ஆசார்ய சரகர்: ஆயுர்வேத நூல் அருளிய மஹான்!(9469)

WRITTEN BY S NAGARAJAN

Post No. 9469

Date uploaded in London – –  –8 APRIL  2021     

Contact – swami_48@yahoo.com

Pictures are taken from various sources for spreading knowledge;

this is a non- commercial blog. Thanks for your great pictures.

tamilandvedas.com, swamiindology.blogspot.com

திருநெல்வேலியிலிருந்து மாதந்தோறும் வெளியாகும் ஹெல்த்கேர் இதழில் ஏப்ரல் 2021 இதழில் வெளியாகியுள்ள கட்டுரை!

ஆசார்ய சரகர்: ஆயுர்வேத நூல் அருளிய மஹான்!

ச.நாகராஜன்

இன்று உலகெங்கும் பிரபலமாகி இருக்கும் ஆயுர்வேத சிகிச்சை முறை பாரதத்தில் உதித்தது தான். இதை முறைப்படுத்தி ஒரு நூலாக வழங்கியவர் ஆசார்ய சரகர்.

வேத முறையிலான வைத்தியம் இது என்பதால் வேதம் கூறும் பூரண ஆயுளான 120 ஆண்டுகள் ஆரோக்கியமாக ஒரு மனிதன் வாழ்வதற்கான அற்புதமான ரகசியங்களையும் அனுபவ பூர்வமான நடைமுறைகளையும் சரகர் தனது நூலான சரக சம்ஹிதையில் தந்திருக்கிறார்.

எல்லாவற்றையும் ஆராய்ந்து அதிலிருந்து உரிய சிகிக்கை முறைகளைத் தருவதோடு அறநெறிகளை அனைவரும் கடைப்பிடித்து ஆரோக்கியத்துடன் 120 ஆண்டுகள் பூரண ஆயுளுடன் வாழ வேண்டும் என்பதே அவரது ஆசை.

    ஒரு நாள் சரகர் தனது சிஷ்யர்களுடன் வனப் பகுதியில் சஞ்சரித்துக் கொண்டிருந்தார். பூக்களையும் செடிகளையும் மரங்களையும் நன்றாக ஆராய்ச்சி செய்வது அவரது பண்பு. அவரது சஞ்சாரத்தில் ஒரு அபூர்வமான மலரைக் கண்டார். இதுவரை பல நூறு பூக்களை அவர் பார்த்திருந்தாலும் கூட அது இதுவரை பார்த்திராத அபூர்வமான புஷ்பம்! உடனே அதை எடுக்க அவர் தனது காலை முன் வைத்தார். உடனேயே நின்று விட்டார்.

அருகிலிருந்த சிஷ்யர் ஒருவர், “ஆசார்யரே, உங்களால் இதைப் பறிக்க முடியவில்லை எனில் நான் சென்று பறித்து வரவா? என்று அவரிடம் அனுமதி கேட்டார்.

ஆசார்யர் அவரை நோக்கி, “சிஷ்யா! எதிலும் ஒரு நியதி உண்டு. இதைப் பறிக்க அனுமதி வேண்டுமே என்றார்.

“அனுமதியா? யாரிடமிருந்து? ஒரே ஒரு பூ! வனாந்திர பிரதேசம். இதைப் பறிக்க யாரிடம் அனுமதி பெற வேண்டும்? என்றார் சிஷ்யர்.

சரகர் அவரை நோக்கி, “அப்பனே, ராஜ நீதி வேறு, அறநெறி முறை வேறு.இங்கு யாரும் காணப்படவில்லை என்றாலும் கூட, இந்தப் பகுதிக்கு உரிமையாளராக இருக்கும் குடியானவனிடம் அனுமதி பெற்று அல்லவா இதைப் பறிக்க வேண்டும். இதுவே அறநெறி முறையாகும் என்றார்.

சொன்னதோடு நில்லாமல் வெகு தூரம் சென்று அந்தப் பகுதிக்குச் சொந்தமானவரை விசாரித்து அறிந்து கண்டு அவரிடம் அந்த ஒரு பூவைப் பறிக்க அனுமதி கேட்டுப் பெற்றார்.

