Written by London swaminathan

Date: 29^th January 2017

Time uploaded in London:-  21-28

Post No.3588

Pictures are taken from different sources; thanks.

contact; swami_48@yahoo.com

தாயுமனவர், பட்டினத்தார், சுந்தரர் ஆகிய சைவ அடியார்கள் எல்லோருக்கும் ஒரு வியப்பு; ஆச்சரியம்; எத்தனை பேர் உன்னை வில்லால் அடித்தனர், சொல்லால் அடித்தனர், கல்லால் அடித்தனர். அத்தனை பேருக்கும் உதவுகின்றாயே. ஆனால் அவர்களுக்கு எல்லாம் இருந்த ஆழமான அன்பு எங்களுக்கு இல்லையே என்று முறையிடுகின்றனர். உலக சமய இலக்கியங்களில் இல்லா சில விஷயங்கள் இந்து மதத்தில் மட்டுமே காணக்கிடக்கின்றன. இதோ மூன்று அடியார்கள் கொடுத்த “குற்றச் சாட்டு” பட்டியல்!

கல்லால் எறிந்தும் கைவில்லால்

அடித்தும் கனிமதுரச்

சொல்லால் துதித்தும்நற் பச்சிலை

தூவியும் தொண்டரினம்

எல்லாம் பிழைத்தனர் அன்பற்ற

நான் இனி ஏதுசெய்வேன்!

கொல்லா விரதியர் நேர்நின்ற

முக்கட்குருமணியே!

–தாயுமானவர்

கல்லால் அடித்து சிவனருள் பெற்றவர் -சாக்கிய நாயனார். இவர் முதலில் புத்தமதத்தைத் தழுவி பின்னர் சைவ மதம் திரும்பியதும், புத்த மதத்தினரைத் திருப்தி செய்வதற்காக சிவலிங்கம் மீது கல்லெறிந்தார். வெளியில் இப்படி வன்முறை காட்டினாலும் மனத்தகத்தே சிவன் மீது அன்புகொண்டார். வில்லால் அடித்து பாசுபதம் பெற்றவன் அர்ஜுனன்.

கனிமதுரச் சொல்லால் துதித்தவர்கள் தேவார, திருவாசக நால்வர் ஆவர். பச்சிலை தூவி வழிபட்டவர் கண்ணப்பநாயனார்.

இவர்களுக்கு இணையான அன்பு எனக்கில்லையே என்று வருத்தப் படுகிறார் தாயுமானவர்.

பட்டினத்தாரும் ஒரு பாடலில்

வாளால் மகவரிந்து ஊட்டவல்லேன்

அல்லன்; மாது சொன்ன

சூளால் இளமை துறக்கவல்லேன்

அல்லன்; தொண்டுசெய்து

நாலாரில் கண்ணிடத்து அப்பவல்லேன்

அல்லன்; நானினிச் சென்று

ஆளாவது எப்படியோதிருக்

காளத்தி அப்பனுக்கே

–பட்டினத்தார்

சிறுத்தொண்ட நாயனார், சிவனடியாரைத் திருப்தி செய்ய தன் மகனையே அறுத்து கறி சமைத்தார். திருநீலகண்ட நாயனாரின் மனைவியின் சொல்லால், அவர் இன்பத்தைத் துறந்தார். கண்ணப்ப நாயனார் உலகிலேயே விரைவில் முக்தியடைந்த மாமனிதர் ஆவார். இப்படி எல்லாம் என்னால் செய்ய இயலாதே என்று பாடுகிறார் பட்டினத்தார்.

தாயுமானவருக்கும், பட்டினத்தாருக்கும் முன்னார் வாழ்ந்த சுந்தரர் தான் ஏன் சிவபெருமானிடம் வந்தார் என்று விளக்குகிறார்.

சம்பந்தன், அப்பர், நந்தனார், சாக்கியநாயனார், கண்ணப்பநாயனார், ஒரு சிலந்தி கணம்புல்லன் என்பவர் எல்லோரும் ஏதேனும் குற்றம் செய்தபோதும் அவர்களுக்கு உதவினாய். இதைப் பார்த்துதான் நானும் உன்னிடம் வந்தேன் என்பார் சுந்தரமூர்த்தி நாயனார்.

நற்றமிழ் வல்ல ஞான சம்பந்தன்

நாவினுக்கரையன் நாளைப் போவானும்

கற்றசூதன்நற் சாக்கியன் சிலந்தி

கண்ணப்பன் கனம்புல்லனென்றிவர்கள்

குற்றம்செய்யினுஞ் குணமெனக் கருதும்

கொள்கை கண்டு நின்குரை  கழல் அடைந்தேன்

பொற்றிரள்மணிக் கமலங்கள் மலரும்

பொய்கை சூழ் திருப்புன்கூருளானே

-சுந்தரர், ஏழாம் திருமுறை

இதில் எட்டு நாயன்மார்களைக் குற்றம் செய்தவராக சுந்தரர் பட்டியலிட்டார். ஆயினும் அப்பராவது வேறு மதம் சென்று திரும்பியவர். ஞானசம்பந்தர் ஒரு தவறும் செய்யவில்லை. இதற்கு இதுவரை சரியான விளக்கம் கிடைக்கவில்லை. பலர், பல விளக்கங்களைக் கொடுத்தாலும் அது திருப்தி தருவதாக இல்லை.

-suBham-

Germany Stamps with Swastika

Written by S NAGARAJAN

Date: 29 January 2017

Time uploaded in London:-  5-29 am

Post No.3586

Pictures are taken from different sources; thanks.

பாக்யா 20-1-2017 இதழில் வெளியாகியுள்ள கட்டுரை

சிம்பல் மயம் உலகம்!

ச.நாகராஜன்

சிம்பல் (Symbol) எனப்படும் அடையாளக் குறியீடு அல்லது சின்னம் இன்று உலகில் பெற்றுள்ள முக்கியத்துவம் மனித சரித்திரத்தின் பரிணாம வளர்ச்சியையே சுட்டிக் காட்டுகிறது.

