் தெரிவிக்கும் கல்லறை இருக்கும் இடம் ஆகியவற்றையும் எட்கர் கேஸ் சரியாகக் கூறி விடுவார். கேஸிடம் எப்படி இப்படி கூற முடிகிறது என்று கேட்டபோது ஒவ்வொரு மனிதனின் அந்தக்கரணத்திலிருந்து இதைப் பெறலாம் அல்லது இன்னொரு வழி ஆகாஷிக் ரிகார்ட் அதாவது ஆகாயப் பதிவுகளிலிருந்து இவற்றைப் பெறலாம் என்றார்!

    உலகின் அனைத்து ஒலி, ஓலி இயக்கம் ஆகியவை ஆகாயத்தில் பதிவாகி விடுகின்றன என்றும் தேவையான போது தேவையானவர் பற்றிய விவரங்களை சுலபமாகப் பெறலாம் என்றும் அவர் விளக்கினார். அவரைப் பற்றி வெளியான ‘மெனி மான்ஷன்ஸ்’ (Many Mansions) என்ற புத்தகம் முன் ஜென்மம் மற்றும் மறுபிறப்பு பற்றிய விதிகளை விவரமாகத் தருகிறது.

 முற்பிறவி என்பது ஒரு மத நம்பிக்கை என்பது போய் அறிவியல் ஆதாரங்களுடன் எட்கர் கேஸ், இயான் ஸ்டீவன்ஸன் ஆகியோரது வழியே நிரூபிக்கப்படும் போது நமது வாழ்வில் ஏற்படும் ஏற்றத் தாழ்வுகளுக்கும் முயற்சி செய்தும் சில முறை வெற்றியும் சில முறை தோல்வியும் அடைவதற்கான காரணத்தையும் அறிய முடிவதோடு உடனே விளக்கிச் சொல்ல முடியாத அனைத்திற்குமே நமது முன் ஜென்ம கர்மத்தின் மூலம் நாமே காரணம் என்றும் தெளிவு பெற முடிகிறது. தர்க்க ரீதியான தீர்வு கிடைக்கும் போது மனம் அமைதி அடைவதோடு இனி வாழ்க்கையை அறத்தின் அடிப்படையில் அமைக்க வேண்டும் என்ற உறுதியும் பிறக்கிறது.

வாழ்க்கையில் இந்த நல்ல உறுதியைத் தவிர வேறு என்ன வேண்டும்.

எடுத்த பிறவிக்கு எது அணி எனில் அடுத்த பிறவி அடையாதிருக்கும் வழியைக் காண்பதே என்பது இந்து மதத்தின் அறிவுரை.

மணிவாசகர் பெருமானின் வாசகத்துடன் இவ்வுரையை முடிக்கிறேன்:

புல்லாகிப் பூடாய்ப் புழுவாய் மரமாகிப்

பல்விருகமாகிப் பறவையாய்ப் பாம்பாகிக்

கல்லாய் மனிதராய்ப் பேயாய்க் கணங்களாய்

வல் அசுரராகி முனிவராய்த் தேவராய்ச்

செல்லாஅ நின்ற இத்தாவர ஜங்கமத்துள்

எல்லாப் பிறப்பும் பிறந்து இளைத்தேன், எம்பெருமான்

மெய்யே உன் பொன் அடிகள் கண்டு இன்று வீடுற்றேன்.

தென்னாடுடைய சிவனே போற்றி!

எந்நாட்டவர்க்கும் இறைவா போற்றி!!

நன்றி, வணக்கம்!

***

 TAGS- இயான் ஸ்டீவன்ஸன், புனர்ஜென்மம் 2, முற்பிறவி,