அறநெறியே வாழ்க்கைக்கான அடிப்படை விதி என்பதை ஆசார்யரிடமிருந்து கற்றனர் சிஷ்யர்கள்.

தேசமெங்கும் இப்படி அலைந்து திரிந்து ஒவ்வொன்றையும் பற்றி ஆராய்ந்ததால் அவர்  சரகர் என்ற பெயரைப் பெற்றார். சரகர் என்றால் அலைபவர் என்று பொருள்.

இப்படி அவர் வாழ்க்கையில் ஏராளமான சம்பவங்கள் உண்டு.

சரக சம்ஹிதாவில் 120 அத்தியாயங்கள் உண்டு.

இந்த நூல் எட்டுப் பகுதிகளைக் கொண்டது. 1) சூத்ர ஸ்தானம் 2) நிதான ஸ்தானம் 3) விமான ஸ்தானம் 4) சரீர ஸ்தானம் 5) இந்திரிய ஸ்தானம் 6) சிகித்ஸா ஸ்தானம் 7) கல்ப ஸ்தானம் 8) சித்தி ஸ்தானம்

சரகர் ஆதிசேஷனின் அவதாரமாகவே கருதப் படுகிறார்.

சிகிச்சை முறையில் மந்திர பிரயோகத்தையும் அவர் கூறியிருப்பது ஒரு தனிச் சிறப்பாகும்.

விஷ்ணு சஹஸ்ரநாமத்தை உச்சரித்தால் ஜுரம் போகும் என்பது அவரது அருளுரை.

மருத்துவம் பற்றிய 60 ரிஷிகளின் கூற்றை அவர் கூறுகிறார். இப்படி வசிஷ்டர், ஜமதக்னி, வாமதேவர், பிருகு உள்ளிட்ட மஹரிஷிகளை அவர் ஆங்காங்கே மேற்கோள் காட்டுகிறார்.

தாவரத்திலிருந்து உருவாக்கப்படும்  341 மருந்து வகைகளை அவர் பட்டியலிடுகிறார்.

விலங்குகளிடமிருந்து உருவாகும் 177 மருந்து வகைகளையும் உலோகம் மற்றும் தாதுப் பொருள்களிலிருந்து உருவாகும் 64 மருந்து வகைகளையும் அவர் குறிப்பிடுகிறார்.

சரகர் வாழ்ந்த காலத்தைச் சரியாக நிர்ணயிக்க முடியவில்லை என்ற போதிலும் பொதுவாக அவர் இன்றைக்கு 2200 ஆண்டுகளுக்கு முற்பட்டவர் என்பது தெரிகிறது.

சரக சம்ஹிதை லத்தீன், அராபி மொழி உள்ளிட்ட ஏராளமான மொழிகளில் மொழிபெயர்க்கப்பட்டுள்ளது.

1898ஆம் ஆண்டு அமெரிக்காவில் நியூயார்க்கில் சார்லஸ் எல்.டானா, ஜோஸப் கொல்லியர்ஸ், பெடரிக் பாட்டர்ஸன் மற்றும் பர்னாட் ஷாஸ் (Charles L.Dana, Joseph Colliers, Federick Petterson and Barnad Sachs) ஆகியோரால் ஆரம்பிக்கப்பட்ட மருத்துவ சங்கத்திற்கு ‘சரகா க்ளப் என்று அவரை மரியாதை செய்யும் விதமாகப் பெயர் சூட்டப்பட்டது.

உலகெங்கும் பெரிதும் மதிக்கப்படும் இவரது நூலுக்கு ஏராளமானோர் விளக்கவுரைகள் எழுதியுள்ளனர். சம்ஸ்கிருத மூலமும் ஆங்கில மொழிபெயர்ப்பும் உள்ள சரக சம்ஹிதை இப்போது கிடைக்கிறது.