ஆயிரம் மொழிகள் உலகில் இருந்தாலும் சுருங்கி விட்ட உலகத்தில் எந்த ஒரு மொழி பேசுபவருக்கும் ஒரு மௌன மொழியாக, பல இடங்களில் உயிர் காக்கும் கருவியாக, சிம்பல் விளங்குகிறது.

எதிரிலே ஒரு பாலம் வருகிறது, பாதை வளைகிறது, மெதுவாகப் போ, ஆபத்தான ஹேர் பின் பெண்ட் என்றெல்லாம் இந்த சிம்பல்கள் சுட்டிக் காட்டுவதால் அல்லவா மனிதன் உயிரிழப்பு இல்லாமல் நிம்மதியாக ஒரு இடத்தைச் சென்று சேர முடிகிறது!

மொழிகளுக்கு அப்பாற்பட்ட ஒரு உலகத்தை சிம்பல்களினால் படைக்க முடியும் என்று இந்த அடையாளக் குறியீட்டில் ஆர்வம் உள்ளவர்கள்  சொல்கின்றனர்.

ஹென்றி ட்ரைஃபஸ் (Henry Dreyfuss )   என்பவர் இந்த அடையாளங்களைத் தொகுப்பதில் முன்னோடி. சுமார் இருபதினாயிரம் சிம்பல்களை அவர் உலகெங்குமிலிருந்து பல்வேறு நாகரிகங்கள், நாடுகளிலிருந்து தொகுத்திருக்கிறார். சிம்பல் சோர்ஸ்புக் (Symbol Sourcebook) என்ற அவரது புத்தகம் ஆயிரக்கணக்கான சிம்பல்களைச் சித்தரித்து அவற்றின் அர்த்தத்தையும் விளக்குகிறது; பார்ப்போருக்குப் பிரமிப்பையும் தருகிறது.

வரலாறில் சிம்பல்களின் தாக்கம் மகத்தானது.

இரண்டாம் உலகப்போரில் அசுர சக்தியாக விளங்கிய ஹிட்லர் பல நாடுகளுக்கும் சிம்ம சொப்ப்னமாக இருந்தான். அவனது கொடியில் ஸ்வஸ்திகா பொறிக்கப்பட்டிருந்தது.

ஆனாலும் முடிவில் அவன் வீழ்ச்சியையே அடைந்தான்; தற்கொலை செய்து கொண்டான்.

ஹிந்துக்களின் நலச் சின்னமாகவும் புனித அடையாளக் குறியீடாகவும் காலமெல்லாம் விளங்கி வருவது ஸ்வஸ்திகா. கோவில்களில் தவ்றாமல் இடம் பெறும் சின்னமும் இதுவே.

இதில் இரு வகை உண்டு. வலப்பக்க சுழற்சி உடைய ஸ்வஸ்திகா தைவிக் ஸ்வஸ்திகா என்று குறிப்பிடப்பட்டு நல்லனவற்றைத் தரும் அடையாளமாகச் சொல்லப்படுகிறது. இதையே ஹிந்து ஆலயங்களில் காணலாம்,

ஆனால் உலகின் அதிர்ஷ்டத்தின் காரணமாக ஹிட்லர் ஸ்வஸ்திகாவின் சுழற்சியை இடப்பக்கமாக மாற்றி அதை 45 டிகிரி கோணத்தில் வேறு வளைத்து தீமையைத் தரும் ஆசுரிக் ஸ்வஸ்திகாவைத் தேர்ந்தெடுத்தான். விளைவு, அசுர வேகத்தில் முன்னேறிய அவன் அதல பாதாளத்தில் வீழ்ந்தான்.

பண்டைய ரோமில் பாதாளக் கல்லறைகளிலும் இந்த ஸ்வஸ்திகா சின்னம் பொறிக்கப்பட்டிருப்பது ஒரு அதிசய செய்தி. திபெத்திய சுவடிகள், குகைகள் மற்றும் ஆலயங்களிலும் ஸ்வஸ்திகா இடம் பெற்றுள்ளது.

இரண்டாம் உலகப் போரில் வி (V) என்ற வெற்றிச் சின்னத்தை தன் இரு விரல்களில் மூலம் காட்டினார் வின்ஸ்டன் சர்ச்சில். கையின் பின்புறம் தன்னை நோக்கி இருந்து ‘வி’-ஐப் பார்ப்போருக்குக் காண்பித்தால்,அது வெற்றி.

காண்பிப்பவரை நோக்கி உள்ளங்கை இருந்து இரு விரல்களைக் காண்பித்தால் அது அடுத்தவரை அவமானப்படுத்தும் சைகை.  சர்ச்சில் வெற்றிக்கான சைகையை வடிவமைத்து 1941, ஜூலை,20 ஆம் தேதி பிபிசி மூலம் பிரிட்டனில் அதை பிரபலப் படுத்தினார்.

மக்கள் திலகம் எம் ஜி ஆரும் இந்த வி சைகையையும் இரட்டை இலையையும் மக்களிடையே உற்சாகமாகப் பரப்பி தொடர் வெற்றி கண்டதும் இங்கு குறிப்பிடத் தகுந்தது.

ஆக உலக தலைவர்கள் அனைவருமே சிம்பல்களில் தனிக் கவனம் செலுத்துவது அதன் மூலம் மக்களை உத்வேகமூட்டி ஒரு பெரிய வெற்றிக்கு அழைத்துச் செல்வதற்கே.

அமெரிக்க ஜனாதிபதி ஒபாமா 2008ஆம் ஆண்டு தனது தேர்தல் பிர்ச்சாரத்தின் போது தவறாமல் கையில் எடுத்துச் சென்றது ஹனுமானின் படத்தையே. இதை அப்போதைய எகனாமிக்ஸ் டைம்ஸ் (10-6-2008இதழ்) வெளியிட்டது.

இஸ்ரேலில் புனிதமாகக் கொண்டாடப்படும் ஸ்டார் ஆஃப் டேவிட் தென்னிந்தியக் கோவில்களில் தவறாமல் இடம் பெறுகிறது. முருகனின் அருளைப் பெற ஷட் கோணத்தை முருக பக்தர்கள் வீட்டில் வைத்து வழி படுகின்றனர்.

ஸ்ரீ சக்ரத்தின் பெருமையை அலெக்ஸி குலைச்சேவ் என்ற ரஷியர் பிரம்மாண்டமான் ஆய்வு செய்து பிரமிக்க வைக்கும் உண்மகளை ஆய்வு முடிவாகத் தந்திருக்கிறார்.ஸ்ரீ சக்ரத்தில் உள்ள ஒன்பது முக்கோணங்கள் ஒன்றை ஒன்று வெட்டினால் ஏற்படும் சந்திப்புப் புள்ளிகள் எவ்வாறு பல்வேறு புள்ளிகளுடன் ஒன்றோடு ஒன்று இணையும் என்ற கண்டுபிடிப்பும், அத்துடன் கூட இன்னும் விளங்கிக் கொள்ள் முடியாத விடை காண இயலாத அநேக அறிவியல் விளக்கங்களும் இந்த யந்திரத்தில் உள்ளன என்கிறார் அவர். ஸ்ரீ சக்ரத்தில் உள்ள சிக்கலான கணிதத்தை நவீன தலைமுறை கம்ப்யூட்டர்கள் கூட விடுவிக்க முடியவில்லை என்ற அவரது கூற்று நம்மை பிரமிக்க வைக்கிறது!

இந்த யந்திரத்தின் பல்வேறு ம்ஹிமைகளைப் பட்டியலிடும் அவர் எப்படி இந்த யந்திரம் பண்டைய காலத்திலேயே அமைக்கப்பட்டிருக்கிறது என்று வியக்கிறார்!

புத்த மதத்தினரின் தர்ம சக்கரம் உள்ளிட்ட நல்ல அடையாளக் குறியீடுகள் காலம் காலமாக பலன் அளித்து வருவதை பௌத்தர்கள் உணர்ந்து இன்றும் அவற்றை விடாமல் பயன்படுத்தி வருகின்றனர். இந்த அதிர்ஷ்ட சிம்பல்களை இனம் காட்டி உலகெங்கும் விற்பனை செய்யும் பல்வேறு நிறுவனங்கள் பணத்தில் கொழிப்பது கண்கூடாக நாம் இன்று பார்க்கும் உண்மை.

அமெரிக்க டாலர் இன்றும் உலகின் செல்வாக்கு மிக்க கரன்ஸியாக விளங்குவதற்கான காரணம் அதில் உள்ள பிரமிடும் கண்ணுமே என்பதை சிம்பல் ஆய்வாளர்கள் உறுதிபடத் தெரிவிக்கின்றனர் (பாக்யா இதழில் அமெரிக்க டாலர் மர்மம் பற்றி ஏற்கனவே விளக்கப்பட்டுள்ளது). அமெரிக்காவை நிறுவும் போது அதை ஸ்தாபித்த தலைவர்கள் செல்வாக்கு மிக்க சக்தியாக அமெரிக்காவை நீடுழி காலம் இருக்குமாறு செய்ய  இப்படிப்பட்ட பல இரகசிய சிம்பல்களை அமெரிக்க வாழ்க்கை முறையில் புகுத்தி விட்டிருக்கின்றனர் என்பதை வரலாறு தெரிவிக்கிறது.

உலகியல் வாழ்க்கைக்கு இன்று இன்றியமையாதது சிம்பலே. கணிதத்தின் சமன்பாடுகள், தொழிற்சாலையில் பல விஷயங்களை எளிதில் சுட்டிக் காட்டும் வழிகாட்டிகள், அறிவியலில் பலவற்றையும் விளக்கும் விளக்கக் குறியீடுகள், நெடுஞ்சாலைகள், விமானதளங்கள், கடல் வழிகள் என அங்கிங்கெனாதபடி எங்கும் வழிகாட்ட உதவும் அடையாளச் சின்னங்கள் ஆகியவை மட்டும் இல்லையெனில் இன்று வாழ்க்கை முறையாக நடைபெறாது. சிம்பல் இல்லாத உலகம் விபத்துள்ள உலகமாக ஆகி விடும்.

நமது அன்றாட வாழ்க்கை முறையில் ஒவ்வொருவரும் அவரவர் தேவைக்கேற்ப ஒரு சிம்பலைத் தேர்ந்தெடுக்க அவரவர் வாழ்க்கை முறை, தேசீயம், மதம் வழி வகுக்கிறது.

இந்த சிம்பல்களில் வெவ்வேறு வண்ணங்களும் சேர்க்கப்படும் போது அதன் மகத்துவம் பன்மடங்கு பெருகி விடுகிறது. கலர் தெராபி என்பது இன்றைய உலகில் பெரும் சிகிச்சை முறையாக உருவெடுத்து வரும் நிலையில் வண்ணங்களை இடம் அறிந்து பாரம்பரியமாக உள்ள சிம்பல்களில் நமது முன்னோர் இணைத்திருப்பது ஒரு பிரமிப்பூட்டும் செய்தியே!

சரியான சிம்பலை ஒருவர் நாடி அதை உரிய அளவின் படி செய்து நிர்ணயிக்கப்பட்ட வண்ணங்களையும் சேர்த்து வைத்துக் கொண்டால் அது அவருக்கு வேண்டியதைத் தந்து விடும். இதன் உண்மையை அனுபவத்தில் அறியலாம்!

மொத்தத்தில் சிம்பல்  மயம் உலகம்!