சரகரைப் பற்றி அமெரிக்காவின் தலை சிறந்த மருத்துவ நிபுணரான டாக்டர் ஜார்ஜ் க்ளார்க் கூறுவது இது:

As I go over each fasciculus I arrive at only one conclusion and that is this:

If the physician of the present day world drop from the pharma copoeia all the modern drugs and treat their patients according to the method of Charaka there would be the least work for the undertakers and fewer chronic invalid to the world.”   – George Clerk (Leading Physician, USA)

ஒவ்வொரு சிறுபகுதியாக நான் படிக்கும்போது, நான் ஒரே ஒரு முடிவுக்குத் தான் வருகிறேன். அது இது தான்:

இன்றைய நாளில் உள்ள மருத்துவர்கள் மருந்தியலில் உள்ள அனைத்து நவீன மருந்துகளையும் விட்டு விட்டு சரகர் சொல்கின்ற முறை போல தங்கள் நோயாளிகளை சிகிச்சை செய்ய ஆரம்பித்தார்களெனில் சவங்களைச் சுமந்து செல்பவர்களுக்கு மிகக் குறைந்த வேலையே இருக்கும். அத்துடன் உலகில் நோயால் செயலற்று இருப்பவர்களும் குறைவாகவே இருப்பர்.

நவீன மருத்துவத்தில் முன்னேறியுள்ள மேலை உலகம், இதை விட சரகருக்கு  என்ன புகழுரையைத் தர முடியும்?!

***

TAGS – ஆசார்ய சரகர், ஆயுர்வேத நூல் 

நமது நூல்கள் தரும் நுட்பமான கருத்துக்கள்! (Post No.5027)

Written by S NAGARAJAN

 

Date: 20 MAY 2018

 

Time uploaded in London –  6-28 AM   (British Summer Time)

 

Post No. 5027

 

Pictures shown here are taken from various sources such as Facebook friends, Books, Google and newspapers; thanks. Pictures may be subject to copyright laws.

 

 

ஹெல்த்கேர் மாத பத்திரிகையில் மே 2018  இதழில் வெளியாகியுள்ள கட்டுரை

ஆரோக்கிய ரகசியம்

நமது நூல்கள் தரும் நுட்பமான கருத்துக்கள்!

 

ச.நாகராஜன்

நமது ஆயுர்வேத நூல்களிலும், வைத்ய நூல்களிலும் இதர சுபாஷித நூல்களிலும் ஆரோக்கியம் பற்றிய ஏராளமான நுட்பமான கருத்துக்கள் தெரிவிக்கப்பட்டுள்ளன.

இது அடிப்படையான விஷயம். இதை முதலில் தெரிந்து கொண்டால் நமக்குத் தேவையான மருத்துவ உதவியைப் பெற்று நோய்களிலிருந்து மீளலாம்.

நோயே இல்லாத ஆரோக்கிய வாழ்வைப் பெறவும் இந்தக் கருத்துக்கள் இன்றியமையாதவை.

சில கருத்துக்கள் இங்கு தொகுக்கப்பட்டு தரப்படுகின்றன.

1

நோய் வருவதற்கான நான்கு காரணங்கள்

ரோக நிமித்தம்

  • ஆகண்டுகா – Exogenous – வெளியிலிருந்து
  • வாதம்
  • பித்தம்
  • ஸ்லேஷ்மா

சரக சம்ஹிதை (சூத்ர 20-3)

 

2

நோயாளியின் நான்கு குணங்கள்

ரோகாதுரா குணா:

 

1) ஸ்மிருதி – நல்ல ஞாபக சக்தி (good memory)

2) நிர்தேசா – மருத்துவ அறிவுரையின் படி நடத்தல் (follwoing the prescription)

3) அபீருத்வா – பயமின்மை (fearlessness)

4) ஞானபாகா – தடையற்ற வெளிப்பாடுகள் (uninhibited expressions)

 

சரக சம்ஹிதை (சூத்ர 9-9)

 

3

நோயைப் போக்கத் தேவையான அம்சங்கள்

Aspects of therapeutics for the cure of disease

 

1)பிஷக் – வைத்தியர் (Physician0

2) த்ரவ்யாணி –  மருந்துகள் (Medicines)

3) உபஸ்தாதா – உடன் இருந்து உதவி செய்பவர் -Upasthata

4) ரோகி – வியாதியஸ்தர் – Rogi

சரக சம்ஹிதை (சூத்ர 9-3)