*****

Picture of Dr Edmund Locard

Written by S NAGARAJAN

Date: 28 January 2017

Time uploaded in London:-  6-18 am

Post No.3583

Pictures are taken from different sources; thanks.

Contact: swami_48@yahoo.com

20-1-2017 பாக்யா வார இதழில் அறிவியல் துளிகள் பகுதியில் 311ஆம் அத்தியாயமாக வெளியாகியுள்ள கட்டுரை

 மர்மக் கதை எழுத்தாளர்கள் நன்றி சொல்ல வேண்டிய விஞ்ஞானி!

BY ச.நாகராஜன்

t

“ஒருவருடன் ஒருவருக்கு ஏற்படும்  இருவரிடையேயான தொடர்பில் ஒரு பரிமாற்றம் நிகழ்கிறது”

                   –  லொகார்ட் விதி (Locard’s exchange principle)              

    இன்றைய தமிழ் டிவி சீரியல்களில் ஒரு போலீஸ் ஸ்டேஷன் காட்சியோ அல்லது ஒரு மருத்துவ மனை காட்சியோ அநேகமாக இடம் பெறாமல் இருக்காது. கொலை, ஆஸ்பத்திரி, டி என் ஏ சோதனை என மர்மமும் திகிலும் தமிழில் மட்டுமல்ல மேலை நாட்டு தொலைக்காட்சி சீரியல்களிலும் உண்டு.  

    ஆயிரக்கணக்கான மர்ம நாவல்களில் கொலைகாரனைப் பிடிக்க துப்பறியும் நிபுணர்கள் படும் பாட்டை விவரிக்கும் மர்மக் கதை எழுதும் எழுத்தாளர்கள் வாசகர்களை திக்பிரமை அடையச் செய்கிறார்கள். இந்த எழுத்தாளர்கள் அனைவரும் நன்றி சொல்ல வேண்டிய விஞ்ஞானி ஒருவர் உண்டு.

அவர் தான் டாக்டர் எட்மண்ட் லொகார்ட் (Dr Edmond Locard தோற்றம் 13-12-1877 மறைவு 4-5-1966)

    பிரான்ஸின் ஷெர்லாக் ஹோம்ஸ் என்ற செல்லப் பெயரைப் பெற்ற அவர் தான் இன்று துப்பறியும் நிபுணர்கள், மர்மக் கதை எழுத்தாளர்கள், டிவி கதாசிரியர்கள் ஆகியோர் தவறாமல் பயன் படுத்தும் ஒரு முக்கிய விதியைக் கண்டு பிடித்துச் சொன்னவர்.

அந்த விதி, “ஒவ்வொரு குற்றவாளியும் தவறாமல் ஒரு தடயத்தை விட்டுச் செல்கிறான்” என்பதே! ஒவ்வொரு தொடர்பிலும் ஒரு தடயம் இருக்கிறது (Every contact leaves a trace) என்ற அவரது பொன்னான விதி எந்தக் காலத்துக்கும் பொருந்தும் உண்மையாகத் திகழ்கிறது.

     1887ஆம் ஆண்டில் சர் ஆர்தர் கானன் டாயில் தனது நாவலில் பிரபலமான ஷெர்லாக் ஹோம்ஸ் என்னும் துப்பறியும் நிபுணரை அறிமுகப்படுத்தினார். ஷெர்லாக் ஹோம்ஸ் எந்த ஒரு மர்மத்தையும் அறிவியல் ரீதியில் அணுகி அதை விடுவிப்பார்.

இந்த நாவல்களில் மனம் லயித்துப் போனார் இளைஞரான எட்மண்ட் லொகார்ட். தடய இயலில் (Forensic Science) மனத்தைப் பறி கொடுத்த லொகார்ட் அதில் ஆழ்ந்து ஈடுபடலானார். குற்றம் புரிந்த இடத்தில் நிச்சயம் ஒரு தடயம் இருக்கும். ஒரு தலைமயிரோ, ஒரு ரத்தக் கறையோ அல்லது ஏதோ ஒரு பொருளோ நிச்சயம் இருக்கும். அதை கண்டுபிடித்து விட்டால் குற்றவாளி பிடிபட்டு விடுவான். ஆகவே ஒரு கொலை நடந்து விட்டால் அந்த இடத்தில் உள்ள அனைத்தையும் முதலில் படம் பிடிக்க வேண்டும். ஒன்றையும் உதாசீனப்படுத்தாமல் சேகரித்து ஆய்வுக்கு உட்படுத்த வேண்டும் என்றார் அவர்.

     மருத்துவ ஆய்வாளராகப் பணி புரிய முதல் உலகப் போரில் அவருக்கு நல்ல சந்தர்ப்பம் கிடைத்தது. ஒரு ராணுவ வீரரின் மரணத்திற்குக் காரணம் என்ன எனப்தை ஆராய வேண்டியது அவரது முக்கியப் பணியாக அமைந்தது. வீரரின் உடலில் உள்ள ரத்தக் கறை, அவரது ஆடை, ஆயுதம் உள்ளிட்ட அனைத்தையும் ஆய்வு செய்து மரணத்திற்கான காரணத்தை அவர் நிர்ணயிக்கலானார். இந்த அனுபவம் தந்த உத்வேகத்தால் 1910ஆம் ஆண்டு குற்றத்தை ஆய்வு செய்யும் உலகின் முதல் தடயவியல் லாபரட்டரியை லியான்ஸ் நகரில் நிறுவினார். அவருக்குப் பிடித்த் ஷெர்லாக் ஹோம்ஸைப் போலவே தர்க்கம், ஆழ்ந்த நம்பிக்கை, தீர்க்கமான சிந்தனை, அறிவியல் ஆய்வு இவற்றின் மூலமாக ஒவ்வொரு மர்மத்தையும் துலக்க ஆரம்பித்தார்.

அவர் பிள்ளையார் சுழி போட அவரது வழிமுறை இன்று உலகெங்கும் பின்பற்றப்பட்டு குற்றங்களைப் புரிந்த குற்றவாளிகளைக் கண்டுபிடிக்க உதவுகிறது; மர்மங்களை அவிழ்க்கிறது.

1912இல் அவர் விடுவித்த ஒரே ஒரு கொலை கேஸை மட்டும் இங்கு காண்போம். 

பிரான்ஸை சேர்ந்த மேரி லடெல்லி என்ற இளம் அழகி தனது பெற்றோரின் வீட்டில் இறந்து கிடந்தாள். அவளுக்கு எமிலி கோர்பின் என்ற ஒரு பாய் ஃப்ரண்ட் உண்டு. போலீஸார் அவனை விசாரிக்கும் போது கொலை நடந்த நேரத்தில் தன் நண்பர்களுடன் சீட்டு விளையாடிக் கொண்டிருந்ததாகச் சொன்னான். தான் நிரபராதி என்றான். போலீஸார் அவன் நண்பர்களை விசாரித்த போது  கொலை நடந்த அந்த நிமிடத்தில் அவன் தங்களுடன் விளையாடிக் கொண்டிருந்தது உண்மை என்று அவர்கள் சாட்சியம் கூறினர். அவர்கள் பொய் சொல்லவில்லை என்று போலீஸார் நம்பினர்.

    சவத்தைப் பார்த்த லொகார்டுக்கோ ஏதோ ஒன்று மர்மமாக இருக்கிறது என்று புலப்பட்டது. அவள் கழுத்து நெரிக்கப்பட்டு கொலை செய்யப்பட்டதாக அவர் உறுதியாக நம்பினார். ஆனால் நிரூபிக்க வேண்டுமே!

     கோர்பினை வரவழைத்து விசாரிக்கும் போது அவனது நகக் கண்களில் ஆழத் தோண்டி சில செல் மாதிரிகளை எடுத்துக் கொண்டார். அதை மைக்ரோஸ்கோப்பின் கீழே வைத்து ஆராய்ந்தார். அந்த திசுக்களில் இளஞ்சிவப்பு வண்ணத்தில் சிறு தூசித் துணுக்கு ஒன்று இருந்தது. அதை மேலும் ஆராய்ந்த லொகார்ட் அது பெண்களின் மேக்கப் சாதனங்களில்  ஒன்று என்று இனம் கண்டார். அந்தக் காலத்தில்  மேக்கப் சாதனங்கள் புழக்கத்திற்கு வந்திருந்தாலும் பெரிய அளவில் பிரபலமாகவில்லை. ஆகவே அதைச் சற்று மேலும் ஆராய ஆரம்பித்தார் லொகார்ட்.

   இளம்சிவப்பு மேக்கப் சாதனங்களை யாரெல்லாம் தயாரிக்கிறார்கள் என்று ஆராய  ஆரம்பித்த அவர் ஒரு கெமிஸ்டிடம் சென்ற போது லடெல்லிக்கு தான் அதை பிரத்யேகமாகத் தயார் செய்து தந்ததாக அவர் சொன்னார். உடனே அவர் தயாரித்த மேக்கப் பவுடரை வாங்கி கோர்பின் கையிலிருந்து எடுத்த சாம்பிளுடன் ஒப்பிட்டுப் பார்க்க அது அப்படியே அச்சு அசலாக ஒத்திருந்தது.

    கோர்பினை வரவழைத்த லொகார்ட் நீ தான் லடெல்லியைக் கொலை செய்தாய் என்று ஆதாரத்துடன் சொல்லவே அவனும் தன் குற்றத்தை ஒப்புக் கொண்டான். நண்பர்கள் சாட்சியம் என்ன ஆனது? நண்பர்கள் திகைத்தனர். ஆனால் அதையும் கோர்பினே விளக்கி விட்டான். முன்பாகவே கடிகார நேரத்தை மாற்றிப் பின்னோக்கி வைத்து விட்டதால் அவர்கள் கொலை நடந்த நேரத்தில் கோர்பின் இருந்ததாக விவரம் அறியாமல் கூறி விட்டனர்.

கேஸ் முடியவே லொகார்டின் புகழ் பரவியது. கூடவே அவர் விதியும் பிரபலமானது!

 பிரபல அமெரிக்க தொலைக்காட்சித் தொடரான சி எஸ் ஐ கிரைம் சீன் இன்வெஸ்டிகேஷனின் 16வது தொடரில் அவரது விதி சுட்டிக்காட்டப்பட்டது. இன்னும் ஏராளமான தொலைக்காட்சித் தொடர்கள் அவரது விதியைப் பயன்படுத்தும் போது அவருக்கு நன்றி தெரிவித்து வருகின்றன!

அறிவியல் அறிஞர் வாழ்வில் ..

கிரேக்க தத்துவஞானியான எம்பிடோக்ளெஸ் (Empedocles) ஒரு விஞ்ஞானியும் கூட. தர்க்கரீதியான அறிவால் எதையும் ஆராய்ந்து பார்த்ததால் அவருக்கு மக்களிடையே நல்ல செல்வாக்கு இருந்தது. கிரேக்கத்தில் சிசிலியில் இருந்த அக்ரிஜெண்டொ காலனி வாழ் மக்கள் அவருக்கு ம்குடம் கூட சூட்டி மகிழ முன் வந்தனர். ஆனால் அவர் தான் அதை வேண்டாம் என்று மறுத்து விட்டார். பெரும் பகுத்தறிவுவாதியாக இருந்த போதும் கூட நாளடைவில் தனக்கு அளப்பரிய சக்தி இருக்கிறது என்று அவர் நம்ப ஆரம்பித்து விட்டார்.

   ஒரு கட்டத்தில் தன்னை  க்டவுள் என்று நம்பிய அவர் தனது மறைவும் கூட எந்த ஒரு தடயமும் இல்லாமல் திடீரென்று மாயமாக மறைந்து போவதாய் இருக்க வேண்டும் என்று விரும்பினார்.