 

4

வைத்யருக்கான குணங்கள்

வைத்ய குணா:

 

1) மிகச் சிறந்த மருத்துவ அறிவு (ச்ருதே பர்யாவதாதத்வம்)

2) பரந்த மருத்துவ அனுபவம் (பஹுஷோ த்ருஷ்டகர்மதா)

3) திறமை (தாக்ஷ்யம்)

4) சுத்தம் (சௌசம்)

சரக சம்ஹிதை (சூத்ர 9-6)

 

5

அறுவை சிகிச்சை நிபுணருக்கான குணங்கள்

சஸ்த்ர வைத்ய குணா:

பயப்படாமை – சௌர்யம்

எளிதாகக் கையாளும் தன்மை – ஆசுக்ரியா

சஸ்த்ரதைக்ச்ன்யம் – மிகக் கூர்மையான கருவிகள்

வியர்வை இல்லாமல் இருத்தல், நடுங்காமல் இருத்தல் -அஸ்வேதவேபது

குழப்பமின்றி இருத்தல் – அஸம்மோஹ:

சுஸ்ருத சம்ஹிதா (சூத்ர 5-10)

 

6

நோயாளிகளிடம் வைத்யரின் அணுகுமுறை

வைத்ய வ்ருத்தி

 

நட்பு – (மைத்ரி)

தயை – (காருண்யா)

சந்தோஷம் – (ப்ரீதி)

இரக்கம் – (உபேக்ஷணம்)

சரக சம்ஹிதை (சூத்ர 9-26)

7

நோய் அறிதல்

வியவஹார தர்ஷணம் (Diagnosis)

 

கேட்டல்- (ஆகம)

உரையாடுதல் – (வியவஹாரா)

சிகிச்சை – (சிகித்ஸா)

முடுவெடுத்தல் – (நிர்ணயா)

நாரத ஸ்மிருதி (1-36)

 

8

நோய் அறிதல்

ரோக விஞ்ஞானம்

நோய் வருவதற்கான காரணம் – நிதானம்

முந்தைய நிலை – பூர்வரூபா

தோற்றம் – ரூபா

நோய்க்குத் தீர்வு – உபசாயா

முடிவு – சம்ப்ராப்தி

மாதவ நிதானம் (1-4)

 

9

 

வியாதிகளின் வகைகள்

வியாதி

 

தொற்று நோய் – (ஆகண்டவா)

உடல் சம்பந்தமானது – (சரீரா)

மனோ வியாதி – (மானஸா)

இயற்கையானது – (ஸ்வாபாவிகா)

சுஸ்ருத சம்ஹிதா (சூத்ர 1-23)

10

எலும்பு வகைகள்

அஸ்திவர்கா

 

தட்டை – (கபாலா)

பல் – (ருசகா)

குருத்தெலும்பு – (தருணா – cartilege)

வட்ட வடிவமானது – (வளயா)

நீளமானது – (நாளகா)

சுஸ்ருத சம்ஹிதா (சரீர 5-20)

11

மருந்துக் கஷாயங்கள்

கஷாயம்

 

அத்தி – (சமி)

அரசு – (அஸ்வத்தா)

ஆலமரம் – (ந்யாக்ரோதா)

புரசு – (பலாச)

 

இப்படி ஒவ்வொரு விஷயத்தையும் தர்க்கரீதியாக ஆராய்ந்து எது நல்லது, யார் வியாதியை நீக்கத் தகுதியானவர்கள் என்பன போன்றவற்றை ஆயிரக் கணக்கான செய்யுள்கள் தருகின்றன.

 

அனுபவத்தின் அடிப்படையில் சிறந்த வைத்தியர்கள் ஒவ்வொரு கிராமம்தோறும் இருந்து மக்களுக்கு உரிய சிகிச்சை அளித்து அவர்களின் ஆரோக்கிய மேம்பாட்டிற்காகப் பாடுபட்டனர். பாரம்பரிய வழியிலான அந்த ஆயுர்வேத மருத்துவம் பற்றி அறிவது நமது கடமை – நமது நலனுக்காகவே!

***