    ஆகவே ஒரு நாள் இரவு திடீரென்று தன் இருப்பிடத்திலிருந்து வெளியேறிய அவர் பெரும் எரிமலையான மவுண்ட் எட்னாவுக்குச் சென்றார்.  அந்த எரிமலை வாயில் இருந்த குழியில் அவர் விழுந்தார். எரிமலை அவரை விழுங்கியது. ஆனால் துரதிர்ஷ்டவசமாக அவரது காலணியில் ஒன்று வெளியே தூக்கி எறியப்பட்டது.

மறுநாள் நகர மக்களில் சிலர் இந்தக் காலணியை எட்னா மலையில் விளிம்பில் பார்த்து விட்டனர். அதை எடுத்ததில் நடந்தது என்னவென்று அனைவருக்கும் புரிந்து விட்டது.

எம்பிடோக்ளெஸ் கடவுள் போல மாயமாக மறையவில்லை என்றும் தனது கர்வத்தின் உச்சகட்டமாக எரிமலையில் விழுந்து இறந்தார் என்றும் அவர்கள் தெரிந்து கொண்டு சிரித்தனர்.

விஞ்ஞானி ஒருவரின் தவறான அகம்பாவம் அவரை மரணத்திற்குக் கொண்டு சென்று விட்டது!

************

Written by London swaminathan

Date: 27 January 2017

Time uploaded in London:- 10-30 am

Post No.3581

Pictures are taken from different sources; thanks.

contact: swami_48@yahoo.com

மன்னர்கள் கால்கள் சிவந்தது எப்படி?

தமிழ் மொழியிலும் சம்ஸ்கிருத மொழியிலும் ஏராளமான உவமைகள் ஒரே மாதிரி இருப்பதும், அவை உலகின் வேறு எந்த நாட்டு இலக்கியத்திலும் இல்லாததும் இரண்டு விஷயங்களை வெளிச்சம் போட்டுக் காட்டுகின்றன.

போக்குவரத்து, தகவல் தொடர்பு வசதிகள் இல்லாத 2000 ஆண்டுகளுக்கு முன்னரே ஒரே பண்பாடு இருந்தது முதல் விஷயம்.

ஆரிய-திராவிட வாதம் கட்டுக்கதை என்பது இரண்டாவது விஷயம். அப்படி ஆரியரோ தமிழரோ வெளிநட்டிலிருந்து வந்திருந்தால் அங்கெல்லாம் இந்த உவமைகள் இருந்திருக்க வேண்டும்.

இதுவரை நூற்றுக் கணக்கான ஒற்றுமைகளைக் காட்டிவிட்டேன். இன்று மேலும் ஒரு காட்சியினைக் காண்போம்.

ரகுவம்சம் (9-13)

இந்திரனை தேவர்கள் எவ்வாறு பயபக்தியுடன் வணங்குவரோ, அவ்வாறே நூற்றுக் கணக்கான சிற்றரசர்கள் எல்லோரும் தசரதனின் கால்களில் விழுந்து வணங்கினர். அவர்கள் தங்கள் மணி முடிகளைச் சாய்த்தபோது தசரதனின் நகங்களின் ஒளி அதிகப்படுத்தியது. அதாவது முடிகளை தசரதனின் கால்களில் படாதவாறு பயபக்தியுடன் கிரீட ஒளி மட்டும் படும் தூரத்தில் வைத்து வனங்கினர். இதனால் தசரதனின் கால் விரல்கள் ஒளிவீசின.

ரகுவம்சம் (4-88)

ரகுவின் பாதங்களில் கொடி, கலசம், குடை ஆகியன ரேகை வடிவில் இருந்தன (சாமுத்ரிகா லக்ஷணம்). அவனிடமிருந்து விடை பெற்றுச் சென்ற சிற்றரசர்கள் அவன் காலில் விழுந்து தலையால்வ ணங்கியதால், அரசர்களின் முடியிலுள்ள மாலைகளிலிருந்து மகரந்தப் பெடிகளும் தேனும் விழுந்து அவனுடைய கால் விரல்கலைச் சிவக்கச் செய்தன.

ரகுவம்சம் (17-28)

அதிதி, சிம்மாசனத்தில் அமர்ந்தான். அதன் பாத பீடம் அரசர்களினின் மணிமுடிகள் வணங்கி, வணங்கி தேய்ந்து போயிருந்தன. விதானத்துடன் கூடிய அந்த தந்தையின் சிம்மாசனத்தில் அவன் அமர்ந்தான்.

இது போல காளிதாசன், அவனுடைய விக்ரம ஊர்வசீய நாடகத்திலும் குமார சம்பவ காவியத்திலும் பல இடங்களில் சொல்லுவான்.

தமிழிலும் சம்ஸ்கிருதத்திலும்  துதிப்பாடல்களிலும் இவ்வாறு தேவியின் பாத கமலங்களில் மன்னர் முதல் எல்லோரும் வணங்கியதால் அவள் பாதம் சிவந்ததாக எழுதியுள்ளனர்.

சங்க காலத் தமிழ்ப் பாடல்களிலேயே இவ்வாறு இருக்கின்றன. சிலப்பதிகாரம் போன்ற காவியங்களிலும் உண்டு.

இதோ ஓரிரு எடுத்துக் காட்டுகள் மட்டும்:-

பட்டினப்பாலை (292-294)

மின்னொளி யெறிப்பத் தம்மொளி மழுங்கி,

விசிபிணி முழவின் வேந்தர் சூடிய

பசுமணி பொருத பரேரெறுழ்க் கழற்கால்

திருமாவளவன் பற்றி உருத்திரங்கண்ணனார் பாடுகிறார்:

திருமாவளவனின் எயில் ஒளி வீசுவதால் பகைவர் அஞ்சி வந்தனர்; அவனது காலடியில் விழுந்தனர். அவ்வாறு அவர்கள் விழுந்து வணங்குதலால் அவர்களுடைய முடிகளில் உள்ள ரத்தினங்களின் ஒளியைப் பருகிய கழலணிந்த கால்களை உடையவன்…………….

காரைக்கால் அம்மையார் அற்புதத் திருவந்தாதியில்:

விசும்பில் விதியுடைய

விண்ணோர் பணிந்து

பசும்பொன் மணிமகுடம்

தேய்ப்ப- முசிந்தெங்கும்

எந்தாய் தழும்பேறி

யேபாவம் பொல்லாவாம்

அந்தா மரைபோல் அடி— என்பார்

பொருள்:-

எம் தந்தையாகிய சிவபெருமானே! தேவர்கள் அல்லும் பகலும் உன் காலடிகளில் விழுந்து வணங்குகின்றனர். அதனால் பொன்னாலாகிய அவர்களுடைய மணிமகுடங்கள் உமது திருவடிகளில் உராய்வதனால் தழும்பேறி விட்டனவே. அழகிய செந்தாமரை நிர்றத்தில் உன் பாதங்கள் இதனால் சிவந்தனவோ—

இதை ஆதி சங்கரர் தேவியின் திருப்பாதங்களுக்குப் பயன்படுத்தி சம்ஸ்கிருதத்தில் கவி பொழிந்துள்ளார்.

இமயம் முதல் குமரி வரை ஒரே உவமைகள், ஒரே பண்பாடு!

–சுபம்–

Written by S NAGARAJAN

Date: 27 January 2017

Time uploaded in London:-  6-25 am

Post No.3580

Pictures are taken from different sources; thanks.

Contact: swami_48@yahoo.com

சங்க இலக்கிய ஆய்வு – கட்டுரை எண் 20

இந்தக் கட்டுரையில் பரிபாடல் திரட்டில் வரும் 1,3,8 ஆம்  பாடல்களில் வேதம் பற்றியும் அந்தணர் பற்றியும் வரும் குறிப்புகளைக் காணலாம்..

       பரிபாடல் திரட்டில் அந்தணரும் வேதமும் !

                        ச.நாகராஜன்

பரிபாடல் திரட்டில் முதலாம் பாடல்

 பரிபாடல் திரட்டு 13  பாடல்களைக் கொண்டுள்ள நூல். முதலாம் பாடல் திருமாலைப் பற்றியது. இருந்தையூர் அம்ர்ந்த இறைவனின் புகழ் பாடும் இந்தப் பாடலில் அந்தணர் இருக்கை பற்றிய வரிகள் வருகின்றன.  இந்தப் பாடல் தொல்காப்பியம் 121ஆம் சூத்திரத்தில் பேராசிரியர் நச்சினார்க்கினியர் உரையில் கண்டெடுக்கப்பட்டது.

ஒருசார்- அறத்தொடு வேதம் புணர் தவம் முற்றி

விறல் புகழ் நிற்ப, விளங்கிய கேள்வித்

திறத்தின் திரிவு இல்லா அந்தணர் ஈண்டி  (வரிகள் 18-20)

இதன் பொருள்:

ஒரு சார் – ஒரு பக்கத்தில்

அறத்தொடு வேதம் புணர் தவம் முற்றி – தர்மத்தொடு  வேதத்தினைப் பின்பற்றித் தவம் புரியும்

விறல் புகழ் நிற்ப, விளங்கிய கேள்வித் திறத்தின் திரிவு இல்லா அந்தணர் –புகழ் வாய்ந்த புனித நூல்களில் நன்கு புலமை பெற்றோர், நீதியின்று திறம்பாத அந்தணர்

ஈண்டி – சேர்ந்து வாழ்வோர்

என இப்படி அந்தணர் வாழ்க்கை வேதத்தின் அடிப்படையில் விளங்கும் வாழ்க்கை என்று புகழ்ந்து உரைக்கப்படுகிறது.

அடுத்து வையையில் அந்தணர் நீராட விரும்பாததை கீழ்க்கண்ட வரிகள் காரணத்துடன் தெரிவிக்கின்றன.

பார்ப்பார் நீராட மாட்டார்கள்                        ஈப்பாய அடு நறாக் கொண்டது இவ்யாறு என்ப

பார்ப்பார் ஒழிந்தார் படிவு                                               மைந்தர் மகளிர் மண விரை தூவிற்று என்று                     அந்தணர் தோயலர் ஆறு                                  வையை தேம் மேவ வழுவழுப்பு உற்றென                                   ஐயர், வாய்பூசுறார், ஆறு (வரிகள் 58-63)

இந்த ஆற்றில் ஈக்களும் மதுவும் உள்ளது. என்று அந்தணர் அந்த ஆற்றை விட்டு நீங்கினர். மைந்தர் மற்றும் மகளிர் இதில் நீராடியதால் அவர்களின் நறுமணம் இதில் கலந்துள்ளதால் இது தூய்மை அற்றது என்று கூறி அந்தணர் அதில் நீராடவில்லை. – நீரானது பூக்களின் மதுவால் வழுவழுப்பாகியுள்ளது என்று கூறி அவர்கள் தங்கள் வாயையும் நீரால் கழுவ மறுத்தனர்

அந்தணர்கள் தங்களின் தூய்மையைக் காக்கும் விதத்தை இந்தப் பாடல் தெரிவிக்கிறது.

பரிபாடல் திரட்டில் மூன்றாம் பாடல்

பரிபாடல் திரட்டு மூன்றாம் பாடல் வைகை நதியைப் பற்றியது. இதுவும் தொல்காப்பியம் 121ஆம் சூத்திரத்தில் பேராசிரியர் நச்சினார்க்கினியர் உரையில் கண்டெடுக்கப்பட்டதேயாகும்.

அறவோர் உள்ளார் அரு மறை காப்ப (முதல் வரி)

என்ற வரியில் அருமறை காப்பதைப் பற்றிக் குறிப்பிடப்படுகிறது. அறவோர் உள்ளார் என்பதால் தர்ம வழியில் நிற்பவர் அந்தணர் என்பது உரைக்கப்படுகிறது. அவர்கள் வேதத்தைக் காத்து வருபவர்கள் என்பதையும் பாடல் வரி தெரிவிக்கிறது.

பரிபாடல் திரட்டில் எட்டாம் பாடல்                               இந்தப் பாடல்  புறத்திரட்டில் நகர் என்னும் பகுதியில் வருகிறது.

நான்மாடக்கூடல் என்னும் மதுரையம்பதியின் சிறப்பை பாடல் வர்ணிக்கிறது.                                                        பூவினுள் பிறந்தோன் நாவினுள் பிறந்த                        நான்மறைக் கேள்வி நவில்குரல் எடுப்ப

ஏம இன்றுயில் எழுதல்   (வரிகள் 7,8,9)

என்னும் வரிகளில் பிரம்மாவையும் அவன் நாவில் வந்த வேதம் பற்றியும் சிறப்புறக் குறிப்பிடப்பட்டிருப்பதைக் காணலாம்.பூவினுள் பிறந்தவனான ப்ரம்மாவின் நாவினுள் பிறந்த வேதத்தின் குரல் எழுப்புதல் அல்லாது சேரனின் வஞ்சியும் சோழனின் கோழி எனப்படும் உறையூரும் கோழி கூவி எழுவது போல மதுரை மா நகரம் கோவி கூவி எழாது என்பது பாடலின் பொருள்.

அதாவது சேரனின் நகரமும் சோழனின் நகரமும் சாதாரணமாக கோழி கூவி எழும். ஆனால் பாண்டியனின் மதுரை மாநகரமோ அந்தணர் வேதத்தை ஓதும் குரல் கேட்டே எழும். புலர்காலைப் பொழுதில் அந்தணர்கள் வேதம் ஓத அந்த இனிய ஓசையிலேயே மதுரை தன் காலைப் பொழுதைத் தொடங்கும் என்று அழகுறப் புலவர் விளக்குகிறார்.

முடிவுரை

இதுகாறும் இருபது அத்தியாயங்களில் சங்க இலக்கிய நூல்களில் அந்தணரும் வேதமும் சொல்லப்படும் இடங்களின் ஆய்வுத் தொகுப்பைக் கண்டோம்.

சங்க காலத்தில் அந்தணர் பெற்றிருந்த இடத்தைத் தெளிவாக இப்பகுதிகள் சுட்டிக் காட்டுகின்றன. இந்தப் பின்புலத்தில் அந்தண்ர் என்போஈர் அறவோர் மற்றெவ்வுயிர்க்கும்  செந்தண்மை பூண்டொழுக லான் (குறள் 30)

. என்ற குறளைப் பார்த்தால் அந்தணர் என்போர் மற்ற அனைத்து உயிர்களிடமும் அருளுடன் நடக்கும் தன்மை கொண்டிருக்கும் அறவோர் என்பது பெறப்படுகிறது.

தன்னலம் பாராமல் பிறர்க்குரியாளராக அவர்கள் திகழக் காரணம் அவர்கள் ஓதும் வேதமும் அதில் கூறப்பட்டுள்ள அற வாழ்க்கையுமே காரணம் என்பதை ஓர்ந்து உணர்ந்து கொள்ளலாம்.

காழ்ப்புணர்ச்சியற்ற ஒன்று பட்ட தமிழகத்தில் வேதத்தின் இடம் சிறப்பு வாய்ந்த ஒன்று. அதை ஓதும் அந்தணர் அந்த வேதச் சிறப்பால், அதை ஓதி அதன் படி நடந்ததால் சிறப்பினைப் பெற்ற்னர். இமயம் முதல் குமரி வரை பரவியிருந்த ஒரே பண்பாடு வேதப் பண்பாடே என்பதையும் இந்தப் பாடல்கள் மிகத் தெளிவாக எடுத்துரைக்கின்றன.

பின்னாளில் ஏற்பட்ட ஏராளமான படையெடுப்புகள் – கிரேக்கப் படையெடுப்பு, முகலாயரின் படையெடுப்பு, வெள்ளையரின் பிரித்தாளும் சூழ்ச்சியுடன் கொண்ட படையெடுப்பு என பல படையெடுப்புகளும் இந்த ஒன்று  பட்ட வாழ்க்கையைக் குலைக்க ஏராளமான முயற்சிகளை எடுத்தன. என்ற போதிலும் அடிப்படைப் பண்பு குறையாமல் இன்றும் பாரதப் பண்பாடு ஒன்றெனத் திகழ்கிறது.

என்ற போதிலும் இடைவிடாது பல நூற்றாண்டு தொடர்ந்த கொடுமைக்கும் சூழ்ச்சிக்கும் பாரத சமுதாயம் சற்றே இரையாகி விட்டதை நிரூபிக்கும் வகையில் இன்றைய சில பிளவுகள் நம்மிடையே ஊடுருவி இருக்கின்றன.

அவற்றைக் களைய வேண்டியது ஒவ்வொருவரின் கடமையாகும். பண்பாடு  ஒன்றே என எடுத்துக் காட்ட இந்த வேதமும் அந்தணரும் என்ற பொருள் முதலில் எடுத்துக் கொள்ளப்பட்டது.

இனி அடுத்த பகுதியில் பழக்க வழக்கங்கள், இறை வழிபாடு, நம்பிக்கைகள் எப்படி நம் தேசத்தில் ஒன்றாகவே விளங்கின என்பதை ஆராய்வோம்.

இதுவரை இதைப் படித்தவர்களுக்கு நன்றி. இனி அடுத்த பாகத்தைத் தொடர்வோம்.

                முதல் பாகம் முற்றிற்று